ဘယ်အရွယ်ရောက်မှ အိမ်ထောင်ပြုဖို့စဉ်းစားသင့်သလဲ (၁၉၈၆ ကင်းမျှော်စင်၊ နိုဝင်ဘာ ၁ စာမျက်နှာ ၁၈၊ ၁၉ ကိုအခြေခံထားသည်)

၁။ (က) အသက်ဘယ်လောက်ရှိမှ အိမ်ထောင်ပြုဖို့စဉ်းစားရမယ်ဆိုတဲ့ စည်းမျဉ်းရှိပါသလား။ (ခ) အိမ်ထောင်ပြုဖို့ စဉ်းစားနေသူတွေကို ဂလာတိ ၅:၂၂၊ ၂၃ က ဘယ်လိုအထောက်အကူပြုနိုင်သလဲ။

^၁ ဘယ်အရွယ်ရောက်မှ အိမ်ထောင်ပြုဖို့စဉ်းစားသင့်သလဲ။ ဒီကိစ္စမှာ စည်းမျဉ်းသတ်မှတ်တာ ပညာရှိရာကျမှာမဟုတ်ဘူး။ ဒါပေမဲ့ ကျမ်းစာက အိမ်ထောင်သည်ဘဝတက်လှမ်းသူတို့မှာ ရှိအပ်တဲ့ရင့်ကျက်မှုနဲ့ပတ်သက်ပြီး အကြံဉာဏ်ကောင်း ပေးထားတယ်။ ဂလာတိ ၅:၂၂၊ ၂၃ ကိုကျေးဇူးပြု၍ ဖတ်ကြည့်ပါ၊ ဘုရားသခင့်စွမ်းအားတော်ကြောင့်ဖြစ်ပေါ်လာတဲ့ အရည်အသွေးများကို သင်တွေ့ရပါလိမ့်မယ်။ အဲဒီအရည်အသွေးတွေဟာ ခရစ်ယာန်တစ်ဦးအနေနဲ့ အိမ်ထောင်မပြုမီကြာမြင့်စွာကတည်းက နေ့စဉ်အသက်တာမှာတင်ပြရမယ့် အရည်အသွေးတွေဖြစ်ပါတယ်။

၂။ အိမ်ထောင်မပြုမီ နှစ်အတန်ကြာ ဘဝအတွေ့အကြုံရှိထားတဲ့ အမျိုးသား ဒါမှမဟုတ် အမျိုးသမီးဖြစ်မယ်ဆိုရင် ဘာအခွင့်အရေး တပန်းသာသလဲ။

^၂ အဲဒီအရည်အချင်းတွေ ပြည့်ဝစုံလင်စွာတင်ပြနိုင်တဲ့သူတစ်ဦးမှမရှိတာ မှန်ပါတယ်။ ဒါပေမဲ့ နှစ်အတော်ကြာ ဘဝအတွေ့အကြုံရှိထားတဲ့ အမျိုးသား ဒါမှမဟုတ် အမျိုးသမီးက အဲဒီအရည်အသွေးတွေကိုပြုစုပျိုးထောင်ဖို့ အခွင့်အလမ်းပိုများတယ်၊ ဒါ့ကြောင့် အောင်မြင်တဲ့အိမ်ထောင်တစ်ခုတည်ဆောက်ဖို့ ပိုကောင်းတဲ့အနေအထားမှာရှိတယ်။ သူတို့ဟာ ဘုရားသခင့်စွမ်းအားတော်ကြောင့်ဖြစ်ပေါ်တဲ့အရည်အသွေးတွေကို အိမ်ထောင်ပြုပြီးနောက်မှတင်ပြသူတစ်ဦးထက် ပိုပြီးအသင့်ရှိသူတွေဖြစ်တယ်။—၂ ပေတရု ၁:၅-၈ နှင့်နှိုင်းယှဉ်ပါ။

၃။ အချိန်ကြာလာတာနဲ့အမျှ လူတစ်ဦးရဲ့စဉ်းစားပုံနဲ့ ကိုယ်ရည်ကိုယ်သွေး ဘယ်လိုပြောင်းလဲသွားနိုင်သလဲ။

^၃ ကိုယ်ကြိုက်တဲ့အရာ၊ မကြိုက်တဲ့အရာတွေနဲ့ပတ်သက်ပြီး ကိုယ့်ကိုယ်ကိုယ်ရိုးသားစွာဆန်းစစ်ကြည့်ပါ။ အချိန်ကာလကုန်လွန်တာနဲ့အမျှ ဘဝအသိအမြင်တိုးလာတယ် မဟုတ်လား။ ငါးနှစ်အရွယ်က တန်ဖိုးထားရာတွေနဲ့ ၁၃ နှစ်အရွယ်က တန်ဖိုးထားရာတွေ တူသလား၊ ဒါမှမဟုတ် ၁၃ နှစ်အရွယ်နဲ့ အသက် ၂၀ အရွယ်က တန်ဖိုးထားရာတွေကော၊ အတူတူပဲလား။ နှစ်တွေတစ်လျှောက် အတွေ့အကြုံပိုရလာတာနဲ့အမျှ ဘဝအသိအမြင်နဲ့နားလည်မှု တိုးများလာသလား ဒါမှမဟုတ် လျော့နည်းသွားသလား။ ကလေးဘဝက ကြိုက်နှစ်သက်တဲ့ လူတစ်ဦးရဲ့အရည်အသွေးကိုပဲ အရွယ်ရောက်ပြီဖြစ်တဲ့ အခုချိန်မှာ သင် မျှော်လင့်နေဆဲလား။

၄။ လူငယ်တစ်ဦးဟာ လက်ထပ်ဖို့မစဉ်းစားခင် ရင့်ကျက်တဲ့အထိ ဘာကြောင့်စောင့်ဆိုင်းသင့်ပါသလဲ။ (‘အပွင့်လန်းဆုံးအချိန် ကျော်လွန်ပါ’ လေးထောင့်ကွက်ကို ဆွေးနွေးပါ)

^၄ ၁၆၊ ၁၇ နှစ်အရွယ်မိန်းကလေးအတွက် “တစ်ဦးတည်းသော” ဆိုတဲ့ယောက်ျားလေးကို ဒီမိန်းကလေးကြီးပြင်းလာတဲ့အခါ မေ့ပျောက်သွားတတ်တယ်မဟုတ်လား။ အခု ရင့်ကျက်တဲ့အမျိုးသမီးတစ်ဦးအနေနဲ့ အမျိုးသားတစ်ဦးရဲ့ ဘုရားရေးရာအရည်အချင်းတွေနဲ့ ကိုယ်ရည်ကိုယ်သွေးကို ပိုပြီးအရေးကြီးတယ်လို့ ရှုမြင်လာတယ်။ အသက် ၂၂၊ ၂၃ နှစ်အရွယ်ရောက်တဲ့အခါ အမျိုးသားတစ်ဦးရဲ့ရုပ်ရည်သွင်ပြင်ထက် စိတ်ဓာတ်ရင့်ကျက်မှုနဲ့ ဘုရားနဲ့သူ့ဆက်ဆံရေးက ပိုအရေးကြီးတယ်လို့ ရှုမြင်လာဖွယ်ရှိတယ်။ အရွယ်ရောက်လာတဲ့ယောက်ျားလေးတစ်ဦးအတွက်လည်း အလားတူပါပဲ။ သူရင့်ကျက်လာတာနဲ့အမျှ ဇနီးတစ်ဦးနဲ့ပတ်သက်တဲ့ သူ့မျှော်လင့်ချက်တွေဟာ ပြောင်းလဲသွားတယ်။ အသက်ကြီးလာပြီး အရေးကြီးတယ်လို့ သူရှုမြင်ရာတွေ ပြောင်းလဲလာတာနဲ့အမျှ နားလည်ပေးပြီး ကြင်နာတတ်တဲ့ အိမ်ထောင်ဖက်ကို ရှာပါလိမ့်မယ်။ အိမ်တွင်းမှုနိုင်နင်းပြီး မိခင်စိတ်ရှိသူ၊ နှလုံးထဲကနေ ဖန်ဆင်းရှင်ယေဟောဝါရဲ့စိတ်တော်နဲ့တွေ့ဖို့ ဦးစားပေးပြီး ကိုယ်တော့်အလိုတော်ဆောင်ချင်စိတ်ပြင်းပြသူကို ရှာပါလိမ့်မယ်။—သု. ၃၁:၁၀၊ ၂၆၊ ၂၇။

၅။ မိဘတွေအနေနဲ့ ကိုယ့်ကလေးတွေ အိမ်ထောင်ပြုမယ်ဆိုရင် အဆင်သင့်ရှိနိုင်အောင် ဘာကူညီပေးနိုင်သလဲ။

^၅ အဓိကအချက်က အရေးကြီးရာတွေ၊ အိမ်ထောင်ဖက်မှာရှိဖို့လိုတဲ့အရာတွေအပေါ် လူတစ်ဦးရဲ့အမြင်ကို အချိန်က ပြောင်းလဲစေတယ်ဆိုတဲ့အချက်ပါပဲ။ ဒါ့ကြောင့် ငယ်ငယ်ရွယ်ရွယ်နဲ့အလျင်စလို အိမ်ထောင်ပြုရင် အန္တရာယ်များစွာကြုံရနိုင်တယ်။ အလွန်ငယ်ရွယ်တဲ့သူနှစ်ဦးအတွက် လက်မထပ်မီ အချိန်အတန်ကြာစောင့်ဆိုင်းဖို့ အမြဲမလွယ်ကူပါ။ မိဘဖြစ်သူတို့အနေနဲ့ အထူးသဖြင့် သားသမီးတွေငယ်ရွယ်စဉ်ကတည်းက ဘဝအကြောင်း လေးလေးနက်နက်စဉ်းစားဖို့၊ အိမ်ထောင်ပြုမယ်ဆိုရင် ဘုရားရေးရာနဲ့ စိတ်ဓာတ်ရေးရာမှာ ပြင်ဆင်ထားဖို့လိုကြောင်း အားပေးနိုင်တယ်။

[စာမျက်နှာ ၆ ပါလေးထောင့်ကွက်]

‘အပွင့်လန်းဆုံးအချိန် ကျော်လွန်ပါ’

‘အပွင့်လန်းဆုံးအချိန် ကျော်လွန်’ တဲ့အထိစောင့်ဆိုင်းပြီးမှ အိမ်ထောင်ပြုဖို့အတွက်စဉ်းစားဖို့ လူငယ်တွေကို ကျမ်းစာက အကြံပေးထားတယ်။ (၁ ကော. ၇:၃၆) အပွင့်လန်းဆုံးအချိန်မှာ လိင်စိတ်ပြင်းပြလွန်းပြီး ချင့်ချိန်နိုင်စွမ်း လွဲမှားတတ်တယ်။

အသက် ၂၂ နှစ်အရွယ်မှာ အိမ်ထောင်ပြုခဲ့သူနစ်ကီက “ငယ်ငယ်ရွယ်ရွယ်နဲ့အိမ်ထောင်ပြုတာ သိပ်အန္တရာယ်များတယ်” လို့ပြောတယ်။ “ဆယ်ကျော်သက်နှောင်းပိုင်းအရွယ်ကနေ ၂၅-၃၀ အထိ သင့်ရဲ့ခံစားချက်တွေ၊ ပန်းတိုင်နဲ့အကြိုက်တွေက ဆက်ပြောင်းလဲနေမှာပဲ” လို့ သူသတိပေးတယ်။

အိမ်ထောင်ပြုဖို့အဆင်သင့်ရှိမရှိကို အသက်အရွယ်တစ်ခုတည်းနဲ့ တိုင်းတာလို့မရတာ မှန်ပါတယ်။ ဒါပေမဲ့ လိင်စိတ်ဖြစ်ပေါ်ခါစနဲ့ အရမ်းပြင်းပြနေတဲ့ နုပျိုတဲ့အရွယ်မလွန်မီ အိမ်ထောင်ပြုမယ်ဆိုရင် ချင့်ချိန်နိုင်စွမ်းကို လွဲမှားစေနိုင်ပြီး နောက်ပိုင်းမှာဖြစ်ပေါ်လာနိုင်တဲ့ပြဿနာတွေကို မမြင်နိုင်အောင် ဖြစ်စေတယ်။