သည်းခံခြင်း

ပိုပြီးသည်းခံတတ်စေတဲ့ အဓိကသော့ချက်က ဘာလဲ

လက်ရှိ အခြေအနေမှန်–

လူမျိုးရေး၊ နိုင်ငံရေး တစ်ဖက်သတ်အစွဲရှိခြင်းနဲ့ ဘာသာရေးအစွန်းရောက်လွန်းခြင်းကြောင့် ကမ္ဘာတစ်ဝန်းရှိ လူအတော်များများဟာ သည်းခံလိုစိတ် လျော့နည်းလာကြတယ်။

သမ္မာကျမ်းစာပြောဆိုရာ–

ယေရှုဟာ တစ်ဖက်သတ်အစွဲရှိသူတွေကြားမှာ အမှုဆောင်ခဲ့တယ်။ ဂျူးလူမျိုးနဲ့ ရှမာရိလူမျိုးဟာ တစ်ဖက်နဲ့တစ်ဖက် မုန်းတီးနေကြတယ်။ (ယောဟန် ၄:၉) အမျိုးသမီးတွေကို အမျိုးသားတွေထက် နိမ့်ကျတယ်လို့ ရှုမြင်ကြတယ်။ ဂျူးဘာသာရေးခေါင်းဆောင်တွေက သာမန်လူတွေကို မတူမတန်သလို ဆက်ဆံကြတယ်။ (ယောဟန် ၇:၄၉) ယေရှုခရစ်ကတော့ သူတို့လို မဟုတ်တာကြောင့် ဆန့်ကျင်သူတွေက ယေရှုကို “ဤလူသည် အပြစ်သားတို့ကို လက်ခံ၍ သူတို့နှင့်အတူ စားသောက်ပါသည်တကား” လို့ ပြောကြတယ်။ (လုကာ ၁၅:၂) ယေရှုက လူတွေကို တရားစီရင်ဖို့မဟုတ်ဘဲ၊ ဘုရားသခင်နဲ့ဆက်ဆံရေးကောင်းပြန်ရှိလာအောင် လုပ်ဆောင်ပေးဖို့ ကြွလာတာကြောင့် လူတွေကို ကြင်နာတယ်၊ စိတ်ရှည်တယ်၊ သည်းခံတယ်။ ချစ်ခြင်းမေတ္တာက အဲဒီလိုလုပ်ဖို့ ယေရှုကို လှုံ့ဆော်ပေးတယ်။—ယောဟန် ၃:၁၇; ၁၃:၃၄။

အပြစ်အနာအဆာနဲ့ အကျင့်စရိုက်အမျိုးမျိုးရှိနေသူတွေကို လက်ခံတတ်အောင်၊ ပိုပြီးသည်းခံတတ်အောင် ကူညီပေးတဲ့ အဓိကသော့ချက်ကတော့ ချစ်ခြင်းမေတ္တာပါပဲ။ “တစ်ဦးနှင့် တစ်ဦး မကျေနပ်စရာအကြောင်းရှိလျှင် အချင်းချင်း ဆက်၍သည်းခံလျက် အကြွင်းမဲ့ခွင့်လွှတ်ကြလော့” လို့ ကောလောသဲ ၃:၁၃ မှာ ပြောထားတယ်။

“အရာအားလုံးတို့ထက် အချင်းချင်းအားကြီးသောမေတ္တာဖြင့် ချစ်ကြလော့။ အကြောင်းမူကား ချစ်ခြင်းမေတ္တာသည် များစွာသောအပြစ်တို့ကို ဖုံးအုပ်တတ်၏။”—၁ ပေတရု ၄:၈။

သည်းခံတာကို ဘာကြောင့် ကန့်သတ်ထားရမလဲ

အခြေအနေမှန်–

လူအဖွဲ့အစည်း အများစုက ဥပဒေနဲ့ စည်းမျဉ်းကို လိုက်နာစောင့်ထိန်းဖို့ ကြိုးစားကြတယ်။ ဒါကြောင့် တချို့သောအပြုအမူတွေကို ခွင့်မပြုကြဘူး။

သမ္မာကျမ်းစာပြောဆိုရာ–

မေတ္တာသည် “မလျောက်ပတ်စွာ မကျင့်တတ်။” (၁ ကောရိန္သု ၁၃:၅) ယေရှုဟာ သည်းခံရာမှာ စံနမူနာပြခဲ့တယ်။ ဒါပေမဲ့ မလျောက်ပတ်တာ၊ ဟန်ဆောင်တာနဲ့ တခြားဆိုးညစ်ရာတွေကို သည်းမခံခဲ့ဘဲ အဲဒီလိုလုပ်သူတွေကို ရဲရဲဝံ့ဝံ့ ပြစ်တင်ပြောဆိုခဲ့တယ်။ (မဿဲ ၂၃:၁၃) “ဆိုးညစ်သောအကျင့်ကို ကျင့်သောသူသည် [အမှန်တရား] အလင်းကို မုန်း” ကြတယ်လို့ ယေရှု ပြောခဲ့တယ်။—ယောဟန် ၃:၂၀။

တမန်တော် ပေါလုက “ဆိုးညစ်သောအရာကို စက်ဆုပ်ရွံရှာ ကြလော့။ ကောင်းသောအရာကို မှီဝဲဆည်းကပ်ကြလော့” လို့ ရေးသားခဲ့သလို အဲဒီစကားအတိုင်းလည်း နေထိုင်ခဲ့တယ်။ (ရောမ ၁၂:၉) ဥပမာ၊ ဂျူးခရစ်ယာန်တွေက ခရစ်ယာန်ဖြစ်လာသူလူမျိုးခြားတွေကို ခွဲခြားခွဲခြား လုပ်တဲ့အခါ ဂျူးဖြစ်တဲ့ တမန်တော် ပေါလုဟာ ကြင်နာစွာ၊ ခိုင်မာပြတ်သားစွာ သူတို့ကို ပြစ်တင်ပြောဆိုခဲ့တယ်။ (ဂလာတိ ၂:၁၁-၁၄) အကြောင်းကတော့၊ “ဘုရားသခင်သည် မျက်နှာလိုက်တော်မမူကြောင်း၊” ကိုယ်တော့်ကို ကိုးကွယ်ဝတ်ပြုသူတွေကြားမှာ လူမျိုးရေး ခွဲခြားတာကို သည်းခံမှာမဟုတ်ကြောင်း ပေါလု သိထားတာကြောင့်ပါ။—တမန်တော် ၁၀:၃၄။

ယေဟောဝါသက်သေတွေဟာ ကိုယ်ကျင့်တရားဆိုင်ရာ လမ်းညွှန်ချက်တွေကို သမ္မာကျမ်းစာမှာ ရှာဖွေကြပြီး ဆိုးညစ်မှုတွေကို သည်းမခံကြဘူး။ (ဟေရှာယ ၃၃:၂၂) ဘုရားသခင်ချမှတ်ထားတဲ့ စံနှုန်းအတိုင်းမနေထိုင်သူတွေကြောင့် သန့်ရှင်းတဲ့ ခရစ်ယာန်အသင်းတော်ကို ထိခိုက်မခံဘူး။ “ဆိုးညစ်သူတို့ကို သင်တို့အထဲမှ နှင်ထုတ်ကြလော့” ဆိုတဲ့ ကျမ်းစာလမ်းညွှန်ချက်ကို ယေဟောဝါသက်သေ ခရစ်ယာန်တွေ လိုက်နာကျင့်သုံးကြတယ်။—၁ ကောရိန္သု ၅:၁၁-၁၃။

“[ယေဟောဝါ] ဘုရားကိုချစ်သောသူတို့ မကောင်းသောအမှုကိုရွံရှာကြလော့။”—ဆာလံ ၉၇:၁၀။

ဆိုးညစ်မှုတွေကို ဘုရားသခင် အမြဲတမ်း သည်းခံနေမှာလား

လူအများယုံကြည်လက်ခံရာ–

ဆိုးညစ်တာဟာ လူ့သဘာဝပဲ။ လူတွေရှိနေသရွေ့ ဆက်ရှိနေမှာပဲ။

သမ္မာကျမ်းစာပြောဆိုရာ–

“ဖိနှိပ်မှုကို ကိုယ်တော် ဘာကြောင့် သည်းခံနေတာလဲ။ အကြမ်းဖက်ဖျက်ဆီးမှုတွေက ကျွန်တော့်ရှေ့မှာ ဘာကြောင့်ရှိနေတာလဲ။ ငြင်းခုံရန်ဖြစ်တာတွေ ဘာကြောင့် ဒီလောက်များနေတာလဲ” ဆိုပြီး ကြိုဟောသူ ဟဗက္ကုတ်က ယေဟောဝါ ဘုရားသခင်ကို မေးခဲ့တယ်။ (ဟဗက္ကုတ် ၁:၃၊ ကဘ) ဘုရားသခင်က စိုးရိမ်ပူပန်နေတဲ့ ဟဗက္ကုတ်ကို ဆိုးညစ်သူတွေကို စစ်ကြောစီရင်မယ်လို့ ပြောပြခြင်းဖြင့် သံသယစိတ် ကင်းစင်စေခဲ့တယ်။ ‘ကျိန်းသေပြည့်စုံလာမယ်၊ နောက်ကျမှာမဟုတ်ဘူး’ လို့ သူ့ကို ကတိပေးခဲ့တယ်။—ဟဗက္ကုတ် ၂:၃၊ ကဘ။

ဆိုးညစ်သူတွေဟာ ဆိုးညစ်တဲ့လမ်းစဉ်ကို စွန့်လွှတ်ဖို့ အခုအချိန်မှာ အခွင့်အရေးရရှိထားကြပါတယ်။ ‘လူဆိုးတစ်ယောက်သေတာကို ငါဝမ်းသာပါ့မလား။ သူ့လမ်းစဉ်တွေကို ကျောခိုင်းပြီး အသက်ဆက်ရှင်တာကိုပဲ ငါနှစ်သက်တယ်မဟုတ်လား’ လို့ အချုပ်အခြာအာဏာရှင်ယေဟောဝါ ပြောတယ်။ (ယေဇကျေလ ၁၈:၂၃၊ ကဘ) ဆိုးညစ်တဲ့လမ်းစဉ်ကို စွန့်လွှတ်ပြီး ယေဟောဝါကိုရှာဖွေသူတွေဟာ ယုံကြည်စိတ်ချစရာ အနာဂတ်မျှော်လင့်ချက်ရှိလာတယ်။ “ငါ့စကားကို နာခံသောသူမူကား စိုးရိမ်ခြင်းကင်းလျက် ဘေးရန်ကို မကြောက်ဘဲ ငြိမ်သက်စွာနေရလိမ့်မည်” လို့ သုတ္တံ ၁:၃၃ [သမ] မှာ ဖော်ပြထားတယ်။

“ခဏကြာပြီးမှ မတရားသောသူသည်မရှိရ။ သူ၏နေရာကို စေ့စေ့ရှာ၍မတွေ့ရ။ စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။” —ဆာလံ ၃၇:၁၀၊ ၁၁။