ဣဇာက် မိန်းမကောင်းတစ်ယောက် ရတဲ့အကြောင်း

ပုံမှာပါတဲ့ မိန်းမဟာ ဘယ်သူလဲသိလား။ သူ့နာမည်က ရေဗက္ကတဲ့။ သူသွားတွေ့နေတဲ့လူက ဣဇာက်ပေါ့။ သူ ဣဇာက်ရဲ့ မိန်းမဖြစ်တော့မယ်လေ။ ဘယ်လိုကနေ ဘယ်လိုဖြစ်လာတာလဲ။

ဒီလိုလေ။ ဣဇာက်ဖေဖေ အာဗြဟံက သားဣဇာက်အတွက် မိန်းမကောင်းကောင်း တစ်ယောက်ရှာပေးချင်တယ်။ ခါနာန်ပြည်မှာ ရှိတဲ့လူတွေက မှားတဲ့ဘုရားတွေကို ကိုးကွယ်တဲ့အတွက် အဲဒီပြည်ကမိန်းကလေးကို ဣဇာက်နဲ့ မပေးစားချင်ဘူး။ ဒါနဲ့ အာဗြဟံက သူ့ကျွန်ကိုခေါ်ပြီး ‘ငါ့အမျိုးတွေနေထိုင်တဲ့ ခါရန်မြို့ကိုသွားပြီး ငါ့သားဣဇာက်အတွက် မိန်းမတစ်ယောက် ခေါ်လာပေးစေချင်တယ်’ ဆိုပြီးပြောတယ်။

အာဗြဟံရဲ့ကျွန်ကလည်း ချက်ချင်းပဲကုလားအုတ်ဆယ်ကောင်နဲ့ ခရီးရှည်ကြီးနှင်တော့တယ်ပေါ့။ အာဗြဟံအမျိုးတွေနေတဲ့ နေရာနားရောက်တဲ့အခါကျတော့ ရေတွင်းတစ်တွင်းအနားမှာ ရပ်နားလိုက်တယ်။ မြို့ထဲကမိန်းကလေးတွေ ရေတွင်းကိုလာပြီး ရေခပ်တဲ့ ညနေပိုင်းအချိန်မှာပဲပေါ့။ ဒါနဲ့ အာဗြဟံရဲ့ကျွန်က ‘ကျွန်တော်မျိုးနဲ့ ကျွန်တော်မျိုးရဲ့ကုလားအုတ်ကို ရေတိုက်တဲ့အမျိုးသမီးဟာ ဣဇာက်အတွက် ကိုယ်တော်ရွေးတော်မူသော မိန်းမဖြစ်ပါစေ’ ဆိုပြီး ယေဟောဝါဆီမှာ ဆုတောင်းလိုက်တယ်။

သိပ်မကြာပါဘူး ရေဗက္က ရေခပ်ဖို့လာရော။ အာဗြဟံကျွန်က ရေတောင်းသောက်တော့ သူကသောက်ဖို့ရေပေးတယ်။ ပြီးတော့ ရေငတ်နေတဲ့ကုလားအုတ်တွေသောက်ဖို့ ရေလည်းလောက်အောင်ခပ်ပေးပြန်တယ်။ ဒါဟာ လွယ်တဲ့အလုပ်မဟုတ်ဘူးကွဲ့။ ဘာလို့လည်းဆိုတော့ ကုလားအုတ်တွေ ရေသောက်ရင် အများကြီးသောက်တတ်ကြတယ်။

ကုလားအုတ်တွေကို ရေဗက္က ရေတိုက်ပြီးတဲ့နောက် အာဗြဟံရဲ့ကျွန်က သူ့ဖေဖေနာမည်ကိုမေးတယ်။ ပြီးတော့ သူတို့အိမ်မှာ တည်းခိုလို့ရမလားလို့လည်းမေးတယ်။ သူက ‘ကျွန်မဖေဖေဟာ ဗေသွေလဖြစ်ပါတယ်။ ကျွန်မတို့အိမ်မှာ တည်းခိုဖို့နေရာလည်းရှိပါတယ်’ ဆိုပြီးပြန်ဖြေတယ်။ အာဗြဟံရဲ့ကျွန်က ဗေသွေလဟာ အာဗြဟံအစ်ကို နာခေါ်ရဲ့သားဖြစ်မှန်းသိတာပေါ့။ ဒါနဲ့ သူ့ကို အာဗြဟံအမျိုးဆီပို့ပေးတဲ့အတွက် မြေပေါ်ပျပ်ဝပ်ပြီး ယေဟောဝါကျေးဇူးတော်ကို ချီးမွမ်းတယ်။

အဲဒီညမှာပဲ အာဗြဟံရဲ့ကျွန်က ဗေသွေလနဲ့ရေဗက္ကအစ်ကို လာဗန်တို့ကို သူလာရတဲ့အကြောင်းရင်း ပြောပြတယ်။ သူတို့နှစ်ယောက်စလုံးက ရေဗက္က သူနဲ့လိုက်သွားပြီး ဣဇာက်နဲ့ယူဖို့ သဘောတူချင်ကြတယ်။ မင်းသဘောဘယ်လိုလဲဆိုပြီး မေးခံရတဲ့အခါ ရေဗက္ကဘာပြောလဲ။ ‘ဟုတ်ကဲ့’ ကျွန်မလိုက်ချင်ပါတယ်ဆိုပြီး ပြန်ဖြေလိုက်တယ်။ ဒါနဲ့ နောက်တစ်ရက်မှာပဲ ကုလားအုတ်စီးပြီး ဝေးလံတဲ့ခါနာန်ပြည်ကို ခရီးနှင်လာကြတော့တယ်။

ရောက်တဲ့အခါ ညနေစောင်းနေပြီ။ လယ်ပြင်မှာလမ်းလျှောက်နေတဲ့ လူတစ်ယောက်ကို ရေဗက္ကတွေ့လိုက်တယ်။ အဲဒီလူက ရေဗက္ကကိုတွေ့တဲ့အခါ ဝမ်းသာလို့နေတယ်။ သူ့မေမေသေတာ သုံးနှစ်တောင်ရှိခဲ့ပေမဲ့ သူဝမ်းနည်းနေတုန်းပဲ။ ခုတော့ ဣဇာက်ဟာ ရေဗက္ကကိုသိပ်ချစ်တာနဲ့ ပြန်ပြီးစိတ်ပျော်လာတော့တယ်။