ယောက်ျားပီသတယ်ဆိုတာ ဘာကိုပြောတာလဲ

သင်ကော သူတို့လို ခံစားဖူးသလား။ အခြေအနေတစ်ခုခုကြောင့် ယောက်ျားပီသတယ်ဆိုတာ ဘာမှန်းမသိလိုက်မှာကို သင် စိုးရိမ်နေပါသလား။ စိတ်ဓာတ်မကျပါနဲ့။

အများကြုံနေကျ ပြဿနာနှစ်ခုကို ဘယ်လိုကျော်လွှားနိုင်သလဲဆိုတာ သုံးသပ်ကြည့်ပါ။

ပြဿနာ ၁– ယောက်ျားပီသခြင်းနဲ့ပတ်သက်တဲ့ အယူအဆအလွဲများ

လူတချို့ပြောဆိုရာ–

• ယောက်ျားပီသရင် စိတ်မာကြောရမယ်၊ ဘယ်တော့မှ မျက်ရည်မကျရဘူး။

• ယောက်ျားပီသရင် ဘယ်သူ့စကားမှ နားထောင်စရာမလိုဘူး။

• ယောက်ျားတွေက မိန်းမထက် ပိုသာတယ်။

နောက်တစ်နည်း ကြည့်ရအောင်– ယောက်ျားပီသတယ်၊ မပီသဘူးဆိုတာကို မိန်းမနဲ့နှိုင်းယှဉ်ဖို့မဟုတ်ဘဲ ကလေးဘဝနဲ့ နှိုင်းယှဉ်ကြည့်ဖို့ ဖြစ်တယ်။ သင်ဟာ ကလေးတစ်ယောက်ရဲ့ အမူအကျင့်တွေကို စွန့်လွှတ်လာတာနဲ့အမျှ ယောက်ျားပီသလာတယ်။ ကျမ်းရေးသူ တမန်တော်ပေါလု ဒီလိုရေးခဲ့တယ်– “ငါသည် သူငယ်ဖြစ်စဉ်အခါ သူငယ်ကဲ့သို့ ပြောဆိုတတ်၏။ သူငယ်ကဲ့သို့ တွေးတောတတ်၏။ သူငယ်ကဲ့သို့ စဉ်းစားဆင်ခြင်တတ်၏။ ယခု လူလားမြောက်သောအခါ၌မူကား သူငယ်၏စရိုက်များကို ငါဖျောက်ပစ်၏။” (၁ ကောရိန္သု ၁၃:၁၁) တခြားတစ်နည်းပြောရရင် ကလေးဆန်တဲ့ အတွေးတွေ၊ စကားတွေ၊ အမူအကျင့်တွေကို ရင့်ကျက်တဲ့ အတွေးတွေ၊ စကားတွေ၊ အမူအကျင့်တွေနဲ့ ပိုအစားထိုးလာတဲ့အခါ သင်ဟာ ပိုပြီးယောက်ျားပီသ လာမှာဖြစ်တယ်။b

ဒီလိုလုပ်ကြည့်ပါ– စာရွက်တစ်ရွက်မှာ ဒီမေးခွန်းတွေရဲ့ အဖြေတွေကို ချရေးပါ–

1. သူငယ်ရဲ့ ဘယ် “စရိုက်” တွေကို ငါဖျောက်ပစ်ခဲ့ပြီလဲ။

2. ဘယ်ကဏ္ဍတွေမှာ တိုးတက်ဖို့လိုနေသေးသလဲ။

အကြံပြုချက်– လုကာ ၇:၃၆-၅၀ ကိုဖတ်ပါ။ ယေရှုက (၁) အမှန်တရားဘက် ရပ်တည်ခြင်း၊ (၂) အမျိုးသမီးတွေအပါအဝင် တခြားသူတွေကို လေးလေးစားစား ဆက်ဆံခြင်းအားဖြင့် ယောက်ျားပီသကြောင်း ပြခဲ့ပုံကိုကြည့်ပါ။

“ကျွန်တော့်သူငယ်ချင်း ကဲန် ကို အားကျတယ်။ သူက ကာယပိုင်း၊ စိတ်ပိုင်း ကြံ့ခိုင်တယ်၊ ဘုရားသခင်နဲ့ ကောင်းတဲ့ဆက်ဆံရေးလည်းရှိတယ်။ အဲဒီအပြင် ကြင်နာတတ်သူလည်းဖြစ်တယ်။ ယောက်ျားပီသသူဟာ သူများကိုနှိမ်ပြီး ကိုယ့်ဂုဏ်ကိုယ်ဖော်တာမျိုး မလုပ်ဘူးဆိုတာ သူ့ဆီကနေ သိခဲ့ရတယ်။”—ဂျော်နသန်။

ပြဿနာ ၂– အတုယူထိုက်တဲ့ ဖခင်ကောင်းမရှိခြင်း

လူတချို့ပြောဆိုရာ–

• အဖေနဲ့ တရင်းတနှီးမရှိရင် ယောက်ျားပီသခြင်းဆိုတဲ့အဓိပ္ပာယ်ကို ဘယ်တော့မှ သိမှာမဟုတ်ဘူး။

• သင့်ဖခင်ရဲ့ ပုံနမူနာက မကောင်းဘူးဆိုရင် သင်လည်း အဲဒီပုံပဲထွက်မှာပဲ။

နောက်တစ်နည်း ကြည့်ရအောင်– ကလေးဘဝက အကြောင်းမလှတာနဲ့ မျှော်လင့်ချက်မရှိတော့ဘူးဆိုတာ မဟုတ်ပါဘူး။ အဲဒီအခြေအနေကနေ လွတ်မြောက်နိုင်ပါတယ်။ (၂ ကောရိန္သု ၁၀:၄) “အားယူလော့။ ယောက်ျား၏ဂုဏ်သတ္တိရှိလော့” ဆိုတဲ့ ဘုရင်ဒါဝိဒ်ရဲ့ လမ်းညွှန်ချက်ကို သင်လိုက်နာနိုင်ပါတယ်။—၃ ရာ. ၂:၂။

အဖေမရှိဘဲ ဒါမှမဟုတ် အဖေရဲ့ ဂရုစိုက်မှုမခံရဘဲ ကြီးလာရတဲ့ဘဝက မလွယ်ဘူးဆိုတာ မှန်ပါတယ်။ “အဖေမရှိတာက ဘဝမှာ ကြီးမားတဲ့နစ်နာဆုံးရှုံးမှုကြီးပဲ” လို့ အရှေ့မှာ ကိုးကားထားတဲ့ အဲလက်စ်ကပြောတယ်။ “အခု ကျွန်တော့်အသက် ၂၅ နှစ်ရှိပြီ။ ဆယ်ကျော်သက်မှာ သိသင့်သိထိုက်တဲ့အရာတွေကို အခုထိ သင်ယူနေရတုန်းပဲ။” သင်လည်း အဲလက်စ်လို ခံစားနေရတယ်ဆိုရင် ဘာလုပ်နိုင်သလဲ။

ဒီလိုလုပ်ကြည့်ပါ– သင့်ကို ထောက်ကူပေးနိုင်သူ၊ ယောက်ျားပီသခြင်းမှာ အတုယူထိုက်သူတစ်ယောက်ကို ရှာပါ။c ဘယ်အရည်အသွေးတွေက ယောက်ျားပီသဖို့ အရေးအကြီးဆုံးလဲဆိုတာ သူ့ကိုမေးကြည့်ပါ။ အဲဒီအရည်အသွေးတွေကို သင်ဘယ်လို မွေးယူနိုင်သလဲဆိုတာကိုလည်း မေးကြည့်ပါ။—သု. ၁:၅။

အကြံပြုချက်– သုတ္တံ အခန်းကြီး ၁-၉ ကိုဖတ်ပါ။ လူငယ်တစ်ယောက်ကို ဉာဏ်ပညာရှိပြီး ဘုရားသခင်နဲ့ရင်းနှီးသူတစ်ယောက် ဖြစ်လာစေတဲ့ ဖခင်တစ်ယောက်လို အကြံပေးထားချက်တွေကို သတိပြုကြည့်ပါ။

“ကျွန်တော့်ဘဝကို ကျေနပ်ပါတယ်။ အဖေသာ ကျွန်တော့်ကို ဒီထက်ပိုကူညီပေးနိုင်ခဲ့ရင် ကောင်းမှာပဲ။ ဒါပေမဲ့လည်း ကျွန်တော် စိတ်ဓာတ်မကျပါဘူး။ ကျွန်တော် အောင်မြင်မယ်လို့ ယုံကြည်တယ်။”—ဂျော်နသန်။