ကျွန်ုပ်တို့၏ကြီးမြတ်တော်မူသော ဖန်ဆင်းရှင်နှင့်အတူ သိုးထိန်းခြင်း

“ထာဝရဘုရား [ယေဟောဝါ၊ ကဘ] သည် ငါ၏သိုးထိန်းဖြစ်တော်မူ၏။ ငါသည် ဆင်းရဲမခံရ။ ငါ့ဝိညာဉ် [စိုးလ်၊ ကဘ] ကိုအားဖြည့်၍ နာမတော်အဖို့အလို့ငှာ တရားလမ်းထဲ၌ သွေးဆောင်တော်မူ၏။”—ဆာလံ ၂၃:၁၊ ၃။

၁။ အဘယ်မေတ္တာပါသောလန်းဆန်းမှုကို ယေဟောဝါပေးတော်မူခဲ့ပြီနည်း။

ဆာလံ ၂၃ ဖြစ်သည့် “ဒါဝိဒ်၏သီချင်း” သည်ပင်ပန်းနွမ်းလျသူများစွာတို့အား လန်းဆန်းမှုပေးခဲ့ပြီ။ အငယ် ၆ တွင်ဖော်ပြထားသည့် စိတ်ချမှုရှိစေရန် သူတို့အားတိုက်တွန်းလှုံ့ဆော်ပေးခဲ့ပြီ။ “အကယ်စင်စစ် အကျွန်ုပ်သည် ကျေးဇူးနှင့်ကရုဏာကို တစ်သက်လုံးခံစား၍ ထာဝရဘုရား [ယေဟောဝါ၊ ကဘ] ၏အိမ်တော်မှာ အစဉ်အမြဲနေရပါလိမ့်မည်။” ယေဟောဝါ၏ဝတ်ပြုရာအိမ်တော်တွင် လူမျိုးအပေါင်းမှ ယခုစုသိမ်းခြင်းခံနေရသူ ကိုယ်တော်၏လူမျိုးနှင့်အတူ စည်းလုံးစွာ ဤသို့နေလိုခြင်းသည် သင့်ဆန္ဒဖြစ်သလော။ “သိုးထိန်းတည်းဟူသော သင်တို့၏ဝိညာဉ် [စိုးလ်၊ ကဘ] တို့ကိုအုပ်စိုးကြည့်ရှုတော်မူသော” ကျွန်ုပ်တို့၏ကြီးမြတ်တော်မူသည့် ဖန်ဆင်းရှင်ယေဟောဝါဘုရားသခင်သည် ထိုပန်းတိုင်သို့အရောက် ပို့ဆောင်ပေးပါလိမ့်မည်။—၁ ပေတရု ၂:၂၅။

၂၊ ၃။ (က) မိမိလူများကို ယေဟောဝါသည် မေတ္တာရှိစွာဖြင့် မည်သို့ထိန်းကျောင်းတော်မူသနည်း။ (ခ) ယေဟောဝါ၏ “သိုးတော်စု” သည် မည်သို့ထူးခြားလှစွာတိုးပွားလာသနည်း။

^၂ “ကောင်းကင်သစ်နှင့်မြေကြီးသစ်” ၏ဖန်ဆင်းရှင်သည်“ဘုရားသခင်၏အိမ်တော်” ခရစ်ယာန်အသင်းတော်ကို ဖွဲ့စည်းစီရင်သည့် ကြီးကြပ်မှူးချုပ်လည်း ဖြစ်တော်မူသည်။ (၂ ပေတရု ၃:၁၃။ ၁ တိမောသေ ၃:၁၅) “ကြည့်ရှုလော့။ အရှင်ထာဝရဘုရား [ယေဟောဝါ၊ ကဘ] သည် ကြီးသောတန်ခိုးနှင့်ကြွလာ၍ လက်ရုံးတော်အားဖြင့် အစိုးရတော်မူလိမ့်မည်။ မိမိခံတော်မူထိုက်သောအခ မိမိ၌ပါလျက် ဆုလာဘ်တော်သည် ရှေ့တော်၌ရှိ၏။ မိမိသိုးစုကို သိုးထိန်းကဲ့သို့ကျွေးမွေးတော်မူမည်။ သိုးသငယ်တို့ကိုချီ၍ ပိုက်ပွေ့တော်မူမည်။ သားငယ်ရှိသောသိုးမတို့ကိုလည်း ဖြည်းညှင်းစွာပို့ဆောင်တော်မူမည်” ဟု ဟေရှာယ ၄၀:၁၀၊ ၁၁ တွင်ရှင်းလင်းပြတ်သားစွာပြောထားသည်အတိုင်း သိုးတော်စုကိုထိန်းကျောင်းပေးရန် ကိုယ်တော်လေးလေးနက်နက်စိတ်ဝင်စားတော်မူသည်။

^၃ အကျယ်ချဲ့ရလျှင် ဤ “သိုးတော်စု” တွင် ခရစ်ယာန်သမ္မာတရားလမ်း၌ ကြာမြင့်စွာလျှောက်လှမ်းခဲ့သူများအပြင် ယခု အာဖရိကနှင့်အရှေ့ဥရောပနိုင်ငံများတွင် နှစ်ခြင်းခံယူခဲ့သူလူများစွာတို့ကဲ့သို့သော မကြာမီနှစ်အနည်းငယ်အတွင်း စုသိမ်းခံနေရသူ “သိုးသငယ်တို့” လည်းပါဝင်ပါသည်။ ယေဟောဝါ၏ ခိုင်ခံ့၍၊ ကာကွယ်မှုပေးသောလက်ရုံးဖြင့် သူတို့အား ရင်ခွင်တော်တွင်းသို့ စုရုံးပေးနေတော်မူ၏။ သူတို့သည် ပျောက်လွင့်သောသိုးများပမာဖြစ်ခဲ့ရသော်လည်း သူတို့ချစ်မြတ်နိုးသောဘုရားသခင်သိုးထိန်းရှင်နှင့် ယခုတရင်းတနှီးဆက်ဆံနေနိုင်ကြပြီ။

ယေဟောဝါ၏ တွဲဖက်သိုးထိန်းရှင်

၄၊ ၅။ (က) ‘သိုးထိန်းကောင်း’ ကားမည်သူနည်း။ ပရောဖက်ပြုချက်က ကိုယ်တော်ကို မည်သို့ညွှန်ပြသနည်း။ (ခ)အဘယ်ခွဲခြားခြင်းလုပ်ငန်းကို ယေရှုကြီးကြပ်ပေးနေတော်မူ၍ အဘယ်ထူးခြားသောရလဒ်ကို ရရှိနေသနည်း။

^၄ ကောင်းကင်တွင် ခမည်းတော်၏လက်ယာဘက်၌နေ၍ အမှုတော်ထမ်းသော ‘သိုးထိန်းကောင်း’ ယေရှုခရစ်သည်လည်း “သိုးများ” ကိုညှာတာစွာဖြင့် ဂရုစိုက်တော်မူသည်။ ကိုယ်တော်သည် ဦးဆုံးဘိသိက်ခံ “သိုးစုငယ်”၊ ထို့နောက် ယနေ့ “အခြားသိုး” မှလူအုပ်ကြီးကို အကျိုးပြုစေခြင်းငှာ အသေခံတော်မူခဲ့ပြီ။ (လုကာ ၁၂:၃၂။ ယောဟန် ၁၀:၁၄၊ ၁၆) ကြီးမြတ်တော်မူသောသိုးထိန်း ယေဟောဝါဘုရားသခင်သည် ဤသိုးတို့အား “ငါသည် ကိုယ်တိုင် . . . တိရစ္ဆာန်အမျိုးမျိုးတို့ကိုလည်း ငါပိုင်းခြားမည်။ သိုးထိန်းတစ်ဦးကိုလည်း ငါခန့်ထား၍ သူသည် ကျွေးမွေးလိမ့်မည်။ ငါ၏ကျွန်ဒါဝိဒ်သည် သူတို့ကိုကျွေးမွေး၍ သိုးထိန်းလုပ်ရလိမ့်မည်။ ငါထာဝရဘုရား [ယေဟောဝါ၊ ကဘ] သည် သူတို့၏ဘုရားသခင်ဖြစ်မည်။ ငါ၏ကျွန်ဒါဝိဒ်သည်လည်း သူတို့၏မင်းဖြစ်ရလိမ့်မည်။ ငါထာဝရဘုရား [ယေဟောဝါ၊ ကဘ] ပြောပြီ။”—ယေဇကျေလ ၃၄:၂၀-၂၄။

^၅ “ငါ၏ကျွန်ဒါဝိဒ်” ဟူသောဘွဲ့အမည်သည် ဒါဝိဒ်၏ထီးနန်းအမွေခံ “မျိုးစေ့” ခရစ်တော်ယေရှုအား ပရောဖက်ပြုညွှန်ပြခြင်းဖြစ်သည်။ (ဆာလံ ၈၉:၃၅၊ ၃၆) လူမျိုးတို့ကို တရားစီရင်ရာ ဤနေ့ရက်တွင် ယေဟောဝါ၏တွဲဖက်သိုးထိန်း၊ ဒါဝိဒ်၏သား ဘုရင်ခရစ်တော်ယေရှုသည် “သိုး” ပါဟုဆိုကြမည်ဖြစ်သော်လည်း အမှန်မှာ “ဆိတ်” ဖြစ်နေသူများမှ “သိုး” ဖြစ်သူများကို ဆက်လက်ပိုင်းခြားခွဲထုတ်နေတော်မူသည်။ (မဿဲ ၂၅:၃၁-၃၃) “သိုးများကို ကျွေးမွေး” စေခြင်းငှာဤ “သိုးထိန်းတစ်ဦး” ကိုခန့်ထားတော်မူခြင်းလည်းဖြစ်သည်။ ယနေ့ဤပရောဖက်ပြုချက် အကြီးအကျယ်ပြည့်စုံနေသည်ကို တွေ့ရှိရသည်တကား။ “ကမ္ဘာသစ်အစီအစဉ်” အားဖြင့်လူသားတို့ကိုစည်းလုံးစေမည်ဟု ကြွားလုံးထုတ်နေကြသော်လည်း ဤကမ္ဘာပေါ်တွင် ဘုရားသခင်၏အဖွဲ့အစည်းသာလျှင် ဆောင်ရွက်နိုင်သည့် ဘာသာစကားအမျိုးမျိုးနှင့်သက်သေခံခြင်းစီမံကိန်းအားဖြင့် လှုပ်ရှားနေသည့်လူမျိုးအသီးသီးမှ “သိုးများ” ကို ဤသိုးထိန်းတစ်ဦးသည် အမှန်တကယ်ပင် စည်းရုံးစုသိမ်းနေတော်မူသည်။

၆၊ ၇။ သိုးတော်စုအတွက် ‘အချိန်တန်လျှင်အစားအသောက်’ ကို ‘သစ္စာသတိပညာရှိကျေးကျွန်’ မည်သို့ပြင်ဆင်ကျွေးမွေးပေးနေသနည်း။

^၆ အရပ်ဒေသအသစ်များထံ ဘုရားသခင့်နိုင်ငံတော်သတင်း တိုးချဲ့ပျံ့နှံ့သွားစဉ် သိုးထိန်းတစ်ဦးတည်း၏ စေလွှတ်ခြင်းကိုခံရသော ဘိသိက်ခံခရစ်ယာန် ‘သစ္စာသတိပညာရှိကျေးကျွန်’ သည် “အချိန်တန်လျှင်အစားအသောက်” ကိုကျွေးမွေးပေးခြင်းငှာ ပြင်ဆင်ချက်အသီးသီးကို ပြုလုပ်ဆောင်ရွက်ပေးပါသည်။ (မဿဲ ၂၄:၄၅) သာ၍ကောင်းသောကျမ်းစာပြဌာန်းစာအုပ်များနှင့် မဂ္ဂဇင်းများကို တိုး၍တိုး၍တောင်းဆိုခြင်းကို ဖြည့်စွက်ပေးနိုင်ရန် ကမ္ဘာတစ်ဝန်းရှိ ကင်းမျှော်စင်အသင်း၏ ပုံနှိပ်သောဌာနခွဲ ၃၃ ခုတို့အနက်အများသည် ထုတ်လုပ်နှုန်းတိုးမြှင့်ပေးနေပါသည်။

^၇ ကမ္ဘာ့လယ်ကွင်းတစ်ဝန်း သတင်းတရားပျံ့နှံ့ရေးအတွက် ဘာသာစကား ၂၀၀ ခန့်ဖြင့် ဘာသာပြန်ဆိုသည့်အရည်အသွေး တိုးတက်လာရန်နှင့် လိုအပ်သ၍ ထပ်ဆင့်ဘာသာစကားများသို့ ဘာသာပြန်ဆိုခြင်းငှာ ယေဟောဝါသက်သေများ၏ အုပ်ချုပ်ရေးအဖွဲ့သည် အတတ်နိုင်ဆုံးကြိုးစားအားထုတ်နေပါသည်။ ယင်းကား တမန်တော် ၁:၈ တွင်တပည့်တော်များအား ယေရှုပေးထားသည့်အမိန့်တော်နှင့်အညီဖြစ်ပေသည်။ “သင်တို့အပေါ်သို့ သန့်ရှင်းသောဝိညာဉ်တော်ဆင်းသက်သောအခါ သင်တို့သည် တန်ခိုးကိုခံရ၍ . . . မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။” ထို့ပြင် New World Translation of the Holy Scriptures ကို ဘာသာစကား ၁၄ မျိုးသို့ ကျမ်းတစ်အုပ်လုံးသော်လည်းကောင်း၊ တစ်စိတ်တစ်ပိုင်းသော်လည်းကောင်း ပုံနှိပ်ပြီးဖြစ်ကာ ဥရောပ၊ အာဖရိကနှင့်အရှေ့တိုင်းမှ ဘာသာစကား ၁၆ မျိုးသို့ ယခုပြန်ဆိုနေဆဲရှိသည်။

“ဘုရားသခင်၏ငြိမ်သက်ခြင်း ကိုမွေ့လျော်ခြင်း”

၈။ ယေဟောဝါရှင်ဖွဲ့တော်မူသည့် ငြိမ်သက်ခြင်းပဋိညာဉ်အားဖြင့် သိုးတော်စုသည် မည်သို့ကြွယ်ဝစွာကောင်းချီးခံစားနေကြရသနည်း။

^၈ ကိုယ်တော်၏သိုးထိန်းတစ်ပါးခရစ်တော်ယေရှုအားဖြင့် ဝဝလင်လင်စားသုံးနေရသောသိုးတော်စုနှင့် ယေဟောဝါရှင်သည် “ငြိမ်သက်ခြင်းပဋိညာဉ်” ကိုဖွဲ့တော်မူသည်။ (ဟေရှာယ ၅၄:၁၀) ယေရှုသွန်းလောင်းတော်မူခဲ့သော အသွေးတော်၌ ယုံကြည်ခြင်းရှိကြောင်းတင်ပြခြင်းအားဖြင့် သိုးတော်စုသည် အလင်း၌ သွားလာနိုင်ကြပါသည်။ (၁ ယောဟန် ၁:၇) ‘ခရစ်တော်ယေရှုအားဖြင့် သူတို့၏စိတ်နှလုံးကိုစောင့်မသော အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်း’ ကိုသူတို့ခံစားနေကြရသည်။ (ဖိလိပ္ပိ ၄:၇) ယေဇကျေလ ၃၄:၂၅-၂၈ ဆက်ဖော်ပြသည့်အတိုင်း ဝိညာဏပရဒိသု၊ ရွှင်လန်းဖွယ် လုံခြုံသောအခြေအနေ၊ လန်းဆန်းစေသည့် ကြွယ်ဝချမ်းသာ၊ အကျိုးဖြစ်ထွန်းမှုရှိ ကြည်နူးအားရဖွယ်အခြေအနေအတွင်းသို့ ယေဟောဝါရှင်သည် သိုးတော်စုအား ထိန်းကျောင်းပို့ဆောင်တော်မူသည်။ ဤမေတ္တာရှင်သိုးထိန်းက မိမိ၏သိုးတော်စုနှင့်ပတ်သက်၍ ဤသို့မိန့်တော်မူသည်။ “သူတို့ထမ်းသော ထမ်းဘိုးကြိုးကိုငါဖြတ်၍ အနိုင်အထက်စေခိုင်းသောသူတို့လက်မှ ကယ်နှုတ်သောအခါ ငါသည် ထာဝရဘုရား [ယေဟောဝါ၊ ကဘ] ဖြစ်ကြောင်းကို သိရကြလိမ့်မည်။ နောက်တစ်ဖန် တစ်ပါးအမျိုးသားတို့သည် မလုမယူရကြ။ . . . အဘယ်သူမျှမကြောက်စေဘဲ သူတို့သည် ငြိမ်ဝပ်စွာနေရကြလိမ့်မည်။”

၉။ ‘ထမ်းဘိုးကြိုးကိုဖြတ်တောက်ခြင်း’ အားဖြင့် ဘုရားသခင့်လူမျိုးတော်အတွက် အဘယ်အခွင့်အလမ်းများ ပွင့်လာခဲ့ပြီနည်း။

^၉ မကြာမီနှစ်များအတွင်းက နိုင်ငံများစွာရှိယေဟောဝါသက်သေများသည် “ထမ်းဘိုးကြိုး” ဖြတ်တောက်ခံရခြင်းကို ကြုံတွေ့ခဲ့ကြပြီ။ တစ်ခါနှင့်မျှမတူ လွတ်လပ်စွာဟောပြောနိုင်ကြပေပြီ။ နိုင်ငံတကာရှိ ကျွန်ုပ်တို့အပေါင်းလည်း လုပ်ငန်းတော်ပြီးစီးရေးအတွက် ယေဟောဝါပြင်ဆင်တော်မူသည့်လုံခြုံမှုကို ကောင်းစွာအသုံးပြုကြစို့လေ။ လူသားအပေါင်း ကြုံတွေ့ကြရမည့် အကြီးတကာ့အကြီးဆုံးဒုက္ခ နီးကပ်လာစဉ် ယေဟောဝါ၏အာမခံချက်သည် ကောင်းလေစွ။—ဒံယေလ ၁၂:၁။ မဿဲ ၂၄:၂၁၊ ၂၂။

၁၀။ ကောင်းမြတ်သောသိုးထိန်း ခရစ်တော်ယေရှုနှင့်အတူ တွဲဖက်ဆောင်ရွက်ရန် မည်သူများကို ယေဟောဝါခန့်အပ်ထားတော်မူသနည်း။ ဤသူတို့အဝင်အချို့ကို တမန်တော်ပေါလု မည်သို့မှာကြားသနည်း။

^၁၀ လူဆိုးတို့အား အမျက်ထွက်တော်မူသည့်နေ့ရက်အတွက် အသင့်ရှိနေခြင်းငှာ သိုးတော်စုကိုစောင့်ရှောက်ပြုစုပေးရန် ကောင်းမြတ်သောသိုးထိန်း၊ ခရစ်တော်ယေရှုနှင့်အတူ တွဲဖက်ဆောင်ရွက်သည့် လက်ထောက်သိုးထိန်းများကို ယေဟောဝါခန့်အပ်ထားတော်မူသည်။ ဤသူတို့အား ဗျာဒိတ် ၁:၁၆ ကယေရှု၏လက်ယာလက်တော်ရှိ ပြည့်စုံသောအရေအတွက် “ကြယ်ခုနစ်လုံး” အဖြစ်ဖော်ပြထားပါသည်။ ပထမရာစုတွင် ဤလက်ထောက်သိုးထိန်း၏ကိုယ်စားလှယ်အဖွဲ့အား တမန်တော်ပေါလု ဤသို့မှာကြားသည်။ “သင်တို့သည် ကိုယ်ကိုသတိနှင့်ကြည့်ရှုကြလော့။ ဘုရားသခင်သည် မိမိ [သားတော်၏၊ ကဘ] အသွေးနှင့်ဝယ်တော်မူသော အသင်းတော်ကိုလုပ်ကျွေးစေခြင်းငှာ သန့်ရှင်းသောဝိညာဉ်တော်သည် သင်တို့ကို အအုပ်အချုပ်ခန့်ထားတော်မူသော သိုးစုတစ်စုလုံးကိုလည်း သတိနှင့်ကြည့်ရှုကြလော့။” (တမန်တော် ၂၀:၂၈) ယနေ့ကမ္ဘာတစ်ဝန်း အသင်းတော်ပေါင်း ၆၉,၅၅၈ တွင်အမှုထမ်းနေသော လက်ထောက်သိုးထိန်း ထောင်သောင်းမက ရှိပါသည်။

ရှေ့ပိုင်းရှိ လက်ထောက်သိုးထိန်းများ

၁၁။ ထပ်ခါတလဲအမှုဆောင်သည့်ရပ်ကွက်များတွင် သိုးထိန်းအချို့သည် မည်သို့အောင်မြင်စွာ ဦးဆောင်ခဲ့ကြပြီနည်း။

^၁၁ ဤနောက်ဆုံးကာလအတွင်း ထပ်ခါတလဲအမှုဆောင်ရသည့်ရပ်ကွက်များတွင် ယင်းသိုးထိန်းတို့သည် နေရာအများ၌ ဦးဆောင်ပြုလုပ်နေကြပါသည်။ သိုးတော်စု၏ စိတ်ဇောထက်သန်မှု တည်မြဲတည်စေရန် သူတို့မည်သို့ပြုလုပ်နိုင်မည်နည်း။ သိုးထိန်းများ၏ကြိုးပမ်းမှုသည် အမှန်ချီးမွမ်းစရာပင်။ သူတို့အောင်မြင်မှုရခြင်းအကြောင်းတစ်ခုကား အရန်နှင့် မှန်မှန်ရှေ့ဆောင်ခြင်းလုပ်ငန်းကို လှုံ့ဆော်တိုက်တွန်းပေးခြင်းကြောင့်ဖြစ်သည်။ သိုးထိန်းမြောက်မြားစွာကိုယ်တိုင်ပင် ဤလုပ်ငန်းတွင် ပါဝင်ခဲ့ကြပြီဖြစ်၍ ထိုသို့မဆောင်ရွက်နိုင်သောကြေညာသူများပင်လျှင် ရှေ့ဆောင်စိတ်ဓာတ်တင်ပြကာ ရပ်ကွက်ရှိဥပေက္ခာပြုမှုကို အနိုင်ယူစေသည့် ရွှင်လန်းခြင်းနှင့် အမှုတော်ထမ်းနေကြသည်။ (ဆာလံ ၁၀၀:၂။ ၁၀၄:၃၃၊ ၃၄။ ဖိလိပ္ပိ ၄:၄၊ ၅) ဤနည်းအားဖြင့် ဆိုးသွမ်းမှုနှင့် ဖရိုဖရဲအခြေနေသည် ကမ္ဘာတစ်လွှားပျံ့နှံ့နေစဉ် သိုးကဲ့သို့သောသူမြောက်မြားစွာသည် ဘုရားသခင့်နိုင်ငံတော်မျှော်လင့်ချက်ကြောင့် နိုးကြားလာကြပြီ။—မဿဲ ၁၂:၁၈၊ ၂၁။ ရောမ ၁၅:၁၂။

၁၂။ အလျင်အမြန်တိုးတက်နေသည့်နေရာများတွင် အဘယ်အရေးအကြောင်းပေါ်ပေါက်နေသနည်း။ ယင်းပြဿနာကို တစ်ခါတစ်ရံ မည်သို့ဖြေရှင်းပေးရသနည်း။

^၁၂ အခြားပြဿနာတစ်ခုမှာ သိုးတော်စုကို ပြုစုစောင့်ရှောက်ပေးရန် အရည်အချင်းရှိသိုးထိန်း အလုံအလောက်မရှိသည်ကား များပါသည်။ အရှေ့ဥရောပမှာကဲ့သို့ အလျင်အမြန်တိုးတက်နေသည့်နေရာများတွင် ခန့်အပ်ခံအကြီးအကဲများ လုံးလုံးမရှိသည့် အသင်းတော်အသစ်များစွာရှိပါသည်။ စေတနာစိတ်ရှိသိုးတော်စုအဝင်ဖြစ်သူများ တာဝန်ယူနေကြသော်လည်း သူတို့သည် အတွေ့အကြုံအလွန်နည်းပါးသူများဖြစ်ကြပြီး အသင်းတော်အတွင်း စုပြုံဝင်လာနေသော သိုးများကိုလေ့ကျင့်ပေးရန် အကူအညီလိုအပ်နေပါသည်။ တိုးတက်မှုနှုန်းအလွန်လျင်မြန်နေသည့် ဘရာဇီး၊ မက္ကဆီကိုနှင့်ဇိုင်ယာနိုင်ငံများကဲ့သို့သော နိုင်ငံများတွင် လုပ်ငန်းတော်ကို ဦးဆောင်ဖွဲ့စည်းပေးရန်နှင့် လူသစ်များကိုလေ့ကျင့်ပေးရန် အတော်အတန်အသက်ငယ်ရွယ်သော သက်သေခံများကို အသုံးပြုနေရပါသည်။ ရှေ့ဆောင်များသည် များစွာဝိုင်းဝန်းကူညီနေကြရာ ဤတွင် ညီအစ်မအသစ်များကို ညီအစ်မများကူညီပေးနိုင်ပါသည်။ အကျိုးဖြစ်ထွန်းလာစေရန် ယေဟောဝါ၏ဝိညာဉ်တော်က ကောင်းချီးပေးနေပါသည်။ သို့ဖြင့်တိုးတက်မြဲ တိုးတက်နေသည်။—ဟေရှာယ ၅၄:၂၊ ၃။

၁၃။ (က) စပါးရိတ်စရာ များစွာရှိနေသည့်အတွက် သက်သေခံအားလုံး အဘယ်အရာအတွက်ဆုတောင်းသင့်သနည်း။ (ခ) ဒုတိယကမ္ဘာစစ်မတိုင်မီနှင့် ယင်းအတောအတွင်း ဘုရားသခင့်လူမျိုး၏ဆုပတ္ထနာများကို ကိုယ်တော်မည်သို့ဖြေဆိုတော်မူခဲ့သနည်း။

^၁၃ ဟောပြောခြင်းလုပ်ငန်း ကောင်းစွာအခြေခိုင်ပြီးနိုင်ငံများ၊ များမကြာမီက ကန့်သတ်ချုပ်ချယ်မှုများ ပယ်ရှားပစ်ခဲ့သောနိုင်ငံများနှင့် ဖွင့်ခါစရပ်ကွက်အသစ်များတွင် မဿဲ ၉:၃၇၊ ၃၈ ပါယေရှု၏စကားများသက်ဆိုင်ဆဲရှိသည်။ “စပါးရိတ်စရာ များစွာရှိ၏။ ရိတ်သောသူတို့သည် နည်းကြ၏။ ထိုကြောင့် လုပ်ဆောင်သောသူတို့ကို စပါးရိတ်စေခြင်းငှာ စေလွှတ်တော်မူမည်အကြောင်း စပါးရှင်ကိုဆုတောင်းကြလော့။” သိုးထိန်းများစွာရလာဖို့အတွက်လည်း ယေဟောဝါထံဆုတောင်းရန်လိုပါသည်။ သို့ပြုနိုင်တော်မူကြောင်း ကိုယ်တော်တင်ပြခဲ့ပြီ။ ဒုတိယကမ္ဘာစစ်မတိုင်မီနှင့် ယင်းအတောအတွင်း ရက်စက်ကြမ်းကြုတ်သော အာရှုရိကဲ့သို့သော အာဏာရှင်များသည် ယေဟောဝါသက်သေများ ပျောက်လွင့်သွားရန် ကြိုးစားခဲ့ကြသည်။ သို့သော် သူတို့၏ဆုပတ္ထနာများကို ဖြေဆိုတော်မူသည့်အနေနှင့် အဖွဲ့အစည်းကို အမှန်သီအိုကရက်တစ်ဖြစ်လာစေရန် ယေဟောဝါသန့်စင်စေတော်မူ၍ လိုအပ်သမျှသိုးထိန်းများ ပေါ်ထွက်လာစေတော်မူသည်။aယင်းကား ဤပရောဖက်ပြုချက်အတိုင်းဖြစ်သည်။ “အာရှုရိလူသည် ငါတို့ပြည်သို့လာ၍ ငါတို့ဘုံဗိမာန်များကိုနင်းသောအခါ သိုးထိန်းခုနစ်ပါးနှင့် လူကြီးရှစ်ပါးတို့သည် ငါတို့တွင်ပေါ်ထွန်း” ခဲ့ရာ ဦးဆောင်မည့် ကြိုးပမ်းအားထုတ်သူ အလုံအလောက်ရှိရုံမက ပိုလျှံနေသည်ကို တွေ့ရှိရ၏။—မိက္ခာ ၅:၅။

၁၄။ အဖွဲ့အစည်းတွင် အဘယ်ထူးခြားသောလိုအပ်ချက် ပေါ်ပေါက်နေပါသနည်း။ ညီအစ်ကိုများအား မည်သို့လှုံ့ဆော်တိုက်တွန်းထားသနည်း။

^၁၄ နှစ်ခြင်းခံယူပြီးသော သက်သေခံအမျိုးသားအားလုံး ထပ်ဆင့်အခွင့်အရေးများကို လက်လှမ်းယူကြရန် ထူးထူးခြားခြားလိုအပ်နေပါသည်။ (၁ တိမောသေ ၃:၁) အလျင်စလိုအခြေအနေမျိုး ဆိုက်ရောက်နေပါပြီ။ ဤအစီအစဉ်စနစ်၏ဆုံးခန်း အလျင်အမြန်ချဉ်းကပ်နေပါသည်။ ဟဗက္ကုတ် ၂:၃ ဆိုသည်အတိုင်းဖြစ်ချေပြီ။ “ထိုရူပါရုံသည် ချိန်းချက်သောအချိန်နှင့်ဆိုင်၍ အမှုကုန်ရသောကာလကိုဆိုလို၏။ မုသာနှင့်ကင်းလွတ်၏။ . . . မျှော်လင့်လော့။ နောက်မကျဘဲ ဧကန်အမှန်ရောက်လိမ့်မည်။” အသင်ညီအစ်ကိုများ၊ အဆုံးမတိုင်မီ ဤသိုးထိန်းခြင်းလုပ်ငန်းတွင် ထပ်ဆင့်အခွင့်အရေးများ ခံယူနိုင်သည့် အရည်အချင်းရှိသူဖြစ်လာနိုင်ရန် တက်လှမ်းနိုင်ကြဦးမည်လော။—တိတု ၁:၆-၉။

သီအိုကရက်တစ် သိုးထိန်းခြင်း

၁၅။ ယေဟောဝါ၏လူများသည် အဘယ်နည်းဖြင့် သီအိုကရေစီဖြစ်သနည်း။

^၁၅ ယေဟောဝါအဖွဲ့အစည်းတိုးချဲ့မှုတွင် အပြည့်အဝပါဝင်နိုင်ရန် ကိုယ်တော်၏လူမျိုးသည် သီအိုကရက်တစ်အမြင်ရှိရန်လိုပါသည်။ ယင်းအမြင်မျိုး မည်သို့ရနိုင်မည်နည်း။ ဦးဆုံး “သီအိုကရက်တစ်” မည်သည်ကားအဘယ်နည်း။ Webster’s New Twentieth Century Dictionary က “သီအိုကရေစီ” မည်သည် “ဘုရားအစိုးရသောပြည်နယ်” ဟုဖော်ပြသည်။ ဤသဘောတရားဖြင့် ယေဟောဝါ၏ “သန့်ရှင်းသောလူမျိုး” သည် သီအိုကရေစီဖြစ်သည်။ (၁ ပေတရု ၂:၉။ ဟေရှာယ ၃၃:၂၂) ထိုသီအိုကရက်တစ်လူမျိုးအဝင်အဖြစ် ခရစ်ယာန်စစ်များသည် ဘုရားသခင့်နှုတ်ကပါဌ်တော်နှင့် ယင်း၏မူဝါဒများအတိုင်း အသက်ရှင်နေထိုင်ကြရမည်။

၁၆။ ကျွန်ုပ်တို့သည် သီအိုကရက်တစ်ဖြစ်ကြောင်း အခြေခံအရ မည်သို့တင်ပြနိုင်သနည်း။

^၁၆ ခရစ်ယာန်များသည် မည်သို့သီအိုကရက်တစ်ဖြစ်သင့်ကြောင်း တမန်တော်ပေါလု ကောင်းစွာရှင်းပြပါသည်။ ဦးဆုံးအနေနှင့် “မှန်သောဖြောင့်မတ်ခြင်း၊ သန့်ရှင်းခြင်း [သစ္စာစောင့်သိခြင်း၊ ကဘ] ပါရမီအားဖြင့် ဘုရားသခင် [အလိုတော်နှင့်အညီ၊ ကဘ] နှင့်အတူအမျှ ဖန်ဆင်းသောလူသစ်ကို ယူတင်ဝတ်ဆောင်” ကြရမည်ဟုသူဆိုသည်။ ဘုရားသခင့်နှုတ်ကပါဌ်တော်တွင် ချမှတ်ထားတော်မူသည့် ကိုယ်တော်၏ဖြောင့်မတ်သောကျင့်စဉ်များနှင့်အညီ ခရစ်ယာန်တစ်ဦးသည် မိမိဥပဓိရုပ်ကို ပုံသွင်းရမည်ဖြစ်သည်။ ယေဟောဝါရှင်နှင့် ကိုယ်တော်၏ပညတ်တော်များကို သစ္စာရှိရပါမည်။ ယင်းကိုမည်သို့ပြုလုပ်ရမည့်အကြောင်း ဖော်ပြပြီးနောက် ပေါလုဤသို့တိုက်တွန်းထားသည်။ “ဘုရားသခင်၏ချစ်သားဖြစ်ကြသည်နှင့်အညီ ဘုရားသခင်ကျင့်တော်မူသည်နည်းတူ ကျင့်ကြလော့။” (ဧဖက် ၄:၂၄–၅:၁) နာခံမှုရှိသားသမီးများအလား ဘုရားသခင်ကို အတုယူကြရမည်။ ယင်းသို့ပြုခြင်းကား တကယ်သီအိုကရက်တစ်ဖြစ်ကြောင်း လက်တွေ့ပြခြင်း၊ ဘုရားသခင့်အုပ်ထိန်းမှုကို အမှန်ခံယူနေကြောင်း တင်ပြခြင်းဖြစ်သည်။—ကောလောသဲ ၃:၁၀၊ ၁၂-၁၄ ကိုလည်းရှု။

၁၇၊ ၁၈။ (က) သီအိုကရက်တစ်ခရစ်ယာန်များ ဘုရားသခင်၏ အဘယ်ထူးခြားသောအရည်အချင်းကို တုပမည်နည်း။ (ခ) မောရှေအားမှာကြားသည့်စကားများတွင် ယေဟောဝါရှင်သည် ကိုယ်တော်၏အဓိကအရည်အချင်းကို မည်သို့အလေးအနက်ပေါ်လွင်စေ၍ အဘယ်သတိပေးချက်ကို ထည့်သွင်းတော်မူသနည်း။

^၁၇ ကျွန်ုပ်တို့အတုယူသင့်သည့် ဘုရားသခင်၏အဓိကအရည်အချင်းကား အဘယ်နည်း။ ၁ ယောဟန် ၄:၈ ၌ “ဘုရားသခင်သည် ချစ်ခြင်းမေတ္တာဖြစ်တော်မူ၏” ဟုပြော၍ တမန်တော်ယောဟန်အဖြေပေးပါသည်။ ဆက်၍အခန်းငယ်ရှစ်ခုမြောက်၊ အငယ် ၁၆ တွင် ဤအရေးပါမူဝါဒကို သူထပ်မံတင်ပြသည်။ “ဘုရားသခင်သည် ချစ်ခြင်းမေတ္တာဖြစ်တော်မူ၏။ ချစ်ခြင်းမေတ္တာ၌တည်သောသူသည် ဘုရားသခင်၌တည်၏။ ဘုရားသခင်သည်လည်း ထိုသူ၌တည်တော်မူ၏။” ကြီးမြတ်တော်မူသောသိုးထိန်း ယေဟောဝါရှင်သည် ချစ်ခြင်းမေတ္တာ၏ပြယုဂ် ဖြစ်တော်မူသည်။ ယေဟောဝါ၏သိုးများကို နက်ရှိုင်းစွာချစ်ကြောင်းတင်ပြခြင်းအားဖြင့် သီအိုကရက်တစ်သိုးထိန်းများသည် ကိုယ်တော်ကိုတုပနေခြင်းဖြစ်သည်။—၁ ယောဟန် ၃:၁၆၊ ၁၈၊ ၄:၇-၁၁ နှိုင်းယှဉ်။

^၁၈ ကြီးမြတ်တော်မူသောသီအိုကရက်သည် မောရှေအား၊ “ယေဟောဝါ၊ ယေဟောဝါ၊ ချစ်သနားခြင်းမေတ္တာကရုဏာနှင့်ပြည့်စုံ၍ အမျက်ထွက်နှေးခြင်း၊ ချစ်ခင်ကြင်နာခြင်းနှင့်သမ္မာတရား ကြွယ်ဝတော်မူထသော၊ အထောင်အသောင်းသောသူတို့အပေါ် ချစ်ခင်ကြင်နာခြင်းကို ရှေ့ရှုတော်မူထသော၊ မတရားပြုခြင်း၊ တရားတော်ကိုလွန်ကျူးခြင်း၊ ပြစ်မှားခြင်းအပြစ်တို့ကို ဖြေလွှတ်သော်လည်း အချည်းနှီးသက်သက် လွှတ်တော်မမူထသော၊ သားစဉ်မြေးဆက်၊ တတိယအဆက်၊ စတုတ္ထအဆက်တိုင်အောင် အဘတို့၏အပြစ်ကို သားတို့၌ဆပ်ပေးစီရင်တော်မူသောဘုရားသခင်” ဟု ကိုယ်တော်တိုင်အကြောင်း ဖော်ပြတော်မူခဲ့သည်။ (ထွက်မြောက်ရာ ၃၄:၆၊ ၇၊ ကဘ) ဤနည်းဖြင့် ယေဟောဝါ၏ထူးခြားသော သီအိုကရက်တစ်အရည်အချင်းဖြစ်သည့် ချစ်ခြင်းမေတ္တာတော်၏ အသွင်အမျိုးမျိုးကို အလေးအနက်ဖော်ပြစဉ် အပြစ်စီရင်ထိုက်လျှင် အပြစ်ပေးတော်မူမည်အကြောင်း အတိအလင်းသတိပေးတော်မူခဲ့သည်။

၁၉။ ခရစ်ယာန်သိုးထိန်းများသည် ဖာရိရှဲများနှင့်ခြားနားစွာ သီအိုကရက်တစ်နည်းဖြင့် မည်သို့ပြုမူသင့်သနည်း။

^၁၉ အဖွဲ့အစည်းတွင် တာဝန်ဝတ္တရားများထမ်းဆောင်ရန် ခန့်အပ်ခံရသူများသည် သီအိုကရက်တစ်ဖြစ်ရမည်ဟုဆိုခြင်းမှာ အဘယ်အဓိပ္ပာယ်ရှိသနည်း။ မိမိခေတ်ရှိ ကျမ်းပြုဆရာနှင့်ဖာရိရှဲများအကြောင်း ယေရှုဤသို့ဆိုသည်။ “အလွန်လေး၍ ထမ်းခဲသောဝန်တို့ကိုပြင်ဆင်၍ သူတစ်ပါးပခုံးပေါ်မှာတင်တတ်ကြ၏။ မိမိတို့မူကား လက်ဖျားနှင့်မျှမရွှေ့လိုကြ။” (မဿဲ ၂၃:၄) အလွန်ဖိနှိပ်နိုင်နင်းပြီး မေတ္တာမဲ့လှသည်တကား။ ကျမ်းစာ၏မေတ္တာပါမူဝါဒများကို ကျင့်သုံးခြင်းအားဖြင့် သိုးတော်စုကိုထိန်းကျောင်းပေးရန်၊ မကုန်မခမ်းနိုင်သော လူ့စည်းမျဉ်းများဖြင့် သိုးတော်စုအား ဝန်ပိမနေစေရန် စစ်မှန်သောသီအိုကရေစီ၊ သို့မဟုတ် ဘုရားအုပ်ချုပ်မှုက တောင်းဆိုထားပါသည်။ (မဿဲ ၁၅:၁-၉ နှိုင်းယှဉ်။) တစ်ချိန်တည်းတွင် သူတို့၏ချစ်ခြင်းမေတ္တာတွင် အသင်းတော်၏သန့်ရှင်းစင်ကြယ်ရေးကို အခိုင်အမာရှေ့ရှုခြင်းသဘော ထပ်ဆင့်ခြင်းအားဖြင့် သီအိုကရက်တစ်သိုးထိန်းများသည် ဘုရားသခင်ကိုတုပကြရမည်။—ရောမ ၂:၁၁။ ၁ ပေတရု ၁:၁၇ နှိုင်းယှဉ်။

၂၀။ အဖွဲ့အစည်းဆိုင်ရာ အဘယ်အစီအစဉ်များကို သီအိုကရက်တစ်သိုးထိန်းများ အသိအမှတ်ပြုသနည်း။

^၂၀ ဤနောက်ဆုံးကာလတွင် ယေရှုသည် မိမိဥစ္စာရှိသမျှကို သစ္စာသမာဓိရှိကျေးကျွန်ထံ အပ်နှင်းထားကြောင်း၊ သိုးတော်စုထိန်းကျောင်းရေးအတွက် အကြီးအကဲများခန့်အပ်ပေးခြင်းငှာ ဤကျေးကျွန်အား သန့်ရှင်းသောဝိညာဉ်တော်ညွှန်ကြားပေးကြောင်း စစ်မှန်သောသိုးထိန်းများ အသိအမှတ်ပြုကြသည်။ (မဿဲ ၂၄:၃၊ ၄၇။ တမန်တော် ၂၀:၂၈) သို့ဖြစ်၍ သီအိုကရက်တစ်ဖြစ်ခြင်းတွင် ဤကျေးကျွန်ကိုလည်းကောင်း၊ ဤကျေးကျွန် အတည်ပြုသော အဖွဲ့အစည်းဆိုင်ရာအစီအစဉ်များကိုလည်းကောင်း၊ အသင်းတော်အတွင်း အကြီးအကဲအစီအစဉ်ကိုလည်းကောင်း အလေးအနက်ရိုသေလေးစားခြင်းပါဝင်သည်။—ဟေဗြဲ ၁၃:၇၊ ၁၇။

၂၁။ လက်ထောက်သိုးထိန်းများအတွက် အဘယ်ပုံသက်သေကောင်းကို ယေရှုချမှတ်ပေးတော်မူခဲ့သနည်း။

^၂၁ ယေဟောဝါနှင့်ကိုယ်တော့်နှုတ်ကပါဌ်တော်မှ လမ်းပြညွှန်ကြားမှုရရှိရန် အမြဲအကူအညီယူခြင်းအားဖြင့် ယေရှုကိုယ်တော်တိုင် ပုံသက်သေကောင်းတင်ပြခဲ့သည်။ ကိုယ်တော်က “ငါသည် ကိုယ်အလိုအလျောက် အဘယ်အမှုကိုမျှမပြုနိုင်။ ငါသည် ကြားသည်အတိုင်း တရားစီရင်၏။ ငါစီရင်ခြင်းသည်လည်း တရားတော်နှင့်ညီညွတ်၏။ အကြောင်းမူကား၊ ငါသည် ကိုယ်အလိုသို့မလိုက်။ ငါ့ကိုစေလွှတ်တော်မူသော ခမည်းတော်၏အလိုသို့လိုက်၏။” (ယောဟန် ၅:၃၀) သခင်ယေရှုခရစ်၏ လက်ထောက်သိုးထိန်းများသည် ထပ်တူနှိမ့်ချသောသဘောထား မွေးမြူသင့်သည်။ အကြီးအကဲတစ်ဦးသည် ဘုရားသခင့်နှုတ်ကပါဌ်တော်၏ညွှန်ကြားမှုကို ယေရှုနည်းတူ အမြဲတောင်းခံမည်ဆိုလျှင် သူသည် အမှန်ပင်သီအိုကရက်တစ်ဖြစ်ပါသည်။—မဿဲ ၄:၁-၁၁။ ယောဟန် ၆:၃၈။

၂၂။ (က) အဘယ်နည်းဖြင့် သီအိုကရက်တစ်ဖြစ်ကြရန် အားလုံးကြိုးစားသင့်သနည်း။ (ခ) သိုးများကို ယေရှု မည်သို့ကြင်နာစွာဖိတ်ခေါ်သနည်း။

^၂၂ နှစ်ခြင်းခံယူပြီးသောအမျိုးသားများတို့၊ အသင်းတော်တွင်းအခွင့်အရေးများအတွက် အရည်အချင်းပြည့်မီရန် လက်လှမ်းကြပါလေ။ အသင်ချစ်မြတ်နိုးရသောသိုးအပေါင်းတို့ သီအိုကရက်တစ်ဖြစ်ရန်၊ ချစ်ခြင်းမေတ္တာပြသရာတွင် ဘုရားသခင်နှင့်ခရစ်တော်ကိုတုပရန် ရည်မှန်းကြပါလေ။ “ဝန်လေး၍ပင်ပန်းသောသူအပေါင်းတို့၊ ငါ့ထံသို့လာကြလော့။ ငါသည် ချမ်းသာပေးမည်။ ငါ့ထမ်းဘိုးကိုတင်၍ ထမ်းကြလော့။ ငါ့ထံ၌နည်းခံကြလော့။ ငါသည် နူးညံ့သိမ်မွေ့ နှိမ့်ချသောစိတ်သဘောရှိ၏။ သင်တို့စိတ်နှလုံးသည် သက်သာခြင်းကိုရလိမ့်မည်။ အကြောင်းမူကား၊ ငါ့ထမ်းဘိုးသည် ထမ်းလွယ်၏။ ငါ့ဝန်သည်လည်း ပေါ့၏” ဟူသောယေရှု၏ဖိတ်ခေါ်ချက်ကို သိုးထိန်းများနှင့် သိုးတော်စုပါ တုံ့ပြန်ခဲ့သောကြောင့် ဝမ်းမြောက်နိုင်ကြပါစေ။—မဿဲ ၁၁:၂၈-၃၀။

[အောက်ခြေမှတ်ချက်များ]

သင်ရှင်းပြနိုင်မည်လော

▫ ယေဟောဝါ၏ “သိုးတော်စု” ကားအဘယ်နည်း။ ယင်း၌ မည်သူများပါဝင်သနည်း။

▫ ပထမရာစုနှင့် ယနေ့တွင် ‘သိုးထိန်းကောင်း’ အဖြစ်ယေရှုခရစ် မည်သို့ပြုလုပ်တော်မူသနည်း။

▫ သိုးတော်စုကိုဂရုပြုရာတွင် လက်ထောက်သိုးထိန်းများသည် အဘယ်အဓိကကဏ္ဍတွင် ပါဝင်လုပ်ဆောင်နေကြသနည်း။

▫ “သီအိုကရေစီ” ဟူသောစကားလုံး၏ အနက်အဓိပ္ပာယ်ကား အဘယ်နည်း။

▫ သီအိုကရက်တစ်ဖြစ်ခြင်းငှာ ခရစ်ယာန်တစ်ဦး—အထူးသဖြင့် လက်ထောက်သိုးထိန်းတစ်ဦး—သည် မည်သို့ပြုမူသင့်သနည်း။

[စာမျက်နှာ ၂၀ ပါ ရုပ်ပုံ]

သစ္စာနှံသိုးထိန်းတစ်ဦးပမာ ယေဟောဝါရှင်သည် သိုးတော်စုကို ဂရုစိုက်တော်မူ၏

[စာမျက်နှာ ၂၃ ပါ ရုပ်ပုံ]

ယေဟောဝါဘုရားသခင်၏ချစ်ခြင်းမေတ္တာအရည်အချင်းကို တုပခြင်းသည် သီအိုကရေစီကို ပြုမူကျင့်သုံးခြင်းဖြစ်