မေတ္တာနှင့်အလုပ်မွန်ကိုအားပေး လှုံ့ဆော်သည့် အစည်းအဝေးများ

ကနဦးခရစ်ယာန်တို့သည် သွန်သင်ညွှန်ကြားမှုကိုခံယူရန်နှင့် တည်ဆောက်မှုဖြစ်စေသည့် ပေါင်းသင်းမှုအတွက် ကိုယ်ပိုင်အိမ်များတွင် တွေ့ဆုံစည်းဝေးကြသည်။ ယနေ့ယေဟောဝါသက်သေတို့၏အသင်းတော်များသည် တစ်ပတ်လျှင်သုံးကြိမ်တွေ့ဆုံစည်းဝေးကြသည်။ ဤအစည်းအဝေးများမှ တစ်ခုခုကိုတက်ရောက်ရန်သင့်အားခေါ်ဖိတ်ပါသည်။ သူတို့၏အစည်းအဝေးများသည် ဘာသာရေးထုံးတမ်းစဉ်လာများအရမဟုတ်ဘဲ ဘုရားရေးရာအသိပညာအပေါ်ဗဟိုပြုထားသည်။ အစည်းအဝေးကို သီချင်းနှင့်ဆုတောင်းခြင်းဖြင့်စတင်သည်။ အဆုံးသတ်သည်။ တက်ရောက်ခမရှိ၊ အလှူငွေကောက်ခံခြင်းမရှိပါ။—တမန်တော် ၄:၂၃-၃၁၊ ၁၄:၂၂၊ ၁၅:၃၂၊ ၃၅။ ရောမ ၁၆:၅။ ကောလောသဲ ၄:၁၅။

သင်ပထမဆုံးတက်ရောက်သည့် အစည်းအဝေးမှာ ၄၅ မိနစ်ကြာသည့် လူထုဟောပြောပွဲဖြစ်နိုင်သည်။ ယင်းအစည်းအဝေးတွင် ကျမ်းစာအယူဝါဒများ၊ ပရောဖက်ပြုချက်များ၊ ခရစ်ယာန်အသက်တာအပေါ်သွန်သင်ဆုံးမချက်များပါဝင်သည်။ ဟောပြောချက်ပြီးနောက် ကင်းမျှော်စင် မှဆောင်းပါးတစ်ခုကို သုံးကာအသင်းတော်လိုက်ကျမ်းစာလေ့လာသည့် အစီအစဉ်ဖြစ်သည်။ ယင်းအစီအစဉ်တွင်ပါဝင်သောအရာများမှာ ကင်းမျှော်စင်မှအပိုဒ်တစ်ပိုဒ်ကို ဖတ်လိုက်သည်။ သင်တန်းမှူးက ယင်းအပိုဒ်နှင့်ဆိုင်သောဆွေးနွေးရန် မေးခွန်းထုတ်လိုက်ပြီး ပရိသတ်ထဲမှ လက်ထောင်ခြင်းဖြင့် လွတ်လပ်စွာပါဝင်ဖြေဆိုနိုင်သည်။ အများအားဖြင့်အဖြေများကို သက်ဆိုင်ရာအပိုဒ်များမှ ထုတ်နှုတ်ကြသည်။ ယင်းအစည်းအဝေးမှာတစ်နာရီကြာသည်။

၄င်းအပတ်အတွင်း၌ပင် ၄၅ မိနစ်စီကြာသော အခြားအစည်းအဝေးနှစ်ခုကိုကျင်းပသည်။ တစ်ခုမှာ သီအိုကရက်တစ်ဓမ္မအမှုဆောင်ကျောင်းဖြစ်သည်။ ကျမ်းစာပါအကြောင်းအရာများကို မည်သို့စုစည်းပြီး ထိရောက်စွာသွန်သင်ပေးနိုင်သည့်နည်းကို ဤကျောင်းကလေ့ကျင့်ပေးသည်။ ၂၁ မိနစ်ကြာအထူးညွှန်ကြားချက်နောက်တွင် ကြိုတင်တာဝန်ချထားခြင်းခံရသည့် ကျောင်းသားများသည် တိုတောင်းသောတင်ပြချက်တစ်ခုစီကိုတင်ပြကြသည်။ တင်ပြချက်တစ်ခုစီပြီးတိုင်း ကျောင်းကြီးကြပ်ရေးမှူးသည် ကျောင်းသားမည်သို့တိုးတက်နိုင်သည်များကို သွန်သင်ချက်ပေးသည်။ ဤကျောင်းတွင်အသုံးပြုရန်စာအုပ်များကို သတ်မှတ်ထားသည်။ အစည်းအဝေးမှန်မှန်တက်သူများ ဤကျောင်းတွင်စာရင်းသွင်းနိုင်သည်။ ဤနည်းဖြင့်သူတို့၏အသက်တာကို ခရစ်ယာန်စည်းမျဉ်းနှင့်ကိုက်ညီအောင်နေထိုင်ကြသည်။

နောက်ဆက်တွဲအစည်းအဝေးတစ်ခုမှာ လုပ်ငန်းတော်အစည်းအဝေးဖြစ်သည်။ တစ်အိမ်တက်ဆင်းသတင်းကောင်းတင်ပြခြင်းနှင့် အခြားဓမ္မအမှုဆောင်ခြင်းလုပ်ငန်းများအကြောင်းသုံးသပ်တင်ပြထားသည်။ အပိုင်း ၃ ပိုင်း သို့မဟုတ် ၄ ပိုင်းပါဝင်သည်။ ဤအပိုင်းတို့ကိုဟောပြောချက်၊ ဆွေးနွေးခန်း သို့မဟုတ် သရုပ်ပြများဖြင့် တင်ပြပြီး တစ်ခါတစ်ရံပရိသတ်လည်းပါဝင်စေသည်။ အများအားဖြင့် အစီအစဉ်ကိုကင်းမျှော်စင်အသင်းမှလစဉ်ထုတ် ၆ မျက်နှာပါ ကျွန်ုပ်တို့၏နိုင်ငံတော်ဓမ္မအမှု စာစောင်မှအခြေခံသည်။

တတိယအစည်းအဝေးတစ်ခုမှာ အသင်းတော်နယ်မြေအတွင်းရှိ ကိုယ်ပိုင်အိမ်များတွင် ကျင်းပလေ့ရှိသော အုပ်စုငယ်လေးများဖွဲ့၍ပတ်စဉ်လေ့လာသည့်အစီအစဉ်ဖြစ်သည်။ ဤလေ့လာမှုသည် ကျမ်းစာနှင့်နောက်ဆုံးထုတ်အသင်းမစာပေများပေါ်အခြေပြုထားသည်။ အုပ်စုငယ်သဖြင့် ဆွေးနွေးခန်းတွင် ပိုမိုပါဝင်ခွင့်နှင့်တက်ရောက်သူချင်းပိုမိုရင်းနှီးအကျွမ်းဝင်ခွင့်ရရှိကြသည်။

အသင်းတော်အစည်းအဝေးအများစုကို ယေဟောဝါသက်သေတို့ဆောက်လုပ်သည့်နိုင်ငံတော်ခန်းမများတွင် ကျင်းပလေ့ရှိသည်။ ယေဟောဝါသက်သေများ ကိုယ်တိုင်ထည့်ဝင်လှူဒါန်းရာများဖြင့်ဆောက်လုပ်ကြပြီး အများအားဖြင့်အခမဲ့စေတနာ့ဝန်ထမ်းလုပ်အားဖြင့် ပြီးမြောက်ကြသည်။ လှူဒါန်းလိုသူများအတွက် အစည်းအဝေးတိုင်းတွင် အလှူငွေသေတ္တာထားရှိပေးသည်။

အသင်းတော်အစည်းအဝေးများသည် ယေဟောဝါသက်သေတို့အားဟေဗြဲ ၁၀:၂၄၊ ၂၅ ပါ “ထိုမှတစ်ပါး၊ မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကိုကျင့်စေခြင်းငှာလည်းကောင်း တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက်ထောက်စာကြည့်ရှုကြကုန်အံ့။ လူအချို့တို့၏ ထုံးစံရှိသည်အတိုင်း အချင်းချင်းစည်းဝေးခြင်းအမှုကိုမရှောင်မလွှဲကြနှင့်။ အချင်းချင်းတို့ကိုတိုက်တွန်းနှိုးဆော်ကြလော့။ ကာလအချိန်ရောက်လုနီးသည်ကိုထောက်သဖြင့် သာ၍ကြိုးစားကြလော့” ဟူသောကျမ်းစာအကြံပေးချက်ကို လိုက်နာရန်ကူညီပေးသည်။

• ရှေးခရစ်ယာန်အစည်းအဝေးတို့၏အဘယ်အသွင်အပြင်များကို ယေဟောဝါသက်သေတို့၏အစည်းအဝေးများ၌မြင်တွေ့နိုင်သနည်း။

• ယေဟောဝါသက်သေများ မှန်မှန်ကျင်းပသည့်စည်းဝေးငါးခုတွင် တင်ပြသည့်အကြောင်းကိုအတိုချုပ်ဖော်ပြပါ။

• စည်းဝေးခန်းမများကိုမည်သို့ရရှိကြသနည်း။

[စာမျက်နှာ ၁၄ ပါ ရုပ်ပုံများ]

ကင်းမျှော်စင် သင်တန်းကိုင်နေသောအကြီးအကဲ

ယူနိုက်တက်စတိတ်

သီအိုကရက်တစ်ကျောင်းမြင်ကွင်း ၊ ဖဲရိုးကျွန်း

ကိုယ်ပိုင်အိမ်၌အုပ်စုလိုက်လေ့လာမှု ၊ ယာ့ပ်

ယေဟောဝါသက်သေများနှစ်ရက်နှင့်ဆောက်လုပ်ပြီးစီးသော နိုင်ငံတော်ခန်းမ

နျူးဘရောန်ဖဲလ်၊ တက္ကဆက်စ်၊ ယူအက်စ်အေ

[စာမျက်နှာ ၁၅ ပါ ရုပ်ပုံများ]

တိုင်းပြည်အသီးသီးမှနိုင်ငံတော်ခန်းမများ

ဂျပန်

ဩစတြေးလျ

ဩစတြီးယား

စပိန်