သင့်ကလေးတွေကို ဓမ္မအမှုဆောင်များဖြစ်အောင် လေ့ကျင့်ပေးပါ

၁။ ဆာလံ ၁၄၈:၁၂၊ ၁၃ က ခရစ်ယာန်မိဘတွေကို ဘာလုပ်ဖို့ တိုက်တွန်းထားသလဲ။

^၁ ယေဟောဝါက မိမိကိုချီးမွမ်းဖို့ လူငယ်တွေကို ဖိတ်ခေါ်တယ်။ (ဆာ. ၁၄၈:၁၂၊ ၁၃) ဒါကြောင့် ခရစ်ယာန်မိဘတွေက ကလေးတွေကို ကျမ်းစာအမှန်တရား၊ ကိုယ်ကျင့်တရားနဲ့ဆိုင်တဲ့ ဘုရားသခင့်ပညတ်တွေကို သင်ပေးရုံသာမကဘဲ သတင်းကောင်းရဲ့ဓမ္မအမှုဆောင်တွေဖြစ်အောင်လည်း လေ့ကျင့်ပေးကြတယ်။ ဘယ်လို အဆင့်ဆင့် လေ့ကျင့်ပေးနိုင်သလဲ။

၂။ မိဘရဲ့ပုံသက်သေကောင်းက ကလေးတွေအပေါ် ဘယ်လိုအကျိုးသက်ရောက်နိုင်သလဲ။

^၂ ပုံသက်သေကောင်းပြပါ– တရားသူကြီးဂိဒေါင်က သူ့လူ ၃၀၀ ကို “ငါ့ကိုကြည့်၍ ငါပြုသည့်အတိုင်းပြုကြ” လို့ပြောခဲ့တယ်။ (သူကြီး. ၇:၁၇) ကလေးတွေက ပင်ကိုသဘာဝအရ မိဘတွေကိုကြည့်ပြီး အတုယူတတ်ကြတယ်။ ညဆိုင်းအလုပ်ဆင်းရတဲ့ ဖခင်တစ်ဦးက စနေနေ့မနက်မှာ ပင်ပန်းနေပေမဲ့ မအိပ်ဘဲ ကလေးတွေကိုခေါ်ပြီး အမှုဆောင်ထွက်တယ်။ ဒါက စကားတစ်ခွန်းမှမပြောဘဲ ဓမ္မအမှုကို ဦးစားပေးရမယ်ဆိုတဲ့အကြောင်း ကလေးတွေကို သင်ပေးနေခြင်းဖြစ်တယ်။ (မ. ၆:၃၃) ဆုတောင်းခြင်း၊ ကျမ်းစာဖတ်ရှုခြင်း၊ မှတ်ချက်များပေးခြင်း၊ ဟောပြောခြင်းစတဲ့ ဝတ်ပြုရေးပုံစံအမျိုးမျိုးမှာ သင်ရွှင်လန်းစွာ ပါဝင်နေတာကို သင့်ကလေးတွေ မြင်တွေ့ရသလား။ သင်က စုံလင်တဲ့ပုံသက်သေမဖြစ်နိုင်ဘူးဆိုတာတော့ မှန်ပါတယ်။ ဒါပေမဲ့ ကိုယ်တော့်ကိုဝတ်ပြုခြင်းမှာ သင် ဝီရိယရှိရှိ ပါဝင်နေတာကို သူတို့မြင်တွေ့ရတဲ့အခါ ယေဟောဝါကို ဝတ်ပြုကိုးကွယ်ဖို့ သင် ကြိုးစားသင်ပေးတာကို ကောင်းစွာတုံ့ပြန်ပါလိမ့်မယ်။—တရား. ၆:၆၊ ၇; ရော. ၂:၂၁၊ ၂၂။

၃။ မိဘတွေက ကလေးတွေကို ဘယ် ဘုရားရေးရာပန်းတိုင်တွေ အဆင့်ဆင့်ချမှတ်ပေးပြီး ရောက်ရှိအောင် ကူညီပေးသင့်သလဲ။

^၃ ပန်းတိုင်အဆင့်ဆင့် ချမှတ်ပေးပါ– မိဘတွေက ကလေးတွေကို လမ်းလျှောက်တတ်ဖို့၊ စကားပြောတတ်ဖို့၊ ကိုယ့်ဘာသာကိုယ် အင်္ကျီဝတ်တတ်ဖို့ စတာတွေကို မမောနိုင်မပန်းနိုင် သင်ပေးကြတယ်။ တဖြည်းဖြည်းကြီးလာပြီး အဲဒါတွေကို လုပ်တတ်လာတဲ့အခါ ပန်းတိုင်အသစ်တွေ ချမှတ်ပေးပြီး သင်ပေးကြတယ်။ မိဘတွေက ခရစ်ယာန်ဖြစ်မယ်ဆိုရင် ကလေးတွေရဲ့ အသက်အရွယ်၊ အစွမ်းအစအလိုက် ဘုရားရေးရာပန်းတိုင်တွေကို ချမှတ်ပေးပြီး ပန်းတိုင်ရောက်ရှိဖို့ ကူညီပေးကြတယ်။ (၁ ကော. ၉:၂၆) ကိုယ်ပိုင်စကားနဲ့မှတ်ချက်ပေးဖို့၊ သီအိုကရက်တစ်ကျောင်းမှာ တာဝန်ရတဲ့အခါ ကိုယ်တိုင်ပြင်ဆင်တတ်ဖို့ သင်ပေးနေသလား။ (ဆာ. ၃၅:၁၈) ဓမ္မအမှုရဲ့ အသွင်အမျိုးမျိုးမှာ ပါဝင်နိုင်ဖို့ သူတို့ကို လေ့ကျင့်ပေးနေသလား။ နှစ်ခြင်းခံဖို့နဲ့ အချိန်ပြည့်ဓမ္မအမှုမှာပါဝင်ဖို့ ပန်းတိုင်တွေ ချမှတ်ပေးသလား။ သူတို့ကိုအားပေးနိုင်တဲ့ ပျော်ရွှင်ပြီး စိတ်အားထက်သန်တဲ့ သတင်းကောင်းဟောပြောသူတွေနဲ့ ပေါင်းသင်းဖို့ သူတို့ကို ကူညီပေးသလား။—သု. ၁၃:၂၀။

၄။ ဓမ္မအမှုမှာ ကလေးတွေကို ငယ်စဉ်ကတည်းကစပြီး လေ့ကျင့်ပေးတဲ့မိဘတွေရှိခြင်းကနေ သားသမီးတွေ ဘယ်လိုအကျိုးခံစားရသလဲ။

^၄ ဆာလံဆရာ ဒီလိုပြောခဲ့တယ်– “အိုဘုရားသခင် ကိုယ်တော်သည် အကျွန်ုပ်ကိုငယ်သောအရွယ်မှစ၍ သွန်သင်တော်မူပါပြီ။ ယခုတိုင်အောင် အံ့ဖွယ်သောအမှုတော်တို့ကို အကျွန်ုပ်ပြပါပြီ။” (ဆာ. ၇၁:၁၇) ဓမ္မအမှုဆောင်တွေဖြစ်လာဖို့ ကလေးတွေကို ငယ်စဉ်ကတည်းကစပြီး လေ့ကျင့်ပေးပါ။ ဒီလိုလေ့ကျင့်ပေးခြင်းက လူကြီးဘဝမှာလည်း သူတို့ကို အကျိုးပြုမှာသေချာပါတယ်။—သု. ၂၂:၆။