“ဘုရားသခင်၏ဣသရေလအမျိုး” နှင့် “လူအုပ်ကြီး”

“ထိုနောက်မှ ငါကြည့်လျှင် . . . အဘယ်သူမျှ မရေတွက်နိုင်သော လူများအပေါင်းတို့ . . . ကိုမြင်ရ၏။”​—ဗျာဒိတ် ၇:၉၊ သမ္မာ။

၁-၃။ (က) ဘိသိက်ခံခရစ်ယာန်များသည် ကောင်းကင်ဆိုင်ရာ အဘယ်အံ့ဖွယ်ရာအခွင့်အရေးများရှိသနည်း။ (ခ) ပထမရာစုအသင်းတော်ကို ပျက်စီးသွားစေရန် စာတန်မည်သို့ကြိုးစားခဲ့သနည်း။ (ဂ) ဘိသိက်ခံခရစ်ယာန်အသင်းတော်ကို ဖောက်ပြန်ယိုယွင်းသွားစေရန် စာတန်ကြိုးစားခဲ့သော်လည်း မအောင်မြင်ကြောင်းတင်ပြသည့် ၁၉၁၉ ခုနှစ်တွင် အဘယ်အရာဖြစ်ပျက်ခဲ့သနည်း။

စီ.အီး. ၃၃. ခု၌ “ဘုရားသခင်၏ဣသရေလအမျိုး” တည်ထောင်ခဲ့ခြင်းသည် ယေဟောဝါ၏ရည်ရွယ်ချက် ပြီးပြည့်စုံရေးတွင် အဓိကကျသောဆောင်ရွက်ချက်တစ်ခုဖြစ်သည်။ (ဂလာတိ ၆:၁၆) ယင်း၏ ဘိသိက်ခံအဖွဲ့ဝင်များသည် ခရစ်တော်နှင့်အတူ ဘုရားသခင်၏ ကောင်းကင်နိုင်ငံတော်တွင် မသေနိုင်သော နာမ်ဝိညာဉ်သားများအဖြစ် အစိုးရခွင့်ကို မျှော်လင့်နိုင်ကြသည်။ (၁ ကောရိန္သု ၁၅:​၅၀၊ ၅၃၊ ၅၄) ထိုအခွင့်အရာတွင် သူတို့သည် ယေဟောဝါ၏နာမတော်ကို သန့်ရှင်းမြင့်မြတ်စေရေးနှင့် မဟာရန်သူကြီး စာတန်မာရ်နတ်၏ခေါင်းကို ကြိတ်ရေးတို့တွင် ဦးစီးဦးဆောင်ပြုမည့် ကဏ္ဍပိုင်း၌ရှိကြမည်ဖြစ်သည်။ (ကမ္ဘာဦး ၃:၁၅; ရောမ ၁၆:၂၀) ထိုကြောင့် စာတန်သည် ဤအသင်းတော်အသစ်ကို နှိပ်စက်ကလူပြုခြင်း၊ ဖောက်ပြန်ယိုယွင်းသွားစေခြင်းဖြင့် ၎င်းကို ပျက်စီးသွားဖို့ရန် အတတ်နိုင်ဆုံးကြိုးစားအားထုတ်ခဲ့ခြင်းသည် အံ့အားသင့်စရာမဟုတ်ပါတကား!​—၂ တိမောသေ ၂:၁၈; ယုဒ ၄; ဗျာဒိတ် ၂:၁၀။

^၂ တမန်တော်များ အသက်ရှင်စဉ်က စာတန် မအောင်မြင်ခဲ့ပါ။ သို့ရာတွင် သူတို့သေပြီးနောက် အတားအဆီးမရှိ အယူဖောက်ပြန်မှု တိုးပွားများပြားလာသည်။ နောက်ဆုံးတွင် ယနေ့ ခရစ်ယာန်ဘောင်ဟုအမည်တွင်သော အယူဖောက်ပြန်သည့် ဘာသာတရားအတုအယောင်ကို စာတန်ဖော်ထုတ်လာသောအခါ လူ့အမြင်အရ ယေရှုတည်ထောင်ခဲ့သော ခရစ်ယာန်အသင်းတော်စစ်သည် ဖောက်ပြန်ယိုယွင်းနေပုံရှိလေသည်။ (၂ သက်သာလောနိတ် ၂:​၃-၈) မည်သို့ဆိုစေကာမူ ခရစ်ယာန်ဘာသာတရားစစ်သည် ဆက်လက်တည်ရှိနေဆဲဖြစ်သည်။​—မဿဲ ၂၈:၂၀။

^၃ ခရစ်ယာန်စစ်များသည် “တောမျိုးစေ့”၊ သို့မဟုတ် အတုအယောင်ခရစ်ယာန်များနှင့်အတူ ကြီးထွားပေါက်ပွားလိမ့်မည်ဟု ယေရှု၏ ကောင်းသောမျိုးစေ့နှင့် တောမျိုးစေ့ပုံဥပမာတွင် ကိုယ်တော်ကြိုတင်ဟောပြောထားသည်; ယင်းအတိုင်းပင် ဖြစ်ပျက်ခဲ့သည်။ သို့သော် နောက်ဆုံးကာလတွင် “နိုင်ငံတော်သား” တို့သည် “တောမျိုးစေ့” နှင့်မတူကြောင်း ထင်ရှားလာမည်ဟူ၍လည်း မိန့်တော်မူပါသည်။ (မဿဲ ၁၃:​၃၆-၄၃) ယင်းသည်လည်း ဟုတ်မှန်ကြောင်း ထင်ရှားခဲ့၏။ ၁၉၁၉ ခုနှစ်တွင် စစ်မှန်သော ဘိသိက်ခံခရစ်ယာန်များသည် ဗာဗုလုန်ချုပ်နှောင်မှုအောက်မှ လွတ်မြောက်လာသည်။ သူတို့အား “သစ္စာနှင့်သတိပညာရှိသောကျွန်” အဖြစ် ဘုရားသခင်အသိအမှတ်ပြုတော်မူသည်။ ထိုနောက် ဘုရားသခင်၏နိုင်ငံတော်သတင်းကောင်းကို ရဲရင့်စွာ ဟောပြောကြလေသည်။ (မဿဲ ၂၄:​၁၄၊ ၄၅-၄၇; ဗျာဒိတ် ၁၈:၄) သူတို့အများစုသည် တစ်ပါးအမျိုးသားများဖြစ်ကြသည်; သို့သော် သူတို့၌ အာဗြဟံ၏ယုံကြည်ခြင်းရှိသောကြောင့် သူတို့သည် အမှန်ပင် “အာဗြဟံ၏အမျိုး” ဖြစ်ကြပါသည်။ “ဘုရားသခင်၏ဣသရေလအမျိုး” အဝင်လည်း ဖြစ်ကြ၏။​—ဂလာတိ ၃:​၇၊ ၂၆-၂၉။

“လူအုပ်ကြီး”

၄။ အထူးသဖြင့် ၁၉၃၀ ပြည့်လွန်နှစ်များတွင် အဘယ်ခရစ်ယာန်အုပ်စုတစ်ခုကို သိသိသာသာ တွေ့ရှိလာသနည်း။

^၄ အစကနဦးတွင် ဤဘိသိက်ခံခရစ်ယာန်များ၏ ဟောပြောခြင်းကို လက်ခံနာယူသူများသည် ကောင်းကင်မျှော်လင့်ခြင်းရှိသော ဝိညာဏဣသရေလသား၊ ၁၄၄,၀၀၀ မှကြွင်းကျန်သူများဖြစ်လာကြသည်။ (ဗျာဒိတ် ၁၂:၁၇) သို့ရာတွင် အထူးသဖြင့် ၁၉၃၀ ပြည့်လွန်နှစ်များအတွင်း အခြားအုပ်စုတစ်စုကို သိသိသာသာ တွေ့ရှိလာရသည်။ ဤသူတို့သည် သိုးခြံများပုံဥပမာပါ “အခြားသိုး” ဖြစ်ကြောင်း သိရှိလာရသည်။ (ယောဟန် ၁၀:၁၆) ဤသူတို့သည် ပရဒိသုကမ္ဘာပေါ် ထာဝစဉ်အသက်ရှင်ရန်မျှော်လင့်သော ခရစ်တော်၏တပည့်များဖြစ်ကြသည်။ သူတို့သည် ပုံဆောင်သဘောအရ ဘိသိက်ခံခရစ်ယာန်များ၏ ဝိညာဏအမျိုးအနွယ်ဖြစ်သည်။ (ဟေရှာယ ၅၉:၂၁; ၆၆:၂၂; ၁ ကောရိန္သု ၄:​၁၅၊ ၁၆ နှိုင်းယှဉ်။) ဤသူတို့က ဘိသိက်ခံခရစ်ယာန်အသင်းတော်ကို သစ္စာနှင့်သတိပညာရှိသောကျွန်အဖြစ် အသိအမှတ်ပြုကြကာ သူတို့၏ဘိသိက်ခံညီအစ်ကိုများနည်းတူ ယေဟောဝါကိုအလွန်ချစ်မြတ်နိုးကြသည်၊ ယေရှု၏ပူဇော်သကာကိုယုံကြည်သည်၊ ဘုရားသခင်ကိုချီးမွမ်းထောမနာပြုရန် ဇွဲရှိသည့်အပြင် ဖြောင့်မတ်ခြင်းတရားအတွက် ဆင်းရဲခံဖို့ အသင့်ရှိကြသည်။

၅။ အခြားသိုးများ၏အခွင့်အရာကို တဖြည်းဖြည်းတိုး၍တိုး၍ မည်သို့နားလည်လာသနည်း။

^၅ အစကနဦးတွင် ဤအခြားသိုးများ၏အခွင့်အရာကို ကောင်းစွာနားမလည်ကြသော်လည်း အတန်ကြာလေသော် ရှင်းလင်းထင်ရှားလာသည်။ ၁၉၃၂ ခုနှစ်တွင် အခြားသိုးပါ ဟောပြောခြင်းလုပ်ငန်း၌ ပါဝင်ကြရန် တိုက်တွန်းပေးဖို့ ဘိသိက်ခံခရစ်ယာန်များ နှိုးဆော်ခံရ၏​—ယင်းလုပ်ငန်းကို အခြားသိုးအမြောက်အမြား ပြုလုပ်နေနှင့်ပြီဖြစ်သည်။ ၁၉၃၄ ခုနှစ်တွင် အခြားသိုးသည် ရေ၌နှစ်ခြင်းယူရန် အားပေးတိုက်တွန်းခံခဲ့ရသည်။ ၁၉၃၅ ခုနှစ်တွင် သူတို့သည် ဗျာဒိတ်အခန်းကြီး ၇ ပါ “လူအုပ်ကြီး” ဖြစ်ကြောင်း သိမြင်နားလည်လာသည်။ ၁၉၃၈ ခုနှစ်တွင် ယေရှုသေခြင်း၏ အောက်မေ့ရာပွဲတော်ကို ကြည့်ရှုသူများအဖြစ် သူတို့ပါတက်ရောက်ကြရန် ဖိတ်ခေါ်ခံခဲ့ရသည်။ ၁၉၅၀ ခုနှစ်တွင် သူတို့အဝင်ဖြစ်သော ရင့်ကျက်သူ ယောက်ျားများသည် “လေလုံ၍ မိုးသက်မုန်တိုင်းကွယ်ရာအရပ်” အဖြစ်အမှုထမ်းသူများဖြစ်သော “မင်းသားမှူးမတ်များ” ဖြစ်ကြောင်း သိမြင်လာသည်။ (ဆာလံ ၄၅:၁၆; ဟေရှာယ ၃၂:၁၊ ၂) ၁၉၅၃ ခုနှစ်တွင် ဘုရားသခင်၏ မြေကြီးဆိုင်ရာအဖွဲ့အစည်း​—ထိုအချိန်တိုင်သော် အများစုမှာ အခြားသိုးများ​—ဖြင့်ဖွဲ့စည်းထားရာ သူတို့သည် ကမ္ဘာအသစ်တွင်ရှိမည့် မြေကြီးအဖွဲ့အစည်း၏ မဏ္ဍိုင်ဖြစ်ကြောင်း တွေ့ရှိလာသည်။ ၁၉၈၅ ခုနှစ်တွင်မူကား ယေရှု၏ရွေးနုတ်ဖိုးပူဇော်သကာကြောင့် အခြားသိုးသည် အာမဂေဒုန်ကိုကပ်ကျော်ခြင်းငှာ ဘုရားသခင်၏မိတ်ဆွေအဖြစ် ဖြောင့်မတ်ရာသို့ရောက်ကြောင်း နားလည်လာပါသည်။

၆။ ယနေ့ ဘိသိက်ခံများနှင့် အခြားသိုး၏ အခွင့်အရာသည် မည်သို့ဆက်စပ်နေရာ အဘယ်မေးခွန်းများ ပေါ်ပေါက်လာစေသနည်း။

^၆ ယခုအချိန်၊ “နောက်ဆုံးကာလ” ၏အဆုံးပိုင်းတိုင်လေသော် ၁၄၄,၀၀၀ မှအများစုသည် သေဆုံးနှင့်ပြီဖြစ်၍ သူတို့၏ကောင်းကင်ဆုလာဘ်ကို ခံရကြပြီဖြစ်သည်။ (၂ တိမောသေ ၃:၁; ဗျာဒိတ် ၆:​၉-၁၁; ၁၄:၁၃) ယခု မြေကြီးဆိုင်ရာမျှော်လင့်ချက်ရှိသူ ခရစ်ယာန်များသည် သတင်းကောင်းဟောပြောခြင်းလုပ်ငန်းတွင် အများဆုံးပါဝင်နေသည်။ ဤလုပ်ငန်း၌ ယေရှု၏ဘိသိက်ခံညီတော်များကို ထောက်ခံအားပေးခွင့်ရခြင်းသည် အခွင့်ထူးဖြစ်သည်ဟူ၍ သူတို့ယူမှတ်ကြသည်။ (မဿဲ ၂၅:၄၀) သို့ရာတွင် ဤဘိသိက်ခံများသည် သစ္စာနှင့်သတိပညာရှိသောကျွန်ဖြစ်၍ ဤနောက်ဆုံးကာလတစ်လျှောက် သူတို့သည် ဝိညာဉ်အစာကို တည်ခင်းကျွေးမွေးပေးနေပါသည်။ ဤဘိသိက်ခံအားလုံးသည် သူတို့၏ကောင်းကင်ဆုကျေးဇူးကို ခံယူပြီးကြသောအခါ အခြားသိုး၏အခြေအနေကား မည်သို့ရှိမည်နည်း။ ထိုအခါ အခြားသိုးအတွက် အဘယ်ပြင်ဆင်ချက်များရှိမည်နည်း။ ထိုမေးခွန်းများအတွက် အဖြေရရှိရန် ရှေးဣသရေလလူမျိုးကို အကျဉ်းချုံးကြည့်ခြင်းသည် အထောက်အကူဖြစ်လိမ့်မည်။

“ယဇ်ပုရောဟိတ်နိုင်ငံ” စစ်စစ်

၇၊ ၈။ ပညတ်တရားပဋိညာဉ်အောက်တွင် ရှေးဣသရေလလူမျိုးသည် အဘယ်အတိုင်းအတာအထိ ယဇ်ပုရောဟိတ်နိုင်ငံ၊ သန့်ရှင်းသောလူမျိုးဖြစ်သနည်း။

^၇ ယေဟောဝါသည် ဣသရေလလူမျိုးကို ကိုယ်တော်၏အထူးလူမျိုးအဖြစ် ရွေးချယ်တော်မူစဉ်က သူတို့နှင့် ပဋိညာဉ်ဖွဲ့တော်မူပြီး ဤသို့မိန့်တော်မူခဲ့သည်– “ယခုတွင် သင်တို့သည် ငါ့စကားကို အမှန်နားထောင်၍ ငါ့ပဋိညာဉ်ကိုစောင့်ရှောက်လျှင် လူမျိုးတကာထက် သင်တို့သည် အထူးငါပိုင်ဆိုင်ရာလူမျိုးဖြစ်ရကြလိမ့်မည်။ မြေကြီးလုံးသည် ငါ့အပိုင်ဖြစ်၏။ သင်တို့သည်လည်း ငါ့အဖို့ယဇ်ပုရောဟိတ်နိုင်ငံ၊ သီးသန့်သောလူမျိုးဖြစ်ရကြလိမ့်မည်။” (ထွက်မြောက်ရာ ၁၉:​၅၊ ၆၊ သမ္မာ) ဣသရေလလူမျိုးသည် ပညတ်တရားပဋိညာဉ်ကြောင့် ယေဟောဝါ၏ အထူးပိုင်ရာလူမျိုးဖြစ်သည်။ သို့သော် ယဇ်ပုရောဟိတ်နိုင်ငံ၊ သန့်ရှင်းသောလူမျိုးဆိုင်ရာ ကတိတော်သည် မည်သို့ပြည့်စုံလိမ့်မည်နည်း။

^၈ ဣသရေလလူမျိုးသည် သစ္စာရှိစဉ်က ယေဟောဝါ၏ပိုင်သအုပ်စိုးခွင့်ကို အသိအမှတ်ပြုပြီး ကိုယ်တော်ကို သူတို့၏ရှင်ဘုရင်အဖြစ် လက်ခံထားကြသည်။ (ဟေရှာယ ၃၃:၂၂) သို့ဖြင့် သူတို့သည် နိုင်ငံတစ်နိုင်ငံဖြစ်ခဲ့သည်။ သို့သော် နောက်ပိုင်းထင်ရှားလာသည့်အတိုင်း “နိုင်ငံတော်” ဆိုင်ရာကတိတော်သည် ထိုထက်မက အဓိပ္ပာယ်ရှိရမည်ဖြစ်သည်။ ထို့ပြင် သူတို့သည် ယေဟောဝါ၏ပညတ်တရားကို လိုက်နာကျင့်သုံးကြသည့်အခါ သန့်ရှင်းကြပြီး သူတို့ဝန်းကျင်ရှိလူမျိုးတို့နှင့်မတူ သီးသန့်ဖြစ်ကြောင်း ထင်ရှားသည်။ သူတို့သည် သန့်ရှင်းသောလူမျိုးဖြစ်သည်။ (တရားဟောရာ ၇:​၅၊ ၆) သူတို့သည် ယဇ်ပုရောဟိတ်နိုင်ငံဖြစ်ပါသလော။ အမှန်မှာ ဣသရေလနိုင်ငံတွင် ဗိမာန်တော်လုပ်ငန်းအတွက် လေဝိအမျိုးကို သီးသန့်ထားခဲ့သည်။ ထိုအမျိုးအနွယ်တွင်တစ်ဖန် လေဝိအနွယ်ဆက်ခံသူ ယဇ်ပုရောဟိတ်အမျိုးရှိပြန်သည်။ မောရှေပညတ္တိကျမ်းစာကို စစီရင်ထုံးဖွဲ့သောအခါ လေဝိသားယောက်ျားများကို လေဝိအမျိုးမဟုတ်သောမိသားစုတိုင်းမှ သားဦးများအတွက် အလဲအလှယ်အဖြစ် သိမ်းပိုက်ခဲ့သည်။a(ထွက်မြောက်ရာ ၂၂:၂၉; တောလည်ရာ ၃:​၁၁-၁၆၊ ၄၀-၅၁) သို့ဖြင့် ဗိမာန်တော်လုပ်ငန်းတွင် ဣသရေလနိုင်ငံရှိ မိသားစုတိုင်းသည် ကိုယ်စားပြုခံရဘိသကဲ့သို့ဖြစ်ပါသည်။ ယင်းကား လူမျိုးတစ်မျိုးအနေနှင့် ယဇ်ပုရောဟိတ်အမျိုးဖြစ်ခြင်းတွင် အနီးကပ်ဆုံးနည်းပင်ဖြစ်သည်။ သို့ဖြစ်စေကာမူ သူတို့သည် လူမျိုးအပေါင်းတို့ရှေ့တွင် ယေဟောဝါကို ကိုယ်စားပြုကြပါသည်။ စစ်မှန်သောဘုရားသခင်ကို ကိုးကွယ်လိုသူ မည်သည့်တစ်ပါးအမျိုးသားမဆိုသည် ဣသရေလလူမျိုးနှင့်အတူ ပူးပေါင်းကိုးကွယ်ရမည်ဖြစ်သည်။​—၂ ရာဇဝင်ချုပ် ၆:​၃၂၊ ၃၃; ဟေရှာယ ၆၀:၁၀။

၉။ မြောက်ဘက်ဣသရေလနိုင်ငံကို ‘ကိုယ်တော်၏ယဇ်ပုရောဟိတ်အဖြစ်အမှုထမ်းခြင်းမှ ယေဟောဝါ အဘယ်ကြောင့်ပယ်ခဲ့ရသနည်း။

^၉ ရှောလမုန်မင်းကြီး ကွယ်လွန်ပြီးနောက် ဘုရားသခင်၏လူမျိုးသည် ဘုရင်ယေရောဗောင်လက်အောက် မြောက်ဘက်ဣသရေလနိုင်ငံနှင့် ဘုရင်ရောဗောင်လက်အောက် တောင်ဘက်ယုဒနိုင်ငံသို့ နှစ်ခြမ်းကွဲသွားပါသည်။ စစ်မှန်သောဝတ်ပြုရေးတည်စိုက်ရာ ဗိမာန်တော်သည် ယုဒနယ်တွင်ရှိနေသည်ဖြစ်ရာ ယေရောဗောင်သည် မိမိနိုင်ငံ၏နယ်နိမိတ်အတွင်း နွားရုပ်များတည်ဆောက်ခြင်းအားဖြင့် တရားတော်နှင့်ဆန့်ကျင်သောကိုးကွယ်မှုကို စတင်လိုက်လေသည်။ ထို့ပြင် “မြင့်သောအရပ်ပေါ်မှာ အိမ်ကိုဆောက်၍ လေဝိသားမဟုတ်သော သာမညလူတို့ကို ယဇ်ပုရောဟိတ်အရာ၌ ခန့်ထားလေ၏။” (၃ ဓမ္မရာဇဝင် ၁၂:၃၁) တစ်ပါးအမျိုးသားဖြစ်သူ ဇနီးယေဇဗေလအား အာဟပ်မင်းသည် နိုင်ငံအတွင်း ဗာလဝတ်ပြုမှုကို တည်ထောင်ခွင့်ပြုပြီးနောက် မြောက်ဘက်လူမျိုးသည် မှောက်မှားသောဝတ်ပြုရေးတွင် နစ်သည်ထက်နစ်မွန်းလေသည်။ နောက်ဆုံး ထိုတော်လှန်ပုန်ကန်သောနိုင်ငံကို ယေဟောဝါတရားစီရင်တော်မူချက်ကိုထုတ်ပြန်ခဲ့သည်။ ဟောရှေမှတစ်ဆင့် ကိုယ်တော်က ဤသို့မိန့်တော်မူ၏– “ငါ့လူတို့သည် ပညာနည်းသောကြောင့် ဆုံးရှုံးကြ၏။ သင်သည် ပညာကိုပယ်သောကြောင့် ငါ့ယဇ်ပုရောဟိတ်အဖြစ်သို့ မရောက်စေခြင်းငှာ သင့်ကိုငါပယ်မည်။” (ဟောရှေ ၄:၆) ထိုနောက်မကြာမီပင် အာရှုရိလူမျိုးသည် မြောက်ဘက်ဣသရေလနိုင်ငံကို ဖျက်ဆီးချေမှုန်းပစ်ခဲ့သည်။

၁၀။ တောင်ဘက်နိုင်ငံသည် သစ္စာရှိစဉ်က လူမျိုးအပေါင်းရှေ့တွင် ယေဟောဝါကို မည်သို့ကိုယ်စားပြုသနည်း။

^၁၀ တောင်ဘက်ယုဒနိုင်ငံကော၊ မည်သို့ဖြစ်ပျက်သနည်း။ ဟေဇကိမင်းလက်ထက်တွင် ဟေရှာယမှတစ်ဆင့် သူတို့အား ယေဟောဝါ ဤသို့မိန့်တော်မူသည်– “သင်တို့သည် . . . ငါ၏သက်သေ၊ ငါရွေးကောက်သောကျွန်ဖြစ်ကြ၏။ . . . ကိုယ်အဖို့ ငါဖန်ဆင်းသောထိုလူမျိုးသည် ငါ၏ဂုဏ်ကျေးဇူးကို ပြရလိမ့်မည်။” (ဟေရှာယ ၄၃:​၁၀၊ ၂၁; ၄၄:၂၁) တောင်ဘက်နိုင်ငံသည် သစ္စာရှိစဉ်က ယေဟောဝါ၏ဂုဏ်တော်ကို လူမျိုးအပေါင်းရှေ့ ချီးမွမ်းကာ စိတ်နှလုံးမှန်ကန်သူများအား ကိုယ်တော့်ဗိမာန်တော်တွင် ကိုယ်တော့်ကို ကိုးကွယ်ဝတ်ပြုရန်နှင့် တရားဝင်ဖြစ်သော လေဝိယဇ်ပုရောဟိတ်အစီအစဉ်အားဖြင့် အကျိုးကျေးဇူးများခံစားရစေရန် ဆွဲဆောင်နိုင်ခဲ့သည်။

ဣသရေလနိုင်ငံရှိ တစ်ပါးအမျိုးသားများ

၁၁၊ ၁၂။ ဣသရေလလူမျိုးနှင့်အတူ ယေဟောဝါထံအမှုတော်ထမ်းခဲ့သော တစ်ပါးအမျိုးသားအချို့၏အမည်ကို ဖော်ပြပါ။

^၁၁ ဤလူမျိုး၏သက်သေခံချက်ကို လက်ခံနာယူသော တစ်ပါးအမျိုးသားတို့နှင့်သက်ဆိုင်သည့်အစီအစဉ်ကို မောရှေမှတစ်ဆင့်ပေးသော ပညတ္တိကျမ်းစာတွင် ထည့်သွင်းစီရင်ရေးသားထားသည်။ မောရှေ၏ဇနီး၊ ဇိပေါရပင်လျှင် မိဒျန်အမျိုးသမီးတစ်ဦးဖြစ်သည်။ ဣသရေလလူမျိုးမဟုတ်သော “အမျိုးမျိုးသောလူအများ” တို့သည် ဣသရေလလူမျိုးနှင့်အတူ အီဂျစ်နိုင်ငံမှ ထွက်ခွာခဲ့ပြီး ပညတ္တိကျမ်းစာကိုပေးခဲ့သောအချိန်တွင် သူတို့လည်းရှိပါသည်။ (ထွက်မြောက်ရာ ၂:​၁၆-၂၂; ၁၂:၃၈; တောလည်ရာ ၁၁:၄) ရာခပ်နှင့်သူမ၏အိမ်ထောင်သည် ယေရိခေါမြို့မှ ကယ်နုတ်ခံရပြီး နောက်ပိုင်းတွင် ဂျူးလူမျိုးအဝင် ဖြစ်လာလေသည်။ (ယောရှု ၆:​၂၃-၂၅) ထိုနောက်များမကြာမီပင် ဂိဗောင်မြို့သားတို့သည် ဣသရေလလူမျိုးနှင့် မိတ်သဟာယဖွဲ့ပြီးနောက် တဲတော်နှင့်ပတ်သက်သော တာဝန်များကို ဆောင်ရွက်ရန် ခန့်အပ်ခံရသည်။​—ယောရှု ၉:​၃-၂၇; ၃ ဓမ္မရာဇဝင် ၈:​၄၁-၄၃; ဧသတာ ၈:၁၇ လည်းရှု။

^၁၂ နောက်ဆုံးတွင် တစ်ပါးအမျိုးသားများသည် မြင့်မားသော အခွင့်အရာရှိတာဝန်များကိုပင် ထမ်းရွက်ရသည်။ ဒါဝိဒ်၏ “သူရဲတို့” တွင် အမ္မုန်အမျိုး၊ ဇေလက်ပါဝင်သကဲ့သို့ ဗာသရှေဘ၏ယောက်ျား၊ ဟိတ္တိလူ၊ ဥရိယလည်းပါဝင်ခဲ့သည်။ (၁ ရာဇဝင်ချုပ် ၁၁:​၂၆၊ ၃၉၊ ၄၁; ၂ ဓမ္မရာဇဝင် ၁၁:​၃၊ ၄) အဲသယောပိပြည်သား ဧဗဒမေလက်သည် နန်းတော်အရာရှိတစ်ဦးဖြစ်၍ ရှင်ဘုရင်၏အထံတော်သို့ ဝင်ခွင့်ရှိသည်။ (ယေရမိ ၃၈:​၇-၉) ဗာဗုလုန်နိုင်ငံတွင် ပြည်နှင်ခံအဖြစ်မှ ဣသရေလလူမျိုးသည် ပြန်ရောက်လာကြသောအခါ ဣသရေလလူမျိုးမဟုတ်သူ နက်သနင်တို့၏ ယဇ်ပုရောဟိတ်များကို အကူအညီပေးရသောတာဝန် တိုးများလာပါသည်။ (ဧဇရ ၇:၂၄) ဤသစ္စာရှိတစ်ပါးအမျိုးသားများ၊ သို့မဟုတ် ဧည့်သည်အာဂန္တုအတော်များများသည် ယနေ့လူအုပ်ကြီးကိုပုံဆောင်သည်ဟု ယူမှတ်ထားရာ သူတို့၏အခြေအနေသည် ကျွန်ုပ်တို့အတွက်စိတ်ဝင်စားစရာဖြစ်ပါသည်။

၁၃၊ ၁၄။ (က) ဣသရေလနိုင်ငံတွင် ဘာသာဝင်များ၏ အခွင့်အရေးနှင့်တာဝန်များကား အဘယ်နည်း။ (ခ) ဣသရေလလူမျိုးသည် သစ္စာရှိဘာသာဝင်များကို မည်သို့ယူမှတ်ကြဖို့ဖြစ်သနည်း။

^၁၃ ဤသူတို့သည် ဘာသာဝင်များဖြစ်ကြသည်။ မောရှေပညတ္တိကျမ်းစာအရ ယေဟောဝါကို ဝတ်ပြုသော ဆက်ကပ်အပ်နှံထားသူများဖြစ်သည်။ သူတို့သည် ဣသရေလလူမျိုးနည်းတူ အခြားလူမျိုးအပေါင်းတို့နှင့် မဆက်ဆံသီးသန့်နေကြသည်။ (ဝတ်ပြုရာ ၂၄:၂၂) ဣသရေလလူမျိုးကဲ့သို့ပင် ယဇ်ပူဇော်ကြသည်၊ မှောက်မှားသောဝတ်ပြုရေးနှင့် အသွေးကို ကြဉ်ရှောင်ကြသည်။ (ဝတ်ပြုရာ ၁၇:​၁၀-၁၄; ၂၀:၂) ရှောလမုန်၏ဗိမာန်တော်ဆောက်လုပ်ရေးတွင် သူတို့ပါဝင်ကူညီကြ၍ အာသမင်းနှင့် ဟေဇကိမင်းတို့လက်ထက်တွင် စစ်မှန်သောဝတ်ပြုရေးကို ပြန်လည်တည်ထောင်ရာတွင် ပါဝင်ခဲ့သည်။ (၁ ရာဇဝင်ချုပ် ၂၂:၂; ၂ ရာဇဝင်ချုပ် ၁၅:​၈-၁၄; ၃၀:၂၅) စီ. အီး. ၃၃ ပင်တေကုတ္တေပွဲနေ့တွင် ဘုရားသခင့်နိုင်ငံတော်၏ ပထမသော့ကို ပေတရုအသုံးပြုချိန်က သူ၏စကားကို “ယုဒလူဖြစ်စေ၊ [ဂျူးမဟုတ်သူ] ဘာသာဝင်ဖြစ်စေ” ကြားနာခဲ့သည်။ ထိုနေ့ရက်တွင် ဗတ္တိဇံယူခဲ့သော လူသုံးထောင်တွင် အချို့သည် ဘာသာဝင်များဖြစ်နိုင်စရာအကြောင်းရှိသည်။ (တမန်တော် ၂:​၁၀၊ ၄၁) ထိုနောက် မကြာမီအချိန်တွင်​—ဘုရားသခင့်နိုင်ငံတော်၏ နောက်ဆုံးသော့ကို ကော်နေလိနှင့် သူ၏အိမ်ထောင်အတွက် ပေတရုအသုံးမပြုမီ​—အဲသယောပိဘာသာဝင်တစ်ဦးကို ဖိလိပ္ပုနှစ်ခြင်းပေးခဲ့သည်။ (မဿဲ ၁၆:၁၉; တမန်တော် ၈:​၂၆-၄၀; ၁၀:​၃၀-၄၈) ဤတွင် ဘာသာဝင်များကို တစ်ပါးအမျိုးသားများဟု မယူမှတ်သည်ကား ထင်ရှားပါသည်။

^၁၄ သို့ဖြစ်စေကာမူ နိုင်ငံအတွင်း၌ ဘာသာဝင်များ၏အခြေအနေသည် ဣသရေလတိုင်းရင်းသားအခြေအနေနှင့် မတူပါ။ ဘာသာဝင်များသည် ယဇ်ပုရောဟိတ်အမှုကို မထမ်းရွက်ကြရချေ။ သူတို့၏သားဦးများသည် လေဝိအနွယ်ဆက်ခံသူ ယဇ်ပုရောဟိတ်အဖွဲ့တွင် ကိုယ်စားပြုခြင်းမခံရပါ။bဘာသာဝင်များသည် ဣသရေလနိုင်ငံတွင် လယ်မြေကိုအမွေမခံကြရချေ။ သို့ရှိစေကာမူ ဣသရေလအမျိုးသားတို့သည် သစ္စာရှိဘာသာဝင်များအား ထောက်ထားစာနာမှုပြပြီး ညီအစ်ကိုများပမာ ဆက်ဆံကြရန် အမိန့်ရထားပါသည်။​—ဝတ်ပြုရာ ၁၉:​၃၃၊ ၃၄။

ဝိညာဏလူမျိုး

၁၅။ ဣသရေလတိုင်းရင်းသားများသည် မေရှိယကိုလက်ခံရန် ငြင်းပယ်ကြသောအခါ အဘယ်အကျိုးသက်ရောက်ခဲ့သနည်း။

^၁၅ ဣသရေလလူမျိုးကို စင်ကြယ်စေရန်နှင့် လူအမျိုးမျိုးတို့နှင့် သီးသန့်ဖြစ်စေရန် ပညတ်တရားကိုပေးတော်မူခြင်းဖြစ်သည်။ သို့သော် အခြားရည်ရွယ်ချက်တစ်ခုလည်းရှိသေးသည်။ တမန်တော်ပေါလုက ဤသို့ရေးသည်– “ငါတို့သည် ယုံကြည်ခြင်းအားဖြင့် ဖြောင့်မတ်ရာသို့ရောက်စေခြင်းငှာ ပညတ်တရားသည် ခရစ်တော်ထံသို့ ငါတို့ကို ပို့ဆောင်၍ ငါတို့၏အထိန်းဖြစ်သတည်း။” (ဂလာတိ ၃:၂၄) ဝမ်းနည်းစရာကား၊ ဣသရေလအများစုသည် ခရစ်တော်ထံသို့ ပညတ်တရား၏ပို့ဆောင်မှုကို လက်မခံခဲ့ခြင်းဖြစ်သည်။ (မဿဲ ၂၃:၁၅; ယောဟန် ၁:၁၁) ထိုကြောင့် ၎င်းလူမျိုးကို ယေဟောဝါဘုရားသခင်ငြင်းပယ်တော်မူပြီး “ဘုရားသခင်၏ဣသရေလအမျိုး” ကိုဖွားမြင်စေတော်မူသည်။ ထို့ပြင် ဤဣသရေလအမျိုးသစ်၏ အရည်အချင်းပြည့် ပြည်တော်သားများဖြစ်ခွင့်ကို ဂျူးမဟုတ်သူများအား ကိုယ်တော်ကမ်းလှမ်းဖိတ်ကြားတော်မူခဲ့သည်။ (ဂလာတိ ၃:၂၈; ၆:၁၆) ဤလူမျိုးသစ်အပေါ် ထွက်မြောက်ရာ ၁၉:​၅၊ ၆ ပါတော်ဝင်ယဇ်ပုရောဟိတ်အဖွဲ့ဆိုင်ရာ ယေဟောဝါ၏ကတိတော်သည် အံ့ချီးဖွယ်နည်းဖြင့် နောက်ဆုံးပြည့်စုံလာလေသည်။ မည်သို့အားဖြင့်နည်း။

၁၆၊ ၁၇။ ကမ္ဘာပေါ်ရှိ ဘိသိက်ခံခရစ်ယာန်များသည် အဘယ်သဘောမျိုးဖြင့် “မင်းစည်းစိမ်ရှိသော” သူများ “ယဇ်ပုရောဟိတ်မျိုး” ဖြစ်သနည်း။

^၁၆ သူ့ခေတ်ရှိ ဘိသိက်ခံခရစ်ယာန်များထံ ပေတရုစာရေးချိန်တွင် ထွက်မြောက်ရာ ၁၉:၆ ကိုကိုးကားခဲ့သည်– “သင်တို့မူကား၊ . . . ‘ရွေးချယ်တော်မူသောအမျိုးဖြစ်၏။ မင်းစည်းစိမ်ရှိသောယဇ်ပုရောဟိတ်မျိုး၊ သန့်ရှင်းသောလူမျိုး၊ ပိုင်ဆိုင်တော်မူရာအထူး ဖြစ်ကြ၏။’” (၁ ပေတရု ၂:၉၊ ကဘ) ယင်းက ဘာကိုဆိုလိုသနည်း။ ကမ္ဘာပေါ်ရှိ ဘိသိက်ခံခရစ်ယာန်များသည် ရှင်ဘုရင်များ ဖြစ်ကြပါသလော။ မဟုတ်ပါ။ သူတို့၏မင်းရိုက်ရာသည် အနာဂတ်တွင် ရှိသေးသည်။ (၁ ကောရိန္သု ၄:၈) မည်သို့ဆိုစေကာမူ အနာဂတ်တွင် ဘုရင်ဆိုင်ရာအခွင့်အရေးများကို သူတို့အား အပ်နှင်းမည်ဖြစ်ရာ ဤသဘောမျိုးဖြင့် သူတို့သည် “မင်းစည်းစိမ်ရှိ” သူများဖြစ်ကြပါသည်။ ယခုပင်လျှင် သူတို့သည် မဟာပိုင်သအုပ်စိုးရှင် ယေဟောဝါဘုရားသခင် ခန့်အပ်ထားတော်မူသော ရှင်ဘုရင်ယေရှု အစိုးရသောလူမျိုးဖြစ်နေ၏။ ပေါလုက ဤသို့ရေးသားသည်– “[ယေဟောဝါသည်] မှောင်မိုက်တန်ခိုးမှလည်း ငါတို့ကိုနုတ်၍ ချစ်တော်မူသောသားတော်၏ နိုင်ငံထဲသို့ သွင်းတော်မူ၏။”​—ကောလောသဲ ၁:၁၃။

^၁၇ ကမ္ဘာပေါ်ရှိ ဘိသိက်ခံခရစ်ယာန်များသည် ယဇ်ပုရောဟိတ်များဖြစ်ပါသလော။ တစ်နည်းအားဖြင့် ဖြစ်ကြပါသည်။ သူတို့သည် ယဇ်ပုရောဟိတ်လုပ်ငန်းကို အစုအဝေးလိုက်ထမ်းဆောင်နေကြောင်း မငြင်းဆိုနိုင်ပါ။ ယင်းအကြောင်းကို ပေတရုက ဤသို့ရှင်းပြသည်– “[သင်တို့သည်] သန့်ရှင်းသောပုရောဟိတ်များဖြစ်သည့်ပြင် . . . တည်ထားသောဝိညာဉ်ဗိမာန်ဖြစ်ကြ၏။” (၁ ပေတရု ၂:​၅၊ သမ; ၁ ကောရိန္သု ၃:၁၆) ယနေ့ အဖွဲ့လိုက်အနေနှင့် ဘိသိက်ခံခရစ်ယာန် အကြွင်းအကျန်များသည် “သစ္စာနှင့်သတိပညာရှိသောကျွန်၊” ဝိညာဏအစာဝေငှဖြန့်ဖြူးသည့် လမ်းကြောင်းဖြစ်သည်။ (မဿဲ ၂၄:​၄၅-၄၇) ရှေးဣသရေလလူမျိုးတွင် ဖြစ်ပျက်ခဲ့သကဲ့သို့ ယေဟောဝါကို ဝတ်ပြုကိုးကွယ်လိုသူ မည်သူမဆိုသည် ဤဘိသိက်ခံခရစ်ယာန်များနှင့်အတူ ပေါင်းသင်း၍ ကိုးကွယ်ကြရမည်။

၁၈။ ယဇ်ပုရောဟိတ်အမျိုးအနေနှင့် ကမ္ဘာပေါ်ရှိ ဘိသိက်ခံခရစ်ယာန်အသင်းတော်၏ အဓိကတာဝန်ကား အဘယ်နည်း။

^၁၈ ထို့ပြင် ဘိသိက်ခံခရစ်ယာန်များသည် ဣသရေလလူမျိုးထံမှ လူမျိုးအသီးသီးတို့အား ယေဟောဝါ၏ကြီးမြတ်တော်မူခြင်းအကြောင်းကို သက်သေခံခွင့် လွှဲပြောင်းယူလိုက်ပေပြီ။ ဘိသိက်ခံခရစ်ယာန်များအား တော်ဝင်ယဇ်ပုရောဟိတ်အမျိုးဟု ပေတရုခေါ်ဆိုခဲ့သောအခါ ဟောပြောခြင်းလုပ်ငန်းကို သူရည်စူးနေကြောင်း ရှေ့နောက်စကားများက ဖော်ပြနေပါသည်။ အမှန်မှာ၊ သူ၏ကိုးကားချက်တစ်ခုတည်းတွင် ထွက်မြောက်ရာ ၁၉:၆ ပါယေဟောဝါ၏ကတိတော်နှင့် ဟေရှာယ ၄၃:၂၁ ပါ ယေဟောဝါ၏မိန့်ဆိုချက်တို့ကို ပေါင်းစပ်၍ သူဤသို့ဆိုသည်– “သင်တို့မူကား၊ မှောင်မိုက်ထဲမှ အံ့ဖွယ်သောအလင်းတော်သို့ ခေါ်သွင်းတော်မူသောသူ၏ဂုဏ်ကျေးဇူးတော်များကို ဖော်ပြစေခြင်းငှာ . . . မင်းစည်းစိမ်ရှိသောယဇ်ပုရောဟိတ်မျိုး  . . ဖြစ်ကြ၏။” (၁ ပေတရု ၂:၉) ယင်းနှင့်အညီ ယေဟောဝါ၏ဂုဏ်ကျေးဇူးတော်များကို ကြေညာခြင်းသည် ဗိမာန်တော်၌ ယဇ်ပူဇော်သကာတင်ခြင်းဖြစ်သည်ဟု ပေါလုပြောဆိုခဲ့သည်။ သူက ဤသို့ရေးသားသည်– “နာမတော်ကို လူအများရှေ့ဝန်ခံရာနှုတ်ခမ်းအသီးတည်းဟူသော ချီးမွမ်းခြင်းယဇ်ကို သခင်ယေရှုခရစ်အားဖြင့် ဘုရားသခင်ထံ အစဉ်မပြတ်ပူဇော်ဆက်ကပ်ကြကုန်အံ့။”​—ဟေဗြဲ ၁၃:၁၅၊ ကဘ။

ကောင်းကင်ဆိုင်ရာပြည့်စုံချက်

၁၉။ ဣသရေလလူမျိုးသည် ယဇ်ပုရောဟိတ်နိုင်ငံတော်ဖြစ်မည်ဟူသော ကတိတော်၏ ကြီးမြတ်တော်မူသော နောက်ဆုံးပြည့်စုံချက်ကား အဘယ်နည်း။

^၁၉ သို့ရာတွင် ထွက်မြောက်ရာ ၁၉:​၅၊ ၆ သည် နောက်ဆုံးတွင် ထိုထက်ကြီးမြတ်ထွန်းတောက်စွာ ပြည့်စုံစရာရှိသေးသည်။ ဗျာဒိတ်ကျမ်းတွင် ရှင်ပြန်ထမြောက်သော ယေရှုကို ကောင်းကင်သားများ ဤသို့ချီးမွမ်းထောမနာပြုရာတွင် ဤကျမ်းချက်အားရည်ညွှန်းအသုံးပြုခဲ့သည်ကို တမန်တော်ယောဟန်ကြားနာခဲ့ရသည်– “ကိုယ်တော်သည် အသေသတ်ခြင်းကိုခံတော်မူသောအားဖြင့် အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှ အကျွန်ုပ်တို့ကိုယူ၍ အသွေးတော်နှင့် ဘုရားသခင်အဖို့ ရွေးနုတ်တော်မူ၏။ အကျွန်ုပ်တို့၏ ဘုရားသခင့်ရှေ့မှာ ရှင်ဘုရင်အရာ၌လည်းကောင်း၊ ယဇ်ပုရောဟိတ်အရာ၌လည်းကောင်း၊ ခန့်ထား၍ မြေကြီးပေါ်မှာ စိုးစံရသောအခွင့်ကိုပေးတော်မူ၏။” (ဗျာဒိတ် ၅:​၉၊ ၁၀) ထိုကြောင့် နောက်ဆုံးသဘောတရားအရ တော်ဝင်ယဇ်ပုရောဟိတ်အမျိုးသည် ကျွန်ုပ်တို့ဆုတောင်းရန် ယေရှုသွန်သင်ပေးတော်မူခဲ့သော အစိုးရအခွင့်အာဏာရှိ ဘုရားသခင့်ကောင်းကင်နိုင်ငံတော်ဖြစ်ပေသည်။ (လုကာ ၁၁:၂) အဆုံးတိုင်အောင်တည်ကြည်သော ၁၄၄,၀၀၀ ဘိသိက်ခံခရစ်ယာန်အားလုံးသည် ထိုဘုရားသခင်၏နိုင်ငံတော်အစီအစဉ်တွင် ပါဝင်ခွင့်ရကြလိမ့်မည်။ (ဗျာဒိတ် ၂၀:​၄၊ ၆) မောရှေမှတစ်ဆင့် ဤမျှတိုင်ကြာမြင့်စွာအချိန်ကတည်းကပေးခဲ့သော ကတိတော်၏ အံ့သြဖွယ်ပြည့်စုံခြင်းပါတကား!

၂၀။ အဘယ်မေးခွန်းကို ဖြေဆိုပေးရန် လိုအပ်နေဆဲဖြစ်သနည်း။

^၂၀ ဘိသိက်ခံအားလုံးသည် သူတို့၏အံ့သြဖွယ်အမွေတော်ကို ခံယူသည့်အခါ လူအုပ်ကြီးနှင့် သူတို့၏အနာဂတ်အခြေအနေသည် ယင်းနှင့်မည်သို့သက်ဆိုင်သနည်း။ အစဉ်လိုက်ဖြစ်သည့် ဤဆောင်းပါးများ၏ နောက်ဆုံးဆောင်းပါးတွင် ယင်းအချက်သည် ရှင်းလင်းလာလိမ့်မည်။

[အောက်ခြေမှတ်ချက်များ]

သင်ရှင်းပြနိုင်သလော

◻ အခြားသိုး၏အခွင့်အရာအကြောင်းကို မည်သို့တိုး၍တိုး၍ နားလည်လာသနည်း။

◻ မြောက်ဘက်ဣသရေလနိုင်ငံကို ယေဟောဝါ၏ယဇ်ပုရောဟိတ်အဖြစ်အမှုထမ်းခြင်းမှ ကိုယ်တော်အဘယ်ကြောင့်ပယ်ရှားတော်မူခဲ့သနည်း။

◻ သစ္စာရှိစဉ်က လူမျိုးအပေါင်းတို့ရှေ့တွင် ယုဒနိုင်ငံ၏အခြေအနေကား အဘယ်နည်း။

◻ ဣသရေလနိုင်ငံတွင် သစ္စာရှိဘာသာဝင်များ၏ အခွင့်အရာကား အဘယ်နည်း။

◻ ဘိသိက်ခံအသင်းတော်သည် ယဇ်ပုရောဟိတ်နိုင်ငံအဖြစ် မည်သို့အမှုထမ်းသနည်း။

[စာမျက်နှာ ၁၆ ပါ ရုပ်ပုံ]

တော်ဝင်ယဇ်ပုရောဟိတ်အမျိုးအနေနှင့် ဘိသိက်ခံခရစ်ယာန်များသည် ယေဟောဝါ၏ဘုန်းကို ကမ္ဘာပေါ်တွင် ကြေညာကြသည်

[စာမျက်နှာ ၁၈ ပါ ရုပ်ပုံ]

ထွက်မြောက်ရာ ၁၉:၆ ၏နောက်ဆုံးပြည့်စုံချက်ကား ဘုရားသခင်၏နိုင်ငံတော်ဖြစ်သည်