နှင်ထုတ်ခြင်း—မေတ္တာပါအစီအစဉ်ဖြစ်သလော

“ထာဝရအရှင် ဘုရားသခင်သည် သန့်ရှင်းတော်မူ၏၊ သန့်ရှင်းတော်မူ၏၊ သန့်ရှင်းတော်မူ၏။” (ဗျာဒိတ် ၄:၈) ထိုဖော်ပြချက်နှင့်အညီ ယေဟောဝါသည် သန့်ရှင်းသောစံနှုန်းများ၏ဇာစ်မြစ်ဖြစ်တော်မူသည်။ ယင်းတို့ကို “သန့်ရှင်းသောရေးသားပြုစုချက်များ” တွင်ချမှတ်ထား၍ ဤလမ်းညွှန်ချက်များကို ခရစ်ယာန်များလိုက်နာကျင့်သုံးကြရန် တာဝန်ရှိသည်။ အမှန်ပင် ယေဟောဝါ၏မျက်မှောက်တော်တွင် မသန့်ရှင်းသောအရာဟူသ၍ကို သူတို့ရှောင်ကြဉ်ကြရမည်။—၂ တိမောသေ ၃:၁၅၊ ကဘ; ဟေရှာယ ၅၂:၁၁။

သမ္မာကျမ်းစာက ဤသို့ရှင်းလင်းပြတ်သားစွာ မိန့်ကြားထားသည်– “သင်တို့ကိုခေါ်တော်မူသောသူသည် သန့်ရှင်းတော်မူသည်နည်းတူ ကျင့်ကြံပြုမူသမျှတို့၌ သန့်ရှင်းခြင်းရှိကြလော့။ အကြောင်းမူကား ‘ငါသည်သန့်ရှင်းတော်မူသောကြောင့် သင်တို့သည်လည်း သန့်ရှင်းခြင်းရှိကြလော့’ ဟုကျမ်းစာလာသတည်း။” (၁ ပေတရု ၁:၁၅၊ ၁၆) ခရစ်ယာန်အသင်းတော် စတည်ရှိခဲ့သော လွန်ခဲ့သည့် ရာစုနှစ်ပေါင်း ၁၉ ခုကတည်းက အသင်းတော်ကို ဝိညာဉ်ရေးနှင့် စာရိတ္တရေးဘက် ညစ်ညူးမသွားစေရန် ခရစ်ယာန်စစ်များသည် တိုက်လှန်ကာကွယ်ပေးခဲ့ကြရသည်။—ယုဒ ၃။

ကာကွယ်ပေးရန် အဘယ်ကြောင့်လိုအပ်

ဘုရားသခင်၏ကျေးကျွန်အားလုံးသည် စာရိတ္တနှင့်ဝိညာဉ်ရေးဘက် သန့်ရှင်းစင်ကြယ်နေရန် စိန်ခေါ်ချက်ကိုရင်ဆိုင်ကြရသည်။ ထို့အတွက် တန်ခိုးရှိသောရန်သူကြီးသုံးပါး—စာတန်၊ သူ၏လောကနှင့် ကျွန်ုပ်တို့၏အပြစ်ဘက်တိမ်းညွတ်တတ်သောဇာတိစိတ်ထားများ—ကိုတော်လှန်တိုက်ခိုက်နေကြရမည်။ (ရောမ ၅:၁၂; ၂ ကောရိန္သု ၂:၁၁; ၁ ယောဟန် ၅:၁၉) သင်သည် ကိုယ်ကျင့်တရားဖောက်ပြန်ဖို့ရန် စာတန်၏လောကက သင့်အားသွေးဆောင်လိမ့်မည်။ ယင်း၏လမ်းစဉ်ကိုခံယူရန် ဖြားယောင်းလိမ့်မည်။ စည်းစိမ်ချမ်းသာ၊ နာမည်ကျော်ကြားခြင်း၊ ရာထူးအဆင့်အတန်း၊ အထင်ကရပုဂ္ဂိုလ်ဖြစ်ရန်နှင့် တန်ခိုးအာဏာတို့ကို သင့်အား ကမ်းလှမ်းလိမ့်မည်။ သို့သော် စစ်မှန်သောဝတ်ပြုရေးကို လိုက်စားသူများသည် စာတန်၏သွေးဆောင်မှုကိုတွန်းလှန်ကြပြီး “လောကီအညစ်အကြေးနှင့်ကင်းစင်” နေရန်စိတ်ပိုင်းဖြတ်ထားကြသည်။ အဘယ်ကြောင့်နည်း။ အကြောင်းမူကား သူတို့သည် ယေဟောဝါ၏သန့်ရှင်းသောအဖွဲ့အစည်းမှရရှိသော ကာကွယ်မှုနှင့် ဂရုစိုက်ကြည့်ရှုမှုကိုလိုလားကြသောကြောင့်ဖြစ်သည်။—ယာကုပ် ၁:၂၇; ၁ ယောဟန် ၂:၁၅-၁၇။

သွေးသားအားနည်းမှုကြောင့် စာတန်၏သွေးဆောင်မှုနောက်ပါသွားသော မည်သည့်ခရစ်ယာန်အသင်းတော်သားမဆို အကူအညီရနိုင်ရန် ယေဟောဝါစီစဉ်ထားတော်မူသည်။ ဝိညာဉ်ရေးအရ အရည်အချင်းပြည့်သောအကြီးအကဲများသည် အသင်းတော်ကိုအကာအကွယ်ပေးပြီး မှားယွင်းသူတို့အား နောင်တယူစေ၍ ပြန်ထူထောင်လာနိုင်ရန် လိုအပ်သလိုအကူအညီပေးဖို့ ခန့်အပ်ထားသည်။ မှားယွင်းခဲ့သော မည်သည့်ခရစ်ယာန်မဆို နောင်တယူပြီး ပြုပြင်ပြောင်းလဲဖို့ သူ့အား စိတ်ရှည်စွာ အကူအညီပေးသင့်သည်။—ဂလာတိ ၆:၁၊ ၂; ယာကုပ် ၅:၁၃-၁၆။

နှင်ထုတ်ခြင်းသည် အဘယ်နည်းဖြင့် မေတ္တာပါရ

ဆိုးယုတ်မိုက်မဲသောလမ်းစဉ်ကို တမင်လိုက်လျှောက်ပြီး မပြောင်းလဲလိုသော ယေဟောဝါ၏ နှစ်ခြင်းခံကျေးကျွန်များအား နောင်တမယူသူများအဖြစ်ယူမှတ်ကြရမည်ဖြစ်ရာ သူတို့သည် ခရစ်ယာန်ပေါင်းသင်းမှုကိုမရထိုက်ကြချေ။ (၁ ယောဟန် ၂:၁၉ နှိုင်းယှဉ်။) ဤကဲ့သို့သောသူများအား သန့်ရှင်းသောခရစ်ယာန်အသင်းတော်တွင် ဆက်၍လက်ခံထားခြင်းဖြင့် ယင်းကိုညစ်ညမ်းစေခွင့်မပြုနိုင်ပါ။ သူတို့ကို နှင်ထုတ်ရမည်။

ဆိုးယုတ်သောအကျင့်များကိုကျင့်သူများအား နှင်ထုတ်ခြင်းသည် သင့်တော်လျောက်ပတ်ကြောင်းကို အောက်ပါအခြေအနေအားဖြင့် ဖော်ပြနိုင်ပါသည်– ကျောင်းသားများအား ရုတ်တရက်တိုက်ခိုက်ခြင်း၊ အဓမ္မမှုများပြုခြင်းတို့သည် အလွန်တိုးများလာနေသောကြောင့် “လက်နက်သုံးသည့်၊ သို့မဟုတ် သုံးမည်ဟုခြိမ်းခြောက်သည့်ကျောင်းသားများကို တစ်သက်တာပတ်လုံး ကျောင်းထုတ်ပစ်ရမည်” ဟူသည့်ပေါ်လစီကို အချို့ကျောင်းများတွင် ချမှတ်ထားကြောင်း ကနေဒါနိုင်ငံ၊ တိုရောန်တိုမြို့၏ The Globe and Mail သတင်းစာကဆိုသည်။ ဤသို့ကျောင်းထုတ်ခြင်းသည် အဓမ္မတိုက်ခိုက်မှုများကိုမခံရဘဲ ပညာသင်လိုသောကျောင်းသားများကို ကာကွယ်ပေးရန်အတွက်ဖြစ်သည်။

နောင်တမယူသောပြစ်မှားသူတစ်ဦးအား အသင်းတော်မှ နှင်ထုတ်ခြင်းသည် အဘယ်ကြောင့်မေတ္တာပါသနည်း။ ထိုသို့ပြုမူခြင်းသည် ယေဟောဝါနှင့် ကိုယ်တော်၏နည်းလမ်းတော်များကို မြတ်နိုးကြောင်း တင်ပြခြင်းဖြစ်သည်။ (ဆာလံ ၉၇:၁၀) ဤသို့ပြုခြင်းအားဖြင့် ဖြောင့်မတ်သောလမ်းစဉ်အတိုင်း လိုက်လျှောက်နေသူများအား မေတ္တာပြနေခြင်းဖြစ်သည်။ အကြောင်းမူကား သူတို့အပေါ် မကောင်းသောသြဇာသက်ရောက်စေနိုင်သည့်သူတစ်ဦးကို သူတို့အထဲမှ ထုတ်ပစ်လိုက်သည့်အတွက်ဖြစ်သည်။ အသင်းတော်၏သန့်ရှင်းမှုကိုလည်း ကာကွယ်ပေးပါသည်။ (၁ ကောရိန္သု ၅:၁-၁၃) ကြီးလေးသောအပြစ်ပြုမှု သို့မဟုတ် ဝိညာဏမသန့်ရှင်းမှုကို အသင်းတော်တွင် ဆက်ထားမည်ဆိုလျှင် အသင်းတော်သည် ညစ်ညမ်းသွားမည်ဖြစ်၍ သန့်ရှင်းတော်မူသောယေဟောဝါ၏ မြင့်မြတ်သောဝတ်ကိုမပြုထိုက်တော့ပါ။ ထို့ပြင် ပြစ်မှားသူအား နှင်ထုတ်ခြင်းဖြင့် သူ၏ထင်ရာစိုင်းသောလမ်းစဉ်သည် မည်မျှအပြစ်ကြီးလေးကြောင်းကို သဘောပေါက်စေပြီး နောင်တယူရန်ဖြစ်စေ၊ လိုအပ်သလို ပြုပြင်ပြောင်းလဲရန်ဖြစ်စေ၊ ထိုသို့ပြုခြင်းအားဖြင့် အသင်းတော်ထဲ သူပြန်ဝင်လာနိုင်ရန်အတွက် အကူအညီဖြစ်ပေမည်။

အခြားသူများအပေါ် အကျိုးသက်ရောက်မှု

အသင်းသားတစ်ဦးသည် သူ့သားအိမ်ရာပြစ်မှားခြင်းကဲ့သို့သော ကြီးလေးသောအပြစ်တစ်ခုခုပြုသောအခါ ယေဟောဝါ၏နှလုံးကို ရွှင်လန်းခြင်းမရှိစေပါ။ (သု. ၂၇:၁၁) ပေါတိဖာ၏မိန်းမသည် မိမိနှင့်ဖောက်ပြန်ရန် ယောသပ်ကိုအတင်းတောင်းဆိုချိန်တွင် ယောသပ်စဉ်းစားခဲ့သကဲ့သို့ ဖောက်ပြန်သောခရစ်ယာန်တစ်ဦး မစဉ်းစားသည်ကား အမှန်ပင်ဖြစ်သည်။ ယောသပ်တုံ့ပြန်သည်ကား ဤသို့ဖြစ်သည်– “အပြစ်ကြီးသော ဤအမှုကိုကျွန်တော်ပြု၍ ဘုရားသခင်ကို အဘယ်သို့ပြစ်မှားနိုင်သနည်း။” (ကမ္ဘာဦး ၃၉:၆-၁၂) ယေဟောဝါ၏ သန့်ရှင်းသောစံနှုန်းများကို ယောသပ်တန်ဖိုးထားလေးမြတ်ကာ ထိုနေရာမှ အပြင်သို့ထွက်ပြေးလေ၏။ တစ်ဖက်မှကြည့်ပြန်လျှင် သူ့သားအိမ်ရာပြစ်မှားသူသည် သူ၏သွေးသားတပ်မက်မှုကို မထိန်းချုပ်နိုင်ခြင်းက ဘုရားသခင်ကိုချစ်မြတ်နိုးသောသဘော လျော့နည်းနေခြင်းကြောင့်ဖြစ်မည်။—ဂလာတိ ၅:၁၉-၂၁။

ဘုရားသခင်၏ပညတ်များကို ချိုးဖောက်သော နှစ်ခြင်းခံပြီးသူသည် ယုံကြည်သူဆွေမျိုးတို့အား မည်မျှစိတ်ဆင်းရဲစေမည်ကို မစဉ်းစားကြောင်း တင်ပြသည်။ ယင်းကြောင့်ခံရသော စိတ်ထိခိုက်မှုသည် အချို့သူများအတွက် မခံမရပ်နိုင်သည့်တိုင်ဖြစ်သည်။ မိမိသားသည် အကျင့်ဖောက်ပြားခဲ့ကြောင်းကို ခရစ်ယာန်မိန်းမတစ်ဦး သိရှိသည့်အခါ သူမသည် ဤသို့ဝမ်းနည်းစွာမြည်တမ်းသည်– “ကျွန်မတို့ ဘယ်လောက်တောင်စိတ်ထိခိုက်ပြီး ဝမ်းနည်းပက်လက်ဖြစ်ကြတယ်ဆိုတာကို သဘောပေါက်နားလည်ပုံရှိတဲ့ ညီအစ်ကိုညီအစ်မတကယ်နည်းတယ်။ . . . ကျွန်မတို့ နှလုံးကြေကွဲသွားတာပဲ။” မိသားစုတစ်ခုလုံး၏နာမည်ကောင်းသည် ထိခိုက်သွားပေမည်။ မိသားစုမှ သစ္စာရှိသောအခြားသူများပါ စိတ်ဓာတ်ကျဆင်းပြီး မိမိကိုယ်ကိုအပြစ်တင်စိတ် အနည်းနှင့်အများရှိနေမည်။ သို့ဖြစ်သောကြောင့် ပြစ်မှားသူ၏မိုက်မဲသောလမ်းစဉ်သည် တစ်မိသားစုလုံးကို စိတ်ထိခိုက်စရာဖြစ်စေသည်။

မိသားစုဝင်များအတွက် မေတ္တာပါအကူအညီ

အသင်းတော်မှနှင်ထုတ်ခြင်းသည် မေတ္တာပါရုံမက အကာအကွယ်ပေးသောအစီအစဉ်ဖြစ်ကြောင်းကို နှင်ထုတ်ခံရသူများ၏ သစ္စာရှိမိသားစုဝင်များ သတိရရန်လိုသည်။ ပြစ်မှားသူကို အကူအညီပေးရန် အတတ်နိုင်ဆုံးကြိုးစားခဲ့သော်လည်း ဘုရားသခင်၏စကားကိုနားမထောင်၊ ခေါင်းမာစွာဖြင့် နောင်တမယူလျှင် အသင်းတော်ကိုကာကွယ်ပေးရန်လိုသည်။ ဘုရားသခင်၏နှုတ်ကပါဌ်တော်က “ထိုဆိုးညစ်သောသူကို သင်တို့အထဲမှ နှင်ထုတ်ကြလော့” ဟုညွှန်ကြားသည့်အတိုင်းသာ လုပ်ကိုင်စရာအကြောင်းရှိတော့သည်။ (၁ ကောရိန္သု ၅:၁၃) သက်သေခံတစ်ဦးပြောသည့်အတိုင်းပင် “နှင်ထုတ်ခြင်းသည် ယေဟောဝါအားသစ္စာရှိခြင်းနှင့်ဆိုင်သောကိစ္စဖြစ်သည်။”

မိသားစုဝင်တစ်ဦး နှင်ထုတ်ခံရသည့်အခါ ခရစ်ယာန်ဆွေမျိုးများသည် စိတ်ထိခိုက်ကြမည်။ ထိုကြောင့် ခန့်အပ်ခံအကြီးအကဲများသည် သူတို့အား ဝိညာဉ်ရေးအရ စိတ်လန်းဆန်းပေါ့ပါးမှုရှိနိုင်ရန် အတတ်နိုင်ဆုံးကူညီပေးသင့်သည်။ (၁ သက်သာလောနိတ် ၅:၁၄) အကြီးအကဲများသည် သူတို့အတွက်သော်လည်းကောင်း၊ သူတို့နှင့်အတူသော်လည်းကောင်း ဆုတောင်းနိုင်သည်။ တည်ဆောက်မှုပေးသော ကျမ်းစာစကားများကို ဤသစ္စာရှိသူများနှင့်ဆွေးနွေးရန် အလည်အပတ်သွားနိုင်ပါသည်။ သိုးထိန်းများသည် ဤချစ်မြတ်နိုးဖွယ်ကောင်းသူများကို ခရစ်ယာန်အစည်းအဝေးများ မစမီနှင့် အပြီးတွင် အခွင့်အရေးရတိုင်း ဝိညာဉ်ရေးအရ အားပေးကူညီသင့်သည်။ သူတို့နှင့်အတူ လယ်ကွင်းလုပ်ငန်း၌ လိုက်သွားခြင်းအားဖြင့်လည်း ထပ်ဆင့်အားပေးနိုင်သည်။ (ရောမ ၁:၁၁၊ ၁၂) ဝိညာဏသိုးထိန်းများသည် ယေဟောဝါ၏ ဤသစ္စာရှိကျေးကျွန်များအား သူတို့ရသင့်ရထိုက်သောမေတ္တာနှင့်ဂရုစိုက်မှုကို ပြသပေးရန်လိုသည်။—၁ သက်သာလောနိတ် ၂:၇၊ ၈။

ပြစ်မှားသူအတွက်ကြောင့် သူ၏မိသားစုမှ သစ္စာရှိသူ မည်သူကိုမဆို ဥပေက္ခာပြုစရာအကြောင်းမရှိပါ။ ဣသရေလနိုင်ငံ၏ ဆိုးသွမ်းသောဘုရင်ရှောလုကို ဘုရားသခင်ပယ်တော်မူသော်လည်း ရှောလု၏သား ယောနသန်အပေါ် ဒါဝိဒ်၏တွယ်တာမှုသည် မလျော့နည်းခဲ့ပါ။ အမှန်မှာ၊ ဒါဝိဒ်နှင့်ယောနသန်တို့၏မေတ္တာနှောင်ကြိုးသည် အလွန်ခိုင်မြဲလာခဲ့သည်။ (၁ ဓမ္မရာဇဝင် ၁၅:၂၂၊ ၂၃; ၁၈:၁-၃; ၂၀:၄၁) ထို့ကြောင့် အသင်းတော်တွင်ရှိသူအားလုံးသည် ယေဟောဝါကိုပြစ်မှားသောဆွေမျိုးများရှိ ခရစ်ယာန်များကို အားပေးထောက်မပြီး မေတ္တာပြသင့်သည်။

ဤကဲ့သို့သောသစ္စာရှိသူများကို ဥပေက္ခာပြုခြင်း သို့မဟုတ် ကြင်နာမှုမပြခြင်းသည် မည်မျှမေတ္တာမဲ့ရာကျမည်တကား! သစ္စာရှိသော မိသားစုဝင်များသည် အားပေးတည်ဆောက်မှု အထူးလိုအပ်နေသည်။ သူတို့ခမျာ အထီးကျန်ဖြစ်နေပြီး ခံရခက်သောအခြေအနေ၌ရှိနေပေမည်။ တယ်လီဖုန်းဖြင့် သူတို့အား ဝိညာဏသတင်းအတိုအထွာတစ်ခု သို့မဟုတ် တည်ဆောက်မှုပေးသော တွေ့ကြုံမှုတစ်ခုကို ပြောဆိုနိုင်သည်။ အသင်းမှနှင်ထုတ်ထားသူကိုယ်တိုင် ဖုန်းလာကိုင်ပါက ခရစ်ယာန်ဆွေမျိုးတို့နှင့် စကားပြောဆိုလိုကြောင်း ကိုသာပြောပါ။ ဤသို့သောမိသားစုရှိ သစ္စာရှိသူများအား သင့်အိမ်၌ ပေါင်းသင်းဖို့ရန်၊ သို့မဟုတ် အစာစားသုံးရန် ခေါ်ဖိတ်လိုပေမည်။ ဈေးဝယ်စဉ် သူတို့နှင့်တွေ့ဆုံလျှင် ထိုအချိန်အခါတွင် အတော်အတန်တည်ဆောက်မှုရှိရှိပေါင်းသင်းနိုင်သည်။ နှင်ထုတ်ခံရသောဆွေမျိုးရှိ သစ္စာရှိခရစ်ယာန်များသည် ယေဟောဝါ၏သန့်ရှင်းသောအဖွဲ့အစည်းအဝင်ဖြစ်ဆဲရှိသည်ကို သတိရပါ။ သူတို့သည် လွယ်ကူစွာဖြင့် အထီးကျန်ဖြစ်ပြီး စိတ်ဓာတ်ကျသွားနိုင်၏။ ထို့ကြောင့် သူတို့အား ကြင်နာမှုနှင့်ချစ်ခြင်းမေတ္တာပြရန် အခွင့်အရေးရှာယူပါ။ ‘ယုံကြည်ခြင်း၏အိမ်သူအိမ်သားတို့အား’ ဆက်လက်၍ကောင်းမှုပြုလုပ်ပါ။—ဂလာတိ ၆:၁၀။

ယေဟောဝါ၏ပြင်ဆင်ချက်ကို တန်ဖိုးထားလေးမြတ်လေ

ယေဟောဝါအားဝတ်ပြုသူ ကမ္ဘာချီမိသားစုကြီးရှိ တစ်ဦးစီကို ဘုရားသခင်သည် ချစ်သနားခြင်း မေတ္တာကရုဏာစိတ်ရှိသည့်အတွက် အလွန်ကျေးဇူးတင်စရာဖြစ်သည်။ ကိုယ်တော်၏အဖွဲ့အစည်းအားဖြင့် ကိုယ်တော့်ရှေ့တော်မှောက်တွင် ဖြောင့်မတ်စွာ သွားလာနိုင်ရန် ကိုယ်တော်သည် မေတ္တာပါသောအစီအစဉ်ကို ပြင်ဆင်ထားတော်မူသည်။ မိသားစုဝင်တစ်ဦးသည် တမင်ပြစ်မှား၍ အသင်းတော်မှ နှင်ထုတ်ခံရသည့်တိုင် ထိုသူသည် အမှန်နောင်တရပါက ပြန်ဝင်လာနိုင်သောလမ်းရှိသည်။ ယင်းကို အောက်ပါပုံဥပမာက ဖော်ပြပါသည်–

အဲနာဟူ၍ ကျွန်ုပ်တို့အမည်ပေးသူတစ်ဦးအား အကြီးအကဲများသည် ကြိုးစားကူညီခဲ့သော်လည်း သူမသည် “ဆေးလိပ်သောက်ခြင်း၊ အရက်သောက်ခြင်း၊ မူးယစ်ဆေးဝါးသုံးစွဲခြင်း” တို့ကိုပြုလေသည်။ သူမသည် နောင်တလည်းမယူ အသင်းတော်တွင်လည်း ဆက်မနေပါ။ သို့သော် များမကြာမီ အဲနာသည် ယေဟောဝါ၏သန့်ရှင်းသောအသင်းတော်နှင့် ချစ်ခင်စွာပေါင်းသင်းမှုကို တမ်းတလာပြီး ကိုယ်တော်ထံ ဆုတောင်းလေသည်။ အကြီးအကဲများသည် လမ်းလွဲသူများအပေါ် မည်မျှဂရုစိုက်သည်ကို သူမသည် အပြည့်အဝသဘောမပေါက်ခဲ့ကြောင်း ဝန်ခံလေသည်။ အစည်းအဝေးများကို အဲနာပြန်တက်လာပြီးနောက် နောင်တယူလေသည်။ ထို့နောက် မေတ္တာရှိ အကာအကွယ်ပေးသော အသင်းတော်ထဲ သူမ ပြန်ဝင်လာနိုင်ရန် လက်ခံလိုက်လေသည်။ ယခုတစ်ဖန် အဲနာသည် ယေဟောဝါ၏ မြင့်မားသော စာရိတ္တစံနှုန်းကို ထောက်ခံနေပါသည်။ အကြီးအကဲများတင်ပြခဲ့သော ချစ်ခြင်းမေတ္တာကို သူမ ကျေးဇူးတင်ကာ ဤသို့လည်းပြောဆိုခဲ့သည်– “ခရစ်ယာန်စာပေများဟာ ကျွန်မအတွက် ဘယ်လောက်တန်ဖိုးရှိတယ်ဆိုတာ သိမှာမဟုတ်ဘူး။ ကျွန်မတို့လိုအပ်ချက်တွေကို ယေဟောဝါတကယ်ဂရုစိုက်ပြီးပေးတယ်။”

မှန်ပါသည်၊ အသင်းတော်မှ နှင်ထုတ်ခံရပြီးနောက်တွင် နောင်တရသူများအတွက် ပြန်လာနိုင်သည့်လမ်းကို ဘုရားသခင်ပြင်ဆင်ထားတော်မူသည်။ နှင်ထုတ်ခြင်းကိုယ်နှိုက်ကပင် မေတ္တာပါအစီအစဉ်ဖြစ်ကြောင်းကိုလည်း ကျွန်ုပ်တို့သိမြင်နားလည်ခဲ့ပြီ။ သို့သော် ကျွန်ုပ်တို့၏ သန့်ရှင်းသောဘုရားသခင်၏ ဖြောင့်မတ်သောလမ်းစဉ်ကို အစဉ်စွဲမြဲလိုက်နာခြင်းအားဖြင့် ဤဝမ်းနည်းဖွယ်တွေ့ကြုံမှုကို ရှောင်ကြဉ်ရန် မည်မျှသာ၍ကောင်းသည်တကား! ယေဟောဝါ၏ သန့်ရှင်းပြီး မေတ္တာပါသည့် ကာကွယ်စောင့်ရှောက်ခံရသောအဖွဲ့အစည်းဝင်တစ်ဦးအနေနှင့် ကိုယ်တော်ကိုချီးမွမ်းနိုင်ခွင့်ရသည့်အတွက် အစဉ်အမြဲကျေးဇူးတင်ကြစို့လေ!

[စာမျက်နှာ ၂၆ ပါ ရုပ်ပုံ]

အသင်းတော်မှ နှင်ထုတ်ခံရသူများ၏ သစ္စာရှိဆွေမျိုးများအား အသင်မေတ္တာပြနေသလော