ရောင့်ရဲတင်းတိမ်ပါ

ဘာကြောင့် အရေးကြီးသလဲ

စိတ်ပညာရှင် ဂျက်စီကာ ခိုလာရဲ့ အဆိုအရ ရောင့်ရဲတတ်သူတွေဟာ အကောင်းမြင်သဘောထား ပိုရှိကြတယ်။ မနာလိုဝန်တိုစိတ် နည်းကြတယ်။ ဒါကြောင့်လည်း ရောင့်ရဲတတ်သူတွေဟာ တခြားသူတွေထက် ပိုပျော်ရွှင်ပြီး စိတ်ဖိစီးမှု နည်းကြတာ မဆန်းပါဘူး။ တကယ်တော့ အပျော်ရွှင်ဆုံးသူတချို့ကို ကြည့်လိုက်ရင် ပိုင်ဆိုင်မှု များများစားစား ရှိကြတာ မဟုတ်ဘူး။ သူတို့ဘဝမှာ တန်ဖိုးအကြီးဆုံးအရာတွေဟာ မိသားစုဝင်တွေ၊ မိတ်ဆွေတွေနဲ့ အချိန်ပေးတာလိုမျိုး ငွေနဲ့ ဝယ်လို့မရတဲ့အရာတွေ ဖြစ်နေလို့ပါ။

လုပ်ဆောင်နိုင်ရာ

တခြားသူတွေနဲ့ မနှိုင်းယှဉ်ပါနဲ့။ လက်ဖျားငွေသီးနေပုံပေါက်သူတွေနဲ့ လိုက်ယှဉ်နေရင် ရှိတာနဲ့ မရောင့်ရဲတော့ဘဲ မနာလိုမရှုဆိတ် ဖြစ်လာနိုင်တယ်။ တကယ်တမ်း သူတို့ရဲ့ ဘဝဟာ ကိုယ်ထင်သလို ဟုတ်ချင်မှ ဟုတ်မှာ။ တချို့က ပိုင်ဆိုင်မှု များပေမဲ့ အကြွေးတွေ ပိနေနိုင်တယ်။ ဆီနီဂေါနိုင်ငံက နီကိုးလ် အခုလိုပြောတယ်– “ပျော်ရွှင်ဖို့ ကျွန်မ ပိုင်ဆိုင်မှု များများစားစား မလိုဘူး။ ရောင့်ရဲစိတ်သာ ရှိရင် တခြားသူတွေလောက် မပိုင်ဆိုင်လည်း ကိုယ့်ဘဝနဲ့ကိုယ် တင်းတိမ်ကျေနပ်နိုင်တယ်။”

အကြံပြုချက်– ဘယ်သူတွေက ဘယ်လိုမျိုး ငွေကို ရေလို သုံးနိုင်ပါတယ်ဆိုတာ စောင်းပေးပြီး တင်ဆက်တဲ့ ကြော်ငြာတွေ၊ လူမှုမီဒီယာ ပို့စ်တွေ မကြည့်ပါနဲ့။

ကျေးဇူးတင်စိတ် ရှိပါ။ ကျေးဇူးသိတတ်သူတွေဟာ ရှိတာလေးနဲ့ ရောင့်ရဲကြတယ်။ ပိုရချင်တယ်၊ ပိုရထိုက်တယ်ဆိုတဲ့ စိတ်လည်း မရှိကြဘူး။ ဟေတီနိုင်ငံက ရောဘတ်တန် အခုလိုပြောတယ်– “ကျွန်တော်တို့မိသားစုကို တခြားသူတွေ မေတ္တာထား ကူညီပေးခဲ့တာလေးတွေ အချိန်ယူပြီး စဉ်းစားတယ်။ ပြီးရင် သူတို့ကို ကျေးဇူးတင်ကြောင်း ပြောတယ်။ ရှစ်နှစ်အရွယ် ကျွန်တော့်သားလေးကိုလည်း ဘယ်သူ့ဆီက ဘာပဲရရ ကျေးဇူးတင်စကား အမြဲပြောဖို့ သင်ပေးထားတယ်။”

အကြံပြုချက်– ဒိုင်ယာရီတစ်အုပ် ထားပြီး ကျေးဇူးတင်စရာတွေ တစ်နေ့တစ်ခု ချရေးကြည့်ပါ။ ကျန်းမာနေလို့၊ မိသားစု၊ မိတ်ဆွေကောင်းတွေ ရှိနေလို့၊ လှပတဲ့ နေဝင်ဆည်းဆာ မြင်လိုက်ရလို့ စသဖြင့်ပေါ့။

ရှိတာနဲ့ ရောင့်ရဲဖို့ တစ်ခါတလေ ခက်နိုင်ပါတယ်။ ဒါပေမဲ့ ရောင့်ရဲတာ အရှုံးမရှိဘူး။ ရောင့်ရဲဖို့ ရွေးချယ်တာဟာ ပျော်ရွှင်ခြင်းလမ်းကို ရွေးချယ်လိုက်တာပဲ။ နှစ်ခုစလုံးဟာ ငွေနဲ့ ဝယ်လို့မရတဲ့အရာတွေပါ။