ဘုရားသခင့်အစိုးရ တစ်ခုတည်းကိုသာ သစ္စာရှိရှိထောက်ခံခြင်း

၁၊ ၂။ (က) ဘယ်မူက ခရစ်တော်ရဲ့နောက်လိုက်တွေကို ဒီနေ့အချိန်ထိ လမ်းညွှန်ပေးနေသလဲ။ (ခ) ရန်သူတွေက ကျွန်တော်တို့ကို အနိုင်ရဖို့ ဘယ်လို ကြိုးစားကြသလဲ။ ဘာရလဒ်ရခဲ့သလဲ။

ယေရှုက ဂျူးလူမျိုးရဲ့ အာဏာအရှိဆုံးတရားသူကြီး ပိလတ်ရှေ့ရပ်နေချိန်မှာ သူ့နောက်လိုက်စစ်တွေကို ဒီနေ့အချိန်ထိ လမ်းညွှန်ပေးတဲ့မူတစ်ခုကို ပြောခဲ့တယ်။ “ငါ၏နိုင်ငံသည် ဤလောကနှင့်မသက်ဆိုင်။ သက်ဆိုင်လျှင် ငါသည် ဂျူးလူမျိုးလက်သို့ မရောက်ရန် ငါ၏လူတို့ တိုက်လှန်ကြပေမည်။ ယခုမူကား ငါ၏နိုင်ငံသည် ဤလောကမှမဟုတ်” ဆိုပြီး ယေရှုပြောတယ်။ (ယော. ၁၈:၃၆) ပိလတ်က ယေရှုကို ကွပ်မျက်ခဲ့ပေမဲ့ ဒီအောင်ပွဲဟာ ခဏပါပဲ။ ယေရှု ရှင်ပြန်ထမြောက်လာတယ်။ အင်အားကြီးရောမအင်ပါယာရဲ့ ဧကရာဇ်တွေက ခရစ်တော်ရဲ့နောက်လိုက်တွေကို ချေမှုန်းပစ်ဖို့ ကြိုးစားပေမဲ့ အချည်းနှီးပါပဲ။ အဲဒီခေတ်အခါမှာ ခရစ်ယာန်တွေက နိုင်ငံတော်သတင်းကို ကမ္ဘာအရပ်ရပ် ပျံ့နှံ့စေခဲ့တယ်။—ကော. ၁:၂၃။

^၂ ၁၉၁၄ ခုနှစ်မှာ နိုင်ငံတော်တည်ထောင်ပြီးနောက် သမိုင်းမှာ စစ်အင်အားအကြီးဆုံး အစိုးရတချို့က ဘုရားသခင့်လူမျိုးကို အပြတ်ရှင်းပစ်ဖို့ ကြိုးစားခဲ့ကြတယ်။ ဒါပေမဲ့ ဘယ်အစိုးရမှ မအောင်မြင်ခဲ့ဘူး။ အစိုးရတွေနဲ့ နိုင်ငံရေးအဖွဲ့တွေက သူတို့ရဲ့ပဋိပက္ခတွေမှာပါဝင်ဖို့ ကျွန်တော်တို့ကို ဖိအားပေးကြတယ်။ ကျွန်တော်တို့ကိုသွေးခွဲဖို့ ကြိုးစားကြတယ်။ ဒါပေမဲ့ မအောင်မြင်ပါဘူး။ အခုဆိုရင် နိုင်ငံတိုင်းနီးပါးမှာ ဘုရားသခင့်နိုင်ငံတော်လက်အောက်ခံတွေ ရှိနေပြီ။ ဒါတောင်မှ ကျွန်တော်တို့ဟာ စစ်မှန်တဲ့ ကမ္ဘာချီညီအစ်ကိုအသင်းအပင်းတစ်ခုအဖြစ် စည်းလုံးနေပြီး နိုင်ငံရေးကိစ္စတွေမှာ လုံးဝမပါဝင်ဘဲ ကြားနေကြတယ်။ ကျွန်တော်တို့ရဲ့စည်းလုံးမှုက ဘုရားသခင့်နိုင်ငံတော် စိုးစံနေပြီဖြစ်ကြောင်း၊ ဘုရင်ယေရှုခရစ်က သူ့လက်အောက်ခံတွေကို ဆက်ပြီးလမ်းညွှန်၊ သန့်စင်၊ ကာကွယ်ပေးနေကြောင်း ခိုင်လုံတဲ့အထောက်အထားပါပဲ။ ခရစ်တော် ဘယ်လိုလုပ်ဆောင်ခဲ့တယ်ဆိုတာ သုံးသပ်ကြည့်ရအောင်။ ‘လောကနဲ့မသက်ဆိုင်ဘဲ’ သီးခြားနေဖို့ ကြိုးစားနေတာနဲ့အမျှ ခရစ်တော်ပေးအပ်တဲ့၊ ယုံကြည်ခြင်းခိုင်ခံ့စေတဲ့ တရားဥပဒေအောင်ပွဲတချို့အကြောင်းကိုလည်း လေ့လာကြည့်ရအောင်။—ယော. ၁၇:၁၄။

အရေးတကြီးဖြေရှင်းရမယ့်ကိစ္စ

၃၊ ၄။ (က) နိုင်ငံတော်ဖွားမြင်ချိန်မှာ ဘာတွေဖြစ်ပျက်ခဲ့သလဲ။ (ခ) ကြားနေခြင်းကိစ္စနဲ့ပတ်သက်ပြီး ဘုရားသခင့်လူမျိုးတွေ အပြည့်အဝနားလည်ခဲ့သလား။ ရှင်းပြပါ။

^၃ နိုင်ငံတော်ဖွားမြင်ပြီးနောက် ကောင်းကင်မှာ စစ်ဖြစ်တယ်။ စာတန်ကို မြေကြီးပေါ် ပစ်ချလိုက်တယ်။ (ဗျာဒိတ် ၁၂:၇–၁၀၊ ၁၂ ကိုဖတ်ပါ။) မြေကြီးမှာလည်း စစ်ဖြစ်တယ်။ ဒီစစ်ပွဲက ဘုရားသခင့်လူမျိုးရဲ့ စိတ်ပိုင်းဖြတ်ချက်ကို စမ်းသပ်ခဲ့တယ်။ သူတို့က ယေရှုရဲ့ပုံသက်သေကို လိုက်လျှောက်ပြီး လောကနဲ့သီးခြားနေဖို့ စိတ်ပိုင်းဖြတ်ထားကြတယ်။ ဒါပေမဲ့ အစပိုင်းမှာတော့ နိုင်ငံရေးကိစ္စအားလုံးမှာ ဘယ်လောက်ထိ ကင်းကင်းရှင်းရှင်းနေရမယ်ဆိုတာ အပြည့်အဝ နားမလည်ခဲ့ကြဘူး။

^၄ ဥပမာ၊ ၁၉၀၄ ခုနှစ်ထုတ် အနှစ်တစ်ထောင်အရုဏ်ဦး စာအုပ်၊ အတွဲ ၆a က စစ်ပွဲမှာမပါဝင်ဖို့ ခရစ်ယာန်တွေကို တိုက်တွန်းခဲ့တယ်။ တကယ်လို့ ခရစ်ယာန်တစ်ယောက်ဟာ မဖြစ်မနေ စစ်မှုထမ်းရမယ်ဆိုရင်တောင် တိုက်ခိုက်ရေးနဲ့မပတ်သက်တဲ့ တာဝန်တစ်မျိုးမျိုးကို ထမ်းဆောင်ခွင့်ရဖို့ ကြိုးစားတောင်းဆိုသင့်တယ်၊ အဲဒီလိုကြိုးစားတာ မအောင်မြင်ဘဲ ရှေ့တန်းပို့ခံရရင် လူသတ်မှုမကျူးလွန်မိအောင် ဂရုစိုက်ရမယ်လို့ ဖော်ပြခဲ့တယ်။ အဲဒီတုန်းကအခြေအနေနဲ့ပတ်သက်ပြီး ဗြိတိန်နိုင်ငံမှာနေထိုင်တဲ့၊ ၁၉၀၅ ခုနှစ်မှာ နှစ်ခြင်းခံခဲ့တဲ့ ဟာဘတ် စီညာ အခုလိုပြောပြတယ်– “တိုက်ခိုက်ရေးနဲ့မပတ်သက်တဲ့ တာဝန်ကိုပဲထမ်းဆောင်ဖို့ စစ်သားအဖြစ် တပ်မတော်ထဲ ဝင်သင့်၊ မဝင်သင့်ဆိုတာကို ညီအစ်ကိုတွေ တော်တော်အငြင်းပွားခဲ့ကြတယ်။ ရှင်းလင်းတဲ့ညွှန်ကြားချက်လည်း မရှိဘူး။”

၅။ ၁၉၁၅၊ စက်တင်ဘာလ ၁ ရက်ထုတ် ကင်းမျှော်စင်မှာ ကျွန်တော်တို့ရဲ့ နားလည်မှုကို ဘယ်လိုစတင်သန့်စင်ပေးခဲ့သလဲ။

^၅ ၁၉၁၅၊ စက်တင်ဘာလ ၁ ရက်ထုတ် ကင်းမျှော်စင်မှာ အဲဒီကိစ္စနဲ့ပတ်သက်တဲ့ နားလည်မှုကို စတင်သန့်စင်ပေးခဲ့တယ်။ ကျမ်းစာစောင်များမှ လေ့လာစရာများ စာအုပ်မှာပါတဲ့ ဖော်ပြချက်နဲ့ပတ်သက်ပြီး ကင်းမျှော်စင်က “တိုက်ခိုက်ရေးနဲ့မပတ်သက်တဲ့ တာဝန်တစ်မျိုးမျိုးကို ထမ်းဆောင်ဖို့ တပ်မတော်ထဲဝင်တာက ခရစ်ယာန်မူတွေကို ချိုးဖောက်ရာရောက်သလားဆိုတာ စဉ်းစားစရာပဲ” လို့ပြောတယ်။ စစ်ဝတ်စုံမဝတ်ရင်၊ စစ်မှုမထမ်းရင် ပစ်သတ်ခံရမယ်လို့ ခရစ်ယာန်တစ်ယောက်ကို ခြိမ်းခြောက်လာရင်ကော။ ဆောင်းပါးက အခုလိုရှင်းပြတယ်– “ငြိမ်းချမ်းရေးမင်းသားကို သစ္စာစောင့်သိပြီး သူ့အမိန့်ကိုနာခံလို့ ပစ်သတ်ခံရတာ ကောင်းသလား။ ကောင်းကင်ဘုရင်ရဲ့ သွန်သင်ချက်တွေကို နည်းနည်းဖြစ်ဖြစ် အလျှော့ပေးလိုက်လျောပြီး မြေကြီးဘုရင်တွေကို ထောက်ခံရင်း၊ သူတို့အတွက်အမှုထမ်းရင်း ပစ်သတ်ခံရတာ ကောင်းသလား။ ဒီသေခြင်းနှစ်မျိုးထဲမှာ ကောင်းကင်ဘုရင်ကို သစ္စာစောင့်သိပြီး သေရတာကို ပိုနှစ်သက်ကြပါလိမ့်မယ်။” အဲဒီလိုအခိုင်အမာပြောပေမဲ့ “အဲဒီအတိုင်းလုပ်ရမယ်လို့ မတိုက်တွန်းပါဘူး။ အကြံပေးရုံသက်သက်ပါပဲ” ဆိုပြီး နိဂုံးချုပ်ထားတယ်။

၆။ ညီအစ်ကိုဟာဘတ် စီညာရဲ့ တွေ့ကြုံမှုကနေ ဘာသင်ယူနိုင်သလဲ။

^၆ ညီအစ်ကိုတချို့က ဒီကိစ္စကို ကောင်းကောင်းသဘောပေါက်တဲ့အတွက် အကျိုးဆက်တွေကို ရင်ဆိုင်ဖို့အသင့်ရှိကြတယ်။ ရှေ့မှာဖော်ပြခဲ့တဲ့ ဟာဘတ် စီညာ အခုလိုပြောတယ်– “ကျွန်တော့်အတွက်ကတော့ ကျည်ဆံတွေကို သင်္ဘောပေါ်ကနေချတာ [တိုက်ခိုက်ရေးနဲ့မပတ်သက်တဲ့တာဝန်] ဟာ ကျည်ဆံကို သေနတ်ထဲထည့်ပစ်တာနဲ့ အတူတူပါပဲ။” (လု. ၁၆:၁၀) ညီအစ်ကိုစီညာဟာ ခံယူချက်အရ စစ်မှုထမ်းဖို့ငြင်းဆိုတဲ့အတွက် ထောင်ချခံရတယ်။ ခံယူချက်အရ စစ်မှုထမ်းဖို့ငြင်းဆိုသူ ၁၆ ယောက်ထဲမှာ သူနဲ့တခြားညီအစ်ကို ၄ ယောက်အပြင် တခြားဘာသာရေးအဖွဲ့တွေထဲက လူတချို့လည်းပါတယ်။ သူတို့ဟာ ဗြိတိန်နိုင်ငံ၊ ရစ်ချ်မွန်အကျဉ်းထောင်မှာ အချိန်အတော်ကြာ နေခဲ့ရတယ်။ တစ်ကြိမ်မှာတော့ ဟာဘတ်နဲ့ သူ့အဖွဲ့ထဲကတခြားသူတွေကို ပြင်သစ်ရှေ့တန်းစစ်မြေပြင်ကို တိတ်တဆိတ်ပို့လိုက်တယ်။ အဲဒီမှာ သူတို့ကိုပစ်သတ်ဖို့ အမိန့်ချလိုက်တဲ့အတွက် သူနဲ့တခြားသူတွေက ကွပ်မျက်ရေးသေနတ်တပ်ဖွဲ့ရှေ့မှာ တန်းစီရပ်နေခဲ့ကြတယ်။ ဒါပေမဲ့ အသတ်မခံခဲ့ရဘူး။ အဲဒီအစား သူတို့ရဲ့ပြစ်ဒဏ်ကို လျှော့ပေါ့ပြီး ထောင်ဒဏ်ဆယ်နှစ် ချမှတ်လိုက်တယ်။

၇။ ဒုတိယကမ္ဘာစစ် ဖြစ်ပွားချိန်မှာ ဘုရားသခင့်လူမျိုးတွေ ဘာကိုနားလည်လာသလဲ။

^၇ ဒုတိယကမ္ဘာစစ်ဖြစ်ပွားချိန်မှာ ယေဟောဝါရဲ့လူမျိုးက ကြားနေခြင်းရဲ့အဓိပ္ပာယ်နဲ့ ယေရှုရဲ့ပုံသက်သေကိုလိုက်လျှောက်ဖို့ ဘာတွေလုပ်ရမယ်ဆိုတာ ပိုနားလည်လာတယ်။ (မ. ၂၆:၅၁-၅၃; ယော. ၁၇:၁၄-၁၆; ၁ ပေ. ၂:၂၁) ဥပမာ၊ ၁၉၃၉၊ နိုဝင်ဘာလ ၁ ရက်ထုတ် ကင်းမျှော်စင်မှာ “ကြားနေခြင်း” ဆိုတဲ့ အရေးကြီးတဲ့ဆောင်းပါးပါလာပြီး အခုလိုဖော်ပြထားတယ်– “အခု ယေဟောဝါနဲ့ပဋိညာဉ်ဖွဲ့ထားတဲ့လူမျိုးကို လမ်းညွှန်ပေးတဲ့စည်းမျဉ်းကတော့ နိုင်ငံတွေကြား ဖြစ်ပွားနေတဲ့စစ်ပွဲမှာ ပြတ်ပြတ်သားသား ကြားနေခြင်းဖြစ်တယ်။” ဒီဆောင်းပါးနဲ့ပတ်သက်ပြီး နယူးယောက်၊ ဘရွတ်ကလင်ဌာနချုပ်မှာ နောက်ပိုင်းအမှုဆောင်ခဲ့တဲ့ ဆိုင်မွန် ကရေကာ ဒီလိုပြောတယ်– “ဘုရားသခင့်လူမျိုးက စစ်ရဲ့ခြိမ်းခြောက်မှုကြားမှာတောင် လူတိုင်းနဲ့သင့်သင့်မြတ်မြတ် နေထိုင်ရမယ်ဆိုတာ ကျွန်တော်သိလာတယ်။” အချိန်တန်ပြင်ဆင်ပေးတဲ့ ဒီပုံဆောင်အစာက နိုင်ငံတော်အပေါ်သစ္စာစောင့်သိမှု အပြင်းအထန်တိုက်ခိုက်ခံရချိန်အတွက် ဘုရားသခင့်လူမျိုးကို အသင့်ပြင်ပေးခဲ့တယ်။

ဆန့်ကျင်တိုက်ခိုက်မှု “မြစ်ရေ” ကိုမှုတ်ထုတ်

၈၊ ၉။ တမန်တော်ယောဟန်ရဲ့ ပရောဖက်ပြုချက် ဘယ်လိုပြည့်စုံလာသလဲ။

^၈ ၁၉၁၄ ခုနှစ်မှာ နိုင်ငံတော်ဖွားမြင်ပြီးနောက် နဂါးကြီး စာတန်မာရ်နတ်ဟာ ခံတွင်းထဲကနေ ပုံဆောင်မြစ်ရေ မှုတ်ထုတ်ပြီး ဘုရားသခင့်နိုင်ငံတော်ထောက်ခံသူတွေကို ရှင်းပစ်ဖို့ကြိုးစားလိမ့်မယ်လို့ တမန်တော်ယောဟန် ပရောဖက်ပြုခဲ့တယ်။b (ဗျာဒိတ် ၁၂:၉၊ ၁၅ ကိုဖတ်ပါ။) ယောဟန်ရဲ့ပရောဖက်ပြုချက် ဘယ်လိုပြည့်စုံလာသလဲ။ ၁၉၂၀ ပြည့်လွန်နှစ်တွေကစပြီး ဘုရားသခင့်လူမျိုးအပေါ် ဆန့်ကျင်မှုလှိုင်းလုံးတွေ တလိမ့်လိမ့်တက်လာတယ်။ ဒုတိယကမ္ဘာစစ်အတွင်း မြောက်အမေရိကမှာရှိတဲ့ ညီအစ်ကိုများစွာလိုပဲ ညီအစ်ကိုကရေကာလည်း ဘုရားသခင့်နိုင်ငံတော်အပေါ် သစ္စာစောင့်သိတဲ့အတွက် ထောင်ချခံရတယ်။ တကယ်တော့ စစ်အတွင်း ဘာသာရေးယုံကြည်ချက်အရ စစ်မှုမထမ်းတဲ့အတွက် အမေရိကန်ပြည်ထောင်စု ဗဟိုအကျဉ်းထောင်တွေမှာ ထောင်ချခံရတဲ့အကျဉ်းသား သုံးပုံနှစ်ပုံကျော်ဟာ ယေဟောဝါသက်သေတွေဖြစ်တယ်။

^၉ မာရ်နတ်နဲ့သူ့နောက်လိုက်တွေဟာ နိုင်ငံတော်လက်အောက်ခံတွေ ဘယ်မှာပဲနေထိုင်ပါစေ သူတို့ရဲ့သမာဓိကို ချိုးဖျက်ဖို့ မပြတ်ကြိုးစားခဲ့တယ်။ အာဖရိက၊ ဥရောပနဲ့ အမေရိကန်ပြည်ထောင်စုတစ်ဝန်းမှာ သူတို့ဟာ တရားရုံးတွေရှေ့၊ ခံဝန်ချုပ်နဲ့လွှတ်ပေးသင့်မသင့် ဆုံးဖြတ်တဲ့အဖွဲ့တွေရှေ့ ရောက်ခဲ့တယ်။ ကြားနေဖို့အခိုင်အမာဆုံးဖြတ်ထားတဲ့အတွက် ထောင်ချခံရ၊ ရိုက်နှက်ခံရပြီး တချို့ဆိုရင် ဒုက္ခိတဖြစ်သွားကြတယ်။ ဂျာမနီနိုင်ငံမှာ ဘုရားသခင့်လူမျိုးဟာ ဟစ်တလာကို အလေးမပြုလို့၊ စစ်ထဲမဝင်လို့ အကြီးအကျယ်နှိပ်စက်ခံရတယ်။ နာဇီအုပ်ချုပ်ချိန်အတွင်း အကျဉ်းထောင်တွေမှာ သက်သေခံ ၆,၀၀၀ နီးပါး ထိန်းသိမ်းခံရပြီး ဂျာမန်လူမျိုးသက်သေခံနဲ့ တခြားသက်သေခံ ၁,၆၀၀ ကျော်ဟာ နှိပ်စက်ညှဉ်းပန်းသူတွေရဲ့လက်ချက်နဲ့ သေဆုံးခဲ့ရတယ်။ ဒါပေမဲ့ မာရ်နတ်ဟာ ဘုရားသခင့်လူမျိုးကို နာလန်မထူနိုင်တဲ့အထိ အန္တရာယ်မပြုနိုင်ခဲ့ပါဘူး။—မာ. ၈:၃၄၊ ၃၅။

“မြေကြီး” က “မြစ်ရေ” ကိုမျိုချ

၁၀။ “မြေကြီး” က ဘာကိုတင်စား သလဲ။ မြေကြီးက ဘုရားသခင့်လူမျိုးရဲ့အကျိုးအတွက် ဘယ်လိုကြားဝင် လုပ်ဆောင်ပေးသလဲ။

^၁၀ တမန်တော်ယောဟန်ရဲ့ပရောဖက်ပြုချက်အရ “မြေကြီး၊” တစ်နည်းအားဖြင့် ပိုပြီးအကျိုးသင့်အကြောင်းသင့်ရှိတဲ့ လောကအာဏာရှင်တွေဟာ “မြစ်ရေ” နဲ့တူတဲ့ နှိပ်စက်ညှဉ်းပန်းမှုကို မျိုချပြီး ဘုရားသခင့်လူမျိုးကို ကူညီပေးမှာဖြစ်တယ်။ ပရောဖက်ပြုချက်ရဲ့ အဲဒီအပိုင်း ဘယ်လိုပြည့်စုံလာသလဲ။ ဒုတိယကမ္ဘာစစ်ပြီးနောက် ဆယ်စုနှစ်တွေမှာ “မြေကြီး” က မေရှိယနိုင်ငံတော်ကို သစ္စာရှိရှိထောက်ခံသူတွေရဲ့အကျိုးအတွက် မကြာခဏ ကြားဝင်လုပ်ဆောင်ပေးခဲ့တယ်။ (ဗျာဒိတ် ၁၂:၁၆ ကိုဖတ်ပါ။) ဥပမာ၊ စစ်မှုထမ်းဖို့ငြင်းဆိုတာ၊ အမျိုးသားရေးအခမ်းအနားတွေမှာ မပါဝင်တာနဲ့ပတ်သက်ပြီး ယေဟောဝါသက်သေတွေရဲ့အခွင့်အရေးကို ဩဇာအာဏာကြီးတဲ့တရားရုံးတွေက ကာကွယ်ပေးတယ်။ ဦးဆုံး၊ စစ်မှုထမ်းခြင်းကိစ္စနဲ့ပတ်သက်ပြီး လူမျိုးတော်ကို ယေဟောဝါပေးအပ်ခဲ့တဲ့ အရေးပါတဲ့အောင်ပွဲတချို့အကြောင်း လေ့လာကြည့်ရအောင်။—ဆာ. ၆၈:၂၀။

၁၁၊ ၁၂။ ညီအစ်ကိုစီကာရယ်လာနဲ့ ညီအစ်ကိုသီမီနော့စ်တို့ ဘယ်ကိစ္စတွေ ရင်ဆိုင်ခဲ့ရသလဲ။ ဘာရလဒ်ရခဲ့သလဲ။

^၁၁ အမေရိကန်ပြည်ထောင်စု။ အန်တိုနီ စီကာရယ်လာဟာ သက်သေခံမိသားစုကနေ မွေးဖွားလာတဲ့ သားသမီးခြောက်ယောက်ထဲက တစ်ယောက်ဖြစ်တယ်။ သူက အသက် ၁၅ နှစ်မှာ နှစ်ခြင်းခံပြီး အသက် ၂၁ နှစ်မှာတော့ ဥပဒေအရ စစ်မှုထမ်းဖို့ဆင့်ခေါ်တဲ့အဖွဲ့မှာ သာသနာ့ဝန်ထမ်းအဖြစ် မှတ်ပုံတင်တယ်။ နှစ်နှစ်အကြာ ၁၉၅၀ မှာ မှတ်ပုံတင်ထားတာကိုပြောင်းပြီး ခံယူချက်အရ စစ်မှုထမ်းဖို့ငြင်းဆိုသူအဖြစ် ပြန်လျှောက်ထားတယ်။ သူ့ရဲ့လျှောက်ထားချက်ကို ဗဟိုစုံစမ်းစစ်ဆေးရေးဗျူရိုက လက်ခံပေမဲ့ တရားရေးဌာနကတော့ ပယ်ချလိုက်တယ်။ တရားရုံးမှာ အကြိမ်ကြိမ် အမှုရင်ဆိုင်ပြီးနောက် အမေရိကန်ပြည်ထောင်စုတရားရုံးချုပ်က ညီအစ်ကိုစီကာရယ်လာရဲ့အမှုကို ကြားနာခဲ့တယ်။ တရားရုံးချုပ်က အောက်တရားရုံးရဲ့ဆုံးဖြတ်ချက်ကို ပယ်ဖျက်ပြီး ညီအစ်ကိုစီကာရယ်လာကို အနိုင်ပေးခဲ့တယ်။ ဒီစီရင်ချက်က ခံယူချက်အရ စစ်မှုထမ်းဖို့ငြင်းဆိုတဲ့ တခြားအမေရိကန်နိုင်ငံသားတွေအတွက်လည်း သာဓကတစ်ရပ်အဖြစ် အထောက်အကူပြုခဲ့တယ်။

^၁၂ ဂရိ။ ၁၉၈၃ ခုနှစ်မှာ ရာကိုဗို့စ် သီမီနော့စ်ဟာ စစ်ဝတ်စုံဝတ်ဖို့ ငြင်းဆိုတဲ့အတွက် အမိန့်မနာခံမှုနဲ့ ပြစ်ဒဏ်စီရင်ခံရပြီး ထောင်ချခံရတယ်။ ထောင်ကထွက်လာပြီးတော့ စာရင်းကိုင်အလုပ် လျှောက်ထားတဲ့အခါ ရာဇဝတ်မှုကျူးလွန်တဲ့မှတ်တမ်းရှိတယ်ဆိုပြီး သူ့လျှောက်လွှာကို ပယ်ချလိုက်တယ်။ ဒီကိစ္စကို တရားရုံးမှာ ဖြေရှင်းတဲ့အခါ ဂရိနိုင်ငံတရားရုံးတွေမှာ ရှုံးနိမ့်ခဲ့တယ်။ ဒါနဲ့ လူ့အခွင့်အရေးဆိုင်ရာ ဥရောပတရားရုံး (အီးစီအိပ်ချ်အာရ်) မှာ အမှုတင်သွင်းခဲ့တယ်။ အီးစီအိပ်ချ်အာရ်ရဲ့ အယူခံတရားရုံးမှာ တရားသူကြီး ၁၇ ယောက်ပါတဲ့အဖွဲ့က ၂၀၀၀ ပြည့်နှစ်မှာ သူ့ကိုအနိုင်ပေးလိုက်တယ်။ ဒါက ခွဲခြားဆက်ဆံမှုကိုဆန့်ကျင်တဲ့ သာဓကတစ်ရပ်ပါပဲ။ ဒီစီရင်ချက်မချခင်မှာ ဂရိနိုင်ငံက ညီအစ်ကို ၃,၅၀၀ ကျော်ဟာ ကြားနေမှုကြောင့် ထောင်ချခံရတဲ့အတွက် ရာဇဝတ်မှုကျူးလွန်တဲ့မှတ်တမ်း ဝင်သွားတယ်။ အခုလိုအနိုင်ရပြီးနောက် ဂရိအစိုးရက ဒီညီအစ်ကိုတွေ ရာဇဝတ်မှုကျူးလွန်တယ်ဆိုတဲ့စွဲချက်ကို ပယ်ဖျက်ပေးတဲ့ ဥပဒေတစ်ရပ် ထုတ်ပြန်လိုက်တယ်။ ဒါ့အပြင် စစ်မှုမထမ်းချင်တဲ့ ဂရိနိုင်ငံသားအားလုံးကို အရပ်ဘက်ဆိုင်ရာလုပ်ငန်းလုပ်ခွင့်ပြုတဲ့ ဥပဒေလည်း ချမှတ်ပေးခဲ့တယ်။ လွန်ခဲ့တဲ့နှစ်အနည်းငယ်ကချမှတ်ခဲ့တဲ့ ဒီဥပဒေကို ဂရိနိုင်ငံဖွဲ့စည်းပုံအခြေခံဥပဒေ ပြင်ဆင်ချိန်မှာ ပြန်အတည်ပြုခဲ့တယ်။

၁၃၊ ၁၄။ ညီအစ်ကိုစတက်ဖာနိုနဲ့ ညီအစ်ကိုဘာရတ်ရန်တို့ရဲ့ အဖြစ်အပျက်ကနေ ဘာသင်ခန်းစာတွေ ရရှိသလဲ။

^၁၃ ဘူလ်ဂေးရီးယား။ ၁၉၉၄ ခုနှစ်မှာ အသက် ၁၉ နှစ်အရွယ် အီဗီလို စတက်ဖာနိုဟာ ဥပဒေအရစစ်မှုထမ်းဖို့ ဆင့်ခေါ်ခံရတယ်။ သူက စစ်မှုထမ်းဖို့ ဒါမှမဟုတ် စစ်တပ်လက်အောက်မှာ တိုက်ခိုက်ရေးနဲ့မပတ်သက်တဲ့တာဝန်တွေ ထမ်းဆောင်ဖို့ ငြင်းဆိုခဲ့တယ်။ ဒါကြောင့် ထောင်ဒဏ် ၁၈ လ ချမှတ်ခံရပေမဲ့ ခံယူချက်အရ စစ်မှုထမ်းဖို့ငြင်းဆိုခွင့်အပေါ် အခြေခံပြီး အယူခံဝင်ခဲ့တယ်။ နောက်ဆုံး သူ့ရဲ့အမှုကို အီးစီအိပ်ချ်အာရ်မှာ တင်သွင်းခဲ့တယ်။ အမှုမကြားနာခင် ၂၀၀၁ ခုနှစ်မှာ အစိုးရက ညီအစ်ကိုစတက်ဖာနိုရဲ့တောင်းဆိုချက်ကို သဘောတူလိုက်တယ်။ ဘူလ်ဂေးရီးယားအစိုးရက ညီအစ်ကိုစတက်ဖာနိုကိုသာမက အရပ်ဘက်ဆိုင်ရာလုပ်ငန်းလုပ်ချင်တဲ့ ဘူလ်ဂေးရီးယားနိုင်ငံသားအားလုံးကိုလည်း လွတ်ငြိမ်းချမ်းသာခွင့်ပေးလိုက်တယ်။c

^၁၄ အာမေးနီးယား။ ဗာဟန် ဘာရတ်ရန်ဟာ ၂၀၀၁ ခုနှစ်မှာ ဥပဒေအရစစ်မှုထမ်းဖို့ အသက်ပြည့်သွားတယ်။d သူက ခံယူချက်အရ စစ်မှုထမ်းဖို့ငြင်းဆိုပြီး ပြည်တွင်းတရားရုံးတွေမှာ အယူခံဝင်ပေမဲ့ အကြိမ်တိုင်းရှုံးနိမ့်ခဲ့တယ်။ ၂၀၀၂၊ စက်တင်ဘာလမှာတော့ ထောင်ဒဏ်နှစ်နှစ်ခွဲချမှတ်ခံရပြီး ဆယ်လခွဲအကြာမှာ ထောင်ကနေလွတ်လာတယ်။ အဲဒီအချိန်အတွင်း သူက အီးစီအိပ်ချ်အာရ်မှာ အယူခံဝင်တဲ့အခါ အမှုကိုကြားနာခဲ့တယ်။ ဒါပေမဲ့ ၂၀၀၉၊ အောက်တိုဘာလ ၂၇ ရက်မှာ ချမှတ်တဲ့ဆုံးဖြတ်ချက်ကြောင့် အီးစီအိပ်ချ်အာရ်မှာလည်း အမှုရှုံးသွားပြန်တယ်။ အဲဒီဆုံးဖြတ်ချက်က အာမေးနီးယားမှာ အလားတူကိစ္စမျိုးရင်ဆိုင်နေရတဲ့ ညီအစ်ကိုတွေအတွက် ပြင်းထန်တဲ့ထိုးနှက်ချက်တစ်ခု ဖြစ်ပုံရတယ်။ ဒါပေမဲ့ အီးစီအိပ်ချ်အာရ်ရဲ့အယူခံတရားရုံးက ဆုံးဖြတ်ချက်ကို ပြန်သုံးသပ်ပေးပြီး ၂၀၁၁၊ ဇူလိုင်လ ၇ ရက်မှာ ညီအစ်ကိုဘာရတ်ရန်ကို အနိုင်ပေးလိုက်တယ်။ ဒါက ဘာသာရေးခံယူချက်အရ စစ်မှုထမ်းဖို့ငြင်းဆိုခြင်းကို လွတ်လပ်စွာတွေးတောကြံဆခွင့်၊ လွတ်လပ်စွာယုံကြည်ခွင့်၊ ဘာသာရေးလွတ်လပ်ခွင့်ဆိုတဲ့ အခွင့်အရေးတွေနဲ့ ကာကွယ်ပေးသင့်တယ်ဆိုတာ အီးစီအိပ်ချ်အာရ်က ဦးဆုံးအကြိမ် အသိအမှတ်ပြုလိုက်တာပါပဲ။ ဒီဆုံးဖြတ်ချက်က ယေဟောဝါသက်သေတွေရဲ့အခွင့်အရေးကိုသာမက ဥရောပကောင်စီအဖွဲ့ဝင်နိုင်ငံတွေမှာရှိတဲ့ လူသန်းပေါင်းများစွာရဲ့အခွင့်အရေးကိုလည်း ကာကွယ်ပေးလိုက်တယ်။e

အမျိုးသားရေးအခမ်းအနားကိစ္စ

၁၅။ ယေဟောဝါရဲ့လူမျိုးက အမျိုးသားရေးအခမ်းအနားတွေမှာ ဘာကြောင့် မပါဝင်တာလဲ။

^၁၅ ယေဟောဝါရဲ့လူမျိုးဟာ စစ်မှုထမ်းဖို့ငြင်းဆိုတဲ့အပြင် အမျိုးသားရေးအခမ်းအနားတွေမှာပါဝင်ဖို့ လေးလေးစားစားငြင်းဆိုခြင်းအားဖြင့်လည်း မေရှိယနိုင်ငံကို သစ္စာစောင့်သိကြတယ်။ အထူးသဖြင့် ဒုတိယကမ္ဘာစစ်ဖြစ်ပွားချိန်ကစပြီး မျိုးချစ်စိတ်ဓာတ်ဟာ ကမ္ဘာတစ်ဝန်းမှာ အရှိန်အဟုန်နဲ့ပျံ့နှံ့လာတယ်။ နိုင်ငံသားများစွာဟာ သစ္စာဆိုခြင်း၊ အမျိုးသားသီချင်းဆိုခြင်း၊ နိုင်ငံတော်အလံအလေးပြုခြင်းအားဖြင့် အမိနိုင်ငံကို သစ္စာစောင့်သိကြောင်းပြဖို့ တောင်းဆိုခံရတယ်။ ဒါပေမဲ့ ကျွန်တော်တို့ကတော့ ယေဟောဝါဘုရားသခင်တစ်ပါးတည်းကိုပဲ ဦးချဝတ်ပြုကြတယ်။ (ထွ. ၂၀:၄၊ ၅) ရလဒ်အနေနဲ့ အကြီးအကျယ် နှိပ်စက်ညှဉ်းပန်းခံခဲ့ရတယ်။ ဒါပေမဲ့ ယေဟောဝါက နှိပ်စက်ညှဉ်းပန်းမှုတချို့ကို မျိုချဖို့ “မြေကြီး” ကို ထပ်အသုံးပြုခဲ့တယ်။ ဒီကိစ္စမှာ ခရစ်တော်ကတစ်ဆင့် ယေဟောဝါပေးအပ်ခဲ့တဲ့ ထူးခြားတဲ့အောင်ပွဲတချို့ကို သုံးသပ်ကြည့်ရအောင်။—ဆာ. ၃:၈။

၁၆၊ ၁၇။ လီလီယံနဲ့ ဝီလျံ ဂိုဗိုင်းတပ်စ်တို့ ဘယ်ကိစ္စနဲ့ရင်ဆိုင်ခဲ့ရသလဲ။ သူတို့ရဲ့အဖြစ်အပျက်ကနေ ဘာသင်ယူနိုင်သလဲ။

^၁၆ အမေရိကန်ပြည်ထောင်စု။ ၁၉၄၀ ပြည့်နှစ်မှာ အမေရိကန်တရားရုံးချုပ်က မိုင်နာစ်ဗီးလ်ကျောင်းနယ်မြေနဲ့ဂိုဗိုင်းတပ်စ် အမှုနဲ့ပတ်သက်ပြီး ၈ မဲ ၁ မဲနဲ့ ဆုံးဖြတ်ချက်ချတဲ့အတွက် ယေဟောဝါသက်သေတွေ ရှုံးနိမ့်ခဲ့တယ်။ ၁၂ နှစ်အရွယ် လီလီယံ ဂိုဗိုင်းတပ်စ်နဲ့ သူ့မောင်လေး ၁၀ နှစ်အရွယ် ဝီလျံတို့ဟာ ယေဟောဝါကို သစ္စာစောင့်သိချင်တာကြောင့် အလံအလေးပြုဖို့၊ သစ္စာဆိုဖို့ ငြင်းဆိုခဲ့တယ်။ ဒါကြောင့် သူတို့ကို ကျောင်းထုတ်လိုက်တယ်။ တရားရုံးချုပ်မှာ အမှုရင်ဆိုင်တဲ့အခါ ကျောင်းရဲ့လုပ်ရပ်ဟာ “အမျိုးသားစည်းလုံးညီညွတ်ရေး” ကို အကျိုးပြုတဲ့အတွက် ဖွဲ့စည်းပုံအခြေခံဥပဒေနဲ့ ကိုက်ညီတယ်ဆိုပြီး ရုံးတော်က ဆုံးဖြတ်တယ်။ ဒီဆုံးဖြတ်ချက်ကြောင့် ပြင်းထန်တဲ့နှိပ်စက်ညှဉ်းပန်းမှုတွေ အစပြုလာတယ်။ သက်သေခံကလေးများစွာ ကျောင်းထုတ်ခံရတယ်။ သက်သေခံလူကြီးတွေ အလုပ်ထုတ်ခံရတယ်။ သက်သေခံအတော်များများဟာ လူရမ်းကားအုပ်ရဲ့ ရက်ရက်စက်စက်တိုက်ခိုက်မှုတွေ ခံရတယ်။ “၁၉၄၁ ကနေ ၁၉၄၃ ခုနှစ်အတွင်း သက်သေခံတွေကို ညှဉ်းပန်းနှိပ်စက်တာက နှစ်ဆယ်ရာစုအတွင်း အမေရိကန်နိုင်ငံမှာဖြစ်ပွားတဲ့ အကြီးမားဆုံးဘာသာရေးအစွန်းရောက်မှုပါပဲ” ဆိုပြီး စာအုပ်တစ်အုပ် (The Lustre of Our Country) မှာဖော်ပြတယ်။

^၁၇ ဘုရားသခင့်ရန်သူတွေရဲ့အောင်ပွဲက ကြာကြာမခံပါဘူး။ ၁၉၄၃ ခုနှစ်မှာ တရားရုံးချုပ်က ဂိုဗိုင်းတပ်စ် အမှုနဲ့ဆင်တူတဲ့ နောက်အမှုတစ်ခုကို စစ်ဆေးခဲ့တယ်။ အဲဒါက အနောက်ဗာဂျီးနီးယား ပညာရေးဘုတ်အဖွဲ့နဲ့ ဘားနက်တ် အမှုဖြစ်တယ်။ ဒီတစ်ကြိမ်မှာတော့ တရားရုံးချုပ်က ယေဟောဝါသက်သေတွေကို အနိုင်ပေးလိုက်တယ်။ တရားရုံးချုပ်က သူကိုယ်တိုင်ချခဲ့တဲ့ အရင်ဆုံးဖြတ်ချက်ကို အခုလို အချိန်တိုအတွင်းပြောင်းလိုက်တာဟာ အမေရိကန်နိုင်ငံသမိုင်းမှာ ဦးဆုံးအကြိမ်ပါပဲ။ အဲဒီဆုံးဖြတ်ချက်ချပြီးနောက် အမေရိကန်နိုင်ငံမှာ ယေဟောဝါရဲ့လူမျိုးကို ပေါ်ပေါ်ထင်ထင်နှိပ်စက်ညှဉ်းပန်းတာ သိသိသာသာကြီး လျော့နည်းသွားတယ်။ ဒီဖြစ်ရပ်က အမေရိကန်နိုင်ငံသားအားလုံးရဲ့အခွင့်အရေးကို ပိုခိုင်မာစေခဲ့တယ်။

၁၈၊ ၁၉။ ဆက်ခံရပ်နိုင်ဖို့ ဘာကကူညီပေးတယ်လို့ ပါဘလို ဘာရောစ် ပြောပြသလဲ။ သူ့ရဲ့ပုံသက်သေကို ယေဟောဝါရဲ့ကျေးကျွန်တွေ ဘယ်လိုတုပနိုင်သလဲ။

^၁၈ အာဂျင်တီးနား။ ၁၉၇၆ ခုနှစ်မှာ အသက်ခုနစ်နှစ်အရွယ် ပါဘလိုနဲ့ ရှစ်နှစ်အရွယ် ယူဂို ဘာရောစ်တို့ဟာ အလံတင်အခမ်းအနားမှာ မပါဝင်တဲ့အတွက် ကျောင်းထုတ်ခံရတယ်။ တစ်ကြိမ်မှာ ကျောင်းအုပ်ဆရာမကြီးက ပါဘလိုကို ခပ်ကြမ်းကြမ်းတွန်းပြီး သူ့ခေါင်းကိုလည်း ရိုက်တယ်။ ဒါ့အပြင် ကျောင်းဆင်းပြီးနောက် သူတို့ကို တစ်နာရီလောက်နေခိုင်းပြီး အမျိုးသားရေးအခမ်းအနားတွေမှာ အတင်းအကျပ်ပါဝင်ခိုင်းတယ်။ ထိတ်လန့်စရာကောင်းတဲ့ အဲဒီအတွေ့အကြုံနဲ့ပတ်သက်ပြီး ပါဘလိုက “ယေဟောဝါရဲ့အကူအညီသာမပါရင် သမာဓိချိုးဖောက်ဖို့ ဖိအားပေးခံရတာကို ကျွန်တော်ခံရပ်နိုင်မှာမဟုတ်ဘူး” လို့ပြောပြတယ်။

^၁၉ တရားရုံးမှာ အမှုရင်ဆိုင်တဲ့အခါ ပါဘလိုနဲ့ ယူဂိုကို ကျောင်းထုတ်ဖို့ ကျောင်းကဆုံးဖြတ်တာ မှန်တယ်လို့ တရားသူကြီးက အတည်ပြုလိုက်တယ်။ ဒါပေမဲ့ သူတို့ရဲ့အမှုကို အာဂျင်တီးနားတရားရုံးချုပ်မှာ အယူခံဝင်ခဲ့တယ်။ ၁၉၇၉ ခုနှစ်မှာ တရားရုံးချုပ်က အောက်တရားရုံးရဲ့ဆုံးဖြတ်ချက်ကို ပယ်ဖျက်ပြီး အခုလိုပြောတယ်– “အဲဒီလိုအပြစ်ပေးတာ [ကျောင်းထုတ်တာ] က သင်ကြားခွင့်ဆိုင်ရာအခြေခံဥပဒေ (အပိုဒ် ၁၄) နဲ့ အခြေခံပညာတတ်မြောက်ရေးဆိုင်ရာ အစိုးရရဲ့တာဝန် (အပိုဒ် ၅) ကို ဆန့်ကျင်ရာရောက်တယ်။” ဒီအောင်ပွဲကြောင့် သက်သေခံကလေး ၁,၀၀၀ နီးပါး အကျိုးခံစားခဲ့ရတယ်။ ကလေးတချို့ ကျောင်းထုတ်မခံရတော့ဘူး။ ပါဘလိုနဲ့ ယူဂိုလိုပဲ တခြားကလေးတွေလည်း ကျောင်းပြန်တက်ခွင့်ရတယ်။

၂၀၊ ၂၁။ ရိုအယ်နဲ့ အင်မလီ အန်ဘရာလီနက်တို့ရဲ့ အဖြစ်အပျက်က သင့်ယုံကြည်ခြင်းကို ဘယ်လိုခိုင်ခံ့စေသလဲ။

^၂၀ ဖိလစ်ပိုင်။ ၁၉၉၀ ပြည့်နှစ်မှာ ၉ နှစ်အရွယ် ရိုအယ် အန်ဘရာလီနက်၊ သူ့အစ်မဖြစ်သူ ၁၀ နှစ်အရွယ် အင်မလီတို့နဲ့အတူ တခြားသက်သေခံကျောင်းသူကျောင်းသား ၆၆ ယောက်ဟာ အလံအလေးမပြုတဲ့အတွက် ကျောင်းထုတ်ခံလိုက်ရတယ်။ ရိုအယ်နဲ့အင်မလီရဲ့အဖေ လီယိုနာဒိုက ကျောင်းတာဝန်ခံတွေနဲ့ ဆွေးနွေးပေမဲ့ ဘာမှအကြောင်းမထူးဘူး။ အခြေအနေ ပိုဆိုးလာတာကြောင့် လီယိုနာဒိုက တရားရုံးချုပ်ဆီ အသနားခံစာတင်ခဲ့တယ်။ သူ့မှာ ငွေလည်းမရှိ၊ အမှုလိုက်ပေးမယ့် ရှေ့နေလည်း မရှိဘူး။ သူတို့မိသားစုက လမ်းညွှန်မှုရဖို့ ယေဟောဝါဆီ ထက်ထက်သန်သန်ဆုတောင်းကြတယ်။ အဲဒီအချိန်အတောအတွင်း ကလေးတွေဟာ ကဲ့ရဲ့လှောင်ပြောင်ခံရရှာတယ်။ ဥပဒေရေးရာမှာ အတွေ့အကြုံမရှိတဲ့အတွက် အမှုနိုင်မှာမဟုတ်ဘူးလို့ လီယိုနာဒို ထင်ခဲ့တယ်။

^၂၁ ဖြစ်ချင်တော့၊ နိုင်ငံရဲ့နာမည်အကြီးဆုံးဥပဒေရေးရာအဖွဲ့မှာ အလုပ်လုပ်ဖူးတဲ့ ရှေ့နေ ဖီလီနို ဂါနယ်လ်က သူတို့မိသားစုဘက်ကနေ အမှုလိုက်ပေးတယ်။ အမှုဖြစ်နေချိန်မှာ ညီအစ်ကိုဂါနယ်လ်က ဥပဒေအဖွဲ့ကနေ အလုပ်ထွက်ပြီးပြီ၊ ယေဟောဝါသက်သေလည်း ဖြစ်နေပြီ။ တရားရုံးချုပ်မှာ အမှုရင်ဆိုင်တဲ့အခါ ရုံးတော်က ယေဟောဝါသက်သေတွေကို အနိုင်ပေးဖို့ တညီတညွတ်တည်းဆုံးဖြတ်ပြီး ကျောင်းထုတ်တဲ့အမိန့်ကို ပယ်ဖျက်လိုက်တယ်။ ဘုရားသခင့်လူမျိုးရဲ့သမာဓိကို ချိုးဖျက်ဖို့ ကြိုးစားသူတွေ အရှုံးကြီးရှုံးသွားပြန်တယ်။

ကြားနေခြင်းက စည်းလုံးမှုကိုဖြစ်စေ

၂၂၊ ၂၃။ (က) ထူးခြားတဲ့တရား ဥပဒေအောင်ပွဲတွေ ဒီလောက်အများကြီးရရှိတာ ဘာကြောင့်လဲ။ (ခ) ကျွန်တော်တို့ရဲ့ ငြိမ်းချမ်းတဲ့ ကမ္ဘာချီညီအစ်ကိုအသင်းအပင်းက ဘာကိုသက်သေထူသလဲ။

^၂၂ ယေဟောဝါရဲ့လူမျိုးက ထူးခြားတဲ့တရားဥပဒေအောင်ပွဲတွေ ဒီလောက်အများကြီးရရှိတာ ဘာကြောင့်လဲ။ ကျွန်တော်တို့မှာ နိုင်ငံရေးအရှိန်အဝါလည်းမရှိဘူး။ ဒါတောင် တစ်နိုင်ငံပြီးတစ်နိုင်ငံ၊ တရားရုံးတစ်ခုပြီးတစ်ခုမှာ ဘက်မလိုက်တဲ့တရားသူကြီးတွေက သဲကြီးမဲကြီးတိုက်ခိုက်သူတွေ လက်ကနေ ကျွန်တော်တို့ကို ကာကွယ်ပေးခဲ့တယ်။ တရားရုံးအမှုတွေမှာ သူတို့က ဖွဲ့စည်းပုံအခြေခံဥပဒေအတွက် သာဓကတွေ ချမှတ်ပေးခဲ့တယ်။ ဒီအောင်ပွဲတွေရဖို့ ကျွန်တော်တို့ကို ခရစ်တော် ကျောထောက်နောက်ခံပေးနေတယ်ဆိုတာ အသေအချာပါပဲ။ (ဗျာဒိတ် ၆:၂ ကိုဖတ်ပါ။) ဒီလို တရားဥပဒေတိုက်ပွဲတွေကို ဘာကြောင့်ဆင်နွှဲကြတာလဲ။ တရားရေးစနစ်ကို ပြုပြင်ပြောင်းလဲချင်လို့ မဟုတ်ပါဘူး။ ကျွန်တော်တို့ရဲ့ရည်ရွယ်ချက်က ဘုရင်ယေရှုခရစ်ရဲ့အမှုတော်ကို အနှောင့်အယှက်မရှိ ဆက်ထမ်းဆောင်နိုင်ဖို့ဖြစ်တယ်။—တ. ၄:၂၉။

^၂၃ နိုင်ငံရေးပဋိပက္ခတွေ၊ အရိုးစွဲနေတဲ့မုန်းတီးမှုတွေကြောင့် တစ်စစီပြိုကွဲနေတဲ့ လောကအလယ်မှာ ဘုရင်ယေရှုခရစ်က သူ့နောက်လိုက်တွေ နိုင်ငံရေးမှာကြားနေဖို့ ကြိုးစားတာကို ကောင်းချီးပေးနေတယ်။ ကျွန်တော်တို့ စည်းလုံးမှုပြိုကွဲသွားအောင်၊ ရှုံးနိမ့်သွားအောင် စာတန်ကြိုးပမ်းနေတာတွေဟာ သဲထဲရေသွန်သလိုပါပဲ။ ‘စစ်ပညာ သင်ကြတော့မှာမဟုတ်တဲ့’ လူသန်းပေါင်းများစွာကို ဘုရားသခင့်နိုင်ငံတော်က စုသိမ်းနေပါတယ်။ ကျွန်တော်တို့ရဲ့ ငြိမ်းချမ်းတဲ့ ကမ္ဘာချီညီအစ်ကိုအသင်းအပင်းကိုယ်နှိုက်က အံ့သြဖွယ်ရာဖြစ်ပြီး ဘုရားသခင့်နိုင်ငံတော်စိုးစံနေပြီဖြစ်ကြောင်း မငြင်းနိုင်တဲ့အထောက်အထားပါပဲ။—ဟေရှာ. ၂:၄၊ ကဘ။