သင်ခန်းစာ ၁၆
ဘုရားသခင့်အမှုတော်ကိုထမ်းဆောင်ရန် အသင့်ဆုံးဖြတ်ချက်
ဘုရားသခင်၏မိတ်ဆွေဖြစ်လာရန် သင်ဘာလုပ်ရမည်နည်း။ (၁၊ ၂)
ဘုရားသခင်ထံ သင်၏ဆက်ကပ်အပ်နှံမှုကို မည်သို့ ပြုလုပ်ရမည်နည်း။ (၁)
မည်သည့်အချိန်၌ သင်နှစ်ခြင်းခံသင့်သနည်း။ (၂)
ဘုရားသခင်ကို ဆက်သစ္စာရှိနေနိုင်ရန်အတွက် ခွန်အားကို သင်မည်သို့ရရှိနိုင်မည်နည်း။ (၃)
၁။ ဘုရားသခင်၏မိတ်ဆွေတစ်ဦးဖြစ်လာရန်အတွက် သင်သည် ကျမ်းစာအသိပညာ ကောင်းရှိထားရမည် (၁ တိမောသေ ၂:၃၊ ၄)၊ သင်ယူသိရှိထားပြီးရာများကို ယုံကြည်ရမည် (ဟေဗြဲ ၁၁:၆)၊ သင့်အပြစ်များကို နောင်တရရမည် (တမန်တော် ၁၇:၃၀၊ ၃၁)၊ ထို့ ပြင် သင့်ဘဝလမ်းစဉ်ကို ပြောင်းလဲရမည်။ (တမန်တော် ၃:၁၉) ထို့နောက် ဘုရားသခင်ကို သင်ချစ်မြတ်နိုးခြင်းက သင့်ကိုသင် ကိုယ်တော့်ထံ ဆက်ကပ်အပ်နှံရန် သင့်ကိုလှုံ့ဆော်သင့်သည်။ ယင်းက ကိုယ်တော့်အလိုတော်ကိုထမ်းဆောင်ရန် သင့်ကိုယ်သင်ပေးလိုက်ပြီဖြစ်ကြောင်း ဘုရားသခင်ထံ ကိုယ်တိုင်သီးသန့်ဆုတောင်းပြောဆိုခြင်းကိုဆိုလိုသည်။—မဿဲ ၁၆:၂၄; ၂၂:၃၇။
၂။ ဘုရားသခင်ထံ သင့်ကိုသင်ဆက်ကပ်အပ်နှံပြီးသည့်နောက် သင်သည်နှစ်ခြင်းခံသင့် ပေပြီ။ (မဿဲ ၂၈:၁၉၊ ၂၀) နှစ်ခြင်းခံခြင်းက ယေဟောဝါထံ သင့်ကိုသင်ဆက်ကပ်အပ်နှံလိုက်ပြီဖြစ်ကြောင်း အားလုံးသောသူတို့ကို အသိပေးပေမည်။ ထို့ကြောင့် နှစ်ခြင်းခံခြင်းသည် ဘုရားသခင်ထံအမှုထမ်းရန် ဆုံးဖြတ်ချက်ချနိုင်သည့် အသက်အရွယ်ရောက်ရှိပြီးသူများအတွက်သာဖြစ်သည်။ လူတစ်ဦးနှစ်ခြင်းခံသည့်အခါ သူ၏ကိုယ်ခန္ဓာတစ်ခုလုံးကို ရေအောက်တွင် အခိုက်အတန့်အားဖြင့် နှစ်မြှုပ်သင့်၏။a—မာကု ၁:၉၊ ၁၀; တမန်တော် ၈:၃၆။
၃။ ဆက်ကပ်အပ်နှံမှုကို ပြုပြီးနောက် သင့်ကတိအတိုင်း အသက်ရှင်နေထိုင်ရန် ယေဟောဝါမျှော်လင့်တော်မူပေလိမ့်မည်။ (ဆာလံ ၅၀:၁၄; ဒေသနာ ၅:၄၊ ၅) သင့်အား ယေဟောဝါ၏အမှုတော်ထမ်းခြင်းမှ ရပ်တန့်သွားစေရန် စာတန်ကြိုးစားပြုလုပ်လိမ့်မည်။ (၁ ပေတရု ၅:၈) သို့သော် ဆုတောင်းခြင်းဖြင့် ဘုရားသခင်ထံသို့ ချဉ်းကပ်ပါ။ (ဖိလိပ္ပိ ၄:၆၊ ၇) ကိုယ်တော်၏နှုတ်ကပါဌ်တော်ကို နေ့စဉ်လေ့လာပါ။ (ဆာလံ ၁:၁-၃) အသင်းတော်နှင့် နီးနီးကပ်ကပ်နေပါ။ (ဟေဗြဲ ၁၃:၁၇) သင်သည် ဤအရာအားလုံးတို့ကိုလုပ်ဆောင်ခြင်းအားဖြင့် ဘုရားသခင်အပေါ် ဆက်သစ္စာရှိနိုင်ရန်အတွက် ခွန်အားရရှိပါလိမ့်မည်။ ဤနည်းအားဖြင့် သင်သည်ဘုရားသခင်တောင်းဆိုတော်မူရာများကို ထာဝစဉ်လုပ်ဆောင်သွားနိုင်ပါမည်တည်း!
[အောက်ခြေမှတ်ချက်များ]
a နှစ်ခြင်းခံရန်အတွက် ပြင်ဆင်ရာတွင် ထာဝရအသက်ရရှိစေသော အသိပညာ သို့မဟုတ် ကင်းမျှော်စင် သမ္မာကျမ်းစာနှင့် ဝေစာအသင်းမှထုတ်ဝေသော ထပ်တူစာအုပ်မျိုးကို လေ့လာရန် အကြံပြုပါသည်။