ဘုရားသခင့် ကောင်းကင်တမန်တွေဆီက အကူအညီ

လူတချို့က မျက်စိနဲ့ မြင်ရမှ ယုံတယ်လို့ ပြောကြတယ်။ ဒါဟာ မိုက်မဲရာကျတယ်။ တို့တစ်တွေ မမြင်ဖူးတဲ့ တကယ့်အရာတွေ အများကြီး ရှိတယ်။ တစ်ခုလောက် ပြောနိုင်မလား။—

တို့တစ်တွေ ရှူနေတဲ့ လေကော။ လေကို ထိတွေ့လို့ ရသလား။— လက်ပေါ်ကို လေ မှုတ်ကြည့်လိုက်။ ထိတွေ့မှုတစ်မျိုး ခံစားရသလား။— ခံစားရတာပေါ့။ ဒါပေမဲ့ လေကို မမြင်ရဘူး မဟုတ်လား။—

မမြင်နိုင်တဲ့ နာမ်ဝိညာဉ် ပုဂ္ဂိုလ်တွေအကြောင်း သိခဲ့ရပြီးပြီ။ တချို့က ကောင်းတယ်၊ တချို့က ဆိုးတယ်ဆိုတာလည်း သိခဲ့ရတယ်။ မမြင်နိုင်တဲ့ နာမ်ဝိညာဉ် ပုဂ္ဂိုလ်ကောင်း တချို့ကို ပြောပြပါလား။— ဟုတ်တယ်၊ ယေဟောဝါဘုရား ရှိတယ်။ ယေရှု ရှိတယ်။ ကောင်းတဲ့ ကောင်းကင်တမန်တွေ ရှိတယ်။ ဆိုးတဲ့ ကောင်းကင်တမန်တွေကော ရှိသလား။— ရှိတယ်လို့ ကျမ်းစာ ဆိုတယ်။ သူတို့အကြောင်း ဘာတွေ သိထားသလဲ ပြောပြပါလား။—

သိရတာတစ်ခုက ကောင်းတဲ့ ကောင်းကင်တမန်ရော၊ ဆိုးတဲ့ ကောင်းကင်တမန်ပါ တို့တစ်တွေထက် ခွန်အားကြီးတယ် ဆိုတာပဲ။ ကြီးမြတ်တဲ့ဆရာဟာ ကောင်းကင်တမန်အကြောင်း အများကြီး သိတယ်။ ကမ္ဘာပေါ်မှာ ကလေးလေး တစ်ဦးအဖြစ် မမွေးခင် ကောင်းကင်တမန်တစ်ပါး ဖြစ်ခဲ့လို့ပါပဲ။ ကောင်းကင်ဘုံမှာ တခြား ကောင်းကင်တမန်တွေနဲ့အတူ နေခဲ့ဖူးတယ်လေ။ ကောင်းကင်တမန် သန်းပေါင်းများစွာကိုလည်း သိထားတယ်။ အဲဒီကောင်းကင်တမန်တွေမှာ နာမည် ရှိကြသလား။—

ကြယ်တွေကို ဘုရားသခင် နာမည် ပေးထားမှန်း သိခဲ့ရပြီးပြီ။ ဒီတော့ ကောင်းကင်တမန် အားလုံးမှာလည်း နာမည် ရှိမယ်ဆိုတာ သေချာတယ်။ ကျမ်းစာက “ကောင်းကင်တမန် ဘာသာစကား” အကြောင်း ပြောထားလို့ ကောင်းကင်တမန် အချင်းချင်း စကားပြောနိုင်တယ်ဆိုတာ သိရတယ်။ (၁ ကောရိန္သု ၁၃:၁) သူတို့ ဘာအကြောင်း ပြောကြမယ် ထင်သလဲ။ ကမ္ဘာပေါ်မှာရှိတဲ့ တို့တစ်တွေအကြောင်း ပြောကြသလား။—

စာတန်ရဲ့ တမန် နတ်ဆိုးတွေဟာ တို့တစ်တွေ ယေဟောဝါစကား နားမထောင်အောင် ကြိုးစားနေကြတယ်။ ဒီတော့ ဘယ်လို ကြိုးစားကြည့်မယ်ဆိုတာ သူတို့ ပြောကြမှာပဲ။ တို့တစ်တွေကို သူတို့လိုပဲ ဖြစ်စေချင်တာ၊ ဒါမှ ယေဟောဝါ မကြိုက်မှာလေ။ ဘုရားသခင်ရဲ့ သစ္စာရှိ ကောင်းကင်တမန်တွေကော။ သူတို့လည်း တို့အကြောင်း ပြောကြမယ် ထင်သလား။— ပြောကြတာပေါ့။ သူတို့ကျတော့ တို့ကို ကူညီပေးချင်ကြတယ်။ ယေဟောဝါကို ချစ်ပြီး ဝတ်ပြုသူတွေကို ကောင်းကင်တမန်တချို့ ဘယ်လို ကူညီပေးခဲ့တဲ့အကြောင်း ပြောပြမယ်နော်။

ဗာဗုလုန်ပြည်မှာ ဒံယေလလို့ခေါ်တဲ့ လူတစ်ယောက် ရှိခဲ့တယ်။ အဲဒီတိုင်းပြည်က လူတွေဟာ ယေဟောဝါကို မချစ်ကြဘူး။ ယေဟောဝါဘုရားဆီ ဆုတောင်းသူ မှန်သမျှကို ပြစ်ဒဏ်စီရင်ဖို့ ဥပဒေတောင် ထုတ်ပြန်ကြတယ်။ ဒါပေမဲ့ ဒံယေလဟာ ယေဟောဝါဆီ ဆုတောင်း မပျက်ခဲ့ဘူး။ ဒံယေလကို သူတို့ ဘယ်လို လုပ်လိုက်ကြသလဲ သိလား။—

ဟုတ်တယ်၊ လူဆိုးတွေက ဒံယေလကို ခြင်္သေ့တွင်းထဲ ပစ်ချလိုက်ကြတယ်။ ဒံယေလခမျာ ဆာလောင်နေတဲ့ ခြင်္သေ့ကြားထဲ ရောက်နေတော့တယ်။ အဲဒီနောက် ဘာဖြစ်သလဲ သိသလား။— “ဘုရားက ကောင်းကင်တမန်ကို လွှတ်ပြီး ခြင်္သေ့တွေရဲ့ ပါးစပ်ကို ပိတ်ထား” တယ်လို့ ဒံယေလ ပြောတယ်။ ထိခိုက်ဒဏ်ရာ တစ်ခုမှ မရခဲ့ဘူး။ ကောင်းကင်တမန်တွေဟာ ယေဟောဝါကို ဝတ်ပြုသူတွေအတွက် ထူးဆန်းတာတွေ လုပ်ပေးနိုင်တယ်။—ဒံယေလ ၆:၁၈-၂၂။

တစ်ခေါက်ကျတော့ ပေတရု ထောင်ချခံရတယ်။ ပေတရုဟာ ကြီးမြတ်တဲ့ဆရာ ယေရှုခရစ်ရဲ့ မိတ်ဆွေတစ်ယောက်ဆိုတာ မှတ်မိမှာပေါ့။ ယေရှုဟာ ဘုရားရဲ့ သားတော် ဖြစ်တယ်လို့ ပေတရု ပြောတာကို လူတချို့ မကြိုက်ကြဘူး။ ဒါနဲ့ ပေတရုကို ထောင်ချလိုက်ကြတယ်။ ပြီးတော့ ပေတရု လွတ်မြောက်သွားမှာ စိုးလို့ စစ်သည်တွေကို အစောင့်ချထားတယ်။ ပေတရုကို ကူညီပေးနိုင်မယ့်သူ ရှိပါ့မလား။—

ပေတရုဟာ အစောင့်နှစ်ယောက် ကြားမှာ အိပ်ပျော်နေတယ်။ လက်မှာလည်း သံကြိုးတွေနဲ့။ ဒါပေမဲ့ ‘ယေဟောဝါရဲ့ ကောင်းကင်တမန် ပေါ်လာပြီး ထောင်ခန်းတစ်ခုလုံး လင်းထိန်သွားတယ်။ ကောင်းကင်တမန်က ပေတရုရဲ့ နံဘေးကို ပုတ်ပြီး “မြန်မြန်ထပါ” လို့ နှိုးတယ်’ ဆိုပြီး ကျမ်းစာ ဆိုတယ်။

အဲဒီအချိန်မှာ ပေတရု လက်ကနေ သံကြိုးတွေ ကျွတ်ကျသွားတယ်။ ကောင်းကင်တမန်က ‘အဝတ်ကို အသေအချာ ဝတ်၊ ဖိနပ် စီးပြီး လိုက်ခဲ့’ လို့ ပေတရုကို ပြောတယ်။ ကောင်းကင်တမန်က ပေတရုကို ကူညီပေးနေတာမို့လို့ အစောင့်တွေ မတားနိုင်ကြဘူး။ သူတို့ သံတံခါးနားကို ရောက်တဲ့အခါ ထူးဆန်းတာတစ်ခု ဖြစ်လာတယ်။ တံခါးကြီး အလိုလို ပွင့်သွားတယ်။ ကောင်းကင်တမန် ကယ်ထုတ်လိုက်လို့ ပေတရု ဆက်ဟောပြောနိုင်ခဲ့တယ်။—တမန်တော် ၁၂:၃-၁၁။

တို့တစ်တွေကိုကော ကောင်းကင်တမန်တွေ ကူညီပေးနိုင်သလား။— ကူညီပေးနိုင်တာပေါ့။ တို့တစ်တွေ အနာတရ မဖြစ်အောင် စောင့်ရှောက်ပေးမယ်လို့ ဆိုလိုတာလား။— မဟုတ်ဘူးကွဲ့၊ မိုက်ရူးရဲ လုပ်ရင်တော့ ထိခိုက်ဒဏ်ရာ မရအောင် ကောင်းကင်တမန်တွေ ကာကွယ်ပေးမှာ မဟုတ်ဘူး။ ဒါပေမဲ့ မိုက်ရူးရဲလုပ်ရပ်တွေ မလုပ်ရင်တောင် ထိခိုက်ဒဏ်ရာတွေ ရနိုင်တယ်။ အဲဒီလို မဖြစ်ရအောင် ကာကွယ်ပေးဖို့ ကောင်းကင်တမန်တွေကို မမှာထားဘူး။ ဘုရားသခင်က ကောင်းကင်တမန်တွေကို အထူးတာဝန် ပေးထားတယ်။

ဘုရားသခင်ကို ကိုးကွယ်ကြပါလို့ အရပ်ရပ်မှာရှိတဲ့ လူတွေကို လိုက်ပြောနေတဲ့ ကောင်းကင်တမန်တစ်ပါးအကြောင်း ကျမ်းစာမှာ ဖော်ပြထားတယ်။ (ဗျာဒိတ် ၁၄:၆၊ ၇) လူတွေကို ဘယ်လို လိုက်ပြောသလဲ။ လူတိုင်း ကြားနိုင်အောင် ကောင်းကင်ကနေ အော်ပြောသလား။— မဟုတ်ဘူး၊ ယေရှုရဲ့ နောက်လိုက်တွေ ကမ္ဘာပေါ်မှာ ဘုရားသခင်အကြောင်း လိုက်ပြောပြတဲ့အခါ ကောင်းကင်တမန်တွေက လမ်းညွှန်ပေးနေတယ်။ ဘုရားသခင်အကြောင်း တကယ် သိချင်သူတွေ ကြားသိခွင့်ရအောင် ကောင်းကင်တမန်တွေ ဖန်တီးပေးကြတယ်။ ဒီဟောပြောခြင်း လုပ်ငန်းမှာ တို့တစ်တွေ ပါဝင်နိုင်တယ်။ ဒါဆိုရင် ကောင်းကင်တမန်တွေက ကူညီပေးကြမှာ။

ဒါပေမဲ့ ဘုရားသခင်ကို မချစ်တဲ့သူတွေက အနှောင့်အယှက် ပေးလာရင်ကော။ တို့ကို ထောင်ချလိုက်ရင်ကော။ ကောင်းကင်တမန်တွေ လာလွှတ်ပေးမှာလား။— လွှတ်ပေးနိုင်တာပေါ့။ ဒါပေမဲ့ အမြဲတမ်း အဲဒီလိုတော့ မလုပ်ပေးဘူး။

တစ်ခါက ယေရှုရဲ့ နောက်လိုက် ပေါလုဟာ အကျဉ်းသားဘဝ ရောက်နေတယ်။ လေပြင်းမုန်တိုင်း တိုက်ခတ်နေချိန်မှာ သူဟာ သင်္ဘောတစ်စင်းပေါ်လိုက်ပါလာတယ်။ ဒါပေမဲ့ ကောင်းကင်တမန်တွေက သူ လွတ်မြောက်အောင် ချက်ချင်း မလုပ်ပေးဘူး။ ဘုရားသခင်အကြောင်း ကြားသိဖို့လိုတဲ့ လူတွေ ရှိနေသေးလို့ပဲ။ ကောင်းကင်တမန်တစ်ပါးက “ပေါလု၊ မကြောက်ပါနဲ့။ ဆီဇာရှေ့မှောက်ကို မင်း ရောက်ရလိမ့်မယ်” လို့ပြောတယ်။ ဟုတ်တယ်၊ ပေါလုဟာ ကမ္ဘာ့အုပ်စိုးရှင် ဆီဇာရှေ့ကို ရောက်သွားမယ်။ ဒါမှလည်း ဆီဇာကို ဟောပြောနိုင်မှာပေါ့။ ကောင်းကင်တမန်တွေက ပေါလု ဘယ်ရောက်နေတယ်ဆိုတာ အမြဲ သိပြီး ကူညီပေးကြတယ်။ တို့တစ်တွေလည်း ဘုရားသခင်ကို ဝတ်ပြုသူ မှန်ရင် ကူညီပေးကြမှာပါ။—တမန်တော် ၂၇:၂၃-၂၅။

ကောင်းကင်တမန်တွေမှာ အရေးကြီးတဲ့ အလုပ်တစ်ခု ရှိသေးတယ်။ မကြာခင် အဲဒီအလုပ်ကို သူတို့ လုပ်တော့မယ်။ လူဆိုးတွေကို ဘုရား ဖျက်ဆီးမယ့်အချိန် သိပ်နီးနေပြီ။ စစ်မှန်တဲ့ ဘုရားသခင်ကို မကိုးကွယ်သူအားလုံး ဖျက်ဆီးခံရတော့မယ်။ ကောင်းကင်တမန်တွေကို မမြင်ရလို့ မယုံဘူးလို့ ပြောတဲ့သူတွေ အမှားကြီး မှားသွားမှန်း သိရတော့မယ်။—၂ သက်သာလောနိတ် ၁:၆-၈။

ဒါဟာ တို့အတွက် ဘယ်လို အဓိပ္ပာယ် ရှိမလဲ။— တို့တစ်တွေသာ ဘုရားရဲ့ ကောင်းကင်တမန်တွေဘက်မှာ ရှိမယ်ဆိုရင် သူတို့ ကူညီပေးကြမှာ။ တို့တစ်တွေ သူတို့ဘက်မှာ ရှိကြရဲ့လား။— ယေဟောဝါကို ဝတ်ပြုသူ မှန်ရင် သူတို့ဘက်မှာ ရှိတာပေါ့ ။ ယေဟောဝါကို ဝတ်ပြုသူဆိုရင် တခြားသူတွေကိုလည်း ယေဟောဝါကို ဝတ်ပြုဖို့ ပြောပြမှာပဲ။