“ကြည့်ရှုလော့! ငါသည်ခပ်သိမ်းသောအရာတို့ကို အသစ်ဖန်ဆင်းသည်”

၁-၄။ (က) ကျွန်ုပ်တို့၏ မျက်နှာဖုံးပါ ရုပ်ပုံ၏ အဘယ်ကဏ္ဍများတွင် သင်ပါဝင်လိုသနည်း။ (ခ) ဤတွင် အဘယ်မျှော်လင့်ချက်ကို သင့်အားကမ်းလှမ်းပေးထားသနည်း။ (ဂ) ဤသို့သောမျှော်လင့်ချက်ကို ထောက်ခံသည့် သမ္မာကျမ်းစာကျမ်းချက်အချို့ကား အဘယ်နည်း။

ဤစာစောင်၏ မျက်နှာဖုံးပါ ရွှင်လန်းဝမ်းမြောက်နေသူများကို ရှုစားကြည့်လေ။ ထိုသူတို့အဝင် သင်ဖြစ်လိုပါသလော။ ‘ဖြစ်ချင်တာပေါ့’ ဟု သင်ဖြေမည်။ ဤတွင် လူသားအပေါင်းလိုလားသော ငြိမ်းချမ်းသာယာမှုကို တွေ့ရှိရသည်။ လူမျိုးပေါင်းစုံ၊ လူဖြူ၊ လူမည်း၊ လူဝါ၊ အားလုံးသောသူတို့သည် အိမ်ထောင်တစ်စုတည်းကဲ့သို့ ပေါင်းသင်းနေကြသည်။ ပျော်ရွှင်ကြည်နူးဖွယ်ပါတကား။ စည်းလုံးလိုက်လေခြင်း။ ဤသူတို့သည် နျူကလီးယားအန္တရာယ် သို့မဟုတ် အကြမ်းဖက်မှုဖြစ်မည်ကို စိုးရိမ်ပုံမရ။ ဤသာယာသောဥယျာဉ်အထက် အေးချမ်းသောမိုးကောင်းကင်ကို ပျက်စီးစေသော ဂျက်တိုက်လေယာဉ်များမတွေ့ရချေ။ စစ်သားများ၊ တင့်ကားများ၊ သေနတ်များ လုံးလုံးမတွေ့ရ။ ငြိမ်ဝပ်အေးချမ်းမှုရှိစေရန် ရဲတို့၏နံပါတ်တုတ်ကို အသုံးပြုဖို့ပင်မလို။ စစ်မှုနှင့်ရာဇဝတ်မှု လုံးဝမရှိချေ။ အိုးအိမ်ပြဿနာများလည်းမရှိပါ။ အကြောင်းမှာ၊ လူတိုင်း လှပတင့်တယ်သော ကိုယ်ပိုင်အိမ်များ၌ နေထိုင်ရကြသည်။

^၂ ကလေးတွေကိုလည်း ကြည့်လိုက်ပါဦး။ သူတို့ပြေးလွှားဆော့ကစားနေပုံက ကြည်နူးဖွယ်ကောင်းလှသည်။ ကစားဖေါ်ကစားဖက် တိရစ္ဆာန်များကိုလည်း ကြည့်လိုက်ပါဦး။ လူသားတို့နှင့်သာမက အချင်းချင်းနှင့်လည်း ငြိမ်ဝပ်စွာနေထိုင်ကြသဖြင့် ဤဥယျာဉ်တွင် သံလှောင်အိမ်များထားရှိစရာမလို။ ခြင်္သေ့နှင့်သိုးသငယ်တို့ပင် မိတ်ဆွေဖြစ်နေကြပြီ။ ပျံသန်းသွားလာနေကြသော ရောင်စုံကျေးငှက်များကိုလည်း ကြည့်လိုက်ပါ။ သူတို့၏နာပျော်ဖွယ် သီချင်းသံများနှင့် ကလေးများ၏ရယ်မောသံများကို နားစွင့်ကြည့်လိုက်ပါ။ လှောင်အိမ်များမရှိဟု ဆိုလိုသလော။ မှန်သည်။ အကြောင်းမှာ ဤနယ်ပယ်တွင် လွတ်လပ်စွာဝမ်းသာကြည်နူးနိုင်သည်။ ပန်းရနံ့ကို အနံ့ခံလိုက်ပါ။ စမ်းချောင်းရေ စီးဆင်းသံ၊ နေရောင်ခြည်၏ နွေးထွေးမှုတို့ကို ခံစားလိုက်ပါ။ ခြင်းတောင်းထဲရှိ သစ်သီးဝလံတို့၏အရသာကို မြည်းစမ်းလိုက်ရလျှင် ကောင်းလိုက်မည်ဖြစ်ခြင်း။ ဤကျက်သရေဖြာ ဥယျာဉ်ခြံမြေတွင် တွေ့မြင်ခံစားရလေသမျှသည် အကောင်းတကာ့အကောင်းဆုံးနှင့် သစ်သီးဝလံများလည်း အနံ့အရသာနှင့်ပြည့်ဝသော အမြိန်ရှက်ဆုံးအသီးအနှံများဖြစ်သည်။

^၃ ‘နေပါအုံး၊ သက်ကြီးရွယ်အိုတွေကော။ ဤပျော်ရွှင်သောလူ့ဘောင်တွင် သာယာချမ်းမြေ့မှု မခံစားရသလော’ ဟု တစ်ဦးတစ်ယောက်က မေးမြန်းမည်။ အမှန်မှာ သူတို့လည်းရှိနေကြပါသည်။ သို့သော် ပြန်ပျိုမျစ်နုနယ်နေကြသည်။ ဤဥယျာဉ်တွင် မည်သူမျှ သက်ကြီးရောဂါကြောင့် မသေပျောက်ပါ။ လူငယ်များသည် ရင့်ကျက်သည့်လူကြီးအရွယ်အထိ ကြီးပြင်းလာပြီး ဆက်၍အိုမင်းရင့်ရော်မသွားပေ။ အသက် ၂၀ ရှိရှိ၊ ၂၀၀ ရှိရှိ ဤဥယျာဉ်အတွင်းနေထိုင်သူသန်းပေါင်းများစွာတို့သည် ကျန်းမာသန်စွမ်းအားအင်အပြည့်နှင့် ဘဝပျော်မွေ့သူချည်းသာဖြစ်သည်။ သန်းပေါင်းများစွာ ဟုသင်ဆိုသလော။ မှန်သည်။ ဤဥယျာဉ်ကို မြေတစ်ပြင်လုံးပျံ့နှံ့ရန် တိုးချဲ့နေသည့်အတွက် သန်းပေါင်းများစွာနေထိုင်ကြမည်။ ဖူဂျီမှအင်ဒီးစ်၊ ဟောင်ကောင်မှ မြေထဲပင်လယ်၊ မြေကြီးစွန်းတိုင်အောင် သက်ရှိများပျော်မွေ့ရာ ငြိမ်းချမ်းသာယာကျက်သရေဖြာသော ကမ္ဘာဖြစ်လာမည်။ ပရဒိသုဥယျာဉ်အဖြစ်သို့ ကမ္ဘာချီပြုစုပျိုးထောင်ပေးနေသောကြောင့် ကမ္ဘာတစ်ခွင် ပရဒိသုပြန်လည်တည်ထောင်လာမည်မှာအမှန်။

^၄ ‘မယုံနိုင်စရာ’ ဟူ၍ သင်ပြောဆိုကောင်းပြောမည်။ ဦးဆုံး သာဓကပြစရာ အဖြစ်အပျက်များကိုကြည့်ပါ။ လက်ရှိဒုက္ခထူပြောသော အစီအစဉ်စနစ်ကိုကျော်ပြီး ကျွန်ုပ်တို့မျက်နှာဖုံးပါရုပ်ပုံတွင် ဖေါ်ပြထားသည့်ပရဒိသုထဲ သင်နှင့်သင့်မိသားစုဝင်နိုင်ခွင့်ရှိသည်။a

ပရဒိသုအကြောင်းဖေါ်ပြသည့် စာစောင်

၅။ (က) ဤအရာများကို အဘယ်စာစောင်က ဖြေရှင်းပေးသနည်း။ (ခ) ဤစာအုပ်သည် အဘယ်နည်းမျိုးဖြင့် ထူးခြားသောစာအုပ်ဖြစ်သနည်း။

^၅ ဤနှစ်သက်ကြည်နူးဖွယ်ရာအကြောင်း အလုံးစုံတို့ကို အကောင်းတကာ့အကောင်းဆုံးစာအုပ်တွင် ရှင်းပြထားသည်။ ယင်းကို သမ္မာကျမ်းစာဟုခေါ်ပါသည်။ အလွန်ရှေးကျသောစာအုပ်၊ အချို့အပိုင်းများဆိုလျှင် လွန်ခဲ့သောနှစ်ပေါင်း ၃၅၀၀ ကျော်ကတည်းက ရေးသားခဲ့သောစာအုပ်ဖြစ်သည်။ တစ်ကြိမ်တည်းတွင် မျက်မှောက်ခေတ်နေထိုင်မှုအတွက် ပညာရှိပြီး လက်တွေ့ကျသော ဩဝါဒကိုတင်ပြထားသည့် ခေတ်အမီဆုံးစာအုပ်လည်းဖြစ်သည်။ ယင်း၏ပရောဖက်ပြုချက်များက အနာဂတ်အတွက် တောက်ပသောမျှော်လင့်ချက်ပေးသည်။ သမ္မာကျမ်းတစ်အုပ်လုံး၏စာစောင်ရေ ၂၀၀၀၀၀၀၀၀၀ ကျော် သို့မဟုတ် ယင်းမှအဓိကအပိုင်းများကို ဘာသာစကား ၂,၂၀၀ ခန့်ဖြင့်ဝေငှခဲ့ပြီဖြစ်ရာ သမိုင်းတစ်လျှောက် အရောင်းအသွက်ဆုံး စာအုပ်လည်းဖြစ်သည်။

၆။ သန့်ရှင်းမြင့်မြတ်သည်ဟု ယူမှတ်ခံရသော အခြားစာပေအရေးအသားများနှင့် သမ္မာကျမ်းစာမည်သို့ ထူးခြားသနည်း။

^၆ မည်သည့်ဘာသာရေးစာစောင်မျှ ဤမျှကမ္ဘာချီဖြန့်ဝေခြင်းမရှိပါ။ အများအားဖြင့် အချို့တို့သည် ဤမျှရှေးမကျပေ။ ထိုကြောင့် မူလအရင်းခံ ဘာသာတရားကို သိရှိနားလည်ရန် သမ္မာကျမ်းစာကိုဖတ်ရှုရမည်။ ယင်းသည် လူသားအပေါင်းအတွက် စကြဝဠာတစ်ခုလုံးနှင့်ဆိုင်သောသတင်းပါရှိသည့် တစ်ခုတည်းသောစာစောင်ဖြစ်သည်။

၇။ စဉ်းစားတတ်သူများ သမ္မာကျမ်းစာအကြောင်း မည်သို့ဆိုခဲ့ပြီနည်း။

^၇ လူမျိုးအသီးသီး၊ လူတန်းစားအလွှာအသီးသီးမှ စဉ်းစားဆင်ခြင်တတ်သူများ သမ္မာကျမ်းစာ၏ ဉာဏ်ပညာနှင့် ပြောင်မြောက်သောအရေးအသားကို ချီးမွမ်းသြဘာပေးခဲ့ပြီ။ နာမည်ကျော်သိပ္ပံပညာရှင်၊ ဆွဲငင်အားနိယာမကို တွေ့ရှိခဲ့သူ ဆာ အိုက်ဇက် နျူတန် က “မည်သည့်သိပ္ပံအတတ်ထက်မဆို သမ္မာကျမ်းစာကို သာ၍ထောက်ခံသည်” ဟုဆိုဖူးသည်။ “လွတ်လပ်ရေးပေးရင်ပေး၊ မပေးရင်သေခြင်းပေး” ဟူသည့်စကားများကြောင့် နာမည်ကြီးလာသူ အမေရိကန်တော်လှန်ရေးခေါင်းဆောင် ပက်ထရစ်ခ် ဟင်နရီကလည်း ဤသို့ဆိုခဲ့ဖူးသည်။ “သမ္မာကျမ်းစာသည် ပုံနှိပ်ခဲ့သမျှ စာအုပ်အားလုံးနှင့် တန်ဖိုးညီသည်။” ဟိန္ဒူကဝိဆရာ မိုဟန်ဒပ်စ် ကေ ဂန္ဒီပင် အိန္ဒိယနိုင်ငံ၏ ဗြိတိသျှဘုရင်ခံချုပ်အား ဤသို့ပြောခဲ့ဖူးသည်။ “ဒီတောင်ပေါ်ဒေသနာမှာ ခရစ်တော်ချမှတ်ခဲ့တဲ့ သွန်သင်ချက်တွေကို ခင်ဗျားနိုင်ငံနဲ့ ကျုပ်နိုင်ငံ အတူတကွလိုက်လျှောက်ကြတဲ့အခါ ကျုပ်တို့နိုင်ငံရဲ့ပြဿနာများသာမကဘူး၊ တစ်ကမ္ဘာလုံးရဲ့ပြဿနာတွေကို ဖြေရှင်းပြီးသားဖြစ်မယ်။” ဂန္ဒီသည် သမ္မာကျမ်းစာပါ မဿဲအခန်းကြီး ၅ မှ ၇ အကြောင်းပြောဆိုနေခြင်းဖြစ်သည်။ ဤအခန်းများကို သင်ကိုယ်တိုင်ဖတ်ရှုပြီး ယင်း၏တန်ခိုးပါသော သတင်းတရားကို ခံစားချက်လှိုက်လှဲစွာဖြင့် သင်ထောက်ခံနိုင်မနိုင် ကြည့်ပါလေ။

အရှေ့တိုင်းစာစောင်—သမ္မာကျမ်းစာ

၈၊ ၉။ (က) သမ္မာကျမ်းစာကို အနောက်နိုင်ငံစာအုပ်ဟူ၍ခေါ်ခြင်းသည် အဘယ်ကြောင့်မှားသနည်း။ (ခ) သမ္မာကျမ်းစာကို မည်သို့ရေးသားခဲ့သနည်း။ အဘယ်ကာလအတွင်း ဖြစ်သနည်း။ (ဂ) သမ္မာကျမ်းစာကို စာကြည့်တိုက်ဟူ၍ အဘယ်ကြောင့်ခေါ်နိုင်သနည်း။ (ဃ) သမ္မာကျမ်းစာကိုရေးသားရန် လူပေါင်းမည်မျှကိုအသုံးပြုခဲ့သနည်း။ (င) သမ္မာကျမ်းစာ၏ မူလအစ ဇာစ်မြစ်အကြောင်း အချို့သူများ အဘယ်သက်သေထူသနည်း။

^၈ လူအများထင်သည့်အတိုင်း သမ္မာကျမ်းစာသည် အနောက်နိုင်ငံယဉ်ကျေးမှုမှ ထွက်ပေါ်လာသည်မဟုတ်။ ယင်းယဉ်ကျေးမှုကိုလည်း အမွှမ်းမတင်ပါ။ သမ္မာကျမ်းစာတစ်အုပ်လုံးနီးပါးကို အရှေ့တိုင်းနိုင်ငံများတွင် ရေးသားခဲ့သည်။ ကလောင်ရှင်အားလုံးတို့သည် အရှေ့တိုင်းသားများဖြစ်ကြသည်။ ဗုဒ္ဓမတိုင်မီ နှစ်ပေါင်းတစ်ထောင်၊ ဘီစီအီး ၁၅၁၃ ခုနှစ်တွင် အရှေ့အလယ်ပိုင်းဒေသနေ မောရှေသည် ကမ္ဘာဦးကျမ်းဟုခေါ်သော သမ္မာကျမ်းစာ၏ ပထမစာစောင်ကိုရေးသားရန် ဘုရားသခင်၏မှုတ်သွင်းခြင်းကိုခံခဲ့ရသည်။ ဤနိဒါန်းမှ နောက်ဆုံးကျမ်းစောင်၊ ဗျာဒိတ်ကျမ်းအထိ သမ္မာကျမ်းစာသည် ရှေ့နောက်ညီညွတ်သော အဓိကအကြောင်းတစ်ခုတည်းကို ဖေါ်ပြထားပါသည်။ ဗုဒ္ဓနောက်ပိုင်း နှစ်ပေါင်း ၆၀၀ ခန့်၊ စီအီး ၉၈ ခုနှစ်တွင် သမ္မာကျမ်းစာစောင်များ ပြီးပြည့်စုံလင်ခဲ့သည်။ သမ္မာကျမ်းစာတွင် ကျမ်းစောင် ၆၆ စောင်ရှိသည်ကို သင်သိပါသလော။ မှန်သည်။ သမ္မာကျမ်းစာကိုယ်နှိုက် စာကြည့်တိုက်လေးတစ်ခုဖြစ်သည်။

^၉ ဤနည်းဖြင့် မောရှေခေတ်မှ နှစ်ပေါင်း ၁၆၀၀ ကျော်အချိန်အထိ သမ္မာကျမ်းစာ၏ ရှေ့နောက်ညီညွတ်သောမှတ်တမ်းကို လူ ၄၀ ခန့်ရေးသားခဲ့ကြသည်။ သူတို့၏အရေးအသားများသည် သာမန်လူသားထက်ကြီးမားသောတန်ခိုးတော်၏ မှုတ်သွင်းခြင်းအားဖြင့်ဖြစ်ကြောင်း သူတို့သက်သေထူပြောဆိုခဲ့သည်။ ခရစ်ယာန်တမန်တော်ပေါလု ဤသို့ရေးသားခဲ့သည်။ “ကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍ . . . ဩဝါဒပေးခြင်း၊ အပြစ်ကိုဖေါ်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်း ကျေးဇူးများကိုပြုတတ်၏။”b (၂ တိမောသေ ၃:၁၆) တမန်တော်ပေတရုကလည်း “ကျမ်းစာ၌ပါသော အနာဂတ္တိစကားမည်သည်ကား၊ ကိုယ်အလိုအလျောက် အနက်မပေါ် . . .။ အကြောင်းမူကား၊ အနာဂတ္တိစကားသည် လူ့အလိုအားဖြင့်ဖြစ်ဖူးသည်မဟုတ်။ ဘုရားသခင်၏သန့်ရှင်းသောသူတို့သည် သန့်ရှင်းသောဝိညာဉ်တော်၏ တိုက်တွန်းတော်မူခြင်းကိုခံရ၍ ဟောပြောကြ၏။”—၂ ပေတရု ၁:၂၀၊ ၂၁။ ၂ ဓမ္မရာဇဝင် ၂၃:၂။ လုကာ ၁:၇၀။

၁၀။ (က) ကျွန်ုပ်တို့ခေတ်တိုင်အောင် သမ္မာကျမ်းစာမည်သို့ရောက်ရှိလာသနည်း။ (ခ) မှုတ်သွင်းခံမူရင်းကျမ်းကို ကိုင်ဆောင်ထားကြောင်း အဘယ်ကြောင့်စိတ်ချနိုင်သနည်း။

^၁၀ ယနေ့တိုင် သမ္မာကျမ်းစာတည်ရှိနေခြင်းသည်လည်း အလွန်အံ့သြစရာကောင်းပါသည်။ လွန်ခဲ့သောအနှစ် ၅၀၀ ခန့်က ပုံနှိပ်တတ်လာသည့်အချိန်မတိုင်မီအထိ နှစ်ထောင်ချီ၍ သမ္မာကျမ်းစာမိတ္တူများကို လက်ဖြင့်ကူးရေးယူခဲ့ရကြသည်။ ရှေးခေတ်က အခြားမည်သည့် ပြောင်မြောက်သောစာပေကိုမျှ ဤမျှလောက် ဝီရိယစိုက်ထုတ်ကူးရေးယူခြင်း မရှိခဲ့ပေ။ ထပ်ခါတလဲ ကူးယူကြရာတွင် အထူးဂရုစိုက်ကူးရေးသည်။ ဤကျမ်းကူးဆရာများသည် အမှားအနည်းအကျဉ်းသာပြုခဲ့သည်။ ယင်းတို့ကိုနှိုင်းယှဉ်ကြည့်သော် ဘုရားသခင်မှုတ်သွင်းခဲ့သည့် မူရင်းစာစောင်မှန်ကန်ကြောင်း ထင်ရှားစေခဲ့သည်။ သမ္မာကျမ်းစာမိတ္တူကျမ်းများကို ပိုင်ပိုင်နိုင်နိုင်တတ်မြောက်သူ ဆာ ဖရက်ဒရစ် ကင်ညွန် က “သမ္မာကျမ်းစာသည် မူရင်းအတိုင်း ကျွန်ုပ်တို့လက်သို့ ရောက်ရှိလာသည်ဟူသော အချက်ကို မယုံသင်္ကာဖြစ်စရာ အကြောင်းဘာမျှမရှိ” ဟုဆိုသည်။ ယနေ့ သမ္မာကျမ်းစာတစ်အုပ်လုံး သို့မဟုတ် အပိုင်းအချို့၏ လက်ရေးစာမူ ၁၆၀၀၀ ခန့်ရှိနေသေးသည်။ အချို့တို့မှာ ခရစ်တော်မတိုင်မီ ဒုတိယရာစုကတည်းက စာမူများဖြစ်သည်။ ထို့ပြင် ဟေဗြဲ၊ အာရမိတ် နှင့် ဂရိဘာသာတို့ဖြင့် မူရင်းရေးခဲ့သောသမ္မာကျမ်းစာကို ကမ္ဘာပေါ်ရှိ ဘာသာစကားပေါင်းအားလုံးနီးပါးသို့ တိကျစွာပြန်ဆိုထားသည့် ကျမ်းစောင်များရှိပါသည်။

၁၁။ ယခုခေတ် အဘယ်တွေ့ရှိချက်များသည် သမ္မာကျမ်းစာမှတ်တမ်းနှင့် ညီညွတ်သနည်း။

^၁၁ သမ္မာကျမ်းစာသည် မတိကျပါဟုဆိုကာ အချို့သူများ ပြစ်တင်ဝေဖန်ကြသည်။ သို့ရာတွင် များမကြာမီက သမ္မာကျမ်းစာပါ တိုင်းနိုင်ငံများရှိ ရှေးခေတ်ကမြို့တော်အပျက်အယွင်းများကို ရှေးဟောင်းသုတေသနပညာရှင်များ တူးဖေါ်ခဲ့ရာ ရှေးအကျဆုံး သမ္မာကျမ်းစာမှတ်တမ်းများ၌ပင် ဖေါ်ပြထားသည့် လူနှင့်နေရာနာမည်များအတိုင်း ရှိခဲ့ဖူးကြောင်း သံသယမရှိစေရန်သက်သေထူသည့် ကမ္ပည်းကျောက်စာများနှင့် အခြားသာဓကများကို တွေ့ရှိခဲ့ပေပြီ။ သမ္မာကျမ်းစာဖေါ်ပြသည့်အတိုင်း ရှေးနှစ်ပေါင်း ၄၀၀၀ ကျော်က နောဧခေတ်တွင် ကမ္ဘာချီရေလွှမ်းမိုးဘေးဖြစ်ခဲ့ကြောင်း ထောက်ခံသည့်သာဓက မြောက်မြားစွာကို သူတို့တူးဖေါ်ရရှိခဲ့ပြီ။ ယင်းနှင့်စပ်လျဉ်း၍ နာမည်ကျော် ရှေးဟောင်းသုတေသနပညာရှင် မင်းသား မီကာဆာ က “ရေလွှမ်းမိုးဘေး အမှန်ဖြစ်ခဲ့သလော။ . . . အမှန်တကယ်ရေလွှမ်းမိုးခဲ့ကြောင်း ခိုင်လုံစွာသက်သေထူနိုင်ပြီ” ဟုဆိုခဲ့သည်။c

သမ္မာကျမ်းစာ၏ ဘုရားသခင်

၁၂။ (က) ဘုရားသခင်နှင့်ပတ်သက်၍ အချို့မည်သို့ကဲ့ရဲ့ပြောဆိုသနည်း။ (ခ) ဖခင်တစ်ပါးအဖြစ် ဘုရားသခင်ကို သမ္မာကျမ်းစာက အဘယ်ကြောင့်ဖေါ်ပြသနည်း။ (ဂ) ဘုရားသခင်၏နာမတော်ကား မည်သို့ဖြစ်ကြောင်း သမ္မာကျမ်းစာတင်ပြသနည်း။

^၁၂ သမ္မာကျမ်းစာကို အချို့ပြစ်တင်ကဲ့ရဲ့ခဲ့သည်နည်းတူ အခြားသူများသည် အနန္တတန်ခိုးရှင် ဘုရားသခင်ရှိကြောင်းကို ပြက်ရယ်ပြုကြသည်။ (၂ ပေတရု ၃:၃-၇) သူတို့က ‘ဘုရားသခင်ကိုမှမတွေ့ရတာ၊ သူ့ကိုဘယ်လိုယုံနိုင်မှာလဲ။ လူထက်ကြီးမြတ်တဲ့ မျက်မြင်မရဖန်ဆင်းရှင် ရှိပါတယ်လို့ သက်သေပြနိုင်မလား။ အရာရာတိုင်းမှာ ဘုရားသခင်ရှိတယ်မဟုတ်လား’ ဟုဆိုကြသည်။ အခြားသူများမူ ‘ဘုရားမရှိပါဘူး’ ဟုဆိုသည်။ သို့ရာတွင် ကျွန်ုပ်တို့အားလုံး မြေကြီးသားဖခင်တစ်ဦးမှ အသက်ရရှိလာခဲ့သည်နည်းတူ ကျွန်ုပ်တို့၏ပထမဘိုးဘေးများသည်လည်း ကောင်းကင်ခမည်းတော် သို့မဟုတ် ဖန်ဆင်းရှင်တစ်ဦးထံမှ အသက်ရရှိခဲ့သည်။ ကိုယ်တော်၏ကိုယ်ပိုင်အမည်မှာ ယေဟောဝါဖြစ်တော်မူသည်။—ဆာလံ ၈၃:၁၈။ ၁၀၀:၃။ ဟေရှာယ ၁၂:၂။ ၂၆:၄။

၁၃။ လူသားတို့အား အဘယ်နည်းနှစ်နည်းဖြင့် ကိုယ်တော်ရှိကြောင်းဖေါ်ပြတော်မူသနည်း။

^၁၃ မိမိအကြောင်းကို ထူးခြားသောနည်းနှစ်နည်းဖြင့် လူသားတို့အား ယေဟောဝါဖေါ်ပြတော်မူခဲ့ပြီ။ အဓိကနည်းက ကိုယ်တော်၏သမ္မာတရားနှင့် ထာဝရရည်ရွယ်တော်မူချက်များကို ထင်ရှားစေသည့် သမ္မာကျမ်းစာအားဖြင့်ဖြစ်သည်။ (ယောဟန် ၁၇:၁၇။ ၁ ပေတရု ၁:၂၄၊ ၂၅) ကျန်တစ်နည်းမှာ ဖန်ဆင်းခြင်းအားဖြင့်ဖြစ်သည်။ မိမိဝန်းကျင်ရှိ အရာခပ်သိမ်းကို လေ့လာစူးစမ်းခြင်းအားဖြင့် လက်ရာတော်များထဲတွင် ရောင်ပြန်ဟပ်သည့် ကြီးမြတ်သော အရည်အသွေးများပိုင်ဆိုင်သူ၊ ဖန်ဆင်းရှင် ဘုရားရှိရမည်အကြောင်း များစွာသောသူတို့ သဘောပေါက်လာကြပြီ။—ဗျာဒိတ် ၁၅:၃၊ ၄။

၁၄။ ယေဟောဝါအကြောင်း သမ္မာကျမ်းစာက ဘာပြောထားသနည်း။

^၁၄ သမ္မာကျမ်းစာ၏ အာဘော်ရှင်ကား ယေဟောဝါဘုရားသခင်ဖြစ်သည်။ ကိုယ်တော်သည် ကြီးမြတ်သောနံဝိညာဉ်ဖြစ်တော်မူ၍ အစဉ်ထာဝရတည်ရှိတော်မူသည်။ (ယောဟန် ၄:၂၄။ ဆာလံ ၉၀:၁၊ ၂) ကိုယ်တော်၏နာမတော် “ယေဟောဝါ” ကား သတ္တဝါများအတွက် ကိုယ်တော်၏ရည်ရွယ်တော်မူချက်ကို အာရုံပြုစေသည်။ လူဆိုးကိုဖျက်ဆီးပြီး ကိုယ်တော်ကို ချစ်မြတ်နိုးသူတို့၊ ပရဒိသုမြေကြီးပေါ် အသက်ရှင်နေထိုင်နိုင်မည်အကြောင်း သူတို့ကိုကယ်တင်ခြင်းအားဖြင့် ထိုနာမတော်မြတ်ကို ဂုဏ်တင်ရန် ရည်ရွယ်တော်မူသည်။ (ထွက်မြောက်ရာ ၆:၂-၈။ ဟေရှာယ ၃၅:၁၊ ၂) အနန္တတန်ခိုးရှင် ဘုရားသခင်ဖြစ်တော်မူသောကြောင့် ယင်းသို့ပြုရန် တန်ခိုးရှိတော်မူသည်။ စကြဝဠာ၏ဖန်ဆင်းရှင်အနေနှင့် လူမျိုးဆိုင်ရာ သာမန်ဘုရားများ နှင့် ရုပ်တုများထက် များစွာကြီးမြတ်တော်မူသည်။—ဟေရှာယ ၄၂:၅၊ ၈။ ဆာလံ ၁၁၅:၁၊ ၄-၈။

၁၅။ အသိဉာဏ်ပညာရှိသောလူသားများ ဖန်ဆင်းခြင်းကိုလေ့လာရာတွင် အဘယ်သို့ဆုံးဖြတ်ရန် အကြောင်းပေါ်လာပြီနည်း။

^၁၅ မကြာမီက ရာစုနှစ်များအတွင်း သိပ္ပံပညာရှင်များသည် ဖန်ဆင်းရာများကို အချိန်ကုန်ခံ လေ့လာသုံးသပ်ခဲ့သူတို့ မည်သို့ဝန်ခံရကြပြီနည်း။ လျှပ်စစ်ပညာကို ဦးစွာလေ့လာခဲ့သူများအနက် တစ်ဦးအဝင်ဖြစ်သူ နာမည်ကျော် ဗြိတိသျှရူပဗေဒပညာရှင် လော့ဒ် ကဲလ်ဗင် ဤသို့ဆိုခဲ့သည်။ “သိပ္ပံကိုစေ့ငစွာလေ့လာလေ ဘုရားမဲ့ဝါဒနှင့်တူသော မည်သည့်အရာမဆို ဝေးကွာသွားလေဖြစ်သည်။” ဥရောပသား သိပ္ပံပညာရှင် အဲယ်လ်ဘတ် အိုင်စတိုင်းသည် ဘုရားမဲ့ဝါဒီတစ်ဦးအဖြစ် နာမည်ထွက်သော်လည်း ဤသို့ဝန်ခံပါသည်။ “ကျွန်ုပ်တို့ဝိုးတဝါး တွေ့ရှိသဘောပေါက်နိုင်သည့် စကြဝဠာ၏အံ့ဖွယ်တည်ဆောက်ပုံကို ကျွန်ုပ်ပြန်စဉ်းစားတွေးတောရုံသာရှိသည်။ သဘာဝတရား၌ ထင်ရှားသောဉာဏ်စွမ်း၏ အလွန့်အလွန်သေးငယ်သောအစိတ်အပိုင်းကလေးကို နားလည်ရန် ကြိုးစားနိုင်ရုံသာရှိသည်။” အမေရိကန်သိပ္ပံပညာရှင်၊ နိုဘဲလ်ဆုရသူ အာသာ ဟော်လီ ကောမ်တန် ဤသို့ဆိုသည်။ “‘အစအဦး၌ ဘုရားသခင်သည်’ ဟူသော အထည်ဝါဆုံးစကားများ မှန်ကန်ကြောင်း စည်းစနစ်ကျ စကြဝဠာကြီးကသက်သေထူသည်။” ဤတွင် သမ္မာကျမ်းစာ၏ အဖွင့်စကားများကို သူကိုးကားနေခြင်းဖြစ်သည်။

၁၆။ ဘုရားသခင်၏ ဖန်ဆင်းခြင်းဆိုင်ရာ ဉာဏ်ပညာတော်နှင့် တန်ခိုးတော်ကို စကြဝဠာကြီးက မည်သို့ချီးမွမ်းသနည်း။

^၁၆ လဟာပြင်ထဲထိုးထွင်းရောက်ရှိနိုင်၍ မိမိတို့ဉာဏ်စွမ်းနှင့် သိပ္ပံတတ်မြောက်အောင်မြင်မှုများကို အာဏာကြီးမားသော တိုင်းနိုင်ငံများ၏မင်းများ ဝါကြွားနေကြပေမည်။ သို့သော် ကမ္ဘာမြေကြီးကိုလှည့်ပတ်နေသော လကမ္ဘာနှင့် နေကိုပတ်ရစ်သော ဂြိုဟ်ဟ်များနှင့်နှိုင်းယှဉ်လိုက်လျှင် သူတို့၏ဂြိုဟ်ဟ်တုများသည် သေးသိမ်လှသည်။ ယေဟောဝါ၏ဖန်ဆင်းထားသည့် ကောင်းကင်နဂါးငွေ့တန်း သန်းကုဋေချီရှိ၍ တစ်ခုစီတွင် ကျွန်ုပ်တို့၏နေဂြိုဟ်ဟ်ကဲ့သို့ နေပေါင်း သန်းကုဋေချီရှိရုံမက ယင်းတို့ကို ကိုယ်တော်ဖွဲ့စည်းထားပုံ၊ အတိုင်းအတာမရှိ အခါသမယအတွင်း လဟာပြင်တွင် တည်နေစေပုံနှင့် ဤသေမျိုးလူသားများ၏ အောင်မြင်မှုများကို နှိုင်းယှဉ်လိုက်သော်မပြောပလောက်ပါတကား။ (ဆာလံ ၁၉:၁၊ ၂။ ယောဘ ၂၆:၇၊ ၁၄) ယင်းကြောင့် လူသားကိုနှံကောင်ကဲ့သို့၊ တန်ခိုးအာဏာကြီးမားသော လူအမျိုးမျိုးတို့ကို “အဘယ်မျှမဟုတ်သကဲ့သို့” ယေဟောဝါမှတ်တော်မူရခြင်းကို အံ့ဩစရာမလိုပါ။—ဟေရှာယ ၄၀:၁၃-၁၈၊ ၂၂။

၁၇။ ဖန်ဆင်းရှင်ကိုယုံကြည်ရန် ဆင်ခြင်တုံတရားနှင့် အဘယ်ကြောင့်ညီညွတ်သနည်း။

^၁၇ အိမ်တစ်လုံးတွင် အသင်နေထိုင်ပါသလော။ သင့်အိမ်ကိုသင်မဆောက်၊ ဆောက်လုပ်သူကိုလည်း သင်သိချင်မှသိမည်။ သို့ရာတွင် အိမ်ဆောက်သူကိုသင်မသိသဖြင့် ဉာဏ်ရှိသူတစ်ဦး ယင်းကိုဆောက်ကြောင်းအမှန်တရားကို သင်လက်မခံဘဲ မနေပါ။ အိမ်တစ်ဆောင် သူ့ဖာသာတည်ရှိလာသည်ဟု ဆင်ခြင်ပါက ရူးမိုက်ရာကျမည်။ စကြဝဠာကြီးနှင့် ယင်း၌ရှိသမျှအရာတို့ ဖြစ်ပေါ်လာနိုင်ရန် အတိုင်းမသိ ကြီးမားသောဉာဏ်ပညာလိုအပ်နေရာ ဉာဏ်ပညာရှင်ဖန်ဆင်းသခင် ရှိရမည်ဟု ဝန်ခံခြင်းသည် ဆင်ခြင်တုံတရားနှင့် ညီညွတ်သည်မဟုတ်လော။ ဦးနှောက်မရှိသူသာလျှင် “ယေဟောဝါမရှိ” ဟူ၍ သူ၏နှလုံးတွင်ဆိုမည်။—ဆာလံ ၁၄:၁၊ NW။ ဟေဗြဲ ၃:၄။

၁၈။ ဘုရားသခင်သည် ပုဂ္ဂိုလ်တစ်ပါးဖြစ်ကြောင်း၊ ချီးမွမ်းခံထိုက်တော်မူကြောင်း အဘယ်အရာကထင်ရှားစေသနည်း။

^၁၈ ပန်းမာလာ၊ ကျေးငှက်များ၊ တိရစ္ဆာန်၊ လူသားဟုခေါ်သည့် ချီးမွမ်းဖွယ်ဖန်ဆင်းရာ၊ အံ့သြလောက်သည့် အသက်ရှင်ခြင်း၊ မွေးဖွားခြင်း အံ့ချီးဖွယ်အကြောင်းအရာ အားလုံးတို့သည် ယင်းတို့ကို ဖြစ်ပွားစေခဲ့သော မျက်မြင်မရဉာဏ်တော်ရှင် ရှိကြောင်းသက်သေထူသည်။ (ရောမ ၁:၂၀) အသိဉာဏ်ရှိလျှင် အသိစိတ်ရှိရမည်။ အသိစိတ်ရှိလျှင် ပုဂ္ဂိုလ်တစ်ဦးရှိရမည်။ အချုပ်အခြာအသိဉာဏ်ရှင်ကား အချုပ်အခြာပုဂ္ဂိုလ်၊ အရာခပ်သိမ်းတို့ကို ဖန်ဆင်းရှင်၊ အသက်စမ်းရေတွင်း ဖြစ်တော်မူသည်။ (ဆာလံ ၃၆:၉) ဖန်ဆင်းရှင်သည် အမှန်ပင် ချီးမွမ်းဝတ်ပြုခံထိုက်တော်မူသည်။—ဆာလံ ၁၀၄:၂၄။ ဗျာဒိတ် ၄:၁၁။

၁၉။ (က) စစ်မှု၌ ဘုရားပေးအောင်ပွဲခံရသည်ဟု ယနေ့အဘယ်လူမျိုးမျှ အဘယ်ကြောင့်မဝါကြွားနိုင်သနည်း။ (ခ) တိုင်းနိုင်ငံတို့၏စစ်မှုတွင် ဘုရားသခင်အဘယ်ကြောင့် လုံးဝမပါဝင်သနည်း။

^၁၉ ဒုတိယကမ္ဘာစစ်အတွင်း အခက်အခဲဒုက္ခများခံစားခဲ့ရ၍ ဘုရားကိုအယုံအကြည်ပျောက်ကွယ်သွားသူအချို့ရှိသည်။ ထိုအချိန်က နိုင်ငံအသီးသီးသည် ကာသိုလိပ်၊ ပရိုတက်စတင့် သို့မဟုတ် အရှေ့တိုင်းဘာသာရပ်များတို့ဆိုင်ရာ မိမိတို့၏ “ဘုရားသခင်” ကို တသခဲ့ကြသည်။ ဤတိုင်းနိုင်ငံအချို့ကို “ဘုရားသခင်” အောင်ပွဲခံစေပြီး အခြားသူတို့ကိုမူ စစ်ရှုံးစေတော်မူသည်ဟု ဆိုရပါမည်လော။ ဤတိုင်းနိုင်ငံတစ်နိုင်ငံမှ စစ်မှန်သောဘုရားသခင်ကို အကူအညီတောင်းဆိုခြင်းမဟုတ်ကြောင်း သမ္မာကျမ်းစာတင်ပြပါသည်။ တိုင်းနိုင်ငံအသီးသီးတို့၏ ပဋိပက္ခဖြစ်မှုနှင့် စစ်ရေးတို့ကို ကောင်းကင်နှင့်မြေကြီး ဖန်ဆင်းတော်မူရှင် ယေဟောဝါဘုရားသခင်၌ တာဝန်မရှိပါ။ (၁ ကောရိန္သု ၁၄:၃၃) ဤလောက၏ နိုင်ငံရေးနှင့် စစ်မှုဆိုင်ရာ တိုင်းနိုင်ငံသားများ၏ အကြံအစည်တို့ထက် ကိုယ်တော်၏အကြံအစည်တော်များ မြင့်မားသည်။ (ဟေရှာယ ၅၅:၈၊ ၉) ထိုနည်းတူ စစ်မှန်သောဝတ်ပြုမှုနှင့် ယေဟောဝါအားကိုးကွယ်ခြင်းသည် တိုင်းနိုင်ငံတို့၏စစ်ရေးတွင် မပတ်သက်ချေ။ တိုင်းနိုင်ငံဆိုင်ရာ ဘုရားများထက် ယေဟောဝါ ကြီးမြတ်တော်မူသည်။ လူမျိုးအသီးသီးရှိ ငြိမ်းချမ်းမှုကိုမြတ်နိုးသူအပေါင်းတို့၏ ဘုရားသခင်အဖြစ် ကိုယ်တော်သည် ထူးခြားတော်မူသည်။ သမ္မာကျမ်းစာဆိုသည်အတိုင်းပင်၊ “ဘုရားသခင်သည် လူမျက်နှာကို မှတ်တော်မမူ။ လူအမျိုးမျိုးတို့တွင် ဘုရားသခင်ကိုကြောက်ရွံ့၍ တရားသဖြင့် ကျင့်ဆောင်သောသူသည် အထံတော်၌ မျက်နှာရသည်။” (တမန်တော် ၁၀:၃၄၊ ၃၅) နိုင်ငံအသီးသီးရှိ ဖြောင့်မတ်ခြင်းတရားကိုမြတ်နိုးသူများ ယခုသမ္မာကျမ်းစာကိုလေ့လာနေကြပြီး လူသားတို့၏ဖန်ဆင်းရှင် “ငြိမ်သက်ခြင်း၏အရှင် [စစ်မှန်သော] ဘုရားသခင်” ကိုဝတ်ပြုကိုးကွယ်နေကြပါသည်။—ရောမ ၁၆:၂၀။ တမန်တော် ၁၇:၂၄-၂၇။

၂၀။ ခရစ်ယာန်ဘောင်သည် ခရစ်ယာန်မပီသ၍ ဘုရားကိုဆန့်ကျင်ဘက်ပြုကြောင်း အဘယ်အရာက တင်ပြသနည်း။

^၂၀ ‘သမ္မာကျမ်းစာရှိထားတဲ့ တိုင်းနိုင်ငံများက နျူကလီးယားလက်နက်များကို အလောတကြီးစုပုံနေတဲ့ နိုင်ငံများထဲ ပါဝင်နေတော့ သမ္မာကျမ်းစာရဲ့ဘုရားကို ဘယ်လိုယုံကြည်နိုင်မလဲ’ ဟုဆိုကြသည်။ အမှန်မှာ သမ္မာကျမ်းစာသည် အမြဲမှန်ကန်နေသော်လည်း တောင်ဝင်ရိုးစွန်းနှင့် မြောက်ဝင်ရိုးစွန်း ကွာဝေးသကဲ့သို့ ခရစ်ယာန်ဘောင်တိုင်းနိုင်ငံများသည် သမ္မာကျမ်းစာပါ ခရစ်ယာန်တရားစစ်နှင့် အလွန်ကွာခြားသည်။ ခရစ်ယာန်ဘာသာဝင်များဖြစ်သည်ဟု ဆိုကြသော်လည်း ကြောင်သူတော်ဆန်လှသည်။ သူတို့၌ သမ္မာကျမ်းစာရှိငြားလည်း ယင်း၏သွန်သင်ချက်များကို သူတို့မနာခံကြချေ။ ဟီရိုရှီးမားမြို့ကို ပထမအဏုမြူဗုံးကြဲရန် အမိန့်ပေးခဲ့သော အမေရိကန်သမ္မတသည် ကမ္ဘာ့အရေးအခင်းတွင် လူသားတို့ကိုလမ်းညွှန်ပေးရန် “ဟေရှာယ၊ ဒါမှမဟုတ် စိန့်တ်ပေါလ်သာပေါ်လာခဲ့ရင် ဘယ်လောက်ကောင်းမလဲ’ ဟု တစ်ချိန်က ရုတ်တရက်နှုတ်မှရွတ်ဆိုခဲ့ဖူးသည်။ သမ္မာကျမ်းစာပါ ဟေရှာယသဘောထား သူ့မှာရှိမည်ဆိုလျှင် အဏုမြူဗုံးကြဲခဲ့မည်မဟုတ်။ အကြောင်းမှာ “ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကို တံစဉ်ဖြစ်စေခြင်းငှာလည်းကောင်း ထုလုပ်ကြရမည်’ ဟုဟေရှာယထောက်ခံအားပေးခဲ့သည်။ ထို့ပြင် သမ္မာကျမ်းစာ၌ ပေါလုကိုယ်တိုင် “ငါတို့သည် လူဇာတိ၌ကျင်လည်သော်လည်း ဇာတိပကတိအလိုသို့ လိုက်၍ စစ်တိုက်ကြသည်မဟုတ်။ ငါတို့စစ်တိုက်၍ သုံးစွဲသော လက်နက်သည် ဇာတိပကတိလက်နက်မဟုတ်” ဟု မိန့်မြွက်ခဲ့သည်။ (ဟေရှာယ ၂:၄။ ၂ ကောရိန္သု ၁၀:၃၊ ၄) သို့ရာတွင် သမ္မာကျမ်းစာ၏ ပညာရပ်သြဝါဒများကို လိုက်နာမည့်အစား ခရစ်ယာန်ဘောင်တိုင်းနိုင်ငံများသည် ကိုယ့်ကိုယ်ကိုသတ်သေနေကြသော လက်နက်ပြိုင်ဆိုင်မှုတွင် ပါဝင်နေကြသည်။ သူတို့၏ သမ္မာကျမ်းစာကိုလိုက်နာသည့် ခရစ်ယာန်အမည်ခံမှု ဟူသ၍သည် မုသာမျှဖြစ်သည်။ ကိုယ်တော်၏အလိုတော်ကို မဆောင်ရွက်ကြသဖြင့် သူတို့ ဘုရားသခင်၏စီရင်ချက်ကိုခံရကြမည်။—မဿဲ ၇:၁၈-၂၃။ ဇေဖနိ ၁:၁၇၊ ၁၈။

ယေဟောဝါ၏ဖန်ဆင်းရာများနှင့် အံ့ဖွယ်ရာတန်ခိုးတော်များ

၂၁။ ဘုရားသခင်၏အံ့ဖွယ်ရာများကို သံသယဖြစ်စရာ အဘယ်ကြောင့်မရှိသင့်သနည်း။

^၂၁ ယေဟောဝါရှင်သည် ဖန်ဆင်းတော်မူ၍ အံ့ဖွယ်ရာတန်ခိုးတော်များကိုလည်း ပြုတော်မူသည်။ ရေကိုသွေးဖြစ်စေခြင်း၊ ပင်လယ်နီကို နှစ်ခြမ်းခွဲခြင်း၊ အပျိုကညာမှ ယေရှုဖွားမြင်လာခြင်း နှင့် သမ္မာကျမ်းစာပါ အခြားအခြားအံ့ဖွယ်ရာတန်ခိုးတော်များအကြောင်း သင်စဉ်းစားကြည့်ဖူးပါသလော။ လူသားသည် အသိဉာဏ်စွမ်းအကန့်အသတ်သာရှိရာ နေ့စဉ်နေဝင်နေထွက်ခြင်းကို အပြည့်အဝနားမလည်နိုင်သကဲ့သို့ ဤအံ့ဖွယ်ရာအချို့ မည်သို့မည်ပုံဖြစ်ပျက်ခဲ့သည်ကို မည်သည့်အခါမျှ နားလည်ကောင်းနားလည်မည်မဟုတ်ပေ။ လူကိုဖန်ဆင်းခြင်းသည် အံ့သြဖွယ်ရာဖြစ်သည်။ ယနေ့ ခေတ်လူသားများ ထိုအံ့ဖွယ်ရာကို မမြင်ခဲ့သော်လည်း ယနေ့သူအသက်ရှင်နေသည့်အတွက် ထိုအမှုဖြစ်ပျက်ခဲ့ကြောင်း သက်သေဖြစ်သည်။ သက်ရှိခပ်သိမ်း နှင့် စကြဝဠာတစ်ခွင်သည် အမှန်တကယ်ပင် အံ့ချီးဖွယ်ရာ အစဉ်ဖြစ်နေသည်။ ထိုကြောင့် ရှေးခေတ်အံ့ဖွယ်ရာများယနေ့မလိုသော်လည်း အချို့သောအချိန်အခါများတွင် အံ့ဖွယ်ရာများပြုတော်မူခဲ့ကြောင်း သမ္မာကျမ်းစာက ဖေါ်ပြခြင်းကို သံသယရှိသင့်သလော။

၂၂။ ဘုရားသခင်၏ ပထမဖန်ဆင်းခြင်းကို ဖေါ်ပြပါ။

^၂၂ ယေဟောဝါ၏ဖန်ဆင်းရာခပ်သိမ်းသည် အံ့သြဖွယ်ရာနှင့် အလွန်ချီးမွမ်းစရာကောင်းပေသည်။ သို့ရာတွင် သူ၏ပထမလက်ရာတော်သည် အံ့ချီးဖွယ်ရာအကောင်းဆုံးဖြစ်သည်။ ယင်းကား ဝိညာဏသားတစ်ပါး၊ ကိုယ်တော်၏ “သားဦး” ကိုဖန်ဆင်းခြင်းဖြစ်သည်။ (ကောလောသဲ ၁:၁၅) ဤကောင်းကင်သားတော်၏အမည်ကား “နှုတ်ကပတ်တော်” ဖြစ်သည်။ ဖန်ဆင်းခံရပြီးနောက် နှစ်ပရိစ္ဆေဒလွန်လေပြီးနောက် ကမ္ဘာမြေကြီးသို့ဆင်းသက်လာပြီး “လူသား၊ ယေရှုခရစ်” အမည်ခံယူခဲ့သည်။ (၁ တိမောသေ ၂:၅) ထိုအချိန်တွင် ကိုယ်တော်၏အကြောင်း ဤသို့ဆိုလေသည်။ “နှုတ်ကပတ်တော်သည်လည်း လူဇာတိအဖြစ်ကိုခံယူ၍ ကျေးဇူးတော်နှင့်လည်းကောင်း၊ သစ္စာတော်နှင့်လည်းကောင်း ပြည့်စုံလျက် ငါတို့တွင်တည်နေတော်မူသည်ဖြစ်၍ ခမည်းတော်၌ တစ်ပါးတည်းသောသားတော်၏ဘုန်းကဲ့သို့ သူ၏ဘုန်းတော်ကို ငါတို့သည်မြင်ရကြပြီ။”—ယောဟန် ၁:၁၄။

၂၃။ (က) ဘုရားသခင်နှင့် သားတော်၏တော်စပ်မှုကို မည်သို့ရှင်းပြနိုင်သနည်း။ (ခ) သားတော်အားဖြင့် ယေဟောဝါရှင်သည် အဘယ်အရာကိုဖန်ဆင်းသနည်း။

^၂၃ ယေဟောဝါနှင့်ကိုယ်တော်၏သားတော် တော်စပ်ပုံကို ဖခင်တီထွင်သော ပစ္စည်းများကို သားဖြစ်သူ ကူညီပြုလုပ်ပေးသည့် အလုပ်ရုံတစ်ခု၏ပိုင်ရှင်မန်နေဂျာနှင့် သူ၏သား တော်စပ်ပုံဖြင့် နှိုင်းယှဉ်နိုင်သည်။ သားဦးလည်းဖြစ်၊ လုပ်ဖေါ်ကိုင်ဖက်လည်းဖြစ်သူမှတစ်ဆင့် ဘုရားသခင့်သားတော်များဖြစ်သော အခြားနံဝိညာဉ်သတ္တဝါများစွာကို ယေဟောဝါဖန်ဆင်းတော်မူသည်။ နောင်တွင် သူတို့သည် ယေဟောဝါ၏သားတော်၊ ကိုယ်တော်၏ဗိသုကာရှင်သည် ကျွန်ုပ်တို့၏မျက်မြင်ရကောင်းကင်နှင့် နေထိုင်ရာကမ္ဘာမြေကြီးကို ဖြစ်ပေါ်လာစေခြင်း၌ ဝမ်းမြောက်အားရကြသည်။ ဤအရာများသည် ဖန်ဆင်းခြင်းအားဖြင့်ဖြစ်ကြောင်းကို သင်သံသယရှိနေသလော။ နှစ်ထောင်ပေါင်းများစွာအကြာတွင် သစ္စာရှိသူတစ်ဦးအားယေဟောဝါဤသို့မေးမြန်းခဲ့သည်။ “မြေကြီးအမြစ်ကိုငါတည်သောအခါ သင်သည်အဘယ်မှာရှိသနည်း။ နားလည်လျှင် ဖေါ်ပြလော့။ နံနက်ကြယ်တို့သည် တညီတညွတ်တည်း သီချင်းဆို၍ ဘုရားသခင့်သားအပေါင်းတို့သည် ဝမ်းမြောက်သဖြင့် ကြွေးကြော်ကြစဉ်” အဘယ်မှာရှိသနည်း။—ယောဘ ၃၈:၄၊ ၇။ ယောဟန် ၁:၃။

၂၄။ (က) ယေဟောဝါ၏ အဘယ်မြေကြီးဆိုင်ရာ ဖန်ဆင်းခြင်းသည် ထူးခြား၍ အဘယ်နည်းများဖြင့်နည်း။ (ခ) တိရစ္ဆာန်များမှ လူသားဆင့်ကဲဖြစ်လာသည်ဟုဆိုခြင်းသည် အဘယ်ကြောင့်ဆင်ခြင်တုံတရားနှင့် မညီညွတ်သနည်း။

^၂၄ အတန်ကြာလေသော် ဤကမ္ဘာမြေကြီးပေါ်မှ သက်ရှိအရာများဖြစ်သည့် သစ်ပင်ပန်းမာလာ၊ ငါး၊ ကျေးငှက်များနှင့် တိရစ္ဆာန်များကို ယေဟောဝါရှင်ဖန်ဆင်းတော်မူသည်။ (ကမ္ဘာဦး ၁:၁၁-၁၃၊ ၂၀-၂၅) ထိုနောက် ကိုယ်တော်၏ဗိသုကာရှင်အား ဘုရားသခင်က “ငါတို့၏ပုံသဏ္ဌာန်နှင့်တညီ တသဏ္ဌာန်တည်း လူကိုဖန်ဆင်းကြစို့။ . . . ထိုသို့ဘုရားသခင်သည် မိမိပုံသဏ္ဌာန်နှင့်အညီ လူကိုဖန်ဆင်းတော်မူ၏။ ဘုရားသခင်၏ပုံသဏ္ဌာန်နှင့်အညီ လူယောက်ျား၊ လူမိန်းမကို ဖန်ဆင်း” တော်မူသည်။ (ကမ္ဘာဦး ၁:၂၆၊ ၂၇) ဘုရားသခင်၏မြင့်မြတ်သောအရည်အချင်းများဖြစ်သည့် ချစ်ခြင်း၊ ဉာဏ်ပညာ၊ တရားမျှတခြင်း နှင့် တန်ခိုးပါ ဘုရားသခင်၏ပုံသဏ္ဌာန်နှင့် တညီတသဏ္ဌာန်တည်း ဖန်ဆင်းခံရသည့်အတွက် ပထမလူသားသည် တိရစ္ဆာန်များထက် သာ၍မြတ်သည်။ လူသည် ဆင်ခြင်သုံးသပ်နိုင်၍၊ အနာဂတ်အတွက် ကြိုတင်ကြံစည်နိုင်သည့်ပြင် ဘုရားကိုဝတ်ပြုကိုးကွယ်နိုင်စွမ်းရှိသည့်အတွက် သက်ရှိသတ္တဝါများမှထူးခြားသော အမျိုးအစားဖြစ်သည်။ တိရစ္ဆာန်များစဉ်းစားဆင်ခြင်ရန် အသိဉာဏ်မရှိပါ။ အသိဉာဉ်ဖြင့်သာ သူတို့အသက်ရှင်ကြသည်။ ဖန်ဆင်းရှင်မရှိဟုဆိုပြီး၊ အရည်အချင်းများပြည့်စုံသည့် အသိဉာဏ်ပညာရှိ လူသတ္တဝါသည် ဉာဏ်မရှိသောအဆင့်နိမ့်တိရစ္ဆာန်များမှ ဆင့်ကဲဖြစ်လာသည်ဟုဆိုခြင်းသည် မိုက်မဲလှပါသည်တကား။—ဆာလံ ၉၂:၆၊ ၇၊ ၁၃၉:၁၄။

၂၅၊ ၂၆။ (က) လူသားတို့ရှေ့ အဘယ်ကြီးမြတ်သောမျှော်လင့်ချက်ကို ချမှတ်ထားသနည်း။ (ခ) ကမ္ဘာမြေကြီးပေါ် လူဦးရေပေါက်ကွဲမှုဖြစ်စရာပြဿနာ အဘယ်ကြောင့်မရှိသနည်း။

^၂၅ “အရှေ့မျက်နှာ ဧဒင်အရပ်၌ဥယျာဉ်” တွင်လူကို ဘုရားသခင်နေရာချတော်မူသည်။ ကျွန်ုပ်တို့စာအုပ်မျက်နှာဖုံးပါဥယျာဉ်နည်းတူ သာယာသောဥယျာဉ်ဖြစ်သည်။ သို့သော် လူသားနှစ်ဦး၊ အာဒံနှင့်ဧဝသာရှိနေသေးသည်။ နောဧခေတ်၌ ရေလွှမ်းမိုးဘေးတွင် ပျက်စီးခဲ့သောကြောင့် ဤမူလပထမပရဒိသု မရှိတော့ချေ။ သို့သော် အရှေ့အလယ်ပိုင်းဒေသ၌ ယင်းတည်ရှိခဲ့သည့်နေရာကိုမူကား ခန့်မှန်းနိုင်သည်။ အကြောင်းမှာ ယင်းဥယျာဉ်အတွင်း စီးဆင်းခဲ့သည်ဟု ကျမ်းစာဖေါ်ပြသောမြစ်အချို့ ယနေ့တိုင်ရှိနေသေးသည်။ (ကမ္ဘာဦး ၂:၇-၁၄) ဤဥယျာဉ်ကိုဗဟိုပြုပြီး ကမ္ဘာတစ်ဝှန်းပြုစုပျိုးထောင် တိုးချဲ့သွားခြင်းအားဖြင့် ကမ္ဘာချီပရဒိသုဖြစ်ပေါ်လာစေရန် လူသား၌အခွင့်ထူးရရှိထားသည်။—ဟေရှာယ ၄၅:၁၂၊ ၁၈။

^၂၆ ဘုရားသခင်နှင့် သားတော်တို့သည် အလုပ်တကယ်လုပ်ကိုင်သူများဖြစ်ကြရာ ဤကမ္ဘာပေါ်တွင် လုပ်ကိုင်စရာလုပ်ငန်းကို လူသားများအားလည်း ဘုရားသခင်ပေးအပ်ထားတော်မူသည်။ (ယောဟန် ၅:၁၇) ပထမလူယောက်ျား၊ လူမိန်းမ၊ အာဒံနှင့်ဧဝအားကိုယ်တော်က “အချင်းတို့၊ များပြားစွာမွေးဖွားကြလော့။ မြေကြီးကိုပြည့်စေ၍နိုင်ကြလော့။ ပင်လယ်ငါးတို့ကိုလည်းကောင်း၊ မိုးကောင်းကင်ငှက်တို့ကိုလည်းကောင်း၊ အသက်ရှင်၍ မြေပေါ်မှာလှုပ်ရှားတတ်သော တိရစ္ဆာန်တို့ကိုလည်းကောင်း အုပ်စိုးကြလော့” ဟုမိန့်တော်မူခဲ့သည်။ (ကမ္ဘာဦး ၁:၂၈) ယင်းကြောင့် လူသားသည် များပြားစွာမွေးဖွားခြင်းဖြင့် မြေကြီးကိုပြည့်စေပြီးနောက် ပြည့်လျှံသည့်တိုင် ဆက်မွေးဖွားရန်လော။ မဟုတ်ပါ။ တစ်ဦးတစ်ယောက်က ခွက်တစ်ခုတွင် လက်ဖက်ရည်ပြည့်အောင်ထည့်ပေးပါဟုဆိုလျှင် ခွက်ကိုလျှံထွက်ကါ စားပွဲပေါ်ဖိတ်သည့်အထိ ဆက်ထည့်နေမည်မဟုတ်ပါ။ ခွက်ပြည့်လျှင် ဆက်မထည့်တော့ချေ။ ထပ်တူပင် လူသားအားယေဟောဝါက “မြေကြီးကိုပြည့်စေ” ဟုအမိန့်ပေးခြင်းဖြင့် မြေကြီးပေါ် လူသားတို့ သက်သောင့်သက်သာနေထိုင်နိုင်သည်အထိ လူတို့နှင့်ပြည့်လာစေပြီးနောက် ကလေးမွေးဖွားခြင်းအမှု ရပ်စဲသွားစေရန် ရည်ရွယ်တော်မူကြောင်း ထင်ရှားသည်။ ယင်းက စုံလင်သောလူ့ဘောင်အတွင်း အခက်အခဲဖြစ်စရာအကြောင်းမရှိပါ။ ယခုခေတ် မစုံလင်သည့်လူ့လောကအတွက်သာ လူဦးရေပေါက်ကွဲမှုသည် ပြဿနာတစ်ရပ်ဖြစ်နေပါသည်။

ဆိုးရွားမှုများ—ယင်းတို့ကို ဘုရားသခင်အဘယ်ကြောင့် ခွင့်ပြုထားသနည်း

၂၇။ ဤတွင် အဘယ်မေးခွန်းများကိုဖြေဆိုစရာလိုလာသနည်း။

^၂၇ ပရဒိသုမြေကြီးကို တည်ဆောက်ပေးရန် ဘုရားသခင်ရည်ရွယ်တော်မူလျှင် ယနေ့ကမ္ဘာပေါ်တွင် မတရားမှု၊ ဒုက္ခဆင်းရဲခြင်း နှင့် ဝမ်းနည်းကြေကွဲမှုများ ဤမျှအဘယ်ကြောင့်ရှိနေရသနည်း။ ဘုရားသခင်သည် အနန္တတန်ခိုးရှင်ဖြစ်ပါက ယင်းအခြေအနေများကို ဤမျှကာလတိုင်အောင် အဘယ်ကြောင့်ခွင့်ပြုထားရသနည်း။ ကျွန်ုပ်တို့၏ဒုက္ခအားလုံး အဆုံးတိုင်ရန် မျှော်လင့်ချက်ရှိပါသလော။ သမ္မာကျမ်းစာက မည်သို့ဆိုထားသနည်း။

၂၈။ ပရဒိသုဥယျာဉ်အတွင်း ပုန်ကန်မှု မည်သို့ဝင်လာသနည်း။

^၂၈ ယေဟောဝါ၏အချုပ်အခြာအာဏာ သို့မဟုတ် အုပ်စိုးမှုကို ဘုရားသခင်၏ နာမ်ဝိညာဉ်သားတစ်ပါး ပုန်ကန်ခဲ့သောအခါ လူသားတို့ စတင်ဒုက္ခရောက်လာခဲ့ကြောင်း သမ္မာကျမ်းစာကတင်ပြထားသည်။ (ရောမ ၁:၂၀။ ဆာလံ ၁၀၃:၂၂၊ NW Ref. Bi. ftn.) လူသားဖန်ဆင်းခံရခြင်းကို တွေ့မြင်ခဲ့၍ ဝမ်းသာအားရခဲ့သူတို့တွင် ဤကောင်းကင်တမန်လည်းပါဝင်ခဲ့ပေမည်။ သို့သော် တပ်မက်လိုချင်စိတ်နှင့် မာနထောင်လွှားသောသဘော သူ့နှလုံးတွင် အမြစ်တွယ်လာရာ အာဒံနှင့်ဧဝအား သူတို့၏ဖန်ဆင်းရှင် ယေဟောဝါကိုကိုးကွယ်ကြမည့်အစား မိမိကိုကိုးကွယ်စေရန်ဆန္ဒဖြင့် သူတို့ကိုသွေးဆောင်ခဲ့သည်။ အရုပ်တစ်ခုမှတစ်ဆင့် မိမိအသံကိုလွှင့်၍ ပြောဆိုတတ်သူနည်းတူ ဤကောင်းကင်တမန်သည် မြွေမှတစ်ဆင့် စကားပြောဆိုကာ ဧဝအား အနန္တတန်ခိုးရှင်ဘုရားသခင်၏စကားကိုနားမထောင်ရန် သွေးဆောင်ခဲ့သည်။ သူ၏လင်သား အာဒံသည်လည်း သူမ၏နာမခံမှုလမ်းစဉ်နောက်လိုက်လေသည်။—ကမ္ဘာဦး ၂:၁၅-၁၇။ ၃:၁-၆။ ယာကုပ် ၁:၁၄၊ ၁၅။

၂၉။ (က) ဆုံးဖြတ်စရာအဘယ်ပြဿနာများ ပေါ်လာသနည်း။ (ခ) စိန်ခေါ်ချက်ကို ဘုရားသခင်မည်သို့ရင်ဆိုင်သနည်း။ (ဂ) စာတန်၏ကဲ့ရဲ့ခြင်းကို အဖြေပေးခြင်းငှာ မည်သို့ပါဝင်နိုင်သနည်း။

^၂၉ ထိုတော်လှန်ပုန်ကန်သော ကောင်းကင်တမန်သည် “ရှေးမြွေဟောင်း” အမည်ကိုရရှိလေသည်။ (ဗျာဒိတ် ၁၂:၉။ ၂ ကောရိန္သု ၁၁:၃) စာတန် “ဆန့်ကျင်သူ”၊ မာရ်နတ် “ရှုတ်ချဂုဏ်ဖျက်သူ” ဟူ၍အဓိပ္ပာယ်ရှိသောအမည်များ ရရှိသည်။ ကမ္ဘာမြေကြီးကို ယေဟောဝါအစိုးရသောအခွင့်အာဏာ နှင့် ကိုယ်တော်၏ဖြောင့်မတ်မှုကို သူပြဿနာလုပ်ခဲ့သည်။ ယခုသူသည် လူသားအပေါင်းကို စစ်မှန်သောဝတ်ပြုမှုမှ သွေဖည်သွားစေနိုင်သည်ဟု ဘုရားသခင်အား စိန်ခေါ်ခဲ့သည်။ သူ၏စိန်ခေါ်ချက် မှန်မမှန်သက်သေထူရန်၊ ယေဟောဝါ၏ အချုပ်အခြာအာဏာနှင့်ဆိုင်သော ပြဿနာကို အစဉ်ထာဝရဖြေရှင်းနိုင်ရန် ဘုရားသခင်သည် စာတန်အား နှစ်ပေါင်း ၆၀၀၀ ခန့်အချိန်ပေးတော်မူခဲ့ပြီ။ ဘုရားသခင်ကိုဖယ်ပြီး ကိုယ့်မင်းကိုယ့်ချင်း အုပ်ချုပ်ရာ လူတို့၏အားထုတ်မှုသည် အရှုံးကြီးရှုံးခဲ့ရပြီ။ အထူးခြားဆုံးပုံသက်သေဖြစ်သူ ယေရှုနှင့်အတူ သစ္စာရှိအမျိုးသမီး၊ အမျိုးသားများစွာ အခက်အခဲဆုံး စမ်းသပ်မှုများခံရကြငြား ဘုရားသခင်ကို သမာဓိစောင့်သိခဲ့ကြပြီ။ သို့ဖြင့် ယေဟောဝါအားဂုဏ်တင်စေပြီး မာရ်နတ်သည်မုသာကောင်ဖြစ်ကြောင်း သက်သေထူခဲ့ပြီ။ (လုကာ ၄:၁-၁၃။ ယောဘ ၁:၇-၁၂။ ၂:၁-၆၊ ၂၇:၅) အသင်လည်း သမာဓိစောင့်ထိန်းသူတစ်ဦးဖြစ်နိုင်ပါသည်။ (သု၊ ၂၇:၁၁) သို့သော် စာတန်သာ ကျွန်ုပ်တို့၏တစ်ပါးတည်းသောရန်သူမဟုတ်။ အခြားအဘယ်ရန်သူရှိသေးသနည်း။

ရန်သူ—သေခြင်း

၃၀။ နာမခံမှုကြောင့် ခံရသောအပြစ်ဒဏ်အကြောင်း ကျမ်းစာက အဘယ်သို့ဆိုထားသနည်း။

^၃၀ နာမခံမှု၏အခကား သေခြင်းဖြစ်ကြောင်း ဘုရားသခင်ကြိုတင်မိန့်တော်မူသည်။ ပထမမိန်းမကိုတရားစီရင်ရာတွင် ယေဟောဝါရှင်က “သင်၌ကိုယ်ဝန်ဆောင်ခြင်းဝေဒနာကို ငါအလွန်များပြားစေမည်။ ပင်ပန်းစွာဝေဒနာကိုခံ၍ သားဖွားရမည်။ ကိုယ်ခင်ပွန်း၏အလိုသို့လိုက်၍ သူ၏အုပ်စိုးခြင်းကိုလည်း ခံရမည်” ဟုမိန့်တော်မူခဲ့သည်။ လူယောက်ျားအာဒံအား “သင်ထွက်ရာမြေသို့ မပြန်မီတိုင်အောင် သင်၏မျက်နှာမှ ချွေးထွက်လျက် အစာကိုစားရမည်။ အကြောင်းမူကား၊ သင်သည် မြေမှုန့်ဖြစ်၍ မြေမှုန့်သို့ပြန်ရမည်” ဟုမိန့်တော်မူသည်။ (ကမ္ဘာဦး ၃:၁၆-၁၉) နာခံမှုမရှိသောမောင်နှံစုံသည် ပျော်ရွှင်ရာပရဒိသုမှ ပြုစုစိုက်ပျိုးမထားသောမြေကြီးအရပ်သို့ နှင်ထုတ်ခံခဲ့ရသည်။ အတန်ကြာသော် သူတို့သေဆုံးခဲ့သည်။—ကမ္ဘာဦး ၅:၅။

၃၁။ အပြစ်တရားကား အဘယ်နည်း။ ယင်းကြောင့် လူသားတို့ခံစားရသည့်အကျိုးကား အဘယ်နည်း။

^၃၁ စုံလင်ခြင်းအဖြစ်မှ သူတို့ကျဆင်းပြီးနောက်မှသာ အာဒံနှင့်ဧဝတို့သည် သားသမီးများ မွေးဖွားခဲ့သည်။ ယနေ့လူသားအပေါင်း မစုံလင်သူများအဖြစ် သူတို့မှဆင်းသက်လာကြသည်။ ယင်းကြောင့် အားလုံးအသက်သေရကြသည်။ သမ္မာကျမ်းရေးသူတစ်ဦး ဤသို့ရှင်းပြခဲ့သည်။ “အပြစ်တရားသည် တစ်ယောက်သောသူအားဖြင့် ဤလောကသို့ဝင်၍ အပြစ်တရားအား ဖြင့် သေခြင်းတရားဝင်သည်နှင့်အညီ လူအပေါင်းတို့သည် အပြစ်ရှိသောကြောင့် သေခြင်းသို့ရောက်ရကြ၏။” ဤ “အပြစ်တရား” ကားအဘယ်နည်း။ ပြည့်ဝစုံလင်ခြင်းအဖြစ်မှ ကျဆင်းသွားခြင်းဖြစ်သည်။ မစုံလင်သည့် မည်သည့်အရာကိုမျှ ယေဟောဝါဘုရားသခင်နှစ်သက်တော်မမူ၊ အသက်ရှင်စေမည်လည်းမဟုတ်ပေ။ ပထမလူသား အာဒံမှ လူသားအပေါင်း အပြစ်နှင့်မစုံလင်မှုကို အမွေရရှိခဲ့ရာ သူတို့အပေါ် “သေခြင်းတရားသည် အစိုးရ၏။” (ရောမ ၅:၁၂၊ ၁၄) အပြစ်ရှိသောလူသားသည် တိရစ္ဆာန်များနည်းတူ အသက်သေရသည်။—ဒေသနာ ၃:၁၉-၂၁။

၃၂။ ကျွန်ုပ်တို့အမွေခံရသော သေခြင်းအကြောင်း သမ္မာကျမ်းစာကမည်သို့ဖေါ်ပြသနည်း။

^၃၂ ဤ “သေခြင်း” ကားအဘယ်နည်း။ သေခြင်းသည် အသက်ရှင်ခြင်း၏ ဆန့်ကျင်ဘက်ဖြစ်သည်။ စကားနားထောင်မည်ဆိုလျှင် အဆုံးမရှိအသက်တာဘဝနှင့် ကမ္ဘာမြေကြီးပေါ်နေထိုင်ခွင့်ကို လူသားအား ဘုရားသခင်မျှော်လင့်စေတော်မူသည်။ သို့သော် သူနားမထောင်သည့်အတွက် ယင်း၏အခကား သေခြင်း၊ သတိကင်းမဲ့နေခြင်း၊ မတည်ရှိတော့သည့်အဖြစ်ကို စီရင်ခံရမည်။ နားထောင်မှုမရှိ၍ သေမည်ဆိုလျှင် လူသား၏အသက်ကို နာမ်ဝိညာဉ်လောကတစ်ခု သို့မဟုတ် မီးတောက်လောင်သော “ငရဲ” သို့ရွှေ့ပြောင်းလိုက်မည်ဟူ၍ ဘုရားသခင်လုံးဝမိန့်တော်မမူခဲ့ပါ။ လူသားအား ဤသို့သာသတိပေးတော်မူသည်။ “ဧကန်အမှန်သေရမည်။” “သင်သည် ဧကန်အမှန် သေရမည်မဟုတ်” ဟုပြောဆိုရာတွင် မုသားသုံးခဲ့သူကား လူအသက်ကိုသတ်သော မာရ်နတ်ပင်ဖြစ်သည်။ (ကမ္ဘာဦး ၂:၁၇။ ၃:၄။ ယောဟန် ၈:၄၄) အာဒံမှ လူသားအပေါင်း ရခဲ့သည့်အမွေကား မြေမှုန့်ကဲ့သို့သော သေခြင်းပေတည်း။—ဒေသနာ ၉:၅၊ ၁၀။ ဆာလံ ၁၁၅:၁၇။ ၁၄၆:၄။

၃၃။ (က) လူသားအပေါင်းနှင့် ဤကမ္ဘာမြေကြီးအတွက် အဘယ်ဂုဏ်ကျက်သရေရှိသောအနာဂတ် စောင့်ဆိုင်းနေသနည်း။ (ခ) သားတော်အားဖြင့် အဘယ်အရေးကြီးသောအရာသုံးခုကို ယေဟောဝါဆောင်ရွက်တော်မူသနည်း။

^၃၃ သို့ဖြစ်လျှင် သေရသောလူသားအတွက် အဘယ်အနာဂတ်မျှမရှိသလော။ အားရဝမ်းသာစရာ အနာဂတ်ရှိပါသည်။ ယခုသေလွန်နေသူများအပါအဝင် လူသားအပေါင်းတို့အတွက် ဘုရားသခင်၏ ကမ္ဘာ့ပရဒိသု ရည်ရွယ်ချက်သည် မအောင်မြင်ဘဲမနေကြောင်း သမ္မာကျမ်းစာတင်ပြထားသည်။ ယေဟောဝါမိန့်တော်မူသည်ကား “ကောင်းကင်ဘုံသည် ငါ့ပလ္လင်ဖြစ်၏။ မြေကြီးသည် ငါ့ခြေတင်ရာခုံဖြစ်၏။” “ငါသည် ငါ၏ခြေတင်ရာအရပ်ကို ဘုန်းပွင့်စေမည်။” (ဟေရှာယ ၆၆:၁။ ၆၀:၁၃) လောကီသားအပေါင်းတို့သည် ကိုယ်တော်အားဖြင့် အသက်ရခြင်းငှာ ကြွယ်ဝသောမေတ္တာတော်ကြောင့် ကိုယ်တော်၏နှုတ်ကပတ်တော်၊ သားတော်ကို မြေကြီးပေါ်သို့စေလွှတ်တော်မူခဲ့သည်။ (ယောဟန် ၃:၁၆။ ၁ ယောဟန် ၄:၉) သားတော်ယေရှုအားဖြင့် ယေဟောဝါပြုလုပ်တော်မူသည့် အရေးကြီးသောအချက်သုံးချက်ကို ယခုကျွန်ုပ်တို့ဆွေးနွေးကြမည်။ (၁) သေခြင်းတရားအောက်မှ လွတ်မြောက်စေခြင်း၊ (၂) လူသေတို့ကို တစ်ဖန်အသက်ရှင်စေခြင်း နှင့် (၃) လူသားအပေါင်းကိုအုပ်ချုပ်ရန် စုံလင်သောအစိုးရကိုတည်ထောင်ပေးခြင်းအကြောင်းတို့ဖြစ်သည်။

သေခြင်းတရားမှလွတ်မြောက်ခြင်း

၃၄၊ ၃၅။ (က) သေခြင်းမှ လူသားများအဘယ်နည်းအားဖြင့်သာ ရွေးနုတ်ခံရနိုင်မည်နည်း။ (ခ) ရွေးဖိုးကား အဘယ်နည်း။

^၃၄ မိမိတို့အား သေမင်းလက်မှ ဘုရားသခင် ‘ရွေးနုတ်မည်’ ကို ရှေးခေတ်ကတည်းက ဘုရားသခင်၏ပရောဖက်များ အားထားယုံကြည်ကြောင်း ဖေါ်ပြခဲ့သည်။ (ဟောရှေ ၁၃:၁၄) သို့သော် သေခြင်းနှောင်ကြိုးကို လူသားများမည်သို့ဖြေနိုင်မည်နည်း။ ယေဟောဝါ၏စုံလင်သောဥပဒေအရ ‘အသက်အတွက်အသက်၊ မျက်စိအတွက်မျက်စိ၊ သွားအတွက်သွား’ ကိုပေးစရာလိုအပ်သည်။ (တရားဟောရာ ၁၉:၂၁) ထိုကြောင့် ဘုရားသခင်စကားကို အာဒံတမင်တကာနားမထောင်သဖြင့် စုံလင်သောလူ့အသက်ကို ဆုံးရှုံးခဲ့ရခြင်းကြောင့် လူသားအပေါင်းအား သေခြင်းအမွေပေးခဲ့သည့်အတွက် အာဒံဆုံးရှုံးခဲ့သည့်အရာကို ပြန်ဝယ်ယူနိုင်ရန် အာဒံအစား အခြားစုံလင်သောလူသားတစ်ဦး သူ၏ စုံလင်သောအသက်နှင့် ဆပ်ပေးရန်လိုအပ်သည်။

^၃၅ ‘တူညီသောအရာအတွက် တူညီသောအရာ’ ကိုဆပ်ပေးခြင်းဆိုင်ရာ တရားမျှတသော မူကို သမိုင်းတစ်လျှောက် အနှံ့အပြားလက်ခံပြုမူခဲ့ပြီ။ အများသုံး စကားက “ရွေးနှုတ်ဖိုးပေးခြင်း” ဖြစ်သည်။ ရွေးနုတ်ဖိုးကား အဘယ်နည်း။ “လူတစ်ဦး သို့မဟုတ် အရာတစ်ခုကိုထိန်းသိမ်းထားသူလက်မှ ထိုသူ သို့မဟုတ် ထိုအရာကို ပြန်ရရှိရန် ပေးသောအခဖြစ်သည်။ ယင်းကြောင့် တန်ဖိုးကြီးလျော်ကြေးနှင့် စစ်သုံ့ပန်းများ သို့မဟုတ် ကျေးကျွန်များကို အလဲအလှယ်လုပ်ပြီး လွှတ်ပေးလိုက်ခြင်းကို ရွေးနုတ်ခံရသည်ဟုဆို၏။ . . . လျော်ကြေးအနေနှင့် အစားပေးသည့်အရာသည် ရွေးဖိုးခဖြစ်သည်။”dအာဒံပြစ်မှားခဲ့သည့်အချိန်မှစ၍ မစုံလင်မှုနှင့် သေခြင်း၏ချုပ်နှောင်မှုအောက်ရောက်ရှိနေသော လူသားအပေါင်းသည် စစ်သုံ့ပန်းများ သို့မဟုတ် ကျေးကျွန်များနှင့်တူနေသည်။ သူတို့ကိုလွတ်မြောက်စေရန် ရွေးနုတ်ဖိုးအစီအစဉ်တစ်ရပ်လိုအပ်လာသည်။ ဆပ်ပေးသည့်ရွေးဖိုးအခမှာ တန်ဖိုးညီမညီနှင့်စပ်လျဉ်း၍ ယခုသော်လည်းကောင်း၊ နောင်သော်လည်းကောင်း အငြင်းပွားမှုမရှိစေရန် အာဒံနှင့် တန်းတူညီမျှသော စုံလင်သည့်လူ့အသက်ကို ပူဇော်ပေးရန် လိုအပ်နေသည်။

၃၆။ ရွေးဖိုးအဖြစ် စုံလင်သောလူ့အသက်ကို ယေဟောဝါမည်သို့ပြင်ဆင်ပေးတော်မူသနည်း။

^၃၆ သို့ရာတွင် ဤကဲ့သို့သော စုံလင်သည့်လူ့အသက်ကို အဘယ်နေရာတွင် တွေ့ရှိနိုင်မည်နည်း။ မစုံလင်သောအာဒံ၏အမျိုးအနွယ်အနေနှင့် လူသားအပေါင်းသည် မစုံလင်မှု၌ မွေးဖွားလာခဲ့ပြီ။ “မိမိညီအစ်ကို ကို အဘယ်သူမျှမရွေးနိုင်။ ရွေးရန်အဖိုးကို ဘုရားသခင်၌မပေးနိုင်။” (ဆာလံ ၄၉:၇) လူသားတို့ကိုလှိုက်လှဲစွာ ချစ်တော်မူသည့်အတွက် လိုအပ်ရာကိုဖြည့်စွက်ပေးရန် ယေဟောဝါရှင်သည် အလွန်မြတ်နိုးသော “သားဦး” ကိုပင် လိုအပ်သည့် ပူဇော်သကာအဖြစ်ပေးရန် စီစဉ်တော်မူသည်။ ဤဝိညာဏသားတော်၊ နှုတ်ကပတ်တော်၏ စုံလင်သောအသက်ကို ဂျူးအပျိုကညာ မာရိ၏ဝမ်းထဲသို့ ပြောင်းရွှေ့ပေးတော်မူသည်။ အမျိုးသမီးငယ်သည် ပဋိသန္ဓေစွဲပြီးအချိန်တန်သော် “ယေရှု” အမည်ရှိသောသားကို ဖွားမြင်လေ၏။ (မဿဲ ၁:၁၈-၂၅) အသက်ကိုဖန်ဆင်းတော်မူသောအရှင်သည် ဤအံ့ချီးဖွယ်ရာတန်ခိုးတော်ကို ပြုလုပ်ပေးနိုင်မည်အကြောင်း စဉ်းစားရန်မခက်ခဲပါ။

၃၇။ အသက်ကိုမြတ်နိုးသူ လူသားအပေါင်းကို ယေရှုချစ်တော်မူကြောင်း မည်သို့တင်ပြသနည်း။

^၃၇ ယေရှုသည်လည်း လူကြီးအဖြစ်သို့ကြီးပြင်းလာပြီး ယေဟောဝါထံ မိမိကိုယ်ကိုအပ်နှံကာ နှစ်ခြင်းခံယူတော်မူသည်။ ထိုအခါ အလိုတော်ကိုဆောင်ရွက်ရန် သူ့အား ဘုရားသခင်တာဝန်ပေးတော်မူသည်။ (မဿဲ ၃:၁၃၊ ၁၆၊ ၁၇) ယေရှု၏မြေကြီးဆိုင်ရာအသက်သည် ကောင်းကင်မှရောက်ရှိလာ၍ ကိုယ်တော်သည် စုံလင်တော်မူသောကြောင့် ထိုစုံလင်သောလူ့အသက်ကိုပူဇော်ပြီး လူသားအပေါင်းကို သေခြင်းမှလွတ်မြောက်စေနိုင်သည်။ (ရောမ ၆:၂၃။ ၅:၁၈၊ ၁၉) ကိုယ်တော်မိန့်တော်မူသကဲ့သို့ “ငါမူကား သိုးတို့သည် အသက်လွတ်ရုံမျှမက အထူးသဖြင့် အသက်နှင့်ပြည့်စုံစေခြင်းငှာ လာသတည်း။” “ကိုယ်အဆွေတို့အဖို့အလိုငှာ ကိုယ်အသက်ကိုစွန့်ခြင်းမေတ္တာထက် သာ၍မြတ်သောမေတ္တာသည် အဘယ်သူ၌မျှမရှိ။” (ယောဟန် ၁၀:၁၀။ ၁၅:၁၃) ယေရှုအား နှက်တိုင်ပေါ်တင်ပြီး စာတန်သတ်စေခဲ့သောအခါ ဤရွေးဖိုးအစီအစဉ်အားဖြင့် ယုံကြည်ကြောင်းတင်ပြသူများ အသက်ရမည်ကိုသိတော်မူ၍ ရက်စက်စွာသေရခြင်းအဖြစ်ကို ယေရှုလက်ခံတော်မူခဲ့သည်။—မဿဲ ၂၀:၂၈။ ၁ တိမောသေ ၂:၅၊ ၆။

အသက်ရှင်ခြင်းသို့ ပြန်ထမြောက်ခြင်း

၃၈။ ဘုရားသခင်၏သားတော်သည် အဘယ်နည်းဖြင့် အသက်ပြန်ရှင်လာသနည်း။ ယင်းကို အဘယ်အရာက သက်သေထူသနည်း။

^၃၈ ရန်သူများလက်ချက်ဖြင့်သေရငြား ဘုရားသခင်၏သားတော်သည် ဘုရားအပေါ် သစ္စာသမာဓိစောင့်သိခဲ့သောကြောင့် စုံလင်သောလူ့အသက်ပိုင်ဆိုင်ခွင့်ကို သူတစ်ခါမျှမဆုံးရှုံးခဲ့ပေ။ သို့သော် သင်္ချိုင်းတွင်သေလွန်နေရာ ဤတန်ဖိုးရှိသည့် လူ့အသက်ပိုင်ဆိုင်ခွင့်ကို လူသားအကျိုးအလိုငှာ ယေရှုမည်သို့အသုံးပြုနိုင်မည်နည်း။ ဤအချိန်တွင် တစ်ချိန်တစ်ခါမျှပြုတော်မမူရသေးသည့် အခြားအံ့ဖွယ်ရာတစ်ခုကို ယေဟောဝါရှင်ပြုတော်မူသည်။ တတိယမြောက်နေ့တွင် ယေဟောဝါရှင်သည် ယေရှုကို သေခြင်းမှမသေနိုင်သောနံဝိညာဉ်သတ္တဝါအဖြစ်သို့ ရှင်ပြန်ထမြောက်စေတော်မူသည်။ (ရောမ ၆:၉။ ၁ ပေတရု ၃:၁၈) ရှင်ပြန်ထမြောက်ကြောင်းယုံကြည်စေခြင်းငှာ လူသားခန္ဓာကိုယ်ကို ယေရှုယူတင်ပြီး တပည့်တော် ၅၀၀ နှင့် ထိုထက်မကတို့အရှေ့ အကြိမ်ကြိမ်ကိုယ်ရောင်ပြတော်မူသည်။ ဤသူတို့အနက်တစ်ယောက်မျှသော်လည်းကောင်း၊ နောင်တွင် ဘုန်းထင်ရှားသောယေရှု ပေါ်တော်မူခြင်းကို တွေ့မြင်၍ မျက်စိကွယ်ခဲ့သော တမန်တော်ပေါလုသော်လည်းကောင်း ကိုယ်တော်ရှင်ပြန်ထမြောက်တော်မူသည့် အံ့ဖွယ်ရာတန်ခိုးတော်ကို သံသယရှိစရာ အဘယ်အကြောင်းမျှမရှိချေ။—၁ ကောရိန္သု ၁၅:၃-၈။ တမန်တော် ၉:၁-၉။

၃၉။ (က) ကိုယ်တော်၏ယဇ်ပူဇော်သက္ကာတန်ဖိုးကို ယေရှုမည်သို့အသုံးပြုတော်မူသနည်း။ ဦးဆုံး အဘယ်သူတို့အတွက် အသုံးပြုတော်မူသနည်း။ (ခ) အခြားအဘယ်အံ့သြဖွယ်ရာတန်ခိုးအကြောင်း ယေရှုမိန့်မြွက်တော်မူသနည်း။

^၃၉ ရက်ပေါင်းလေးဆယ်ကြာသောအခါ ရှင်ပြန်ထမြောက်ခဲ့သောယေရှုသည် ကောင်းကင်အရပ် ဘုရားသခင်ကိုယ်တော်တိုင်၏မျက်မှောက်ရှေ့ ဝင်ရောက်ခစားပြီး လူသားတို့အတွက် ရွေးဖိုးဖြစ်သော ကိုယ်တော်၏စုံလင်သည့်လူ့ယဇ်၏တန်ဖိုးကို ဆက်သလေသည်။ “ထိုသခင်မူကား အပြစ်ကိုဖြေခြင်းငှာ ယဇ်တစ်ခုတည်းကို ပူဇော်ပြီးမှ ဘုရားသခင်၏လက်ယာဘက်၌ အစဉ်အမြဲထိုင်၍ မိမိရန်သူတို့ကို မိမိခြေတင်ရာမချမထားမှီတိုင်အောင် မျှော်လင့်လျက်နေတော်မူ၏။” (ဟေဗြဲ ၁၀:၁၂၊ ၁၃) ဤရွေးဖိုးအားဖြင့် ဦးဆုံးလွတ်မြောက်သူတို့ကား ‘ခရစ်တော်ပိုင်ဆိုင်’ သော သစ္စာရှိခရစ်ယာန် “သိုးစုငယ်” ဖြစ်သည်။ (လုကာ ၁၂:၃၂။ ၁ ကောရိန္သု ၁၅:၂၂၊ ၂၃) ဤသူတို့သည် “လူတို့အထဲကရွေးနုတ်” ခံရသူများဖြစ်သဖြင့် ရှင်ပြန်ထမြောက်ချိန်တွင် ကောင်းကင်၌ ခရစ်တော်၏ ဝိညာဏအပေါင်းအသင်းများဖြစ်လာကြသည်။ (ဗျာဒိတ် ၁၄:၁-၅) သို့ရာတွင် သင်္ချိုင်းတွင်ယခုသေလွန်နေသူ လူသားမြောက်မြားစွာကော။ မြေကြီးပေါ်ရှိစဉ်က တရားစီရင်ခြင်းနှင့် အသက်ပေးရန်အခွင့်အာဏာကို ခမည်းတော်သည် မိမိအားပေးအပ်ခဲ့ကြောင်း ယေရှုမိန့်တော်မူခဲ့သည်။ ဤသို့ထပ်ဆင့်မိန့်ဆိုသေးသည်။ “ဤအမှုကိုအံ့သြခြင်းမရှိကြနှင့်။ သင်္ချိုင်းများမှာရှိသောသူအပေါင်းတို့သည် သားတော်၏စကားသံကိုကြား၍ ထွက်ရမည့်အချိန်ကာလရောက်လတံ့။” (ယောဟန် ၅:၂၆-၂၉) ဤသူတို့အား ပရဒိသုမြေကြီးပေါ်တွင် ပြန်အသက်ရှင်စေမည်ဖြစ်သည်။

၄၀၊ ၄၁။ (က) “ရှင်ပြန်ထမြောက်ခြင်း” အဓိပ္ပာယ်ကို အတိအကျရှင်းပြပေးပါ။ (ခ) ဘုရားသခင်၏ ရှင်ပြန်ထမြောက်ခြင်းကတိတော်ကို အဘယ်ကြောင့်ယုံကြည်စိတ်ချနိုင်သနည်း။

^၄၀ “ဤအမှုကိုအံ့သြခြင်းမရှိကြနှင့်” ဟူသည့် ယေရှု၏စကားများကို သတိပြုပါ။ သို့တိုင်အောင် သေလွန်သည်မှာ နှစ်ပေါင်းများစွာရှိနေသူတစ်ဦး သေခြင်းမှမည်သို့လွတ်မြောက်ပြီး အသက်ပြန်ရှင်နိုင်မည်နည်း။ သူ၏ခန္ဓာကိုယ်သည် မြေမှုန့်ဖြစ်နေပြီမဟုတ်လော။ ယင်းခန္ဓာကိုယ်ကိုဖြစ်ပေါ်စေသည့် အစိတ်အပိုင်းအချို့ပင်လျှင် သစ်ပင်နှင့်တိရစ္ဆာန် အစရှိသည့် သက်ရှိများထဲပင် ပါဝင်နေပေမည်။ သို့ရာတွင် ရှင်ပြန်ထမြောက်ခြင်းကား ထပ်တူဓာတုဗေဒဒြပ်စင်ကို ပြန်စုပေါင်းပေးရမည်ဟုမဆိုလိုပါ။ ဆိုလိုသည်ကား သူတစ်ဦးကို သူ့ဥပဓိရုပ်နှင့်သူ ဘုရားသခင်ပြန်၍ဖန်ဆင်းပေးခြင်းဖြစ်သည်။ မြေကြီးဒြပ်စင်များမှ ခန္ဓာကိုယ်အသစ်ကိုပြုပြင်ပေးပြီး လူတစ်ဦးအသက်သေဆုံးချိန်တွင်ရှိနေသော ထပ်တူအင်္ဂါရပ်များ၊ ထပ်တူထူးခြားသောအရည်အချင်းများ၊ ထပ်တူမှတ်ဉာဏ်စွမ်း၊ ထပ်တူအသက်ပုံစံကို ထိုခန္ဓာကိုယ်ထဲထည့်သွင်းပေးမည်ဖြစ်သည်။

^၄၁ သင်အလွန်မြတ်နိုးသည့် အိမ်တစ်လုံး မီးလောင်ပြာကျဖြစ်ခဲ့ဖူးမည်။ သို့ရာတွင် ထိုအိမ်၏ပုံစံကို ကောင်းစွာမှတ်မိထားသဖြင့် ယင်းအိမ်ကိုပြန်ဆောက်နိုင်မည်။ ထိုနည်းတူ မှတ်မိနိုင်စွမ်းကို တီထွင်သူဘုရားသခင်သည် ကိုယ်တော်ချစ်သောသူတို့ကို အောက်မေ့မှတ်ထားတော်မူသောကြောင့် လူသားကိုပြန်ဖန်ဆင်းပေးနိုင်တော်မူသည်။ (ဟေရှာယ ၆၄:၈) ယင်းကြောင့် ‘အောက်မေ့ရာသင်္ချိုင်းများ’ ဟုသမ္မာကျမ်းစာဆိုရခြင်းဖြစ်သည်။ လူသေတို့ကို ဘုရားသခင်အသက်ပြန်ရှင်စေချိန်တိုင်သော် ပထမလူယောက်ျားကိုဖန်ဆင်းရာတွင် အံ့ဖွယ်ရာအမှုကိုပြုတော်မူသည့်နည်းတူ ထိုအံ့ဖွယ်ရာကို ကိုယ်တော်ပြုတော်မူမည်။ ဤတစ်ကြိမ်တွင်မူကား ယင်းအံ့ဖွယ်ရာကို ကြိမ်ဖန်များစွာပြုတော်မူမည်ဖြစ်သည်။—ကမ္ဘာဦး ၂:၇။ တမန်တော် ၂၄:၁၅။

၄၂။ ကမ္ဘာမြေကြီးပေါ် ထာဝရအသက်ရှင်ခြင်းသည် အဘယ်ကြောင့်ဖြစ်နိုင်သည်သာမက သေချာရသနည်း။

^၄၂ နောက်တစ်ဖန် ဘယ်သောအခါမျှမသေရတော့သည့် မျှော်လင့်ချက်ဖြင့် လူသားကိုပြန်အသက်ရှင်စေတော်မူမည်။ သို့သော် ကမ္ဘာမြေကြီးပေါ် မည်သို့ထာဝစဉ်အသက်ရှင်နိုင်မည်နည်း။ ဘုရားသခင်၏အလိုတော်နှင့် ရည်ရွယ်တော်မူချက်ဖြစ်သောကြောင့် ထာဝစဉ်အသက်ရှင်နိုင်မည်ကား သေချာပါသည်။ (ယောဟန် ၆:၃၇-၄၀။ မဿဲ ၆:၁၀) ယနေ့လူသားသေရခြင်းသည် အာဒံမှသေခြင်းကို အမွေခံခဲ့ရခြင်းကြောင့်သာဖြစ်သည်။ သို့ရာတွင် လူသားပျော်မွေ့စရာ မကုန်ခန်းနိုင်သော အံ့ဖွယ်ရာအမျိုးမျိုးကို သုံးသပ်ကြည့်မည်ဆိုလျှင် အနှစ်တစ်ရာပင်မပြည့်သော လူ့သက်တမ်းသည် တိုလွန်းလှသည်။ လူသား၏မျိုးစဉ်မျိုးဆက်အား ဤကမ္ဘာမြေကြီးပေါ်နေထိုင်ခွင့်ပေးရာတွင် နှစ်ပေါင်းတစ်ရာမျှ၊ နှစ်ပေါင်းတစ်ထောင်မျှလည်းမဟုတ်၊ ထာဝစဉ်ပင် ကိုယ်တော့်လက်ရာတော်တို့၏ ကျက်သရေများ၌ ပျော်မွေ့စေရန် ဘုရားသခင်ရည်ရွယ်တော်မူသည်။—ဆာလံ ၁၁၅:၁၆၊ ၁၃၃:၃။

ငြိမ်သက်ခြင်းရှိစေမည့် စုံလင်သောအစိုးရ

၄၃။ (က) စုံလင်သောအစိုးရရှိရန် အဘယ်ကြောင့်လိုအပ်နေသနည်း။ (ခ) ဤကိစ္စနှင့်စပ်လျဉ်း၍ ယေဟောဝါမည်သို့ရည်ရွယ်တော်မူသနည်း။

^၄၃ ကျွန်ုပ်တို့၏ ပထမမိဘများ ဘုရားသခင်၏ဥပဒေကို ငြင်းပယ်ခဲ့သောကြောင့် လူ့အုပ်ချုပ်မှုသည် စာတန်လက်အောက်ရောက်ရှိခဲ့သည်။ စာတန်ကို သမ္မာကျမ်းစာက “ဤလောကကိုအစိုးရသောဘုရား” ဟုလျောက်ပတ်သင့်လျော်စွာ ခေါ်ဆိုထားသည်။ (၂ ကောရိန္သု ၄:၄) ဤသို့ပင်ဖြစ်ကြောင်း စစ်ပွဲများ၊ ရက်စက်ကြမ်းကြုတ်မှုများ၊ ယိုယွင်းပျက်ပြားမှုများ နှင့် လူ့အစိုးရများ မတည်မြဲခြင်းက သက်သေထူသည်။ လူသားတို့သည် ငြိမ်သက်ခြင်းရှိစေမည့် အစိုးရကို တမ်းတနေကြသည်။ ဤကမ္ဘာပေါ် ပရဒိသုပြန်လည်တည်ထောင်ရန် ရည်ရွယ်တော်မူသောဖန်ဆင်းရှင်သည် ယင်းပရဒိသုအတွက် စုံလင်သောအုပ်ချုပ်ရေးအဖွဲ့ကို ပေးမည်ဟုယူဆနိုင်သည်မဟုတ်လော။ ထိုသို့ပင်ပြုတော်မူရန် ယေဟောဝါစီစဉ်ထားတော်မူပြီ။ ဤအစိုးရတွင် ဘုရားသခင်ကိုကိုယ်စားပြုမည့်အရှင်ကား ကိုယ်တော်၏ “ငြိမ်သက်ခြင်းမင်းသား” ခရစ်တော်ယေရှုဖြစ်ပြီး “အာဏာတော်တိုးတက်ခြင်းနှင့် ငြိမ်သက်တော်မူခြင်းသည် နိစ္စအမြဲရှိလိမ့်မည်။”—ဟေရှာယ ၉:၆၊ ၇။

၄၄။ (က) ဤအစိုးရအဖွဲ့သည် အဘယ်နေရာတွင် စိုက်တည်မည်နည်း။ (ခ) မည်သို့ဖွဲ့စည်းမည်နည်း။

^၄၄ စုံလင်သောအုပ်ချုပ်ရေးအဖွဲ့သည် ကောင်းကင်တွင် စိုက်တည်မည်ဟု သမ္မာကျမ်းစာကဖေါ်ပြသည်။ ဤမြင့်မြတ်သောနေရာမှ ဘုရင်ယေရှုခရစ်သည် ဖြောင့်မတ်စွာဖြင့် ကမ္ဘာမြေကြီးကို အုပ်စိုးလိမ့်မည်။ ထို့ပြင် ယင်းမျက်မြင်မရ ကောင်းကင်အုပ်ချုပ်ရေးအဖွဲ့တွင် မင်းပြုသူဘက်တော်သားများရှိမည်။ ဤသူတို့သည် သစ္စာရှိလူသားတို့မှ ရွေးချယ်ခံရသူ၊ စုံစမ်းခြင်းအမျိုးမျိုးကြားမှ ယေရှုကိုသစ္စာတည်ကြည်သူများဖြစ်သည်။ သူတို့အား ကိုယ်တော်ဤသို့မိန့်တော်မူခဲ့သည်။ “ငါ့ခမည်းတော်သည် ငါ့အားနိုင်ငံကိုပေးတော်မူသည်နှင့်အညီ သင်တို့သည် ငါ၏နိုင်ငံတွင် . . . အုပ်စိုးရသောအခွင့်ကို ငါသည်သင်တို့အားပေးမည်။” (လုကာ ၂၂:၂၈၊ ၂၉) ခရစ်တော်ယေရှုနှင့်အတူ ကောင်းကင်တွင်အုပ်ချုပ်ရန် လူသားထဲမှ လူနည်းစုကိုသာ ရွေးနုတ်ထားသည်။ ယေရှုခရစ်နှင့် တွဲဖက်အုပ်စိုးသူ မင်း ၁၄၄၀၀၀ မျှရှိသည်ဟု သမ္မာကျမ်းစာကတင်ပြထားသည်။ ထိုကြောင့် ဘုရားသခင်၏နိုင်ငံတော် သို့မဟုတ် ကောင်းကင်အစိုးရတွင် ခရစ်တော်ယေရှုနှင့် မြေကြီးမှကောင်းကင်သို့ ရွေးနုတ်ခံရသူ ၁၄၄၀၀၀ သာရှိသည်။ (ဗျာဒိတ် ၁၄:၁-၄၊ ၅:၉၊ ၁၀)ကမ္ဘာမြေကြီးကော။ “မြေကြီးတစ်ပြင်လုံးတွင် မင်းအရာ၌” လူသားများကို ဘုရင်မင်းမြတ်ခန့်ထားတော်မူမည်အကြောင်း ဆာလံ ၄၅:၁၆ ကဖေါ်ပြသည်။ ဖြောင့်မတ်ခြင်းဆိုင်ရာမူများကို မြတ်နိုးလေးစားသူတို့အား လူသား “မင်းများ” သို့မဟုတ် အုပ်ချုပ်ရေးပိုင်း အကြီးအကဲများအဖြစ် ကောင်းကင်မှခန့်အပ်မည်။—ဟေရှာယ ၃၂:၁ နှင့်နှိုင်းယှဉ်ပါ။

၄၅၊ ၄၆။ (က) မြေကြီးပေါ်တွင် ယေရှုဟောပြောခြင်း၏ အဓိကအချက်ကား အဘယ်နည်း။ (ခ) စုံလင်သောအစိုးရအဖွဲ့ကို အဘယ်ကြောင့်ချက်ချင်းမတည်ထောင်သနည်း။ (ဂ) စီအီး ၁၉၁၄ သည် ပရောဖက်ပြုချက်တွင်လည်းကောင်း၊ ကမ္ဘာ့အဖြစ်အပျက်များတွင်လည်းကောင်း ထူးခြားသောနှစ် မည်သို့ဖြစ်လာသနည်း။

^၄၅ စုံလင်သောအစိုးရကို အဘယ်အချိန်နှင့် အဘယ်နည်းဖြင့် တည်ထောင်မည်နည်း။ ယေရှုမြေကြီးပေါ်ရှိစဉ် ကိုယ်တော်ဟောပြောခဲ့သည့်အကြောင်းတွင် ဤနိုင်ငံတော်သတင်းသည် အဓိကဖြစ်သည်။ (မဿဲ ၄:၁၇။ လုကာ ၈:၁) သို့ရာတွင် ထိုအချိန်၌သော်လည်းကောင်း၊ ရှင်ပြန်ထမြောက်ချိန်၌သော်လည်းကောင်း နိုင်ငံတော်ကိုကိုယ်တော် မတည်ထောင်ခဲ့ပါ။ (တမန်တော် ၁:၆-၈) ကောင်းကင်သို့တက်သည့်အချိန်တွင်ပင် ယေဟောဝါခန့်အပ်ထားချိန်အထိ ကိုယ်တော်စောင့်ဆိုင်းခဲ့ရသေးသည်။ (ဆာလံ ၁၁၀:၁၊ ၂။ ဟေဗြဲ ၁:၁၃) စီအီး ၁၉၁၄ တွင် ထိုခန့်အပ်ချိန်ရောက်ရှိကြောင်း သမ္မာကျမ်းစာပရောဖက်ပြုချက်များကတင်ပြပါသည်။ သို့ရာတွင် တစ်ဦးတစ်ယောက်က ‘စုံလင်သောအစိုးရတည်ထောင်မည့်အစား ၁၉၁၄ ခုနှစ်တွင် ကမ္ဘာပေါ်အမင်္ဂလာများ တိုးများလာသည်မဟုတ်လောဟုမေးပေမည်။’ ဤကားအချက်အချာပေတည်း။ ဘုရားသခင့်နိုင်ငံတော်တည်ထောင်ခြင်းနှင့် မကြာမီနှစ်အနည်းငယ်က ဖြစ်ပျက်ခဲ့သော ဘေးဒုက္ခများ ဆက်စပ်မှုရှိကြောင်း ယခုသုံးသပ်၍ သဘောပေါက်နားလည်လာကြမည်။

^၄၆ သမ္မာကျမ်းစာပရောဖက်ပြုချက်တွင် ၁၉၁၄ ခုနှစ်ကို သတ်မှတ်ထားရာနှစ်အဖြစ် ၁၉၁၄ ခုနှစ်မတိုင်မီ ၃၅ နှစ်ခန့်ကတည်းက (ယခု ကမ္ဘာပေါ် အများဆုံးထုတ်ဝေရသည့် ဘာသာရေးမဂ္ဂဇင်း) ကင်းမျှော်စင် မှဖေါ်ပြခဲ့သည်။ ဤပရောဖက်ပြုချက်များသည် ၁၉၁၄ ခုနှစ်တွင် ထူးခြားစွာ စတင်ပြည့်စုံလာပါသည်။ ယင်းတို့အနက် တစ်ခုမှာ နှစ်ပေါင်း ၁၉၀၀ ကျော်က မိန့်တော်မူခဲ့သည့် ယေရှုကိုယ်တော်တိုင်၏ပရောဖက်ပြုချက်ပါဝင်သည်။ ဤမည်ကား အစီအစဉ်စနစ်၏အဆုံးတွင် ပေါ်လာ၍ ဘုရင်မင်းမြတ်တန်ခိုးအာဏာနှင့်တကွ ကိုယ်တော်ရောက်ရှိနေကြောင်း သက်သေထူမည့် “ပုပ္ပနိမိတ်” နှင့်ပတ်သက်သည်။ ဤ “ပုပ္ပနိမိတ်” အကြောင်း တပည့်တော်တို့၏မေးခွန်းကို ဖြေဆိုရာတွင် ကိုယ်တော်က “လူတစ်မျိုးနှင့်တစ်မျိုး၊ တစ်နိုင်ငံနှင့်တစ်နိုင်ငံ ရန်ဘက်ပြုကြလိမ့်မည်။ အရပ်ရပ်တို့၌ အစာခေါင်းပါးခြင်း၊ ကာလနာများပြားခြင်း၊ မြေကြီးလှုပ်ခြင်းတို့သည် ဖြစ်ကြလိမ့်မည်။ ထိုအမှုအရာတို့သည် ဒုက္ခဆင်းရဲခြင်း၏အစပေတည်း။” (မဿဲ ၂၄:၃၊ ၇၊ ၈) ထူးခြားစွာပြည့်စုံချက်အနေနှင့် ပထမဦးဆုံးကမ္ဘာ့စစ်ပွဲကြီးသည် ၁၉၁၄ ခုနှစ်တွင် ဖြစ်ပွားခဲ့ပြီး လွန်ခဲ့သော နှစ်ပေါင်း ၂၅၀၀ အတွင်းဖြစ်ခဲ့သည့် စစ်ပွဲပေါင်း ၉၀၀ တို့ထက် အဖျက်စွမ်းအား ခုနစ်ဆများပေသည်။ ထိုအချိန်ကတည်းက ဒုက္ခဆင်းရဲခြင်းများ ယနေ့တိုင်ရှိနေပေသည်။ ၁၉၁၄ ခုနှစ်မှစ၍ ကမ္ဘာပေါ်ကပ်ဆိုက်ခဲ့သော စစ်ဘေးဒဏ်၊ ငတ်မွတ်ခြင်းဘေး သို့မဟုတ် ကြီးမားသောငလျင်ဘေးကို သင်ကြုံဖူးသလော။ သို့ဖြစ်လျှင် သင်သည် ဤအစီအစဉ်စနစ်၏ “နောက်ဆုံးကာလ” ကိုတင်ပြသော “ပုပ္ပနိမိတ်” ၏မျက်မြင်ကိုယ်တွေ့ကြုံဖူးသူဖြစ်သည်။—ဒံယေလ ၁၂:၄။

၄၇။ များမကြာမီနှစ်များအတွင်း “ပုပ္ပနိမိတ်” ကိုပြည့်စုံစေသည့် အဖြစ်အပျက်များ မည်သို့အရှိန်တိုးမြှင့်လာသနည်း။

^၄၇ ပထမကမ္ဘာစစ်ထက် အဖျက်စွမ်းအား လေးဆများသည့် ဒုတိယကမ္ဘာစစ်ပြီးနောက် ဤနျူကလီးယားခေတ်တိုင်အောင် “ဆင်းရဲဒုက္ခများ” သည် တိုး၍တိုး၍ဆိုးရွားလာရာ ယေရှုထပ်ဆင့်ပရောဖက်ပြုသည့်စကားများကို ပြည့်စုံစေခဲ့သည်။ “မိုးကောင်းကင်၌လည်း ကြောက်မက်ဖွယ်သောအရာနှင့် ကြီးစွာသောပုဗ္ဗနိမိတ်တို့သည် ပေါ်ထွန်းကြလိမ့်မည်။” (လုကာ ၂၁:၁၁) ရာဇဝတ်မှုနှင့် မတရားမှုများ၊ စကားနားမထောင်ခြင်း၊ စာရိတ္တပျက်ပြားသော သားသမီးများ၊ ဘုရားတရားမဲ့ပြီး သီလယိုယွင်းမှု တိုးပွားများပြားလာခြင်းဆိုင်ရာ ထိတ်လန့်စရာအဖြစ်အပျက်များသည် ဤအစီအစဉ်စနစ်ဆိုး၏ “နောက်ဆုံးနေ့ရက်’ များကို သတ်မှတ်မည်အကြောင်းကိုလည်း ကြိုတင်ပရောဖက်ပြုထားသည်။—၂ တိမောသေ ၃:၁-၅။ မဿဲ ၂၄:၁၂။

၄၈။ ကမ္ဘာမြေကြီးပေါ် အမင်္ဂလာများ၏တရားခံကား မည်သူနည်း။ ၁၉၁၄ ခုနှစ်ကတည်းက အဘယ်ကြောင့်တိုးများလာသနည်း။

^၄၈ သို့ရာတွင် ကောင်းကင်အစိုးရသည် ၁၉၁၄ ခုနှစ်တွင် တည်ထောင်ခဲ့လျှင် ကမ္ဘာပေါ်တွင် ဆင်းရဲဒုက္ခ ဤမျှအဘယ်ကြောင့်ရှိရသနည်း။ တရားခံကား စာတန်မာရ်နတ်ဖြစ်သည်။ နိုင်ငံတော်တန်ခိုးအာဏာကို ခရစ်တော်ရရှိချိန်တွင် ဦးဆုံးပြုတော်မူသည်ကား မျက်မြင်မရကောင်းကင်တွင် စာတန်ကိုစစ်တိုက်ခြင်းဖြစ်သည်။ ယင်းကြောင့် “ဤလောကတစ်နိုင်ငံလုံးကိုလှည့်ဖြား” သောစာတန်ကို သူ၏တမန်များနှင့်အတူ မြေကြီးသို့ချလိုက်လေသည်။ သူပျက်စီးရမည့်အချိန် နီးပြီဖြစ်ကြောင်းသိထား၍လည်း မြေကြီးပေါ်တွင် ဒုက္ခကြီးစွာပေးနေသည်။ “မြေကြီးနှင့်ပင်လယ်သည် အမင်္ဂလာရှိ၏။ အကြောင်းမူကား၊ မာရ်နတ်သည် မိမိကာလတစ်ခဏသာရှိသည်ကိုသိ၍ ပြင်းစွာသောဒေါသအမျက်နှင့်တကွ သင်တို့ရှိရာသို့ ဆင်းလေပြီ။”—ဗျာဒိတ် ၁၂:၇-၉၊ ၁၂။

၄၉။ (က) “မြေကြီးကိုဖျက်ဆီးသူများ” ဘာဖြစ်သွားမည်နည်း။ (ခ) တိုင်းနိုင်ငံများအပေါ် ကိုယ်တော်၏ “တရားစီရင်ရာအကြံတော်” ကို ယေဟောဝါမည်သို့စီရင်မည်နည်း။

^၄၉ ဤအမင်္ဂလာများ အဆုံးတိုင်ပါမည်လော။ အနန္တတန်ခိုးရှင် ဘုရားသခင်၏နိုင်ငံတော်၊ ကောင်းကင်အုပ်ချုပ်ရေးအဖွဲ့စီရင်တော်မူ၍ “မြေကြီးကိုဖျက်ဆီးသောသူတို့ကို ဖျက်ဆီးတော်မူသော” အခါ အဆုံးတိုင်ရမည်။ (ဗျာဒိတ် ၁၁:၁၈။ ဒံယေလ ၂:၄၄) နိုင်ငံရေးအာဏာစက်များ၊ ခရစ်ယာန်အတုအယောင်များ နှင့် မည်သူ့ကိုမျှ မိမိ၏လက်ရာတော် ကမ္ဘာမြေကြီးကို သူတို့၏နျူကလီးယားလက်နက်များဖြင့် ဘုရားသခင်ဖျက်ဆီးခွင့်ပြုတော်မူမည်မဟုတ်။ ထိုသို့ဖြစ်မည့်အစား ကိုယ်တော်ဤသို့ကြွေးကြော်ခဲ့သည်။ “တိုင်းနိုင်ငံပြည်သားတို့ကိုစုဝေးစေ၍ ငါ့အမျက်၊ ငါ့ဒေါသအရှိန်ကို အကုန်အစင်သွန်းလောင်းမည်ဟု ငါအကြံရှိ၏။” (ဇေဖနိ ၃:၈) ယေဟောဝါရှင်သည် ခရစ်တော်မှတစ်ဆင့် မြေကြီးပေါ်တွင် စာတန်နောက်လိုက်အပေါင်းကို လုံးဝဖျက်ဆီးပစ်ရန် မိမိချုပ်ကိုင်ထားသော စကြဝဠာရှိစွမ်းအင်များကို အသုံးပြုတော်မူမည်။ ယင်းသည် နောဧခေတ်ကရေလွှမ်းမိုးဘေး၏အတိုင်းအတာနည်းတူ ကမ္ဘာချီဖြစ်ပေမည်။—ယေရမိ ၂၅:၃၁-၃၄။ ၂ ပေတရု ၃:၅-၇၊ ၁၀။

၅၀။ (က) “အာမဂေဒုန်” ကားအဘယ်နည်း။ (ခ) မည်သူသာလျှင် အာမဂေဒုန်ကိုကျော်မည်နည်း။

^၅၀ ဆိုးသွမ်းသောတိုင်းနိုင်ငံများပျက်စီးချိန်ကို သမ္မာကျမ်းစာက ဘုရားသခင်၏ အာမဂေဒုန်စစ်ဟူ၍ ခေါ်ဆိုထားသည်။ (ဗျာဒိတ် ၁၆:၁၄-၁၆) စိတ်နှိမ့်ချ၍ ယေဟောဝါနှင့် ဖြောင့်မတ်ခြင်းတရားကို ရှာသူများသာလျှင် အာမဂေဒုန်ကျော်ပြီး ဘုရားသခင်၏ငြိမ်းချမ်းသောစနစ်သစ်ထဲဝင်ရလိမ့်မည်။ (ဇေဖနိ ၂:၃။ ဟေရှာယ ၂၆:၂၀၊ ၂၁) သူတို့အကြောင်း သမ္မာကျမ်းစာဤသို့ဆိုသည်။ “စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသော ငြိမ်သက်ခြင်း၌ မွေ့လျော်ကြလိမ့်မည်။” (ဆာလံ ၃၇:၁၁) ထိုအခါ ကမ္ဘာပေါ်ပရဒိသုပြန်လည်တည်ထောင်ခြင်းဆိုင်ရာ ထူးမြတ်သောလုပ်ငန်း စတင်မည်ဖြစ်သည်။

ပရဒိသုအတွင်းဝင်ရန် သွန်သင်ပို့ချမှု

၅၁။ ယခုပင်ဆောင်ရွက်စရာများကိုဆောင်ရွက်ရန် အဘယ်ကြောင့်လိုအပ်သနည်း။

^၅၁ ပရဒိသုတွင် သင်နေထိုင်လိုသလော။ ‘ဟုတ်ကဲ့’ ဟုသင်ဖြေဆိုပါက ယခုဒုက္ခထူပြောသောစနစ်အကြောင်းနှင့်၊ ယင်းပျက်စီးမည့်အချိန်နီးခြင်း၏ “ပုပ္ပနိမိတ်” အကြောင်း ယေရှုမိန့်တော်မူချိန်တွင် ဤသို့ထပ်ဆင့်မိန့်မြွက်ခဲ့သည့်အတွက် ဝမ်းသာပေမည်။ “ယခုဖြစ်သောလူများမကုန်မှီ ထိုအကြောင်းအရာအလုံးစုံတို့သည် ဖြစ်ကြလိမ့်မည်။” (မဿဲ ၂၄:၃၄) သို့ရာတွင် လူအများစုမှာ ပျက်စီးခြင်းလမ်းကျယ်ပေါ် သွားလာနေကြရာ အလွန်ဝမ်းနည်းစရာကောင်းပေသည်။ (မဿဲ ၇:၁၃၊ ၁၄) သူတို့ပြောင်းလဲကြရန် အချိန်အနည်းငယ်သာကျန်ရှိတော့သည်။ ကြိုတင်သတိပေးထားသဖြင့် ယေဟောဝါရှင်ကို သင်ကျေးဇူးတင်ထိုက်လှပေသည်တကား။ သင့်အားယေဟောဝါအသက်ရစေလိုသည့်အတွက် ခြေလှမ်းမှန်ကန်ရန် သင့်အားကိုယ်တော်ကူညီမစတော်မူမည်။—၂ ပေတရု ၃:၉။ ယေဇကျေလ ၁၈:၂၃။

၅၂။ ဘာသာတရားနှင့်ပတ်သက်၍ ပညာရှိဆုံးဖြတ်ချက်ချရန် အဘယ်အရာလိုအပ်သနည်း။

^၅၂ ယခုသင်အရေးတကြီးလိုအပ်နေသည်ကား မှန်သောအသိပညာပင်တည်း။ (၁ တိမောသေ ၂:၄။ ယောဟန် ၁၇:၃) ယင်းကို သင်အဘယ်နေရာတွင် ရရှိနိုင်မည်နည်း။ မည်သည့်ဘာသာ၌မဆို ယင်းကိုရရှိနိုင်ပါမည်လော။ တောင်ပေါ်လမ်းအားလုံး တောင်ထိပ်သို့ဦးတည်သကဲ့သို့ ဘာသာအားလုံး ပန်းတိုင်တစ်ခုတည်းသို့ဝင်စေသည်ဟု အချို့ဆိုသည်။ မည်မျှမှားယွင်းနေပါသည်တကား။ လမ်းမှန်ကိုရှာတွေ့ရန် တောင်တက်သူများ မြေပုံများအသုံးပြုရကြသည်။ လမ်းပြများကိုလည်း ငှားရမ်းရကြသည်။ ထိုနည်းတူစွာ ထာဝရအသက်သို့ပို့ဆောင်သော သမ္မာတရားဆိုင်ရာ ဘာသာတစ်ခုတည်းသာရှိပြီး ယင်းကိုတွေ့ရှိရန် လမ်းပြမှုလိုအပ်ပေသည်။—တမန်တော် ၈:၂၆-၃၁။

၅၃။ (က) ထာဝရအသက်ရခြင်းငှာ ဆက်လက်၍ အဘယ်အရာပြုရမည်နည်း။ (ခ) စာတန်ထံမှ အဘယ်သွေးဆောင်မှုများကို သင်ကျော်လွှားရန် လိုမည်နည်း။

^၅၃ သင့်အတွက် အကူအညီဖြစ်စေရန် ဤစာစောင်ကို ယေဟောဝါသက်သေများ ပုံနှိပ်ထုတ်ဝေထားသည်။ သမ္မာကျမ်းစာရှိအခြေခံသမ္မာတရားအချို့ကိုပင် သင်သိနားလည်ရန် ကူညီပေးခဲ့ပြီမဟုတ်လော။ အချက်အလက်တစ်ခုစီသည် ဘုရားသခင်မှုတ်သွင်းခံနှုတ်ကပတ်တော်မှ ဖြစ်မဖြစ် သင်စစ်ဆေးကြည့်ပြီးဖြစ်မည်။ ယခု သင့်ပန်းတိုင်သို့ရောက်နိုင်ရန် ဆက်လက်လေ့လာရမည်။ နေ့စဉ်လူ့ဘောင်အတွင်း အံဝင်နေနိုင်ရန် လောကီပညာအတော်အသင့်ရှိထားရန် လိုအပ်သည့်နည်းတူ ပရဒိသုကမ္ဘာပေါ်အသက်ရှင်နိုင်ရန် ကပ်ကျော်မည့် လူ့အဖွဲ့အစည်းအဝင်ဖြစ်ဖို့အတွက် သမ္မာကျမ်းစာပညာ အတော်အသင့်ရှိထားရန်လိုသည်။ (၂ တိမောသေ ၃:၁၆၊ ၁၇) သင့်အပေါင်းအသင်းများ သင့်ကိုအတိုက်အခံပြုရန်၊ သို့မဟုတ် စည်းစိမ်ချမ်းသာ သို့မဟုတ် သီလယိုယွင်းသောလမ်းစဉ်များသို့ ကိုယ်ကျိုးရှာစေရန် သွေးဆောင်ခြင်းအားဖြင့် စာတန်သည်သင့်အားလမ်းလွဲစေလိမ့်မည်။ စာတန်ကိုအလျှော့မပေးပါနှင့်။ သင့်လုံခြုံမှု၊ သင်နှင့်သင့်မိသားစု၏နောင်အနာဂတ်သည် သမ္မာကျမ်းစာကို ဆက်လေ့လာခြင်းပေါ်မူတည်နေသည်။—မဿဲ ၁၀:၃၆။ ၁ ယောဟန် ၂:၁၅-၁၇။

၅၄။ သင့်အရပ်ဒေသတွင် ပညာပေးခြင်းအတွက် အဘယ်အစီအစဉ်ကို ယေဟောဝါထပ်ဆင့်စီမံထားတော်မူသနည်း။

^၅၄ ဤအတိုင်း သမ္မာကျမ်းစာကိုဆက်လေ့လာသည့်အပြင် သင်ယူရန် အခြားနည်းတစ်နည်းရှိသေးသည်။ သမ္မာကျမ်းစာပညာကိုစိတ်ဝင်စားသူ သင့်ရပ်ကွက်သူ၊ ရပ်ကွက်သားများသည် ဒေသခံနိုင်ငံတော်ခန်းမ၌စည်းဝေးများကို မှန်မှန်တက်ရောက်ကြသည်။ တက်ရောက်သူအားလုံးသည် သမ္မာကျမ်းစာမှ သွန်သင်ချက်များနာယူရန်တက်ကြပြီး သာ၍ကောင်းသောသူများဖြစ်လာကြရန် စိတ်ရင်းမှန်ဖြင့် ကြိုးစားနေသူများဖြစ်ကြသည်။ လူသစ်များကိုလည်း လှိုက်လှဲစွာဤသို့ဖိတ်ခေါ်ကြပါသည်။ “လာကြလော့။ [ကိုယ်တော်၏ဝတ်ပြုရာ] ယေဟောဝါ၏တောင်တော်၊ . . . သို့တက်သွားကြကုန်အံ့။ လမ်းခရီးတော်တို့ကို ပြသသွန်သင်တော်မူ၍ ငါတို့သည်ခြေတော်ရာသို့ လိုက်သွားကြမည်။” (ဟေရှာယ ၂:၃) “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကိုကျင့်စေခြင်းငှာလည်းကောင်း၊ တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှုကြကုန်အံ့။ လူအချို့တို့၏ထုံးစံရှိသည်အတိုင်း အချင်းချင်းစည်းဝေးခြင်းအမှုကို မရှောင်မလွှဲကြနှင့်။ အချင်းချင်းတို့ကို တိုက်တွန်းနှိုးဆော်ကြလော့။ ကာလအချိန်ရောက်လုနီးသည်ကိုထောက်သဖြင့် သာ၍ကြိုးစားကြလော့” ဟူ၍ ကျွန်ုပ်တို့ဖတ်ရသည့် ဟေဗြဲ ၁၀:၂၄၊ ၂၅ တွင်သမ္မာကျမ်းစာအစည်းအဝေးများတက်ရန် အကြောင်းကောင်းများကို တင်ပြထားပါသည်။

၅၅။ (က) ယေဟောဝါအဖွဲ့အစည်းသည် အခြားအဖွဲ့အစည်းများမှ အဘယ်နည်းများဖြင့် ခြားနားသနည်း။ (ခ) အခြားမည်သည့်လူတို့နှင့်မျှမတူဘဲ ယေဟောဝါသက်သေများသည် မည်သို့စည်းလုံးကြသနည်း။

^၅၅ ယေဟောဝါအဖွဲ့အစည်းနှင့် သင်ပေါင်းသင်းရာတွင် ဗိမာန်ကျောင်းဆောင်များအတွင်းရှိ အခြေအနေနှင့်အလွန်ခြားနားကြောင်း သင်သတိပြုမိမည်။ အလှူငွေကောက်ခံခြင်းမရှိ၊ ကုန်းတိုက်ခြင်း၊ ရန်ဖြစ်ခြင်း၊ မိသားစုနောက်ခံ သို့မဟုတ် စီးပွားရေးအခြေအနေကြောင့် ခွဲခြားဆက်ဆံခြင်း မရှိချေ။ သူတို့သည် ဦးဆုံးယေဟောဝါကိုချစ်မြတ်နိုးသည်။ ထိုနောက်အခြားသူတို့ကို မေတ္တာထားကြသည်။ ဤမည်ကား ခရစ်ယာန်စစ်များ၏ အမှတ်အသားများဖြစ်သည်။ (မဿဲ ၂၂:၃၇-၃၉။ ယောဟန် ၁၃:၃၅) သူတို့၏အစည်းအဝေးများကို တက်ကြည့်ပြီး ဟုတ်မဟုတ်မှန်မမှန် သင်စစ်ဆေးသင့်သည်။ သူတို့၏စည်းလုံးမှုကို သင်သတိပြုမိမည်ကားသေချာသည်။ ကမ္ဘာတစ်ဝှန်း နိုင်ငံပေါင်း ၂၃၀ ကျော်တွင် သက်သေခံသုံးသန်းကျော်ရှိပါသည်။ သို့နှင့်ပင် သူတို့၏အစည်းအဝေးများတွင် သက်သေခံများသည် တစ်မျိုးတည်းသောအစီအစဉ်ကို ကမ္ဘာတစ်ခွင်အသုံးပြုကြပါသည်။ ဘာသာစကားပေါင်းများစွာဖြင့် တစ်ချိန်တည်း ပုံနှိပ်ထုတ်ဝေခြင်းကြောင့်လည်း ပတ်စဉ်အစည်းအဝေးများတွင် ယေဟောဝါသက်သေခံအများစုသည် နာရီအနည်းငယ်သာခြားနားပြီး ထပ်တူကျမ်းစာဆိုင်ရာအကြောင်းများကို လေ့လာကြသည်။ ဤကွဲပြားခြားနားသော လောကကြီးတွင် ယေဟောဝါအဖွဲ့အစည်း၏ စည်းလုံးမှုသည် မျက်မှောက်အံ့ဖွယ်ရာအမှုဖြစ်ပေသည်။

၅၆။ (က) ယေဟောဝါအဖွဲ့အစည်းနှင့် ပေါင်းသင်းခြင်းမှ အဘယ်အကျိုးကျေးဇူးများ ခံစားရမည်နည်း။ (ခ) ပြဿနာများပေါ်လာသည့်အခါ သင်မည်သို့တုံ့ပြန်သင့်သနည်း။ (ဂ) သင့်အသက်တာကို ယေဟောဝါထံဆက်ကပ်အပ်နှံရန် အဘယ်ကြောင့်အရေးကြီးသနည်း။

^၅၆ ယေဟောဝါလူမျိုးနှင့် မှန်မှန်ပေါင်းရာတွင် “လူသစ်” ကိုယူတင်ဝတ်ဆောင်ရန် လိုအပ်လာပြီး ဘုရားသခင်၏ဝိညာဉ်အသီးများဖြစ်သော “ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ ယုံကြည်ခြင်း၊ နူးညံ့သိမ်မွေ့ခြင်း နှင့် ချုပ်တည်းခြင်း” တို့ကိုမွေးမြူပေးရမည်။ (ကောလောသဲ ၃:၁၀၊ ၁၂-၁၄။ ဂလာတိ ၅:၂၂၊ ၂၃NW) ယင်းမှ ကျေနပ်ရောင့်ရဲမှုများစွာခံစားရမည်။ ပျက်စီးယိုယွင်းသော လောကကြီးတွင် သင်နေထိုင်ရသောကြောင့်လည်းကောင်း၊ သင့်မစုံလင်မှုများကြောင့်လည်းကောင်း တစ်ခါတစ်ရံ အနိုင်ယူရန်လိုအပ်သော ပြဿနာများကြုံကောင်းကြုံရမည်။ သို့သော် ယေဟောဝါသင့်အားကူညီပေးလိမ့်မည်။ ကိုယ်တော်၏အလိုတော်ကိုဆောင်ရွက်ရန် ကြိုးစားနေသူများအား နှုတ်ကပတ်တော်က ဤသို့ဆိုသည်။ “အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ ကျေးဇူးတော်ကိုချီးမွမ်းခြင်းနှင့်တကွ ဆုတောင်းပတ္ထနာပြုသောအားဖြင့် သင်တို့တောင်းပန်လိုသောအရာများတို့ကို ဘုရားသခင်အား ကြားလျှောက်ကြလော့။ ထိုသို့ပြုလျှင် အဘယ်သူမျှကြံ၍မမှီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် သင်တို့၏စိတ်နှလုံးတို့ကို စောင့်မလိမ့်မည်။” (ဖိလိပ္ပိ ၄:၆၊ ၇) ယေဟောဝါ၏မေတ္တာတော်ကြောင့် ဆွဲဆောင်ခံရသည့်အတွက် ကိုယ်တော်ကို ဝတ်ပြုလိုစိတ်ပေါ်လာပေမည်။ ဤမေတ္တာရှင်ဘုရားသခင်ထံ သင့်အသက်ကိုသင် မည်သို့ဆက်ကပ်အပ်နှံနိုင်ပြီး ကိုယ်တော်၏အခွင့်ထူးသောသက်သေတစ်ဦး မည်သို့ဖြစ်လာနိုင်သည်ကို ယေဟောဝါသက်သေများ ဝမ်းသာအားရနှင့် ပြသလိုပါသည်။ (ဆာလံ ၁၀၄:၃၃။ လုကာ ၉:၂၃) မှန်ပါသည်၊ အခွင့်ထူးဖြစ်သည်။ စဉ်းစားကြည့်ပါ။ ယေဟောဝါကို ကိုးကွယ်သူတစ်ဦးအနေနှင့် ဤကမ္ဘာပေါ်ပရဒိသုတွင် ထာဝရအသက်ရရန်ပန်းတိုင်ကို လက်လှမ်းယူနိုင်ပါသည်။—ဇေဖနိ ၂:၃။ ဟေရှာယ ၂၅:၆၊ ၈။

၅၇။ (က) စနစ်သစ်တွင် ဘုရားသခင်နှင့် လူသားစပ်ကြား အဘယ်ရင်းနှီးသောဆက်ဆံမှု ရှိမည်နည်း။ (ခ) ထိုအခါ သင်ခံစားရမည့် ကောင်းချီးအချို့ကား အဘယ်နည်း။

^၅၇ ထိုကြောင့် ယေဟောဝါဘုရားသခင်၊ ကိုယ်တော်၏သားတော် နှင့် ဖြောင့်မတ်ခြင်းဆိုင်ရာ ကောင်းကင်အုပ်ချုပ်ရေးအဖွဲ့အကြောင်း ဆက်လေ့လာပြီး မြတ်နိုးတန်ဖိုးထားခြင်း တိုးပွားလာရန် ကြိုးစားပါ။ ဘုရားသခင်၏အုပ်ချုပ်ရေးနှင့် ယင်း၏ကောင်းချီးများကို ဖေါ်ပြရာတွင် သမ္မာကျမ်းစာပရောဖက်ပြုချက်က ဤသို့ဆိုသည်။ “ဘုရားသခင်၏တဲတော်သည် လူတို့တွင်ရှိ၏။ လူတို့နှင့်အတူ ကျိန်းဝပ်တော်မူမည်။ သူတို့သည် ကိုယ်တော်၏လူဖြစ်ကြလိမ့်မည်။ ဘုရားသခင်သည် ကိုယ်တော်တိုင် သူတို့နှင့်အတူရှိနေ၍ သူတို့၏ဘုရားသခင်ဖြစ်တော်မူမည်။” ယခုနေ့ရက်တွင်ရှိ လူ့အစိုးရထက် များစွာမြင့်မြတ်တော်မူသော “ဘုရားသခင်ကိုယ်တော်တိုင်” ထိုစနစ်သစ်တွင် ကိုယ်တော်ကိုချစ်မြတ်နိုးကာ ဝတ်ပြုကိုးကွယ်သူအားလုံး၏ ကြင်နာသောဖခင်တစ်ဦးအဖြစ် ရင်းနှီးစွာရှိမည်။ ထိုအခါ ယေဟောဝါကို ကိုးကွယ်သည့်စစ်မှန်သောဘာသာ တစ်ခုတည်းသာရှိမည်။ ကိုယ်တော်ကို ကိုးကွယ်သူတို့သည်လည်း သားသမီးနှင့်ဖခင်၏ရင်းနှီးသောဆက်ဆံမှု၌ ပျော်မွေ့နေကြမည်။ ကိုယ်တော်သည် မေတ္တာရှင် ဘုရားသခင်ဖြစ်တော်မူကြောင်း တကယ်ထင်ရှားလာပေမည်။ “ဘုရားသခင်သည် သူတို့၏မျက်စိ၌မျက်ရည်ရှိသမျှကို သုတ်တော်မူမည်။ နောက်တစ်ဖန်သေဘေးမရှိ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား၊ ရှေးဖြစ်ဖူးသောအရာတို့သည် ရွေ့သွားကြပြီ။”—ဗျာဒိတ် ၂၁:၃၊ ၄။

၅၈။ ယေဟောဝါရှင်သည် “အရာခပ်သိမ်းကို အသစ်ဖန်ဆင်း” မည်အကြောင်း အဘယ်ကြောင့်စိတ်ချနိုင်သနည်း။

^၅၈ ဤနည်းဖြင့် ပြည့်ဝစုံလင်သော ကောင်းကင်အစိုးရအောက် ပရဒိသုကမ္ဘာမြေကြီးတည်ထောင်ခြင်းဆိုင်ရာ အံ့ဖွယ်ရာအမှုကြီးသည် ပြီးပြည့်အောင်မြင်မည်။ နက်ဖြန်နေ့တွင် နေထွက်လာပြီး နေဝင်မည် သေချာသကဲ့သို့ပင် ယင်းအမှုကိစ္စဖြစ်မည်သေချာသည်။ အကြောင်းမူကား၊ ကောင်းကင်မြေကြီးကိုဖန်ဆင်းတော်မူရှင် ယေဟောဝါဘုရားသခင်၏ ကတိတော်များသည် “သစ္စာစကား၊ ဟုတ်မှန်သောစကား” ဖြစ်တော်မူသည်။ ကောင်းကင်ပလ္လင်တော်ပေါ်မှ ကိုယ်တော်တိုင် ဤသို့မိန့်တော်မူသည်။ ‘ကြည့်ရှုလော့။ ငါသည်ခပ်သိမ်းသောအရာတို့ကို အသစ်ဖန်ဆင်းသည်။’—ဗျာဒိတ် ၂၁:၅။

ဤစာစောင်ကို ပြန်လည်သုံးသပ်ကြည့်ရာတွင် အောက်ပါမေးခွန်းများကို မည်သို့ဖြေဆိုမည်နည်း။

သမ္မာကျမ်းစာသည် အဘယ်နည်းများဖြင့် ထူးခြားသနည်း။

ဘုရားသခင်အကြောင်း သင်အဘယ်အရာများ သိလာသနည်း။

ခရစ်တော်ယေရှုကား မည်သူနည်း။

စာတန်မာရ်နတ်ကား မည်သူနည်း။

ဆိုးသွမ်းမိုက်မဲမှုကို ဘုရားသခင်အဘယ်ကြောင့် ခွင့်ပြုတော်မူသနည်း။

လူအဘယ်ကြောင့် သေရသနည်း။

လူသေများ၏အခြေအနေကား အဘယ်နည်း။

ရွေးနှုတ်ဖိုးကား အဘယ်နည်း။

အဘယ်နေရာနှင့် အဘယ်နည်းဖြင့် ရှင်ပြန်ထမြောက်မည်နည်း။

နိုင်ငံတော်ကား အဘယ်နည်း။ ယင်းသည် အဘယ်အရာကိုဖြစ်မြောက်စေမည်နည်း။

“အစီအစဉ်စနစ်၏ဆုံးခန်း” ဆိုင်ရာ “ပုပ္ပနိမိတ်” ကားအဘယ်နည်း။

ပရဒိသုတွင် ထာဝရအသက်ရရှိရန် သင်မည်သို့ပြင်ဆင်နိုင်မည်နည်း။

[အောက်ခြေမှတ်ချက်]

[စာမျက်နှာ ၁၃ ပါ ရုပ်ပုံ]

ဖန်ဆင်းရာတို့တွင် လူသည် တိရစ္ဆာန်တို့ထက် အဆင့်မြင့်သည်

[စာမျက်နှာ ၁၈ ပါ ရုပ်ပုံ]

ယေရှုသည် စုံလင်သော လူယောက်ျားအာဒံနှင့် ညီတူညီမျှဖြစ်သည်