သမ္မာကျမ်းစာ—ယခုခေတ်လူသားများအတွက် လက်တွေ့ကျ လမ်းညွှန်

“ကျမ်းစာရှိသမျှသည် မှုတ်သွင်းခြင်းအားဖြင့်ဖြစ်၍ အကျိုးရှိစွာဖြင့် . . . လူ့အသက်တာ လမ်းပြညွှန်ကြားခြင်းအတွက် ယင်းကိုအသုံးပြုနိုင်သည်။”—၂ တိမောသေ ၃:၁၆၊ “The Jerusalem Bible.”

ဤကျမ်းချက်က ကျွန်ုပ်တို့ခေတ်တွင် သမ္မာကျမ်းစာသည် အဘယ်ကြောင့်လက်တွေ့ကျရခြင်း၏ အကြောင်းရင်းကို ရှင်းပြပါသည်။ သမ္မာကျမ်းစာသည် ဘုရားသခင်မှုတ်သွင်းခြင်းအားဖြင့် ဖြစ်သည်။ ကျွန်ုပ်တို့ကို ဘုရားသခင်ဖန်ဆင်းတော်မူသည့်အတွက် ကျွန်ုပ်တို့ခန္ဓာကိုယ်၊ စိတ်သဘောထားနှင့် လိုအပ်ရာများကို ကိုယ်တော်ထက် သိနားလည်သူ မရှိပါ။ ဣသရေလရှင်ဘုရင် ဒါဝိဒ်က ယေဟောဝါဘုရားသခင်အကြောင်း ဤသို့ဆိုခဲ့ဖူးသည်။ “အကျွန်ုပ်၏အလုံးအထွေးကိုလည်း ကိုယ်တော်သည် ကြည့်ရှု၍ မြင်တော်မူပြီ။ . . . ကိုယ်တော်၏စာရင်း၌ အကုန်အစင်မှတ်သားလျက်ရှိကြပါ၏။” (ဆာလံ ၁၃၉:၁၆) ဖန်ဆင်းရှင်သည် ကျွန်ုပ်တို့အကြောင်း ဤမျှသိရှိတော်မူသည်ဆိုလျှင် ကျိုးကြောင်းညီညွတ်နေသည်ကား ပျော်ရွှင်ချမ်းမြေ့သောဘဝကို မည်သို့ရရှိနိုင်ကြောင်းနှင့်စပ်လျဉ်းသည့် ကိုယ်တော်၏ဆုံးမချက်များကို ဆည်းပူးလေ့လာခြင်းသည် အမှန်တကယ်အကျိုးရှိပါလိမ့်မည်။

သမ္မာကျမ်းစာမူသည် ကျွန်ုပ်တို့ခေတ်တွင် လက်တွေ့ကျရုံမက လက်တွေ့အသုံးပြုနိုင်ကြောင်း အတွေ့အကြုံက တင်ပြခဲ့ပေပြီ။ တိကျမှန်ကန်ကြောင်းလည်း တွေ့ရှိခဲ့ရပြီ။ နေ့စဉ်အသက်တာတွင် သမ္မာကျမ်းစာ၏ လက်တွေ့ကျမှုကို အောက်ပါဥပမာလေးခုက တင်ပြပါသည်။

လူမှုဆက်ဆံရေးနှင့်ပုဂ္ဂလိကအပြုအမူ။ သူတစ်ပါးနှင့် ဆက်ဆံမှုပြေပြစ်ကောင်းမွန်စေသည့် ပုဂ္ဂလိကကျင့်ထုံးများကိုလိုက်နာရန် သမ္မာကျမ်းစာ အားပေးပါသည်။ ဥပမာ၊ ဣသရေလလူမျိုးအား ဤသို့မိန့်မှာထားသည်။ “ကိုယ်တိုင် အပြစ်ပြန်၍မတုံ့ရ။ အငြိုးမထားရ။ ကိုယ်နှင့်စပ်ဆိုင်သောသူကို ကိုယ်နှင့်အမျှ ချစ်ရမည်။” (ဝတ်ပြုရာ ၁၉:၁၈) ဣသရေလလူမျိုး၏ ပညတ်တရားအောက် ကျွန်ုပ်တို့မရှိကြသော်လည်း သမ္မာကျမ်းစာမူကို လိုက်လျှောက်ကြမည်ဆိုလျှင် လူလူချင်း အသင့်အတင့်ရှိနိုင်ပါလိမ့်မည်။ ဥပမာ၊ ဂလာတိ ၅:၂၂၊ ၂၃ (ကဘ) ပါဝိညာဏအရည်အချင်းများကို လူတိုင်းကြိုးစားမွေးမြူကြမည်ဆိုလျှင် ပြဿနာများ မည်မျှလျော့နည်းမည်ကို စဉ်းစားကြည့်ပါ။ “ဝိညာဉ်တော်နှင့်ဆိုင်ရာအသီးမူကား ချစ်ခြင်း၊ ရွှင်လန်းခြင်း၊ ကရုဏာပြခြင်း၊ ကောင်းမြတ်ခြင်း၊ ယုံကြည်ခြင်း၊ နူးညံ့သိမ်မွေ့ခြင်း၊ ချုပ်တည်းခြင်းများပေတည်း။ ထိုသို့သောအကျင့်တို့ကို အဘယ်တရားကမျှမမြစ်တား။”—ရောမ ၈:၅၊ ၆ နှိုင်းယှဉ်။

ဝမ်းနည်းစရာကား ဘဝဖိစီးမှုများ တိုးပွားလာလျှင် တင်းမာမှုနှင့်စိတ်သဘောကွဲလွဲမှုလည်း များပြားလာတတ်သည်။ ဤကဲ့သို့သောအခြေအနေမျိုးများတွင် သု၊ ၂၉:၁၁ (ကဘ) ပါသတိပေးချက်ကို လိုက်နာကျင့်သုံးခြင်းဖြင့် ပြဿနာလျော့နည်းစေနိုင်သည်။ “အမျက်အားလုံးကို မိုက်သောသူသည်ဖော်ပြတတ်၏။ ပညာရှိသောသူမူကား အဆုံးတိုင်အမျက်ကိုချုပ်ထား၍ငြိမ်းစေတတ်၏။”—သု၊ ၁၅:၁။ မဿဲ ၇:၁၂။ ကောလောသဲ ၃:၁၂-၁၄ နှိုင်းယှဉ်။

အကြံပြုချက်ကောင်းပင်ဖြစ်သည်။—သို့သော် လက်တွေ့ကျပါ၏လော။ ပြင်သစ်နိုင်ငံရှိ ဒေါသမထိန်းချုပ်နိုင်သော သူတစ်ဦး၏အဖြစ်ကိုကြည့်ပါ။ ထိုသူသည် ရိုက်ပွဲများတွင် ပါဝင်ခဲ့သောကြောင့် အကျဉ်းကျသည်တိုင် အကြိမ်ကြိမ်ဒုက္ခရောက်ခဲ့ပါသည်။ ကျွမ်းကျင်သောလက်ဝှေ့သမားတစ်ဦးဖြစ်နေခြင်းကလည်း သူ့ကိုအကျိုးမပေးပါ။ တစ်ချိန်တွင် သူ့ဖခင်နှင့်စကားများခဲ့သည်။ ထိုနောက် သူသိလိုက်သည်မှာ သူ့တစ်ချက်တည်းသောလက်သီးဒဏ်ကြောင့် ဖခင်မှာ ကြမ်းပြင်ပေါ်မှောက်လျက်သားဖြစ်နေတော့သည်။ သို့နှင့် သူတို့သည် အခဲမကြေစိတ်ဝမ်းကွဲကြလေသည်။

ဤအတောအတွင်း ထိုသူသည် ယေဟောဝါသက်သေများနှင့်တွေ့ဆုံကာ သမ္မာကျမ်းစာမူကို စတင်လေ့လာခဲ့ပါသည်။ ယင်းကြောင့် သူတစ်ပါးနှင့် မိမိဆက်ဆံနေပုံကို အသေအချာသုံးသပ်ဆင်ခြင်ကြည့်ရန် တိုက်တွန်းခံရလေ၏။ ထိုနောက် ကြိုးစားပမ်းစားပြုပြင်လာခဲ့ရာ သူ၏ပုဂ္ဂလိကအပြုအမူသည် ထူးခြားလာပြီး အသင့်အတင့်နေထိုင်တတ်သူဖြစ်လာလေသည်။ တစ်နေ့သောအခါ ဤသူသည် ဖခင်ထံသွား၍ တောင်းပန်ခဲ့သည်။ သားဖြစ်သူ၏ပြုပြင်ပြောင်းလဲလာပုံက ဖခင်အတွက် စွဲမှတ်စရာဖြစ်ပြီး သူတို့၏ဆက်ဆံရေး ပြန်ပြေလည်လာပါသည်။

ဤအဖြစ်အပျက်သည် တမန်တော်ပေါလု၏စကားများ မှန်ကန်ကြောင်းကို သက်သေထူသည့် ဥပမာများစွာအနက် တစ်ခုမျှဖြစ်သည်။ “ဘုရားသခင်၏နှုတ်ကပါဌ်တော်သည် အသက်ရှင်ခြင်း၊ တန်ခိုးနှင့်ပြုပြင်ခြင်း၊ သန်လျက်တကာတို့ထက် ထက်ခြင်းနှင့် ပြည့်စုံသည်ဖြစ်၍ . . . စိတ်နှလုံးအကြံအစည်များကိုလည်း သိမြင်တတ်၏။”—ဟေဗြဲ ၄:၁၂။

မိသားစုဘဝ။ သင့်မိသားစုသည် ပျော်ရွှင်ပါသလော။ မိသားစုအများမှာ မပျော်ရွှင်နိုင်ကြပါ။ “မိသားစုဘဝသည် အဖွဲ့အစည်းတစ်ခုအနေနှင့် ယခုခြိမ်းခြောက်ခံနေရခြင်းသည် သေချာနေပါသည်” ဟုတောင်အာဖရိကသတင်းစာ The Natal Witness ကဆိုသည်။ “ယနေ့ ကလေးသူငယ်များသည် လူမှုတော်လှန်ရေးထဲ မွေးဖွားလာနေရရှာသည်” ဟုထပ်ဆင့်ဆိုသည်။

သို့သော် သမ္မာကျမ်းစာတွင် အိမ်ထောင်ရေးပြဿနာများ ဖြေရှင်းနည်းနှင့်ပတ်သက်သည့် လက်တွေ့ကျ အကြံပြုချက်များ ပြည့်လျှံနေပါသည်။ ဥပမာ၊ လင်ယောက်ျားများ၏ကဏ္ဍနှင့်စပ်လျဉ်း၍ သမ္မာကျမ်းစာက “အချင်းယောက်ျားတို့ . . . မိမိကိုယ်ကိုချစ်သကဲ့သို့ ကိုယ်ခင်ပွန်းကိုချစ်ကြလော့” ဟုဆိုသည်။ ဤလိုအပ်ချက်ကို လင်ယောက်ျားဖြည့်စွက်ပေးမည်ဆိုလျှင် “ကိုယ်ခင်ပွန်းကို အလွန့်အလွန်ရိုသေခြင်း” ဖြင့်တုံ့ပြန်ရန် ဇနီးသည်သည် နှစ်ထောင်းအားရပါလိမ့်မည်။ (ဧဖက် ၅:၂၅-၂၉၊ ၃၃၊ ကဘ) မိဘနှင့်သားသမီးစပ်ကြား ဆက်ဆံရေးကို ဧဖက် ၆:၄ (ကဘ) ကဖော်ပြပါသည်။ “အဘတို့ ကိုယ့်သားသမီးကို စိတ်ဆိုးစေခြင်းငှာ မပြုကြနှင့်။ ယေဟောဝါ၏ ပဲ့ပြင်ဆုံးမခြင်းနှင့် စိတ်သဘောတော်ဆိုင်ရာ စည်းမျဉ်းဥပဒေအရ သူတို့ကိုမွေးမြူကြလော့။” ယင်းကလည်း ကျမ်းစာအမိန့်ရှိသည်အတိုင်း သားသမီးများလိုက်လျှောက်၍ မိဘစကားနားထောင်ရန် လွယ်ကူစေသော မိသားစုစိတ်ဓာတ်ကို ဖြစ်ပေါ်စေမည်။—ဧဖက် ၆:၁။

အဆိုပါတို့သည် မိသားစုဘဝအကြောင်း ကျမ်းစာဖော်ပြသည့်အချက် အချို့မျှသာရှိသေးသည်။ ဘုရားသခင့်လမ်းပြမှုကိုတုံ့ပြန်ခြင်းအားဖြင့် အိမ်တွင်း၌ အောင်မြင်မှုနှင့်ပျော်ရွှင်မှု ခံစားရသူများစွာရှိပါသည်။။ သမ္မာကျမ်းစာမူများကို ကျင့်သုံးခြင်းအားဖြင့် ခံစားရသောအကျိုးများအကြောင်း ကလေးနှစ်ယောက်ဖခင်ဖြစ်သူ အဲဒဝါဒ်ရှင်းပြခဲ့သည်။ “ကျွန်တော့်အိမ်ထောင်ရေး ပြိုပျက်နေတယ်။ သားသမီးများနဲ့ အဓိပ္ပာယ်ရှိရှိ ပေါင်းသင်းဖို့ အချိန်မရခဲ့ဖူး။ ကျွန်တော်တို့ကို ပြန်စည်းလုံးစေတာက မိသားစုဘဝအကြောင်း ကျမ်းစာပြောတဲ့အတိုင်း နေထိုင်ခဲ့ကြလို့ပဲဖြစ်တယ်။”—သု၊ ၁၃:၂၄။ ၂၄:၃။ ကောလောသဲ ၃:၁၈-၂၁။ ၁ ပေတရု ၃:၁-၇။

စိတ်ဓာတ်၊ ကာယနှင့်စိတ်လှုပ်ရှားမှုဆိုင်ရာ ကျန်းမာရေး။ လူ့ကျန်းမာရေးသည် သူ၏စိတ်ဓာတ်နှင့် စိတ်လှုပ်ရှားမှုဆိုင်ရာ ကြံ့ခိုင်ရေးပေါ် အတော်အတန်အခြေခံကြောင်း သုတေသနပြုချက်တစ်ခုက တင်ပြသည်။ “သာမန်ဖိစီးမှုလက္ခဏာများတွင် နှလုံးခုန်နှုန်းမြန်ခြင်း၊ သွေးတိုးခြင်း၊ အကြောတင်းခြင်း၊ စိတ်ဓာတ်ကျဆင်းခြင်းနှင့် အာရုံမစိုက်နိုင်ခြင်းတို့ ပါဝင်သည်” ဟု The World Book Encyclopedia တင်ပြသည်။ သို့သော် အပြင်းအထန်လှုပ်ရှားပြုမူခြင်းဖြင့် ဖိစီးမှုကို ပေါ့သွားစေနိုင်သည်ဟု အချို့ယူမှတ်ပါသည်။ The Star ခေါ်တောင်အာဖရိကသတင်းစာတစ်ခုက “လက်ဝှေ့ထိုးခြင်းသည် ဖိစီးမှုကို ချုပ်ငြိမ်းနိုင်သည်” ဟုဆိုသည်။ ကြံ့ခိုင်ရေးအတိုင်ပင်ခံ ဂျာနာ ကလာစင်၏စကားများကို ဤသို့ကိုးကားဖော်ပြပါသည်။ “အမျိုးသမီးတစ်ဦးသည် တစ်နေ့လုံး အလွန်စိတ်ပင်ပန်းခဲ့လျှင် သူမ၏ ကသိကအောက်ဖြစ်မှုအတွက် ထွက်ပေါက်အနေနှင့် သဲအိတ်ကိုထိုးနှက်နိုင်ပါသည်။”

သို့သော် စိတ်ပင်ပန်းရခြင်း၏ အရင်းအမြစ်ကို ဖြေရှင်းတတ်ခြင်းကား သာ၍ကောင်းမည်မဟုတ်ပေလော။ Stress—The Modern Scourge ဂျာနယ်တွင် ဒေါက်တာ မိုက်ကဲလ် စလပ်စကင်က “ဖိစီးမှုခံနေရကြောင်း အသိအမှတ်ပြုခြင်း . . . သည်အရေးကြီး၏။ အကြောင်းမူကား၊ အကျိုး၏ အကြောင်းများစွာအတွက် ဆေးရှိပါသည်။” ထပ်ဆင့်၍ “ဖိစီးမှုကိုနိုင်နင်းခြင်းဖြင့် . . . အခြေအနေအမျိုးမျိုးတွင် ပြေငြိမ်းမှုကိုပင် ဖြစ်ပွားစေနိုင်ပါသည်” ဟုဆိုသည်။

ဖိစီးမှုကို နိုင်နင်းနိုင်သည့် အလွန်ထိရောက်သောနည်းကို သမ္မာကျမ်းစာ ဖော်ပြပေးသည်။ “အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ကျေးဇူးတော်ကိုချီးမွမ်းခြင်းနှင့်တကွ၊ ဆုတောင်းပတ္ထနာ . . . ကို ဘုရားရှင်ထံတင်လျှောက်ကြလော့။ ထိုသို့ပြုလျှင် အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် သင်တို့၏စိတ်နှလုံးတို့ကို စောင့်မလိမ့်မည်။” (ဖိလိပ္ပိ ၄:၆၊ ၇၊ ကဘ) ဖိစီးမှုကို ဤနည်းဖြင့် ချုပ်ထိန်းခြင်းဖြင့် အကျိုးများစွာရှိသည်။—ကာယရေးကိုပင် အကျိုးပြု၏။ ကျမ်းစာပညာရှိစကားတစ်ခွန်းက ဤသို့ဆိုသည်။ “ငြိမ်သက်သောနှလုံးသည် ကိုယ်ကာယအသက်ရှင်ရာအကြောင်းဖြစ်၏။” (သု၊ ၁၄:၃၀၊ ကဘ) အခြားပညာရှိစကားတစ်ရပ်က “စိတ်ရွှင်လန်းခြင်းသည် ကျန်းမာစေတတ်၏။ စိတ်ပျက်ခြင်းမူကား အရိုးတို့ကို သွေ့ခြောက်စေတတ်၏။”—သု၊ ၁၇:၂၂။

ဖိစီးကျပ်တည်းမှုမှ လွတ်မြောက်ရန် ဆေးလိပ်၊ အရက်နှင့်မူးယစ်ဆေးဝါး သုံးစွဲသူ များစွာရှိသည်။ ယင်းတို့ကိုစွဲလမ်းခြင်း၏အန္တရာယ်ကို အတိအလင်းမှတ်တမ်းတင်ထားပြီ။ သို့ဖြစ်၍ပင် သမ္မာကျမ်းစာက “ကိုယ်ခန္ဓာ၏အညစ်အကြေး . . . ရှိသမျှ” တို့နှင့်ကင်းစင်ရန် ထောက်ခံပြောဆိုခဲ့ခြင်းကား ကြာမြင့်ပေပြီ။ (၂ ကောရိန္သု ၇:၁။ သု၊ ၂၃:၂၉-၃၅ နှိုင်းယှဉ်။) ဤကဲ့သို့သော အကျိုးယုတ်သည့် အကျင့်များကို ရှောင်ကြဉ်ခြင်းသည် မျက်မှောက်လောကတွင် အမှန်ပင် လက်တွေ့ကျအကာအကွယ်ဖြစ်သည်။

အလုပ်၊ ငွေနှင့်ရိုးသားဖြောင့်မတ်ခြင်း။ ပျင်းရိခြင်းသည် အကျိုးမပေး။ သု၊ ၂၀:၄ က “ချမ်းသောကြောင့် ပျင်းရိသောသူသည် လယ်မလုပ်လို။ ထိုကြောင့် စပါးရိတ်သောကာလ၌ သူတစ်ပါးကိုတောင်းသော်လည်း မရရာ” ဟုဆိုသည်။ တစ်ဖက်မှကြည့်ပြန်လျှင် ဝီရိယစိုက်ထုတ်ခြင်းသည် အကျိုးပြု၏။ “ခိုးတတ်သောသူသည် နောက်တစ်ဖန်မခိုး” စေနှင့်ဟု ဧဖက် ၄:၂၈ ကဆိုသည်။ “ဆင်းရဲသောသူအား ပေးကမ်းဝေငှရန် ရှိစေခြင်းငှာ မိမိလက်နှင့်ကောင်းသောအလုပ်ကို လုပ်ဆောင်အားထုတ်” ခြင်းသည်သာ၍ကောင်း၏ဟု ဤကျမ်းချက်ကဆက်၍ဆိုပါသည်။—သု၊ ၁၃:၄ နှိုင်းယှဉ်။

ကျမ်းစာမူများကို အလုပ်ခွင်၌ပင် ဆက်ဆံရေးနှင့်ပတ်သက်၍ ကျင့်သုံးနိုင်ကြောင်း သင်သိရှိပါသလော။ ကျမ်းစာခေတ်က “ကျေးကျွန်များ” နည်းတူ အလုပ်လုပ်သူများသည် “လောကီသခင်၏စကားကို အရာရာ၌ နားထောင်” လျှင်ကောင်းသည်။ အလုပ်ရှင် သို့မဟုတ် “သခင်များ” မူကား မိမိလက်အောက်သားများအား “ဖြောင့်မတ်ခြင်းတရား၊ မျှခြင်းတရားနှင့်အညီ” ပြုသင့်သည်။—ကောလောသဲ ၃:၂၂-၂၄၊ ၄:၁။ ၁ ပေတရု ၂:၁၈-၂၀ နှိုင်းယှဉ်။

ရိုးရိုးသားသား စီးပွားရှာခြင်းအကြောင်း ကျမ်းစာတွင် များစွာဖော်ပြထားသည်။ ယနေ့ရိုးသားမှုကို တွေ့ခဲသဖြင့် ဝမ်းနည်းစရာဖြစ်သော်လည်း ယင်းကို နှစ်မြို့ဖွယ်အရည်အချင်းအဖြစ် အသိအမှတ်ပြုတန်ဖိုးထားကြသည်။ ယင်းကို သမ္မာကျမ်းစာအလေးအနက်ပေါ်လွင်စေသည်။ “အနည်းငယ်သောအမှု၌ သစ္စာရှိသောသူသည် ကြီးသောအမှု၌လည်း သစ္စာရှိလိမ့်မည်။ အနည်းငယ်သောအမှု၌ သစ္စာမရှိသောသူသည် ကြီးသောအမှု၌လည်း သစ္စာမရှိ” ဟုယေရှုမိန့်တော်မူဖူးသည်။—လုကာ ၁၆:၁၀။ သု၊ ၂၀:၁၀။ ၂၂:၂၂၊ ၂၃။ လုကာ ၆:၃၁ နှိုင်းယှဉ်။

အာဖရိကနိုင်ငံတစ်နိုင်ငံတွင် စိန်ထုတ်လုပ်ရေး၌ ခိုးမှုနှင့်အဂတိလိုက်စားမှု အလွန်များပြားနေသည်။ သို့ဖြစ်၍ ယင်းထုတ်လုပ်ရေးဌာနတွင် ဌာနမှူးပြောင်းလဲလိုက်ရန် ဆုံးဖြတ်ကြသည်။ ထိုရာထူးအတွက် သင့်တော်သည်ဟု မိမိတို့ထင်မြင်သူများ၏အမည်စာရင်းကို တင်သွင်းရန် အစိုးရအဖွဲ့ဝင်ဝန်ကြီးများအား ဆင့်ခေါ်ခဲ့သည်။ အစိုးရအဖွဲ့အစည်းအဝေးတွင်၊ အဓိကအားဖြင့် အဂတိလိုက်စားမှုကြောင့် တင်သွင်းထားသောအမည်များကို တစ်ခုပြီးတစ်ခု ပယ်ခဲ့ကြသည်။ နောက်ဆုံး စာရင်း၏အောက်ဆုံးတွင် နာမည်တစ်ခုသာကျန်ရစ်တော့သည်။—သမ္မတထောက်ခံသူ၏အမည်ဖြစ်သည်။

“ဒါပေမယ့် သူဟာ ပါတီဝင်မှ မဟုတ်တာ” ဟု ဝန်ကြီးတစ်ဦးက ကန့်ကွက်ပြောဆိုသည်။

သမ္မတက ထိုရာထူးသည် နိုင်ငံရေးရာထူးမဟုတ်ဟု ဖြေဆိုသည်။

“သူဟာ ယေဟောဝါသက်သေတစ်ယောက်ပဲ” ဟုအခြားတစ်ဦးပြောပြန်သည်။

“အဲ့ဒါကြောင့် သူ့ကိုအလုပ်ခန့်သင့်တယ်” ဟုသမ္မတဖြေသည်။ ထိုနောက် ဆက်၍ပြောသည်ကား “သူတို့ဟာ ရိုးသားတဲ့လူတွေဆိုတာကို ဒို့သိပါတယ်။ အဲ့ဒီလိုလူစားမျိုးကို ဒို့လိုအပ်နေတာ။ သူ့ကို စိတ်ချအားထားနိုင်တယ်” ဟူ၍ဖြစ်သည်။

မှန်သည်။ ကျမ်းစာမူများကို ကျင့်သုံးသူတို့သည် မျက်မှောက်လောကတွင်ပင် အကျိုးဖြစ်ထွန်းကြောင်း မကြာခဏတွေ့ခဲ့ကြပြီ။

လက်တွေ့ကျ ဉာဏ်ပညာကို စုဆောင်းပါ

“ဘုရားသခင်ကိုသိသောဉာဏ်နှင့် ပြည့်စုံ” ခြင်းသည်အဘယ်အရာကိုဆိုလိုကြောင်း အနည်းအကျဉ်းသာ သုံးသပ်ခဲ့ပေပြီ။ (သု၊ ၂:၁-၉) အလျဉ်းသင့်၍ လက်တွေ့ကျသော အကြံဉာဏ်ကောင်းများစွာကို သမ္မာကျမ်းစာတွင် တွေ့ရှိနိုင်ပါသည်။ သန့်ရှင်းရေး၊ ဝီရိယစိုက်ထုတ်ခြင်း၊ ဆက်သွယ်ရေး၊ လိင်ဆိုင်ရာ၊ ကွာရှင်းမှု၊ အခွန်အတုတ်ပေးဆောင်ခြင်း၊ ပုဂ္ဂိုလ်ရေးပဋိပက္ခ၊ ချို့ငဲ့ဆင်းရဲခြင်းကို ကိုင်တွယ်ဖြေရှင်းခြင်းနှင့်စပ်လျဉ်းသော မူများသည် ကျမ်းစာတွင်ဖော်ပြထားသည့် ဘဝကဏ္ဍအသီးအသီးအကြောင်းတွင် အချို့မျှရှိပါသေးသည်။ မိမိတို့၏ဘဝအောင်မြင်ရေးနှင့် ကျဆင်းမှုမှာ သမ္မာကျမ်းစာမူများကို မည်မျှကျင့်သုံးခဲ့ခြင်းအပေါ်မူတည်ကြောင်း သန်းပေါင်းများစွာသောသူတို့ သက်သေထူကြပါလိမ့်မည်။

သမ္မာကျမ်းစာသည် ယခုပင်လက်တွေ့ကျကြောင်း အာမခံချက်များရှိသည့်အပြင် တာဝေးအကျိုးရလဒ်များကိုလည်း ကမ်းလှမ်းထားပါသည်။ ဥပမာ၊ ယနေ့ ဤလောကရှိ နာခြင်း၊ ဒုက္ခခံရခြင်း၏ အကြောင်းရင်းများကို မကြာမီ ဘုရားသခင်သုတ်သင်ရှင်းလင်းတော့မည်အကြောင်း သမ္မာကျမ်းစာ ကတိပြုထားပါသည်။—ဒံယေလ ၂:၄၄။ ၂ ပေတရု ၃:၁၁-၁၃။ ဗျာဒိတ် ၂၁:၁-၅။

ထိုကြောင့် သမ္မာကျမ်းစာကို အတတ်နိုင်ဆုံးလေ့လာဆည်းပူးကြရန် အားပေးတိုက်တွန်းပါသည်။ ကျမ်းစာမရှိသေးလျှင် တစ်အုပ်ရှာဝယ်ပါ။ ဤမဂ္ဂဇင်းကိုထုတ်ဝေသူများက သင့်အား ဝမ်းသာအားရစွာဖြင့် ကူညီပေးပါလိမ့်မည်။ သမ္မာကျမ်းစာမှ လက်တွေ့ကျ အကြံဉာဏ်များကို ကျင့်သုံးခြင်းအားဖြင့် များစွာသောအခြားသူတို့သည် အကျိုးခံစားခဲ့ရကြသည့်နည်းတူ ဘုရားသခင်၏နှုတ်ကပါဌ်တော်သည် မျက်မှောက်ကာလနှင့် အနာဂတ်ကာလအတွက်ပါတန်ဖိုးရှိကြောင်း သဘောပေါက်နားလည်ရန် အသင်လည်း အကူအညီရရှိနိုင်ပါသည်။

[စာမျက်နှာ ၇ ပါ ရုပ်ပုံ]

အိမ်ထောင်ရေးဘဝသာယာရေးအတွက် သမ္မာကျမ်းစာသည် လက်တွေ့ကျ လမ်းပြဖြစ်သည်