အရာအားလုံးရဲ့ အစပြုရှင်ကို သိကျွမ်းလာခြင်း

ယေဟောဝါရဲ့ ကတိတော်တွေအကြောင်း ကြားရလို့ ကိုအောင်နိုင် ဝမ်းသာပေမဲ့ အဲဒီကတိတော်တွေ ပြည့်စုံလာအောင် လုပ်နိုင်တဲ့တန်ခိုး တစ်ယောက်ယောက်ဆီမှာ ဘယ်လို ရှိနိုင်မလဲဆိုတာ သိချင်နေတယ်။ ယေဟောဝါက ကတိပြုထားရာအားလုံးကို ဘယ်လို ပြည့်စုံစေနိုင်မလဲဆိုတာ သိဖို့ လူအများ ရင်းနှီးပြီးသား အခြေခံသဘောတရားဖြစ်တဲ့ အကြောင်းတရားနဲ့ အကျိုးတရားကို သုံးသပ်သင့်ကြောင်း ကိုစိုးမိုး ရှင်းပြတယ်။

ကိုစိုးမိုးက အဲ့ဒီအခြေခံသဘောတရားကို သမ္မာကျမ်းစာမှာလည်း ရှင်းပြထားကြောင်း ပြောပြီး ကျမ်းချက် ဖတ်ပြတယ်–

• “အိမ်ဆိုတာ တည်ဆောက်တဲ့သူရှိလို့ ဖြစ်လာတာ။”—ဟီဘရူး ၃:၄။

“ယုတ္တိရှိပုံတော့ ရပါတယ်၊ တည်ဆောက်တဲ့သူ မရှိဘဲ ဘယ်အိမ်မှ ဖြစ်မလာဘူးဆိုတာ သေချာတာပေါ့” လို့ ကိုအောင်နိုင် ပြန်ပြောတယ်။

“နောက်တစ်ခု စဉ်းစားကြည့်ပါဦး။ ချက်ပြုတ်ပြင်ဆင်ပေးတဲ့သူ မရှိဘဲ ဟင်းတစ်ခွက် ဘယ်လိုမှ ဖြစ်မလာနိုင်ဘူး” လို့ ကိုစိုးမိုး ထပ်ပြောတယ်။

ပတ်၀န်းကျင်မှာရှိတဲ့ အရာအားလုံးက အိမ်တစ်လုံးထက် ပိုထူးခြားရှုပ်ထွေးကြောင်း ကိုစိုးမိုး ပြောပြတယ်။ “နုနယ်တဲ့ ပန်းပွင့်လေးတွေ၊ ခန့်ညားထည်ဝါတဲ့ တောင်တန်းကြီးတွေ၊ ကြီးမားနက်ရှိုင်းတဲ့ ပင်လယ်သမုဒ္ဒရာ၊ အဆုံးမဲ့ စကြ၀ဠာကိုလည်း ကြည့်လိုက်ပါဦး။ အိမ်တစ်လုံးမှာ ပုံစံရေးဆွဲသူနဲ့ တည်ဆောက်သူ လိုအပ်သလို ဟင်းတစ်ခွက် ဖြစ်ဖို့လည်း ပြင်ဆင်ချက်ပြုတ်သူ လိုအပ်တယ်ဆိုရင် စကြ၀ဠာမှာရှိတဲ့ အံ့သြဖွယ်ကောင်းတဲ့အရာတွေကော။ ဒါတွေအတွက်လည်း ပုံစံရေးဆွဲသူနဲ့ ပြုလုပ်သူ မလိုအပ်ဘူးလား” လို့ပြောတယ်။

ကိုစိုးမိုး ပြောပြတာတွေက ယုတ္တိရှိမှန်း ကိုအောင်နိုင် သဘောတူတယ်။

“အမှန်တော့ အရာအားလုံးကို ဦးဆုံး ဒီဇိုင်းရေးဆွဲသူနဲ့ ပြုလုပ်သူ ရှိတယ်လို့ သမ္မာကျမ်းစာက ပြောတယ်။ အရာအားလုံးကို ပြုလုပ်ဖို့ဆိုရင် အစွမ်းတန်ခိုးကြီးရမှာပေါ့။ ဒါကြောင့် ကျမ်းစာက ကိုယ်တော့်ကို ဘုရားသခင်လို့ ခေါ်တာပေါ့။ သမ္မာကျမ်းစာရဲ့ မူရင်းဘာသာစကားမှာ အဲဒီစကားလုံးဟာ ‘တန်ခိုးကြီးသောပုဂ္ဂိုလ်၊’ ‘ခွန်အားကြီးသောပုဂ္ဂိုလ်’ ဆိုတဲ့အဓိပ္ပာယ် ရှိတယ်။ ဒီနေ့အချိန်မှာ ‘ဘုရား’ လို့ ခေါ်တဲ့ပုဂ္ဂိုလ် အများကြီး ရှိပေမဲ့ အရာအားလုံးကို ယေဟောဝါ ပြုလုပ်တဲ့အတွက် ကိုယ်တော့်ကို အနန္တတန်ခိုးရှင် ဘုရားသခင်လို့ မှန်ကန်စွာ ခေါ်ဆိုနိုင်တယ်” ဆိုပြီး ကိုစိုးမိုး ပြောပြတယ်။

ယေဟောဝါဘုရားရဲ့ အံ့ဖွယ်လုပ်ဆောင်မှုတွေ အကြောင်း သမ္မာကျမ်းစာမှာ ဖော်ပြထားတာကို တွေ့ရလို့ ကိုအောင်နိုင် အံ့သြခဲ့တယ်။ ကိုစိုးမိုးပြတဲ့ ကျမ်းချက်တချို့ကတော့–

• “အစအဦးမှာ ဘုရားသခင်က ကောင်းကင်နဲ့ မြေကြီးကို ဖန်ဆင်းတယ်။”—ကမ္ဘာဦး ၁:၁။

• “ယေဟောဝါဟာ ဘုရားသခင်ပဲဆိုတာ သိမှတ်ကြပါ။ ဘုရားဟာ ငါတို့ကို ဖန်ဆင်းတဲ့အရှင်ပဲ။ ငါတို့ကို ပိုင်တဲ့အရှင်ပဲ။”—ဆာလံ ၁၀၀:၃။

• “ကောင်းကင်က ဘုရားသခင်ရဲ့ ဂုဏ်ကျက်သရေကို ကြေညာ နေတယ်။ အထက်မိုးကောင်းကင်က ဘုရားရဲ့လက်ရာတွေအကြောင်း ပြောကြားနေတယ်။”—ဆာလံ ၁၉:၁။

• “ကောင်းကင်ပေါ်မှာ လှေကားတွေကို တည်ဆောက်တဲ့အရှင်၊ ကမ္ဘာမြေအထက်မှာ မျက်နှာကြက်ကို တည်ဆောက်တဲ့အရှင်၊ ပင်လယ်ရေကို ဆင့်ခေါ်ပြီး မြေပြင်ပေါ် သွန်းလောင်းပေးတဲ့အရှင်ရဲ့ နာမည်ဟာ ယေဟောဝါပဲ။”—အာမုတ် ၉:၆။

မှန်ပါတယ်၊ ယေဟောဝါက အရာခပ်သိမ်းကို ပြုလုပ်တဲ့အရှင် ဖြစ်တယ်။ ဒါပေမဲ့ အဲဒါတွေကို ဖြစ်ပေါ်စေရုံ၊ ပြုလုပ်ရုံထက်မက လုပ်ဆောင်ခဲ့တယ်။ သတ္တဝါအားလုံးကို အသက်ပေးခဲ့တယ်။ ယေဟောဝါနဲ့ပတ်သက်ပြီး ကျမ်းစာက “ကိုယ်တော်ဟာ အသက်ရဲ့ပင်ရင်းပါ” လို့ပြောတယ်။ (ဆာလံ ၃၆:၉) ဒါကြောင့် ကိုယ်တော်ဟာ အသက်ပေးရှင်တည်းဟူသော ဖန်ဆင်းရှင်ဖြစ်တယ်။ ယေဟောဝါဟာ အသက်ကို အစပြုရှင်မို့ အမှန်ပဲ ကျွန်တော်တို့ရဲ့ ဖခင် ဖြစ်တယ်။ ဒါကြောင့် သမ္မာကျမ်းစာက ဒီလိုပြောတယ်– “ကျွန်တော်တို့အားလုံးရဲ့ ဖခင်ဟာ တစ်ယောက်တည်းပဲ မဟုတ်လား။ ကျွန်တော်တို့ကို ဖန်ဆင်းတဲ့ ဘုရားသခင်က တစ်ပါးတည်းပဲ မဟုတ်လား။”—မာလခိ ၂:၁၀။

ကိုအောင်နိုင် သဘောပေါက်လာပြီး ဒီလိုပြောလိုက်တယ်– “ကျွန်တော်တို့ ပတ်ဝန်းကျင်မှာ ရှိတဲ့အရာတွေကို ကြည့်ပြီး စဉ်းစားလိုက်တဲ့အခါမှာ မူလအကြောင်းတရားဖြစ်တဲ့၊ ဒီဇိုင်းရေးဆွဲတဲ့ အသက်ပေးပိုင်ရှင်၊ ဖန်ဆင်းရှင် ရှိရမယ်ဆိုတာကို သဘောပေါက်ဖို့ မခက်ဘူးပဲ။”

“ယေဟောဝါမှာ အရာအားလုံးကို ဖန်ဆင်းနိုင်တဲ့ တန်ခိုးရှိတယ်ဆိုရင် ကျမ်းစာထဲမှာ ဖော်ပြထားတဲ့ ကတိတော်အားလုံးကို ပြည့်စုံစေနိုင်တဲ့ တန်ခိုးလည်းရှိမှာ သေချာတယ်” လို့ မစန္ဒာက စိတ်လှုပ်ရှားစွာ ၀င်ပြောတယ်။

ကိုအောင်နိုင်နဲ့ မစန္ဒာတို့အတွက် အဲဒီနေ့မှာ ကြားခဲ့တာတွေအားလုံးဟာ လုံး၀ ကျိုးကြောင်းညီညွတ်ပေမဲ့ ဒီလိုတန်ခိုးကြီးမားတဲ့ ဒီဇိုင်းရေးဆွဲသူဟာ ဘယ်လို ပုဂ္ဂိုလ်မျိုးလဲဆိုတာ သိချင်နေကြတယ်။