သွန်သင်ချက်ပေးသောအခါ အခြားသူများ၏ ဂုဏ်သိက္ခာကို သင်ထောက်ထားသလော

သိက္ခာရှိရှိနှင့် သွန်သင်ချက်ပေးခံရခြင်းသည် မည်မျှကောင်းပြီးအကျိုးရှိလိုက်မည်ဖြစ်ခြင်း! “ကြင်နာမှု၊ စာနာမှု၊ ဂရုစိုက်မှုရှိသောသွန်သင်ချက်သည် ကောင်းသောဆက်ဆံရေးကိုဖြစ်စေသည်” ဟု အက်ဒဝပ်ကပြောသည်။ “သွန်သင်ချက်ပေးသူသည် သင့်ဘက်မှတင်ပြစရာကိုနားထောင်ရန် လိုလိုလားလားရှိခြင်းဖြင့် သင့်ကိုလေးစားပြီး ရိုသေကြောင်းတင်ပြသည်ဟု သင်ခံစားရလျှင် ထိုသွန်သင်ချက်ကိုလက်ခံရန် များစွာလွယ်ကူသည်” ဟု ဝါရင်ကအဆိုပြုသည်။ “သွန်သင်ပေးသူက ကျွန်တော့်ကိုလေးလေးစားစားဆက်ဆံရင် သူ့ကိုချဉ်းကပ်ဖို့၊ အကြံဉာဏ်တွေတောင်းဖို့ ပိုရဲတယ်လို့ကျွန်တော်ယူဆတယ်” ဟုနော်မန်က မှတ်ချက်ချသည်။

ဂုဏ်သိက္ခာနှင့်ဆိုင်သော လူ့ပင်ကိုယ်အခွင့်အရေး

လှိုက်လှဲ၊ ဖော်ရွေ၍ မေတ္တာပါသောသွန်သင်ချက်သည် အမှန်ပင်လက်ခံဖွယ်ရာဖြစ်သည်။ သင်သွန်သင်ခံလိုသည့်နည်းအတိုင်း အခြားသူများကိုသွန်သင်ခြင်းသည် အကျိုးဖြစ်ထွန်းသည်။ (မဿဲ ၇:၁၂) ကောင်းသောသွန်သင်မှုပေးသူသည် အချိန်ယူနားထောင်တတ်ပြီး သွန်သင်ခံရသူကိုအပြစ်တင်ဝေဖန်မည့်အစား—သူ၏စဉ်းစားပုံ၊ အနေအထားနှင့် ခံစားချက်များ—ကိုနားလည်ရန်ကြိုးစားသည်။—သု. ၁၈:၁၃။

ခရစ်ယာန်အကြီးအကဲများအပါအဝင် ယနေ့သွန်သင်ပေးသူများသည် သွန်သင်ချက်ပေးနေသောအခါ အခြားသူများ၏ဂုဏ်သိက္ခာကိုထောက်ထားရန် သတိရှိဖို့လိုအပ်သည်။ အဘယ်ကြောင့်နည်း။ လူ့အသိုင်းအဝိုင်းတွင် ပျံ့နှံ့နေသောသဘောထားတစ်ခုမှာ သူတစ်ပါး၏ဂုဏ်သိက္ခာကို မထောက်မထားဆက်ဆံခြင်းဟူသော ရိုးရှင်းသည့်အကြောင်းကြောင့်ဖြစ်သည်။ ယင်းသဘောထားသည် ကူးစက်တတ်သည်။ သူတစ်ပါး၏ဂုဏ်သိက္ခာကို ထောက်ထားလျက်ဆက်ဆံရန် သင်မျှော်လင့်သည့် အတတ်ပညာရှင်များ၊ ဘာသာရေးခေါင်းဆောင်များ သို့မဟုတ် အခြားသူများသည် ထိုသို့မဟုတ်သူများဖြစ်နေတတ်ကြသည်။ ဥပမာ၊ လုပ်ငန်းခွင်တစ်ခုတွင် အလုပ်တစ်ခုရပ်ဆိုင်းသွားခြင်းသည် အလုပ်ရှင်နှင့်အလုပ်သမားနှစ်ဦးနှစ်ဖက်လုံးအတွက် ထိခိုက်နစ်နာမှုနှင့် ခက်ခဲကျပ်တည်းမှုကို ဖြစ်စေသည်။ မိမိကိုယ်ကိုယုံကြည်အားထားစိတ်ကို ပျက်စီးစေသည်။ အထူးသဖြင့် အလုပ်ဖြုတ်ခံရသူသည် သူ၏ဂုဏ်သိက္ခာကိုထောက်ထားမှုဖြင့်ဆက်ဆံမခံရလျှင် ထိုသို့ ဖြစ်နိုင်သည်။ ဤကိစ္စတွင် ကြီးကြပ်ညွှန်ကြားသူများသည် “ကြားနာရန်ခက်သည့်အကြောင်းကြားချက်များကို ရှင်းလင်းပြတ်သားပြီး တိကျခိုင်မာစွာဖြစ်စေလျက် တစ်ဦးစီ၏ဂုဏ်သိက္ခာကို မထိပါးအောင်” ပြောဆိုတတ်ရန် သင်ယူရမည်ဟု ဗယ်န်ကိုဗာစန်း စာစောင်က ဖော်ပြသည်။ မှန်ပါသည်၊ လူသားအားလုံးသည် ဂုဏ်သိက္ခာရှိရှိဆက်ဆံခံရရန် ထိုက်တန်ပါသည်။

ကုလသမဂ္ဂအထွေထွေညီလာခံတွင် ဤသို့ကြေညာသည်– “လူသားအားလုံးသည် မွေးရာပါလွတ်လပ်ခွင့်ရှိကြပြီး ဂုဏ်သိက္ခာနှင့်အခွင့်အရေးတို့တွင် တန်းတူဖြစ်ကြသည်။ သူတို့သည် ဆင်ခြင်တုံတရားနှင့်သြတ္တပ္ပစိတ်တို့ဖြင့် တည်ဆောက်ထားခံကြရပြီး တစ်ဦးကိုတစ်ဦး ညီအစ်ကိုမောင်နှမစိတ်ဓာတ်ဖြင့် ဆက်ဆံသင့်သည်။” လူ့ဂုဏ်သိက္ခာသည် တိုက်ခိုက်ခံနေရသဖြင့် ကုလသမဂ္ဂပဋိညာဉ်စာတမ်းနှင့် လူသားအားလုံးနှင့်ဆိုင်သောကြေညာချက်၏နိဒါန်းတို့သည် ဤအရည်အချင်းကို အသိအမှတ်ပြုကြသည်။ ယင်းတို့က “အခြေခံလူ့အခွင့်အရေး၊ လူပုဂ္ဂိုလ်၏ ဂုဏ်သိက္ခာနှင့်တန်ဖိုး တို့အပေါ် သစ္စာစောင့်သိခြင်း” အကြောင်းကို အခိုင်အမာပြောဆိုကြသည်။

ယေဟောဝါသည် ပင်ကိုယ်ဂုဏ်သိက္ခာဖြင့် လူကိုဖန်ဆင်းခဲ့

ယေဟောဝါသည် ဂုဏ်သိက္ခာရှိတော်မူသောဘုရားသခင်ဖြစ်တော်မူသည်။ ကိုယ်တော့်မှုတ်သွင်းခံစကားများက တိကျမှန်ကန်စွာဆိုထားသည်မှာ “ဂုဏ်သိက္ခာနှင့် ခမ်းနားမြင့်မြတ်ခြင်းသည် ရှေ့တော်တွင်ရှိ” ပြီး “[ကိုယ်တော့်] ဂုဏ်သိက္ခာသည် ကောင်းကင်ထက်ဝယ် ပြန်လည်ပြောကြားခြင်းခံရပါသည်” ဟူ၍ဖြစ်သည်။—၁ ရာဇဝင်ချုပ် ၁၆:၂၇၊ ကဘ; ဆာလံ ၈:၁၊ ကဘ။

ဂုဏ်သိက္ခာရှိသောဘုရားနှင့် စကြဝဠာအကြွင်းမဲ့ပိုင်သအုပ်စိုးရှင်အနေနှင့် ကိုယ်တော်သည် ကောင်းကင်နှင့်မြေကြီးတို့တွင်ရှိသည့် မိမိ၏ဖန်ဆင်းရာအားလုံးတို့အပေါ် ဂုဏ်သိက္ခာကို အပ်နှင်းထားတော်မူသည်။ ယင်းသို့ချီးမြှင့်ခံရသူများထဲတွင် ထူးခြားထင်ရှားသူမှာ ဘုန်းပွင့်ပြီးနန်းထိုင်နေသောသားတော် ဘုရင်ယေရှုခရစ်ဖြစ်သည်။ “ဂုဏ်သိက္ခာနှင့်ခမ်းနားမြင့်မြတ်ခြင်းကို သူ့အပေါ်မှာတင်တော်မူ၏” ဟု ဒါဝိဒ်က တင်ကူးရေးသားခဲ့သည်။—ဆာလံ ၂၁:၅၊ ကဘ; ဒံယေလ ၇:၁၄။

ဝမ်းနည်းစရာကား ဤအခြေခံလူ့အခွင့်အရေးသည် သမိုင်းတစ်လျှောက် အလွဲသုံးစားပြုခြင်းခံလာရသည်။ မိမိ၏လုပ်ရပ်အားဖြင့် စာတန်မာရ်နတ်ဖြစ်လာသော တန်ခိုးကြီကောင်းကင်တမန်တစ်ပါးက ဘုရားသခင့်အကြွင်းမဲ့အုပ်စိုးပိုင်ခွင့်၏ တော်မှန်ခြင်း၊ ဖြောင့်မတ်ခြင်းနှင့် ထိုက်တန်ခြင်းတို့ကို စိန်ခေါ်ခဲ့သည်။ ထိုသို့ ပြုခြင်းသည် ယေဟောဝါအားမခန့်မငြားပြုခြင်းနှင့် ဂုဏ်အသရေရှိကိုယ်တော့်နာမတော်ကို ရှုတ်ချခြင်းကိုတင်ပြလျက် ကိုယ်တော့်အုပ်ချုပ်ပိုင်ခွင့်ကို စိန်ခေါ်ခြင်းဖြစ်သည်။ မထိုက်မတန်ဘဲ မိမိကိုယ်ကိုအလွန်အမင်းဂုဏ်တင်သည်။ မာရ်နတ်ကဲ့သို့ပင် ကျမ်းစာခေတ်က နေဗုခဒ်နေဇာမင်းကဲ့သို့သော တန်ခိုးသြဇာကြီးသည့်လူသားဧကရာဇ်များသည် မိမိတို့၏ ‘အစွမ်းတန်ခိုးနှင့် ခမ်းနားထည်ဝါမှု’ ကို ဝါကြွားကြသည်။ သူတို့သည် ယေဟောဝါ၏ဂုဏ်သိက္ခာကို ထိပါးစော်ကားကြပြီး ကိုယ်နှင့်မထိုက်တန်သောဂုဏ်သိက္ခာဖြင့် မိမိတို့ကိုယ်ကိုချီးမြှောက်ကြသည်။ (ဒံယေလ ၄:၃၀) လူသားလောကအပေါ်သက်ရောက်နေသည့် စာတန်၏ဖိနှိပ်သည့်အုပ်ချုပ်မှုက လူသားတို့၏ဂုဏ်သိက္ခာကို ထိုးနှက်ခဲ့ပြီး ဆက်လက်၍ထိုးနှက်နေလျက်ရှိသည်။

သင့်ဂုဏ်သိက္ခာထိပါးခံရဖူးသလော။ သွန်သင်ချက်ပေးခံရသောအခါ အတိုင်းထက်အလွန်အပြစ်တင်ခြင်း၊ အရှက်ခွဲခြင်း၊ သိက္ခာချခြင်း သို့မဟုတ် နှိမ်ခြင်းတို့ကို ခံရဖူးသလော။ “ကြောင့်ကြမှု၊ စာနာမှုနဲ့ ဂုဏ်သိက္ခာရှိတာတွေကို ကျွန်တော်မခံစားရဘူး။ ကျွန်တော်ဟာ ဘာမှအသုံးမကျဘူးလို့ ခံစားရစေတယ်။ အဲဒါက စိတ်ပျက်စရာ၊ စိုးရိမ်ပူပန်စရာ နောက်ဆုံး စိတ်ဓာတ်ကျဆင်းစရာကောင်းတဲ့ ခံစားချက်တွေကိုဖြစ်စေတယ်” ဟု အယ်န်ဒရီးဆိုသူကပြောသည်။ “ကိုယ့်အကျိုးကိုမလိုလားဘူးလို့ ထင်တဲ့လူတစ်ယောက်ဆီက သွန်သင်ချက်ကို လက်ခံဖို့ခက်တယ်” ဟု လော်ရာပြောသည်။

ဤအကြောင်းကြောင့် ခရစ်ယာန်အကြီးအကဲများသည် ဘုရားသခင်၏သိုးတော်စုကို ရိုသေလေးစားမှုဖြင့်ဆက်ဆံရန် ဆုံးမခံရကြသည်။ (၁ ပေတရု ၅:၂၊ ၃) သူတစ်ပါးကိုသွန်သင်ရန် လိုအပ်ပြီးအကျိုးဖြစ်ထွန်းမည့် အခြေအနေများပေါ်ပေါက်လာခဲ့သော် အခြားသူများ၏ဂုဏ်သိက္ခာကို မဆိုင်းမတွထိပါးစော်ကားတတ်သည့် လောကသားများ၏ အတွေးအခေါ်နှင့်အမူအကျင့်မျိုးမှ သင့်ကိုယ်ကိုမည်သို့ကာကွယ်နိုင်သနည်း။ ခရစ်ယာန်ချင်းအပြင် သင်ကိုယ်တိုင်၏ ဂုဏ်သိက္ခာကို ထိန်းသိမ်းရန် မည်သည့်အရာကအကူအညီဖြစ်စေနိုင်သနည်း။—သု. ၂၇:၆; ဂလာတိ ၆:၁။

ဂုဏ်သိက္ခာကိုထိန်းသိမ်းသည့်စည်းမျဉ်းများ

ဤကိစ္စတွင် ဘုရားသခင့်နှုတ်ကပါဌ်တော်သည် နှုတ်ဆိတ်မနေပါ။ ကျွမ်းကျင်သည့်သွန်သင်သူသည် ဤလောက၏ဉာဏ်ပညာကို အားထားမည့်အစား ဘုရားသခင့်နှုတ်ကပါဌ်တော်၏သွန်သင်မှုကို အကြွင်းမဲ့ယုံစားမည်ဖြစ်သည်။ မြင့်မြတ်သန့်ရှင်းသည့်စာပေတွင် တန်ဖိုးရှိအကြံပြုချက်များပါဝင်သည်။ လိုက်နာသောအခါ ယင်းတို့က သွန်သင်ပေးသူနှင့် သွန်သင်ခံရသူနှစ်ဦးလုံးတို့၏ဂုဏ်သိက္ခာကို ထိန်းသိမ်းပေးသည်။ ထို့ကြောင့် ခရစ်ယာန်ကြီးကြပ်မှူးတိမောသေထံ ပေါလု၏ညွှန်ကြားမှုမှာ ဤသို့– “အသက်ကြီးသောသူကို ကြပ်တည်းစွာမဆုံးမနှင့်။ အဘကဲ့သို့တောင်းပန်လော့။ လူပျိုတို့ကို ညီအစ်ကိုကဲ့သို့လည်းကောင်း၊ မိန်းမပျိုတို့ကို အလွန်စင်ကြယ်သောအခြင်းအရာနှင့်တကွ နှမကဲ့သို့လည်းကောင်း မှတ်၍ကျင့်ကြလော့။ (၁ တိမောသေ ၅:၁၊ ၂) ဤစံချိန်ကိုလိုက်လျှောက်ခြင်းအားဖြင့် ဝမ်းနည်းစရာ၊ နာကျည်းစရာ၊ စိတ်အနှောင့်အယှက်ဖြစ်စရာများစွာကို မည်မျှရှောင်ရှားလိုက်နိုင်မည်ဖြစ်ခြင်း!

အောင်မြင်သောသွန်သင်ခြင်း၏သော့ချက်မှာ တစ်ဖက်သားနှင့် သူ့အားဂုဏ်သိက္ခာရှိရှိ၊ ဂရုတစိုက်ဆက်ဆံခံရမည့် ရပိုင်ခွင့်ကို တော်လျော်စွာလေးစားခြင်းဖြစ်ကြောင်း သတိပြုပါ။ နယ်လှည့်ကြီးကြပ်မှူးများအပါအဝင် ခရစ်ယာန်အကြီးအကဲများသည် ဤအကြံဉာဏ်ကိုလိုက်လျှောက်ရန် အားထုတ်သင့်ပြီး ပဲ့ပြင်ခံရရန်လိုအပ်သူသည် အဘယ်ကြောင့်ဤသို့ ပြုမူကျင့်ကြံရသည်ကို သုံးသပ်စိစစ်နေရန် ကြိုးစားသင့်သည်။ သူ၏အမြင်ကို နားထောင်လိုသည့်ဆန္ဒရှိသင့်ပြီး မိမိကူညီပေးသူအရှက်ရခြင်း၊ အနှိမ်ခံရခြင်း၊ သိက္ခာကျခြင်းတို့ကို ရှောင်ရှားနိုင်ရန် အတတ်နိုင်ဆုံးကြိုးစားအားထုတ်သင့်သည်။

အကြီးအကဲတစ်ဦးအနေနှင့် သင်သည် သူ့ကိုဂရုစိုက်ပြီး သူ့ ပြဿနာများကို ကူညီဖြေရှင်းပေးလိုကြောင်းတို့ကို သင့်ညီအစ်ကိုအားသိစေပါ။ ကျန်းမာရေးစစ်ဆေးရန် ဆရာဝန်ကောင်းတစ်ဦး၏ရုံးခန်းသို့ သင်သွားသောအခါ ထိုအတိုင်းသူလုပ်မည်ဖြစ်သည်။ အေးပြီးပိုးသတ်ထားသောအခန်းထဲတွင် အဝတ်ချွတ်ရမည်ဟူသည့်အတွေးသည် သင့်အတွက် စိတ်အနှောင့်အယှက်ဖြစ်စရာ၊ သိက္ခာကျသည်ဟုထင်စရာဖြစ်စေနိုင်သည်။ သင်၏ ကိုယ့်သိက္ခာကိုယ်လေးစားမှုကို အကင်းပါးစွာသိကြောင်း သူကတင်ပြပြီး သင့်ကိုအဝတ်တစ်ခုခြုံပေးပြီးမှ သင့်ဖျားနာမှုအတွက် လိုအပ်သည့်စမ်းသပ်စစ်ဆေးမှုကိုပြုခြင်းအားဖြင့် သင့်ဂုဏ်သိက္ခာကိုထောက်ထားလျှင် ထိုဆရာဝန်ကိုသင်မည်မျှလေးစားလိုက်မည်ဖြစ်ခြင်း! ထိုနည်းထပ်တူပင် လူများကို တော်လျော်သည့်လေးစားမှုတင်ပြသော ခရစ်ယာန်သွန်သင်ပေးသူတစ်ဦးသည် ကြင်နာမှုနှင့်တည်ကြည်ခိုင်မာမှုရှိသော်လည်း လက်ခံသူအား ဂုဏ်သိက္ခာအဝတ်ဖြင့် ဖုံးအုပ်ပေးသည်။ (ဗျာဒိတ် ၂:၁၃၊ ၁၄၊ ၁၉၊ ၂၀) ဆန့်ကျင်ဘက်အနေနှင့် ကြမ်းတမ်းသော၊ ဖော်ရွေမှုမရှိသော၊ ခံစားမှုမပါသောသွန်သင်ချက်သည် သင့်အားအရှက်ကွဲစေသော၊ သိက္ခာကျစေသော၊ သင့်ဂုဏ်သိက္ခာခွာချခံရသည်ဟု ခံစားရစေသော ပုံဆောင်သဘောအရ သင့်အဝတ်ကိုချွတ်ခြင်းဖြစ်သည်။

သီအိုကရက်တစ်ဓမ္မအမှုကျောင်းကြီးကြပ်မှူးသည် အထူးသဖြင့် သိက္ခာရှိရှိသွန်သင်ချက်ပေးရန် ဂရုစိုက်ကြသည်။ အသက်ကြီးသောသူများကို သွန်သင်ချက်ပေးသည့်အခါ သူတို့၏သွေးသားမိဘများအား တင်ပြသည့်မေတ္တာမျိုးကို ထင်ဟပ်စေကြမည်ဖြစ်သည်။ သူတို့သည် ထောက်ထားစာနာ၊ ရင်းနှီးပွင့်လင်းပြီး လှိုက်လှဲဖော်ရွေကြသည်။ ထိုသို့သောအကင်းပါးမှုသည် လိုအပ်သည့်အရာဖြစ်သည်။ ယင်းသည် သင့်တော်လျောက်ပတ်သော သွန်သင်ချက်ပေးခြင်းနှင့်ခံယူခြင်းကို ဖြစ်ထွန်းအောင်မြင်စေသည့် အသိုင်းအဝိုင်းကို ဖန်တီးပေးသည်။

အကြီးအကဲတို့ လက်တွေ့ကျသောသွန်သင်ချက်သည် တိုးတက်ကောင်းမွန်စေပြီး အားပေးမှု၊ တည်ဆောက်မှုတို့ကိုဖြစ်စေကာ အပြုသဘောကိုဆောင်သည်ကို စိတ်တွင်စွဲမှတ်ထားပါ။ ဧဖက် ၄:၂၉ က ဤသို့ဖော်ပြထားသည်– “ညစ်ညူးသောစကားတစ်ခွန်းကိုမျှ သင်တို့နှုတ်ထဲကမထွက်စေနှင့်။ ကြားနာသောသူတို့၏အကျိုးကို ပြုစုစေခြင်းငှာ တည်ဆောက်စရာဖို့ကောင်းသောစကားကိုသာ သုံးဆောင်ကြလော့။”

ခက်ထန်သည့်အသုံးအနှုန်းများ၊ ရင့်သီးသည့်ဝေါဟာရများ သို့မဟုတ် ဆင်ခြေဆင်လက်များကို သုံးရန်မလိုအပ်ပါ။ ယင်းအစား သူတစ်ပါးကိုလေးစားခြင်းနှင့် ကိုယ့်သိက္ခာကိုယ်လေးစားသည့် သူ့ခံစားချက်ကို ထောက်ထားလိုသည့်ဆန္ဒတို့က ကိစ္စအဝဝကို အပြုသဘောနှင့် တည်ဆောက်မှုဖြစ်စေသည့်နည်းဖြင့်ကိုင်တွယ်ရန် သင့်အားလှုံ့ဆော်မည်။ စိတ်ပျက်အားငယ်၍ တန်ဖိုးမရှိဟုကိုယ်ကိုကိုယ်ထင်မှတ်စေသည့် အမြင်များကို အသားပေးဖော်ပြမည့်အစား သူ၌ကောင်းသည့်အချက်များ သို့မဟုတ် အရည်အချင်းများကို ရိုးသား၊ စစ်မှန်သည့်သဘောနှင့် ချီးမွမ်းခြင်းအားဖြင့် သွန်သင်ချက်ကိုနိဒါန်းပျိုးပါ။ သင်သည် အကြီးအကဲအဖြစ်လုပ်ဆောင်ပါက သင်၏ ‘ဖြိုလှဲရန်မဟုတ်ဘဲ တည်ဆောက်ရန် အခွင့်အာဏာ’ ကို အသုံးပြုပါ။—၂ ကောရိန္သု ၁၀:၈၊ သမ။

မှန်ပါသည်၊ ခရစ်ယာန်ကြီးကြပ်မှူးများထံမှ မည်သည့်သွန်သင်ချက်မဆိုသည် လိုအပ်သည့်အားပေးမှုနှင့် တည်ဆောက်စရာဖို့ကောင်းသောအရာဖြစ်သင့်သည်။ စိတ်ပျက်အားလျော့စရာ သို့မဟုတ် “ခြိမ်းချောက်သည့်အရာ” မဖြစ်သင့်။ (၂ ကောရိန္သု ၁၀:၉) ကြီးလေးသည့်အမှားပြုသူပင်လျှင် သူ၏ ကိုယ်ကိုကိုယ်လေးစားမှုနှင့် ဂုဏ်သိက္ခာတို့ကို အတန်အရာအခွင့်ပေးသင့်သည်။ သွန်သင်ချက်သည် ကြင်နာသော်လည်း ခိုင်မာမှုရှိခြင်းဖြင့် ဟန်ချက်ညီနေပြီး သူနောင်တရရန်လှုံ့ဆော်သည့် ဆုံးမစကားများဖြစ်သင့်သည်။—ဆာလံ ၄၄:၁၅; ၁ ကောရိန္သု ၁၅:၃၄။

ဣသရေလလူမျိုးကိုပေးသော ဘုရားသခင့်ပညတ်တော်တွင်လည်း အလားတူစည်းမျဉ်းများထည့်သွင်းထားကြောင်း ထင်ရှားသည်။ ယင်းက သွန်သင်မှုပေးခြင်းကို ခွင့်ပြုပြီး ကာယရေးဆိုင်ရာစည်းမျဉ်းများပင် ပါဝင်သည်နှင့်တစ်ပြိုင်နက် ပုဂ္ဂိုလ်ရေးဂုဏ်သိက္ခာကိုကာကွယ်သည့် တစ်ဦးစီ၏အခွင့်အရေးကိုလည်း ထိန်းသိမ်းပေးသည်။ အချက်ရေဖြင့်ရိုက်နှက်ခြင်းတွင် “အပြစ်နှင့်အလျှောက်ညီမျှသောဒဏ်ချက်” ကိုခွင့်ပြုသော်လည်း မပိုစေရ။ အမှားပြုသူသည် “ယုတ်ညံ့သောသူ” ဟုယူမှတ်ခြင်းမခံရစေရန် ရိုက်ချက်ကိုကန့်သတ်ထားသည်။—တရားဟောရာ ၂၅:၂၊ ၃။

နောင်တရသည့်အပြစ်ပြုသူ၏ ခံစားချက်များကို အသိအမှတ်ပြုခြင်းသည်လည်း ယေရှု၏ဂုဏ်ရည်တစ်ခုဖြစ်သည်။ ကိုယ်တော်နှင့်ပတ်သက်၍ ဟေရှာယပရောဖက်ပြုချက်မှာဤသို့– “နင်းနယ်လျက်ရှိသောကျူပင်ကိုမချိုး၊ အတောက်သေးသောမီးစာကိုမသတ်။ တရားသည် မြဲမြံခြင်းသို့ရောက်မည့်အကြောင်း စီရင်လိမ့်မည်။”—ဟေရှာယ ၄၂:၃; မဿဲ ၁၂:၁၇၊ ၂၀; လုကာ ၇:၃၇၊ ၃၈; ၄၄-၅၀။

ကိုယ်ချင်းစာနာမှုရှိရန်လိုအပ်ကြောင်း ထပ်ဆင့်၍အထူးပြုဖော်ပြခြင်းသည် တောင်ပေါ်ဒေသနာမှ ယေရှု၏စကားများဖြစ်သည်။ “သင်တို့သည် ကိုယ်၌သူတစ်ပါးပြုစေလိုသမျှအတိုင်း သူတစ်ပါး၌ပြုကြလော့။” (မဿဲ ၇:၁၂) ဤစည်းမျဉ်းကို ရွှေပညတ်ဟုခေါ်လောက်သည်ထိ ယင်းသည် ကောင်းသောဆက်ဆံရေးတိုးတက်စေရာတွင် အချက်အချာကျသည်။ ခရစ်ယာန်အကြီးအကဲတစ်ဦးအနေနှင့် သူတစ်ပါးကိုသွန်သင်ချက်ပေးသောအခါ ကြင်နာမှုနှင့် သိက္ခာရှိရှိဆက်ဆံရန် ယင်းက သင့်အားမည်သို့အကူအညီပေးသနည်း။

သင်လည်း အမှားများပြုတတ်ကြောင်း မမေ့ပါနှင့်။ ယာကုပ်သတိထားမိသကဲ့သို့ “လူအားလုံးတို့သည် အကြိမ်ပေါင်းများစွာ ထိမိလဲစေကြ၏။” (ယာကုပ် ၃:၂၊ ကဘ) သူတစ်ပါးချွတ်ယွင်းချက်များအကြောင်း ကာယကံရှင်ကိုပြောဆိုရန်လိုအပ်သည့်အခါ ယင်းအချက်ကိုသတိရခြင်းက သင့်ပြောဆိုမှုကို တည်ငြိမ်ပျော့ပျောင်းစေပြီး သင့်ခံစားချက်များကိုထိန်းချုပ်ရန် ကူညီပေးသည်။ သူတို့၏ ထိခိုက်လွယ်သောသဘောများကို အသိမှတ်ပြုပါ။ ယင်းက လွန်ကဲသည့်ပြစ်တင်ဝေဖန်ခြင်း၊ အမှား သို့မဟုတ် ချွတ်ချော်ချက်အသေးအမွှားကလေးများကို ပုံကြီးချဲ့ခြင်းတို့ကိုရှောင်ရန် သင့်အားကူညီမည်။ ယေရှု၏ဤစကားက ယင်းအချက်ကိုထင်ရှားစေသည်– “သင်တို့သည် စစ်ကြောဆုံးဖြတ်ခြင်းနှင့်ကင်းလွတ်ရမည်အကြောင်း သူတစ်ပါး၏အမှု၌ စစ်ကြောဆုံးဖြတ်ခြင်းကိုမပြုကြနှင့်။ သင်တို့သည် အကြင်တရားအတိုင်း သူတစ်ပါးကိုစီရင်ကြ၏။ ထိုတရားအတိုင်း စီရင်ခြင်းကိုခံရကြမည်။ အကြင်ချိန်၊ တင်း ပမာဏနှင့် သူတစ်ပါးအားပေး၏။ ထိုပမာဏအတိုင်း ကိုယ်ခံရကြမည်။—မဿဲ ၇:၁၊ ၂။

အခြားသူများ၏သိက္ခာကိုထောက်ထား —မာရ်နတ်ကိုဆန့်ကျင်

စာတန်၏နည်းစနစ်များသည် သင့်ဂုဏ်သိက္ခာကိုခွာချရန်၊ ယုတ်ညံ့သည်၊ အသုံးမကျဟု သင်ခံစားရပြီး စိတ်ငြိုးငယ်မှိုင်တွေစေရန် ဦးတည်ချက်ရှိသည်။ သစ္စာရှိသူယောဘအား အပျက်သဘောဆန်သည့်စိတ်လှုပ်ရှားမှုများ ပေါ်လာအောင်လှုံ့ဆော်ရန် လူသားကိုယ်စားလှယ်များကို သူမည်သို့အသုံးပြုကြောင်း သတိပြုပါ။ အရေခြုံဧလိဖတ် ဤသို့အဆိုပြုသည်– “[ယေဟောဝါသည်] အမှုတော်ထမ်းတို့ကို ယုံတော်မမူ။ ကောင်းကင်တမန်တော်တို့၌ စုံလင်ခြင်းမရှိဟု ထင်တော်မူတတ်၏။ သို့ ဖြစ်၍ မြေမှုန့်၌တည်၍ မြေထဲ၌နေတတ်သောသူတို့ [အပြစ်ရှိလူသားများ] ကို အဘယ်ဆိုဖွယ်ရှိအံ့နည်း။ ထိုသူတို့ကို ပိုးရွပင်နိုင်တတ်၏။” (ယောဘ ၄:၁၈၊ ၁၉) သူ့စကားအရ ယောဘသည် ဘုရားသခင်အတွက် ပိုးရွလောက်ပင်တန်ဖိုးမရှိဖြစ်သွားသည်။ အမှန်အားဖြင့် ဧလိဖတ်နှင့်သူ့အဖော်များ၏ သွန်သင်ချက်သည် ယောဘအား တည်ဆောက်မှုပေးမည့်အစား သာ၍ကောင်းသောအချိန်များပင် ပြန်သတိရခြင်းကို ကင်းမဲ့စေရန် ဖြစ်စေခဲ့သည်။ သူတို့၏အမြင်တွင် အတိတ်က ယောဘ၏သစ္စာရှိခြင်း၊ မိသားစုကိုသွန်သင်လေ့ကျင့်ခြင်း၊ ဘုရားသခင်နှင့်ဆက်ဆံခြင်း၊ ကရုဏာပြခြင်းတို့သည် ဘာမျှတန်ဖိုးမရှိတော့။

အလားတူ ယနေ့လည်း နောင်တရသောအပြစ်ပြုသူသည် အထူးသဖြင့် ထိုကဲ့သို့သောခံစားချက်များအားဖြင့် စိတ်ထိခိုက်လွယ်ပြီး “ဝမ်းနည်းခြင်းအားကြီးလျက် မိန်းမောတွေဝေ” သည့်အန္တရာယ်ရှိသည်။ အကြီးအကဲတို့ ထိုကဲ့သို့သောသူများကို သွန်သင်ချက်ပေးသည့်အခါ သူတို့၏ဂုဏ်သိက္ခာကို အတန်အရာစောင့်ထိန်းခွင့်ပြုခြင်းအားဖြင့် သူတို့အား “အမှန်ချစ်ကြသည်” ကို ထင်ရှားစေကြလော့။ (၂ ကောရိန္သု ၂:၇၊ ၈) “သိက္ခာရှိရှိဆက်ဆံမခံရရင် သွန်သင်ချက်ကို လက်ခံဖို့ခက်တယ်” ဟု ဝီလျန်ကဝန်ခံသည်။ သူတို့သည် ဘုရားသခင့်အမြင်တွင်တန်ဖိုးရှိကြောင်း ပိုမိုခိုင်မာစွာယုံကြည်လာရန်ပြုလုပ်ပေးဖို့အရေးကြီးသည်။ ယေဟောဝါသည် လွန်ခဲ့သည့်နှစ်များကသူတို့၏သစ္စာရှိရှိအမှုဆောင်ခဲ့စဉ် ‘သူတို့၏လုပ်ဆောင်မှုကိုလည်းကောင်း၊ နာမတော်ကိုထောက်၍ [သူတို့] ပြသော မေတ္တာကိုလည်းကောင်း မေ့လျော့သည့်တိုင်အောင် အဓမ္မအမှုကိုပြုတော်မူသည်မဟုတ်’ ကြောင်း သူတို့ကိုသတိပေးပါ။—ဟေဗြဲ ၆:၁၀။

အခြားသူများ၏သိက္ခာကိုထောက်ထားရန် အခြားမည်သည့်အကြောင်းအချက်များက သင့်အားအကူအညီပေးနိုင်သေးသနည်း။ လူသားအားလုံးတို့သည် ဘုရားသခင်၏သဏ္ဍာန်တော်နှင့်အညီ ဖန်ဆင်းခံထားကြရကား ဂုဏ်သိက္ခာဆိုင်ရာပင်ကိုယ်အခွင့်အရေးကို ပိုင်ဆိုင်ထားကြကြောင်းကို အသိအမှတ်ပြုပါ။ သူတို့သည် ယေဟောဝါဘုရားသခင်နှင့်ယေရှုခရစ်တို့၏ တန်ဖိုးထားခြင်းကိုခံရကြသည်; ရွေးနှုတ်ဖိုးနှင့် ရှင်ပြန်ထမြောက်ခြင်းအစီအစဉ်နှစ်ခုက ယင်းအချက်ကိုထောက်ခံသည်။ ယေဟောဝါသည် ခရစ်ယာန်များအား “ဓမ္မအမှုခန့်အပ်ခြင်း” အားဖြင့် ဂုဏ်သိက္ခာကိုထပ်ဆောင်းပေးကာ ဆိုးညစ်သည့်လူမျိုးဆက်သည် ဘုရားသခင်နှင့်ငြိမ်းချမ်းမှုရရန် အပူတပြင်းလုပ်ဆောင်ပေးဖို့ သူတို့ကိုအသုံးပြုသည်။—၁ တိမောသေ ၁:၁၂။

အကြီးအကဲတို့၊ သင့်ခရစ်ယာန်ညီအစ်ကိုထုအများစုသည် သန့်စင်ထားသည့်ကမ္ဘာရှိလူ့လောကသစ်တွင် အမာခံအဖွဲ့ဝင်ဖြစ်လာမည့်သူများဖြစ်ကြောင်း သတိရပါ။ တန်ဖိုးရှိသော၊ အဖိုးထိုက်သောသူများအနေနှင့် သူတို့သည် ရိုသေခြင်းကိုခံထိုက်ကြသည်။ သွန်သင်ချက်ပေးသောအခါ ယေဟောဝါနှင့်ယေရှုနှစ်ဦးလုံးတို့က သူတို့ကိုမည်သို့စာနာထောက်ထားမှုပြကြောင်း ပြန်စဉ်းစားပြီး စာတန်၏စိန်ခေါ်မှုများကို ရင်ဆိုင်စဉ်တွင် သင့်ညီအစ်ကို၏ဂုဏ်သိက္ခာနှင့် ကိုယ့်ကိုကိုယ်တန်ဖိုးထားမှုတို့ကို ထိန်းသိမ်းပေးရန် သင့်အပိုင်းမှလုပ်စရာရှိသည်ကို ဆက်၍လုပ်ပါ။—၂ ပေတရု ၃:၁၃; ၁ ပေတရု ၃:၇ နှိုင်းယှဉ်။

[စာမျက်နှာ ၂၉ ပါ လေးထောင့်ကွက်]

သိက္ခာရှိသောသွန်သင်မှု

(၁) စစ်မှန်၍ရိုးသားသည့်ချီးမွမ်းခြင်းကို ပြုပါ။ (ဗျာဒိတ် ၂:၂၊ ၃)

(၂) ကောင်းစွာနားထောင်သူဖြစ်ပါ။ ပြဿနာနှင့် သွန်သင်ချက်ပေးရသည့်အကြောင်းတို့ကို ရှင်းလင်းစွာနှင့်ကြင်နာစွာ ထုတ်ဖော်ပြောပြပါ။ (၂ ဓမ္မရာဇဝင် ၁၂:၁-၁၄; သု. ၁၈:၁၃; ဗျာဒိတ် ၂:၄)

(၃) သင့်သွန်သင်ချက်ကို ကျမ်းစာပေါ်အခြေပြုပါ။ အပြုသဘောနှင့် ကျိုးကြောင်းညီညွတ်မှုရှိပါ၊ အားပေးမှုဖြစ်စေပြီး ကိုယ်ချင်းစာနာမှုကိုတင်ပြပါ။ ခံယူသူ၏ဂုဏ်သိက္ခာနှင့် ကိုယ့်ကိုကိုယ်တန်ဖိုးထားသည့်သဘောတို့ကို ဆက်လက်စောင့်ထိန်းပေးပါ။ (၂ တိမောသေ ၃:၁၆; တိတု ၃:၂; ဗျာဒိတ် ၂:၅၊ ၆)

(၄) သွန်သင်ချက်ကိုလက်ခံ၍ လိုက်လျှောက်ခြင်းမှ ကောင်းချီးများခံရမည်ဖြစ်ကြောင်း သွန်သင်ခံရသူကိုစိတ်ချစေပါ။ (ဟေဗြဲ ၁၂:၇၊ ၁၁; ဗျာဒိတ် ၂:၇)

[စာမျက်နှာ ၂၆ ပါ ရုပ်ပုံ]

ခရစ်ယာန်အကြီးအကဲများသည် သွန်သင်ချက်ပေးသည့်အခါ အခြားသူများကို ဂုဏ်သိက္ခာထောက်ထားရန်လိုအပ်