ယေရှုပြုတော်မူသောအံ့ဖွယ်အမှုများ—ရာဇဝင်သမိုင်းလော၊ ဒဏ္ဍာရီလော

“သန်းခေါင်ကျော်သုံးနာရီခန့်အချိန်၌ ကိုယ်တော်သည် အိုင်ရေပေါ်တွင်စက်တော် ဖြန့်လျက် တပည့်တော်တို့ထံ ကြွတော်မူ” ၏။ —မဿဲ ၁၄:၂၅၊ သမ။

ကမ္ဘာတစ်ဝန်းရှိ သန်းပေါင်းများစွာသောသူတို့အတွက် ဘုရားသခင်ကိုယုံကြည်ခြင်းသည် အရေးကြီးသကဲ့သို့ပင် ယေရှုခရစ်တော်သည် အံ့ဖွယ်အမှုများပြုလုပ်တော်မူခဲ့ကြောင်းကိုယုံကြည်ခြင်းသည် ထပ်တူနီးပါးအရေးကြီးသည်။ ခရစ်ဝင်ကျမ်းရေးသူများ—မဿဲ၊ မာကု၊ လုကာ၊ ယောဟန်—တို့ကယေရှုပြုလုပ်တော်မူခဲ့သော အံ့ဖွယ်ရာ ၃၅ ခုကိုဖော်ပြထားသည်။ သို့ရာတွင် ကိုယ်တော်သည် သဘာဝလွန်စွမ်းဆောင်ချက်များကို ထိုထက်မကပြုလုပ်တော်မူခဲ့ကြောင်း သူတို့၏ရေးသားချက်များတွင် အရိပ်အမြွက်ဖော်ပြထားသည်။—မဿဲ ၉:၃၅; လုကာ ၉:၁၁။

ဤအံ့ဖွယ်အမှုများကို ဖျော်ဖြေမှုအတွက် ကိုယ်တော်ပြုတော်မူခြင်းမဟုတ်။ ယင်းတို့က ယေရှုသည် ဘုရားသခင်၏သားတော်၊ ကြာမြင့်စွာစောင့်မျှော်ခဲ့သော မေရှိယအမှန်ဖြစ်ကြောင်း ကိုယ်တော်၏အဆိုကို ထောက်ခံသည့်အခြေအမြစ်ဖြစ်သည်။ (ယောဟန် ၁၄:၁၁) ကျွန်ခံနေရသောဣသရေလလူမျိုးထံသို့ မောရှေ စေလွှတ်ခံရချိန်တွင် နိမိတ်လက္ခဏာအဖြစ် အံ့ဖွယ်အမှုများကို လုပ်ဆောင်ပြခဲ့သည်။ (ထွက်မြောက်ရာ ၄:၁-၉) ကြိုတင်ဟောထားသည့် မောရှေထက်သာ၍ကြီးမြတ်တော်မူသောပရောဖက်၊ မေရှိယသခင်ကိုလည်း ဘုရားသခင်ထောက်ခံကြောင်းတင်ပြသည့်နိမိတ်ကိုပြသဖို့ မျှော်လင့်ခဲ့ခြင်းမှာ ဆင်ခြင်တုံတရားနှင့်ညီသည်။ (တရားဟောရာ ၁၈:၁၅) ယင်းကြောင့် သမ္မာကျမ်းစာက ယေရှုအား “ထူးဆန်းသောတန်ခိုး၊ နိမိတ်လက္ခဏာ၊ အံ့ဖွယ်သောအမှုတို့ကို သင်တို့ [ဂျူး] တွင်ပြုရသောအခွင့်နှင့် ဘုရားသခင်ပေးတော်မူသောသက်သေကိုရသောသူ” ဟုခေါ်သည်။—တမန်တော် ၂:၂၂။

လွန်လေပြီးသောကာလက ယေရှုသည် အံ့ဖွယ်အမှုပြုလုပ်သူအဖြစ် သမ္မာကျမ်းစာ၏သရုပ်ဖော်ပြချက်ကိုလူတို့သည် များသောအားဖြင့် မငြင်းမခုံဘဲလက်ခံကြသည်။ သို့သော် မကြာသေးမီဆယ်စုနှစ်များက ခရစ်ဝင်ကျမ်းများကို ဝေဖန်ပြစ်တင်သူများ ပေါ်ထွက်လာသည်။ လွိုက်ဂရေဟမ်က သူ၏ Deceptions and Myths of the Bible စာအုပ်တွင် ကျမ်းစာပါ ယေရှုရေပေါ်လမ်းလျှောက်ခြင်းအကြောင်းကိုဖော်ညွှန်းပြီး ဤအထိပြောဆိုဝံ့သည်– “ထိုအတိုင်းဖြစ်ပျက်သည်ဟုယုံဖို့ရန် အသိဉာဏ်အလွန်နည်းရမည်။ သို့တိုင် ယုံကြည်သူသန်းပေါင်းများစွာရှိနေရာ ဤလောကကြီး ဘာဖြစ်နေပြီနည်းဟုအံ့အားသင့်သေးသည်။ ဤမျှဉာဏ်တိမ်နေသဖြင့် အဘယ်သာ၍ကောင်းသောလောကကို မျှော်လင့်နိုင်မည်နည်း။”

မဖြစ်နိုင်ရာများလော

သို့ရာတွင် ဤသို့ဝေဖန်ပြောဆိုခြင်းသည် အကျိုးသင့်အကြောင်းသင့်မဟုတ်။ အံ့ဖွယ်ရာမည်သည် “နိယာမတရားနှင့်အညီ မရှင်းပြနိုင်သောအဖြစ်အပျက်တစ်ခု” ဖြစ်သည်ဟုကမ္ဘာ့စာအုပ်စွယ်စုံကျမ်းကရှင်းပြထားသည်။ ဤအနက်ဖွင့်ဆိုချက်အတိုင်း လွန်ခဲ့သောအနှစ်တစ်ရာအချိန်တွင် ရောင်စုံတီဗွီ၊ ဆဲလ်လူလာဖုန်း၊ သို့မဟုတ် လက်ပတော့ကွန်ပျူတာများကို အံ့ဖွယ်ရာများဟုယူမှတ်ကြပေမည်။ လက်ရှိသိပ္ပံပညာရပ်ဖြင့်မရှင်းပြနိုင်ရုံနှင့် တစ်စုံတစ်ရာသည်မဖြစ်နိုင်ဟု တစ်ယူသန်သဘောဖြင့်ဆိုခြင်းမှာ ယုတ္တိတန်ပါသလော။

စဉ်းစားစရာနောက်တစ်ချက်မှာ “ဓမ္မသစ်ကျမ်း” ကိုရေးသားစဉ်က အသုံးပြုခဲ့သောမူရင်းဂရိဘာသာစကားတွင် “အံ့ဖွယ်အမှု” အတွက် “တန်ခိုး” ဟုအဓိပ္ပာယ်ရှိသောစကားလုံး ဒိုင်နာမစ္စကိုအသုံးပြုခဲ့သည်။ ယင်းကို “တန်ခိုးပါသောလုပ်ရပ်များ” သို့မဟုတ် “အစွမ်းသတ္တိ” ဟူ၍လည်းပြန်ဆိုသည်။ (လုကာ ၆:၁၉; ၁ ကောရိန္သု ၁၂:၁၀; မဿဲ ၂၅:၁၄) ယေရှု၏အံ့ဖွယ်အမှုတို့သည် “ဘုရားသခင်၏မဟာတန်ခိုးတော်” ထင်ရှားခြင်းဖြစ်သည်ဟု သမ္မာကျမ်းစာကဆိုသည်။ (လုကာ ၉:၄၃) “ခွန်အားကြီး၍တန်ခိုးနှင့်ပြည့်စုံတော်မူသော” အနန္တတန်ခိုးရှင်ဘုရားသခင်အတွက် ဤအမှုများသည် မဖြစ်နိုင်ရာဖြစ်ပါမည်လော။—ဟေရှာယ ၄၀:၂၆။

ကျမ်းစစ်ကျမ်းမှန်ဖြစ်ခြင်း၏သာဓက

ခရစ်ဝင်ကျမ်းလေးစောင်ကို အသေအချာစစ်ဆေးကြည့်ရာတွင် ယင်းတို့သည် ယုံကြည်နိုင်ဖွယ်ရာများဖြစ်ကြောင်း ထပ်ဆင့်သက်သေသာဓကများတွေ့ရှိရသည်။ တစ်ချက်မှာ ဤဖော်ပြချက်များသည် နတ်သမီးပုံပြင်များ၊ ဒဏ္ဍာရီများနှင့် သိသိသာသာကွဲပြားခြင်းဖြစ်သည်။ ဥပမာ၊ ယေရှုသေလွန်ပြီးနောက်ရာစုနှစ်များအတွင်း ကိုယ်တော်နှင့်ပတ်သက်၍ ထွက်ပေါ်လာသော ဒဏ္ဍာရီစကားများကိုသုံးသပ်ကြည့်ပါ။ ကျမ်းစစ်ကျမ်းမှန်မဟုတ်သည့် “သောမတ်ခရစ်ဝင်ကျမ်း” ကဤသို့ဆိုသည်– “ဤသူငယ်ယေရှုသည် ငါးနှစ်အရွယ်ရှိသောအခါ . . . ရွာကိုဖြတ်ဝင်လာစဉ် လူငယ်တစ်ဦးသည် ပြေးလွှားရာမှကိုယ်တော်ကိုတိုက်မိသည်။ ယေရှုသည် စိတ်တိုစွာဖြင့် ‘အသင်ဆက်မသွားစေရ’ ဟုဆိုလိုက်သည်နှင့် ကလေးသည်လဲပြီးအသက်ထွက်လေသည်။” ဤအကြောင်းသည် လုပ်ကြံပြောဆိုသောပုံတိုပတ်စမျှဖြစ်ကြောင်း ရိပ်မိရန်လွယ်ကူပါသည်။ ထို့ပြင် ဤတွင်သရုပ်ဖော်ထားသော စိတ်အပြောင်းအလဲမြန်၍ ခက်ထန်သည့်သူငယ်သည် ကျမ်းစာမှယေရှုနှင့် လုံးဝမတူချေ။—လုကာ ၂:၅၁၊ ၅၂ နှိုင်းယှဉ်။

ယခု ကျမ်းစစ်ကျမ်းမှန်ဖြစ်သော ခရစ်ဝင်ကျမ်းများကို ဆင်ခြင်သုံးသပ်ကြည့်ပါ။ ပုံကြီးချဲ့ခြင်းနှင့် စိတ်ကူးယဉ်ဆန်ဆန်အကြောင်းများမှ ကင်းရှင်းပါသည်။ စိတ်ကူးပေါက်၍မဟုတ်ဘဲ အမှန်လိုအပ်၍သာ ယေရှုသည် အံ့ဖွယ်အမှုများကို ပြုလုပ်တော်မူခဲ့သည်။ (မာကု ၁၀:၄၆-၅၂) မိမိအကျိုးအတွက် တန်ခိုးအစွမ်းများကို ယေရှုတစ်ခါမျှအသုံးပြုတော်မမူ။ (မဿဲ ၄:၂-၄) ဟိတ်ဟန်ထုတ်ရန်အတွက်လည်း ကိုယ်တော်အသုံးပြုတော်မမူ။ အမှန်မှာ အံ့သြဖွယ် “နိမိတ်လက္ခဏာ” ကိုတွေ့မြင်လိုသော ဟေရုဒ်မင်းအား ယေရှုသည် “အဘယ်စကားကိုမျှပြန်တော်မမူ” ချေ။—လုကာ ၂၃:၈၊ ၉။

ယေရှု၏အံ့ဖွယ်အမှုများသည် ကြေးစားမျက်လှည့်ဆရာများ၊ မှော်ဆရာများ၊ ယုံကြည်မှုကုထုံးဖြင့် ကုသပေးသူများ၏ လုပ်ဆောင်မှုများနှင့်လည်း ထီးထီးကြီးကွာခြားပါသည်။ ကိုယ်တော်၏များစွာသောတန်ခိုးတို့သည် ဘုရားသခင့်ဘုန်းတော်ကို အမြဲထင်ရှားစေသည်။ (ယောဟန် ၉:၃; ၁၁:၁-၄) ကိုယ်တော်၏အံ့ဖွယ်အမှုများသည် စိတ်လှုပ်ရှားမှုပိုင်းဆိုင်ရာ ဘာသာရေးထုံးတမ်းများ၊ ရွတ်ဖတ်သရဇ္စျယ်ပြုခြင်းများ၊ အထင်ကြီးအောင်ဟန်ရေးပြပွဲများ၊ လိမ်လည်လှည့်ဖြားမှုများနှင့် စိတ်ညှို့ ခြင်းတို့လုံးဝမပါပါ။ “ရာဗိုနီ၊ မျက်စိမြင်စေပါ” ဟုဆိုသောဗာတိမဲအမည်ရှိ လူကန်းသူတောင်းစားတစ်ဦးကို ယေရှုတွေ့သောအခါ “သွားလော့၊ သင်၏ယုံကြည်ခြင်းသည် သင့်ကိုကယ်မပြီ” ဟုရိုးရိုးသာပြောသည်။ ထိုခဏခြင်းတွင် ထိုသူသည်မျက်စိမြင်လေ၏။—မာကု ၁၀:၄၆-၅၂၊ ကဘ။

တန်ခိုးပါသောလုပ်ရပ်တို့ကို ယေရှုပြုလုပ်ရာတွင် ဇာတ်ပို့၊ ဇာတ်ရန်များ၊ အထူးဇာတ်ကွက်စီစဉ်ထားခြင်းများ၊ မျက်စိလှည့်စားရန် ရောင်စုံမီးများ အစရှိသည်တို့ကို အသုံးမပြုကြောင်း ခရစ်ဝင်ကျမ်းများကဖော်ပြသည်။ အံ့ဖွယ်ရာများကို လူသိရှင်ကြား မျက်မြင်သက်သေအများရှေ့တွင် ပြုလုပ်လေ့ရှိသည်။ (မာကု ၅:၂၄-၂၉; လုကာ ၇:၁၁-၁၅) ခေတ်သစ်ယုံကြည်မှုကုထုံးဖြင့် ကုသပေးသူများ၏ ကြိုးပမ်းမှုများနှင့်မတူဘဲ ယုံကြည်ခြင်းအားနည်းပုံရှိသည့်လူနာကြောင့် ရောဂါမကုသပေးနိုင်သည့်အခါများ လုံးဝမရှိပါ။ မဿဲ ၈:၁၆ ကဤသို့ဆိုသည်– “နာသောသူရှိသမျှတို့ကိုသက်သာစေတော်မူ၏။”

ပညာရှင်အာသာပီရစင်က ခရစ်တော်၏အံ့ဖွယ်အမှုများအကြောင်း သူ၏စာအုပ် “Many Infallible Proofs:” The Evidences of Christianity တွင်ဤသို့ဆိုသည်– “၎င်း၏အရေအတွက်၊ တစ်ခဏချင်းတွင် ရောဂါလုံးလုံးလျားလျားပျောက်ကင်းခြင်း၊ လူသေကိုထမြောက်စေရာတွင်ပင် မအောင်မြင်ဘဲတစ်ခါမျှမရှိခြင်းတို့က ဤအံ့ဖွယ်အမှုများသည် မျက်မှောက်ခေတ်နှင့် အခြားမည်သည့်ခေတ်တွင်မဆိုပြုသော အယောင်ဆောင်အံ့သြဖွယ်ရာများနှင့် အလွန့်အလွန်ကွာခြားလှသည်။”

လောကီအထောက်အထားများ

ခရစ်ဝင်ကျမ်းကိုထောက်ခံသည့် အခြားအကြောင်းပြချက်တစ်ခုကို ပီရစင်က ဤသို့တင်ပြသေးသည်– “ကျမ်းစာပါ အံ့ဖွယ်အမှုများကို ရန်သူတို့မငြင်းဆိုခြင်းထက် ထူးခြားသောအခြားထောက်ခံချက်မရှိပါ။” ဂျူးခေါင်းဆောင်များသည် ယေရှု၏အသရေကိုဖျက်လိုသောစိတ်ပြင်းထန်သော်လည်း၊ ကိုယ်တော်၏အံ့ဖွယ်အမှုတို့သည် အများသိဖြစ်သဖြင့် အတိုက်အခံပြုသူတို့က ၎င်းကိုမငြင်းဆိုဝံ့ကြချေ။ ထိုစွမ်းဆောင်ချက်တို့ကို နတ်ဆိုးတန်ခိုးဖြင့်ပြုလုပ်သည်ဟူ၍သာ သူတို့စွပ်စွဲနိုင်ကြသည်။ (မဿဲ ၁၂:၂၂-၂၄) ယေရှုသေလွန်ပြီးနောက် ရာစုနှစ်များစွာအကြာတွင် ဂျူးတာလ်မွဒ်ကျမ်းရေးသူများက ယေရှုသည် အံ့ဖွယ်အမှုများပြုလုပ်သူဖြစ်ကြောင်းကို ဖော်ပြဆဲရှိသည်။ Jewish Expressions on Jesus စာအုပ်အရ ကိုယ်တော်သည် “မှော်အတတ်လိုက်စားသူ” ဖြစ်သည်ဟုဆိုကာ ကိုယ်တော်ကိုပထုတ်ကြသည်။ ယေရှု၏အံ့ဖွယ်အမှုများသည် ဒဏ္ဍာရီပုံပြင်မျှသာဖြစ်ပါက ထိုသို့ပြောဆိုစရာအကြောင်းရှိပါမည်လော။

စတုတ္ထရာစုခေတ်က ချာ့ချ်သမိုင်းဆရာယူစီဘိယပ်စ်ထံမှ ထပ်ဆင့်သာဓကများကိုရရှိသည်။ သူ၏စာအုပ် The History of the Church From Christ to Constantine တွင်ဧကရာဇ်မင်းထံ ခရစ်ယာန်ဘာသာတရားဘက်မှ ခုခံကာကွယ်ရန် စာတစ်စောင်ရေးပို့ခဲ့သူ ကွာဒရတပ်စ်ကို အကိုးအကားပြုထားသည်။ ကွာဒရတပ်စ်က ဤသို့ရေးသည်– “ကျွန်ုပ်တို့ကယ်တင်ရှင်၏လုပ်ဆောင်မှုများသည် စစ်မှန်သောကြောင့် အမြဲတွေ့ရှိနိုင်သည်။ ရောဂါကုသခံရသူများ၊ ရှင်ပြန်ထမြောက်လာသူများကို ရောဂါကုသချိန်၊ ထမြောက်လာချိန်၌သာ တွေ့မြင်ရသည်မဟုတ်ဘဲ ကျွန်ုပ်တို့နှင့်အတူ ကယ်တင်ရှင်ရှိစဉ်အချိန်တွင်သာမက ကိုယ်တော်ခွဲခွာပြီးနောက်၌ပင် သူတို့အား ကြာမြင့်စွာတွေ့ရှိရကြ၏; အမှန်မှာအချို့တို့သည် အကျွန်ုပ်အချိန်အထိ ရှိနေသေးသည်။” ပညာရှင်ဝီလျံဘားကလေးက ဤသို့ဆိုသည်– “အံ့ဖွယ်အမှုများကို ကိုယ်တိုင်ကိုယ်ကျခံစားခဲ့ရသူများအား သက်သေအဖြစ်ထုတ်ပြနိုင်ကြောင်း ကွာဒရတပ်စ်ပြောဆိုနေခြင်းဖြစ်သည်။ ထိုစကားများ မမှန်ကန်လျှင် ရောမအစိုးရသည် ယင်းကို မုသားစကားအဖြစ် သတ်မှတ်ရန် အလွန်လွယ်ကူပါသည်။”

ယေရှု၏အံ့ဖွယ်အမှုများကိုယုံခြင်းသည် အကျိုးသင့်အကြောင်းသင့်ဖြစ်၍ ဆင်ခြင်တုံတရားနှင့်ညီရုံမက သက်သေအထောက်အထားများနှင့်လည်း လုံးလုံးညီညွတ်ပါသည်။ သို့ရှိစေကာမူ ယေရှု၏အံ့ဖွယ်အမှုတို့သည် လွန်လေပြီးသောခေတ်ကသမိုင်းမဟုတ်ပါ။ ဟေဗြဲ ၁၃:၈ ကဤသို့သတိပေးသည်– “ယေရှုခရစ်သည် မနေ့၊ ယနေ့၊ နောင်ကာလအစဉ်အမြဲ မပြောင်းမလဲနေတော်မူ၏။” မှန်ပါသည်။ ယနေ့ ကိုယ်တော်သည် ကောင်းကင်တွင်နေထိုင်တော်မူပြီး ကမ္ဘာပေါ် လူသားအဖြစ်ရှိစဉ်က ပြုတော်မူခဲ့သောအမှုများထက် ပိုမိုကြီးကျယ်ခမ်းနားစွာ အံ့ဖွယ်တန်ခိုးများကို ဆောင်ရွက်နိုင်တော်မူသည်။ ထို့ပြင် ခရစ်ဝင်ကျမ်းများပါ ကိုယ်တော်၏အံ့ဖွယ်အမှုများက (၁) ယနေ့ ခရစ်ယာန်များအသုံးချနိုင်သည့်သင်ခန်းစာများကို သွန်သင်ပေးသည်၊ (၂) ယေရှုအကြောင်း စိတ်စွဲမှတ်စရာများကိုဖော်ပြသည်၊ (၃) သာ၍ပင်အံ့သြမိန်းမောဖွယ်ကောင်းသော အဖြစ်အပျက်များဖြစ်မည့် အလွန်နီးကပ်နေသောအနာဂတ်ကာလကို အာရုံပြုစေသည်။

ဤအချက်များကိုဖော်ပြရန် လူသိများသောကျမ်းစာမှတ်တမ်းသုံးခုကို နောက်ဆောင်းပါးတွင် အဓိကထား ဆွေးနွေးပါမည်။