နည်းပညာက သားသမီးကို ထိခိုက်စေနိုင်

အွန်လိုင်းမှာပဲ အချိန်ကုန်နေတဲ့ လူငယ်တချို့ဟာ

• ဖုန်း/တက်ဘလက်တွေကို မသုံးရ မနေနိုင် ဖြစ်သွားတယ်။

• အွန်လိုင်းပေါ်မှာ တခြားသူကို အနိုင်ကျင့်တာ၊ ကိုယ်တိုင် အနိုင်ကျင့်ခံရတာ ဖြစ်နိုင်တယ်။

• မရည်ရွယ်ဘဲ ညစ်ညမ်းရုပ်ပုံစာပေနဲ့ ထိတွေ့မိနိုင်တယ်။

သိထားသင့်တဲ့ အချက်များ

စွဲလမ်းခြင်း

ဂိမ်းကစားတာလိုမျိုး အွန်လိုင်းပေါ်မှာ လုပ်ဆောင်ရတာတွေဟာ စွဲနိုင်တယ်။ ဖြတ်ဖို့ ခက်တယ်။ “ဖုန်းမှာ ပါတဲ့ အက်ပ်တွေက ဖုန်းကို လက်က မချချင်အောင် လုပ်ထားတယ်” လို့ စာအုပ်တစ်အုပ်က ဆိုတယ်။ စီးပွားရေးနဲ့ဆိုင်တဲ့ အက်ပ်တွေကို ကျွန်တော်တို့ ကြည့်လေ သူတို့ အကျိုးအမြတ် များလေပဲ။

စဉ်းစားကြည့်ပါ– သင့်ကလေးက ဖုန်း/တက်ဘလက်ကို အလွန်အကျွံ သုံးနေတဲ့ပုံ ပေါက်နေသလား။ အချိန်ကို အကျိုးရှိရှိ သုံးတတ်အောင် ဘယ်လို ကူညီပေးနိုင်သလဲ။—ဧဖက် ၅:၁၅၊ ၁၆။

အနိုင်ကျင့်ခြင်း

တချို့သူတွေက အွန်လိုင်းပေါ်မှာ ရိုင်းရိုင်းစိုင်းစိုင်း ပြုမူတတ်တယ်။ အဲဒီလို လူတွေက တခြားသူတွေကို အနိုင်ကျင့်တတ်တယ်။

တချို့သူတွေ လူမှုမီဒီယာပေါ်မှာ ရိုင်းရိုင်းစိုင်းစိုင်း ပြုမူတာက အာရုံစိုက်ခံချင်လို့၊ ထင်ပေါ်ချင်လို့ပါ။ တချို့ကျတော့ ပါတီပွဲ တက်ဖို့ ဖိတ်ခေါ်မခံရတဲ့အခါ ကိုယ့်ကို အနိုင်ကျင့်တယ်လို့ ခံစားရနိုင်တယ်။

စဉ်းစားကြည့်ပါ– သင့်ကလေးတွေ အွန်လိုင်းပေါ်မှာ ရိုင်းရိုင်းစိုင်းစိုင်း ပြုမူနေသလား။ (ဧဖက် ၄:၃၁) ဒါမှမဟုတ် ဖယ်ကြဉ်ခံရတယ်လို့ ခံစားနေရသလား။

ညစ်ညမ်းရုပ်ပုံစာပေ

အကျင့်ပျက် ညစ်ညမ်းတာတွေကို အင်တာနက်ပေါ်မှာ အလွယ်တကူ မြင်တွေ့နိုင်တယ်။ အဲဒါတွေကို မမြင်အောင် ပိတ်ထားနိုင်တဲ့ ဆော့ဝဲလ်တွေ ရှိပေမဲ့ ကလေးတွေ လုံးဝ မမြင်အောင်တော့ အပြည့်အဝ မကာကွယ်ပေးနိုင်ဘူး။

ဖုန်းကနေ ညစ်ညမ်းရုပ်ပုံတွေ၊ ညစ်ညမ်းစကားတွေ ပို့တာ၊ လက်ခံတာက တရားဥပဒေနဲ့ မညီဘူး။ ကိုယ့်ဒေသရဲ့ ဥပဒေနဲ့ အသက်အရွယ်အရ အဲဒါတွေနဲ့ ပတ်သက်မိသူတွေဟာ ကလေး ညစ်ညမ်းရုပ်ပုံ ဖြန့်တဲ့ ဥပဒေနဲ့ တရားစွဲခံရနိုင်တယ်။

စဉ်းစားကြည့်ပါ– အွန်လိုင်းပေါ်ကနေ ညစ်ညမ်းရုပ်ပုံတွေ ကြည့်တဲ့၊ ပို့တဲ့ ထောင်ချောက်ထဲ မကျအောင် သားသမီးတွေကို ဘယ်လို ကူညီပေးနိုင်သလဲ။—ဧဖက် ၅:၃၊ ၄။

လုပ်ဆောင်နိုင်တဲ့ အချက်များ

သားသမီးတွေကို လေ့ကျင့်ပေးပါ

နည်းပညာနဲ့ပတ်သက်လာရင် ကလေးတွေက တတ်လွယ်ပေမဲ့ ထိန်းပေးဖို့တော့ လိုတယ်။ ဖုန်းကို ဘယ်လို အကျိုးရှိရှိ သုံးရမယ်ဆိုတာ မသိတဲ့ ကလေးကို ဖုန်းပေးလိုက်တာက “ရေမကူးတတ်တဲ့ ကလေးကို တာဝန်မဲ့စွာနဲ့ ရေကန်ထဲ ဒိုင်ဗင်ထိုးခိုင်းတာနဲ့ တူတယ်” လို့ စာအုပ်တစ်အုပ်က ဆိုတယ်။

ကိုယ်ကြိုးစားချင်တဲ့ အချက်တွေ မှတ်သားပါ။ စိတ်ကူးထားတဲ့အချက်တွေ ချရေးပါ။

• အွန်လိုင်း သုံးတဲ့အခါ ရှိရမယ့် အမူအကျင့်ကောင်းတွေကို သားသမီးတွေနဲ့ ဆွေးနွေးမယ်။

• ဖယ်ကြဉ်ခံရတယ်ဆိုတဲ့ ခံစားချက် မဝင်အောင် ကူညီပေးမယ်။

• မသင့်တော်တာတွေ မပေါ်လာအောင် အတတ်နိုင်ဆုံး ပိတ်ထားပေးမယ်။

• ကလေးရဲ့ ဖုန်းကို မကြာခဏ စစ်ဆေးမယ်။

• တစ်ရက်ကို အချိန်ဘယ်လောက်ပဲ သုံးရမယ်ဆိုတာ ကန့်သတ်ပေးမယ်။

• ကလေးတစ်ယောက်တည်း ရှိတဲ့အချိန်၊ အထူးသဖြင့် အိပ်ချိန်မှာ ကလေး ဖုန်းသုံးတာကို တားမြစ်မယ်။

• ထမင်းဝိုင်းမှာ ဖုန်းမသုံးဖို့ တားမြစ်မယ်။