ကြီးပွားခြင်းက သင့်ယုံကြည်ခြင်းအတွက် စမ်းသပ်ချက်ဖြစ်နိုင်

ကြီးပွားခြင်းသည် ရိုးသားဖြောင့်မှန်သူ၏ယုံကြည်ခြင်းအတွက် စမ်းသပ်မှုဖြစ်နိုင်သည်။ ရုပ်ပစ္စည်းကြွယ်ဝလာရန် ကြိုးစားအားထုတ်ခြင်းသည် ယုံကြည်ခြင်းကို ပျောက်လွင့်သွားစေနိုင်သည်။ (၁ တိမောသေ ၆:၉၊ ၁၀) သို့သော် ကြီးပွားခြင်းသည် အခြားတစ်နည်းဖြင့် ယုံကြည်ခြင်းကို စမ်းသပ်နိုင်ပါသေးသည်။ ဖြောင့်မတ်သောသူတစ်ဦးက မိမိဒုက္ခခံနေရစဉ် မဖြောင့်မတ်သူများစွာတို့သည် ကြီးပွားနေသည်ကိုတွေ့ရှိသည့်အခါ ဘုရားတရားမဲ့လမ်းစဉ်ကိုလိုက်လျှောက်ရန် သွေးဆောင်ခံရပေမည်။ ယင်းကြောင့် ယေဟောဝါ၏ကျေးကျွန်အချို့ပင်လျှင် ဖြောင့်မှန်သောဘဝလမ်းစဉ်အတိုင်း လိုက်လျှောက်ခြင်း၏တန်ဖိုးကို သံသယဝင်ခဲ့သည်မဟုတ်ပေလော။

ဣသရေလဘုရင်ဒါဝိဒ်နန်းစံချိန်အတွင်း လေဝိတေးဂီတရှင်အာသပ် ထိုသို့ခံစားခဲ့ရသည်။ အာသပ်သည် လူအများဝတ်ပြုကြရာတွင်အသုံးပြုသော ဆာလံများကို စပ်ဆိုခဲ့ပါသည်။ ဟေမန်နှင့်ယေဒုသုန်တို့နှင့်အတူ သူလည်းပရောဖက်ပြုခဲ့၍ ယေဟောဝါဘုရားသခင်အား ထောမနာသီချင်းများဆိုခဲ့ပါသည်။ (၁ ရာဇဝင်ချုပ် ၂၅:၁။ ၂ ရာဇဝင်ချုပ် ၂၉:၃၀) ထူးမြတ်သောအခွင့်အရေးကို အာသပ်ရရှိခဲ့သော်လည်း လူဆိုးတို့၏ စည်းစိမ်ချမ်းသာက သူ၏ယုံကြည်ခြင်းအတွက် အကြီးအကျယ်စမ်းသပ်မှုဖြစ်ခဲ့ကြောင်း ဆာလံ ၇၃ ကတင်ပြပါသည်။

အာသပ်၏ အန္တရာယ်ကြီးမားသောသဘောထား

“အကယ်စင်စစ် ဘုရားသခင်သည် နှလုံးသန့်ရှင်းသောသူတည်းဟူသော ဣသရေလအမျိုး၌ ကျေးဇူးကြီးတော်မူ၏။ ငါမူကား၊ ခြေချော်လုလျက် ခြေရာလွဲလုလျက်ရှိမိပြီ။” (ဆာလံ ၇၃:၁၊ ၂) ဤစကားများအားဖြင့် ဣသရေလလူမျိုးအပေါ် ယေဟောဝါကောင်းမြတ်တော်မူကြောင်း အာသပ်အသိအမှတ်ပြုခဲ့ပါသည်။ အတိအကျပြောရလျှင် “နှလုံးသန့်ရှင်းသောသူ” တို့သည် ဘုရားသခင်အား အကြွင်းမဲ့ဝတ်ပြုကိုးကွယ်မှုပေး၍ သန့်ရှင်းသောနာမတော်ကို အထွတ်အမြတ်ဖြစ်စေရန် ပြုလိုကြသောကြောင့် ထိုသို့ဖြစ်ခဲ့ပါသည်။ ကျွန်ုပ်တို့တွင် ထိုသဘောထားမျိုးရှိပါက လူဆိုးတို့၏ကြီးပွားမှုကြောင့်၊ သို့မဟုတ် အခြားမည်သည့်အခြေအနေမျိုးကြောင့် စိတ်အနှောင့်အယှက်ဖြစ်သည့်တိုင် ယေဟောဝါကိုချီးမွမ်းခြင်းအားဖြင့် ကိုယ်တော်အား ကောင်းချီးပေးပါလိမ့်မည်။—ဆာလံ ၁၄၅:၁၊ ၂။

ယေဟောဝါ၏ကောင်းမြတ်မှုကို အာသပ်သိမြင်သော်လည်း ဖြောင့်မတ်သောလမ်းစဉ်မှ သူခြေချော်လုဖြစ်ခဲ့ပါသည်။ မောပန်းသည့် တာဝေးပြေးပွဲတွင်ပါဝင်နေစဉ် ရေခဲပြင်ပေါ် သူတို့ချော်လဲနေဘိသကဲ့သို့ဖြစ်သည်။ သူ အဘယ်ကြောင့် ဤမျှယုံကြည်ခြင်း နည်းရသနည်း။ သူဤသို့ရှင်းပြပါသည်။ “အကြောင်းမူကား၊ မတရားသောသူတို့၏စည်းစိမ်းကို မြင်သောအခါ မိုက်သောသူတို့ကိုပင် ငါငြူစူမိပြီ။ ထိုသူတို့သည် မသေမီတိုင်အောင် နာကြင်ခြင်းဝေဒနာမရှိ။ ခိုင်မာသောအစွမ်းသတ္တိရှိ [ဗိုက်ရွှဲ၊ ကဘ] ကြ၏။ သူတို့သည် လောကဓံဒုက္ခမရှိ။ လူများကဲ့သို့ အနှောင့်အယှက်ကိုမခံရကြ။”—ဆာလံ ၇၃:၃-၅။

မဖြောင့်မတ်သူများ၏ စည်းစိမ်းချမ်းသာက အာသပ်အား ဝန်တိုစိတ်ပေါ်စေသည်။ ကောက်ကျစ်လိမ်လည်သောနည်းဖြင့် ချမ်းသာလာကြသည့်တိုင် သူတို့မှာ စိတ်တည်ငြိမ်ပုံရှိသည်။ (ဆာလံ ၃၇:၁ နှိုင်းယှဉ်။) သူတို့သည် မတရားသဖြင့် ပြုနေကြသော်လည်း အမြင်အားဖြင့် လုံခြုံနေပါသည်။ မည်သည့်နာကြင်ခြင်းဝေဒနာမျှမရှိဘဲ သူတို့ဘဝ ပြည့်စုံပုံရှိသည်မဟုတ်ပေလော။ ဝိညာဉ်ရေးဘက် လိုအပ်နေကြောင်း လုံးဝမသိရှိလျက် သူတို့ အေးဆေးငြိမ်သက်စွာ သေကြရသည်။ (မဿဲ ၅:၃) တစ်ဘက်မှဆိုလျှင် ဘုရားသခင့်ကျေးကျွန်အချို့မှာ ရောဂါပြင်းထန်စွာခံ၍ အသက်ထွက်ခဲ့ကြရသော်လည်း ကိုယ်တော်သည် သူတို့အား ခွန်အားပေးပါသည်။ သူတို့မှာ ရှင်ပြန်ထမြောက်ခြင်းမျှော်လင့်ချက် ရှိပါသည်။—ဆာလံ ၄၃:၁-၃။ ယောဟန် ၅:၂၈၊ ၂၉။

လူဆိုးများစွာတို့မှာ သူတို့ ဝစွာစားသုံးရသည့်အစာကို မြိန်ရှက်စွာမစားနိုင်စေသည့် ကျန်းမာရေးပြဿနာများမရှိကြပါ။ သူတို့ “ဗိုက်ရွှဲနေကြ၍” စူထွက်နေပါသည်။ ထို့ပြင် သူတို့မှာ “လောကဓံဒုက္ခမရှိ။” အကြောင်းမူကား၊ လူအများစုကဲ့သို့ အသက်ရှင်ရေးအတွက် လိုအပ်ရာများကို ရုန်းကန်၍ရှာဖွေယူစရာမလိုကြပါ။ လူဆိုးတို့သည် “လူများကဲ့သို့ အနှောင့်အရှက်ကိုမခံရကြ” ဟုအာသပ်ယူမှတ်လေတော့သည်။ အထူးသဖြင့် စာတန်၏ဆိုးသွမ်းသောလောကတွင် ယေဟောဝါ၏ဖြောင့်မတ်သောစံချိန်များအတိုင်း ဘုရားတရားရှိသူများ အသက်ရှင်ကြသောကြောင့် ခံရသည့်ဆင်းရဲဒုက္ခများကို လူဆိုးများမခံကြရချေ။—၁ ယောဟန် ၅:၁၉။

လူဆိုးတို့သည် ကြီးပွားနေကြသောကြောင့် သူတို့နှင့်စပ်လျဉ်း၍ အာသပ် ဤသို့ဆက်ပြောပါသည်။ “ထိုကြောင့် မာနကို လည်ဆွဲတန်ဆာကဲ့သို့ဆင်၍ ညှဉ်းဆဲခြင်းအဝတ်ကိုလည်း ဝတ်တတ်ကြ၏။ ဆူဝသောကြောင့် မျက်နှာမော်လျက်ရှိကြ၏။ စိတ်နှလုံးကြံစည်ခြင်းအားဖြင့် လွန်ကျူးတတ်ကြ၏။ ဆိုးသောညှဉ်းဆဲခြင်းကိုပင် ပြက်ယယ်ပြု၍ ပြောတတ်ကြ၏။ ထောင်လွှားသောစကားကိုလည်း သုံးတတ်ကြ၏။ သူတို့နှုတ်သည် ကောင်းကင်နှင့်ဆန့်ကျင်ဘက်ပြု၍ လျှာသည်လည်း မြေကြီးကို လှည့်လည်တတ်၏။”—ဆာလံ ၇၃:၆-၉။

လူဆိုးတို့သည် မာန်မာနစိတ်ကို “လည်ဆွဲတန်ဆာ” ကဲ့သို့ ဝတ်ဆင်ကြသည်။ ညှဉ်းဆဲနှိပ်စက်တတ်ကြလွန်းသဖြင့် ယင်းကို ‘အဝတ်တန်ဆာကဲ့သို့ ခြုံထားကြသည်။’ မိမိလိုဘပြည့်ရန် သူတို့ကို နှိပ်စက်ကလူပြုကြသည်။ အာဟာရချို့တဲ့မှုကြောင့် မျက်တွင်းဟောက်ပက်ခြင်းကို လူဆိုးတို့မခံရဘဲ စားကျူး၍ အလွန်ဝသောကြောင့် ‘မျက်လုံးပြူးလျက်’ နေသည်။ (သု၊ ၂၃:၂၀) သူတို့၏ စဉ်းလဲသော အကြံအစည်များသည် အလွန်အောင်မြင်နေသဖြင့် သူတို့ ‘စိတ်နှလုံးကြံစည်ရာတို့ထက် သာနေ’ ပေသည်။ သူတို့၏ကလိန်ကျမှုအကြောင်း ကြွားဝါ၍ ‘အထက်စီး’ ပြောဆိုကြ၏။ ‘သူတို့နှုတ်ကို ကောင်းကင်၌ပင်တင်ကာ သူတို့လျှာသည်ကား မြေကြီးပေါ်လှည့်လည်’ ချေသည်တကား။ ကောင်းကင်ပေါ် မြေကြီးပေါ်ရှိ မည်သူကိုမျှ မလေးမခန့်ပြုကာ ဘုရားသခင်ကိုရှုတ်ချပြစ်တင်၍ လူတို့အကြောင်း မကောင်းပြောဆိုပါသည်။

အာသပ်တွေ့မြင်သည့်အရာတို့ကြောင့် သူတစ်ဦးသာ စိတ်ထိခိုက်နစ်နာခဲ့သည်မဟုတ်ကြောင်း ထင်ရှားပါသည်။ သူက “ထိုကြောင့် ဘုရားသခင်၏လူတို့သည် သူတို့ထံသို့ပြန်သွား၍ များစွာသောရေကိုမျိုကြရ၏။ ‘ဘုရားသခင်သည် အဘယ်သို့သိတော်မူမည်နည်း။ အမြင့်ဆုံးသောဘုရား၌ ဉာဏ်ရှိပါလိမ့်မည်လော’ ဟုဆိုတတ်ကြ၏။” (ဆာလံ ၇၃:၁၀၊ ၁၁) လူဆိုးတို့သည် ကြီးပွားဟန်ရှိသောကြောင့် ဘုရားသခင့်လူမျိုးရှိအချို့တို့သည် အမြင်မှားပြီး မတရားသောသူတို့ကဲ့သို့ ဖြစ်သွားကြပြီး ‘အဖြစ်အပျက်ကို ဘုရားသခင်မသိပါ။ မတရားမှုကို အရေးယူမည်မဟုတ်ပါ’ ဟုပြောဆိုကြမည့်အကြောင်း ဟေဗြဲကျမ်းကဆိုလိုနေပေမည်။ တစ်ဘက်မှကြည့်ပြန်လျှင် လူဆိုးတို့သည် မတရားမှုကို အပြစ်မခံရဘဲပြုမူနေဟန်ရှိခြင်းကိုတွေ့မြင်ခြင်းသည် ဆေးခါးတစ်ခွက်ကိုသောက်ရသကဲ့သို့ဖြစ်ခါ ‘ဤအရာများကို ဘုရားသခင်မည်သို့ သီးခံနိုင်သနည်း။ အဖြစ်အပျက်ကို ကိုယ်တော်မမြင်သလော’ ဟုဖြောင့်မှန်သူများအား မေးမြန်းစေပါသည်။

လူဆိုးတို့၏အခြေအနေနှင့် မိမိအခြေအနေကို အာသပ်ဤသို့နှိုင်းယှဉ်ခဲ့ပါသည်။ “ထိုမတရားသောသူတို့သည် အစဉ်ကောင်းစား၍ ဥစ္စာပွားများကြ၏။ အကယ်စင်စစ် ငါ့နှလုံးကို ငါသန့်ရှင်းစေသော်လည်း အကျိုးမရှိ။ အပြစ်ကင်းခြင်းနှင့် ငါ့လက်ကိုဆေးကြောသော်လည်း အကျိုးမရှိ။ နေ့တိုင်းနှောင့်ယှက်ခြင်းနှင့် နံနက်တိုင်း ဆုံးမခြင်းကို ငါခံရ၏။” (ဆာလံ ၇၃:၁၂-၁၄) ဖြောင့်မှန်စွာနေထိုင်ခြင်းသည် အကျိုးမရှိဟု အာသပ်ထင်မှတ်ခဲ့သည်။ လူဆိုးများသည် ကလိန်ကျနည်းလမ်းများအားဖြင့် ‘ဥစ္စာတိုးပွား’ ခဲ့ပေမည်။ အဆိုးရွားဆုံးမကောင်းမှုအတွက်လည်း အပြစ်ဒဏ်စီရင်ခြင်း ခံရပုံမရှိပါ။ သို့သော် အာသပ်မူကား “နေ့တိုင်း”—နိုးထချိန်မှ အိပ်ရာဝင်ချိန်အထိ—အနှောင့်ယှက်ခံခဲ့ရသည်။ မိမိအား ယေဟောဝါသည် နံနက်တိုင်း ဆုံးမနေတော်မူသည်ဟု သူခံစားခဲ့ရပါသည်။ ယင်းသည် မတရားပုံဖြစ်နေရာ အာသပ်၏ယုံကြည်ခြင်းအတွက် စမ်းသပ်မှုဖြစ်ခဲ့ပါသည်။

အတွေးအခေါ် ပြုပြင်ပြောင်းလဲမှု

နောက်ဆုံး မိမိ၏အတွေးအခေါ်သည် မှားယွင်းနေကြောင်းကို အာသပ်အသိအမှတ်ပြုကာ ဤသို့ဆိုပါသည်။ “‘ထိုသို့သဘောကျမည်’ ဟုအကျွန်ုပ်ဆိုလျှင် ကိုယ်တော်၏အမျိုးသားတို့ကို ပြစ်မှားရာသို့ရောက်ပါလိမ့်မည်။ ထိုအမှုကိုနားလည်ရအောင် ဆင်ခြင်သောအခါ အလွန်ခက်သည်ဟုထင်ပါ၏။ နောက်မှ ဘုရားသခင်၏ သန့်ရှင်းရာဌာနထဲသို့ဝင်၍ သူတို့၏အဆုံးကို နားလည်ရပါ၏။ အကယ်စင်စစ် ကိုယ်တော်သည် သူတို့ကိုချောသောအရပ်၌ထားတော်မူပြီ။ ဖျက်ဆီးရာအရပ်သို့ ချတော်မူ၏။ တစ်ခဏချင်းတွင် အကျိုးနည်းကြပါပြီတကား။ ဘေးဥပဒ်များအားဖြင့် ရှင်းရှင်းပယ်ပျောက်လျက် ရှိကြပါပြီတကား။ အိုထာဝရဘုရား [ယေဟောဝါ၊ ကဘ] လူသည် နိုးသောအခါ အိပ်မက်ကိုမှတ်သကဲ့သို့ သူတို့ကိုနှိုးတော်မူသောအခါ သူတို့အကြံအစည် [အသွင်၊ ကဘ] ကိုမထီမဲ့မြင်ပြုတော်မူမည်။”—ဆာလံ ၇၃:၁၅-၂၀။

အာသပ် မညည်းညူခဲ့သည်မှာ ကောင်းပေသည်။ အကြောင်းမှာ ယေဟောဝါအမှုတော်ထမ်းခြင်းသည် အကျိုးမရှိဟု လူအများရှေ့သူပြောဆိုမိခဲ့ပါက ဝတ်ပြုသူများဖြစ်သည့် မိသားစုအား စိတ်ဓာတ်ကျစေခြင်း၊ သို့မဟုတ် သူတို့ယုံကြည်ခြင်းလျော့နည်းသွားစရာဖြစ်ခြင်းအကြောင်း ရှိစေနိုင်မည်။ နှုတ်ပိတ်ကာ အာသပ်နည်းတူပြုလုပ်ခြင်းကား သာ၍ကောင်းသည်တကား။ ဖြောင့်မှန်သူများ ဒုက္ခခံကြရစဉ် လူဆိုးတို့သည် အပြစ်ပြုကြလျက်ပင် အဘယ်ကြောင့်ဒဏ်စီရင်မခံရကြောင်း အာသပ်သိရှိခြင်းငှာ ဘုရားသခင်၏သန့်ရှင်းရာဌာနသို့ သွားခဲ့ပါသည်။ ထိုနေရာတွင် ယေဟောဝါကိုဝတ်ပြုသူများနှင့်အတူ အာသပ်သည် အေးဆေးစွာ ဆင်ခြင်သုံးသပ်ခွင့်ရပြီးနောက် သူ၏အတွေးအခေါ်ကို ပြုပြင်ပြောင်းလဲနိုင်ခဲ့ပါသည်။ ယနေ့လည်း ကျွန်ုပ်တို့တွေ့မြင်ရသည့်ကိစ္စများကြောင့် စိတ်အနှောင့်အယှက်ဖြစ်မိပါက တစ်သီးပုဂ္ဂလနေမည့်အစား ဘုရားသခင်၏လူတို့နှင့်ပေါင်းသင်းခြင်းအားဖြင့် ကျွန်ုပ်တို့သိလိုသည့်အကြောင်းများကို သိနားလည်ရန်ကြိုးစားပါ။—သု၊ ၁၈:၁။

လူဆိုးတို့အား “ချောသောအရပ်” ၌ဘုရားသခင်ထားတော်မူကြောင်းကို သူသဘောပေါက်လာသည်။ စည်းစိမ်ဥစ္စာကို သူတို့အားကိုးပြီး အသက်ရှင်ကြသည့်အတွက် ရုတ်တရက်ပျက်စီးရမည့်အန္တရာယ် သူတို့၌ရှိနေသည်။ နောက်ဆုံးတစ်နေ့ သူတို့အသက်ကြီးပြီးကွယ်လွန်ရမည်ဖြစ်၍ မသမာနည်းဖြင့် ရရှိထားသောကြွယ်ဝမှုတို့က သူတို့အသက်ကို တိုးရှည်နိုင်မည်မဟုတ်ပါ။ (ဆာလံ ၄၉:၆-၁၂) သူတို့၏ကြီးပွားခြင်းသည် အလျင်အမြန်ကွယ်ပျောက်သောအိပ်မက်ကဲ့သို့ ဖြစ်သွားပါလိမ့်မည်။ ကိုယ်စိုက်သည်အတိုင်း ကိုယ်ရိတ်ရမည်ဖြစ်၍ ဇရာအိုအရွယ်မရောက်မီပင် ဖမ်းဆီးခံရစရာအကြောင်းရှိပါလိမ့်မည်။ (ဂလာတိ ၆:၇) သူတို့ကိုကူညီနိုင်သည့် တစ်ဦးတည်းသောအရှင်ကို ကျောခိုင်းခဲ့ကြရာ ခိုကိုးရာမဲ့၊ မျှော်လင့်ချက်မရှိဘဲ ဖြစ်ကြရမည်။ သူတို့ကို ယေဟောဝါစီရင်တော်မူသည့်အခါ သူတို့၏ “အသွင်”—သူတို့၏ ဟိတ်ကြီးဟန်ကြီးနှင့် ရာထူးအဆင့်—ကိုစက်ဆုပ်ရွံရှာတော်မူလိမ့်မည်။

သင့်တုံ့ပြန်ပုံကို သတိပြု

မိမိတွေ့မြင်ခဲ့ရာကို အမြင်မှန်ဖြင့် တုံ့ပြန်ခြင်းမရှိခဲ့သည့်အတွက် အာသပ်ဤသို့ဝန်ခံပါသည်။ “ထိုသို့ အကျွန်ုပ်သည် နှလုံးနာလျက် ကျောက်ကပ်မွှေနှောက်လျက်ရှိ၍ မိုက်သောသူ၊ ပညာမဲ့သောသူဖြစ်ပါ၏။ ရှေ့တော်၌ တိရစ္ဆာန်ကဲ့သို့ဖြစ်ပါ၏။ သို့သော်လည်း အကျွန်ုပ်သည် ကိုယ်တော်ထံမှာ အစဉ်ရှိ၍ အကျွန်ုပ်၏လက်ယာလက်ကို ဆွဲကိုင်တော်မူ၏။ အကျွန်ုပ်ကို ဉာဏ်ပေး၍ ပဲ့ပြင်တော်မူမည်။ နောက်တစ်ဖန် ဘုန်းအသရေ၌ သိမ်းယူတော်မူမည်။”—ဆာလံ ၇၃:၂၁-၂၄။

လူဆိုးတို့၏စည်းစိမ်ချမ်းသာနှင့် ဖြောင့်မှန်သူများ၏ဆင်းရဲဒုက္ခကို တွေးတောဆင်ခြင်နေခြင်းသည် စိတ်နှလုံးမကျေမချမ်း၊ သို့မဟုတ် စိတ်နာကြည်းစရာဖြစ်စေနိုင်သည်။ ဤအခြေအနေကြောင့် အာသပ်သည် နက်ရှိုင်းစွာ—သူ၏ကျောက်ကပ်တွင်—ဗယောက်ဗယက်ဖြစ်ခဲ့ရာ အတော်စိတ်နာခဲ့ပါသည်။ ယေဟောဝါ၏ရှုထောင့်တွင် သူသည် ခံစားချက်များကိုသာအမှီပြုပြီး ကယက်ရိုက်ခံသော အဆင်အခြင်ကင်းမဲ့သည့် တိရစ္ဆာန်ကဲ့သို့ ဖြစ်နေရှာသည်။ သို့ဖြစ်စေကာမူ အာသပ်သည် ‘သူ၏လက်ယာလက်ကို ဆွဲကိုင်ထားသော ဘုရားသခင်ထံ၌ အစဉ်ရှိ’ ပါသည်။ ကျွန်ုပ်တို့၏အတွေးအခေါ်မှားနေ၍ အာသပ်နည်းတူ ယေဟောဝါ၏ပဲ့ပြင်ခြင်းကိုခံယူမည်ဆိုလျှင် ကျွန်ုပ်တို့ကိုအားပေးထောက်ခံ၊ လမ်းပြပေးရန် ဘုရားသခင်လက်တွဲခေါ်ဆောင်ပါလိမ့်မည်။ (ယေရမိ ၁၀:၂၃ နှိုင်းယှဉ်။) ကိုယ်တော့်ပဲ့ပြင်ဆုံးမမှုကို ကျွန်ုပ်တို့ခံယူကျင့်သုံးမှသာလျှင် ပျော်ရွှင်သာယာသောအနာဂတ်သို့ ပို့ဆောင်ခံရလိမ့်မည်။ ကျွန်ုပ်တို့သည် ခေတ္တအရှက်တကွဲအကျိုးနည်းမည်ဖြစ်သော်လည်း ပြောင်းပြန်အခြေအနေဖြစ်သည့် ‘ဘုန်းအသရေခံရခြင်း’ သို့မဟုတ် ဂုဏ်ပြုခံရခြင်းအဖြစ်သို့ ယေဟောဝါရောက်စေတော်မူမည်။

ယေဟောဝါကို အားကိုးအားထားနေဖို့လိုကြောင်း သဘောပေါက်ကာ အာသပ်ထပ်ဆင့်ပြောသည်ကား၊ “ကိုယ်တော်မှတစ်ပါး ကောင်းကင်ဘုံမှာ အကျွန်ုပ်၌ အဘယ်သူရှိပါသနည်း။ ကိုယ်တော်ကိုအလိုရှိသည်နှင့်အမျှ မြေကြီးပေါ်မှာ အကျွန်ုပ်သည် အဘယ်အလိုရှိပါသနည်း။ အကျွန်ုပ်၏အသားနှင့်နှလုံးသည် ပျက်ကြပါ၏။ သို့သော်လည်း ဘုရားသခင်သည် အကျွန်ုပ်နှလုံး၏အစွမ်းသတ္တိ၊ အကျွန်ုပ်အစဉ်အမြဲခံစားရာအဖို့ ဖြစ်တော်မူ၏။ အကယ်စင်စစ် ကိုယ်တော်နှင့် ဝေးဝေးနေသောသူတို့သည် ပျက်စီးခြင်းသို့ရောက်ရကြပါ၏။ ကိုယ်တော်နှင့်ကွာ၍ မှားယွင်းသောသူအပေါင်းတို့ကို ပယ်ရှင်းတော်မူ၏။ အကျွန်ုပ်မူကား၊ ဘုရားသခင့်ထံတော်သို့ချဉ်းကပ်၍ အကျိုးရှိပါ၏။ အမှုတော်ရှိသမျှတို့ကို ကြားပြောခြင်းအလို့ငှာ အရှင်ထာဝရဘုရား [ယေဟောဝါ၊ ကဘ] ၌ ခိုလှုံလျက်နေပါ၏။”—ဆာလံ ၇၃:၂၅-၂၈။

အာသပ်နည်းတူ စစ်မှန်သောလုံခြုံမှုနှင့်သက်သာခြင်းအတွက် ကျွန်ုပ်တို့အားကိုးစရာ ယေဟောဝါမှတစ်ပါး မည်သူမျှမရှိပါ။ (၂ ကောရိန္သု ၁:၃၊ ၄) ထို့ကြောင့် သူတစ်ပါး၏စည်းစိမ်ဥစ္စာကို တပ်မက်နေမည့်အစား ဘုရားအမှုတော်ဆောင်ကြကာ ကောင်းကင်၌ ဘဏ္ဍာကို စုဆောင်းကြစို့။ (မဿဲ ၆:၁၉၊ ၂၀) ယေဟောဝါ၏မျက်နှာသာတော်ရခြင်းသည် ကျွန်ုပ်တို့အတွက် အနှစ်ခြိုက်ဆုံးအရာဖြစ်သင့်သည်။ ကျွန်ုပ်တို့၏ကိုယ်အင်္ဂါအစိတ်အပိုင်းများနှင့် နှလုံးပင် အားနည်းသွားသည့်တိုင် ကိုယ်တော်ရှင်သည် ခွန်အားပေးပြီး အခက်အခဲများကြား မျှော်လင့်ခြင်းကင်းမဲ့၍ သတ္တိမရှိသည့်အဖြစ်မျိုးသို့ မရောက်စေရန် နှလုံးကို တည်ငြိမ်စေတော်မူမည်။ ယေဟောဝါနှင့်ရင်းနှီးကျွမ်းဝင်ခြင်းသည် တန်ဖိုးဖြတ်မရ ပိုင်ဆိုင်ရာပင်ဖြစ်သည်။ ယင်းကိုစွန့်လွှတ်ခြင်းသည် ကျွန်ုပ်တို့နှင့်အတူ ကိုယ်တော်ကို စွန့်ပယ်သူအားလုံးအတွက် အတိဒုက္ခသင့်ရာဖြစ်မည်။ ထိုကြောင့် အာသပ်နည်းတူ ဘုရားသခင်ထံချဉ်းကပ်၍ စိုးရိမ်စရာရှိရှိသမျှကို ကိုယ်တော့်အပေါ် ပုံအပ်ကြစို့လေ။ (၁ ပေတရု ၅:၆၊ ၇) ယင်းသို့ပြုခြင်းက ကျွန်ုပ်တို့၏ဝိညာဏကောင်းကျိုးကို တိုးပွားစေကာ ယေဟောဝါ၏အံ့ချီးဖွယ်အမှုများကို သူတစ်ပါးအားပြောဆိုကြရန် တိုက်တွန်းပေးပါသည်။

ယေဟောဝါကို သစ္စာရှိပါလေ

မိမိ၏ပြည်တော်ဖြစ်သည့် ဣသရေလနိုင်ငံတွင် လူဆိုးတို့ ကြီးပွားနေသည်ကို အာသပ်တွေ့မြင်ခဲ့၍ စိတ်အနှောင့်အယှက်ဖြစ်ခဲ့ပါသည်။ ယေဟောဝါ၏သစ္စာရှိကျေးကျွန်များတွင် ကြွားဝါသူများ၊ မာန်မာနထောင်လွှားသူများ၊ အဓမ္မမှုပြုသူများ၊ မထီမဲ့မြင်ပြုသူများ၊ ကောက်ကျစ်စဉ်းလဲသူများနှင့် မိမိတို့ပြုမူသမျှကို ဘုရားသခင်မသိဟု ပြောဆိုသော “လူဆိုးများ” ရှိနေပါသည်။ (ဆာလံ ၇၃:၁-၁၁) သတိပေးချက် ပါတကား။ ယေဟောဝါဘုရားသခင်၏အလိုတော်နှင့်တွေ့လိုလျှင် မာနထောင်လွှားခြင်း၊ အဓမ္မအမှုပြုခြင်း၊ မထီမဲ့မြင်ပြုခြင်း နှင့် မရိုးသားခြင်း အစရှိသောလက္ခဏာများကို သတိပြုရှောင်ကြဉ်ရမည်။ အာသပ်နည်းတူ ယေဟောဝါ၏ကျေးကျွန်အပေါင်းသည် ကိုယ်တော်၏သစ္စာရှိဝတ်ပြုသူများနှင့်အတူ မှန်မှန်စည်းဝေးခြင်းအားဖြင့် ‘ဘုရားသခင်၏သန့်ရှင်းရာဌာနတော်ထဲဝင်ကြ’ စို့။ မှန်ပါသည်။ ယေဟောဝါကိုချစ်မြတ်နိုးသူအားလုံး ‘ဘုရားသခင်ထံချဉ်းကပ်’ ကာ သူတစ်ပါးသည် မည်သို့ပင်ပြောဆိုပြုမူပါစေ ဆင်းရဲဒုက္ခခံရစဉ်ပင် ကိုယ်တော်ခွန်အားပေးတော်မူမည့်အကြောင်း ကိုယ်တော်ကို အားထားမှီခိုကြစို့လေ။—ဆာလံ ၇၃:၁၂-၂၈။ ၃ ယောဟန် ၁-၁၀။

မှန်သည်။ လူဆိုးတို့၏စည်းစိမ်ချမ်းသာကြောင့် အာသပ်နည်းတူ ကျွန်ုပ်တို့ယုံကြည်ခြင်း အစမ်းသပ်ခံရကောင်းခံရပေမည်။ သို့တိုင် ယေဟောဝါ၏လုပ်ငန်းတော်ကို ဦးစားထားနေမည်ဆိုလျှင် ဤစုံစမ်းခြင်းကိုခံရပ်နိုင်မည်ဖြစ်သည်။ ယင်းသို့ပြုသည့်အတွက် ဆုကျေးဇူးခံစားရမည်အမှန်။ အကြောင်းမူကား၊ ‘ဘုရားသခင်သည် ကျွန်ုပ်တို့ပြုသောအမှုကိုလည်းကောင်း၊ နာမတော်ကိုထောက်၍ ပြသောမေတ္တာကိုလည်းကောင်း မေ့လျော့သည်တိုင်အောင် မဖြောင့်မတ်သောဘုရား’ ဖြစ်တော်မမူပါ။ (ဟေဗြဲ ၆:၁၀) ကျွန်ုပ်တို့ခံစားရမည့် ဆုကျေးဇူးနှင့်နှိုင်းယှဉ်လိုက်လျှင် ခံခဲ့ရသောစုံစမ်းခြင်းများသည် “ခဏခံရ၍ပေါ့ပါး” နေပါလိမ့်မည်။ (၂ ကောရိန္သု ၄:၁၇) အနှစ် ၇၀၊ ၈၀ ဆင်းရဲဒုက္ခခံရခြင်းပင်လျှင် သစ္စာရှိကျေးကျွန်များအား ယေဟောဝါကတိထားတော်မူသည့် ထာဝစဉ်ပျော်ရွှင်ရသောအသက်တာနှင့် နှိုင်းယှဉ်သည့်အခါ အသက်တစ်ခါရှိုက်သကဲ့သို့သာ လွန်သွားပါလိမ့်မည်။—ဆာလံ ၉၀:၉၊ ၁၀။

ဖြောင့်မတ်ခြင်းတရားကြောင့် ခံရသောဆင်းရဲဒုက္ခများနှင့်ပြောင်းပြန်ဖြစ်သည့် လူဆိုးတို့၏ စည်းစိမ်းချမ်းသာကြောင့် ဘုရားသခင်၏ သန့်ရှင်းသောဝိညာဉ်တော် အသီးတစ်သီးဖြစ်သော ယုံကြည်ခြင်းကို မတင်ပြနိုင်သည်တိုင် ဘယ်သောအခါမျှ မဖြစ်ပါစေနှင့်။ (ဂလာတိ ၅:၂၂၊ ၂၃။ ၁ ပေတရု ၃:၁၃၊ ၁၄) မရှက်ကြောက်တတ်ကြသည့်အတွက် အများအားဖြင့်ကြီးပွားကြသော လူဆိုးတို့ကို ကျွန်ုပ်တို့အတုယူမည်ဆိုလျှင် စာတန်အလွန်ဝမ်းသာပါလိမ့်မည်။ ထိုသို့ဖြစ်စေမည့်အစား ယေဟောဝါ၏ဖြောင့်မတ်သောစံချိန်များကို စွန့်ပယ်ရန် သွေးဆောင်ခံရခြင်းတို့ကို ငြင်းဆန်ခြင်းအားဖြင့် ကိုယ်တော်၏နာမတော်မြတ်ကို ဂုဏ်တင်ချီးမြှင့်ကြစို့။ (ဇေဖနိ ၂:၃) လူဆိုးတို့၏အောင်မြင်မှုကြောင့် စိတ်အနှောင့်အယှက် မဖြစ်ကြစို့နှင့်။ အကြောင်းမူကား၊ အလွန်ဆုံးဆိုလျှင် စည်းစိမ်ဥစ္စာကိုသာ သူတို့စုဆောင်းနိုင်မိမည်။ ယင်းသည် အဘယ်တန်ဖိုးရှိသနည်း။ ပိုင်သအုပ်စိုးရှင် ယေဟောဝါသခင်ကို ယုံကြည်ခြင်းတင်ပြသူများခံစားနေကြရသည့် ဝိညာဏစည်းစိမ်ချမ်းသာနှင့် လုံးဝမနှိုင်းယှဉ်နိုင်ပါလေ။