စာရှုသူများထံမှမေးခွန်းလွှာ

▪ ယုဒအမျိုးသမီးဧသတာသည် ပါးရှားဘုရင်မျက်နှာသာတော်နှင့်အခွင့်အရေးများရရှိရန် ရှင်ဘုရင်နှင့်မတရားမေထုန် မှီဝဲခဲ့ပါသလော။

အချို့သူများက လောကီရာဇဝင်မှတ်တမ်းများကိုမှီး၍ ဤသို့ကောက်ချက်ချကြပေမည်။ သို့ရာတွင် သမ္မာကျမ်းစာမှယုံကြည်စိတ်ချရသောမှတ်တမ်းက ဤယူဆချက်နှင့်ဆန့်ကျင်ဘက် ဖြစ်နေပေသည်။

ဂျူးသမိုင်းဆရာ ဖလေးဗီးယာစ်ဂျိုစီဖတ်စ်က ပါးရှားမိဖုရားဝါရှတိသည် လင်တော်မောင်အာရွှေရုရှေ့တော်မှောက်သို့ အခစားဝင်ရန်ငြင်းပယ်ခဲ့ကြောင်း သမိုင်းမှတ်တမ်းရေးသားထားသည်။ ထို့ကြောင့်ယင်းရှင်ဘုရင်မှာ ဘီစီအီး ငါးရာစုမှပထမဇာဇက်စ်ဖြစ်ကြောင်းထင်ရှားသည်။ အမျက်တော်ထွက်၍ ဝါရှတိအားမိဖုရားအရာမှပယ်ရှား၍ မိဖုရားတစ်ပါးကိုအင်ပါယာတစ်ဝန်းမှ ရွေးကောက်တင်မြှောက်ရန် သဘောတူလိုက်သည်။ သို့နှင့်ချောမောလှပသော အပျိုကညာများကိုစုရုံး၍ အချိန်ကြာမြင့်စွာအလှပြုပြင်ပေးသည်။

“ယင်းနောက်၊ အပျိုကညာတို့အားလိုလေသေးမရှိ ဂရုစိုက်ပြုပြင်ပြီး၍ . . . ရှင်ဘုရင်စက်တော်ခေါ်ရာ ညောင်စောင်းသလွန်သို့ ချဉ်းကပ်ရန်သင့်တော်ပြီဟု [ဘုရင့်မိန်းမစိုးက] ယူဆသောအခါ သူသည်ရှင်ဘုရင်နှင့်အိပ်စက်ရန် နေ့စဉ်တစ်ဦးကျဆက်သသည်။ ရှင်ဘုရင်သည်ထိုအပျိုကညာနှင့်သံဝါသပြုပြီးသည်နှင့် မိန်းမစိုးထံချက်ချင်းပင် ပြန်လွှတ်လိုက်သည်။ သို့ရာတွင်အထံတော်သို့ ဧသတာရောက်လာသောအခါ အလွန်နှစ်သက်သဘောကျသဖြင့် သူမနှင့်ချစ်တင်းနှီးနှောပြီးသော် ကြင်ရာတော်အဖြစ်ချီးမြှင့်ပြီး ထိမ်းမြားပွဲကျင်းပလေသည်။”—⁠Jewish Antiquities,အတွဲ ၆၊ ၁၈၄-၂၀၂၊ ရာလ်ဖ်မားကပ်စ်ပြန်ဆိုသည်။ (အတွဲ ၁၁၊ အခန်း ၆၊ အပိုဒ် ၁၊ ၂၊ ဝီလျံဝှစ်တန်ပြန်ဆိုချက်)

ဤသမိုင်းမှတ်တမ်းအရ အပျိုတော်တို့သည် ရှင်ဘုရင်နှင့်မတရားမေထုန်မှီဝဲကြကြောင်း၊ ဧသတာနှင့်သူတို့ ကွဲပြားခြားနားသည့် အချက်တစ်ခုတည်းမှာ သူမ၏အကျင့်ပျက်မှုကြောင့် ထိမ်းမြားမင်္ဂလာဆောင်နှင်းခြင်းနှင့် မိဖုရားခေါင်ဖြစ်လာခြင်းသာဖြစ်ကြောင်း ထင်မှတ်စေနိုင်သည်။ သို့သော်လည်း၊ သမ္မာကျမ်းစာသည် ပို၍တိကျမှန်ကန်၍ ပို၍ကျေနပ်ဖွယ်ကောင်းသော အချက်အလက်များကို တင်ပြထားသည်။

အလှပြုပြင်မှုအကြောင်းဖော်ပြပြီးနောက် သမ္မာကျမ်းစာက အောက်ပါအတိုင်းဆို၏။ “ထိုနောက်မှအပျိုတော် [တစ်ယောက်ချင်း] သည်ရှင်ဘုရင်ထံသို့ဝင် [ကြ၏]။ . . . ညဦးအချိန်၌ဝင်၍ နံနက်အချိန်၌ နန်းတော်မိန်းမစိုး၊ မောင်းမမိဿံအုပ်၊ ရှာရှဂါဇစောင့်သော ဒုတိယမိန်းမဆောင်သို့ ပြန်ရ၏။ ရှင်ဘုရင်ချစ်၍ နာမည်အားဖြင့်ခေါ်တော်မမူလျှင် နောက်တစ်ဖန်အထံတော်သို့မဝင်ရ။”—⁠ဧသတာ ၂:၁၃၊ ၁၄။

ဧသတာသည်ညွှန်ကြားချက်အတိုင်း အချိန်ရှည်လျားသည့် အလှပြုပြင်မှုခံယူရန် “အပျိုတော်နန်း” သို့ “ခေါ်ဆောင်” သွားခံရကြောင်း ကျမ်းစာဆိုသည်။ ထိုနောက် “ဧသတာကိုနန်းတော်၌ သိမ်းတော်မူပြီးလျှင် အခြားကညာအပေါင်းတို့ထက် ဧသတာသည်စိတ်တော်ကိုနူးညွတ်စေ၍ အထံတော်၌မျက်နှာရသဖြင့် ရှင်ဘုရင်သည်အခြားမိန်းမတကာတို့ကိုချစ်သည်ထက် ဧသတာကိုသာ၍ချစ်သောကြောင့် သူ့ခေါင်းပေါ်မှာ ရာဇသရဖူကိုတင်၍ မိဖုရားဝါရှတိအရာ၌ ချီးမြှောက်တော်မူ၏။”—⁠ဧသတာ ၂:၈၊ ၉၊ ၁၆၊ ၁၇။

အပျိုတော်တို့သည် ရှင်ဘုရင်နှင့်တစ်ညအိပ်စက်ပြီးနောက် မည်သည့်နေရာသို့ပြန်ရကြောင်း သမ္မာကျမ်းစာမှတ်တမ်း၌ သင်သတိပြုမိသလော။ ‘မောင်းမမိဿံအုပ်၊ ရှာရှဂါဇအုပ်စောင့်သော ဒုတိယမိန်းမနန်းသို့ပြန်ရ၏။’ ထို့ကြောင့်သူတို့သည် မောင်းမမိဿံများဖြစ်လာကြသည်။ သမ္မာကျမ်းစာမှ ဧသတာကျမ်းကိုရေးသားသူမော်ဒကဲသည် ဟေဗြဲတစ်ဦးဖြစ်ပြီး ထိုစဉ်အခါကသူ့လူမျိုးတွင် မယားငယ်သည်ဒုတိယမယားဖြစ်သော လူမှုရေးအဆင့်အတန်းရှိပေသည်။ ပညတ်တရားတော်အရ ဣသရေလအမျိုးသားတစ်ဦးသည် စစ်ပွဲတွင်ဖမ်းဆီးရမိသော နိုင်ငံခြားမိန်းကလေးတစ်ဦးကို သိမ်းပိုက်နိုင်ခွင့်ရှိပြီး၊ သူမသည်လည်း အခွင့်အရေးများနှင့်တရားဥပဒေအရ အကာအကွယ်ရပိုင်သည့်မယားငယ် သို့မဟုတ် ဒုတိယမယားဖြစ်ခွင့်ရှိသည်။ (တရားဟောရာ ၂၁:၁၀-၁၇။ ထွက်မြောက်ရာ ၂၁:၇-၁၁ နှင့်နှိုင်းယှဉ်) ထိုသို့သောတရားဝင်မယားငယ်တစ်ဦး မွေးဖွားသည့်ကလေးတို့သည် တရားဝင်သားသမီးများဖြစ်သည့်ပြင် အမွေဆက်ခံပိုင်ခွင့်လည်းရှိသည်။ ဣသရေလလူမျိုး ၁၂ နွယ်တို့၏ဘိုးဘေးများဖြစ်သော ယာကုပ်၏သား ၁၂ ယောက်မှာမယားနှစ်ယောက်နှင့် တရားဝင်မယားငယ်တို့မှ မွေးဖွားလာကြသူများဖြစ်ကြသည်။—⁠ကမ္ဘာဦး ၃၀:၃-၁၃။

လုပ်ထုံးလုပ်နည်းအရ အပျိုတော်တို့သည် ပါးရှားရှင်ဘုရင်နှင့်ပေါင်းသင်းပြီးနောက် မောင်းမမိဿံနန်းဆောင်သို့ ပြန်ကြရသည်။ ဒုတိယမိဖုရား ဖြစ်လာသည့်သဘောပင်ဖြစ်သည်။

ဧသတာကောမည်သို့နည်း။ သူမသည်ရှင်ဘုရင်နှင့်အိပ်ပြီးမှ မျက်နှာသာရသည်ဟု သမ္မာကျမ်းစာမဆိုပေ။ မောင်းမမိဿံနန်းဆောင်သို့ ပြန်ရသည်ဟုလည်းမဆိုပဲ “ရှင်ဘုရင်အာရွှေရု . . . ၏အဆောင်တော်သို့ ဧသတာကိုသွင်းဆက်သောအခါ ရှင်ဘုရင်သည်မိန်းမတကာတို့ထက် ဧသတာကိုသာ၍ချစ်၏” ဟုသာရိုးရိုးလေးဆိုထားသည်။ ယင်းအချိန်မတိုင်မီက သူမသည်သန့်ရှင်းဖြူစင်သော အပျိုရည်အပျက်ခံစရာမလိုဘဲနှင့် “မိန်းမစိုးဟေဂဲ” ၏ “စိတ်နှင့်တွေ့၍မျက်နှာရ” ခဲ့သည်ကိုသတိရပါ။ ထိုမျှမက “ဧသတာကိုတွေ့မြင်သမျှသောသူတို့သည် ချစ်တတ်ကြ၏။” (ဧသတာ ၂:၈၊ ၉၊ ၁၅-၁၇) ထို့ကြောင့်ဧသတာသည်အခြားသူတို့၏လေးစားမှုကိုခံရသကဲ့သို့ပင် ရှင်ဘုရင်၏စိတ်တော်ကို နူးညွတ်စေ၍လေးစားမှုခံရသည်မှာ ရှင်းပေသည်။

ကျွန်ုပ်တို့အတွက် သမ္မာကျမ်းစာဖော်ပြပေးသည့်အချက်များနှင့် ယင်းတို့ကိုထိုးထွင်းသိမြင်နိုင်ခွင့်အတွက် ကျွန်ုပ်တို့မည်မျှကျေးဇူးတင်စရာ ကောင်းပါသည်တကား။ တကယ့်အဖြစ်အပျက်နှင့်နှစ်ထောင်ပေါင်းများစွာ အလှမ်းကွာနေစေကာမူ ဧသတာသည်ဘုရားရေးရာကျင့်စဉ်နှင့်အညီ သီလသန့်ရှင်းဖြူစင်စွာ ပြုမူကျင့်ကြံခဲ့ကြောင်း ကျွန်ုပ်တို့စိတ်ချယုံကြည်နိုင်စရာအကြောင်းရှိပေသည်။