ဘုရားသခင့်သိုးတော်စုကို ချစ်ခြင်းမေတ္တာဖြင့် ထိန်းကျောင်းခြင်း

“သင်တို့တွင်ရှိသော ဘုရားသခင့်သိုးတော်စုကို . . . ထိန်းကျောင်းကြလော့။”—၁ ပေတရု ၅:၂၊ သမ။

၁၊ ၂။ ယေဟောဝါ၏ အဓိကအရည်အချင်းကား အဘယ်နည်း။ ယင်းသည် မည်သို့ထင်ရှားသနည်း။

ဘုရားသခင်၏ အထင်ရှားဆုံးအရည်အချင်းမှာ ချစ်ခြင်းမေတ္တာဖြစ်တော်မူကြောင်း သမ္မာကျမ်းစာတစ်အုပ်လုံးတွင် အတိအလင်းဖော်ပြထားပါသည်။ “ဘုရားသခင်သည် ချစ်ခြင်းမေတ္တာ ဖြစ်တော်မူ၏” ဟု ၁ ယောဟန် ၄:၈ ကဆိုသည်။ ကိုယ်တော်၏မေတ္တာကို လက်တွေ့တင်ပြသောကြောင့် ဘုရားသခင်သည် “သင်တို့ကို သတိနှင့်ကြည့်ရှုတော်မူ” သည်ဟု ၁ ပေတရု ၅:၇ ကဆို၏။ သမ္မာကျမ်းစာတွင် လူမျိုးတော်အား ယေဟောဝါ သတိနှင့်ကြည့်ရှုပုံသည် သိုးထိန်းက သိုးစုကို တယုတယကြည့်ရှုပြုစုသည့်ပမာ နှိုင်းယှဉ်ထားသည်– “ကြည့်ရှုလော့။ အရှင်ထာဝရဘုရားသည် . . . မိမိသိုးစုကို . . . ကျွေးမွေးတော်မူမည်။ သိုးသငယ်တို့ကို ချီ၍ ပိုက်ပွေ့တော်မူမည်။ သားငယ်ရှိသော သိုးမတို့ကိုလည်း ဖြည်းညင်းစွာ ပို့ဆောင်တော်မူမည်။” (ဟေရှာယ ၄၀:၁၀၊ ၁၁) “ယေဟောဝါသည် ငါ၏သိုးထိန်းဖြစ်တော်မူ၏။ ငါသည် ဆင်းရဲမခံရ” ဟုဒါဝိဒ်ပြောဆိုနိုင်သည့်အတွက် မည်မျှနှစ်သိမ့်မှုရခဲ့သည်တကား!—ဆာလံ ၂၃:၁၊ ကဘ။

^၂ ဘုရားသခင့်အလိုတော်နှင့်တွေ့သူများကို သိုးနှင့်နှိုင်းယှဉ်ထားခြင်းသည် အလွန်လျောက်ပတ်ပေသည်။ အကြောင်းမူကား သိုးမည်သည် ထိန်းကျောင်းရာတွင် ငြိမ်ဝပ်အေးဆေး၍ လက်အောက်ခံပြီးနာခံသော သတ္တဝါမျိုးဖြစ်သည်။ မေတ္တာရှိတော်မူသောသိုးထိန်းအဖြစ် ယေဟောဝါသည် သိုးကဲ့သို့သော မိမိ၏လူမျိုးကို သတိနှင့်ကြည့်ရှုတော်မူသည်။ သူတို့၏ကာယနှင့်ဝိညာဏရေးရာကို ဖြည့်စွက်ပေးတော်မူပြီး ဤဆိုးသွမ်းသောကမ္ဘာ၏ ခဲယဉ်းသည့် ‘နောက်ဆုံးကာလ’ အတွင်း ဝင်ရောက်လုနီးသော ဖြောင့်မတ်ခြင်းတရားတည်ရာ ကမ္ဘာသစ်သို့ လမ်းညွှန်ပို့ဆောင်ပေးခြင်းအားဖြင့် မေတ္တာတော်ကို ထင်ရှားပြသတော်မူသည်။—၂ တိမောသေ ၃:၁-၅၊ ၁၃; မဿဲ ၆:၃၁-၃၄; ၁၀:၂၈-၃၁; ၂ ပေတရု ၃:၁၃။

၃။ သိုးတော်စုအား ယေဟောဝါ ကြည့်ရှုပြုစုပုံကို ဆာလံဆရာ မည်သို့ဖော်ပြသနည်း။

^၃ သိုးတော်စုအတွက် ယေဟောဝါ၏မေတ္တာပါဂရုစိုက်မှုကို သတိပြုပါ– “ထာဝရဘုရားသည် ဖြောင့်မတ်သောသူတို့ကို ကြည့်ရှုတော်မူ၏။ သူတို့အော်ဟစ်သံကိုလည်း နားထောင်တော်မူ၏။ . . . ဖြောင့်မတ်သောသူတို့သည် အော်ဟစ်သောအခါ ထာဝရဘုရားသည် နားထောင်၍ သူတို့ကို ခပ်သိမ်းသောဆင်းရဲထဲက ကယ်လွှတ်တော်မူ၏။ ထာဝရဘုရားသည် ကျိုးပဲ့သောစိတ်ရှိသောသူတို့နှင့် နှလုံးကြေကွဲသောသူတို့ကို နီးတော်မူ၏။ . . . ဖြောင့်မတ်သောသူသည် များစွာသောဒုက္ခဆင်းရဲကို ခံရသော်လည်း ထာဝရဘုရားသည် ခပ်သိမ်းသောဒုက္ခဆင်းရဲထဲက ကယ်လွှတ်တော်မူ၏။” (ဆာလံ ၃၄:၁၅-၁၉) စကြဝဠာသိုးထိန်းရှင်သည် သိုးကဲ့သို့သောလူမျိုးကို ကြီးစွာသောနှစ်သိမ့်မှုပေးတော်မူသည်တကား!

ကောင်းသောသိုးထိန်း၏ ပုံသက်သေ

၄။ ဘုရားသခင်၏သိုးတော်စုကို ကြည့်ရှုပြုစုရေးတွင် ယေရှု၏ကဏ္ဍကား အဘယ်နည်း။

^၄ ဘုရားသခင်၏သားတော် ယေရှုသည် ခမည်းတော်ထံ၌ ကောင်းစွာသင်ကြားခံခဲ့သောကြောင့် သမ္မာကျမ်းစာက ယေရှုအား “ကောင်းသောသိုးထိန်း” ဟုခေါ်ဆိုပါသည်။ (ယောဟန် ၁၀:၁၁-၁၆) ဘုရားသခင့်သိုးတော်စုအတွက် ကိုယ်တော်၏အဓိကလုပ်ငန်းကို ဗျာဒိတ် အခန်းကြီး ၇ ကသတိပြုစေသည်။ အခန်းငယ် ၉ တွင် ကျွန်ုပ်တို့ခေတ်ရှိ ဘုရားသခင်၏ကျေးကျွန်များအား “အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှ . . . လူများအပေါင်း” ဟုခေါ်ထားပါသည်။ ထို့နောက် အခန်းငယ် ၁၇ ကဤသို့ဆိုသည်– “သိုးသငယ် [ယေရှု] သည် သူတို့ကို လုပ်ကျွေး၍ အသက်စမ်းရေတွင်းသို့ လမ်းပြလိမ့်မည်။ ဘုရားသခင်သည်လည်း သူတို့မျက်စိ၌ မျက်ရည်ရှိသမျှတို့ကို သုတ်တော်မူမည်။” ဘုရားသခင်၏သိုးတော်စုကို ယေရှုသည် ထာဝရအသက်ရစေသော သမ္မာတရားစမ်းရေသို့ လမ်းပြညွှန်ကြားတော်မူသည်။ (ယောဟန် ၁၇:၃) ယေရှုသည် ဘုရားသခင်အားလက်အောက်ခံခြင်း၏ အဓိကပြယုဂ်ဖြစ်ရာ ကိုယ်တော်တိုင်၏ သိုးကဲ့သို့သောအရည်အချင်းများကို ရည်ညွှန်းလျက် ကိုယ်တော်အား “သိုးသငယ်” ဟုခေါ်ဆိုထားကြောင်းကို သတိပြုပါ။

၅။ လူတို့အပေါ် ယေရှု အဘယ်သဘောထားရှိသနည်း။

^၅ ကမ္ဘာပေါ်တွင် လူတို့အလယ် ယေရှုသွားလာစဉ်က သူတို့၏သနားစဖွယ်အခြေအနေကို တွေ့တော်မူသည်။ သူတို့အဖြစ်ဆိုးကို ကိုယ်တော်မည်သို့တုံ့ပြန်တော်မူသနည်း။ “လူအစုအဝေးတို့ကို မြင်တော်မူလျှင် သနားခြင်းစိတ်ရှိတော်မူ၏။ အကြောင်းမူကား ထိုသူတို့သည် ပင်ပန်းသည်ဖြစ်၍ ထိန်းသူမရှိဘဲ ပစ်ထားသောသိုးကဲ့သို့ဖြစ်ကြ၏။” (မဿဲ ၉:၃၅၊ ၃၆) သတိနှင့်မကြည့်ရှုသော သိုးထိန်းများလက်အောက်ရှိ သိုးများနည်းတူ သိုးထိန်းမရှိသော သိုးတို့သည် လုယက်ဖျက်ဆီးသူများ၏ဒဏ်ကို အကြီးအကျယ်ခံကြရသည်။ သို့သော် ယေရှုက “ဝန်လေး၍ပင်ပန်းသောသူအပေါင်းတို့၊ ငါ့ထံသို့လာကြလော့။ ငါသည် လန်းဆန်းစေမည်။ ငါ့ထမ်းပိုးကိုတင်၍ ငါ့ထံ၌နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ်သဘောရှိ၏။ သင်တို့စိုးလ်သည် လန်းဆန်းရလိမ့်မည်။ အကြောင်းမူကား၊ ငါ့ထမ်းပိုးသည် ထမ်းလွယ်၏။ ငါ့ဝန်လည်းပေါ့၏” ဟုမိန့်တော်မူသောကြောင့် ကိုယ်တော်သည် အလွန်ဂရုစိုက်တော်မူကြောင်း ထင်ရှားပါသည်။—မဿဲ ၁၁:၂၈-၃၀၊ ကဘ။

၆။ အနှိမ်ခံရသူများကို ယေရှုမည်သို့ စာနာမှုပြတော်မူသနည်း။

^၆ ယေရှုသည် လူများနှင့် မေတ္တာပါပါဆက်ဆံလိမ့်မည်ဟု သမ္မာကျမ်းစာက ဤသို့ပရောဖက်ပြုထားသည်– “နှလုံးကြေကွဲသောသူတို့၏အနာကိုပျောက်စေခြင်းငှာလည်းကောင်း၊ . . . စိတ်မသာညည်းတွားသောသူတို့အား နှစ်သိမ့်စေခြင်းငှာလည်းကောင်း ယေဟောဝါဘုရား၏ဝိညာဉ်တော်သည် . . . ငါ့ကိုဘိသိက်ပေးတော်မူပြီ။” (ဟေရှာယ ၆၁:၁၊ ၂၊ ကဘ; လုကာ ၄:၁၇-၂၁) ဆင်းရဲနွမ်းလျသူတို့ကို ယေရှုတစ်ခါမျှ အထင်သေးတော်မမူဘဲ ဟေရှာယ ၄၂:၃ ကို ပြည့်စုံစေတော်မူသည်– “နင်းနယ်လျက်ရှိသော ကျူပင်ကို မချိုး။ အတောက်သေးသောမီးစာကို မသတ်။” (မဿဲ ၁၂:၁၇-၂၁ နှိုင်းယှဉ်။) ဆင်းရဲဒုက္ခခံရသောသူတို့သည် နင်းနယ်ခံရသော ကျူပင်၊ မီးခွက်တွင် ဆီမရှိ၍ ငြိမ်းတော့မည့်မီးစာနှင့်တူပါသည်။ သူတို့၏ ကြေကွဲဖွယ်အဖြစ်ကို သိမြင်တော်မူ၍ ယေရှုသည် သူတို့ကို ကရုဏာသက်စွာ ဝိညာဏနှင့်ကာယရေးဘက် ကုသပေးကာ ခွန်အားဖြည့်တင်းပေးပြီး မျှော်လင့်ချက်ရှိစေတော်မူသည်။—မဿဲ ၄:၂၃။

၇။ ယေရှုသည် မိမိအားတုံ့ပြန်သူတို့ကို မည်သူ့ထံ ညွှန်ပြသနည်း။

^၇ သိုးကဲ့သို့သောသူများသည် အုပ်နှင့်ချီ၍ ယေရှုကိုတုံ့ပြန်ကြ၏။ ကိုယ်တော်၏သွန်သင်ခြင်းသည် နှစ်ခြိုက်ဖွယ်ဖြစ်လွန်းသဖြင့် ကိုယ်တော့်အား ဖမ်းဆီးခေါ်ဆောင်လာရန် စေလွှတ်ခံရသော မင်းလုလင်တို့က “ထိုသူဟောပြောသကဲ့သို့ အဘယ်သူမျှ မဟောစဖူးပါ” ဟုလျှောက်ကြသည်။ (ယောဟန် ၇:၄၆) ကြောင်သူတော် ဘာသာရေးခေါင်းဆောင်များပင်လျှင် မကျေမနပ်ဖြစ်ပြီး ဤသို့ဆိုသည်– “ဤလောကသည် ထိုသူနောက်သို့ လိုက်သွားပါပြီတကား!” (ယောဟန် ၁၂:၁၉) သို့သော် ယေရှုသည် သူ့အား ဂုဏ်ပြုခြင်း သို့မဟုတ် ချီးမွမ်းခြင်းကို မခံလို။ လူတို့အား ခမည်းတော်ထံသာ ညွှန်ပြတော်မူသည်။ ယေဟောဝါ၏ ချီးမွမ်းအံ့သြဖွယ် အရည်အချင်းများကို ချစ်မြတ်နိုးကြသောကြောင့် ကိုယ်တော့်အား ဝတ်ပြုကြရန် သွန်သင်ပေးတော်မူခဲ့သည်– “သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့၊ အစွမ်းသတ္တိရှိသမျှ၊ ဉာဏ်ရှိသမျှနှင့် ချစ်လော့။ ကိုယ်နှင့်စပ်ဆိုင်သောသူကို ကိုယ်နှင့်အမျှ ချစ်လော့။”—လုကာ ၁၀:၂၇၊ ၂၈။

၈။ ဘုရားသခင်၏လူမျိုးများ ကိုယ်တော့်အား ပေးသော နာခံမှုသည် ကမ္ဘာ့ခေါင်းဆောင်များအားအခြားသူများပေးသောနာခံမှုနှင့် မည်သို့ကွာခြားသနည်း။

^၈ ယေဟောဝါ၏ သိုးကဲ့သို့သောလူတို့သည် ကိုယ်တော့်အား ချစ်မြတ်နိုးကြသောကြောင့် ကိုယ်တော်၏ စကြဝဠာပိုင်သအုပ်စိုးခွင့်ကို ထောက်ခံအားပေးသည့်အတွက် ကိုယ်တော်ဂုဏ်ယူတော်မူသည်။ ကိုယ်တော်၏ မြတ်နိုးဖွယ်ကောင်းသော အရည်အချင်းများကို သူတို့သိရှိသောကြောင့် ကိုယ်တော့်အား စိတ်စေတနာအပြည့်ဖြင့် ဝတ်ပြုလိုကြသည်။ ကြောက်သောကြောင့်သာလည်းကောင်း၊ နားမထောင်ချင်ထောင်ချင်ဖြင့်လည်းကောင်း၊ အတွင်းကြိတ် ရည်ရွယ်ချက်ဖြင့်လည်းကောင်း နာခံကြသော တိုင်းသူပြည်သားများ၏ ကမ္ဘာ့ခေါင်းဆောင်များနှင့် အခြားကြီးခြားလှပါသည်တကား! ရိုမန်ကက်သလစ်ချာ့ချ်၏ ပုပ်ရဟန်းမင်းတစ်ဦးနှင့်စပ်လျဉ်း၍ ပြောဆိုခဲ့သော ဤစကားကို ယေဟောဝါ သို့မဟုတ် ယေရှုနှင့်ပတ်သက်၍ ဘယ်သောအခါမျှ ပြောဆိုနိုင်မည်မဟုတ်ပေ– “သူ့ကို လူအများချီးမွမ်းကြသည်၊ အားလုံးကြောက်ရွံ့ကြသည်၊ တစ်ဦးတစ်ယောက်မျှ မချစ်နိုင်ကြ။”—ပီတာ ဒီရိုစာရေးသော ခရစ်တော်၏ ဘုန်းတော်ကြီးများ—ပုပ်ရဟန်းမင်းအုပ်ချုပ်မှု၏ မနှစ်မြို့ဖွယ်ရာ။

ဣသရေလနိုင်ငံ၏ ရက်စက်သောသိုးထိန်းများ

၉၊ ၁၀။ ရှေးဣသရေလနိုင်ငံနှင့် ပထမရာစုခေတ်မှ ခေါင်းဆောင်များအကြောင်း ဖော်ပြပါ။

^၉ ယေရှု၏ခေတ်က ဣသရေလနိုင်ငံရှိ ဘာသာရေးခေါင်းဆောင်များသည် ကိုယ်တော်နှင့်မတူ သိုးစုအပေါ် မေတ္တာမရှိကြပါ။ သူတို့သည် ဣသရေလနိုင်ငံရှိရှေးအုပ်ချုပ်သူများနှင့်စပ်လျဉ်း၍ ယေဟောဝါ မိန့်တော်မူခဲ့သည့်အတိုင်းပင် ဖြစ်ကြသည်– “ကိုယ်ကိုသာ ကျွေးမွေးသော ဣသရေလအမျိုး သိုးထိန်းတို့သည် အမင်္ဂလာရှိကြ၏။ သိုးထိန်းသည် သိုးတို့ကို မကျွေးမွေးရသလော။ . . . အားနည်းသောသိုးကို မ မစကြ၊ နာသောသိုးကို ဆေးမကုကြ၊ အရိုးကျိုးသောသိုးကို အဝတ်နှင့်မစည်းကြ၊ သူတစ်ပါးနှင်သော သိုးကိုလိုက်၍ မဆောင်ခဲ့ကြ၊ ပျောက်သောသိုးကို မရှာကြ၊ အနိုင်အထက်ပြု၍ ကြမ်းတမ်းစွာ စီရင်ကြပြီ။”—ယေဇကျေလ ၃၄:၂-၄။

^၁၀ ထိုနိုင်ငံရေးသိုးထိန်းများနည်းတူ ပထမရာစုမှ ဂျူးဘာသာရေးခေါင်းဆောင်များသည် နှလုံးခိုင်မာကြသည်။ (လုကာ ၁၁:၄၇-၅၂) ယင်းကိုဥပမာတင်ပြရန် ယေရှုက လုယူရိုက်နှက်ခံရပြီးနောက် သေလုမတတ်အခြေအနေတွင် ပစ်ထားခံရသော ဂျူးတစ်ယောက်အကြောင်း မိန့်တော်မူခဲ့သည်။ ထိုလမ်းသို့ ဣသရေလယဇ်ပုရောဟိတ်တစ်ယောက်သည် ရောက်လာ၍ ဂျူးကိုမြင်သောအခါ လွှဲရှောင်၍သွားလေ၏။ ထိုနည်းတူပင် လေဝိလူတစ်ယောက်လည်း ပြုလေသည်။ ထို့နောက် ဣသရေလလူမျိုးမဟုတ်သူ၊ အထင်အမြင်သေးခံရသော ရှမာရိလူတစ်ယောက်သည် ထိုသူရှိရာသို့ရောက်သောအခါ မြင်၍ သနားလေ၏။ အနာများကို အဝတ်နှင့်စည်းပြီး တိရစ္ဆာန်တစ်ကောင်ပေါ်တင်၍ ဇရပ်တစ်ခုသို့ ခေါ်ဆောင်သွားကာ ပြုစုပေး၏။ ဇရပ်ရှင်အား အခငွေပေးလျက် ကုန်သမျှကို ပြန်လာဆပ်ပေးမည်ဟူ၍လည်း ဆိုသည်။—လုကာ ၁၀:၃၀-၃၇။

၁၁၊ ၁၂။ (က) ယေရှုခေတ်တွင် ဘာသာရေးခေါင်းဆောင်များ၏ ဆိုးသွမ်းမှုသည် အထွတ်အထိပ်သို့ မည်သို့ရောက်ခဲ့သနည်း။ (ခ) နောက်ဆုံးတွင် ရောမလူတို့သည် ဘာသာရေးခေါင်းဆောင်များကို မည်သို့ပြုသနည်း။

^၁၁ ယေရှုခေတ်မှ ဘာသာရေးခေါင်းဆောင်များသည် ယိုယွင်းပျက်ပြားလွန်းလှသဖြင့် လာဇရုအား သေရာမှ ယေရှုထမြောက်စေတော်မူပြီးနောက် ယဇ်ပုရောဟိတ်များနှင့်ဖာရိရှဲများသည် လွှတ်အရာရှိတို့ကို စည်းဝေးစေ၍ ဤသို့ပြောဆိုခဲ့သည်– “ငါတို့သည် အဘယ်သို့ပြုလျက် နေကြသနည်း။ ထိုသူ [ယေရှု] သည် များစွာသောနိမိတ်လက္ခဏာကိုပြ၏။ သူ့ကို ဤသို့အလွတ်ထားလျှင် လူခပ်သိမ်းတို့သည် ယုံကြည်ကြလိမ့်မည်။ ရောမလူတို့သည်လည်း လာ၍ ငါတို့အရပ်ဌာနကိုလည်းကောင်း၊ ငါတို့အမျိုးကိုလည်းကောင်း သုတ်သင်ပယ်ရှင်းကြလိမ့်မည်။” (ယောဟန် ၁၁:၄၇၊ ၄၈) လူသေအတွက် ယေရှုပြုတော်မူခဲ့သောကောင်းကျိုးကို သူတို့ထည့်မတွက်ပါ။ မိမိတို့၏ရာထူးအတွက်သာ သူတို့စိုးရိမ်နေကြ၏။ ထို့ကြောင့် “ထိုနေ့မှစ၍ ကိုယ်တော်၏အသက်ကို သတ်ခြင်းငှာ တိုင်ပင်ကြံစည်ကြ၏။”—ယောဟန် ၁၁:၅၃။

^၁၂ “ယုဒလူများတို့သည် လာဇရုကိုအကြောင်းပြုသဖြင့် ထွက်သွား၍ ယေရှုကို ယုံကြည်သောကြောင့်” ယဇ်ပုရောဟိတ်အကြီးတို့သည် “လာဇရုကိုလည်း သတ်ခြင်းငှာ တိုင်ပင်စီရင်” ခြင်းက သူတို့၏မတရားမှုကို ပို၍ဆိုးရွားစေသည်။ (ယောဟန် ၁၂:၁၀၊ ၁၁) မိမိတို့၏ရာထူးများကို ကာကွယ်ရန် ကိုယ်ကျိုးရှာပြုလုပ်ကြသော်လည်း အချည်းနှီးသက်သက်ဖြစ်ခဲ့သည်။ အကြောင်းမှာ ယေရှုက “သင်တို့နေသောအိမ်သည် သင်တို့၌ လူဆိတ်ညံလျက် ကျန်ရစ်ရ၏” ဟုသူတို့အား မိန့်တော်မူသောကြောင့်ဖြစ်သည်။ (မဿဲ ၂၃:၃၈) ဤအတိုင်းပင် ထိုလူမျိုးဆက်အတွင်း ရောမလူတို့သည်လာ၍ ‘သူတို့၏အရပ်ဌာန’ ကိုလည်းကောင်း၊ အသက်ကိုလည်းကောင်း သိမ်းပိုက်လေသည်။

ခရစ်ယာန်အသင်းတော်တွင် ချစ်ခြင်းမေတ္တာရှိသော သိုးထိန်းများ

၁၃။ ယေဟောဝါ၏သိုးတော်စုကို ထိန်းကျောင်းဖို့ရန် မည်သူ့အား စေလွှတ်တော်မူမည်ဟု ကတိပြုတော်မူသနည်း။

^၁၃ သိုးတော်စုကို ပြုစုကျွေးမွေးရန် ရက်စက်ကြမ်းကြုတ်၊ ကိုယ်ကျိုးရှာ သိုးထိန်းများအစား ကောင်းသောသိုးထိန်း ယေရှုကို ယေဟောဝါ ပေါ်လာစေတော်မူမည်။ သိုးတို့ကို ပြုစုမည့် ချစ်ခြင်းမေတ္တာရှိသော လက်ထောက်သိုးထိန်းများကိုလည်း ပေါ်ထွက်လာစေမည်ဟု ကိုယ်တော်ကတိပေးတော်မူသည်– “သူတို့ကိုကျွေးမွေးသောသိုးထိန်းတို့ကို သူတို့အပေါ်မှာ ငါခန့်ထားသဖြင့် သူတို့သည် နောက်တစ်ဖန် ကြောက်ခြင်း၊ ထိတ်လန့်ခြင်း မရှိရကြ။” (ယေရမိ ၂၃:၄) ထို့ကြောင့် ပထမရာစု ခရစ်ယာန်အသင်းတော်များမှာကဲ့သို့ ယနေ့လည်း “တစ်မြို့ပြီးတစ်မြို့ အသက်ကြီးသူများကို ခန့်အပ်” နေသည်။ (တိတု ၁:၅၊ ကဘ) ကျမ်းစာ၌ပါသော အရည်အချင်းများကို ပြည့်မီသည့် ဝိညာဉ်ရေးဘက် ဤအသက်ကြီးသူများသည် “ဘုရားသခင်၏သိုးတော်စုကိုထိန်း” ကြရမည်ဖြစ်သည်။—၁ ပေတရု ၅:၂; ၁ တိမောသေ ၃:၁-၇; တိတု ၁:၇-၉။

၁၄၊ ၁၅။ (က) တပည့်တော်များသည် အဘယ်သဘောထားကို ပြုစုပျိုးထောင်ရန်ခဲယဉ်းခဲ့သနည်း။ (ခ) အကြီးအကဲများသည် နှိမ့်ချသောကျေးကျွန်များဖြစ်သင့်ကြောင်း ယေရှုမည်သို့ တင်ပြသနည်း။

^၁၄ သိုးတို့ကို ကြည့်ရှုပြုစုရာတွင် အကြီးအကဲများသည် “အခြားသောအမှုအရာထက်မက” သူတို့ကို “အားကြီးသောချစ်ခြင်းမေတ္တာ” နှင့်ချစ်ကြရမည်ဖြစ်သည်။ (၁ ပေတရု ၄:၈) သို့သော် ယေရှု၏တပည့်တော်များသည် ဂုဏ်ရှိဖို့၊ အဆင့်အတန်းရှိဖို့ကိုသာ အဓိကစဉ်းစားနေကြသောကြောင့် ယင်းကိုသင်ယူကြရ၏။ ထို့ကြောင့် တပည့်တော်နှစ်ဦး၏မိခင်က ယေရှုအား “ကိုယ်တော်၏နိုင်ငံတွင် ကျွန်မ၌ ဤသားနှစ်ယောက်တို့သည် လက်ယာတော်ဘက်၌တစ်ယောက်၊ လက်ဝဲတော်ဘက်၌တစ်ယောက် ထိုင်ရသောအခွင့်ကို ပေးတော်မူပါ” ဟုလျှောက်သောအခါ အခြားတပည့်တော်များ ဒေါသူပုန်ထခဲ့ကြသည်။ သူတို့အား ယေရှုက “သင်တို့သိသည်အတိုင်း လောကီမင်းတို့သည် အစိုးတရပြုတတ်ကြ၏။ အကဲအမှူးတို့သည် အာဏာထားတတ်ကြ၏။ . . . သင်တို့တွင် အကဲအမှူးပြုလိုသောသူကို သင်တို့အစေခံဖြစ်စေ။ သင်တို့တွင် အထွတ်အမြတ်လုပ်ချင်သောသူကိုလည်း သင်တို့ ကျွန်ဖြစ်စေ” ဟုမိန့်တော်မူသည်။—မဿဲ ၂၀:၂၀-၂၈။

^၁၅ နောင်တစ်ကြိမ်တွင် တပည့်တော်များက “အဘယ်သူသည် သာ၍ကြီးမြတ်အံ့နည်းဟု လမ်း၌အချင်းချင်းငြင်းခုံကြ” ပြီးနောက်တွင် ယေရှုက “အရင်အဦးဖြစ်လိုသောသူမည်သည်ကား နောက်ဆုံးဖြစ်ရမည်။ အလုံးစုံတို့၏အစေခံလည်း ဖြစ်ရမည်” ဟုသူတို့အား မိန့်တော်မူသည်။ (မာကု ၉:၃၄၊ ၃၅) နှိမ့်ချသောသဘောနှင့် အစေခံလိုသည့် စိတ်စေတနာသည် သူတို့၏ပင်ကိုယ်စရိုက်အဝင် ဖြစ်လာရမည်ဖြစ်သည်။ သို့တိုင် တပည့်တော်များသည် အဆိုပါစိတ်ထားကို ထုတ်မပစ်နိုင်ကြချေ။ အကြောင်းမှာ ယေရှုမသေမီည ကိုယ်တော်နောက်ဆုံးစားသုံးသည့် ညစာစားပွဲ၌ပင် အဘယ်သူသည် အကြီးမြတ်ဆုံးဖြစ်ခြင်းနှင့်ပတ်သက်၍ “အချင်းချင်းငြင်းခုံ” ခဲ့ကြသေး၏! အကြီးအကဲတစ်ဦးသည် သိုးတော်စုကို မည်သို့ပြုစုရမည်အကြောင်း သူတို့၏ခြေကိုဆေးကြောခြင်းအားဖြင့် ယေရှုကိုယ်တော်တိုင် နှိမ့်ချမှုပြခဲ့လျက်နှင့် ထိုသို့ဖြစ်ခဲ့သည်။ ကိုယ်တော်က “ငါသည် သခင်ဖြစ်လျက်၊ အရှင်ဘုရားလည်းဖြစ်လျက်နှင့် သင်တို့၏ခြေကိုဆေးလျှင် သင်တို့သည် အချင်းချင်းတို့၏ခြေကို ဆေးရကြမည်။ ငါသည် သင်တို့၌ပြုသကဲ့သို့ သင်တို့သည် ပြုစေခြင်းငှာ ပုံသက်သေကိုပြခဲ့ပြီ” ဟုမိန့်တော်မူသည်။—လုကာ ၂၂:၂၄; ယောဟန် ၁၃:၁၄၊ ၁၅။

၁၆။ ၁၈၉၉ ခုနှစ်တွင် အကြီးအကဲများ၏ အဓိကအရည်အချင်းနှင့်ပတ်သက်၍ ကင်းမျှော်စင်က မည်သို့ဆိုသနည်း။

^၁၆ အကြီးအကဲများသည် ဤပုံစံအတိုင်းဖြစ်ရမည်ဟု ယေဟောဝါသက်သေများ အစဉ်အမြဲသွန်သင်ပေးခဲ့ပြီ။ အနှစ်တစ်ရာနီးပါးကာလက ၁၈၉၉၊ ဧပြီ ၁ ကင်းမျှော်စင်တွင် ၁ ကောရိန္သု ၁၃:၁-၈ ပါပေါလု၏စကားကို သတိပြုစေပြီး ဤသို့ဆိုခဲ့သည်– “အသိပညာနှင့် အာဝဇ္ဇန်းရွှင်ခြင်းသည် အဓိကလိုအပ်ချက်များမဟုတ်ကြောင်း တမန်တော်သည် ရှင်းလင်းပြတ်သားစွာ ညွှန်ပြသည်။ ယင်းအစား နှလုံးထဲမှထွက်ပေါ်၍ အသက်တာဘဝတစ်လျှောက်လုံး လှုံ့ဆော်တိုက်တွန်းပေးသည့် ချစ်ခြင်းမေတ္တာသာ—မြင့်မြတ်သောဆက်ဆံမှု၏ သာဓကစစ် သာဓကမှန်ဖြစ်သည်။ . . . သန့်ရှင်းသောအရာများကို ဆောင်ရွက်ပြုစုရသော ချာ့ချ်အမှုထမ်းတစ်ဦးဖြစ်ခွင့်ရသူတိုင်း၌ရှိရမည့် အရေးအပါဆုံးသောအရည်အချင်းမှာ အဦးဆုံး ချစ်ခြင်းမေတ္တာဖြစ်သင့်သည်။” ချစ်ခြင်းမေတ္တာကို ရှေ့ထားပြီး နှိမ့်ချစွာအမှုမထမ်းသူများသည် “စိတ်မချရသောဆရာများဖြစ်ကြရာ အကျိုးပေးသည်ထက် ပိုဒုက္ခရောက်စေနိုင်သည်” ဟုကောက်ချက်ချထားသည်။—၁ ကောရိန္သု ၈:၁။

၁၇။ အကြီးအကဲများ၌ရှိရမည့် အရည်အချင်းများကို သမ္မာကျမ်းစာသည် မည်သို့အလေးအနက်ဖော်ပြသနည်း။

^၁၇ သို့ဖြစ်သောကြောင့် အသက်ကြီးသူများသည် သိုးတို့ကို ‘အာဏာထား၍ အစိုးတရမပြု’ ကြရပါ။ (၁ ပေတရု ၅:၃) ယင်းအစား “အချင်းချင်းကျေးဇူးပြုခြင်း၊ သနားစုံမက်ခြင်း” အမှုတွင် ဦးစီးဦးဆောင်ကြရမည်ဖြစ်သည်။ (ဧဖက် ၄:၃၂) ပေါလုက ဤသို့အလေးအနက်ဆိုသည်– “သနားစုံမက်ခြင်း၊ ကျေးဇူးပြုခြင်း၊ စိတ်နှိမ့်ချခြင်း၊ နူးညံ့သိမ်မွေ့ခြင်း၊ စိတ်ရှည်ခြင်းတို့ကို ယူတင်ဝတ်ဆောင်ကြလော့။ . . . စုံလင်ခြင်းအဖွဲ့အစည်း တည်းဟူသော ချစ်ခြင်းမေတ္တာကိုထပ်၍ ယူတင်ဝတ်ဆောင်ကြလော့။”—ကောလောသဲ ၃:၁၂-၁၄။

၁၈။ (က) သိုးတို့နှင့်ဆက်ဆံရာတွင် ပေါလုသည် အဘယ်ပုံသက်သေကောင်းကို တင်ပြခဲ့သနည်း။ (ခ) သိုးတို့၏လိုအပ်ရာများကို အကြီးအကဲများသည် အဘယ်ကြောင့် လျစ်လျူမရှုသင့်သနည်း။

^၁၈ ယင်းသို့ပြုရန် ပေါလုတတ်မြောက်ခဲ့သဖြင့် ဤသို့ဆိုနိုင်သည်– “သင်တို့ကိုချစ်သောကြောင့် နို့ထိန်းသည် မိမိသူငယ်ကို ကျွေးမွေးပြုစုသကဲ့သို့ ငါတို့သည် သင်တို့ကို နှမြောစုံမက်ခြင်းနှင့်တကွ ဘုရားသခင်၏ဧဝံဂေလိတရားကိုမျှမက ကိုယ်အသက်ကိုပင် ပေးချင်သောစေတနာစိတ် ရှိကြ၏။” (၁ သက်သာလောနိတ် ၂:၇၊ ၈) ယင်းနှင့်လျော်ညီစွာ သူက “စိတ်ငယ်သောသူတို့ကို အားပေးကြလော့။ အားနည်းသောသူတို့ကို ထောက်မကြလော့။ ခပ်သိမ်းသောသူတို့အား ရှည်သောစိတ်ရှိစေကြလော့” ဟုပြောပါသည်။ (၁ သက်သာလောနိတ် ၅:၁၄) သိုးများကြောင့် မည်သို့သောပြဿနာပင် ပေါ်လာစေကာမူ အကြီးအကဲများသည် နယပုံပြင်ကျမ်း ၂၁:၁၃ ကိုသတိရသင့်သည်– “ဆင်းရဲသောသူ၏ အော်ဟစ်သံကို မကြားလို၍ နားကိုပိတ်သောသူသည် ကိုယ်တိုင် အော်ဟစ်၍ အဘယ်သူမျှ မကြားရ။”

၁၉။ ချစ်ခြင်းမေတ္တာရှိသော အကြီးအကဲများသည် အဘယ်ကြောင့်ကောင်းချီးဖြစ်သနည်း။ ဤသို့သောမေတ္တာကို သိုးတို့သည် မည်သို့တုံ့ပြန်သနည်း။

^၁၉ သိုးတော်စုကို မေတ္တာကရုဏာဖြင့် ထိန်းကျောင်းသော အသက်ကြီးသူများသည် သိုးများအတွက် ကောင်းချီးတစ်ရပ်ဖြစ်သည်။ ဟေရှာယ ၃၂:၂ က ဤသို့ကြိုတင်ဟောသည်– “ထိုမင်းတို့သည် လေလုံ၍ မိုးသက်မုန်တိုင်း ကွယ်ရာအရပ်ကဲ့သို့လည်းကောင်း၊ သွေ့ခြောက်သောမြေ၌စီးသော ချောင်းရေကဲ့သို့လည်းကောင်း၊ နေပူသောအရပ်၌ ကျောက်လုံးကြီးအရိပ်ကဲ့သို့လည်းကောင်း ဖြစ်ကြလိမ့်မည်။” ယနေ့ ကျွန်ုပ်တို့၏အကြီးအကဲများစွာသည် ထိုတင့်တယ်လှပသည့်ပုံဖော်ချက်နှင့်အညီ လန်းဆန်းသည့်အသွင် ရှိသဖြင့် ဝမ်းမြောက်ရွှင်လန်းနိုင်ကြသည်။ အောက်ပါမူကို သူတို့ကျင့်သုံးရန်သင်ယူတတ်မြောက်လာကြပေပြီ– “ညီအစ်ကိုချစ်ခြင်းအရာမှာ တစ်ယောက်ကိုတစ်ယောက် တွယ်တာစုံမက်ကြပါ။ အချင်းချင်းချီးမြောက်ဂုဏ်ပြုခြင်း၌ ဦးဆောင်ကြပါ။” (ရောမ ၁၂:၁၀၊ ကဘ) အကြီးအကဲများသည် ဤကဲ့သို့သော ချစ်ခြင်းမေတ္တာနှင့် နှိမ့်ချသောသဘောကို တင်ပြကြလျှင် “သူတို့ပြုသောအမှုကြောင့် မေတ္တာစိတ်နှင့် အလွန်ချစ်ခင်လေးမြတ်” စိတ်ဖြင့် သိုးတို့အမှန်တုံ့ပြန်ကြမည်။—၁ သက်သာလောနိတ် ၅:၁၂၊ ၁၃။

လွတ်လပ်စွာရွေးချယ်ပိုင်ခွင့်ကို လေးစားခြင်း

၂၀။ လွတ်လပ်စွာရွေးချယ်ပိုင်ခွင့်ကို အကြီးအကဲများသည် အဘယ်ကြောင့် လေးစားသင့်သနည်း။

^၂၀ လွတ်လပ်စွာရွေးချယ်ပိုင်ခွင့်ဖြင့် ဆုံးဖြတ်ချက်ချရန် လူသားကို ယေဟောဝါ ဖန်ဆင်းထားတော်မူသည်။ အကြီးအကဲတို့သည် ဆုံးမသြဝါဒပေးရန်၊ ပဲ့ပြင်ဆုံးမရန်အခွင့်ရှိသော်လည်း သူတစ်ပါး၏အသက် သို့မဟုတ် ယုံကြည်ခြင်းကို တာဝန်ယူချုပ်ကိုင်ဖို့မဟုတ်ပါ။ ပေါလုက ဤသို့ဆိုသည်– “ငါတို့သည် သင်တို့၏ယုံကြည်ခြင်းကို အစိုးရသည်မဟုတ်။ သင်တို့၏ဝမ်းမြောက်ခြင်းအကြောင်းကို ကူမ၍သာ ပြုကြ၏။ အဘယ်ကြောင့်နည်းဟူမူကား ယုံကြည်ခြင်းအားဖြင့် သင်တို့သည် တည်နိုင်ကြ၏။” (၂ ကောရိန္သု ၁:၂၄) မှန်ပါ၏၊ “လူအသီးအသီးတို့သည် မိမိတို့ဝန်ကို ဆောင်ရွက်ရကြမည်။” (ဂလာတိ ၆:၅) ယေဟောဝါ၏ပညတ်ဥပဒေသနှင့် ကျင့်စဉ်မူများအတွင်း လွတ်လပ်စွာပြုမူခွင့်ကို များစွာပေးထားတော်မူသည်။ သို့ဖြစ်သောကြောင့် ကျမ်းစာမူများကို ချိုးဖောက်ခြင်းမဟုတ်လျှင် စည်းမျဉ်းချမှတ်ခြင်းကို အကြီးအကဲများ ရှောင်ကြဉ်ရမည်။ ကိုယ်ပိုင်အယူအဆများကို တရားသေအယူအဖြစ် တင်ပြလိုသည့်သဘော၊ သို့မဟုတ် ဤသို့သောအယူအဆများနှင့် သဘောမတူနိုင်သူရှိခဲ့လျှင် ကိုယ့်ကိုယ်ကိုစိတ်ကြီးဝင်သော မည်သည့်သဘောထားကိုမဆိုတွန်းလှန်သင့်သည်။—၂ ကောရိန္သု ၃:၁၇; ၁ ပေတရု ၂:၁၆။

၂၁။ ဖိလေမုန်အပေါ် ပေါလု၏စိတ်ထားမှ အဘယ်သင်ခန်းစာ ရနိုင်သနည်း။

^၂၁ ရောမမြို့တွင် ထောင်ကျနေစဉ် အာရှမိုင်းနားပြည်နယ်၊ ကောလောသဲမြို့ရှိ ခရစ်ယာန်ဖြစ်သူ ကျွန်ပိုင်ရှင်ဖိလေမုန်နှင့် ပေါလု မည်သို့ဆက်ဆံခဲ့သည်ကို သတိပြုပါ။ ဖိလေမုန်၏ကျွန်ဖြစ်သူ ဩနေသိမ်သည် ရောမမြို့သို့ ထွက်ပြေးလာ၍ ခရစ်ယာန်တစ်ဦးဖြစ်လာပြီးနောက် ပေါလုကို အကူအညီပေးနေပါသည်။ ဖိလေမုန်ထံ ပေါလုက ဤသို့စာရေးသည်– “ဧဝံဂေလိတရားကြောင့် ချည်နှောင်ခြင်းကို ငါခံစဉ်တွင် သူသည် သင်၏ကိုယ်စား ငါ့ကိုပြုစုစေမည်အကြောင်း သူ့ကို ငါထားချင်သော်လည်း သင်သည် ငါ၌ကျေးဇူးပြုရာတွင် အနိုင်ပြုရသကဲ့သို့မဟုတ်၊ အလိုအလျောက်ပြုစေချင်သောစိတ်ရှိသည်ဖြစ်၍ သင်၏အခွင့်မရှိလျှင် အလျှင်းမပြုလို။” (ဖိလေမုန် ၁၃၊ ၁၄) ဩနေသိမ်ကို ပေါလုပြန်အပ်ပြီး သူ့အား ခရစ်ယာန်ညီအစ်ကိုတစ်ဦးအဖြစ် ဆက်ဆံရန် ဖိလေမုန်အား တောင်းဆိုခဲ့သည်။ သိုးတော်စုကို မိမိမပိုင်ဆိုင်; ဘုရားသခင်ပိုင်တော်မူကြောင်းကို ပေါလုသိထားပါသည်။ မိမိသည် သခင်မဟုတ်၊ အစေခံကျွန်ဖြစ်သည်ကို သူသဘောပေါက်သည်။ ဖိလေမုန်ကို ပေါလုအမိန့်ပေးမညွှန်ကြားပါ; သူ၏လွတ်လပ်စွာရွေးချယ်ပိုင်ခွင့်ကို လေးစားခဲ့ပါသည်။

၂၂။ (က) အကြီးအကဲများသည် မိမိတို့၏နေရာကို မည်သို့သဘောပေါက်သင့်သနည်း။ (ခ) မည်သို့သောအဖွဲ့အစည်းမျိုးကို ယေဟောဝါပြုစုပျိုးထောင်နေတော်မူသနည်း။

^၂၂ ဘုရားသခင်၏အဖွဲ့အစည်းသည် တိုးတက်လာသည်နှင့်အမျှ အကြီးအကဲများကို တိုး၍ခန့်အပ်ရသည်။ ဤသူတို့နှင့်အတူ အတွေ့အကြုံပိုရှိသောအကြီးအကဲများတို့ သိကြရမည်ကား သူတို့နေရာသည် နှိမ့်ချစွာလုပ်ဆောင်ခြင်းတည်း။ ဤနည်းအားဖြင့် ကမ္ဘာသစ်သို့ အဖွဲ့အစည်းကို ကိုယ်တော်ပို့ဆောင်ပေးစဉ် ကိုယ်တော်အလိုရှိသည့်အတိုင်း—စည်းစနစ်ကျနပြီး တစ်ကြိမ်တည်းတွင် အကျိုးဖြစ်မြောက်ဖို့အတွက် ချစ်ခြင်းမေတ္တာနှင့် ကရုဏာသက်ခြင်းကို မစွန့်လွှတ်ဘဲ—ဆက်တိုးတက်ကြီးပွားမည်ဖြစ်သည်။ သို့ဖြစ်၍ ကိုယ်တော်၏အဖွဲ့အစည်းတွင် “ဘုရားသခင်ကိုချစ်သော . . . သူတို့၏အကျိုးကို ခပ်သိမ်းသောအရာတို့သည် တညီတညွတ်တည်း ပြုစု” နေသည့်သာဓကကိုတွေ့သော သိုးကဲ့သို့သူများအတွက် အဖွဲ့အစည်းသည် ပိုမို၍နှစ်မြို့ဖွယ်ဖြစ်လာပေလိမ့်မည်။ “မေတ္တာသည် ဖောက်ပြန်ခြင်းသဘောနှင့် အစဉ်ကင်းလွတ်”သောကြောင့် ချစ်ခြင်းမေတ္တာပေါ်အခြေခံသည့် အဖွဲ့အစည်းသည် ထိုသို့ပင်ဖြစ်သင့်သည်။—ရောမ ၈:၂၈; ၁ ကောရိန္သု ၁၃:၈။

ပူးပေါင်းကြံစည်ကြ၏

သင်မည်သို့ဖြေဆိုမည်နည်း

◻ မိမိ၏လူမျိုးကို ယေဟောဝါသည် သတိနှင့်ကြည့်ရှုတော်မူကြောင်း သမ္မာကျမ်းစာက မည်သို့ဖော်ပြသနည်း။

◻ ဘုရားသခင်၏သိုးတော်စုကို ကြည့်ရှုပြုစုရာတွင် ယေရှုသည် အဘယ်ကဏ္ဍ၌ ပါဝင်သနည်း။

◻ အကြီးအကဲများ၌ အဘယ်အဓိကအရည်အချင်း ရှိရမည်နည်း။

◻ သိုးတို့၏ လွတ်လပ်စွာရွေးချယ်ပိုင်ခွင့်ကို အကြီးအကဲများ အဘယ်ကြောင့်ထည့်စဉ်းစားရမည်နည်း။

[စာမျက်နှာ ၁၆ ပါ ရုပ်ပုံ]

“ကောင်းသောသိုးထိန်း” ယေရှုသည် ကရုဏာသက်တော်မူခဲ့သည်

[စာမျက်နှာ ၁၇ ပါ ရုပ်ပုံ]

ယိုယွင်းဖောက်ပြန်သောဘာသာရေး ခေါင်းဆောင်များသည် ယေရှုကိုသတ်ပစ်ဖို့