ပြဿနာအားလုံးရဲ့ အဆုံး

ယေဟောဝါအကြောင်း ကိုစိုးမိုး ပြောခဲ့သမျှကို ကိုအောင်နိုင် အလွန်စိတ်စွဲမှတ်သွားပေမဲ့ စိတ်ရှုပ်ထွေးနေတုန်းပဲ။ ကိုစိုးမိုးကို ဒီလိုမေးတယ်– “ယေဟောဝါဟာ အရာအားလုံးကို ဖန်ဆင်းတဲ့ တန်ခိုးရှင်၊ မေတ္တာရှိတဲ့ပုဂ္ဂိုလ် ဖြစ်တယ်ဆိုရင် ကမ္ဘာမှာ ဘာကြောင့် ဒီလောက် ဆင်းရဲဒုက္ခတွေ များနေရသလဲ။ ပြဿနာတွေ ဘာကြောင့် ဒီလောက်ကြုံတွေ့နေရသလဲ။”

ကိုစိုးမိုး ဒီလိုပြောတယ်– “သိပ်ကောင်းတဲ့မေးခွန်းပဲ။ လူတော်တော်များများလည်း အဲဒီအတွက်နဲ့ပဲ စိတ်ရှုပ်ထွေးနေကြတယ်။ ယေဟောဝါရဲ့ အရည်အသွေးတွေကို စဉ်းစားကြည့်တဲ့အခါ လက်ရှိ ကမ္ဘာ့အခြေအနေဆိုးတွေဟာ လူသားတွေအတွက် ကိုယ်တော်ဖြစ်စေချင်တဲ့အရာတော့ မဟုတ်နိုင်ဘူးဆိုတာ ထင်ရှားလာတယ်။ ဒါကြောင့် ဒီအရာတွေ ဖြစ်ပျက်နေရတဲ့ အကြောင်းရင်းကို နားလည်ဖို့ ကမ္ဘာမြေအတွက် ဘုရားသခင်ရဲ့ မူလရည်ရွယ်ချက်နဲ့ အဲဒီရည်ရွယ်ချက် ဘယ်လိုဖြစ်သွားခဲ့တယ်ဆိုတာကို နားလည်ဖို့ လိုတယ်။”

ဒီနောက် မြေကြီးဆိုင်ရာ ဖန်ဆင်းခြင်းကို ယေဟောဝါဘုရား လက်စသတ်တဲ့အခါ ဘယ်လိုခံစားခဲ့ရတယ်ဆိုတာ ကိုစိုးမိုး ရှင်းပြတယ်။ ကိုစိုးမိုး ဖတ်ပြတဲ့ကျမ်းချက်ကတော့–

• “ဘုရားသခင်က ဖန်ဆင်းထားရာအားလုံး သိပ်ကောင်းတယ်ဆိုတာကို မြင်တယ်။”—ကမ္ဘာဦး ၁:၃၁။

ကမ္ဘာပေါ် ယေဟောဝါ ဖန်ဆင်းထားရာတွေထဲမှာ အထူးခြားဆုံးက ပထမလူသားမောင်နှံပဲ။ သူတို့နာမည်က အာဒံနဲ့ ဧဝ။ ဘုရားသခင်က တခြားအရာအားလုံးလိုပဲ သူတို့ကိုလည်း စုံလင်စွာ ဖန်ဆင်းခဲ့တယ်။ ဒါကြောင့် သူတို့ဟာ ကမ္ဘာပေါ်မှာ ထာဝစဉ် အသက်ရှင်နိုင်တယ်။ ဘုရားသခင်က ဧဒင်ဥယျာဉ်လို့ခေါ်တဲ့ လှပတဲ့နေရာတစ်ခုမှာ သူတို့ကို နေရာချထားတယ်။ အဲဒီနေရာမှာ ပျော်ရွှင်စွာ နေထိုင်နိုင်ဖို့ လိုလေသေးမရှိ ထောက်ပံ့ပေးခဲ့တယ်။ လိုအပ်တယ်ဆိုတာ ဘာမှမရှိဘူး။ (ကမ္ဘာဦး ၂:၈၊ ၉) ဒါ့ပြင် ယေဟောဝါက သူတို့ကို ကလေးများစွာ မွေးဖို့၊ ကမ္ဘာကို ပြည့်စေပြီး အုပ်ထိန်းကြဖို့ ပြောခဲ့တယ်။ (ကမ္ဘာဦး ၁:၂၈) ဆိုလိုတာက နောက်ဆုံးမှာ ကမ္ဘာမြေတစ်ခုလုံးဟာ ပြည့်ဝစုံလင်တဲ့၊ ပျော်ရွှင်တဲ့ လူ့မိသားစုနဲ့ ပြည့်နေမယ့် ပရဒိသုကြီးတစ်ခု ဖြစ်လာမယ်။ တကယ့်ကောင်းတဲ့ အလားအလာပဲ။

ဘာမှားသွားခဲ့သလဲ။ ကိုစိုးမိုးက သမ္မာကျမ်းစာကနေ ရိုးရှင်းတဲ့ ရှင်းပြချက်တစ်ခု ဖတ်ပြတယ်–

• “အပြစ်ဟာ လူတစ်ယောက်ကြောင့် လူ့လောကထဲ ရောက်လာတယ်။ အပြစ်ကြောင့် သေခြင်းလည်း ပေါ်ပေါက်လာတယ်။ ဒါကြောင့် လူအားလုံးဟာ အပြစ်ရှိသူတွေ ဖြစ်သွားတဲ့အတွက် သေဆုံးကြရတယ်။”—ရောမ ၅:၁၂။

မေတ္တာရှင်ဖခင်အနေနဲ့ ယေဟောဝါဘုရားက အာဒံနဲ့ ဧဝကို စည်းမျဉ်း၊ စံနှုန်းတချို့ ပေးခဲ့တယ်။ ဒါတွေကို လိုက်နာမယ်ဆိုရင် ပရဒိသုမှာ သူတို့ ဆက်အသက်ရှင်နိုင်ရုံမက အဲဒီဥယျာဉ်ကို စောင့်ရှောက်နိုင်ကြမယ်။ (ကမ္ဘာဦး ၂:၁၅-၁၇) ပညာရှိဖခင် ယေဟောဝါက ပြောခဲ့ရာတွေကို အတင်းမလိုက်လျှောက်ခိုင်းဘဲ နာခံမှုရှိတဲ့ သားသမီးတွေ ဖြစ်ဖို့ ကိုယ်တိုင်ရွေးချယ်ခွင့် ပြုတယ်။ ယေဟောဝါကို ဘယ်လောက်ချစ်ကြောင်း ဖော်ပြခွင့် ပေးလိုက်တယ်။ ကျွန်တော်တို့မှာ လွတ်လပ်စွာ ရွေးချယ်ပိုင်ခွင့် ရှိသလို အာဒံနဲ့ ဧဝတို့မှာလည်း ရှိကြတယ်။ သူတို့ ဘာလုပ်ခဲ့ကြသလဲ။

ဝမ်းနည်းစရာက အာဒံနဲ့ ဧဝဟာ ဖန်ဆင်းရှင်ရဲ့ လမ်းညွှန်မှုကို မလိုက်နာဘဲ ကိုယ့်နည်းကိုယ့်ဟန်နဲ့ လျှောက်လှမ်းဖို့ ရွေးချယ်ခဲ့ကြတယ်။ အဲဒီလိုရွေးချယ်ခဲ့လို့ အပြစ်ဖြစ်သွားတယ်။ အပြစ်ရှိတဲ့အတွက် မစုံလင်တော့ဘူး။ မစုံလင်တော့တဲ့အတွက် မကြာမီမှာ အိုမင်းစပြုလာပြီး သေဆုံးသွားကြတယ်။ ဒီလိုဖြစ်လာခဲ့တာဟာ ယေဟောဝါဘုရားက မိမိစံနှုန်းတွေအတိုင်း မလိုက်လျှောက်ဘူးဆိုရင် ဖြစ်လာမယ်လို့ ပြောထားတဲ့ ရလဒ်ပဲ။—ကမ္ဘာဦး ၂:၁၇။

ကျွန်တော်တို့အားလုံးဟာ အာဒံနဲ့ ဧဝရဲ့ သားမြေးတွေမို့ မစုံလင်မှုကို အမွေခံခဲ့ရတယ်။ ဒါကြောင့်လည်း အိုမင်းလာပြီး သေဆုံးကြရတယ်။ ဒါပေမဲ့ လူသားတွေအတွက် ယေဟောဝါရဲ့ ရည်ရွယ်ချက် မပြောင်းသွားဘူးဆိုတာကို ကိုစိုးမိုး စိတ်ချစေခဲ့တယ်။ မေတ္တာရှင်ဖခင် ယေဟောဝါက လူသားတွေကို ပရဒိသုအခြေအနေရှိတဲ့ ကမ္ဘာပေါ်မှာ အသက်ရှင်စေလိုဆဲပဲ။ ကိုစိုးမိုး ကျမ်းချက် ဖတ်ပြတယ်–

• “ယေဟောဝါဟာ မိုးကောင်းကင်ကို ဖန်ဆင်းတဲ့အရှင်၊ စစ်မှန်တဲ့ ဘုရားသခင်၊ ကမ္ဘာမြေကို ပုံသွင်းတဲ့အရှင်၊ ကမ္ဘာမြေကို အခိုင်အမာတည်တဲ့အရှင်ပဲ။ ကမ္ဘာမြေကို အကြောင်းမဲ့ ဖန်ဆင်းတာ မဟုတ်ဘဲ သတ္တဝါတွေ နေထိုင်ဖို့ ဖန်ဆင်းခဲ့တဲ့အရှင်ပဲ။”—ဟေရှာယ ၄၅:၁၈။

ကိုစိုးမိုးက ကိုအောင်နိုင်နဲ့ မစန္ဒာတို့ကို ကျမ်းစာမှာပါတဲ့ နှစ်သက်အားရဖွယ်ကောင်းတဲ့ ကတိတော်အားလုံးကို ပြန်အမှတ်ရစေတယ်။ ဖျားနာတာ၊ နာကျင်တာ၊ ဆင်းရဲဒုက္ခခံစားရတာတွေ ရှိတော့မှာ မဟုတ်ဘူး။ လူတိုင်းအတွက် အစာရေစာ ပေါများကြွယ်ဝမယ်။ အိမ်ကောင်းရာကောင်း ပိုင်ဆိုင်ကြမယ်။ သေခြင်းလည်း ရှိတော့မှာ မဟုတ်ဘူး။ ဒီကောင်းချီးအားလုံးဟာ မြေကြီးပရဒိသုပေါ်မှာ ထာဝစဉ် အသက်ရှင်ခြင်းဆိုတဲ့ လူသားတို့အတွက် ဘုရားသခင်ရဲ့ မပြောင်းလဲနိုင်တဲ့ မူလရည်ရွယ်ချက်ရဲ့ တစ်စိတ်တစ်ပိုင်း ဖြစ်တယ်။ ကိုစိုးမိုး ဒီကတိတော်ကို ဖတ်ပြတယ်–

• “ဖြောင့်မတ်သူတွေဟာ ကမ္ဘာမြေကို ပိုင်ဆိုင်ပြီး ထာဝစဉ် နေထိုင်ရလိမ့်မယ်။”—ဆာလံ ၃၇:၂၉။

ဒါဟာ ယေဟောဝါဘုရားသခင့် ကတိတော် ဖြစ်ပြီး အမှန်တကယ် ပြည့်စုံလာမယ်။