ဘုရားပေးလွတ်လပ်မှုကို ချစ်မြတ်နိုးသူများနှင့်စည်းဝေးခြင်း

ယေဟောဝါသက်သေများသည် နည်းအမျိုးမျိုးဖြင့် ထူးခြားရာတွင် အတုမရှိသူများဖြစ်ကြသည်။ သူတို့သာလျှင် “စင်ကြယ်သောဘာသာစကား” ပြောဆိုကြသည်။ (ဇေဖနိ ၃:၉) သူတို့သာ ယေရှုခရစ်ဖော်ပြခဲ့သော ခွဲခြားသိမြင်စေသည့် ချစ်ခြင်းမေတ္တာအမှတ်အသားရှိကြပြီး စည်းလုံးကြပါသည်။ (ယောဟန် ၁၃:၃၅) ယောဟန် ၈:၃၂ တွင်မှတ်တမ်းတင်ထားသော “သမ္မာတရားကိုလည်းသိကြသဖြင့် ထိုတရားသည် သင်တို့ကိုလွှတ်လိမ့်မည်” ဟူသည့်အတိုင်း သမ္မာတရားကြောင့်ရရှိမည်ဟု ယေရှုခရစ်ဆိုခဲ့သောလွတ်လပ်မှုကို သူတို့သာရကြသည်။

တပည့်တော်များအား ဘုရားသခင့်သားတော်ယေရှုခရစ်ဆင့်ဆိုခဲ့သော ထိုစကားများ မှန်ကန်ကြောင်းထင်ရှားပြီ။ “လွတ်လပ်မှုကိုချစ်မြတ်နိုးသူများ” ခရိုင်စည်းဝေးပွဲကြီးများ တက်ရောက်ခဲ့သူ ယေဟောဝါ၏သက်သေအားလုံးတို့သည် ထိုစကားများကို ယခင်ကထက် ယခု သာ၍တန်ဖိုးထားကြပြီ။ စည်းဝေးပွဲကြီးအစီအစဉ်က သူတို့၏လွတ်လပ်မှု ကဏ္ဍအသီးသီးကို သဘောပေါက်စေပြီး၊ ယင်းကိုမည်သို့အသုံးပြုရမည်၊ သူတို့၏လွတ်လပ်မှုနှင့်ဒွန်တွဲ၍ စာရင်းရှင်းစရာရှိကြောင်းနှင့် လွတ်လပ်သောလူမျိုး ဖြစ်ရခြင်း၏ကောင်းချီးများကို သိရှိလာပါသည်။

ဤအခန့်သင့်၊ လက်တွေ့ကျသွန်သင်ချက်များပါ စည်းဝေးပွဲကြီးများသည် မြောက်ကမ္ဘာခြမ်းရှိ ယူအက်စ်အေ၊ ကယ်လီဖိုးနီးရားပြည်နယ်၊ လော့စ်အိန်ဂျလိစ်မြို့တွင် ၁၉၉၁ ဇွန်လ ၇ ရက်၌ စတင်ခဲ့ပါသည်။ နံနက် ၁၀:၂၀ နာရီတွင် တေးသံသာတင်ဆက်ခြင်းဖြင့် အစီအစဉ်စတင်ခဲ့သည်။ နိဒါန်းဟောပြောချက်သည် ယာကုပ် ၁:၂၅ ကိုအခြေခံသည့် အလွန်ထိမိသောဟောပြောချက်ဖြစ်ခဲ့သည်။ ယေရုရှလင်ကျမ်းစာ အရ ဤသို့ဆိုသည်။ “လွတ်လပ်မှုဥပဒေမြတ်ကို စေ့စေ့ကြည့်ရှုလေ့ရှိသူသည် ယင်းကိုကြားနာပြီး မေ့လျော့မည်မဟုတ် လက်တွေ့ကျင့်သုံးခြင်းဖြင့် ပြုလေရာရာ၌ ရွှင်လန်းခြင်းရှိမည်။” ကျွန်ုပ်တို့ပုံပန်းကိုပြုပြင်ပေးရန် မှန်ကိုကြည့်ရသည့်နည်းတူ ကျွန်ုပ်တို့၏ဥပဓိရုပ်ကို မည်သည့်နေရာတွင်ပြုပြင်ပေးရန်လိုနေကြောင်းသိရှိဖို့ လွတ်လပ်မှုနှင့်ဆိုင်သော ဘုရားသခင့်စုံလင်သောပညတ်တရားကို စွဲစွဲမြဲမြဲစေ့စေ့စပ်စပ်ကြည့်ရှုရမည်။ ထိုမှန်ကို အမြဲကြည့်ရှုနေသင့်သည်။

ထိုနောက် “လွတ်လပ်မှုချစ်မြတ်နိုးသူ အသင်တို့အပေါင်းအား ကြိုဆိုပါ၏” ဟူသည့်သဘာပတိမိန့်ခွန်းကို ကြားနာခဲ့ရ၏။ ယေဟောဝါသက်သေများသည် လွတ်လပ်မှုချစ်မြတ်နိုးကြ၍ လွတ်လပ်စွာနေလိုကြ၏။ ဥပဒေကင်းမဲ့လျှင် လွတ်လပ်မှုမရှိနိုင်ဟုတင်ပြသည့် တရားရေးအာဏာပိုင်တို့၏စကားကို ဟောပြောသူကိုးကားတင်ပြပါသည်။ မှန်သည်၊ ခရစ်ယာန်များသည် ကိုယ်ကြိုက်ရာကိုပြုမူရန်မလွတ်လပ်ကြဘဲ ယေဟောဝါ၏အလိုတော်ကို ထမ်းဆောင်ရန် လွတ်လပ်ကြဖို့ဖြစ်သည်။ သူတို့၏လွတ်လပ်မှုကို အပြည့်အဝအသုံးပြုလိုကြ၏။ သို့သော် ယင်းကိုအလွဲသုံးစားပြုရန်မဟုတ်ပါ။ အထူးသဖြင့် ၁၉၁၉ ကတည်းက ယေဟောဝါသက်သေများသည် တိုး၍လွတ်လပ်လာကြသည်။ စည်းဝေးပွဲကြီးများ၏ အဓိကခေါင်းစဉ်များနှင့် ခရစ်ယာန်စာပေများပါ လွတ်လပ်မှုကိုအလေးအနက်ဖော်ပြသည့်အချက်တို့ကို ဟောပြောသူဖော်ညွှန်းခဲ့သည်။ စည်းဝေးပွဲကြီးတက်ရောက်သူအားလုံးသည် ဘုရားပေးလွတ်လပ်မှုအကြောင်း ပိုမိုသိရှိလာမည့်အပြင် ယင်းကိုမည်သို့အသုံးပြုနိုင်ကြောင်း ကြားသိကြရမည်ဖြစ်သည်။

ယင်းအခန့်သင့်စကားများကြားရပြီးနောက် စည်းဝေးပွဲကြီးကို တက်ရောက်နိုင်ခွင့်ရရှိသည့်အတွက် ဝမ်းသာကြသော လွတ်လပ်မှုချစ်မြတ်နိုးသူများအား တွေ့ဆုံမေးမြန်းခန်းများပြုလုပ်ခဲ့ပါသည်။ ရှေးဣသရေလနိုင်ငံတွင် နှစ်ပတ်လည်ပွဲတော်သုံးခုသည် ရွှင်လန်းဖွယ်အချိန်အခါများဖြစ်ခဲ့သည်နည်းတူ ယင်းစည်းဝေးကြီးများသည် ဝမ်းမြောက်ရွှင်လန်းစရာအခါသမယဖြစ်သည်။ စည်းဝေးပွဲကြီးများသည် ဝိညာဉ်ရေးဘက် အားတက်ရွှင်လန်းစရာ အခါသမယများဖြစ်ကြောင်း တွေ့ဆုံမေးမြန်းခန်းများစွာက သက်သေထူသည်။

ယင်းနောက် အဓိကဟောပြောချက်ဖြစ်သည့် “ကျွန်ုပ်တို့ဘုရား-ပေးလွတ်လပ်ခြင်း၏ ရည်ရွယ်ချက်နှင့် အသုံးချပုံ” အကြောင်းကြားခဲ့ရသည်။ ယေဟောဝါသည် အချုပ်အခြာအာဏာရှင်နှင့် အနန္တတန်ခိုးရှင်ဖြစ်တော်မူသောကြောင့် ကိုယ်တော်တစ်ပါးတည်းသာလျှင် ခြွင်းချက်မရှိလွတ်လပ်မှုရှိကြောင်းကို ဤဟောပြောချက်မှ စည်းဝေးပွဲကြီးတက်ရောက်လာသူတို့သိရှိခဲ့ကြသည်။ သို့ရာတွင် ကိုယ်တော့်နာမနှင့်၊ ကိုယ်တော့်ဖန်ဆင်းခံများအကျိုးအလိုငှာ အမျက်တော်ထွက်နှေးခြင်း၊ ချုပ်တည်းခြင်းအားဖြင့် ကိုယ်တော်တိုင်၏လွတ်လပ်မှုကို တစ်ခါတစ်ရံ ကန့်သတ်ပေးတော်မူ၏။ အသိဉာဏ်ရှိသော ကိုယ်တော့်ဖန်ဆင်းခံအပေါင်းသည် ခြွင်းချက်ဖြင့်သာ လွတ်လပ်ကြသည်။ အကြောင်းမှာ သူတို့သည် ယေဟောဝါရှင်ကိုလက်အောက်ခံနေရကြ၏၊ ကိုယ်တော်၏ ရူပနိယာမနှင့်စာရိတ္တပညတ်များအောက် ရှိနေကြရသည်။ အထူးသဖြင့်ကိုယ်တော်အားဝတ်ပြုကိုးကွယ်ခြင်းအားဖြင့် ကိုယ်တော်ကိုဂုဏ်တင်ချီးမွမ်း၍ ရွှင်လန်းစေခြင်းငှာ၊ သူတို့ပျော်မွေ့အားရစေရန် ယေဟောဝါသည် လွတ်လပ်မှုပေးသနားထားတော်မူပြီ။ မိမိတို့ရရှိထားသောလွတ်လပ်မှုကို ကောင်းစွာအသုံးပြုခြင်းအားဖြင့် ယေဟောဝါသက်သေများသည် အကျင့်ကောင်းကြောင်း၊ သူတို့၏ဓမ္မအမှု၌ ဇွဲလုံ့ရှိကြောင်း ကမ္ဘာချီနာမည်ကောင်းရှိထားကြပြီ။

သောကြာနေ့ မွန်းလွဲပိုင်း

သောကြာနေ့မွန်းလွဲပိုင်းအစီအစဉ်ကိုစတင်ခဲ့သည့် စဉ်းစားတွေးတောစေသောဟောပြောချက်ခေါင်းစဉ်ကား “အလုပ်များနေ—အလုပ်သေများတွင်လော၊ ယေဟောဝါ၏လုပ်ငန်းတော်တွင်လော” ဖြစ်သည်။ အလုပ်သေများတွင် ဇာတိသဘောနှင့်ဆိုင်သောအလုပ်များသာမက ငွေရှာနည်းများအစရှိသည့် အချည်းနှီးဖြစ်သော၊ အကျိုးမဲ့သောဝိညာဉ်ရေးအရ အသေဖြစ်သောအလုပ်များလည်းပါဝင်သည်။ ဤကိစ္စတွင် ကျွန်ုပ်တို့ဘဝ၌ ဘုရားသခင့်နိုင်ငံတော်ကို ရှေ့ဦးထားမထားသုံးသပ်ကြည့်ရန် ကိုယ်ကိုယ်ကိုရိုးသားစွာစစ်ဆေးသင့်သည်။

ထပ်တူသဘောတရားမျိုးရှိသည်ကား “ဘုရားသခင်၏ဓမ္မအမှုဆောင်များအဖြစ် ကျွန်ုပ်တို့တာဝန်ကျေပွန်ခြင်း” ဟောပြောချက်ဖြစ်သည်။ ခရစ်ယာန်များသည် စတိလောက် သို့မဟုတ် နာရီကိုတာပြည့်ရုံလောက်သာ လုပ်ငန်းတော်၌ပါဝင်ခြင်းမဖြစ်သင့်ကြောင်း ဟောပြောသူတင်ပြသည်။ မိမိတို့၏ခရစ်ယာန်ဓမ္မအမှု၏ ကဏ္ဍအသီးသီးတွင် ထိရောက်သူများဖြစ်လိုကြရမည်။ ဤအချက်များကို သရုပ်ပြခန်းများ၊ တွေ့ဆုံမေးမြန်းခန်းများဖြင့် ကောင်းစွာသဘောပေါက်စေခဲ့သည်။ မိမိတို့၏ဓမ္မအမှုကို အတတ်နိုင်အပြည့်အဝဆုံးဆောင်ရွက်ကြရန် အားလုံးကိုတိုက်တွန်းအားပေးခဲ့ပါသည်။

“လွတ်လပ်သောလူမျိုးဖြစ်သော်လည်း စာရင်းရှင်းရန်ရှိ” ဟောပြောချက်တွင် ဟောပြောသူက သမ္မာတရားကြောင့်လွတ်လပ်ရသည့်အခွင့်ကို ယေဟောဝါလူမျိုးချစ်မြတ်နိုးကြသော်လည်း ယင်းနှင့်အတူ စာရင်းရှင်းစရာရှိကြောင်း သတိရသင့်သည်ဟု ဖော်ပြသွားသည်။ မိမိတို့လွတ်လပ်မှုကို အကျင့်ဆိုးများအတွက်အသုံးပြုမည့်အစား ယေဟောဝါအားချီးမွမ်းခြင်းအတွက်ဖြစ်စေကြရမည်။ ခရစ်ယာန်များအနေနှင့် “အာဏာစက်များ” ရှေ့စာရင်းရှင်းရန်လိုသည့်ပြင် အသင်းတော်အကြီးအကဲများနှင့်လည်း ပူးပေါင်းဆောင်ရွက်ကြရန်ဖြစ်သည်။ (ရောမ ၁၃:၁) ထို့ပြင် သူတို့၏ဝတ်စားဆင်ယင်၊ ကျင့်ကြံပြုမူပုံတို့တွင် စာရင်းရှင်းကြရဖို့ဖြစ်သည်။ “ငါတို့ရှိသမျှသည် ဘုရားသခင်စစ်ကြောတော်မူခြင်းကို ခံရကြမည်” အကြောင်းဘယ်သောအခါမျှ သူတို့မမေ့လျော့သင့်ပါ။—ရောမ ၁၄:၁၂။ ၁ ပေတရု ၂:၁၆။

ထိုနောက်ခရစ်ယာန်တိုင်းသည် “ဤကမ္ဘာကုန်ဆုံးချိန်နီးစဉ် ကြောက်ရွံ့မှုကင်းခြင်း” ရှိဖို့လိုကြောင်းဆွေးနွေးချက်ကို ကြားခဲ့ရ၏။ လူသားများသည် အနာဂတ်အတွက်စိုးရိမ်နေကြငြား ခရစ်ယာန်များမူ မိမိတို့၏ဓမ္မအမှုကိုဆောင်ရွက်နိုင်ဖို့ ကြောက်ရွံ့မှုကင်းရန်လိုသည်။ ကြောက်ရွံ့ခြင်းကင်းမှုသည် ယေဟောဝါကိုအားထားမှီခိုခြင်း၏ရလဒ်ဖြစ်သည်။ အကြောင်းမှာ ဘုရားစိတ်တော်ထိခိုက်မည်ကို ခရစ်ယာန်တစ်ဦးစိုးရိမ်တတ်လေ ဖန်ဆင်းခံတို့ကိုကြောက်စိတ်လျော့နည်းလေဖြစ်မည်။ စိတ်သက်သာရာရစေသောကျမ်းချက်များကို အမှတ်ရနေခြင်းသည် လူတစ်ဦးကို ခွန်အားရှိစေပြီး ကြောက်ရွံ့မှုကင်းစေသည်။ ဝိညာဉ်ရေးသန်မာပြီး ကြောက်ရွံ့မှုကင်းရန် ဘုရားသခင့်ကျေးကျွန်များသည် ယုံကြည်သူချင်းတို့နှင့်ပေါင်းသင်းခွင့်တို့ကို အကျိုးရှိစွာအသုံးပြုရန်လိုအပ်သည်။ ကြောက်ရွံ့မှုကင်းမဲ့ခြင်းငှာ ဆုတောင်းခြင်း၏ကဏ္ဍကိုလည်း ကျွန်ုပ်တို့အသီးသီးသတိရထားဖို့လိုပါသည်။ ကြောက်ရွံ့မှုကင်းကြခြင်းအားဖြင့် ခရစ်ယာန်များသည် ယေဟောဝါဘုရားသခင်နှင့် ကောင်းမွန်သောဆက်ဆံရေးကို ထိန်းသိမ်းထားနိုင်ကြ၏။

ပထမနေ့အစီအစဉ်သည် စစ်မှန်သောဝတ်ပြုနေးကိုတိုးမြှင့်ရန် လွတ်လပ်စေခြင်း ပညာပေးပြဇာတ်ဖြင့် နိဂုံးချုပ်ခဲ့သည်။ မျက်မှောက်ခေတ်မိသားစုတစ်စုသည် ယေရုရှလင်မြို့သို့ပြန်လာရန် ဧဇရနှင့်သူ၏အဖွဲ့သား ၇,၀၀၀ သည်မည်သို့စွန့်စားခဲ့ရကြောင်း ယင်းမှသင်ခန်းစာရရှိခဲ့သည်။ သို့ဖြင့် စည်းဝေးပွဲကြီးတက်ရောက်သူတိုင်းအား မိမိဦးစားထားသင့်ရာနှင့် မိမိတို့၏လုပ်ငန်းတော်အခွင့်အရေးများကို မည်သို့တိုးချဲ့ပေးနိုင်မည်ကို စစ်ဆေးကြည့်စေသည်။ ဤပြဇာတ်သည် သက်ကြီးသက်ငယ်အားလုံးနှင့် သက်ဆိုင်နေပါသည်။

စနေနေ့ နံနက်ပိုင်း

တေးသံသာအစီအစဉ်၊ သီချင်း၊ ဆုတောင်းခြင်းနှင့် နေ့စဉ်ကျမ်းချက်ကို ဆွေးနွေးပြီးနောက် စနေနေ့နံနက်အစီအစဉ်သည် “မိသားစုအသိုင်းအဝိုင်းတွင် တာဝန်ဝတ္တရားနှင့်အတူ လွတ်လပ်ခြင်း” ဟူသည့်အခန်းဆက်ဟောပြောချက်ကို အသားပေးပါသည်။ “ဖခင်များ ယေဟောဝါကို မည်သို့တုပနိုင်ပုံ” ဖြစ်သည့်ပထမပိုင်းတွင် ကောင်းကင်ခမည်းတော်ကို ဖခင်များ မည်သို့အတုယူနိုင်သည့် နည်းမျိုးစုံကိုကြားသိရ၏။ သူတို့သည် ကာယရေးသာမက ဝိညာဉ်ရေးကိုလည်း ဖြည့်စွက်ပေးရန် တိမောသေ ပထမစောင် ၅:၈ ကမှာကြားသည်။ မိသားစု၏ ဆရာသမားကောင်းဖြစ်ခြင်း၊ လိုအပ်သလို မေတ္တာပါပါ ဆုံးမပဲ့ပြင်ခြင်းအားဖြင့် သူတို့သည် ယေဟောဝါကိုတုပကြသည်။ ဤအချက်များကို တွေ့ဆုံမေးမြန်းခန်းများဖြင့် ဖော်ပြပေးခဲ့သည်။

ဤအခန်းဆက်၏ နောက်တစ်ပိုင်းကား “ဇနီးသည်၏ ထောက်မရေးကဏ္ဍ” ဖြစ်သည်။ ခရစ်ယာန်အိမ်ထောင်တွင် ထောက်မပေးရသူအဖြစ် ဇနီးသည်သည် သိက္ခာရှိသူဖြစ်ကြောင်း နိဒါန်းတွင် အလေးအနက်ဖော်ပြပါသည်။ ယင်းက သူမထံမှ အဘယ်အရာတောင်းဆိုပါသနည်း။ သူမသည် လျောက်ပတ်စွာလက်အောက်ခံနေရန်၊ သူမအလိုကိုသာ လင်ယောက်ျားလိုက်ရန် ဘယ်သောအခါမျှ မပူဆာဖို့ဖြစ်သည်။ လင်သားနှင့် သားသမီးများအပေါ် သူမ၏ဝတ္တရားများကို ကျေပွန်စွာဆောင်ရွက်ရန်ဖြစ်သည်။ အိမ်ကိုသပ်ယပ်သန့်ရှင်းစွာ ထိန်းသိမ်းပေးခြင်းမှလည်း သူမ ကျေနပ်မှုအစစ်အမှန်ရရှိနိုင်မည်ဖြစ်သည်။ ခရစ်ယာန်ဓမ္မအမှုဆောင်တစ်ဦးအနေနှင့်လည်း လယ်ကွင်းလုပ်ငန်း၌ပါဝင်ရန် သူမ၌ အခွင့်ကောင်းများစွာရှိပါသည်။ ဤကျမ်းစာဆိုင်ရာသြဝါဒသည် ပညာရှိစကားများဖြစ်ကြောင်း မိသားစုတစ်စုအား တွေ့ဆုံမေးမြန်းခြင်းက အလေးအနက်ပေါ်လွင်စေသည်။

“နားထောင်၍ သင်ယူသောကလေးများ” အပိုင်းတွင် လူငယ်များကိုဂရုစိုက်သွန်သင်ခဲ့သည်။ သားသမီးများကို နားထောင်၍ သင်ယူရန်လေ့ကျင့်ပေးခြင်းအားဖြင့် မိဘတို့သည် ယေဟောဝါ၏ဂုဏ်တော်ကိုချီးမြှင့်ရာရောက်ပြီး ဝိညာဏညီအစ်ကိုများနှင့် မိမိတို့သားသမီးများကိုပါ မေတ္တာပြရာရောက်ပါသည်။ သားသမီးနှင့်မိဘများ အရည်အချင်းပြည့်ပေါင်းသင်းချိန်ရှိလျှင် မေတ္တာနှောင်ကြိုး ခိုင်မြဲမည်ဖြစ်သည်။ သားသမီးများ၏ မေးခွန်းများကိုဖြေဆိုပေးရန် မိဘများအရည်အချင်းရှိကြရမည်ဖြစ်ပြီး သူတို့လေးများ အသိပညာဆာလောင်နေရန် ခံတွင်းတွေ့စေသင့်သည်။ တွေ့ဆုံမေးမြန်းခန်းများအားဖြင့်တစ်ဖန် ယင်းကိုမည်သို့ပြုလုပ်နိုင်ကြောင်း တင်ပြခဲ့ပါသည်။

ထိုနောက် “ယေဟောဝါအမှုတော်ထမ်းရွက်ရန် သင့်ကိုယ်ကိုလွတ်လပ်စေခြင်း” ဟူသည့်အကြံဉာဏ်ကောင်းကို ကြားလိုက်ကြရသည်။ ယင်းကိုမည်သို့ပြုသနည်း။ လောကီသက်မွေးဝမ်းကျောင်းများနောက်လိုက်ခြင်း၊ အချိန်များစွာကုန်သော ဝါသနာများကို လိုက်စားခြင်း၊ စည်းစိမ်ဥစ္စာရှာခြင်းတို့မှ ရှောင်ကြဉ်ခြင်းအားဖြင့်ဖြစ်သည်။ ယေရှုနှင့်တမန်တော်ပေါလုသည် ကိုယ်ကျိုးစွန့်ခြင်းအားဖြင့် ပုံသက်သေကောင်းများ ချမှတ်ပေးခဲ့ပြီ။ ယေဟောဝါ၏လူများသည် ဘုရားသခင့်နိုင်ငံတော်ကိုအာရုံပြုသည့် ရိုးရှင်းသောမျက်စိရှိရန်လိုသည်။ ပစ္စည်းဥစ္စာဝယ်ခြမ်းရေးနှင့်ပတ်သက်လျှင် ယခုစုဆောင်း၊ နောက်မှဝယ်ခြင်းသည် ယခုဝယ်နောက်မှပေးစနစ်ထက် သာ၍ပညာရှိသည်။ လူငယ်များသည် လိင်သာယာမှုများနှင့် လောကီဆန်သက်မွေးဝမ်းကျောင်းနှင့်စပ်လျဉ်း၍ စိတ်ကူးယဉ်ခြင်းကို ရှောင်ကြဉ်ရမည်။ ယေဟောဝါအမှုတော်ဆောင်ရန် လွတ်လပ်စွာနေသည့်အတွက် ရလာသည့်ကောင်းချီးများကို အိမ်ထောင်မပြုသော ရှေ့ဆောင်တစ်ဦးအား တွေ့ဆုံမေးမြန်းခြင်းက ရှင်းပြပါသည်။

စနေနေ့နံနက်ပိုင်းအစီအစဉ်သည် “ဆက်ကပ်အပ်နှံခြင်းနှင့် နှစ်ခြင်းအားဖြင့် လွတ်လပ်ခြင်းသို့ဝင်ရောက်လော့” ဟောပြောချက်နှင့် နိဂုံးချုပ်ခဲ့သည်။ အာဒံ၏ပုန်ကန်မှုကြောင့် ဖန်ဆင်းခံအပေါင်း ကျွန်အဖြစ်သို့ရောက်ခဲ့ကြရသော်လည်း ကြီးမြတ်တော်မူသော လွတ်မြောက်စေသူ ယေရှုခရစ်သည် ကိုယ်တော်၏ ယဇ်ပူဇော်သက္ကာအားဖြင့် လွတ်လပ်မှုလမ်းကို ဖွင့်ပေးတော်မူကြောင်း နှစ်ခြင်းခံမည့်သူများအား သတိပေးခဲ့သည်။ ဘုရားသခင့်အလိုတော်ဆောင်ရွက်ရန် အလွတ်ရုန်းထွက်ခြင်း၌ အဘယ်အရာများပါဝင်ကြောင်းနှင့် နှစ်ခြင်းခံယူမည့်သူများ၏ ကြီးမားသောတာဝန်နှင့်ကောင်းချီးများကို ဟောပြောသူသည် အလေးအနက်တင်ပြပါသည်။

စနေနေ့ မွန်းလွဲပိုင်း

“မည်သူ့အကျိုးကို သင်ရှာနေသနည်း” ဟူသည့်ကိုယ်ကိုယ်ကို စိစစ်ရန်မေးခွန်းဖြင့် စနေနေ့မွန်းလွဲပိုင်းအစီအစဉ်စတင်ပါသည်။ ဤလောကသည် မာရ်နတ်၏ကိုယ်ကျိုးရှာစိတ်ဓာတ်ကို တင်ပြပါသည်။ သို့ရာတွင် ခရစ်ယာန်များမူ ယေရှုခရစ်၏ ကိုယ်ကျိုးစွန့်စိတ်ဓာတ်ကို အတုယူရန်ဖြစ်သည်။ ကိုယ်တော်၏ပုံသက်သေ ကောင်းလှသည်တကား။ ကောင်းကင်ဘုန်းစည်းစိမ်ကို စွန့်လွှတ်တော်မူပြီးနောက် ကျွန်ုပ်တို့အကျိုးအလိုငှာ ကိုယ်တော်၏လူသားအသက်ကို ပူဇော်ပေးတော်မူသည်။ စီးပွားရေး သို့မဟုတ် ငွေကြေးကိစ္စများတွင် စိတ်ဝမ်းကွဲမှုဖြစ်သည့်အခါ၊ ပုဂ္ဂိုလ်ရေး ပဋိပက္ခများဖြစ်သည့်အခါ၊ အစရှိသည့်ကိစ္စများတွင် မည်သူ့အကျိုးရှာသနည်းဟူသည့် စိန်ခေါ်မှုများပေါ်လာပါသည်။ ယင်းတို့သည် ခရစ်ယာန်မေတ္တာ စမ်းသပ်ချက်ဖြစ်သည်။ သူတစ်ထူးအကျိုးကိုရှာခြင်းအားဖြင့် ပေးကမ်းခြင်း၏ ကြီးမားသောကောင်းချီးကို သဘောပေါက်လာမည်ဖြစ်ပြီး ယေဟောဝါ၏မျက်နှာသာတော်ရရှိမည်အမှန်။

ထိုနောက် ယင်းနှင့်ဆက်စပ်သည့် “ဝိညာဏအားနည်းမှုကို အသိအမှတ်ပြု၍ နိုင်နင်းခြင်း” အကြောင်းကြားရသည်။ ဝိညာဏအားနည်းမှု၏လက္ခဏာများကို ခွဲခြားသိရှိရန်လိုအပ်ကြောင်းနှင့် စာတန်၏ထောင်ချောက်များကို ရှောင်ကွင်းရန် ပိုင်နိုင်စွာဆုံးဖြတ်ပြုမူရမည့်အကြောင်း ဤဟောပြောချက်က အလေးအနက်ဖော်ပြပါသည်။ ယေဟောဝါ၏ကျေးကျွန်များသည် ကိုယ်တော်ကိုနှစ်နှစ်ကာကာချစ်မြတ်နိုးပြီး မကောင်းမှုကိုမုန်းတီးသော စိတ်ထားကိုမွေးမြူရန်လိုသည်။ ယင်းသို့ပြုရန် မှန်မှန်ပြုလုပ်သည့် ရည်ရွယ်ချက်ရှိ ကိုယ်ပိုင် နှင့် မိသားစုလေ့လာမှုအားဖြင့် ယေဟောဝါကိုသိကျွမ်းလာရန်လိုသည်။ အဓမ္မမှုနှင့် လိင်စာရိတ္တယိုယွင်းမှုကို အမွှမ်းတင်သော ဖျော်ဖြေမှုအားလုံးကို ရှောင်ကြဉ်ရမည်။ (ဧဖက် ၅:၃-၅) မှန်မှန်ဆုတောင်းခြင်းနှင့် စည်းဝေးများတက်ခြင်းတို့သည်လည်း ဝိညာဏအားနည်းမှုများကိုဖြိုခွင်းရန် အခြေခံနည်းလမ်းများဖြစ်သည်။

“အိမ်ထောင်မင်္ဂလာသည် ပျော်ရွှင်ရာသို့ သော့ချက်လော” ဟူသည့်အကြောင်းမှာ အခြားမည်သည့်ဟောပြောချက်ထက်မဆို စိတ်ဝင်စားမှုပိုမိုနှိုးဆွပုံရှိသည်။ ထိုအတိုင်းပင်လူငယ်အများ ယူမှတ်ထားသည်။ သို့သော် အိမ်ထောင်မပြုသောမရေတွက်နိုင်သည့် သစ္စာရှိနာမ်ဝိညာဉ်သားတို့သည် ပျော်ရွှင်နေကြသည်နည်းတူ အိမ်ထောင်ထမ်းပိုးကိုမထမ်းသော်လည်း ပျော်ရွှင်မှုရရှိနေသော ဆက်ကပ်အပ်နှံခရစ်ယာန်များစွာရှိကြောင်း ဟောပြောသူကရှင်းလင်းသွားပါသည်။ ထို့ပြင်အိမ်ထောင်ကွာရှင်းခြင်းနှုန်းထား မြင့်မားနေခြင်းကား အိမ်ထောင်သည်များစွာတို့သည် ပျော်ရွှင်မှုမရှိကြကြောင်းတင်ပြပါသည်။ အိမ်ထောင်ပြုခြင်းသည် ကောင်းချီးမင်္ဂလာတစ်ခုဖြစ်နိုင်သော်လည်း ပျော်ရွှင်ရာသို့သော့ချက်မဟုတ်ကြောင်းကို အသိအမှတ်ပြုရန် ဆက်ကပ်အပ်နှံခရစ်ယာန်များခံစားနေရသည့် ကောင်းချီးအမြောက်အမြားကိုသာ ပြန်ဆင်ခြင်သုံးသပ်သင့်သည်။

ယင်းနောက် အခန်းဆက်ဟောပြောချက် “ကျွန်ုပ်တို့လက်ထက်တွင် ခရစ်ယာန်လွတ်လပ်မှု” အကြောင်းဆက်ကြားကြရသည်။ ပထမဟောပြောသူက “ကျွန်ုပ်တို့၏ခရစ်ယာန်လွတ်လပ်ခြင်းအသွင်များ” ကိုဆွေးနွေးတင်ပြသည်။ ယင်းတို့တွင် သုံးပါးပေါင်းတစ်ဆူ၊ လူ့စိုးလ်မသေနိုင်၊ ထာဝရညှဉ်းဆဲခြင်း အစရှိသည့် သွန်သင်ချက်များမှ လွတ်လပ်မှုရခြင်းပါဝင်သည်။ ၎င်းနောက် အပြစ်တရားအောက် ကျွန်ခံရသည့်အဖြစ်မှ လွတ်လပ်မှုရခြင်းရှိသေးသည်။ ခရစ်ယာန်များသည် မစုံလင်ကြသော်လည်း ဆေးလိပ်သောက်ခြင်း၊ လောင်းကစားခြင်း၊ သောက်ကြူးခြင်း၊ လိင်လော်မာမှု အစရှိသည့် အကျင့်ဆိုးများနှင့် လွတ်ကင်းနေကြပြီ။ ပရဒိသုမျှော်လင့်ချက်ရရှိထားကြရာ ယင်းအကြောင်း သူတစ်ပါးအားမပြောမနေနိုင်သည့်အတွက် သူတို့မှာ မျှော်လင့်ချက်ကင်းမဲ့သောအဖြစ်မှလည်း လွတ်လပ်မှုရရှိကြသည်။

နောက်ဟောပြောသူက “ထိုသို့သောလွတ်လပ်ခြင်းကို အသင်တစ်ဦးချင်း အမြတ်တနိုးထားပါသလော” ဟုမေးခဲ့သည်။ အမြတ်တနိုးထားသည်ဆိုရာမှာ တယုတယထားခြင်း၊ ဂရုစိုက်သိမ်းဆည်းခြင်းကိုဆိုလိုသည်။ ယင်းသို့ပြုရန် ဘုရားသခင့်ကျေးကျွန်သည် ခရစ်ယာန်လွတ်လပ်မှု၏ ဘောင်အပြင်ရောက်သွားရန် သွေးဆောင်ခြင်းကို ရှောင်ကြဉ်ရမည်။ ဤလောက၏လွတ်လပ်မှုသည် အပြစ်နှင့် ပျက်စီးယိုယွင်းသောလမ်းသို့ ပို့ဆောင်ပေးသည့်အတွက် လှည့်စားတတ်သောမုသားမျှဖြစ်သည်။

ဤအခန်းဆက်ဟောပြောချက်၏ နောက်ဆုံးဟောပြောသူသည် “လွတ်လပ်ခြင်းကို ချစ်မြတ်နိုးသူများ ခိုင်မြဲစွာရပ်တည်” အကြောင်းပြောဆိုသည်။ ယင်းသို့ပြုနိုင်ရန် ကောင်းကင်မိဘနှစ်ပါး၊ ယေဟောဝါနှင့် ကိုယ်တော်၏ဇနီးကဲ့သို့သော အဖွဲ့အစည်းကို ခရစ်ယာန်များ တွယ်ကပ်နေရန်လိုသည်။ ယေဟောဝါ၏လူတို့သည် အယူဖောက်ပြန်သောဝါဒဖြန့်စကားများကြောင့် လမ်းလွဲသွေဖည်မခံနိုင်ကြပါ။ စာရိတ္တပျက်ပြားရန်အဆိုသွင်းတတ်သူတို့ကို ငြင်းပယ်ကြရမည်။ ဘုရားရေးရာလွတ်လပ်မှု၌ မြဲမြံနေနိုင်ရန် ခရစ်ယာန်များသည် “ဝိညာဉ်ပကတိကြောင့် အသက်ရှင်ရမည်။”—ဂလာတိ ၅:၂၅။

ထိုနေ့၏နောက်ဆုံးဟောပြောချက်သည် တကယ့်နှစ်ထောင်းအားရဖွယ်ဖြစ်သည်။ ယင်းကား “အသက်ရှင်ခဲ့သမျှတွင် အကြီးမြတ်ဆုံးလူသား” ဖြစ်သည်။ ယေရှုခရစ်သည် ရှိရှိသမျှ ကြည်းတပ်များ၊ ရေတပ်များ၊ လွှတ်တော်များနှင့်ဘုရင်များအားလုံးတို့ထက် လူသားတို့၏ဘဝကို တန်ခိုးပါပါနှင့် ထိရောက်စွာ လွှမ်းမိုးခဲ့သည့်အတွက် အကြီးမြတ်ဆုံးလူသားဖြစ်တော်မူသည်။ ကိုယ်တော်သည် မြေကြီးပေါ်သို့မကြွလာမီ ကောင်းကင်တွင်သက်တော်ထင်ရှားခဲ့သည့် ဘုရားသခင်၏သားတော်ဖြစ်သည်။ ယေရှုပြောဆိုသင်ကြားနေထိုင်ပုံသည် ကောင်းကင်ခမည်းတော်၏ပုံစံအတိုင်းဖြစ်လွန်းလှသဖြင့် “ငါ့ကိုမြင်သောသူသည် ခမည်းတော်ကိုမြင်၏” ဟုကိုယ်တော်မိန့်ဆိုနိုင်၏။ (ယောဟန် ၁၄:၉) “ဘုရားသခင်သည် ချစ်ခြင်းမေတ္တာဖြစ်တော်မူ” ကြောင်း မည်မျှကောင်းစွာယေရှုတင်ပြခဲ့သည်တကား။ (၁ ယောဟန် ၄:၈) ယေရှု၏အရည်အချင်းများကို အသေးစိတ်ဖော်ပြပြီးနောက် ၁၉၈၅ ဧပြီမှစ၍ ကင်းမျှော်စင်၌ “ယေရှုဘဝနှင့်ဓမ္မအမှု” အခန်းဆက်ဆောင်းပါးများကို ပုံနှိပ်ထုတ်ဝေခဲ့ကြောင်း ဟောပြောသူသတိပြုစေပါသည်။ တောင်းဆိုမှုအများအပြားကြောင့် ယခုအသင်းမသည် အသက်ရှင်ခဲ့သမျှတွင် အကြီးမြတ်ဆုံးလူသား စာအုပ်သစ်ကို ထုတ်ဝေလိုက်ပါသည်။ ၁၃၃ ခန်းရှိပြီး ရောင်စုံဖြင့်ပုံနှိပ်ထားသည်။ အခန်းဆက်အကြောင်းများကို တည်းဖြတ်၍ ၄၄၈ မျက်နှာရှိ ဤစာအုပ်တွင် အားလုံးကိုထည့်သွင်းပေးထားပါသည်။ စည်းဝေးပွဲကြီး၏ ဤနေ့သည် ရွှင်လန်းအားရစွာဖြင့် ပြီးဆုံးခဲ့သည်။

တနင်္ဂနွေ နံနက်ပိုင်း

တနင်္ဂနွေနံနက် စောစောပိုင်းအစီအစဉ်တွင် အခန်းဆက်ဟောပြောချက် “လူကိုဖမ်းသောတံငါများအဖြစ် ထမ်းဆောင်ခြင်း” ကိုကြားကြရ၏။ “ငါးဖမ်းခြင်း—စာသားအရနှင့်ပုံဆောင်ချက်” ဟူသည့်ဟောပြောချက်က နောက်ဆက်တွဲဟောပြောချက်များအတွက် အုတ်မြစ်ခင်းပေးပါသည်။ ယေရှုသည် ငါးများကို အံ့သြစွာဖမ်းစေပြီးနောက် ငါးဖမ်းခဲ့သော တံငါသည်များအား လူကိုဖမ်းသောတံငါများဖြစ်ကြရန် ကိုယ်တော်ဖိတ်ကြားခဲ့သည်။ လူကိုဖမ်းသောတံငါများဖြစ်လာကြရန် တပည့်တော်များကို ယေရှုအတန်ကြာလေ့ကျင့်ပေးတော်မူခဲ့ပြီ။ စီအီး ၃၃ ခုနှစ်၊ ပင်တေကုတ္တေပွဲနေ့မှစ၍ အမျိုးသား၊ အမျိုးသမီးမြောက်မြားစွာကို တပည့်များဖြစ်လာရန် သူတို့အောင်မြင်စွာကူညီပေးနိုင်ခဲ့သည်။

နောက်ဟောပြောသူက မဿဲ ၁၃:၄၇-၅၀ တွင်မှတ်တမ်းတင်ထားသည့် ပိုက်ကွန်ပုံဥပမာနှင့်ပတ်သက်၍ ဟောပြောသည်။ ပုံဆောင်ရာပိုက်ကွန်တွင် ဘိသိက်ခံခရစ်ယာန်များနှင့် ခရစ်ယာန်ဘောင်ပါ,ပါရှိသည်ဟု သူတင်ပြသည်။ ကျမ်းစာများကို ဘာသာပြန်ခြင်း၊ ပုံနှိပ်ထုတ်ဝေဖြန့်ချိခြင်းကြောင့် ခရစ်ယာန်ဘောင်ပါရခြင်းဖြစ်သည်။ သူတို့၏ကြိုးပမ်းမှုများမူကား မသင့်တော်သောငါးမြောက်မြားစွာကို စုသိမ်းမိလျက်သားဖြစ်စေသည်။ အထူးသဖြင့် ၁၉၁၉ မှစပြီး ခွဲခြားခြင်းလုပ်ငန်းကို လုပ်ဆောင်နေ၏။ မသင့်တော်သောငါးများကို ပစ်ထုတ်လိုက်၍ သင့်တော်သောငါးများကိုကား ထည့်စရာခြင်းများနှင့်တူသော အသင်းတော်များထဲစုသိမ်းခြင်းအားဖြင့် ခရစ်ယာန်စစ်များအား မြင့်မြတ်သောလုပ်ငန်းတော်ဆောင်ရွက်ရန် စောင့်ရှောက်ကာကွယ်မှု ရရှိထားကြပါသည်။

တတိယဟောပြောချက်ဖြစ်သည့် “ကမ္ဘာချီရေပြင်တွင် လူတို့ကိုမျှားခြင်း” အကြောင်းက ဆက်ကပ်အပ်နှံပြီးသောခရစ်ယာန်အားလုံး ကမ္ဘာချီငါးမျှားခြင်းလုပ်ငန်း၌ပါဝင်ရန် တာဝန်ရှိကြောင်း အလေးအနက်ဖော်ပြသည်။ ယခု ၄,၀၀၀,၀၀၀ ကျော်တို့သည် နိုင်ငံပေါင်း ၂၀၀ ကျော်တွင် ဤလုပ်ငန်း၌ပါဝင်နေကြပါသည်။ လွန်ခဲ့သောနှစ်အနည်းငယ်အတွင်း၌လည်း နှစ်စဉ် ၂၃၀,၀၀၀ ကျော်နှစ်ခြင်းခံယူနေကြပါသည်။ ယေဟောဝါ၏လူတို့အားလုံး သူတို့၏ငါးမျှားခြင်းစွမ်းရည်တို့ကို ထက်မြက်လာစေရန် တိုက်တွန်းပေးခံရသည်။ လက်တွေ့အောင်မြင်မှုရရှိသော “တံငါ” အချို့ကို တွေ့ဆုံမေးမြန်းခဲ့သည်။

နောက်ဆက်တွဲဟောပြောချက်ဖြစ်သည့် “‘နောက်ဆုံးကာလ’ တွင်နိုးကြားလျက်နေခြင်း” အကြောင်းတွင် ဟောပြောသူသည် ဘုရားသခင့်လူမျိုးတို့ နိုးကြားနေနိုင်ရန် အကူအညီပေးသည့်နည်း ခုနစ်နည်းကို ရေတွက်ဖော်ပြပေးပါသည်။ အာရုံလွင့်စေရာများကို တိုက်လှန်ခြင်း၊ ဆုတောင်းခြင်း၊ ဤအစီအစဉ်၏ဆုံးခန်းတိုင်လုနီးကြောင်း သတိပေးခြင်း၊ ယေဟောဝါအဖွဲ့အစည်းနှင့် တွယ်ကပ်နေခြင်း၊ ကိုယ်ကိုယ်ကို စစ်ဆေးခြင်း၊ ပြည့်စုံပြီးသားပရောဖက်ပြုချက်များကို ဆင်ခြင်သုံးသပ်ခြင်း၊ မိမိတို့ကယ်တင်ခြင်းရမည့်အချိန်သည် ယုံကြည်သူများဖြစ်လာချိန်ကထက် ပိုနီးလာပြီဖြစ်ကြောင်း စွဲမှတ်ထားခြင်းတို့ဖြစ်သည်။

နံနက်ပိုင်းအစီအစဉ်သည် “‘ဒုက္ခကာလ’ ကိုမည်သူ လွတ်မြောက်မည်နည်း” ဆွေးနွေးချက် နိဂုံးချုပ်ခဲ့သည်။ ယောလ၏ပရောဖက်ပြုချက်သည် တမန်တော်များခေတ်တွင် မည်သို့တစ်စိတ်တစ်ဒေသပြည့်စုံခဲ့၍ ယခုဆက်ပြည့်စုံနေကြောင်း၊ နီးကပ်သောအနာဂတ်တွင် မည်သို့လုံးလုံးလျားလျားပြည့်စုံမည်အကြောင်း ဟောပြောသူတင်ပြသွားသည်။

တနင်္ဂနွေနေ့ မွန်းလွဲပိုင်း

မွန်းလွဲပိုင်းအစီအစဉ်သည် “လွတ်လပ်သော ဘုရားသခင့်ကမ္ဘာသစ်ကို ကြွေးကြော်ခြင်း” လူထုဟောပြောပွဲနှင့် စတင်သည်။ ဤဟောပြောချက်သည် လွတ်လပ်မှုဟူသည့် စည်းဝေးကြီး၏အဓိကအချက်ကို ဆက်ရှင်းပြပေးသည်။ အပြစ်နှင့်သေခြင်းတို့မှလည်း လွတ်လပ်မှုရရှိမည်ဖြစ်သည်။ စုံလင်သောကျန်းမာမှုကိုရရှိလာကြမည်ဖြစ်၍ လူတို့သည် ပရဒိသုမြေကြီးပေါ် ထာဝစဉ်ပျော်ရွှင်စွာ နေနိုင်ကြတော့မည်။ သို့ဖြင့်ဖြောင့်မတ်ခြင်းတရားကို ချစ်မြတ်နိုးကြသူများသည် “စစ်မှန်သောလွတ်လပ်မှုကို ရကြပြီဖြစ်သည့်အတွက် ကျေးဇူးတော်ချီးမွမ်းပါသည် ယေဟောဝါ” ဟုကြွေးကြော်၍ ကမ္ဘာသစ်၏ဖန်ဆင်းရှင်ကို ချီးမွမ်းထောမနာပြုရန် အကြောင်းခိုင်လုံပါသည်။

လူထုဟောပြောချက်ပြီးနောက် ခရိုင်စည်းဝေးပွဲကြီးများတွင် ပြုလေ့ပြုထမရှိသည့် ပတ်စဉ်လေ့လာရန် ကင်းမျှော်စင် မှဆောင်းပါးကို ဆွေးနွေးခြင်းပြုခဲ့သည်။ ထိုနောက် အားတက်ဖွယ်ဟောပြောဆုံးမချက်ဖြစ်သည့် “လွတ်လပ်မှုချစ်မြတ်နိုးသူများ ဆက်လက်၍ချီတက်နေ” ဟောပြောချက်ဖြင့် စည်းဝေးပွဲကြီးနိဂုံးချုပ်ခဲ့သည်။ ဟောပြောသူသည် စည်းဝေးပွဲကြီး၏လွတ်လပ်မှုအဓိကအချက်မှ ပေါ်လွင်ချက်များကို အကျဉ်းချုပ်ဖော်ပြပါသည်။ လွတ်လပ်မှုကြောင့် ယေဟောဝါ၏လူများသည် မည်မျှပျော်ရွှင်ကြရကြောင်း၊ ခရစ်ယာန်များ တိုးတက်ပြုပြင်လာသည့်နည်းများနှင့် ထပ်ဆင့်ကောင်းချီးများခံစားရရန် စည်းလုံးစွာဖြင့် ရှေ့သို့ချီတက်နေရန် သူအားပေးတိုက်တွန်းပါသည်။ နောက်ဆုံးတွင် “ယင်းသို့ကျွန်ုပ်တို့ပြုကြရာ လွတ်လပ်မှုချစ်မြတ်နိုးသူများအနေနှင့် ဆက်တိုးတက်နေရန် ကျွန်ုပ်တို့တစ်ယောက်မကျန်ကို ယေဟောဝါအစဉ်ကောင်းချီးပေးပါလေစေ” ဟူသည့်စကားများနှင့် နိဂုံးချုပ်ခဲ့ပါသည်။

“ဤလောကသည် အနိစ္စနိုင်ငံသို့အလိုလို လိုက်သည်မဟုတ်။ဘုရားသခင် သားတို့၏ထူးမြတ်သောလွတ်ခြင်း ချမ်းသာတည်းဟူသောဖောက်ပြန်ပျက်စီးခြင်းအနှောင် အဖွဲ့မှကယ်လွှတ်ခြင်းချမ်းသာကို ဝင်စားမည်ဟုမျှော်လင့်ရသောအခွင့်ကိုပေး၍ အနိစ္စနိုင်ငံသို့ လိုက်စေတော်မူသောသူ၏အလိုတော်ကြောင့်သာ လိုက်ရ၏။”—ရောမ ၈:၂၀၊၂၁။

[စာမျက်နှာ ၂၅ ပါ ရုပ်ပုံများ]

ပရက်ဂ်၊ ချက်ကိုစလိုဗက် တွင်ကျင်းပသောစည်းဝေးပွဲသို့ လူငယ်ကိုယ်စားလှယ်တစ်ဦး

[စာမျက်နှာ ၂၆ ပါ ရုပ်ပုံများ]

၁။ ပရက်ဂ်၊ ချက်ကိုစလိုဗက်တွင် နှစ်ခြင်းခံရန်သွားနေသူများ

၂။ တဲလ်လင်၊ အက်စ်တိုနီယာတွင် ယေဟောဝါသက်သေတစ်ဦးအဖြစ်နှစ်ခြင်းခံစဉ်

၃။ ယူဆိုလီ-ဆိုက်ဘစ်စကိုးရီ ဆိုက်ဘေးနီးယားတွင်စာအုပ်သစ်က စည်းဝေးကြီးတက်သူများအားရွှင်လန်းစေသည်

၄။ ပရက်ဂ်စည်းဝေးပွဲကြီးတွင် ချက်နှင့်စလိုဗက်စကားနှင့် “ကမ္ဘာသစ်ဘာသာပြန်ကျမ်းကိုထုတ်ဝေခြင်း