မေတ္တာစစ် မေတ္တာမှန်ကိုရှာတွေ့ရန် ခက်ခဲရသည့်အကြောင်းရင်း

ထောင့်ငါးရာအချစ်နှင့်ပတ်သက်သော အကြံပေးချက်များ ပြတ်လပ်သည်ဟူ၍မရှိပါ။ ကုထုံးပညာရှင်များနှင့် အကြံပေးပုဂ္ဂိုလ်များက လမ်းညွှန်ပေးတတ်ကြသည်။ ရုပ်မြင်သံကြားမေးမြန်းခန်းများတွင်လည်း ထိုအကြောင်းကို သုံးသပ်တင်ပြလေ့ရှိသည်။

အင်တာနက်ဝက်ဘ်ဆိုက် အမြောက်အမြားက အချစ်ကို မည်သို့ရှာတွေ့နိုင်ကြောင်း လမ်းညွှန်ပေးသည်ဟုဆို၏။ သင်သည် “အလွန်စိတ်ဝင်စားဖွယ်ကောင်းပြီး စိတ်ကူး၍မရနိုင်သောလျှို့ဝှက်ချက်များ” ကို ရှာဖွေတွေ့ရှိပြီး စိတ်ကုထုံးပညာရှင်များ၊ စိတ်ပညာရှင်များနှင့် နက္ခတ်ဗေဒင်ဆရာများအပြင် “အောင်သွယ်တော်များ” နှင့် “အချစ်သုတေသီများ” ထံမှ သင်ယူရလိမ့်မည်ဟု ဆိုပေမည်။

အချစ်အကြောင်းပါသောစာအုပ်နှင့် မဂ္ဂဇင်းများမှာ ရောင်းအားကောင်းလှပြီး အချို့က ယုတ္တိမရှိသောကတိများ ပေးတတ်ကြသည်။ ဥပမာ၊ စာအုပ်တစ်အုပ်က “တစ်စုံတစ်ယောက်၏အချစ်ကိုရအောင် လုပ်နိုင်ပုံ” ကိုဖော်ပြမည်ဟုဆို၏။ နောက်တစ်အုပ်က “တစ်လအတွင်း အဖော်မွန်” တွေ့နိုင်ပုံကို ပြောပြမည်ဟုဆို၏။ တစ်လကို ကြာလွန်းသည်ဟု ယူဆသူများအတွက်မူ “မိနစ် ၉၀ အတွင်း” သင့်အား ထာဝရချစ်အောင် ပြုလုပ်နိုင်ပုံကို ဖော်ပြသည့်စာအုပ်ရှိသေးသည်။

ငွေကြေးကော စိတ်ပိုင်းအရပါ ပေးဆပ်ရသည့် အကြံပေးချက် များပါသည်။ လူတို့သည် ငွေပေးပြီး အကြံဉာဏ်ရယူကြသည်။ ထို့နောက် ဖြစ်လေ့ရှိသည်မှာ မျှော်လင့်ထားသည့်အတိုင်း ထိုအကြံပေးချက်မအောင်မြင်သောအခါ စိတ်မောလူမောဖြစ်ကြရသည်။

သို့သော် လက်တွေ့ကျင့်သုံးပါက မုချအောင်မြင်သည့် အကြံပေးစာအုပ်တစ်အုပ်ရှိပါသေးသည်။ ရမ်းဆချက်များနှင့် လက်တွေ့မကျသော ကတိများပေးမည်အစား ထိုအကြောင်းကို အမှန်အတိုင်း ဆွေးနွေးသုံးသပ်ထားသည်။ သက်တမ်းကြာပြီဖြစ်သော်လည်း ယင်း၏အကြံပေးချက်များသည် တစ်ခါမျှ ခေတ်နောက်ကျသွားခြင်းမရှိပါ။ ယင်း၏အာဘော်ရှင်မှာ ပြိုင်ဘက်ကင်းသော ဉာဏ်ပညာရှင်နှင့် မေတ္တာရှင်ဖြစ်တော်မူ၏။ သမ္မာကျမ်းစာတည်းဟူသော ထိုလက်ဆောင်မွန်တစ်အုပ် သင်၌ ရှိထားနှင့်ပြီးဖြစ်နိုင်သည်။ ကျွန်ုပ်တို့၏အခြေအနေနှင့် နောက်ခံမည်သို့ပင်ရှိပါစေ ချစ်ခြင်းမေတ္တာနှင့်ပတ်သက်၍ ကျွန်ုပ်တို့သိသင့်သိအပ်ရာများကို သမ္မာကျမ်းစာက အခမဲ့နည်းပြသင်ကြားပေးသည်။

သမ္မာကျမ်းစာသည် ကျွန်ုပ်တို့ကို လူတိုင်းနှင့်ဆက်ဆံရေးကောင်း ရှိစေနိုင်သလော။ မဖြစ်နိုင်ပါ။ ကျွန်ုပ်တို့မည်မျှကြိုးပမ်းပါစေ အချို့သူတို့သည် ကျွန်ုပ်တို့နှင့် ခင်မင်ရင်းနှီးလာမည်မဟုတ်ပါ။ ထို့ပြင် မေတ္တာစစ်မေတ္တာမှန်ကို အတင်းအကျပ်လုပ်ယူ၍မရနိုင်ပါ။ (ရှောလမုန်သီချင်း ၈:၄၊ သမ္မာ) သို့သော် ကျမ်းစာလမ်းညွှန်ချက်ကို လက်တွေ့ကျင့်သုံးခြင်းဖြင့် အချိန်နှင့် ခွန်အားစိုက်ထုတ်မှုလိုမည်ဖြစ်သော်လည်း မေတ္တာပါသော ပေါင်းသင်းဆက်ဆံမှုများကို ပြုစုပျိုးထောင်ရန် အခွင့်အလမ်းများ တိုးများလာပါလိမ့်မည်။ ထိုမေတ္တာမျိုးကို နောက်ဆောင်းပါး၌ သုံးသပ်ပါမည်၊ သို့သော် ယခုခေတ်တွင် ချစ်ခြင်းမေတ္တာကိုရှာတွေ့ရန် အဘယ်ကြောင့် ပို၍ခက်ခဲလာကြောင်း ဦးစွာသုံးသပ်ကြည့်ကြစို့။

ချစ်ခြင်းမေတ္တာ “ခေါင်းပါးလိမ့်မည်”

ယေရှုသည် ‘ဤစနစ်ဆုံးခန်း’ ဆိုင်ရာ မဟာပရောဖက်ပြုချက်တွင် ကျွန်ုပ်တို့ခေတ်ရေစီးကြောင်း အခြေအနေများကို အတိအကျကြိုဟောခဲ့သည်။ ဤလောကသည် ချစ်ခြင်းမေတ္တာနှင့် လုံးဝဆန့်ကျင်ဘက်ဖြစ်သော မတရားမှုနှင့် စစ်မက်များဖြင့် သိသာထင်ရှားမည်ဟု မိန့်တော်မူ၏။ “အများသောသူတို့သည် . . . အချင်းချင်းတစ်ယောက်ကိုတစ်ယောက် အပ်ကြလိမ့်မည်။ အချင်းချင်း မုန်းကြလိမ့်မည်။” ထို့ပြင် “အများသောသူတို့၏ ချစ်ခြင်းမေတ္တာသည် ခေါင်းပါးလိမ့်မည်” ဟူ၍လည်း ကိုယ်တော်မိန့်တော်မူခဲ့သည်။ (မဿဲ ၂၄:၃-၁၂) ဤလောကသည် အေးစက်စက်နိုင်လာပြီး မိသားစု၌ပင် မေတ္တာစစ်ခေါင်းပါးလာသည်ကို သင်သဘောတူသည်မဟုတ်လော။

ယေရှုအပြင် တမန်တော်ပေါလုကလည်း ‘နောက်ဆုံးကာလ’ ၏လူမှုရေးအခြေအနေကို အသေးစိတ်ဖော်ပြခဲ့သည်။ လူတို့သည် “ကိုယ်ကိုကိုယ်ချစ်သောသူ၊ ငွေကိုတပ်မက်သောသူ၊ ဝါကြွားသောသူ၊ ထောင်လွှားစော်ကားသောသူ၊ သူ့အသရေကိုရှုတ်ချသောသူ၊ မိဘစကားကိုနားမထောင်သောသူ၊ ကျေးဇူးမရှိသောသူ၊ သန့်ရှင်းခြင်းမရှိသောသူ၊ ပကတိကြင်နာစုံမက်ခြင်းနှင့်ကင်းသောသူ၊ ရန်ငြိုးဖွဲ့သောသူ၊ ချောစားတတ်သောသူ၊ ကိုယ်ဣန္ဒြေကိုမချုပ်တည်းနိုင်သောသူ၊ ပြင်းထန်သောသူ၊ သူတော်ကောင်းကိုမုန်းသောသူ၊ သစ္စာကိုဖျက်တတ်သောသူ၊ သတိပေးခြင်းကိုမခံသောသူ၊ မာန်မာနနှင့်ယစ်မူးသောသူ၊ ဘုရားသခင်ကိုနှစ်သက်သည်ထက် ကာမဂုဏ်ခံစားခြင်းကိုသာ၍နှစ်သက်သောသူ” များဖြစ်ကြလိမ့်မည်ဟု သူရေးသားခဲ့သည်။ (၂ တိမောသေ ၃:၁-၄) အဆိုပါစရိုက်များသည် နိုင်ငံများစွာတွင် လုံးဝအဆန်းမဟုတ်တော့ချေ။

စဉ်းစားကြည့်ပါ။ မာနထောင်လွှားသူ၊ ကျေးဇူးမသိတတ်သူ၊ သစ္စာမဲ့သူ၊ သင့်အကြောင်း သားပုပ်လေလွင့်ပြောသူကို သင်ခင်မင်လိုမည်လော။ ကိုယ့်ကိုယ်ကိုချစ်သူ၊ ငွေ သို့မဟုတ် အပျော်အပါးကို တပ်မက်သူများနှင့် သင်ရင်းနှီးလိုသလော။ အတ္တသမားများသည် အလိုကြီးမှု၊ မိမိစိတ်ကြိုက်ပြုမူလိုမှုများ လွှမ်းမိုးနေသောကြောင့် သူတစ်ပါးကို စိတ်ဝင်စားမှုပြလျှင်လည်း ကိုယ်ကျိုးအတွက်သာ ဖြစ်တတ်သည်။ “ထိုသူတို့ကိုရှောင်လော့” ဟု သမ္မာကျမ်းစာက ပညာရှိစွာအကြံပြုသည်။—၂ တိမောသေ ၃:၅။

နောက်ဆုံးကာလ၌ အသက်ရှင်သူတို့သည် “ပကတိကြင်နာစုံမက်ခြင်းနှင့်ကင်း” ကြလိမ့်မည်၊ ဘာသာပြန်ကျမ်းနောက်တစ်ခုအရ “မိသားစုဝင်များကိုပင် ချစ်ခင်မှုကင်း” တော့မည်ဟု ဆိုထားကြောင်းလည်း သတိပြုပါ။ ထိုသို့သောနေအိမ်များတွင် ကြီးပြင်းလာသောကလေး များသည်ထက်များလာခြင်းသည် ဝမ်းနည်းစရာပင်။ ဤသူငယ်တို့သည် ချစ်ခြင်းမေတ္တာအကြောင်းကို သတင်းမီဒီယာမှ သင်ယူလေ့ရှိကြသည်။ သို့သော် ထိုသတင်းမီဒီယာသည် ဆက်ဆံရေးများကို အမှန်တိုးတက်ကောင်းမွန်စေမည့် မေတ္တာမျိုးဖြစ်သော၊ ချစ်ခြင်းမေတ္တာ၏ပုံလွှာအစစ်ကို ဖော်ပြပါ၏လော။

စိတ်ကူးယဉ်အချစ်လော၊ မေတ္တာစစ်လော

ကျွန်ုပ်တို့အများစုသည် အတိုင်းအတာတစ်ခုအထိ သတင်းမီဒီယာ၏သြဇာလွှမ်းခြင်းကို ခံရကြသည်။ သုတေသီတစ်ဦးက ဤသို့ရေးသားခဲ့သည်– ‘ကလေးဘဝကတည်းက ကျွန်ုပ်တို့သည် ပုံပြင်ဇာတ်လမ်းများနှင့် ရုပ်ရှင်၊ ရုပ်မြင်သံကြား၊ စာအုပ်နှင့် မဂ္ဂဇင်းများ၊ ရေဒီယိုနှင့် သီချင်းခွေ၊ ကြော်ငြာနှင့် သတင်းများ၌ပင်ပါသော လိင်၊ အချစ်၊ အလွမ်းဆိုင်ရာ ပုံသေအချစ်ဇာတ်လမ်းများကြားတွင် ကြီးပြင်းလာကြသည်။’ သူဤသို့လည်း ရှင်းပြခဲ့သည်– “လိင်၊ အချစ်၊ အလွမ်းနှင့်ပတ်သက်သော မီဒီယာအများစု၏ ပုံဖော်ချက်တို့သည် ကျွန်ုပ်တို့အများစု ဖျောက်ဖျက်ရခက်သည့် စိတ်ကူးယဉ်ဆန်ဆန် မျှော်လင့်ချက်များကို ဖြစ်ပေါ်စေသည်၊ သို့မဟုတ် ပို၍ပြင်းပြလာစေသည်။ ၎င်းတို့သည် ကျွန်ုပ်တို့၏ကြင်ဖော်များကိုသာမက မိမိတို့ကိုယ်တိုင်ကိုလည်း အားမလိုအားမရဖြစ်စေသည်။”

မှန်ပါသည်၊ အချစ်အကြောင်း အမှန်အတိုင်းပုံဖော်သည့် စာအုပ်များ၊ ရုပ်ရှင်နှင့် သီချင်းများ ရှားလှသည်။ အမှန်မှာ ၎င်းတို့၏အဓိကရည်ရွယ်ချက်သည် ပညာပေးဖို့မဟုတ် အပျင်းပြေစေဖို့ဖြစ်သည်။ ထို့ကြောင့် စာရေးဆရာများသည် ဝင်ငွေများများရဖို့ စိတ်ကူးယဉ်အချစ်ဇာတ်လမ်းများကို ပလူပျံအောင် ရေးသားထုတ်ဝေကြသည်။ သို့သော် ဝမ်းနည်းစရာမှာ ထိုစိတ်ကူးယဉ်ကို အဖြစ်မှန်နှင့် ရောထွေးပစ်ရန် လွယ်ကူခြင်းဖြစ်၏။ ထို့ကြောင့် မိမိတို့၏ဆက်ဆံရေးများသည် ဝတ္ထုထဲမှဇာတ်ကောင်များနှင့် မကိုက်ညီသောအခါ လူတို့စိတ်ပျက်တတ်ကြသည်။ သို့ဖြစ်၍ စိတ်ကူးယဉ်နှင့် အဖြစ်မှန်ကိုလည်းကောင်း၊ သတင်းမီဒီယာမှ အချစ်ဇာတ်လမ်းနှင့် မေတ္တာစစ်မေတ္တာမှန်ကိုလည်းကောင်း မည်သို့ခွဲခြားသိနိုင်သနည်း။ အောက်ပါနှိုင်းယှဉ်ချက်များကို သုံးသပ်ကြည့်ပါ။

ပုံပြင်ထဲကအချစ်နှင့် အချစ်စစ်

စာအုပ်များ၊ ရုပ်ရှင်များ သို့မဟုတ် ပြဇာတ်များပါ အချစ်ဇာတ်လမ်းများသည် အမျိုးမျိုးပြောင်းလဲနိုင်သော်လည်း ဇာတ်အိမ်ကမူ မပြောင်းလဲပါ။ စာရေးသူမဂ္ဂဇင်းက ဤသို့ဖော်ပြသည်– “အချစ်ဇာတ်လမ်းအရေးအသား အတော်များများမှာ ဆင်တူယိုးမှား ထပ်နေသည်။ ထိုသို့ဖြစ်ရသည့်အကြောင်းရင်းရှိပါသည်။ ကောင်လေးနှင့် ကောင်မလေး တွေ့ကြသည်/ ကွဲသွားကြသည်/ ပြန်လည်ဆုံဆည်းကြသည်ဟူသော ရေးနည်းသည် ဇာတ်လမ်းဇာတ်ကွက်နှင့် ခေတ်ကာလမည်သို့ပင်ရှိပါစေ စာဖတ်သူပရိသတ်များ ထပ်မံအားပေးကြမည့် စိတ်ချရသောရေးနည်းဖြစ်သောကြောင့်ပင်။” ဤရေပန်းစားသောရေးနည်းကို အနီးကပ်သုံးသပ်ကြည့်ကြစို့။

ကောင်လေးနှင့် ကောင်မလေး တွေ့ကြသည်– မင်းသားလေးနှင့် မိန်းမချောလေး တွေ့ဆုံပြီး ချစ်ကြိုက်သွားကြလေသည်။ အောင်မြင်သောစာရေးဆရာမတစ်ဦးက အချစ်ဝတ္ထုရေးမည့်သူများအား အကြံပြုသည်မှာ “မြင်မြင်ချင်းမှာပင် ထိုသူနှစ်ဦးတို့သည် တစ်ယောက်အတွက်တစ်ယောက် ဖြစ်တည်နေသောပုံစံမျိုး စာဖတ်ပရိသတ် ပုံရိပ်ဖော်မိအောင် ရေးသားရမည်ဖြစ်သည်။”

မြင်မြင်ချင်းချစ်မိသည်ဟူသောအယူအဆက မေတ္တာစစ်ဟူသည် ခံစားချက်တစ်ခုမျှဖြစ်ပြီး တစ်ဖက်သူကို တွေ့လိုက်ရချိန်တွင် ညှို့ယူဖမ်းစားခံလိုက်ရသည့်သဘော သက်ရောက်စေသည်။ ထိုမေတ္တာမျိုးသည် ရုတ်ခြည်းပေါ်ပေါက်လာပြီး တစ်ဖက်သူအကြောင်း သိစရာမလိုပေ။ သို့သော် မေတ္တာစစ်ဟူသည် ခံစားချက်တစ်ခုမျှမကပေ။ ခံစားချက်များအပြင် ကျင့်ဝတ်စံနှုန်းများ ပါဝင်ပတ်သက်ကာ ကောင်းမွန်စွာ မွေးမြူထိန်းသိမ်းထားသ၍ ဘယ်သောအခါမျှ ပြတ်တောက်မသွားသော သိမ်မွေ့နက်နဲသည့် နှောင်ကြိုးတစ်ခုဖြစ်သည်။—ကောလောသဲ ၃:၁၄။

ထို့ပြင် တစ်ဖက်သူအကြောင်းသိရန် အချိန်လိုအပ်သည်။ မြင်မြင်ချင်းချစ်မိသွားသူကို မိမိ၏အဖော်မွန်အဖြစ် ယူမှတ်ခြင်းသည် စိတ်ကူးယဉ်ဆန်ပြီး စိတ်ပျက်ရလေ့ရှိသည်။ ထို့ထက်ကား အချစ်စစ်တွေ့ပြီဟု အမြန်ယူမှတ်လိုက်ခြင်းဖြင့် ယင်းနှင့်တခြားစီဖြစ်ကြောင်း ဖော်ပြသည့်လက္ခဏာများကို မျက်ကွယ်ပြုစေပေမည်။ သင့်တော်သည့်အိမ်ထောင်ဖက်ရွေးချယ်ခြင်းသည် အရူးအမူးစွဲလမ်းသွားခြင်းမှ ပေါ်လာသော ပြင်းပြသောစိတ်ခံစားချက်မျှမက ပါဝင်ပတ်သက်သည်။ သို့ဖြစ်၍ အချိန်ယူပါ။ အိမ်ထောင်ဖက်အရွေးမှားခြင်းသည် လုပ်ကိုင်ဆောင်ရွက်မှု၊ ကိုယ်စိတ်ကျန်းမာမှုနှင့် သက်တမ်းကိုပင် ဆိုးကျိုးပြုနိုင်ကြောင်း လေ့လာမှုများက ဖော်ပြခဲ့ပြီ။

ကွဲသွားကြသည်– မိန်းမချောလေးကို လူဆိုးကြီးက ရဲတိုက်မှ ခိုးသွားသည်။ မင်းသားလေးက အန္တရာယ်ကြားမှ စွန့်စွန့်စားစား ရှာပုံတော်ဖွင့်လေ၏။ အမေရိကအချစ်ဝတ္ထုစာရေးဆရာများအသင်း၏ ပြောရေးဆိုခွင့်ရှိသူအမျိုးသမီးတစ်ဦးက ဤသို့ဆိုသည်– “လူနှစ်ဦး ချစ်ကြိုက်သွားကြပြီး အချစ်လမ်းခရီးသာယာဖို့ ရုန်းကန်ကြိုးစားကြခြင်းကို အဓိကထား ဇာတ်အိမ်ဖွဲ့ရမည်။” ဝတ္ထုအများစုတွင် သူတို့၏ချစ်လမ်းခရီး အောင်မြင်လိမ့်မည်ကို စာဖတ်ပရိသတ်များ သိထားကြသည်။ ပြင်ပအတားအဆီးကို အောင်မြင်ကျော်လွှားလေ့ရှိသည်။

လက်တွေ့ဘဝတွင်မူ ပြင်ပပြဿနာများအပြင် အတွင်းပြဿနာများကိုပါ ကြုံတွေ့ရလေ့ရှိ၏။ ငွေ၊ အလုပ်အကိုင်၊ ဆွေမျိုးအသိုင်းအဝိုင်းနှင့် မိတ်ဆွေများ ပါဝင်ပတ်သက်နိုင်သည်။ တစ်ဖက်က မျှော်မှန်းထားသည့်အတိုင်း ဖြစ်မလာသောအခါ ပြဿနာများပေါ်လာတတ်သည်။ ဝတ္ထုထဲမှ ဇာတ်ကောင်များအတွက် အပြစ်အနာအဆာများသည် အရေးမပါလှချေ၊ သို့သော် လက်တွေ့ဘဝတွင်မူ အမြဲတမ်း ထိုသို့မဟုတ်ချေ။ ထို့ပြင် မေတ္တာစစ်သည် အခက်အခဲများကိုဖြစ်စေ၊ ရှုမြင်ပုံ၊ နောက်ခံ၊ အလိုဆန္ဒနှင့် စရိုက်မတူမှုများကိုဖြစ်စေ ကြိုးစားအားထုတ်မှုမရှိဘဲ ကျော်လွှားအောင်မြင်စေသည်မဟုတ်။ ယင်းအစား မေတ္တာတွင် သူ့အလိုလို သို့မဟုတ် အလွယ်တကူပေါ်ပေါက်လာလေ့မရှိသော အရည်အသွေးများဖြစ်သည့် ပူးပေါင်းဆောင်ရွက်ခြင်း၊ နှိမ့်ချခြင်း၊ နူးညံ့သိမ်မွေ့ခြင်း၊ သည်းခံခြင်းနှင့် စိတ်ရှည်ခြင်းတို့ ပါဝင်ပတ်သက်သည်။—၁ ကောရိန္သု ၁၃:၄-၇။

ပြန်လည်ဆုံစည်းကြသည်– မင်းသားလေးက မိန်းမချောလေးကို ကယ်တင်လိုက်ပြီး လူဆိုးကြီးကို နှိမ်နှင်းလိုက်သည်။ ချစ်သူနှစ်ဦး ပေါင်းဖက်ကာ သက်ဆုံးတိုင် ပျော်ရွှင်စွာ နေထိုင်သွားကြလေသတည်း။ အချစ်ဝတ္ထုအယ်ဒီတာတစ်ဦးက ဝတ္ထုရေးမည့်သူများကို ဤသို့အကြံပြုသည်– “သက်ဆုံးတိုင် ပျော်ရွှင်စွာနေထိုင်သွားသည့် ဇာတ်ပေါင်းခန်း လိုအပ်သည်။ . . . ချစ်သူနှစ်ဦး ပေါင်းဖက်ပျော်ရွှင်နေမှ စာဖတ်ပရိသတ် ကျေနပ်သွားမည်။” အချစ်ဝတ္ထုများသည် မိမိတို့ဇာတ်ကောင်များ အိမ်ထောင်ကျပြီး နောက်ပိုင်းနှစ်များအကြောင်း ဖော်ပြခြင်းမရှိသလောက်ပင်။ ထိုအချိန်တွင် သဘောထားကွဲလွဲမှုများနှင့် အခြားအခက်အခဲများက စမ်းသပ်မှုဖြစ်လာနိုင်သည်။ ကွာရှင်းမှုကိန်းဂဏန်းများအရ အိမ်ထောင်သည်အများစုသည် ၎င်းအခက်အခဲများကို မခံရပ်နိုင်ကြောင်း ဖော်ပြသည်။

မှန်ပါသည်၊ ဝတ္ထုဇာတ်လမ်းထဲမှ အချစ်သည် အတော်ပင် လွယ်ကူသည်၊ မေတ္တာစစ်မှာမူ အားထုတ်လုပ်ဆောင်မှုလိုအပ်သည်။ ထိုမေတ္တာနှစ်မျိုး၏ ကွဲပြားချက်များကို ခွဲခြားတတ်ခြင်းက ပိုင်းခြားဝေဖန်ခြင်းမရှိ စိတ်ကူးယဉ်ဆန်ဆန် မျှော်လင့်စေမည်မဟုတ်ပါ။ အလျင်စလိုကတိကဝတ်ပြုမိသောကြောင့် နောင်မှ နောင်တရစေမည့်အဖြစ်မျိုးမှလည်း ကာကွယ်ပေးပါလိမ့်မည်။ မေတ္တာစစ်မေတ္တာမှန်ကို မည်သို့ပြုစုပျိုးထောင်နိုင်ပုံနှင့် ပို၍ချစ်ခင်စရာကောင်းသူဖြစ်လာနိုင်ပုံတို့ကို နောက်ဆောင်းပါး၌ ဆွေးနွေးပါမည်။

[စာမျက်နှာ ၅ ပါ အကျဉ်းဖော်ပြချက်]

မေတ္တာခေါင်းပါးသူတို့သည် ချစ်ခင်စရာမကောင်း

[စာမျက်နှာ ၇ ပါ အကျဉ်းဖော်ပြချက်]

ဝတ္ထုဇာတ်လမ်းထဲမှ အချစ်သည် အတော်ပင် လွယ်ကူသည်၊ မေတ္တာစစ်မှာမူ အားထုတ်လုပ်ဆောင်မှုလိုအပ်

[စာမျက်နှာ ၆ ပါ လေးထောင့်ကွက်/ရုပ်ပုံ]

အချစ်ဝတ္ထုထဲမှ ဇာတ်လိုက်မင်းသား၊ မင်းသမီးများ

အမေရိကန်ပြည်ထောင်စုတွင် အချစ်ဝတ္ထုများကို နှစ်စဉ် ဒေါ်လာသန်းတစ်ထောင်ကျော်ဖိုး ရောင်းချရသည်။ ထိုနိုင်ငံတွင်ရောင်းချရသော ဝတ္ထုစာအုပ်ထက်ဝက်ခန့်မှာ အချစ်ဝတ္ထုများဖြစ်၏။ အမေရိကန်နိုင်ငံမှ အချစ်ဝတ္ထု စာရေးဆရာများ ထုတ်ဝေသော စာရင်းဇယားအရ အမျိုးသမီးပရိသတ် ၉၀ ရာခိုင်နှုန်းခန့်ရှိသော ဝတ္ထုဖတ်ပရိသတ်များသည် ဗလတောင့်တောင့်၊ ရုပ်ချောချော၊ ဉာဏ်ရည်ထက်သော ဇာတ်လိုက်မင်းသားမျိုးကို အများအားဖြင့် နှစ်သက်ကြသည်။ ဇာတ်လိုက်မင်းသမီးများတွင် သူတို့ရှိစေလိုသော အရည်အချင်းသုံးမျိုးမှာ ဉာဏ်ရည်ထက်မြက်၊ စိတ်ဓာတ်ကြံ့ခိုင်၍ ဆွဲဆောင်မှုရှိသူဖြစ်သည်။

[စာမျက်နှာ ၆၊ ၇ ပါ ရုပ်ပုံ]

သတင်းမီဒီယာသည် ချစ်ခြင်းမေတ္တာ၏ ပုံလွှာအစစ်ကို တင်ဆက်ခဲလှသည်