ကြွယ်ဝသောတိုင်းပြည်သို့ ပြောင်းရွှေ့ရာ၌ အကြောင်းခြင်းရာအရပ်ရပ်ကို စဉ်စားချင့်ချိန်ခြင်း

ဤ မြင်ကွင်းမှာ ဖွံ့ဖြိုးဆဲနိုင်ငံများရှိ ကောင်စစ်ဝန်ရုံးများ၌ တွေ့နေကျမြင်ကွင်းတစ်ရပ်ဖြစ်သည်။ စောင့်ဆိုင်းနေရန် အခန်းတစ်ခန်းတွင် မိမိတို့၏တွေ့ဆုံမေးမြန်းမည့်အချိန်ကို တုန်တုန်ရီရီနှင့်သည်းခံစိတ်ရှည်စွာ စောင့်နေသူတို့နှင့် ပြည့်ကျပ်နေခြင်းဖြစ်သည်။ တိုတောင်းသော်လည်း အရေးကြီးသည့် ထိုဆွေးနွေးမှုပေါ်အခြေပြု၍ အနောက်စက်မှုနိုင်ငံတစ်နိုင်ငံသို့ ပြည်ဝင်ခွင့်ဗီဇာ ရနိုင်မရနိုင် အဆုံးအဖြတ်ပေးမည်ဖြစ်သည်။ အများသောသူတို့က ၄င်းကိုချမ်းသာကြွယ်ဝရာသို့ သွားရာလက်မှတ်အဖြစ် ယုံကြည်ကြသည်။ “ကျွန်တော်ကြိုးစားပမ်းစားအလုပ်လုပ်ခဲ့တာ လေးနှစ်ရှိပြီ။ ဒါတောင်မှ ရေဒီယိုလေးတစ်လုံးတောင် မဝယ်နိုင်ဘူး” ဟူ၍အနောက်အာဖရိကမှ လူငယ်လေးတစ်ယောက်က ညည်းညူမြည်တမ်းခဲ့သည်။ “ကျွန်တော်သာ အင်္ဂလန်တို့၊ အမေရိကန်တို့မှာသာရှိယင် ခုလောက်ဆို ကိုယ်ပိုင်ကား၊ ကိုယ်ပိုင်အိမ်တောင်ရှိနေရောပေါ့။”

ဆင်းရဲသောဖွံ့ဖြိုးဆဲနိုင်ငံများ၌ရှိသော သူအများ၌ ဤသို့သောစိတ်သဘောထားမျိုး အဘယ်ကြောင့်ရှိရသည်ကို နားလည်ရမခက်ပါ။ သူတို့အဖို့ အလုပ်ရဖို့ကမလွယ်၊ ရပြန်တော့လည်း လုပ်ခကနည်းလှသည်။ ငွေကြေးဖောင်းပွမှုက စုဆောင်းငွေကို တစ်တိတိပြုန်းတီးသွားစေသည်။ အိုးအိမ်များရှားပါးပြီး ကျဉ်းကျဉ်းကျပ်ကျပ် ပြွတ်ပြွတ်သိပ်သိပ် နေထိုင်ရကြသည်။ ဝတ်ရပြန်တော့လည်း ချမ်းသာသောနိုင်ငံများမှ စွန့်ပစ်လိုက်သည့် အဟောင်းအနွမ်းများကို ဝတ်ရကြသည်။ အများသောသူတို့က စီးပွားရေးနွံအတွင်း နစ်နေသည့်ပမာ ခံစားနေကြသည်။

ကြွယ်ဝသောအနောက်နိုင်ငံများကလည်း လက်ယပ်ခေါ်နေသည်တကား။ ဆီအာရာလီအွန်နိုင်ငံ ( Sierra Leone) မှလူရွယ်တစ်ဦး ဤသို့ပြောပြသည်။ “နိုင်ငံခြားသွားပြီး ပြန်လာတဲ့သူတို့ရဲ့ပြောပြချက်အရ စက်မှုနိုင်ငံတွေကိုသွားပြီး ကိုယ်ကိုယ်တိုင်လေ့လာချင်တဲ့ စိတ်ဖြစ်ပေါ်လာတယ်။ သွားရဲတဲ့သတ္တိကိုလည်းရှိလာတယ်။ အဲ၊ အလုပ်ကိုတော့ ပင်ပင်ပန်းပန်းလုပ်ရသလားမပြောနဲ့၊ ဒါပေမယ့် ကိုယ့်ဘဝကိုယ်ရပ်တည်နိုင်ဖို့နဲ့ ကားတို့လိုဇိမ်ခံပစ္စည်းဝယ်နိုင်လောက်အောင် ငွေကတော့ ကောင်းကောင်းရနိုင်တယ်တဲ့။ ဒေါ်လာနှစ်ထောင်လောက်ပြန်ပါလာတယ်ဆိုရင် ခင်ဗျားစီးပွားရေးတစ်ခုခုလုပ်နိုင်တဲ့အပြင် အိမ်ထောင်ပြုလို့လည်းရနိုင်တယ်တဲ့။”

ဘုရားသခင်၏အစေခံအချို့ကလည်း ဤသို့ပင်တွေးကြမည်မှာ အဆန်းမဟုတ်ပေ။ အာဖရိကညီအစ်မတစ်ဦးက ဤသို့ပြောပြ၏။ “ဘုရားသခင့်အဖွဲ့အစည်းတော်ထဲမှာရှိတဲ့ ကျွန်မတို့လိုလူငယ်လူရွယ်တွေဟာ နိုင်ငံခြားရောက်နေတဲ့သူတို့ ဘယ်လောက်အဆင်ပြေနေတဲ့အကြောင်း ပြောကြဆိုကြတာကို ကြားရကြတယ်။ ဒါကြောင့်၊ တစ်ခါတလေ ကျွန်မကိုကျွန်မမေးမိတယ်။ ‘ကျွန်မကော ဘာလုပ်မလဲ၊ ဘာဖြစ်လို့ဒီမှာ ဆင်းဆင်းရဲရဲ၊ ချို့ချို့ငဲ့ငဲ့နေနေတာလဲ၊ သွားရင်ကောင်းမလား။ ဒီမှာပဲဆက်ပြီးနေရင်ကောင်းမလား။’”

အကယ်၍သင်သည် ဆင်းရဲသောနိုင်ငံတွင် နေထိုင်နေပါက အပြောင်းအရွှေ့ပြုလုပ်လိုက်လျှင် ဘဝတိုးတက်မည်ဟူ၍အလားတူ တွေးကောင်းတွေးမိပေမည်။ သို့ရာတွင် တိုင်းတစ်ပါးသို့ ပြောင်းရွှေ့ရခြင်းမှာ ကြီးမားသောအလုပ်၊ အကုန်အကျများပြီး အရေးကြီးသောခြေလှမ်းတစ်ရပ်ဖြစ်သည်။ ဘာသာစကားအသစ်ကို သင်ယူခြင်း၊ အလုပ်အကိုင်အသစ်အတွက် ကျွမ်းကျင်မှုဆည်းပူးရခြင်း၊ ယဉ်ကျေးမှုအသစ်တစ်မျိုးနှင့်အံကျအောင် အလိုက်အထိုက်ပြုပြင်ရခြင်း၊ နိုင်ငံခြားသားများအပေါ် ထားရှိဖွယ်ရှိသည့် ငဲ့ကွက်မှုကိုသည်းခံရခြင်း လုံးလုံးကွဲပြားသည့် လူနေမှုစနစ်နှင့် ဝင်ဆန့်အောင် သင်ယူခြင်းတို့ အကျုံးဝင်ကောင်းဝင်မည်။ သို့တစေ ခရစ်ယာန်အများတို့သည် ထိုသို့အောင်မြင်စွာလုပ်ဆောင်နိုင်ခဲ့သည့်ပြင် ရောက်ရှိရာနယ်မြေတွင် စံပြကြေညာသူများ၊ ရှေ့ဆောင်များ၊ အကြီးအကဲများနှင့်ဓမ္မအမှုထမ်းများအဖြစ် အမှုတော်ဆောင်ခြင်းအားဖြင့် အသင်းတော်အတွက် တကယ့်ကို အကျိုးပြုသူများဖြစ်ခဲ့ကြသည်။

သို့သော် အားလုံးဤသို့အဆင်ပြေကြသည်ကား မဟုတ်ပေ။ တိုင်းတစ်ပါးသို့ပြောင်းရွှေ့ရာမှ ဖြစ်ပေါ်လာသည့် ပင်ပန်းဆင်းရဲကြပ်တည်းမှုတို့ကြောင့် အချို့သူများ ဝိညာဉ်ရေးပျက်စီးသွားခဲ့ကြသည်။ ထို့ကြောင့် အလေးအနက်ထားပြီး ဆုတောင်း၍မစဉ်းစားဘဲနှင့် ထိုသို့ပြောင်းရွှေ့ခြင်းမပြုသင့်သည်မှာ ထင်ရှားလှသည်။ သု၊ ၃:၅၊ ၆ ၌သမ္မာကျမ်းစာက ဤသို့သြဝါဒပေးထားသည်။ “ထာဝရဘုရား [ယေဟောဝါ၊ NW] ကိုစိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကို အမှီမပြုနှင့်။ သွားလေရာရာ၌ ထာဝရဘုရား [ယေဟောဝါ၊ NW] ကိုမျက်မှောက်ပြုလော့။ သို့ပြုလျှင်၊ သင်၏လမ်းခရီးတို့ကို ပဲ့ပြင်တော်မူမည်။” ယေဟောဝါ၏အလိုတော်နှင့်အညီ ပြုမူလုပ်ဆောင်နေကြောင်း သေချာအောင်ပြုလုပ်လိုသောဆန္ဒ သင်၌မုချရှိပေမည်။ (ယာကုပ် ၄:၁၃-၁၅) တရားနာပရိသတ်တို့အား ‘ကုန်ကျစရိတ်ကို ချင့်တွက်’ ရန်ယေရှုအားပေးတော်မူခဲ့စဉ်က သင့်အတွက် အထောက်အကူဖြစ်မည့် လက်တွေ့ကျသောအကြံဉာဏ်ကို ကိုယ်တော်ပေးတော်မူခဲ့သည်။ (လုကာ ၁၄:၂၈) ငွေရေးကြေးရေးကုန်ကျစရိတ်လောက်သာမက ပြောင်းရွှေ့ရာမှဖြစ်ပေါ်လာဖွယ်ရှိနိုင်သော ဝိညာဏကုန်ကျစရိတ်ကိုပါ ထည့်သွင်းဖို့လိုသည့်သဘောဖြစ်သည်။

နိုင်ငံခြားတွင်ရှိသော ဘဝသရုပ်မှန်

မည်သည့်နေရာသို့မျှ ပြောင်းရွှေ့ခြင်းမပြုမီ ရှေ့ဦးစွာ မိမိရောက်ရှိသွားသောအခါ မျှော်လင့်ထားရမည့်အရာများနှင့်ပတ်သက်၍ သဘာဝကျသည့်စိတ်ကူးကောင်း ရှိထားသင့်သည်။ ဖြစ်နိုင်ပါက အခြေအနေမည်သို့ရှိသည်ကို ကိုယ်ကိုယ်တိုင်သွား၍ ကြိုတင်လေ့လာကြည့်ပါ။ သို့မဟုတ်ပါက သင်သည် တစ်ဆင့်ပြောစကားကိုသာ အားထားရမည်ဖြစ်သည်။ “ဉာဏ်တိမ်သောသူသည် သူတစ်ပါးပြောသမျှကို ယုံတတ်၏။ ပညာသတိရှိသောသူမူကား မိမိသွားရာလမ်းကို စေ့စေ့ကြည့်ရှုတတ်၏” ဟူ၍သမ္မာကျမ်းစာသတိပေးထားသည်။—သု၊ ၁၄:၁၅။

အချို့သူများသည် အနောက်နိုင်ငံများ၌ရှိသောဘဝနှင့်ပတ်သက်သော သတင်းအချက်အလက်မှန်သမျှကို ရုပ်ရှင်နှင့်ရုပ်မြင်သံကြားဇာတ်လမ်းများမှ ရရှိကြသည်။ သို့နှင့် ထိုနိုင်ငံများ၌ရှိသောလူတိုင်းသည် ချမ်းသာကြသည်၊ ကားအသစ်ကိုစီးကြသည်၊ စည်းစိမ်ရှိသောနေအိမ်၌ နေကြသည်ဟူ၍ ထင်မှတ်ယုံကြည်ပေမည်။ သို့သော် တကယ့်ဘဝမှန်ကား ကွာခြားလှပါသည်။ ကြွယ်ဝသောနိုင်ငံအများတွင် ဆင်းရဲခြင်း၊ အိုးအိမ်မဲ့ခြင်းနှင့်အလုပ်လက်မဲ့ဖြစ်ခြင်းတို့မှာ ထိတ်လန့်ဖွယ်ကောင်းသောအခြေအနေ၌ရှိကြသည်။ ဆင်းရဲသောနိုင်ငံတစ်နိုင်ငံရှိ အမေရိကန်သံရုံးမှ ကောင်စစ်ဝန်အရာရှိတစ်ဦးက အောက်ပါအတိုင်းရှင်းပြသည်။ “အမေရိကန်ပြည်မှာ အမြဲတမ်းနေထိုင်ဖို့ ဘယ်လောက်ခက်တယ်ဆိုတာကို လူတွေမသိကြဘူး။ တချို့က သူတို့ဘယ်လောက်အဆင်ပြေနေတယ်၊ ကားနှစ်စီးအိမ်တစ်ဆောင် ဘယ်လိုဝယ်နိုင်တယ်ဆိုပြီး အိမ်ကိုစာရေးပြီးပြောပြနေပေမယ့်လို့ တကယ်တမ်းကျတော့ သူတို့တွေ တကယ့်ကိုရုန်းကန်လှုပ်ရှားနေရကြတယ်။”

အခြားဒေသများ၌လည်း အခြေအနေမှာ အလားတူပင်ဖြစ်သည်။ မစ္စတာဆာရ်ဆိုရီသည် လန်ဒန်တွင်နေထိုင်၍ ပညာလေ့လာဆည်းပူးနေသည့် အနောက်အာဖရိက ပညာရေးဝန်ထမ်းတစ်ဦးဖြစ်သည်။ သူကဤသို့ထင်မြင်ချက် ထုတ်ဖေါ်ပြောပြသည်။ “အင်္ဂလန်နိုင်ငံမှာ အခြေချဖို့ အာဖရိကတိုက်ကနေ ပြောင်းရွှေ့လာရတာ မလွယ်ပါဘူး။ ပြောင်းရွှေ့လာသူအများအပြားဟာ ဆင်းဆင်းရဲရဲနေရကြတယ်။ သူတို့ရဲ့မျက်နှာပေါ်မှာ ဆင်းရဲဒုက္ခရဲ့ဒဏ်ရာဒဏ်ချက်အစင်းကြောင်းတွေကို တွေ့ရတယ်။ တချို့ဆိုရင် ဖုန်းဆက်ဖို့ပဲနိ ၂၀ ရဖို့တောင်အနိုင်နိုင်။ သူတို့တွေဟာ များသောအားဖြင့် အနွေးဓာတ်ပေးတဲ့ကိရိယာလေးတစ်လုံးလောက်သာ တပ်ဆင်ထားတဲ့အခန်းတစ်ခန်းထဲမှာ တစ်ခြားလူတွေနဲ့စုပေါင်းပြီး နေကြရတယ်။ သူတို့ဟာ လက်လုပ်လက်စားအလုပ်လောက်သာရရှိနိုင်ပြီး ပေးစရာငွေစာရင်းအတွက်တောင် အနိုင်နိုင်။ ဆင်းရဲတွင်းကလွတ်မြောက်ဖို့ဆိုပြီး အာဖရိကတိုက်ကထွက်ခွာလာခဲ့ကြသူတွေဟာ များသောအားဖြင့် ဥရောပတိုက်ရဲ့ ညစ်ပတ်ပေကျံပြီး အိမ်ခြေပြွတ်သိပ်နေတဲ့ဆင်းရဲသားရပ်ကွက်တွေမှာ ရောက်နေကြတာကိုတွေ့ရကြတယ်။”

နေရာသစ်တစ်ခုမှာ အမြဲနေထိုင်ဖို့ ကြိုးစားခြင်းနှင့်အတူ ဒွန်တွဲလိုက်ပါလာသည့် ငွေရေးကြေးရေးအကျပ်အတည်းသည် လူတစ်ဦး၏ဝိညာဉ်ရေးကို အလွယ်တကူဟန့်တားမှုပြုနိုင်သည်။ (မဿဲ ၁၃:၂၂) သမ္မာကျမ်းစာ၌ အားထုတ်ကြိုးပမ်းခြင်းကို ထောက်ခံထားသည်မှာ မှန်ပါသည်။ (သု၊ ၁၀:၄။ ၁၃:၄) သို့သော် နိုင်ငံရပ်ခြားသို့ရောက်သွားကြသူအများမှာ ငွေနှင့်ပတ်သက်၍ သူတို့ထားရှိသည့် ပန်းတိုင်ရောက်ရှိရေးအတွက်သော်လည်းကောင်း၊ အသုံးစရိတ်ကာမိရေးအတွက်သော်လည်းကောင်း အလုပ်နှစ်ခုသုံးခုကိုမလုပ်မဖြစ် လုပ်ရကြသည်။ ဘုရားသခင်ကိုကိုးကွယ်ရန် အချိန်မကျန်သလောက်ဖြစ်သွားသည်။ ခရစ်ယာန်စည်းဝေးများ၊ ကျမ်းစာလေ့လာမှု၊ သူတစ်ပါးအား ကျမ်းစာသမ္မာတရားဝေမျှခြင်းတို့ကို လျစ်လျူရှုလာသည်။ “သင်တို့သည် ဘုရားသခင်၏အစေကိုလည်းကောင်း၊ လောကီစည်းစိမ်၏အစေကိုလည်းကောင်း မခံနိုင်ကြ” ဟူ၍ယေရှုမိန့်တော်မူသည့်စကားသည် သွေးထွက်အောင်မှန်ကန်လှပေသည်။—မဿဲ ၆:၂၄။

စာရိတ္တဖိအားများ

သင်သွားရောက်မည့် တိုင်းပြည်မှလူတို့၏စာရိတ္တအခြေအနေကိုလည်း ထည့်သွင်းစဉ်းစားသင့်ပေသည်။ လောတသည် ယောဒန်ခရိုင်၌ အခြေချနေထိုင်ရန် ရွေးချယ်ခဲ့ကြောင်း သမ္မာကျမ်းစာကဆို၏။ ရုပ်ပစ္စည်းပိုင်းအရကြည့်လျှင် သူ့ဆုံးဖြတ်ချက်သည် အမြော်အမြင်ရှိသည်ဟုထင်ရသည်။ အဘယ်ကြောင့်ဆိုသော် ထိုဒေသသည် “အရပ်ရပ်၌ ရေများ၍ ထာဝရဘုရား [ယေဟောဝါ၊ NW] ၏ဥယျာဉ်တော်ကဲ့သို့ . . . ဖြစ်” သောကြောင့်တည်း။ (ကမ္ဘာဦး ၁၃:၁၀) သို့ရာတွင် လောတ၏အိမ်နီးချင်းအသစ်တို့မှာ “ထာဝရဘုရား [ယေဟောဝါ၊ NW] ရှေ့၌အလွန်အပြစ်များသောသူ၊” ဖိုမစာရိတ္တဖောက်ပြန်ကြသူများဖြစ်ကြသည်။ (ကမ္ဘာဦး ၁၃:၁၃) “ထိုဖြောင့်မတ်သောသူသည် မတရားသောသူတို့တွင်နေစဉ်အခါ သူတို့၏မတရားသောအမှုများကို နေ့တိုင်းမပြတ် မျက်စိမြင်လျက်၊ နားကြားလျက်ရှိသဖြင့် မိမိဖြောင့်မတ်သောစိတ်နှလုံးကို ပြင်းစွာညှဉ်းဆဲရ” ခြင်းသာအဖတ်တင်သည်။—၂ ပေတရု ၂:၈။

ထိုနည်းတူ ယခုခေတ်တွင် အနောက်နိုင်ငံများသို့ရွှေ့ပြောင်းခြင်းသည် သင့်နိုင်ငံ၌ခံရသောစာရိတ္တဖိအားထက် ပိုမိုပြင်းထန်သည့်စာရိတ္တဖိအားများကို သင်နှင့်သင့်မိသားစု ခံရဖွယ်ရှိနိုင်သည်။ ၄င်းပြင် သင့်တိုင်းပြည်၌ကဲ့သို့ သက်ကြီးရွယ်အိုများသည် ရိုသေခြင်းခံရချင်မှ ခံရပေမည်။ အိမ်နီးနားချင်းတို့ကလည်း ဘာသိဘာသာနေကောင်းနေကြမည်။ ထိုသို့သောဖိအားတို့သည် သင်နှင့်သင့်မိသားစုကို မည်သို့ထိခိုက်မည်နည်း။ ဤကား ဆုတောင်းလျက် အလေးအနက်စဉ်းစားသင့်သောအချက်ဖြစ်သည်။

အဝေးရောက်မိဘများ

အချို့မိဘတို့သည် မိသားစုကိုထား၍ တစ်ဦးတည်း နိုင်ငံရပ်ခြားသို့သွားရန် ရွေးချယ်ကြသည်။ သူတို့၏အစီအစဉ်မှာ အခြေကျသည်နှင့် မိသားစုကိုခေါ်ယူရန် သို့မဟုတ် ငွေအမြောက်အမြားနှင့်အိမ်ပြန်လာရန်ပင်ဖြစ်သည်။ ဤသို့သောအစီအစဉ်မျိုးသည် ဉာဏ်အမြော်အမြင်ရှိသောအစီအစဉ်ဖြစ်ပါသလော။

မိသားစုအား စားဝတ်နေရေးထောက်ပံ့ရန် မိဘဖြစ်သူတို့ကို ကျမ်းစာကတာဝန်ပေးထားသည်ဖြစ်ရာ အချို့မလွဲမရှောင်သာသည့်ကိစ္စများ၌ မိဘဖြစ်သူတို့သည် ထိုသို့ထောက်ပံ့ရန်အတွက် နိုင်ငံရပ်ခြားသို့သွားရောက်အလုပ်လုပ်ရန်မှတစ်ပါး ရွေးစရာအခွင့်အလမ်းသိပ်မရှိဘဲဖြစ်ကောင်းဖြစ်နိုင်သည်။ (၁ တိမောသေ ၅:၈) သို့ဖြစ်လင့်ကစား၊ မိဘတို့သည် မိသားစုတို့၏ဝိညာဉ်ရေးလိုအပ်ရာများကို စောင့်ရှောက်ပေးရန် တာဝန်ရှိသည်။ ဘုရားသခင့်နှုတ်ကပါဌ်တော်က ဤသို့မှာထား၏။ “အဘတို့၊ ကိုယ်သားသမီးကို စိတ်ဆိုးစေခြင်းငှာ မပြုကြနှင့်။ ယေဟောဝါ၏ပဲ့ပြင်ဆုံးမခြင်းနှင့် စိတ်သဘောတော်ဆိုင်ရာ စည်းမျဉ်းဥပဒေအရ သူတို့ကို မွေးမြူကြလော့။”—ဧဖက် ၆:၄။

ဖခင်ဖြစ်သူအနေဖြင့် တစ်ကြိမ်လျှင် လနှင့်ချီ၍ သို့မဟုတ် နှစ်နှင့်ချီ၍ ခရီးထွက်နေလျှင် ဤသို့ထိထိရောက်ရောက် ဆောင်ရွက်နိုင်ပါမည်လော။ ဆောင်ရွက်နိုင်မည့် ပုံမပေါ်ပေ။ ထို့ကြောင့် ရရှိသည့်ရုပ်ပိုင်းဆိုင်ရာအကျိုးကျေးဇူးများသည် သင်မရှိသဖြင့် သားသမီးများအပေါ် သက်ရောက်ဖွယ်ရှိသည့်အကျိုးကို ကာမိမကာမိစဉ်းစားသုံးသပ်ရပေမည်။ ၄င်းပြင်၊ တိုင်းတစ်ပါးသို့ပြောင်းရွှေ့သွားသူတို့သည် ထင်ထားသကဲ့သို့ လွယ်လွယ်ကူကူနှင့် “စီးပွား” ဖြစ်မလာကြောင်း မကြာခဏတွေ့ရကြသည်။ မိသားစုအတွက် ခရီးစရိတ်မရှာနိုင်ပါက နှစ်နှင့်ချီ၍ခွဲနေရကောင်းခွဲနေရပေမည်။ ဤသည်က ကြီးလေးသည့်စာရိတ္တအန္တရာယ်ကို ထပ်၍ဖြစ်ပေါ်စေနိုင်သည်။ (၁ ကောရိန္သု ၇:၁-၅ နှင့်နှိုင်းယှဉ်။) ဝမ်းနည်းစရာကား၊ ထိုသို့ခက်ခဲကြပ်တည်းသောအခြေအနေမျိုး၌ရောက်နေသူအချို့သည် လိင်စာရိတ္တပျက်ပြားမှု၏သွေးဆောင်မှုကို အညံ့ခံခဲ့ကြခြင်းဖြစ်သည်။

ဘုရားသခင်ပြင်ဆင်ပေးရာများကို ယုံကြည်စိတ်ချပါ

ကမ္ဘာ့စီးပွားရေးအခြေအနေဆုတ်ယုတ်လာသည်နှင့်အမျှ ဘုရားသခင့်အစေခံတို့အနေဖြင့် စွန့်ပစ်ခံရမည်ကိုစိုးရိမ်စရာမလိုကြောင်း သတိရနေဖို့ကောင်းသည်။ “ဘုရားသခင်၏နိုင်ငံတော်နှင့်ဖြောင့်မတ်ခြင်းတရားကို ရှေ့ဦးစွာရှာကြလော့။ နောက်မှ ထိုအရာများကို ထပ်၍ပေးတော်မူလတံ့။ ထိုကြောင့် နက်ဖြန်အဖို့ မစိုးရိမ်ကြနှင့်။ နက်ဖြန်နေ့သည် မိမိအဖို့ စိုးရိမ်လိမ့်မည်။ ယခုနေ့၌ရှိသော မကောင်းမသင့်သောအရာသည် ယခုနေ့ဖို့လောက်ပေ၏” ဟူ၍ ယေရှုမိန့်မှာတော်မူခဲ့သည်။—မဿဲ ၆:၃၁-၃၃။

ယနေ့ယေဟောဝါသက်သေများသည် သတင်းကောင်းကို စိတ်အားထက်သန်စွာ ကြွေးကြော်ခြင်းအားဖြင့် ဘုရားသခင့်နိုင်ငံတော်၏အကျိုးစီးပွားအတွက် သယ်ပိုးထမ်းဆောင်နေကြသည်။ (မဿဲ ၂၄:၁၄။ ၂၈:၁၉၊ ၂၀) ဆင်းရဲသောနိုင်ငံအများ၌ နိုင်ငံတော်သတင်းဟောပြောသူ အကြီးအကျယ်လိုအပ်လျက်ရှိသည်။ အထူးသဖြင့် ပါရမီရင့်သောအကြီးအကဲများနှင့် ဓမ္မအမှုထမ်းများကိုလိုအပ်နေသည်။ ဤသို့သိပ်မလိုအပ်သောစီးပွားရေးအရ ကြွယ်ဝချမ်းသာသောနိုင်ငံများသို့သွားရောက်မည့်အစား အများသောသူတို့သည် မိမိတို့၏ဇာတိတိုင်းပြည်၌ပင် ဆက်လက်နေထိုင်ရန်ဆုံးဖြတ်ကြသည်။ ထိုသို့ဆုံးဖြတ်သူအချို့၏အခြေအနေ မည်ကဲ့သို့ရှိသနည်း။

မိမိ၏တိုင်းပြည်တွင် နှစ်ပေါင်း ၃၀ ရှေ့ဆောင်အဖြစ်အမှုတော်ဆောင်လာသော အနောက်အာဖရိကတိုင်းသားတစ်ဦး အယ်လက်သီယာက ဤသို့ပြောပြသည်။ “နိုင်ငံခြားမှာသွားနေဖို့ ကျွန်မအခွင့်အရေးရခဲ့တယ်။ ကျွန်မမသွားဘဲနေခဲ့ရတဲ့အကြောင်းက ကျွန်မလူမျိုး၊ ကျွန်မဆွေမျိုးတွေနဲ့အတူနေရတာကို နှစ်သက်လို့ပါပဲ။ ကျွန်မတို့အတူတူယေဟောဝါကိုဝတ်ပြုနိုင်ရအောင် သူတို့ကိုသမ္မာတရားသိလာအောင် အကူညီပေးရတာကို ကျွန်မပျော်တယ်။ ကိုယ့်တိုင်းပြည်မှာ နေခဲ့မိလို့ ကျွန်မဘာတစ်ခုမှ မဆုံးရှုံးခဲ့ပါဘူး။ ပြီးတော့ နောင်တလည်းလုံးဝမရမိပါဘူး။”

ဝင်နီဖရစ်သည်လည်း အာဖရိကနိုင်ငံတစ်နိုင်ငံတွင် နေထိုင်သူဖြစ်သည်။ ထိုနိုင်ငံ၏လူနေမှုအဆင့်အတန်းမှာ ကမ္ဘာပေါ်တွင်အနိမ့်ဆုံးအဆင့်တွင်ပါဝင်သည်။ သို့သော် အချိန်ပြည့်ရှေ့ဆောင်လုပ်ငန်းတွင် နှစ်ပေါင်း ၄၂ နှစ်ကြာ ထမ်းဆောင်ပြီးနောက် သူမကဤသို့ပြောပြသည်။ “စီးပွားရေးဘက်လုံးပန်းရတာ အမြဲတမ်းတော့မလွယ်ကူပါဘူး။ ခက်ခဲကြပ်တည်းအောင် စာတန်အမြဲဖန်တီးနေတယ်။ ဒါပေမယ့် ယေဟောဝါဟာ ကျွန်မကိုအမြဲတမ်းကြည့်ရှုစောင့်ရှောက်ပြီး ကျွန်မလိုအပ်ရာများကို အမြဲတမ်းပဲ ထောက်ပံ့ပေးခဲ့ပါတယ်။”

ရှေးခေတ်၌ အာဗြဟံအနေဖြင့် “ကတိထားတော်မူသော [ဘုရားသခင်] သည်ကတိတော်အတိုင်း တတ်နိုင်တော်မူသည်ကို စိတ်စွဲလမ်း” ခဲ့သည်။ (ရောမ ၄:၂၁) နိုင်ငံတော်အကျိုးစီးပွားကို အသက်တာတွင်ရှေ့ဦးထားမည်ဆိုလျှင် ယေဟောဝါသည် သင့်အားစောင့်ရှောက်မည်၊ ကတိတော်အတိုင်း တတ်နိုင်တော်မူသည်ကို ထိုနည်းတူသင်ယုံကြည်စိတ်ချသလော။ “[ဘုရားသခင့်] နှုတ်တော်ထွက်တရားတော်သည် ရွှေငွေအထောင်အသောင်းထက်မက၊ ကျွန်ုပ်တို့၌သာ၍ကောင်းပါ၏” ဟူ၍ရေးသားခဲ့သော ဆာလံဆရာနှင့်သင် သဘောတူပါသလော။ (ဆာလံ ၁၁၉:၇၂) သို့မဟုတ် သင်သည် တမန်တော်ပေါလုပေးခဲ့သောသြဝါဒစကားကို ပို၍ပြည့်ပြည့်ဝဝလိုက်နာကျင့်သုံးရန် လိုနေသလော။ “စားရန်၊ ဝတ်ရန်ရှိသမျှနှင့် ရောင့်ရဲလျက်နေကြကုန်အံ့” ဟူ၍ ၁ တိမောသေ ၆:၈ ၌သူရေးသားခဲ့သည်။ ပညာအမြော်အမြင်ရှိသောလုပ်ရပ်မှာ ပတ်ဝန်းကျင်အသစ်ကိုရှာခြင်းမဟုတ်ဘဲ မိမိ၏လက်ရှိပတ်ဝန်းကျင်ကို ပို၍ကောင်းအောင်၊ ပို၍အကျိုးရှိအောင်ပြုလုပ်ခြင်း မဖြစ်နိုင်သလော။

တိုင်းပြည်အများ၌ရှိသော စီးပွားရေးအခြေအနေသည် ခရစ်ယာန်များအတွက် ကြီးမားသည့်အခက်အခဲအကြပ်အတည်းဖြစ်ပေါ်စေနိုင်သည်။ သို့ဖြစ်သောကြောင့် သက်ဆိုင်ရာအချက်အလက် စုံစုံလင်လင်ကို စဉ်းစားသုံးသပ်ပြီးနောက် မိသားစုတစ်ခုက တိုင်းတစ်ပါးသို့ပြောင်းရွှေ့ရန် ဆုံးဖြတ်ခဲ့သည်ရှိသော် အခြားသူတို့အနေဖြင့် ဝေဖန်ရန်အကြောင်းမရှိပေ။ (ဂလာတိ ၆:၅) နေရစ်သူတို့အနေဖြင့် ဘုရားသခင်ပေးတော်မူသော ကောင်းချီးမင်္ဂလာများကိုခံစားယင်းနှင့် ဤစနစ်ဟောင်းဖြစ်ပေါ်စေသည့် အခက်အခဲဆင်းရဲဒုက္ခများကို ခါးစည်းခံနိုင်အောင် မစတော်မူမည့်အကြောင်း ယေဟောဝါထံဆက်လက်၍တောင်းလျှောက်နိုင်ကြသည်။ များမကြာမီ ဘုရားသခင့်နိုင်ငံတော်အောက်တွင် ဤလောက၏တရားမျှတမှုမရှိခြင်းနှင့် မတရားမှုတို့သည် အမှန်ဖြစ်အောင် တည့်မတ်ခံရမည်ဖြစ်သည်။ ထိုအခါကျမှ ဆာလံဆရာရေးသားခဲ့သည်အတိုင်း “ထာဝရဘုရား [ယေဟောဝါ၊ NW] သည်လက်တော်ကိုဖွင့်၍ အသက်ရှင်သောသတ္တဝါအပေါင်းတို့ကို ရောင့်ရဲစေတော်မူ” မည်ဖြစ်သည်။—ဆာလံ ၁၄၅:၁၆။