ယေဟောဝါအား ချစ်မြတ်နိုးတတ်ရန် အခြားသူများကို သင်ပေးပါ

၁။ အချို့သူများကို ယေဟောဝါထံချဉ်းကပ်ရန် အဘယ်အရာက ဆွဲဆောင်သနည်း။

^၁ ယေဟောဝါအကြောင်း သင် ဦးဆုံးအကြိမ် ကြားခဲ့ရချိန်ကို မှတ်မိပါသလော။ ကိုယ်တော့်ထံချဉ်းကပ်ရန် သင့်ကို အဘယ်အရာက ဆွဲဆောင်ခဲ့သနည်း။ ဖန်ဆင်းရှင်၏ အနှိုင်းမဲ့အရည်အသွေးများ၊ အထူးသဖြင့် ကိုယ်တော်၏ကြင်နာမှုနှင့် မေတ္တာအကြောင်း သိရှိလာသောအခါ ကိုယ်တော့်ထံဆွဲဆောင်ခံခဲ့ရကြောင်း စိတ်ရိုးဖြောင့်သူများစွာက သင့်ကိုပြောပြပေလိမ့်မည်။​—၁ ယော. ၄:၈။

၂၊ ၃။ ယေဟောဝါအား ချစ်မြတ်နိုးစိတ်တိုးများလာစေရန် ကျမ်းစာသင်သားများကို ကူညီရာတွင် သမ္မာကျမ်းစာသွန်သင်ရာစာအုပ်ကို ကျွန်ုပ်တို့ မည်သို့အသုံးပြုနိုင်သနည်း။

^၂ “ဤအရှင်ကား . . . ငါတို့၏ဘုရားသခင်တည်း”– သမ္မာကျမ်းစာသွန်သင်ရာစာအုပ်သည် ယေဟောဝါ၏မေတ္တာအကြောင်း၊ ကိုယ်တော်နှင့်ရင်းနှီးသောဆက်ဆံရေးရှိရန် လိုအပ်သည့်အကြောင်း အာရုံစိုက်စေသည်။ ဘုရားသခင်ကို ချစ်မြတ်နိုးစိတ်တိုးပွားလာရန် အခြားသူများအား သွန်သင်ပေးရာတွင် ထိုစာအုပ်ကို ကျွန်ုပ်တို့မည်သို့အသုံးပြုနိုင်သနည်း။ အဓိကအချက်အသစ်ကို ဆွေးနွေးသောအခါ ကျမ်းစာသင်သားအား စဉ်းစားတွေးတောစေသော ဤမေးခွန်းများ မေးနိုင်သည်– “ဒီအမှန်တရားက ယေဟောဝါနဲ့ပတ်သက်ပြီး ဘာဖော်ပြသလဲ” သို့မဟုတ် “ယေဟောဝါဟာ လူတိုင်းအတွက် အကောင်းဆုံးဖခင်ဖြစ်တယ်ဆိုတာ ဒီအချက်က ဘယ်လိုသက်သေပြသလဲ။” ဤနည်းဖြင့်သွန်သင်ပေးခြင်းသည် သင်သားကို ယေဟောဝါနှင့်တည်မြဲသောဆက်ဆံရေးရှိစေရန် အကူအညီဖြစ်စေနိုင်သည်။

^၃ စစ်မှန်၍တစ်ဆူတည်းဖြစ်သော အသက်ရှင်သည့် ဘုရားသခင်နှင့်ဆိုင်သောအသိပညာကို ဆည်းပူးရခြင်းသည် တကယ့်အခွင့်ထူးဖြစ်ကြောင်း ကျမ်းစာသင်သားများသဘောပေါက်လာရန် ကျွန်ုပ်တို့ကူညီပေးသောအခါ သူတို့သည် ဟေရှာယကျမ်းပါ စကားများအတိုင်း “ဤအရှင်ကား . . . ငါတို့၏ဘုရားသခင်တည်း” ဟူ၍အသိအမှတ်ပြုလာကြပေမည်။ (ဟေရှာ. ၂၅:၉) ဘုရားသခင့်နှုတ်မြွက်တော်ကို သင်သားအား ရှင်းပြသောအခါ ခရစ်တော်ယေရှုအုပ်ချုပ်မည့် အစိုးရမှတစ်ဆင့် ယေဟောဝါ၏ရည်ရွယ်တော်မူချက်များ ပြည့်စုံလာစဉ် လူတို့ မည်သို့ကောင်းချီးခံစားရမည်အကြောင်း အလေးပေးဖော်ပြရန် လိုအပ်သည်။​—ဟေရှာ. ၉:၆၊ ၇။

၄၊ ၅။ ယေဟောဝါကို ချစ်မြတ်နိုးခြင်းဟူသည် အဘယ်နည်း။

^၄ ယေဟောဝါကို ချစ်မြတ်နိုးကြောင်း သက်သေ– ယေဟောဝါကို စိတ်နှလုံးအကြွင်းမဲ့၊ ဉာဏ်ရှိသမျှဖြင့် တစ်သက်တာလုံးချစ်ခြင်းတွင် ပြင်းပြသောခံစားချက်ရှိရုံထက်မက ပါဝင်ကြောင်း ကျွန်ုပ်တို့သိကြသည်။ ကျွန်ုပ်တို့သည် ကိုယ်တော်၏စဉ်းစားတွေးခေါ်ပုံကို ရယူပြီး ယင်းနှင့်အညီ အသက်ရှင်ရမည်။ (ဆာ. ၉၇:၁၀) ကိုယ်တော်၏ပညတ်အားလုံးကို နာခံခြင်းနှင့် အခက်အခဲများ၊ အတိုက်အခံများကြုံတွေ့ရလျှင်ပင် ဆက်၍ “သန့်ရှင်းသောအကျင့်ကိုကျင့်ခြင်း၊ ဘုရားဝတ်၌မွေ့လျော်ခြင်း” ဖြင့် ဘုရားသခင်ကိုချစ်ကြောင်း ဖော်ပြကြသည်။​—၂ ပေ. ၃:၁၂; ၂ ယော. ၆။

^၅ ဘုရားသခင်ကိုချစ်မြတ်နိုးသောကြောင့် ကိုယ်တော့်အလိုတော်ဆောင်ခြင်းသည် အလွန်နှစ်သက်ဖွယ်ဖြစ်သည်။ (ဆာ. ၄၀:၈) ဘုရားသခင့်ပညတ်အားလုံးသည် မိမိကျေးကျွန်များ၏ ထာဝရကောင်းကျိုးအတွက် ကိုယ်တော်ပြဋ္ဌာန်းထားခြင်းဖြစ်ကြောင်း ကျမ်းစာသင်သား နားလည်လာရမည်။ (တရား. ၁၀:၁၂၊ ၁၃) လူတစ်ဦးသည် ယေဟောဝါ၏လမ်းညွှန်မှုနှင့်အညီ အသက်ရှင်ခြင်းဖြင့် ကိုယ်တော်၏အံ့ချီးဖွယ်လုပ်ရပ်အားလုံးကို နက်ရှိုင်းစွာလေးမြတ်ကြောင်း ဖော်ပြရာရောက်သည်။ ယေဟောဝါ၏ ဖြောင့်မတ်သောလမ်းစဉ်များအတိုင်း လျှောက်လှမ်းခြင်းသည် ပြဿနာများ၊ စိတ်နာကျင်မှုများမှ ကင်းဝေးစေကြောင်း သင်သားသဘောပေါက်လာစေရန် ကူညီပေးပါ။

၆။ ယေဟောဝါကို ချစ်မြတ်နိုးသည့်အတွက် မည်သည့်ကောင်းချီးများ ခံစားရနိုင်သနည်း။

^၆ ဘုရားသခင်ကို ချစ်မြတ်နိုးသူများအတွက် ကောင်းချီး– ယေဟောဝါသည် မိမိကိုချစ်သော စိတ်နှိမ့်ချသူများကို အလွန်ဂရုစိုက်တော်မူပြီး “ဘုရားသခင်၏နက်နဲသောအရာ” တို့ကို သူတို့အား ဖော်ပြတော်မူသည်။ (၁ ကော. ၂:​၉၊ ၁၀) သူတို့သည် ယေဟောဝါ၏ရည်ရွယ်တော်မူချက်ဆိုင်ရာ အသိပညာကြောင့် အနာဂတ်ကို ရှင်းလင်းစွာသိမြင်ပြီး သေချာသောမျှော်လင့်ချက်ရရှိကြသည်။ (ယေ. ၂၉:၁၁) ယေဟောဝါကို ချစ်မြတ်နိုးသူများသည် ကိုယ်တော်၏ထူးကဲသောကရုဏာကို ခံစားကြရသည်။ (ထွ. ၂၀:၆) ထို့ပြင် သူတို့သည် ဘုရားသခင်၏ကြီးမားလှသောမေတ္တာကြောင့် ထာဝရအသက်မျှော်လင့်ချက် ရရှိကြသည်။​—ယော. ၃:၁၆။

၇။ ယေဟောဝါကို ချစ်မြတ်နိုးတတ်ရန် အခြားသူများအား သွန်သင်ပေးရခြင်းကို သင် မည်သို့သဘောထားသနည်း။

^၇ ကျွန်ုပ်တို့သည် ကောင်းကင်ခမည်းတော်အကြောင်း ပို၍သိကျွမ်းလာလေ အခြားသူများကို ဝေမျှစရာ ပိုများလာလေဖြစ်သည်။ (မ. ၁၃:၅၂) အခြားသူများ၊ အထူးသဖြင့် ကျွန်ုပ်တို့၏သားသမီးများကို ယေဟောဝါအား ချစ်မြတ်နိုးတတ်ရန် သင်ပေးရခြင်းသည် မဟာအခွင့်ထူးကြီးဖြစ်သည်။ (တရား. ၆:​၅-၇) ကျွန်ုပ်တို့သည် ယေဟောဝါ၏ “အလွန်ကောင်းမြတ်တော်မူခြင်း” ကို တွေ့ကြုံခံစားရသောကြောင့် ကျမ်းစာသင်သားများနှင့်အတူ ကိုယ်တော်အား ချီးမွမ်းစကား မပြတ်မြွက်ဆိုနိုင်ကြပါစေ။​—ဆာ. ၁၄၅:၇။