ဗာဗုလုန်သုံ့ပန်းဘဝရောက်တဲ့ အချိန်ကနေပြီး ယေရုရှလင်မြို့ရိုး ပြန်လည်တည်ဆောက်တဲ့ အချိန်အထိ

ဣသရေလလူတွေ ဗာဗုလုန်ပြည်မှာ သုံ့ပန်းဖြစ်နေတဲ့အချိန်မှာ ယုံကြည်ခြင်းအမျိုးမျိုးစမ်းသပ်ခံရကြတယ်။ ရှာဒရက်၊ မေရှက်၊ အဗေဒနေဂေါတို့ဟာ မီးလောင်တိုက်အသွင်းခံရကြတယ်။ ဒါပေမဲ့ ဘုရားသခင်ကသူတို့ကိုအရှင်လတ်လတ် ပြန်ကယ်ထုတ်လိုက်တယ်။ အဲဒီနောက် မေဒိနဲ့ပေရသိလူတွေလက်ချက်နဲ့ ဗာဗုလုန်နိုင်ငံကျရှုံးသွားပြီးတဲ့နောက်မှာ ဒံယေလလည်း ခြင်္သေ့တွင်းထဲပစ်ချခံခဲ့ရတယ်။ ဒါပေမဲ့ ခြင်္သေ့တွေရဲ့နှုတ်ကိုပိတ်ခြင်းအားဖြင့် သူ့ကိုဘုရားသခင်ကာကွယ်ခဲ့တယ်။

နောက်ဆုံးတော့၊ ပေရသိရှင်ဘုရင် ကုရုမင်းက ဣသရေလလူတွေကိုလွှတ်လိုက်တယ်။ ဒါနဲ့ ဣသရေလလူတွေ နေပြည်တော်ကိုပြန်ကြတယ်။ အဲဒါဟာ ဗာဗုလုန်ပြည်ကိုသုံ့ပန်းအဖြစ်နဲ့အဖမ်းခံရတဲ့အချိန်ကနေဆိုရင် အနှစ် ၇၀ အတိပဲ။ ယေရုရှလင်မြို့ကိုပြန်ရောက်တဲ့အခါ ဦးဦးဆုံး သူတို့လုပ်တာက ယေဟောဝါဗိမာန်တော်ပြန်ဆောက်တာပဲ။ ဒါပေမဲ့ ရန်သူတွေက မဆောက်နိုင်အောင်လုပ်လိုက်တယ်။ ဒါကြောင့် ယေရုရှလင်မြို့ကိုရောက်လို့ ၂၂ နှစ်ကြာမှပဲ ဗိမာန်တော်ဆောက်လို့ ပြီးသွားတယ်။

နောက်တစ်ချက်က ဧဇရ ယေရုရှလင်မြို့ကိုသွားပြီး ဗိမာန်တော်ကိုမွမ်းမံစီချယ်တဲ့အကြောင်းပဲ။ အဲဒါကတော့ ဗိမာန်တော်ပြီးစီးလို့ ၄၇ နှစ်အကြာမှာဖြစ်တယ်။ ဧဇရ ခုလိုလည်ပတ်လို့ ၁၃ နှစ်အကြာမှာ နေဟမိက ပျက်နေတဲ့ယေရုရှလင်မြို့ရိုးကိုပြုပြင်ဖို့ အထောက်အကူပြုခဲ့တယ်။ အဲဒီအချိန်အထိ နှစ်ပေါင်း ၁၅၂ နှစ်ရှည်လျားတဲ့ရာဇဝင်ကို အပိုင်း ငါး က တင်ပြလိုက်တယ်။