ကတိထားရာပြည်မှမြင်ကွင်းများ

ရှိလောသို့သွားရောက်ခြင်း—ကလေးကောင်းများနှင့်ကလေးဆိုးများ

ကတိထားရာပြည်ရှိ မြို့ကြီးမြို့ငယ်များ၊ နေရာဒေသများကို စဉ်းစားကြည့်ပါက သင့်စိတ်ထဲတွင် မှတ်သားလောက်ဖွယ်ယောက်ျားများနှင့်မိန်းမများ ပေါ်မလာပေလော။ ထိုသို့ဖြစ်နိုင်သည်။ အကြောင်းမှာ ကျမ်းစာမှတ်တမ်းအများစုမှာ လူကြီးများပါဝင်သည်။ သို့ရာတွင် ထိုအချိန်က,ကလေးများကော။ မြင်ကွင်းတွင် သူတို့ကို သင်မြင်ယောင်သလော။

အထက်ပါမြင်ကွင်းသည် ခရစ်ယာန်များအတွက် ပုံသက်သေကောင်းများပေးသည့်လူငယ်အချို့နှင့် သတိပေးချက်ဖြစ်စေသည့်ပုံသက်သေပေးသော လူငယ်အချို့တို့ ပါဝင်ပတ်သက်သည့် အဖြစ်အပျက်များကို အာရုံစိုက်ရန်အကူအညီဖြစ်စေသည်။ အလယ်တွင်ရှိသော ဝန်းဝိုင်းနေသည့်တောင်ကုန်းသည် ရှိလောမြို့တည်ရာဖြစ်ဖွယ်ရှိသည်။a

ကတိထားရာပြည်သို့ ဣသရေလလူမျိုးဝင်ခဲ့စဉ်က ဦးဆုံးသူတို့သည် ယေရိခေါမြို့အနီးရှိဂိလဂါလအရပ်တွင် ဘုရားသခင်၏တဲတော်တည်ခဲ့ကြသည်ကို သင်ပြန်လည်သတိရပေလိမ့်မည်။ (ယောရှု ၄:၁၉) သို့သော် ပြည်ကိုပိုင်းခြားသောအခါ သန့်ရှင်းရာတဲတော်—ဣသရေလလူမျိုး၏ဝတ်ပြုရေးအခြေစိုက်ရာ—သည် ဤရှိလောသို့ပြောင်းရွှေ့ခဲ့သည်။ (ယောရှု ၁၈:၁) ယင်းသည် ယေရုရှလင်မြို့မြောက်ဖက် မိုင် ၂၀ ခန့်ကွာဝေးသည့် ဧဖရိမ်တောင်တန်းဒေသတွင် ရှိခဲ့သည်။ ဣသရေလယောက်ျားနှင့်မိန်းမအားလုံးတို့သည် ရှိလောသို့ခရီးထွက်ကြသည်။ တဲတော်တည်ရှိခဲ့ဖွယ်ရှိသည့်နေရာ၏ တောင်ဘက်ချိုင့်တွင် ကြီးမားသောလူအုပ်စုကြီးစုရုံးနိုင်ခဲ့ကြသည်။ (ယောရှု ၂၂:၁၂) ဤနေရာသို့ ကလေးများ လာသည်ကို သင်မြင်ယောင်နိုင်သလော။

အချို့တို့လာခဲ့ကြသည်။ ကျွန်ုပ်တို့သိသင့်သည့် မှတ်သားလောက်ဖွယ်အကောင်းဆုံးပုံသက်သေမှာ လူငယ်ရှမွေလဖြစ်သည်။ သူ့မိဘများဖြစ်ကြသော ဧလကာနနှင့်ဟန္နတို့သည် အနောက်ဘက်တောင်ကုန်းများရှိမြို့တစ်မြို့တွင် နေထိုင်ကြသည်။ နှစ်စဉ်ဤနေရာသို့ သူတို့လာကြသည်။ ဧလကာန၏အခြားမိန်းမများဖြင့်ရသော ကလေးများကိုလည်း ခေါ်လာကြဖွယ်ရှိသည်။ နောက်ဆုံးတွင် ယေဟောဝါသည်ဟန္နအား ရှမွေလအမည်ရှိသောသားတစ်ယောက်အားဖြင့် ကောင်းချီးပေးတော်မူသည်။ အချိန်တန်သော် သူ၏မိဘများသည် သူ့အား တဲတော်တွင် ယဇ်ပုရောဟိတ်မင်းကြီးဧလိနှင့်အတူ အမှုထမ်းဆောင်ရန်အလို့ငှာ ရှိလောတွင်နေရန်ခေါ်သွားခဲ့ကြသည်။—၁ ဓမ္မရာဇဝင် ၁:၁-၂:၁၁။

လူငယ်ကလေးသည် ဘုရားသခင့်အိမ်တော်တွင် လုပ်စရာများစွာရှိပြီး အနီးအနားရှိတောင်ကုန်းများပေါ်တက်ရောက်ခွင့်ရှိခဲ့ပေမည်။ (၁ ဓမ္မရာဇဝင် ၃:၁၊ ၁၅) အချို့တို့သည် စာမျက်နှာ ၉ ပါပုံတွင်မြင်ရသည့်အတိုင်း မြေပြန့်ကုန်းမြင့်များဖြစ်နေပြီး သံလွင်ပင်များဖြင့်ပြည့်နေကြသည်။ ကျောက်တုံးငယ်ကလေးဖြင့်ပြီးသောကင်းမျှော်စင်ကို ကြည့်လိုက်ပါ။ အဝေးမှ လယ်သမားများ သို့မဟုတ် သိုးထိန်းများတို့သည် ထိုကဲ့သို့သောမျှော်ကြည့်ရာအရပ်မှနေ၍ မိမိတို့၏တိရစ္ဆာန်များကို စောင့်ကြည့်နိုင်ကြသည်။ သို့သော် လူငယ်ရှမွေလလည်း ဤနေရာသို့တက်ကြည့်ခဲ့မည်ဟုယူမှတ်နိုင်သည်။ (၂ ရာဇဝင်ချုပ် ၂၀:၂၄ နှိုင်းယှဉ်။) ဤနေရာသည် သားရဲတိရစ္ဆာန်များကိုစောင့်ကြည့်ရန် အထက်စီးမှနေရာကောင်းဖြစ်ခဲ့ပေမည်။

ထိုအချိန်က ယခုအခါထက်သစ်ပင်များပိုမိုရှိခဲ့သည်။ သားရဲတိရစ္ဆာန်များပင်သွားလာကျက်စားခဲ့သည့် သစ်တောကြီးများရှိခဲ့သည်။ (ယောရှု ၁၇:၁၅၊ ၁၈) ရှေးအချိန်က ဧလိရှဲသည် ဘုရားသခင့်အဓိကပရောဖက်ဖြစ်လာချိန်တွင် ဖြစ်ပျက်သည့်အဖြစ်အပျက်အားဖြင့် ယင်းအချက်ကိုကျွန်ုပ်တို့သိရသည်။ ဧလိရှဲသည် ယေရိခေါ်မြို့မှ ဗေသလမြို့သို့ခရီးသွားခဲ့သည်။ ထို့ကြောင့် ရှိလောတောင်ဘက်ဆယ်မိုင်ခန့်ဝေးသောဤနေရာတွင် သူရှိခဲ့ပေမည်။ ရွှေနွားရုပ်ကိုးကွယ်ရာဗဟိုဒေသတစ်ခုဖြစ်လာသော ဗေသလမြို့သူမြို့သားများက သူ့အားမည်သို့ကြိုဆိုခဲ့သနည်း။ (၃ ဓမ္မရာဇဝင် ၁၂:၂၇-၃၃။ ၄ ဓမ္မရာဇဝင် ၁၀:၂၉) လူကြီးများသည် ဘုရားသခင်၏ပရောဖက်ကို ဆန့်ကျင်ဘက်ပြုပုံရပြီး သူတို့၏သဘောထားသည် သူတို့၏သားသမီးများကိုကူးစက်ခဲ့ပုံရသည်။

လူငယ်တစ်စုတို့သည် ဘုရားသခင့်ပရောဖက်ကို ပြောင်လှောင်သရော်ခဲ့ကြောင်း ၄ ဓမ္မရာဇဝင် ၂:၂၃၊ ၂၄ က ကျွန်ုပ်တို့အားဖော်ပြထားသည်။ “ဟေဦးပြည်း၊ တက်ဦးလော့။ ဟေဦးပြည်း၊ တက်ဦးလော့” ဟုဆိုကြ၏။ ဧလိရှဲက “ထာဝရဘုရား၏အခွင့်နှင့်ကျိန်ဆိုသဖြင့် ဝံမနှစ်ကောင်တို့သည် တောထဲကထွက်၍ လုလင်ပျိုလေးကျပ်နှစ်ယောက်တို့ကို ကိုက်သတ်လေ၏။” ထိုရှုရိဝက်ဝံညိုများသည် ထိတ်လန့်သွားသောအခါ သို့မဟုတ် သူတို့၏သားငယ်များထိတ်လန့်သွားပုံရသောအခါ အလွန်ရက်စက်ကြမ်းကြုတ်ကြသည်။ (၂ ဓမ္မရာဇဝင် ၁၇:၈။ သု၊ ၁၇:၁၂၊ ၂၈:၁၅) ယေဟောဝါသည် မိမိအားကိုယ်စားပြုသူကို အလွန်အမင်းကဲ့ရဲ့ပြောင်လှောင်ခြင်းအားဖြင့် မိမိကိုကဲ့ရဲ့ပြောင်လှောင်သောသူများအား စီရင်ချက်ချရန် ထိုအကောင်များကို ဘုရားသခင်အသုံးပြုခဲ့ခြင်းဖြစ်သည်။

ကလေးတစ်ဦးသည် ရှိလောအနီးတစ်ဝိုက်တွင် ထိုကဲ့သို့သောကြမ်းတမ်းသည့်ဘဝမျိုးတွေ့ကြုံနိုင်သည့်အဖြစ်က ရှမွေလ၏မိဘများသည် သူ့အား တဲတော်တွင်အမှုထမ်းရန်ခေါ်သွားခဲ့ခြင်းဖြင့် တင်ပြသည့်ယုံကြည်ခြင်းကို ကျွန်ုပ်တို့ပိုမိုလေးမြတ်ရန် အကူအညီဖြစ်စေသင့်သည်။

ထိုအချိန်ထက်စော၍ အလားတူယုံကြည်ခြင်းနှင့် ဆက်ကပ်အပ်နှံမှုကိုတင်ပြခဲ့သည့် စစ်မှန်သောဝတ်ပြုသူအခြားတစ်ဦးမှာ တရားသူကြီးယေဖသဖြစ်သည်။ ယော်ဒန်အရှေ့ဘက်ပိုင်း၊ တောင်ကုန်းထူထပ်သောဂိလဒ်ပြည်တွင် သူနေထိုင်ခဲ့သည်။ ယေဟောဝါအတွက်ဇွဲစိတ်ထက်သန်စွာ ရန်သူအမ္မုန်လူမျိုးများကိုတိုက်ခိုက်ရာတွင် မိမိအားအိမ်မှထွက်၍ ဦးဆုံးကြိုဆိုသောသူသည် ယေဟောဝါအတွက်ပူဇော်သက္ကာဖြစ်စေမည်အကြောင်း သူကျိန်ဆိုခဲ့သည်။ ထိုပူဇော်သက္ကာမှာ သူ့သမီးပျိုလေးဖြစ်ခဲ့သည်။ ထို့ကြောင့် သူ၏တစ်ဦးတည်းသောကလေးကို ရှိလောတွင်ရှိသော ဘုရားသခင့်သန့်ရှင်းရာဌာနသို့ခေါ်သွားပြီး သူမငယ်သည် ထိုတွင် နှစ်ပေါင်းများစွာနေထိုင်ပြီး သစ္စာရှိစွာအမှုထမ်းခဲ့သည်။—တရားသူကြီး ၁၁:၃၀-၄၀။

ရှိလောတစ်ဝိုက်တွင် ရှမွေလနှင့် ယေဖသ၏သမီးတို့တင်ပြခဲ့သော သစ္စာရှိဆက်ကပ်အပ်နှံဝတ်သည် ဤဒေသတွင်ပင်နေကြ၍ ယေဟောဝါ၏ပရောဖက်ကို ပြောင်လှောင်သော လူဆိုးကလေး ၄၂ ယောက်တို့၏မကောင်းသောပုံသက်သေနှင့် လုံးဝကွာခြားသည်။—၁ ကောရိန္သု ၁၀:၆၊ ၁၁ နှိုင်းယှဉ်။

[အောက်ခြေမှတ်ချက်များ]

[Picture Credit Line on page 8]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.

[Picture Credit Line on page 9]

Safari Zoo, Ramat-Gan, Tel Aviv