သတ္တိရှိတဲ့ ပေါလုရဲ့တူ

တမန်တော်ပေါလုရဲ့အသက်ကို ကယ်ခဲ့တဲ့ လူငယ်လေးတစ်ယောက်ရှိတယ်။ အဲဒီလူငယ်လေးက ပေါလုရဲ့တူပဲ။ သူ့နာမည်ကိုတော့ တို့တွေ မသိဘူး။ ဒါပေမဲ့ သူက အရမ်းသတ္တိရှိတဲ့ အလုပ်တစ်ခု လုပ်ခဲ့တယ်။ အဲဒီအကြောင်း သားတို့သမီးတို့ သိချင်ကြလား။—

ပေါလုက ယေရှုအကြောင်း ဟောပြောလို့ အဖမ်းခံရပြီး ဂျေရုဆလင်မြို့မှာ ထောင်ကျနေတယ်။ ပေါလုကို မုန်းတဲ့သူတွေလည်း ရှိတယ်။ အဲဒီလူတွေက ‘ပေါလုကို တရားရုံးခေါ်ခဲ့ဖို့ စစ်သူကြီးကို သွားပြောကြရအောင်။ ပြီးရင် ငါတို့ လမ်းမှာ စောင့်ပြီး ပေါလုကို သတ်ပစ်မယ်’ လို့ မကောင်းကြံကြတယ်။

အဲဒီအကြောင်းကို ပေါလုရဲ့တူ သိသွားတယ်။ ဒါနဲ့ သူဘာလုပ်သလဲ သိလား။ ထောင်ထဲမှာရှိတဲ့ ပေါလုကို သွားပြောပြတယ်။ အဲဒီအခါ ပေါလုက စစ်သူကြီးဆီ ချက်ချင်းသွားပြောခိုင်းတယ်။ စစ်သူကြီးကို သွားပြောပြဖို့ ပေါလုရဲ့တူအတွက် လွယ်မယ်လို့ထင်လား။— မလွယ်ဘူး။ စစ်သူကြီးဆိုတာ တခြားစစ်သားတွေကို အမိန့်ပေးရတဲ့ အကြီးဆုံးသူလေ။ ဒါပေမဲ့ ပေါလုရဲ့တူက သတ္တိရှိရှိနဲ့ စစ်သူကြီးကို အကြောင်းစုံ ပြောပြလိုက်တယ်။

ဒါနဲ့ စစ်သူကြီးက ဘာလုပ်ရမလဲဆိုတာ သိသွားတာပေါ့။ သူက ပေါလုကို ကာကွယ်ပေးဖို့ စစ်သား ၅၀၀ လောက်ကိုခေါ်လိုက်တယ်။ ပြီးတော့ ပေါလုကို ကဲသရိမြို့ဆီ ညတွင်းချင်း ခေါ်သွားဖို့ အမိန့်ပေးလိုက်တယ်။ လမ်းမှာ ပေါလု အသတ်ခံရသလား။— အသတ်မခံရဘူး။ မကောင်းကြံတဲ့လူတွေက ပေါလုကို ဘာမှမလုပ်နိုင်တော့ဘူး။ ဒီလိုနဲ့ သူတို့ရဲ့ အကြံအစည် ပျက်သွားပါလေရော။

ဒီဇာတ်လမ်းကနေ သားတို့သမီးတို့ ဘာသင်ယူနိုင်သလဲ။— မင်းတို့လည်း ပေါလုရဲ့တူလို သတ္တိရှိရမယ်။ အထူးသဖြင့် ယေဟောဝါဘုရားအကြောင်း တခြားသူတွေကို ပြောတဲ့အခါ သတ္တိရှိဖို့လိုတယ်။ တခြားသူတွေကို ယေဟောဝါဘုရားအကြောင်း သတ္တိရှိရှိနဲ့ ပြောပြရဲမလား။— ပြောပြရဲတယ်ဆိုရင် တခြားသူတွေရဲ့အသက်ကို ကယ်တာနဲ့တူတယ်။