‘ထမြောက်ရာကာလ၌ သူတို့ထမြောက်လိမ့်မည်ကို ကျွန်ုပ်တို့သိပါသည်’

အ နန္တတန်ခိုးရှင်ဘုရားသခင်သည် လူသားတို့အား အသက်ပေးတော်မူ၏။ သေလွန်သူတို့အားလည်း အသက်ပြန်ပေးနိုင်တော်မူသည်။ ကိုယ်တော်.ထံတော်မှလည်း အသက်ရှင်ခြင်းနှင့် သေခြင်းအကြောင်း သတင်းအချက်အလက်များဆိုင်ရာ အထူးယုံကြည်စိတ်ချရသော ဇာစ်မြစ်ရရှိသည်။ ယင်းမှာ ဟေဗြဲနှင့်ခရစ်ယာန်ဂရိကျမ်းစောင်တို့ဖြစ်ပြီး ထိုနှစ်ပိုင်းပေါင်းလိုက်သော် သမ္မာကျမ်းစာဖြစ်လာသည်။ ယင်းတွင် သေလွန်သူ အများပြန်ရှင်လာနိုင်ကြောင်း၊ ပြန်၍လည်း ရှင်လာမည်ဖြစ်ကြောင်း ခိုင်လုံသော အထောက်အထားရှိသည့် သတင်းတရားပါရှိသည်။—⁠ယောဟန် ၅:၂၈၊ ၂၉။

သာဓကအနေနှင့် ဗေသနိရွာမှ လာဇရုနှင့်ဆိုင်သော သမိုင်းဝင်မှတ်တမ်းကို သုံးသပ်ကြည့်ပါ။ လာဇရုမှာ ယေရှုခရစ် ကောင်းစွာသိကျွမ်းသူဖြစ်ပြီး ဖျားနာ၍ သေဆုံးသွားသည်။ ယင်းနောက် ယေရှုက လာဇရု၏အစ်မ မာသအား “သင်၏ [သေနေသော] မောင်သည် ထမြောက်လိမ့်မည်” ဟုမိန့်တော်မူ၏။ သူမကလည်း “နောက်ဆုံးသောနေ့ တည်းဟူသော ထမြောက်ရာကာလ၌ သူသည်ထမြောက်လိမ့်မည်ကို ကျွန်မသိပါသည်” ဟုလျှောက်၏။ (ယောဟန် ၁၁:၂၃၊၂၄) မှန်ပါသည်။ သူမကောင်းစွာသိသည်။ ယုံကြည်စိတ်ချရသော သတင်းအချက်အလက်တို့အပေါ် အခြေပြု၍ သူမ၏ချစ်စွာသောမောင် လာဇရုသည် “နောက်ဆုံးသောနေ့” တွင် ပြန်ရှင်လာမည်ကို သူမလုံးဝသံသယမရှိခဲ့ပေ။

ယောဟန်အခန်းကြီး ၁၁ ၌ အဆိုပါသမိုင်းဝင်မှတ်တမ်းကို ဖတ်ရှုပါလျှင် ယင်းနောက် မည်သို့ဖြစ်ပျက်သည်ကို အသေးစိတ်တွေ့ရပေမည်။ လာဇရုသည် လေးရက်ကြာသေနေပြီဖြစ်သော်လည်း သူ့အား ယေရှုအသက်ပြန်ရှင်စေတော်မူ၏။ ထိုရှင်ပြန်ထမြောက်ခြင်းသည် “နောက်ဆုံးသောနေ့” တွင် သေသူများအား ပြန်ရှင်စေမည်ဟူသော ကတိတော်ကို ဘုရားသခင်ပြည့်စုံစေနိုင်သည်ဟူသော သက်သေပင်ဖြစ်သည်။ သို့သော် အဘယ်နေရာတွင် လာဇရုကိုပြန်တွေ့ရန် မာသမျှော်လင့်ခဲ့သနည်း။ အခြားသစ္စာရှိ ယုဒအမျိုးသားများအနေဖြင့် လာလတံ့သော ရှင်ပြန်ထမြောက်ခြင်းသည် အဘယ်နေရာတွင်ဖြစ်ပျက်မည်ဟု တွေးထင်ခဲ့ကြသနည်း။

‘ပြန်လမ်းမရှိသော ပြည်’

ကမ္ဘာမြေကြီးကို လူသားတို့၏ ဇာတိနေရပ်ဌာနေအဖြစ် ဘုရားသခင်ရွေးချယ်တော်မူ၏။ ဆာလံဆရာက ယင်းအကြောင်းကို အောက်ပါစကားများဖြင့် ဖေါ်ပြထားသည်။ “ကောင်းကင်ကား ယေဟောဝါ၏ ကောင်းကင်ဖြစ်၏။ မြေကြီးကိုကား လူသားတို့အား ပေးတော်မူပြီ။” (ဆာလံ ၁၁၅:၁၆) အကယ်၍ အာဒံနှင့်ဧဝသည် ဘုရားသခင်အပေါ် သစ္စာစောင့်သိခဲ့သော် ဤကမ္ဘာမြေပထဝီအပြင် တစ်နေရာရာတွင် ထာဝရအသက်ရရှိမည်ဟူ၍ သမ္မာကျမ်းစာ၌ အရိပ်အမြွက်ဖေါ်ပြချက် လုံးဝမရှိပေ။ အမှန်ဆိုလျှင် ပထမလူသားမောင်နှံ ဘုရားသခင်အား နာမခံသည့်လမ်းသို့ လိုက်မသွားမီက စံပျော်ခဲ့ကြသော ပရဒိသု ဤကမ္ဘာမြေကြီး၌ပင် “အသက်ပင်” ရှိခဲ့သည်မဟုတ်လော။ (ကမ္ဘာဦး ၂:⁠၉။ ၃:၂၂) ဘုရားသခင်ထံတော်မှ ဆန့်ကျင်ဘက်သတင်းအချက်အလက်များမရှိသဖြင့် ဧဒင်ဥယျာဉ်အပြင်ဘက်ရှိ (အာဒံ၏ ဘုရားခန့်ညားသောသား အာဗေလမှစ၍) ကိုယ်တော်၏ သစ္စာရှိအစေခံများသည် ရှင်ပြန်ထမြောက်ခြင်းအကြောင်းကို လူသားတို့၏ တစ်ခုတည်းသော နေအိမ်အဖြစ် သူတို့သိရှိထားသော ဤကမ္ဘာမြေကြီးနှင့်သာ မလွဲမသွေဆက်စပ်ခဲ့ကြပေမည်။

သမ္မာကျမ်းစာနှင့် အကျွမ်းတဝင်ရှိသူအချို့အနေဖြင့် ဤသို့ငြင်းချက်ထုတ်ကောင်းထုတ်မည်။ ‘နေပါဦး၊ ယောဘက ယောဘ အခန်းကြီး ၁၆ အခန်းငယ် ၂၂ မှာ “ပြန်၍မလာရသော လမ်းသို့ ငါလိုက်သွားတော့မည်” ဟုပြောခဲ့သည်မဟုတ်ပါလော။ ယောဘ ၇:၉ ၌လည်း “သင်္ချိုင်းတွင်း [ရှီးအိုးလ်] ထဲသို့ ဆင်းသောသူသည် နောက်တစ်ဖန်မတက်ရ” ဟု သူထောက်ပြထားသည်။ ယောဘ အခန်းငယ် ၁၀ ၌ “မိမိအိမ်သို့မပြန်ရ။ သူ၏နေရင်းအရပ်သည် နောက်တစ်ဖန် သူ့ကိုမသိရ” ဟူ၍ ထပ်ဆင့်ဆိုထားသည်။

ထိုကြောင့် ပညာရှင်အချို့ယူဆသည့်အတိုင်း ထိုအခန်းငယ်များနှင့် အလားတူဖေါ်ပြချက်များက သေခြင်းကို ‘ပြန်လမ်းမရှိသောပြည်’ အဖြစ် ယောဘသဘောထားကြောင်း သေချာနေသည်မဟုတ်လော။ ထိုသို့သော ဖေါ်ပြချက်များသည် အနာဂတ်ထမြောက်ခြင်းကို ယောဘမယုံကြည်ဟု အဓိပ္ပာယ်သက်ရောက်သလော။ အဖြေမှန်ရရှိရေးအတွက် ယင်းစကားများ၏ ထားသိုပုံကို ထည့်သွင်းစဉ်းစားပြီး ဤအကြောင်းနှင့်ပတ်သက်၍ ယောဘ၏ အခြားအယူအဆများနှင့်လည်း နှိုင်းယှဉ်ကြည့်ရပါမည်။

ယောဘသည် ဘာကြောင့် ဒုက္ခဆင်းရဲခံစားရသည်ကိုပင် မသိခဲ့ပေ။ သူခံစားရသော ဒုက္ခသည် ဘုရားသခင်ကြောင့်ဟု အတန်ကြာမှားယွင်းစွာ ယူဆခဲ့သည်။ (ယောဘ ၆:⁠၄။ ၇:၁၇-၂၀။ ၁၆:၁၁-၁၃) သူ့အတွက် လက်ငင်းအေးငြိမ်းမှုပေးနိုင်သော အရပ်တစ်ခုတည်းမှာ သင်္ချိုင်းသာဖြစ်သည်ဟု စိတ်ပျက်အားငယ်စွာဖြင့် သူခံစားရသည်။ (ယောဘ ၇:၂၁။ ၁၇:⁠၁။ ၃:၁၁-၁၃ နှင့်နှိုင်းယှဉ်ပါ။) ထိုနေရာတွင် သူနှင့်ခေတ်ပြိုင် အသက်ရှင်သူများ ရှုထောင့်မှကြည့်လျှင် သူ့ကိုမမြင်ရ၊ သူသည်လည်း သူ့အိမ်သို့မပြန်၊ သူ့ကိုမသိမှတ်၊ သူပြန်မလာ၊ ဘုရားသခင့်ချိန်းချက်ရာအချိန်မတိုင်မီ ထိုသို့ပြုရန်လည်း မျှော်လင့်ချက်မရှိချေ။ ဘုရားသခင့်မစမှုမရှိဘဲ သူတို့ဖါသာသာဆိုလျှင် ယောဘနှင့်တကွ အာဒံ၏သားစဉ်မြေးဆက်ရှိရှိသမျှသည် သေရာမှထမြောက်ရန် လုံးဝမတတ်စွမ်းနိုင်ကြပေ။a—⁠ယောဘ ၇:၉၊ ၁၀။ ၁၀:၂၁။ ၁၄:⁠၁၂။

ထမြောက်ခြင်းကို ယုံကြည်ခြင်း

သို့တစေ ခံစားတွေ့ကြုံမှုနှင့်ပတ်သက်၍ ယောဘ ဇဝေဇဝါဖြစ်ခြင်း၊ သူ၏လက်ငင်းအနာဂတ်နှင့်ပတ်သက်၍ ပြောဆိုခဲ့သော ကြောက်ဖွယ်ကောင်းသည့် ပြောဆိုချက်တို့ကို ထောက်၍ ရှင်ပြန်ထမြောက်ခြင်းကို သူအယုံအကြည်မရှိဟူ၍ အဓိပ္ပာယ်မကောက်သင့်ပေ။ အနာဂတ်ထမြောက်ခြင်းကို သူအသေအချာယုံကြည်ကြောင်း ယောဘ ၁၄:၁၃-၁၅ မှရှင်းလင်းစွာတွေ့မြင်ရသည်။ ထိုကျမ်းပိုဒ်တွင် ယောဘက ‘ရှီးအိုးလ်၌ ဝှက်ထား’ ရန်လိုလားကြောင်း၊ ထိုနောက် ဘုရားသခင် ‘အောက်မေ့ခြင်းခံရရန်’ လိုလားကြောင်း ယောဘပြောခဲ့သည်။ ထိုမျှမက ယောဘ ၁၉:၂၅-၂၇ တွင် ယုံကြည်ခြင်းရှိ၍ သမာဓိစောင့်သိသော ဤသူက “ရွေးနှုတ်သောသခင်” တစ်ပါးရှိကြောင်း၊ နောင်တွင် ‘ဘုရားသခင်ကိုမြင်မည်’ အကြောင်း ပြောဆိုခဲ့သည်။ မှန်ပေသည်။ ထမြောက်ခြင်းကို ယောဘယုံကြည်သည်။ ‘သေသူတို့ကို ထမြောက်စေရန်’ ဘုရားသခင်တတ်နိုင်တော်မူကြောင်း အာဗြဟံယုံကြည်ခဲ့သကဲ့သို့ မိမိအား ဘုရားသခင်အသက်ပြန်ရှင်စေနိုင်သည့်ပြင် ပြန်၍လည်း ရှင်စေမည်ကို ယောဘယုံကြည်ခဲ့သည်။—⁠ဟေဗြဲ ၁၁:၁၀၊ ၁၆၊ ၁၉၊ ၃၅။

မျက်မှောက်ခေတ်ကာလတိုင်အောင် ယုဒအမျိုးသားတို့သည် အနာဂတ်ကာလတွင် ကမ္ဘာမြေကြီးပေါ် အသက်ရှင်ရန် ထမြောက်ခြင်းအကြောင်းကို ယုံကြည်လာခဲ့ကြသည်။ Encyclopœdia Judaica (၁၉၇၁) ၌ ဤသို့ဖေါ်ပြထား၏။ “နောက်ဆုံးတစ်နေ့၌ သေလွန်သူတို့သည် သူတို့၏ ကိုယ်ခန္ဓာ၌ ပြန်လည်ရှင်သန်လာပြီး ကမ္ဘာမြေကြီးပေါ် တစ်ဖန်နေထိုင်ကြမည်ဟူသော ယုံကြည်ချက်မှာ [ယုဒဘာသာ၏] အဓိကကျသော တရားဓမ္မ” ဖြစ်သည်။ ထိုစွယ်စုံကျမ်းက ဤသို့ဆက်၍ဆိုသည်။ “ဤယူဆချက်ကို အလေးအနက်နှင့် စာသားပကတိအတိုင်း လက်ခံယုံကြည်ကြသဖြင့် ဘုရားတရားကြည်ညိုသော ယုဒအမျိုးသားတို့သည် သူတို့သင်္ဂြိုဟ်ခံရစဉ်၌ ဝတ်သောအဝတ်၊ ကိုယ်အင်္ဂါအစိတ်အပိုင်း အပြည့်အစုံဖြင့် မြှုပ်နှံခြင်းနှင့် ဣသရေလတိုင်းပြည်တွင် မြှုပ်နှံခြင်းတို့ကို အထူးအလေးထားလေ့ရှိကြသည်။”

စိတ်ဝင်စားစရာအချက်မှာ ရှင်ပြန်ထမြောက်ရာကာလတွင် သေလွန်သူတို့၏ ပျက်စီးယိုယွင်းပြီးသော လူ့ကိုယ်ခန္ဓာကို ဘုရားသခင်ပြန်လည်စုစည်းတော်မူမည်ဟူ၍ သမ္မာကျမ်းစာ၌ဆိုမထားခြင်းဖြစ်သည်။ ရှေးရှေးက သေလွန်ခဲ့သူတို့၏ တကယ့်အက်တမ်များသည် မြေကြီးတစ်ပြင်လုံးသို့ ပြန့်နှံ့သွားပြီးနောက် ဟင်းသီးဟင်းရွက်နှင့် တိရစ္ဆာန်များ၌ ဖွဲ့စည်းပါဝင်သွားလေ့ရှိသည်။ အခြားလူသားများ၌ပင် ပါဝင်သွားပေမည်။ ထိုသူတို့လည်း နောက်ပိုင်းတွင် သေလွန်ကြပြန်သည်။ ထိုကြောင့် ရှင်ပြန်ထမြောက်ရာကာလတွင် အက်တမ်တစ်မျိုးတည်းကို ထမြောက်လာသူ တစ်ဦးထက်မကအတွက် အသုံးပြုနိုင်မည်မဟုတ်သည်မှာ ရှင်းလင်းလှပေသည်။ ဘုရားသခင်သည် အလိုတော်ရှိသည်အတိုင်း ထိုသူ၌ မသေမီကရှိခဲ့သော ချွတ်ယွင်းမှုများမပါဘဲ အင်္ဂါအစိတ်အပိုင်း အစုံအလင်ပါရှိသော သင့်တော်သည့် ကိုယ်ခန္ဓာဖြင့် လူသားတို့ကို အသက်ရှင်စေတော်မူမည်။—⁠၁ ကောရိန္သု ၁၅:၃၅-၃၈ နှင့်နှိုင်းယှဉ်ပါ။

ရှင်ပြန်ထမြောက်လာသော ဤသူတို့ကို အသက်ပြန်ရှင်လာကြသူများဖြစ်ကြသော သူတို့၏ ဆွေမျိုးညာတိများ မှတ်မိပါမည်လော။ ဤမေးခွန်းသည် အကျိုးအကြောင်းဆီလျော်သည်။ အကြောင်းမှာ ထမြောက်လာသူများကို ကျွန်ုပ်တို့မမှတ်မိ၊ သူတို့လည်း ကျွန်ုပ်တို့ကို မမှတ်မိပါက သေလွန်သွားသော ကျွန်ုပ်တို့၏ ချစ်ခင်သူများ အမှန်ရှင်လာကြောင်း မည်သို့သိနိုင်မည်နည်း။ လာဇရု၏ ကိုယ်ခန္ဓာသည် ပျက်စီးယိုယွင်းခဲ့ပြီဖြစ်သော်လည်း သူ့အားယေရှုထမြောက်စေပြီးနောက် ဆွေမျိုးမိတ်သင်္ဂဟများက သူ့ကို မှတ်မိကြသည်။ ထိုကြောင့် ကမ္ဘာမြေကြီးပေါ် အသက်ရှင်ရန် ထမြောက်ရာကာလ၌ အချင်းချင်းတစ်ယောက်ကိုတစ်ယောက် တွေ့မြင်သိကျွမ်းနိုင်ရန် ယေဟောဝါဘုရားသခင် မေတ္တာရှေ့ထား၍ စီမံပေးတော်မူမည်အကြောင်း ကျွန်ုပ်တို့လည်း မျှော်လင့်နိုင်ကြသည်။

လူနည်းစုအတွက် ကောင်းကင်မျှော်လင့်ချက်

အထက်၌ ကျွန်ုပ်တို့သတိပြုမိသည့်အတိုင်း ကမ္ဘာမြေပထဝီမှာ လူသားများအတွက် ဘုရားသခင်ပေးသနားတော်မူသည့် စံအိမ်ဖြစ်သည်။ သို့ရာတွင် ယေရှုခရစ်တော်က လူသားတို့အထဲမှ ရွေးချယ်ခြင်းခံရသော အရေအတွက်သည် မိမိနှင့်အတူ ကောင်းကင်ဘုံတွင် ဖောက်ပြန်ပျက်စီးခြင်းကင်း၍ မသေနိုင်သော နံဝိညာဉ်အသက်တာဘဝသို့ ထမြောက်ခံရမည့် မျှော်လင့်ခြင်းအကြောင်း ရှင်းပြတော်မူခဲ့သည်။ (၂ တိမောသေ ၁:၁၀) ကောင်းကင်အသက်တာသို့သွားရာ “အသက်လမ်းသစ်” ကို ယေရှုဖွင့်လှစ်တော်မူပြီးနောက် ခရစ်ယာန်အားလုံးအား ထိုမျှော်လင့်ချက်ကို ဝင်စားကြရန် အချိန်အတန်ကြာ ဖိတ်ခေါ်ခဲ့သည်။ (ဟေဗြဲ ၉:၂၄; ၁၀:၁၉၊ ၂၀) ထိုဆုလာဘ်ကို နောက်ဆုံးတွင် မည်မျှသောသူတို့ ရရှိမည်နည်း။ ‘ဖြစ်ရမည့်အမှုအရာများကို ကျွန်တော်ရင်းတို့အား ထင်ရှားစေရန် ယေရှုထံသို့ဘုရားသခင်အပ်ပေးတော်မူသော မှုတ်သွင်းခံ ဗျာဒိတ်တော်’ က “မြေကြီးမှရွေးနှုတ်သောသူ” ၁၄၄၀၀၀ ဟူသော ကိန်းဂဏန်းကိုဖေါ်ပြ၏။—⁠ဗျာဒိတ် ၁:⁠၁; ၇:၄-၈; ၁၄:၁၊ ၃။

ဤမျှအရေအတွက်နည်းပါးသည့်သူတို့ကို ကောင်းကင်အသက်တာအတွက် အဘယ်ကြောင့် “မြေကြီးပေါ်မှ ရွေးနှုတ်” ရသနည်း။ ဤဗျာဒိတ်ကျမ်းကပင် အရေအတွက် ကန့်သတ်ခြင်းအကြောင်း ရှင်းပြ၏။ ဗျာဒိတ် အခန်းကြီး ၂၀ အခန်းငယ် ၅ နှင့် ၆ တွင် ဤသို့ဖတ်ရသည်။ “ဤထမြောက်ခြင်းကား ပထမထမြောက်ခြင်းဖြစ်သတည်း။ ပထမထမြောက်ခြင်းကို ဝင်စားသောသူသည် မင်္ဂလာရှိသောသူ၊ သန့်ရှင်းသောသူဖြစ်၏။ ထိုသို့သောသူသည် ဒုတိယသေခြင်း၏လက်နှင့် ကင်းလွတ်လျက်၊ ဘုရားသခင်၏ ယဇ်ပုရောဟိတ်၊ ခရစ်တော်၏ ယဇ်ပုရောဟိတ်ဖြစ်၍ အနှစ်တစ်ထောင်ပတ်လုံး ခရစ်တော်နှင့်အတူ စိုးစံရကြလိမ့်မည်။”—⁠ဗျာဒိတ် ၅:၉၊ ၁၀ ကိုလည်းကြည့်ပါ။

ဘုရင်မင်းမြတ်၏ မြေကြီးဆိုင်ရာ လက်အောက်ခံများ

လူသားအားလုံး ရှင်ဘုရင်များအဖြစ် ယဇ်ပုရောဟိတ်များအဖြစ် အုပ်ချုပ်ကြမည်မဟုတ်သည်မှာ ထင်ရှားလှသည်။ အကြောင်းမှာ၊ အားလုံးသာ ရှင်ဘုရင်များဖြစ်ကြလျှင် မည်သူတို့အပေါ် “အုပ်ချုပ်” ကြမည်နည်း။ ယေရှု၏ သစ္စာရှိတမန်တော်များကို မဏ္ဍိုင်ပြု၍ တည်ဆောက်ထားသော အထူးရွေးချယ်ခြင်းခံရသည့် ဤအုပ်စုသည် ဗျာဒိတ်အခန်းကြီး ၇၊ အခန်းငယ် ၉ မှ ၁၇ ၌ဖေါ်ပြထားသော “လူအုပ်ကြီး” နေထိုင်ရာ ကမ္ဘာ့အစိတ်အပိုင်းကို အုပ်ချုပ်ကြမည်။ ယခုအခါ ထိုသူတို့မှ သန်းပေါင်းများစွာသောသူတို့သည် ဤကမ္ဘာမြေကြီးပေါ်မှ မဖြောင့်မတ်မှုအားလုံးကို ရှင်းလင်းပစ်မည့် “အနန္တတန်ခိုးရှင် ဘုရားသခင်၏ နေ့ကြီးစစ်ပွဲ” အလျင်အမြန် ချဉ်းကပ်လာမည်ကို မျှော်လင့်စောင့်စားနေကြသည်။ သူတို့သည် ဘုရားသခင့်မခံစားထိုက်သော ကျေးဇူးတော်အားဖြင့် လုံးဝသေစရာမလိုဘဲ ကြီးစွာသောဒုက္ခကို အရှင်လတ်လတ် ကပ်ကျော်ကြလိမ့်မည်။—⁠ဗျာဒိတ် ၁၆:၁၄; ၂၁:၁၄။ သု၊၂:၂၁၊ ၂၂။

‘ဒါပေမယ့်၊ သေသွားတဲ့လူတွေကျတော့ကော။ ကျွန်တော်ချစ်ခင်တဲ့ သူတွေလိုလူတွေကော’ ဟူ၍ သင်မေးပေမည်။ အခြားသူတို့သည် “သေလွန်သော်လည်း ရှင်လိမ့်မည်” ဟု ယေရှုကိုယ်တော်တိုင် မာသအားမိန့်တော်မူခဲ့၏။ (ယောဟန် ၁၁:၂၅) မြေကြီးဆိုင်ရာ ထမြောက်ရာကာလ၌ ထိုသို့ဖြစ်လာလိမ့်မည်။ ခရစ်တော်နှင့်အတူ တွဲဖက်ရှင်ဘုရင်များနှင့် ယဇ်ပုရောဟိတ်များ ၁၄၄၀၀၀ ကောင်းကင်ဘုံမှ အုပ်ချုပ်မည့် ကာလအတွင်း ဘုရားသခင်အောက်မေ့ခြင်းခံရသော သေလွန်သူ သန်းပေါင်းများစွာသည် ထမြောက်လာကြမည်ဖြစ်ပြီး ယေဟောဝါအား မှန်ကန်စွာကိုးကွယ်ဝတ်ပြုတတ်ရန် သင်ကြားမည့်အခွင့်အရေး အပြည့်အဝရရှိကြမည်။ သစ္စာရှိကြမည်ဆိုပါက သူတို့သည် ကမ္ဘာချီပရဒိသုတွင် ထာဝရအသက်ရှင်ခွင့်ဆုကျေးဇူးကို ရရှိကြပေမည်။ မောင်ဖြစ်သူ လာဇရု တစ်ဖန်အသက်ရှင်လာမည်ဟူသော ယေရှု၏အဆိုကို သဘောတူကြောင်း ဝန်ခံပြောဆိုစဉ်တွင် မာသရည်ညွှန်းခဲ့သော “နောက်ဆုံးသောနေ့” အတောအတွင်း၌ ထိုသို့ဖြစ်လာပေလိမ့်မည်။—⁠ယောဟန် ၅:၂၈၊ ၂၉၊ ၁၁:၂၄။ လုကာ ၂၃:⁠၄၃။

အာမခံချက်များရှိသော မျှော်လင့်ချက်

သမ္မာကျမ်းစာတွင် မှတ်တမ်းတင်ထားသော ရှင်ပြန်ထမြောက်ခြင်းအကြောင်းများသည် သန့်ရှင်းသော သမ္မာကျမ်းစာမှ ကမ်းလှမ်းထားသည့် ရှင်ပြန်ထမြောက်ခြင်းမျှော်လင့်ချက်၏ ခိုင်ခံ့ခြင်းဆိုင်ရာ ပုံစံများနှင့် အာမခံချက်များဖြစ်ကြသည်။ ယင်းမှတ်တမ်း၌ ခရစ်ယာန်ခေတ်မတိုင်မီက မြေကြီးပေါ်တွင် ပရောဖက်ဧလိယနှင့် ဧလိရှဲတို့ပြုလုပ်ခဲ့သော ရှင်ပြန်ထမြောက်ခြင်းအကြောင်း၊ (လာဇရုရှင်ပြန်ထမြောက်ခြင်းအပါအဝင်) ဘုရားသခင့်သားတော်ပြုလုပ်ခဲ့သော ရှင်ပြန်ထမြောက်ခြင်းအကြောင်း၊ တမန်တော်ပေတရုနှင့် ပေါလုတို့ပြုလုပ်ခဲ့သော ရှင်ပြန်ထမြောက်ခြင်းအကြောင်းနှင့် အထူးသဖြင့် သားတော်အား ယေဟောဝါဘုရားသခင်ရှင်ပြန်ထမြောက်စေတော်မူခြင်းအကြောင်း ပါရှိသည်။ ထိုမှတ်တမ်းများကို သင့်ကျမ်းစာ၌ ၃ ဓမ္မရာဇဝင် ၁၇:၁၇-၂၄။ ၄ ဓမ္မရာဇဝင် ၄:၃၂-၃၇။ မဿဲ ၂၈:၁-၁၀။ လုကာ ၇:၁၁-၁၇၊ ၈:၄၀-၅၆။ ယောဟန် ၁၁:၃၈-၄၄။ တမန်တော် ၉:၃၆-၄၂၊ ၁၀:၃၈-၄၂၊ ၂၀:၇-၁၂ တို့တွင်ဖတ်ရှုနိုင်သည်။b

ဤသို့အလွန်ခိုင်လုံသော သက်သေအထောက်အထားရှိသည့် ရှင်ပြန်ထမြောက်ခြင်းမျှော်လင့်ချက်ကို အခြေခံ၍အာသင်မြို့သားတို့အား အောက်ပါအတိုင်း ပေါလုအာမခံနိုင်ခဲ့သည်။ “ဘုရားသခင်သည် . . . ခန့်ထားတော်မူသောသူအားဖြင့် လောကီသားတို့ကို ဖြောင့်မတ်ခြင်းတရားနှင့် ညီလျော်စွာ စစ်ကြောစီရင်မည့် နေ့ရက်ကို ချိန်းချက်တော်မူပြီ။ ထိုသူကို သေခြင်းမှ ထမြောက်စေတော်မူသောအားဖြင့် ခပ်သိမ်းသောလူတို့အား ယုံလောက်သောသက်သေကို ပြတော်မူပြီ။”—⁠တမန်တော် ၁၇:၃၀၊ ၃၁။

မှန်ပါသည်။ ယေရှုရှင်ပြန်ထမြောက်တော်မူခြင်းသည် ရှင်ပြန်ထမြောက်ရာမျှော်လင့်ချက်၏ အခြေခိုင်လုံမှုအတွက် အဆုံးစွန်သော အာမခံချက်ပင်ဖြစ်သည်။ ထိုကြောင့် ကျွန်ုပ်တို့၌လည်း ယေဟောဝါဘုရားသခင်၏ တန်ခိုးတော်နှင့် မေတ္တာတော်အပေါ် အကြွင်းမဲ့ယုံကြည်စိတ်ချနိုင်သည့် ခိုင်ခံ့မြဲမြံသော အခြေအမြစ်တစ်ခုရှိထားပေသည်။ မာသထုတ်ဖေါ်ပြောဆိုခဲ့သကဲ့သို့ ကျွန်ုပ်တို့လည်း ‘နောက်ဆုံးသောနေ့တည်းဟူသော ထမြောက်ရာကာလ၌ လူသေတို့သည် ထမြောက်လိမ့်မည်ကို ကျွန်ုပ်တို့သိပါသည်’ ဟု ယုံကြည်ချက်အပြည့်ဖြင့် ထုတ်ဖေါ်ပြောဆိုနိုင်ကြသည်။

အာရေတောင်ကုန်းပေါ်ရှိ ပေါလု၏တရားနာပရိသတ်တို့သည် “သေသောသူတို့၏ ထမြောက်ခြင်းအကြောင်း” သက်သေခံထွက်ဆိုချက်ကို ကြားနာပြီးနောက် အုပ်စုသုံးစုကွဲသွားကြသည်။ “အချို့တို့သည် ကဲ့ရဲ့ကြ၏။ အချို့တို့က ‘ဤအမှုမှာ သင်၏စကားကို ငါတို့သည် နောက်တစ်ဖန်နားထောင်ဦးမည်’ ဟုဆိုကြ၏။ . . . လူအချို့သည် ပေါလု၌ မှီဝဲဆည်းကပ်၍ ယုံကြည်ခြင်းသို့ရောက်ကြ၏။”—⁠တမန်တော် ၁၇:၃၂-၃၄။

ရှင်ပြန်ထမြောက်ခြင်း မျှော်လင့်ချက်နှင့်ပတ်သက်၍ သင်၏တုံ့ပြန်မှု မည်သို့ရှိသနည်း။ လူသန်းပေါင်းများစွာသာမက ကုဋေပေါင်းများစွာကို သေရာမှ ရှင်ပြန်ထမြောက်စေတော်မူမည်ဟူသော ကတိတော်ကို ယေဟောဝါစောင့်ထိန်းတော်မူမည်။ ထိုနေရာတွင် သူတို့ကို တွေ့ဆုံရန် သူတို့က သင့်ကိုတွေ့ရန်ဆိုသည်မှာ သင့်လုပ်ဆောင်မှုအပေါ် များစွာမူတည်နေပါသည်။ ထာဝရအသက်ရရှိရေးအတွက် ဘုရားသခင့်တောင်းဆိုချက် စည်းကမ်းများအကြောင်း သင်ယူ၍ ထိုအတိုင်း ညီညွတ်အောင်နေထိုင်ရန် ဆန္ဒရှိပါသလော။ သေလွန်သူတို့အတွက် မျှော်လင့်ချက်အကြောင်းနှင့် ဤအစီအစဉ်စနစ်၏ အဆုံးကို သင်မည်ကဲ့သို့ ကပ်ကျော်နိုင်သည့်အကြောင်း သင့်အား ဤထက်မကပြောပြရန် ယေဟောဝါသက်သေများ အလွန်နှစ်ထောင်းအားရရှိကြပါသည်။—⁠ယောဟန် ၁၇:⁠၃။

[အောက်ခြေမှတ်ချက်များ]