ခရစ်ယာန်များနှင့် လူသားလောက

“ပြင်ပလူတို့၏မျက်နှာကိုထောက်လျက်၊ ပညာနှင့်ကျင့်ဆောင် . . . ကြလော့။”—ကောလောသဲ ၄:၅။

၁။ ယေရှုသည် မိမိ၏နောက်တော်လိုက်များနှင့် လောကအကြောင်း ဘာပြောခဲ့သနည်း။

မိမိ၏ကောင်းကင်ခမည်းတော်ထံ ဆုတောင်းရာတွင် မိမိနောက်တော်လိုက်များနှင့်ပတ်သက်၍ ယေရှုက ဤသို့ဆို၏– “အကျွန်ုပ်သည်ဤလောကနှင့်မဆက်ဆံသကဲ့သို့ ဤသူတို့သည်မဆက်ဆံသောကြောင့်၊ လောကီသားတို့သည်ဤသူတို့ကိုမုန်းကြပါ၏။” ကိုယ်တော် ဤသို့ထပ်ဆို၏– “ဤသူတို့ကိုဤလောကမှနုတ်ယူတော်မူမည်အကြောင်း အကျွန်ုပ်တောင်းသည်မဟုတ်ပါ။ မကောင်းသောအမှုအရာနှင့် ကင်းလွတ်စေခြင်းငှာ စောင့်မတော်မူမည်အကြောင်းကိုသာ တောင်းပါ၏။” (ယောဟန် ၁၇:၁၄၊ ၁၅) ဥပမာအနေနှင့် တရားကျောင်းများတွင် သီးခြားနေခြင်းအားဖြင့် ခရစ်ယာန်များသည် ရုပ်ခန္ဓာအရ လောကနှင့်သီးခြားနေရမည်ဟူ၍မဟုတ်ပေ။ ယင်းအစား ခရစ်တော်သည် “မြေကြီးစွန်းတိုင်အောင်” မိမိ၏သက်သေဖြစ်ရန် သူတို့အား “ဤလောကသို့စေလွှတ်တော်မူ” ၏။ (ယောဟန် ၁၇:၁၈; တမန်တော် ၁:၈) သို့တိုင် ခရစ်တော်၏နာမကြောင့် သူတို့ခံရမည့် ရန်ဘက်ပြုမုန်းတီးမှုသည် “ဤလောကကိုအစိုးရသောမင်း” စာတန်ကလှုံ့ဆော်ပေးမည်ဖြစ်သောကြောင့် သူတို့ကိုကြည့်ရှုဖို့ ဘုရားသခင်အား ကိုယ်တော်တောင်းဆိုခဲ့ခြင်းဖြစ်သည်။—ယောဟန် ၁၂:၃၁; မဿဲ ၂၄:၉။

၂။ (က) “လောက” ဟူသည့်စကားလုံးကို ကျမ်းစာတွင်မည်သို့သုံးနှုန်းထားသနည်း။ (ခ) လောကနှင့်ပတ်သက်၍အဘယ်မျှတသောသဘောထားကို ယေဟောဝါပြတော်မူသနည်း။

^၂ သမ္မာကျမ်းစာပါ “လောက” (ဂရိ၊ ကော့စ်မော့စ်) ဟူသောစကားလုံးသည် “မာရ်နတ်၏လက်၌ရှိ” သောမဖြောင့်မတ်သောလူ့အဖွဲ့အစည်းကို ဖော်ညွှန်းလေ့ရှိသည်။ (၁ ယောဟန် ၅:၁၉) ခရစ်ယာန်များသည် ယေဟောဝါ၏စံနှုန်းများကိုလိုက်နာပြီး လောကအား ဘုရားသခင့်နိုင်ငံတော်သတင်းကောင်းဟောပြောရန် မိန့်မှာချက်ကိုလည်း လိုက်နာကြသောကြောင့် သူတို့နှင့်လောကစပ်ကြားတွင် တစ်ခါတစ်ရံခက်ခဲသောဆက်ဆံရေးရှိခဲ့ကြသည်။ (၂ တိမောသေ ၃:၁၂; ၁ ယောဟန် ၃:၁၊ ၁၃) သို့ရာတွင် ယေဘုယျလူ့မိသားစုကိုရည်ညွှန်းရာတွင်လည်း ကော့စ်မော့စ်ကို ကျမ်းစာတွင်အသုံးပြုသည်။ ဤသဘောဖြင့်လောကကိုပြောကာ ယေရှုဤသို့ဆို၏– “ဘုရားသခင်၏သားတော်ကို ယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ၊ ဘုရားသခင်သည် မိမိ၌တစ်ပါးတည်းသောသားတော်ကို စွန့်တော်မူသည်တိုင်အောင် လောကီသားတို့ကိုချစ်တော်မူ၏။ လောကီသားတို့အားအပြစ်စီရင်ခြင်းငှာ၊ ဘုရားသခင်သည်သားတော်ကို ဤလောကသို့စေလွှတ်တော်မူသည်မဟုတ်။ လောကီသားတို့သည်ကိုယ်တော်အားဖြင့် ကယ်တင်ခြင်းသို့ရောက်မည်အကြောင်း စေလွှတ်တော်မူ၏။” (ယောဟန် ၃:၁၆၊ ၁၇; ၂ ကောရိန္သု ၅:၁၉; ၁ ယောဟန် ၄:၁၄) သို့ဖြင့် စာတန့်ဆိုးယုတ်သောစနစ်၏စရိုက်လက္ခဏာများကို မုန်းတီးစဉ် “နောင်တရ” သူများအားလုံးကိုကယ်တင်ဖို့အလို့ငှာ လူသားတို့အတွက် မိမိ၏သားတော်ကိုစေလွှတ်တော်မူခြင်းအားဖြင့် မိမိ၏မေတ္တာတော်ကို ယေဟောဝါပြသတော်မူခဲ့သည်။ (၂ ပေတရု ၃:၉; သု. ၆:၁၆-၁၉) လောကအပေါ်ထားသော ယေဟောဝါ၏မျှတသောသဘောထားက ကိုယ်တော်အားဝတ်ပြုသူများကို လမ်းညွှန်သင့်သည်။

ယေရှု၏ပုံနမူနာ

၃၊ ၄။ (က) အုပ်ချုပ်ရေးနှင့်ပတ်သက်၍ ယေရှု၏အနေအထားကားအဘယ်နည်း။ (ခ) လူ့လောကကိုယေရှုမည်သို့ရှုမြင်ခဲ့သနည်း။

^၃ ကိုယ်တော်မသေမီလေးတွင် ပုန္တိပိလတ်ကို ယေရှုဤသို့မိန့်တော်မူ၏– “ငါ၏နိုင်ငံသည်ဤလောကနှင့်မစပ်ဆိုင်။” (ယောဟန် ၁၈:၃၆) ထိုစကားများနှင့်အညီ ယေရှုသည် လောကတိုင်းနိုင်ငံများကိုအုပ်စိုးရန် အစောပိုင်းက စာတန်၏ကမ်းလှမ်းချက်ကို ကိုယ်တော်ငြင်းပယ်ခဲ့ပြီး ဂျူးများ၏ ဘုရင်အဖြစ်တင်မြှောက်ဖို့ကြိုးပမ်းမှုကို ကိုယ်တော်လက်မခံခဲ့ပါ။ (လုကာ ၄:၅-၈; ယောဟန် ၆:၁၄၊ ၁၅) သို့တိုင် လူ့လောကအတွက် ကြီးမားသောမေတ္တာကို ယေရှုပြသတော်မူခဲ့သည်။ ဤပုံနမူနာကို တမန်တော်မဿဲက မှတ်တမ်းတင်ခဲ့သည်– “လူအစုအဝေးတို့ကိုမြင်တော်မူလျှင် သနားခြင်းစိတ်ရှိတော်မူ၏။ အကြောင်းမူကား၊ ထိုသူတို့သည် ပင်ပန်းသည်ဖြစ်၍ ထိန်းသူမရှိဘဲ ပစ်ထားသောသိုးကဲ့သို့ ဖြစ်ကြ၏။” မေတ္တာတော်ကြောင့် မြို့ရွာများတွင်လူတို့ထံသို့သွား၍ ကိုယ်တော်ဟောပြောတော်မူခဲ့သည်။ ကိုယ်တော်သည် သူတို့ကိုသွန်သင်ကာ သူတို့၏နာမကျန်းမှုများကို ကုသပေးတော်မူ၏။ (မဿဲ ၉:၃၅၊၃၆) ကိုယ်တော့်ထံသင်ယူရန်ရောက်ရှိလာကြသူများ၏ ကာယရေးလိုအပ်ရာများကိုလည်း အကင်းပါးပါးသိရှိတော်မူ၏။ ကျွန်ုပ်တို့ဤသို့ဖတ်ရသည်– “တပည့်တော်တို့ကိုခေါ်၍၊ ဤလူများကိုငါသနား၏။ သုံးရက်ပတ်လုံး ငါနှင့်အတူရှိကြပြီ။ စားစရာအလျှင်းမရှိ။ လမ်းခရီး၌ မောမည်ကိုစိုးရိမ်သောကြောင့် အစာမစားမီသူတို့ကိုလွှတ်ခြင်းငှာ ငါအလိုမရှိဟုမိန့်တော်မူ” ၏။ (မဿဲ ၁၅:၃၂) မေတ္တာပါသောစိုးရိမ်ကြောင့်ကြမှုပါတကား!

^၄ ဂျူးများသည် ရှမာရိလူမျိုးများအပေါ်လွန်စွာစိတ်စွန်းကွက်မှုရှိကြသော်လည်း ယေရှုသည် ရှမာရိမိန်းမတစ်ဦးကို အတော်ကြာကြာစကားပြောခဲ့ပြီး ရှမာရိမြို့တစ်မြို့တွင် စေ့စေ့စပ်စပ်သက်သေခံဖို့ နှစ်ရက်အချိန်ပေးခဲ့သည်။ (ယောဟန် ၄:၅-၄၂) “ဣသရေလအမျိုးအဝင် ပျောက်လွင့်သောသိုးများ” ရှိရာသို့ကိုယ်တော့်ကို ဘုရားသခင်စေလွှတ်သော်လည်း ဂျူးမဟုတ်သောအခြားသူများ၏ ယုံကြည်ကြောင်းဖော်ပြချက်များကို တစ်ခါတစ်ရံယေရှုတုံ့ပြန်ခဲ့သည်။ (မဿဲ ၈:၅-၁၃; ၁၅:၂၁-၂၈) မှန်ပါသည်၊ “လောကနှင့်မစပ်ဆိုင်” ဘဲတစ်ချိန်တည်းတွင် လူ့လောကမှ လူတို့ကိုမေတ္တာပြသနိုင်ကြောင်း ယေရှုတင်ပြခဲ့သည်။ ကျွန်ုပ်တို့နေထိုင်ရာ၊ အလုပ်၊ သို့မဟုတ် ဈေးဝယ်ရာတွင် လူတို့ကို ထပ်တူထောက်ထားစာနာမှု ကျွန်ုပ်တို့ပြပါသလော။ သူတို့၏ကောင်းကျိုးအတွက်—ကျွန်ုပ်တို့ကူညီနိုင်သည့်အတိုင်းအတာအတွင်း၌သာဖြစ်မည်ဆိုလျှင် သူတို့၏ဝိညာဉ်ရေးလိုအပ်ရာများအတွက်သာမကဘဲ အခြားလိုအပ်ရာများအတွက်ပါ စိုးရိမ်မကင်းဖြစ်ကြောင်း ကျွန်ုပ်တို့ပြပါသလော။ ယေရှုပြသခဲ့ပြီး ယင်းသို့လုပ်ဆောင်ခြင်းဖြင့် ဘုရားသခင့်နိုင်ငံတော်အကြောင်း လူတို့အားသွန်သင်သည့်လမ်းကို ကိုယ်တော်ဖွင့်ခဲ့သည်။ ယေရှုပြုခဲ့သကဲ့သို့ ပကတိအံ့ဖွယ်အမှုများကို ကျွန်ုပ်တို့မလုပ်နိုင်သည်မှာ မှန်ပါသည်။ သို့သော် ကြင်နာသည့်အပြုအမူတစ်ခုသည် စကားအဖြစ်ဆိုရလျှင် စိတ်စွန်းကွက်မှုကို အံ့ဖွယ်ပျက်ပြယ်စေသည်။

“ပြင်ပ” လူတို့နှင့်ပတ်သက်၍ ပေါလု၏သဘောထား

၅၊ ၆။ တမန်တော်ပေါလုသည် “ပြင်ပ” မှဂျူးများနှင့် မည်သို့ဆက်ဆံခဲ့သနည်း။

^၅ သူ၏စာများစွာတွင် “ပြင်” သို့မဟုတ် “ပြင်ပ” လူတို့ဟု တမန်တော်ပေါလုရည်ညွှန်းရာ၌ ဂျူးများဖြစ်စေ၊ တစ်ပါးအမျိုးသားများဖြစ်စေ ခရစ်ယာန်မဟုတ်သူများကို ဆိုလိုခြင်းဖြစ်သည်။ (၁ ကောရိန္သု ၅:၁၂; ၁ သက်သာလောနိတ် ၄:၁၁၊၁၂; ၁ တိမောသေ ၃:၇) ထိုသို့သောသူများကို သူမည်သို့ဆက်ဆံသနည်း။ သူသည် “အချို့သောသူတို့ကို တစ်စုံတစ်ခုသောအမှုအရာအားဖြင့် ကယ်တင်ခြင်းအလိုငှာ၊ ခပ်သိမ်းသောသူတို့၌ ခပ်သိမ်းသောအရာဖြစ်၏။” (၁ ကောရိန္သု ၉:၂၀-၂၂) မြို့တစ်မြို့တွင် သူရောက်ရှိသည့်အခါတိုင်း ယင်းတွင်အခြေချနေထိုင်ကြသောဂျူးများထံ အရင်သွားရောက်ဟောပြောသည့်ထုံးစံ သူ၌ရှိခဲ့သည်။ သူ၏ချဉ်းကပ်နည်းကားအဘယ်နည်း။ လိမ္မာပါးနပ်စွာနှင့် လေးစားစွာဖြင့် မေရှိယရောက်ရှိလာခဲ့ပြီးဖြစ်ကြောင်း၊ ယဇ်သကာဆိုင်ရာသေခြင်းနှင့်သေခဲ့ပြီးကြောင်း၊ ထမြောက်ခဲ့ပြီးဖြစ်ကြောင်းတို့ကို ယုံကြည်နိုင်လောက်အောင် ကျမ်းစာအထောက်အထားများနှင့် ရှင်းပြခဲ့သည်။—တမန်တော် ၁၃:၅၊ ၁၄-၁၆၊ ၄၃; ၁၇:၁-၃၊ ၁၀။

^၆ ဤနည်းဖြင့် မေရှိယနှင့်ဘုရားသခင့်နိုင်ငံတော်အကြောင်းကို သူတို့အားသွန်သင်ဖို့ ပညတ်တရားနှင့် ပရောဖက်များဆိုင်ရာ ဂျူးများ၏အသိပညာအပေါ် တည်ဆောက်ခဲ့သည်။ သို့ဖြင့် အချို့ယုံကြည်သူများဖြစ်လာခဲ့ကြသည်။ (တမန်တော် ၁၄:၁; ၁၇:၄) ဂျူးခေါင်းဆောင်များ၏ ဆန့်ကျင်မှုများရှိလင့်ကစား ဂျူးအဖော်များအတွက် စာရေးသောအခါ နွေးထွေးသည့်တွယ်တာမှုကို ပေါလုပြသခဲ့သည်– “ညီအစ်ကိုတို့၊ ဣသရေလလူတို့သည် ကယ်တင်တော်မူခြင်းသို့ရောက်စေခြင်းငှာ၊ ငါ၏စေတနာအလိုရှိ၍ ဘုရားသခင်ကိုဆုတောင်းလေ့ရှိ၏။ ထိုသူတို့သည် မှန်သောပညာမရှိသော်လည်း၊ ဘုရားသခင်ဘက်၌စိတ်အားကြီးသည်ဟု သူတို့အဖို့ငါသက်သေခံ၏။”—ရောမ ၁၀:၁၊ ၂။

ဂျူးမဟုတ်သည့် ယုံကြည်သူများအားကူညီခြင်း

၇။ ပေါလုဟောပြောခဲ့သောသတင်းကောင်းကို ဘာသာပြောင်းလာသူများ မည်သို့တုံ့ပြန်ခဲ့ကြသနည်း။

^၇ ဘာသာပြောင်းလာသူများသည် ယုဒဘာသာကိုကျင့်သုံးသော အရေဖျားလှီးထားသည့် ဂျူးမဟုတ်သူများဖြစ်ကြသည်။ သူတို့သည် ရောမ၊ ရှုရိပြည်အန္တိအုတ်မြို့၊ အီသီယိုးပီးယားနှင့် ပိသိဒိပြည် အန္တိအုတ်မြို့—အမှန်ပင် ဂျူးဒိုင်အာစပေါရားနယ်မြေတစ်ခွင်မှ ဘာသာပြောင်းလာသူဂျူးများဖြစ်ကြောင်းထင်ရှားသည်။ (တမန်တော် ၂:၈-၁၀; ၆:၅; ၈:၂၇; ၁၃:၁၄၊ ၄၃; မဿဲ ၂၃:၁၅ နှိုင်းယှဉ်။) ဂျူးအုပ်ချုပ်သူအများနှင့်မတူဘဲ ဘာသာပြောင်းလာသူများသည် မောက်မာမှုရှိကြဟန်မတူဘဲ အာဗြဟံမှဆင်းသက်ကြောင်း ဝါကြွား၍ဂုဏ်မယူနိုင်ကြပေ။ (မဿဲ ၃:၉; ယောဟန် ၈:၃၃) ယင်းအစား သူတို့သည် တိတ္ထိနတ်ဘုရားများကို စွန့်ပယ်ခဲ့ကြပြီး နှိမ့်ချစွာယေဟောဝါဘက်လှည့်လာကြကာ ကိုယ်တော်နှင့် ကိုယ်တော့်ပညတ်တော်ဆိုင်ရာအသိပညာတချို့ကို သိရှိလာခဲ့ကြသည်။ သို့ဖြင့် ဂျူးဆိုင်ရာမေရှိယကြွလာခြင်းမျှော်လင့်ချက်ကို သူတို့လက်ခံခဲ့ကြသည်။ သမ္မာတရားအတွက် မိမိတို့လေ့လာမှုများနှင့်အညီ ပြောင်းလဲဖို့ဆန္ဒရှိကြောင်းပြသကြပြီး အများစုသည် ပိုမို၍ပြောင်းလဲမှုများပြုလုပ်ဖို့ အဆင်သင့်ရှိကြကာ တမန်တော်ပေါလု၏ဟောပြောချက်များကို တုံ့ပြန်ခဲ့ကြသည်။ (တမန်တော် ၁၃:၄၂၊ ၄၃) တိတ္ထိဘုရားများကို တစ်ချိန်ကကိုးကွယ်ခဲ့သည့် ဘာသာပြောင်းလာသူတစ်ဦးသည် ခရစ်ယာန်ဘာသာတရားသို့ပြောင်းလာသောအခါ ထိုဘုရားများကိုဝတ်ပြုကိုးကွယ်နေသေးသည့် တခြားတစ်ပါးအမျိုးသားများကို သက်သေခံဖို့ ထူးခြားစွာတန်ဆာဆင်ခံရသည်။

၈၊ ၉။ (က) ဘာသာပြောင်းသူများအပြင် အခြားအဘယ်တစ်ပါးအမျိုးသားအတန်းအစားသည် ဂျူးဘာသာတရားသို့ဆွဲဆောင်ခံရကြသနည်း။ (ခ) အရေဖျားမလှီးသော ဘုရားသခင်ကိုကြောက်ရွံ့သူတို့ သတင်းကောင်းကို မည်သို့တုံ့ပြန်ခဲ့ကြသနည်း။

^၈ အရေဖျားလှီးခြင်းခံသည့် ဘာသာပြောင်းလာသူများအပြင် တခြားဂျူးမဟုတ်သူများသည် ဂျူးဘာသာတရားသို့ဆွဲဆောင်ခံခဲ့ကြရသည်။ ထိုသူများတွင် ပထမဆုံးခရစ်ယာန်ဖြစ်လာသူ ကော်နေလိသည် ဘာသာပြောင်းလာသူတစ်ဦးမဟုတ်သော်လည်း “ဘုရားဝတ်၌မွေ့လျော်၍ ဘုရားသခင်ကိုကြောက်ရွံ့ခြင်းရှိသောသူ” ဖြစ်သည်။ (တမန်တော် ၁၀:၂) ပရောဖက်ဆာ အက်ဖ်. အက်ဖ်. ဘရုစ်က တမန်တော်ကျမ်းနှင့်ပတ်သက်သော ၎င်း၏ဋီကာတွင် ဤသို့ရေးသားခဲ့သည်– “ထိုသို့သောတစ်ပါးအမျိုးသားများကို သာမန်အားဖြင့် ‘ဘုရားသခင်ကိုကြောက်ရွံ့သူတို့’ ဟုခေါ်ကြသည်; ယင်းသည်ပညာရပ်ဝေါဟာရတစ်ခုမဟုတ်သော်ငြားလည်း သင့်လျော်သောအသုံးအနှုန်းဖြစ်သည်။ ထိုခေတ်ရှိ တစ်ပါးအမျိုးသားအများသည် ယုဒဘာသာ (အရေဖျားလှီးခြင်းတောင်းဆိုချက်သည် အမျိုးသားများအတွက်အထူးအတားအဆီးတစ်ခုဖြစ်သည်) သို့ လုံးလုံးလျားလျားပြောင်းလာဖို့ပြင်ဆင်မထားကြသော်လည်း ဂျူးတရားဇရပ်ရှိဝတ်ပြုကိုးကွယ်မှုဆိုင်ရာ ရိုးရှင်းသောဘုရားသခင်တစ်ဆူတည်းရှိသည်ဟူသောအယူဝါဒနှင့် ဂျူးဆိုင်ရာဘဝလမ်းစဉ်၏ လူ့ကျင့်ဝတ်ဆိုင်ရာစံနှုန်းများအားဖြင့် ဆွဲဆောင်ခံရကြသည်။ သူတို့ထဲမှတချို့သည် တရားဇရပ်သို့တက်ရောက်ခဲ့ကြပြီး ဂရိဘာသာပြန်ကျမ်းဖြင့်ဖတ်ရွတ်ခြင်းမှ ကြားခဲ့ရသည့် ဆုတောင်းချက်များ၊ ကျမ်းစာသင်ခန်းစာများနှင့် အကျွမ်းတဝင်ဖြစ်လာခဲ့ကြသည်။”

^၉ တမန်တော်ပေါလုသည် အာရှမိုင်းနားနှင့် ဂရိတရားဇရပ်များတွင် သွန်သင်သောအခါ ဘုရားသခင်ကိုကြောက်ရွံ့သူအများအပြားနှင့်တွေ့ဆုံခဲ့သည်။ ပိသိဒိပြည်အန္တိအုတ်မြို့တွင် တရားဇရပ်၌ရှိနေကြသောသူများကို “ဣသရေလလူမှစ၍ ဘုရားသခင်ကိုကြောက်ရွံ့သောသူတို့” ဟုဖော်ပြခဲ့သည်။ (တမန်တော် ၁၃:၁၆၊ ၂၆) ပေါလုသည် သက်သာလောနိတ်မြို့တရားဇရပ်၌ သုံးဥပုသ်တိုင်ဟောပြောပြီးနောက် လုကာဤသို့ရေးသည်– “ထိုသူအချို့တို့ [ဂျူးများ] သည် ယုံကြည်ခြင်းသို့ရောက် [ခရစ်ယာန်များဖြစ်လာ] ၍၊ ပေါလု၊ သိလတို့နှင့်ပေါင်းဖော်ကြ၏။ ဘုရားကိုကိုးကွယ်သော ဟေလသလူအပေါင်းတို့နှင့် ထင်ရှားသောမိန်းမအများတို့လည်း ယုံကြည်ကြ၏။” (တမန်တော် ၁၇:၄) ဂရိအချို့သည် အရေဖျားမလှီးသည့် ဘုရားသခင်ကိုကြောက်ရွံ့သူများဖြစ်ခဲ့ပုံရသည်။ ထိုသို့သောတစ်ပါးအမျိုးသားအများစုသည် ဂျူးအသိုင်းအဝိုင်းများနှင့်ပေါင်းသင်းခဲ့ကြသည့် အထောက်အထားများရှိသည်။

“မယုံကြည်သူတို့” အလယ်တွင် ဟောပြောခြင်း

၁၀။ ကျမ်းစာနောက်ခံမရှိသော တစ်ပါးအမျိုးသားများကို ပေါလုမည်သို့ဟောပြောခဲ့ပြီး ရလဒ်ကားအဘယ်နည်း။

^၁၀ ခရစ်ယာန်ဂရိကျမ်းစာစောင်များတွင် “မယုံကြည်သူတို့” ဟူသောစကားလုံးကို ခရစ်ယာန်အသင်းတော်ပြင်ပရှိ ယေဘုယျလူတို့ကို ရည်ညွှန်းနိုင်သည်။ တစ်ခါတစ်ရံ တိတ္ထိများကို ရည်ညွှန်းလေ့ရှိသည်။ (ရောမ ၁၅:၃၁; ၁ ကောရိန္သု ၁၄:၂၂၊ ၂၃; ၂ ကောရိန္သု ၄:၄; ၆:၁၄) အေသင်တွင် မယုံကြည်သူအများအပြားသည် ကျမ်းစာနောက်ခံလုံးဝမရှိသော ဂရိအတွေးအခေါ်တွင် ပညာသင်ယူခဲ့ကြသည်။ ယင်းကြောင့် သူတို့ကိုသက်သေခံရန် ပေါလုစိတ်ပျက်သွားခဲ့သလော။ စိတ်မပျက်ခဲ့ပါ။ သို့ရာတွင် သူ၏ချဉ်းကပ်ပုံကို ပြောင်းလဲခဲ့သည်။ အေသင်မြို့သားများထံသို့ ၎င်းတို့မသိသော ဟေဗြဲကျမ်းစာစောင်များမှ တိုက်ရိုက်မကိုးကားဘဲ ကျမ်းစာအယူဝါဒများကို ကျွမ်းကျင်လိမ္မာစွာ တင်ဆက်ခဲ့သည်။ ကျမ်းစာသမ္မာတရားနှင့် ရှေးသတောအိတ်ကဗျာများ၌ဖော်ပြထားသော အချို့အတွေးအခေါ်များ၏ ဆင်တူမှုများကို ကျွမ်းကျင်စွာဖော်ပြခဲ့သည်။ ထို့နောက် လူသားအားလုံးအတွက် တစ်ဆူတည်းသော စစ်မှန်သည့်ဘုရားသခင်အယူအဆ၊ သေလွန်ခဲ့ပြီး ရှင်ပြန်ထမြောက်ခဲ့သောသူတစ်ဦးအားဖြင့် ဖြောင့်မတ်စွာတရားစီရင်မည့် ဘုရားသခင်အကြောင်း တင်ဆက်ခဲ့သည်။ သို့ဖြင့် ပေါလုသည် လိမ္မာပါးနပ်စွာဖြင့် အေသင်မြို့သားများထံ ခရစ်တော်၏အကြောင်းကို ဟောပြောနိုင်ခဲ့သည်။ ရလဒ်ကားအဘယ်နည်း။ အများစုသည် သူ၏ရှေ့တွင်ပွင့်လင်းစွာကဲ့ရဲ့ကြ သို့မဟုတ် ယုံမှားသံသယရှိခဲ့ကြသော်လည်း “လူအချို့တို့သည် ပေါလု၌မှီဝဲဆည်းကပ်၍ ယုံကြည်ခြင်းသို့ရောက်ကြ၏။ ထိုသူတို့အဝင်ဒယောနုသိအမည်ရှိသော အာရေတောင်မင်းတစ်ယောက်၊ ဒမာရိအမည်ရှိသောမိန်းမတစ်ယောက်မှစ၍ အခြားသောသူရှိကြ၏။”—တမန်တော် ၁၇:၁၈၊ ၂၁-၃၄။

၁၁။ ကောရိန္သုမြို့သည် မည်သို့သောမြို့မျိုးဖြစ်ပြီး ထိုမြို့တွင် ပေါလု၏ဟောပြောခြင်းလုပ်ငန်း၏ရလဒ်ကားအဘယ်နည်း။

^၁၁ ကောရိန္သုမြို့တွင် အတော်အတန်ကြီးမားသောဂျူးရပ်ကွက်တစ်ခုရှိသည့်အတွက် ပေါလုသည် တရားဇရပ်တွင်ဟောပြောခြင်းဖြင့် ထိုနေရာတွင် သူ၏ဓမ္မအမှုကိုစတင်ခဲ့သည်။ သို့ရာတွင် ဂျူးများသည် ဆန့်ကျင်ကြသောအခါ တစ်ပါးအမျိုးသားတို့ထံသို့ ပေါလုထွက်သွားခဲ့သည်။ (တမန်တော် ၁၈:၁-၆) တကယ့် လူများပင်! ကောရိန္သုမြို့သည် ပျားပန်းခပ်မျှ ကမ္ဘာအနှံ့မှကူးသန်းရောင်းဝယ်ရေးမြို့၊ ဂရိကို-ရောမကမ္ဘာတစ်ခွင်တွင် အကျင့်ပျက်မှုဖြင့် နာမည်ဆိုးတွင်သည့် မြို့ဖြစ်သည်။ အမှန်တွင် “ကောရိန္သုမှုပြု” ဆိုရာတွင် အကျင့်ပျက်စွာပြုမူသည်ဟူ၏။ သို့တိုင် ပေါလု၏ဟောပြောခြင်းကို ဂျူးများငြင်းပယ်ခဲ့ပြီးနောက် ခရစ်တော်သည် သူ့အား အဆင်းအာရုံကိုပြ၍ ဤသို့ပြောခဲ့သည်– “မကြောက်နှင့်။ ဟောပြောလော့။ . . . ဤမြို့၌ငါ၏လူအများရှိကြသည်။” (တမန်တော် ၁၈:၉၊ ၁၀၊) အမှန်ပင်ဖြစ်ခဲ့ပါသည်၊ ပေါလုသည် ကောရိန္သုမြို့၌ အသင်းတော်တစ်ခုကိုတည်ထောင်ခဲ့ရာ ယင်းအသင်းဝင်များအချို့သည် ယခင်က “ကောရိန္သုမြို့သား” ဘဝပုံစံရှိသောသူများဖြစ်ခဲ့ကြသည်။—၁ ကောရိန္သု ၆:၉-၁၁။

ယနေ့ “လူမျိုးအားလုံးတို့” ကို ကယ်တင်ရန် ကြိုးစားခြင်း

၁၂၊ ၁၃။ (က) ယနေ့ကျွန်ုပ်တို့ရပ်ကွက်သည် ပေါလုခေတ်နှင့် မည်သို့ဆင်တူသနည်း။ (ခ) ခရစ်ယာန်ဘောင်ဘာသာများ ကြာမြင့်စွာတည်ထောင်ခဲ့သော သို့မဟုတ် ဖွဲ့စည်းထားသောဘာသာတရား ဟုတ်တိုင်းမှန်ရာမြင်လာသော သူအများရှိသည့်ရပ်ကွက်များတွင် အဘယ်သဘောထားမျိုးကိုကျွန်ုပ်တို့ပြရမည်နည်း။

^၁၂ ယနေ့တွင် ပထမရာစု၌ကဲ့သို့ ‘ဘုရားသခင်၏ကျေးဇူးတော်သည် လူအပေါင်းတို့ကိုကယ်တင်’ သည်။ (တိတု ၂:၁၃) သတင်းကောင်းဟောပြောခြင်းအတွက်နယ်ပယ်ကို တိုက်ကြီးများအားလုံးနှင့် အဏ္ဏဝါပြင်မှကျွန်းအများစုသို့ တိုးချဲ့ခဲ့သည်။ သို့ဖြင့် ပေါလုခေတ်၌ကဲ့သို့ “လူမျိုးအပေါင်းတို့” ကို အမှန်ပင်တွေ့ဆုံခဲ့ကြသည်။ ဥပမာ ကျွန်ုပ်တို့ထဲမှတချို့သည် ခရစ်ယာန်ဘောင်ချာ့ချ်များ ရာစုနှစ်ပေါင်းများစွာတည်ထောင်ပြီးဖြစ်သည့်နယ်မြေများတွင် ဟောပြောကြသည်။ ပထမရာစုဂျူးများကဲ့သို့ သူတို့အသင်းသားများသည် ဘာသာရေးထုံးတမ်းစဉ်လာများဖြင့် ခိုင်မြဲစွာချည်နှောင်ခံရပေမည်။ သို့တိုင် နှလုံးအခြေအနေကောင်းသူများကိုရှာဖွေပြီး သူတို့တွင်ရှိထားသောကျမ်းစာအသိပညာအပေါ် တည်ဆောက်ပေးခြင်းကို ကျွန်ုပ်တို့ပျော်ရွှင်ကြသည်။ တစ်ခါတစ်ရံ သူတို့ဘာသာရေးခေါင်းဆောင်များ၏ဆန့်ကျင်မှုနှင့် နှိပ်စက်ညှဉ်းပန်းမှုများကိုကြုံရလင့်ကစား ကျွန်ုပ်တို့သည် သူတို့ကိုရှုတ်ချပြောဆိုဖို့ သို့မဟုတ် သူတို့ကိုအထင်အမြင်သေးဖို့ မဟုတ်ပါ။ ယင်းအစား မှန်သောပညာမရှိကြသော်လည်း ထိုသူများထဲမှတချို့သည် “ဘုရားသခင်ဘက်၌စိတ်အားကြီး” နိုင်ကြောင်း ကျွန်ုပ်တို့အသိအမှတ်ပြုကြသည်။ ယေရှုနှင့်ပေါလုကဲ့သို့ ကျွန်ုပ်တို့သည်လူတို့ကိုစစ်မှန်သောမေတ္တာပြသကြပြီး သူတို့ကယ်တင်ခံရဖို့ ကျွန်ုပ်တို့သည်စိတ်အားထက်သန်မှုရှိကြသည်။—ရောမ ၁၀:၂။

^၁၃ ဟောပြောစဉ်တွင် ကျွန်ုပ်တို့အများစုသည် ဖွဲ့စည်းထားသောဘာသာတရားအပေါ် ဟုတ်တိုင်းမှန်ရာ သိမြင်လာသောသူများကို တွေ့ကြုံကြသည်။ သူတို့သည် ဘုရားသခင်ကိုကြောက်ရွံ့နေဆဲဖြစ်နိုင်ပြီး တစ်စုံတစ်ခုသောအတိုင်းအတာအထိ ဘုရားသခင်ကိုယုံကြည်ကာ ကောင်းသောအသက်တာဖြင့်နေထိုင်ဖို့ ကြိုးစားနေသူများဖြစ်နိုင်သည်။ ဤသို့ရှုပ်ထွေးပြီး တိုးများလျက်ရှိသောဘုရားတရားမဲ့လူမျိုးဆက်အတွင်း ဘုရားသခင်၌ယုံကြည်ခြင်းရှိသူအချို့ကို တွေ့ရခြင်းအား ကျွန်ုပ်တို့ဝမ်းမမြောက်သင့်ပေလော။ ဟန်ဆောင်ခြင်းနှင့် မှောက်မှားမှုမရှိသော ဝတ်ပြုမှုပုံစံတစ်ခုသို့ သူတို့ကိုလမ်းညွှန်ဖို့ ကျွန်ုပ်တို့စိတ်အားမထက်သန်ပေလော။—ဖိလိပ္ပိ ၂:၁၅၊ ၁၆။

၁၄၊ ၁၅။ သတင်းကောင်းဟောပြောခြင်းအတွက် ကြီးမားသောလယ်ကွင်းတစ်ခု မည်သို့ရရှိလာနိုင်သနည်း။

^၁၄ ပိုက်ကွန်ဆိုင်ရာကိုယ်တော်၏ပုံဥပမာတွင် ဟောပြောခြင်းလုပ်ငန်းအတွက် ကြီးမားသောရပ်ကွက်တစ်ခုရှိမည်ကို ယေရှုကြိုပြောခဲ့သည်။ (မဿဲ ၁၃:၄၇-၄၉) ဤဥပမာကိုရှင်းလင်းရာတွင် ၁၉၉၂၊ ဇွန် ၁၅ ကင်းမျှော်စင် စာမျက်နှာ ၁၆ တွင်ဖော်ပြသည်မှာ “ခရစ်ယာန်ဘောင်အသင်းသားများသည် ဘုရားသခင့်နှုတ်ကပါဌ်တော်ကို ဘာသာပြန်ဆို၊ ကူးရေး၍ထုတ်ဝေဖြန့်ဖြူးရေးတွင် အဓိကကဏ္ဍ၌ပါဝင်ဆောင်ရွက်ခဲ့ပေပြီ။ နောက်ပိုင်းတွင် လူသူအရောက်နည်းသောတိုင်းနိုင်ငံများ၏ ဘာသာစကားများဖြင့် ကျမ်းစာပြန်ဆိုပေးသောကျမ်းစာအသင်းများကို အသင်းတော်များကတည်ထောင်၍ ထောက်ပံ့ကူညီပေးခဲ့သည်။ ထို့ပြင်ကာယအကျိုးရ၍ခရစ်ယာန်ဖြစ်လာစေသည့် ဆေးဘက်ဆိုင်ရာသာသနာပြုများနှင့် ဆရာသမားများကိုလည်းစေလွှတ်သေးသည်။ ယင်းသည် ဘုရားသခင်မျက်နှာသာမရသော မကောင်းသည့်ငါးအထောင်အသောင်းတို့ကို စုစည်းပေးခဲ့သည်။ မည်သို့ဆိုစေ၊ ယင်းသည်ခရစ်ယာန်မဟုတ်သူသန်းပေါင်းများစွာတို့အား သမ္မာကျမ်းစာနှင့် ဖောက်ပြန်သောခရစ်ယာန်ဘာသာတရားအမျိုးအစားတစ်ခုကိုမူ သိရှိလာစေသည်။”

^၁၅ တောင်အမေရိက၊ အာဖရိကနှင့် အဏ္ဏဝါပြင်မှကျွန်းအချို့တွင် ခရစ်ယာန်ဘောင်၏ဘာသာသွင်းခြင်းသည် အထူးပင်ထိရောက်လျက်ရှိသည်။ ကျွန်ုပ်တို့ခေတ်တွင် နူးညံ့သိမ်မွေ့သောသူများကို ထိုနေရာများတွင်တွေ့ရှိခဲ့ကြပြီး ဂျူးဘာသာဝင်များအပေါ်ပေါလု၏သဘောထားကဲ့သို့ ထိုသို့သောနှိမ့်ချသူများအပေါ် ကျွန်ုပ်တို့သည်အပြုသဘောရှိပြီး မေတ္တာပါသောသဘောထားရှိပါက ကောင်းမှုများစွာကို ကျွန်ုပ်တို့ဆက်၍ပြုနိုင်မည်။ ကျွန်ုပ်တို့၏အကူအညီလိုနေသူများထဲတွင် ယေဟောဝါသက်သေများအပေါ် “ကိုယ်ချင်းစာနာတတ်သောသူတို့” ဟုဆိုနိုင်သည့် သန်းနှင့်ချီသောသူများလည်း ရှိကြသည်။ ကျွန်ုပ်တို့သွားရောက်လည်ပတ်သောအခါ ကျွန်ုပ်တို့ကိုတွေ့ရခြင်းအား သူတို့အမြဲနှစ်သက်လိုလားကြသည်။ အချို့သည် ကျွန်ုပ်တို့နှင့်ကျမ်းစာသင်အံခဲ့ကြပြီး ကျွန်ုပ်တို့၏အစည်းအဝေးများ၊ အထူးသဖြင့် ခရစ်တော်၏သေခြင်းအောက်မေ့ရာပွဲကို နှစ်စဉ်တက်ရောက်ခဲ့ကြသည်။ ထိုသို့သောသူများသည် ဘုရားသခင့်နိုင်ငံတော်သတင်းကောင်းဟောပြောရန်အတွက် ကြီးစွာသောလယ်ကွင်းရှိကြောင်းကို ကိုယ်စားမပြုပေလော။

၁၆၊ ၁၇။ (က) အဘယ်လူစားမျိုးကို သတင်းကောင်းဖြင့် ကျွန်ုပ်တို့ချဉ်းကပ်ကြသနည်း။ (ခ) လူအမျိုးမျိုးအဖုံဖုံထံသို့ ဟောပြောခြင်းတွင် ကျွန်ုပ်တို့သည် ပေါလုကိုမည်သို့တုပမည်နည်း။

^၁၆ ထို့အပြင်၊ ခရစ်ယာန်ဘောင်အပြင်ဘက် ယဉ်ကျေးမှုများမှပေါက်ဖွားလာသူများ—သူတို့၏မွေးရပ်ဌာနေတွင်တွေ့ရသည်ဖြစ်စေ၊ အနောက်တိုင်းနိုင်ငံများသို့ ပြောင်းရွှေ့လာသူဖြစ်စေ—သူတို့ကောအသို့နည်း။ ဘာသာရေးကိုလုံးလုံးကျောခိုင်းစွန့်ခွာကာ ဘုရားမဲ့ဝါဒီ သို့မဟုတ် မသိဝါဒီဖြစ်လာကြသည့်သန်းပေါင်းများစွာသောသူများနှင့်ပတ်သက်၍ကောအသို့နည်း။ စာအုပ်ဆိုင်များ၌တွေ့ရသည့် ကိုယ့်ဘာသာကိုယ်အကူအညီရယူသော စာအုပ်များစွာတွင်ထုတ်ဝေထားသော ခေတ်သစ်ဒဿနိကဗေဒ သို့မဟုတ် ခေတ်ပေါ်စိတ္တဗေဒတို့ကို ဘာသာတရားအဖြစ်ထက်သန်စွာလိုက်လျှောက်ကြသောသူများနှင့်ပတ်သက်၍ကောအသို့နည်း။ ထိုသို့သောသူများကို ကယ်တင်ခြင်းမရနိုင်သူများဟုယူဆပြီး ရှောင်ဖယ်လျစ်လျူရှုသင့်သလော။ ကျွန်ုပ်သည်တမန်တော်ပေါလုကို တုပနေပါက ထိုသို့ပြုမည်မဟုတ်ပေ။

^၁၇ အေသင်တွင်ဟောပြောသောအခါ ပေါလုသည် သူ၏ပရိသတ်များနှင့် ဒဿနိကဗေဒဆွေးနွေးငြင်းခုံခြင်း၏ကျော့ကွင်းသို့ ကျမသွားခဲ့ပေ။ သို့သော်ငြားလည်း သူဟောပြောနေသည့်လူတို့အတွက် သူ၏ဆင်ခြင်သုံးသပ်မှုကို ပြုပြင်ခဲ့ပြီး ရှင်းလင်းပြတ်သား၊ ယုတ္တိရှိသောနည်းဖြင့် ကျမ်းစာသမ္မာတရားများကိုတင်ဆက်ခဲ့သည်။ ထို့နည်းတူစွာ လူတို့ကိုဟောပြောဖို့အတွက် ဘာသာတရားများ သို့မဟုတ် စိတ္တဗေဒများတွင် ကျွမ်းကျင်သူများဖြစ်လာရန်မလိုပေ။ သို့ရာတွင် ကျွန်ုပ်တို့၏သက်သေခံခြင်းကို ထိရောက်စေရန် ကျွန်ုပ်တို့၏ချဉ်းကပ်ပုံကို ပြောင်းလဲမည်၊ သို့ဖြင့် “ခပ်သိမ်းသောသူတို့၌ ခပ်သိမ်းသောအရာ” ဖြစ်လာကြမည်။ (၁ ကောရိန္သု ၉:၂၂) ကောလောသဲမှ ခရစ်ယာန်များထံစာရေးရာတွင် ပေါလု ဤသို့ဖော်ပြခဲ့သည်– “ပြင်ပလူတို့၏မျက်နှာကိုထောက်လျက်၊ ပညာနှင့်ကျင့်ဆောင်၍ ကာလအချိန်ကိုရွေးနုတ်ကြလော့။ လူအသီးသီးတို့အား အဘယ်သို့ပြန်ပြောရမည်ကိုသိနိုင်မည်အကြောင်း၊ သင်တို့စကားသည် ဆားအားဖြင့်ငန်သောအရသာနှင့် ပြည့်စုံလျက်၊ အစဉ်မပြတ်တင့်တယ်လျောက်ပတ်ပါစေ။”—ကောလောသဲ ၄:၅၊ ၆။

၁၈။ ကျွန်ုပ်တို့သည်အဘယ်တာဝန်ကို ရရှိထားကြပြီး အဘယ်အရာကို ကျွန်ုပ်တို့ဘယ်တော့မျှမမေ့သင့်သနည်း။

^၁၈ ယေရှုနှင့် တမန်တော်ပေါလုကဲ့သို့ လူအပေါင်းတို့အား မေတ္တာပြကြစို့။ အထူးသဖြင့် ဘုရားသခင့်နိုင်ငံတော်သတင်းကောင်းကို အခြားသူများအားဝေမျှဖို့ ကြိုးပမ်းကြစို့။ အခြားတစ်ဖက်တွင် မိမိ၏တပည့်တော်များနှင့်ပတ်သက်၍ ယေရှုပြောခဲ့သောစကားကို ဘယ်တော့မျှမမေ့လိုက်လေနှင့်– “သူတို့သည်ဤလောကနှင့်မဆက်ဆံကြပါ။” (ယောဟန် ၁၇:၁၆) ယင်းသည်ကျွန်ုပ်တို့အတွက် အဘယ်အဓိပ္ပာယ်ရှိကြောင်းကို နောက်ဆောင်းပါးတွင်သုံးသပ်ကြမည်။

ပြန်လည်သုံးသပ်ခြင်းဖြင့်

◻ လောကနှင့်ပတ်သက်၍ ယေရှု၏မျှတသောသဘောထားကိုဖော်ပြပါ။

◻ တမန်တော်ပေါလုသည် ဂျူးများနှင့် ဘာသာပြောင်းလာသူများကို မည်သို့ဟောပြောခဲ့သနည်း။

◻ ပေါလုသည် ဘုရားသခင်ကိုကြောက်ရွံ့သူတို့နှင့် မယုံကြည်သူတို့ကို မည်သို့ချဉ်းကပ်ခဲ့သနည်း။

◻ ကျွန်ုပ်တို့၏ဟောပြောခြင်းလုပ်ဆောင်မှုတွင် ကျွန်ုပ်တို့သည် “ခပ်သိမ်းသောသူတို့၌ ခပ်သိမ်းသောအရာ” မည်သို့ဖြစ်နိုင်မည်နည်း။

[စာမျက်နှာ ၁၀ ပါ ရုပ်ပုံ]

ကိုယ်နှင့်စပ်ဆိုင်သူအပေါ် ကြင်နာမှုလုပ်ရပ်ကိုပြခြင်းဖြင့် ခရစ်ယာန်များသည် စိတ်စွန်းကွက်မှုများကို ပယ်ဖျက်ပစ်နိုင်သည်