ခရစ္စမတ်တွင် ခရစ်တော်ပျောက်ဆုံးနေပြီလော

“ခရစ္စမတ်အချိန်မှာကျင်းပတဲ့ ပျော်ပွဲရွှင်ပွဲတွေကို ကျွန်တော်တစ်ခါမှ လက်မခံနိုင်ခဲ့ဘူး။ အဲဒါတွေဟာ ယေရှုရဲ့ဘဝ၊ ယေရှုရဲ့သွန်သင်ချက်တွေနဲ့ လုံးဝမကိုက်ညီဘူးလို့ ကျွန်တော်ထင်တယ်။”

—မိုဟန်ဒပ်စ်ကေ. ဂန္ဒီ။

ဂန္ဒီနှင့် သဘောမတူသူများစွာရှိမည်။ ‘ဟိန္ဒူနိုင်ငံ့ခေါင်းဆောင်တစ်ဦးက ခရစ္စမတ်ပွဲနေ့အကြောင်း ဘယ်သိပါ့မလဲ’ ဟုသူတို့တွေးဆကြပေမည်။ သို့သော် ခရစ္စမတ်သည် ကမ္ဘာအနှံ့ ယဉ်ကျေးမှုအသီးသီးသို့ ဩဇာသက်ရောက်လျက်ရှိပြီဟုဝန်ခံရမည်။ ဒီဇင်ဘာရောက်တိုင်း ထိုပွဲနေ့သည် နေရာတကာသို့ပျံ့နှံ့နေပုံရသည်။

သာဓကအနေနှင့် အာရှတိုက်သား ၁၄၅ သန်းခန့်သည် ခရစ္စမတ်ကိုကျင်းပကြ၏။ ယင်းမှာ လွန်ခဲ့သောဆယ်စုနှစ်ထက် သန်း ၄၀ ပိုများလာခြင်းဖြစ်သည်။ “ပျော်ပွဲရွှင်ပွဲများ” ဟုဂန္ဒီပြောသည့်အခါ သူက မျက်မှောက်ခေတ်ခရစ္စမတ်ပွဲ၏ ဘာသာရေးမဆန်သည့်အသွင်၊ ကျွန်ုပ်တို့အားလုံးသတိပြုမိကြသည့် ဆူပူသောင်းကျန်းစွာ စားသောက်ပျော်မြူးခြင်းကိုဆိုလိုနေပါက ထိုပွဲလမ်းသဘင်၏ ဤအပိုင်းသည် အထင်ရှားဆုံးဖြစ်ကြောင်းကို မည်သူမျှမငြင်းနိုင်ပါ။ အေးရှားဝိခ် မဂ္ဂဇင်းကဤသို့ကောက်ချက်ချသည်– “အာရှတွင်ကျင်းပသော ခရစ္စမတ်ပွဲ—ဟောင်ကောင်တွင် ရောင်စုံမီးများထွန်းညှိ၍ ဘေဂျင်းမြို့၌ ဟိုတယ်တွင် မြင့်မားသောခရစ္စမတ်သစ်ပင်များမှအစ စင်ကာပူမြို့လယ်တွင် သူငယ်တော်ဖွားမြင်သည့်မြင်ကွင်းကို ဆင်ယင်ထားခြင်းအထိ—ဘာသာရေးမဆန်သော (အဓိကအားဖြင့်ဈေးရောင်းပွဲ) ပွဲလမ်းများဖြစ်သည်။”

မျက်မှောက်ခေတ် ခရစ္စမတ်ပွဲကျင်းပမှုသည် ခရစ်တော်ကိုမျက်ခြည်ပြတ်ခဲ့ပြီလော။ ရိုမန်ကက်သလစ်ချာ့ချ်က ဒီဇင်ဘာ ၂၅ ရက်နေ့ကို ယေရှုမွေးဖွားခြင်း၏ ဘာသာရေးအခမ်းအနားကျင်းပရာနေ့အဖြစ် သတ်မှတ်သော စီ.အီး. လေးရာစုကတည်းက ထိုနေ့ရက်တွင် တရားဝင်ပွဲခံလာခဲ့သည်။ သို့သော် အမေရိကန်ပြည်ထောင်စုတွင် မကြာသေးမီက ကောက်ခံရရှိသည့်မဲစာရင်းအရ မဲထည့်သူ ၃၃ ရာခိုင်နှုန်းသာလျှင် ယေရှုမွေးဖွားခြင်းကို ခရစ္စမတ်၏အရေးကြီးဆုံးကဏ္ဍအဖြစ် ယူမှတ်ခဲ့ကြသည်။

သင်မည်သို့ထင်သနည်း။ အားကြိုးမာန်တက်ကြော်ငြာခြင်း၊ လက်ဆောင်များကို အပြေးအလွှားဝယ်ယူကြခြင်း၊ သစ်ပင်များကိုဆင်ယင်ခြင်း၊ ပါတီပွဲများကိုစီစဉ်၍ တက်ရောက်ကြခြင်း၊ ကတ်များကိုပေးပို့ကြခြင်းတို့ကို ပြုလုပ်နေကြစဉ် ယေရှုကိုတစ်နည်းနည်းဖြင့် ချန်လှပ်ထားသည်ဟု တစ်ခါတစ်ရံသင်ခံစားရသလော။

ခရစ္စမတ်ကျင်းပရာတွင် ခရစ်တော်ကိုပြန်လည်ပါဝင်စေသည့်နည်းတစ်နည်းမှာ သူငယ်တော်ဖွားမြင်ရာမြင်ကွင်းကို ဆင်ယင်ထားခြင်းဖြစ်သည်ဟု လူအများယူဆပုံပေါ်သည်။ နွားစားခွက်ထဲမှသူငယ်တော်ယေရှုကို မာရိ၊ ယောသပ်၊ သိုးထိန်းအချို့၊ “ပညာရှိသုံးဦး” သို့မဟုတ် “မင်းကြီးသုံးပါး၊” လယ်ယာသုံးတိရစ္ဆာန်အချို့နှင့် ဘေးမှရပ်ကြည့်သူအချို့တို့ ဝိုင်းရံနေကြသည့် ပန်းပုရုပ်ငယ်လေးများမြင်ကွင်းကို သင်မြင်ဖူးပေမည်။ ဤမြင်ကွင်းသည် ခရစ္စမတ်၏အဓိပ္ပာယ်မှန်ကို လူတို့အားပြန်သတိရစေသည်ဟု ယူဆလေ့ရှိကြသည်။ ယူ.အက်စ်. ကက်သလစ်မဂ္ဂဇင်းအရ “သူငယ်တော်ဖွားမြင်ရာမြင်ကွင်းသည် မည်သည့်ခရစ်ဝင်ကျမ်းထက်မဆို ပိုပီပြင်စွာသရုပ်ဖော်နိုင်သည်မှန်သော်လည်း ယင်းဖော်ပြချက်များ၏ သမိုင်းမဝင်သောအပိုင်းကိုလည်း အထူးဖော်ပြနေပေသည်” ဟုဆိုသည်။

သို့သော် သူငယ်တော်ဖွားမြင်ရာမြင်ကွင်းက သမ္မာကျမ်းစာမှ ခရစ်ဝင်ကျမ်းတွင်ပါသောမှတ်တမ်းသည် သမိုင်းဝင်မဟုတ်သယောင် မည်သို့သက်ရောက်စေသနည်း။ ယင်းချစ်စရာကောင်းသောပန်းပုရုပ်လေးများသည် ခရစ်တော်မွေးဖွားခြင်းကို ဒဏ္ဍာရီဆန်သွားစေကြောင်း ဝန်ခံရပေမည်။ ၁၃ ရာစုမှ ဘုန်းတော်ကြီးတစ်ပါး ဦးဆုံးရေပန်းစားစေခဲ့သည့် သူငယ်တော်ဖွားမြင်ရာမြင်ကွင်းသည် တစ်ကြိမ်က ရိုးရိုးသာဖြစ်သည်။ ယနေ့ ဤအားလပ်ရက်နှင့်ဆက်စပ်သည့် အခြားအရာများစွာနည်းတူ သူငယ်တော်ဖွားမြင်ရာမြင်ကွင်းများသည် အလွန်စီးပွားကောင်းသော လုပ်ငန်းကြီးတစ်ခုဖြစ်လာပေပြီ။ အီတလီနိုင်ငံ၊ နေပယ်မြို့မှဆိုင်တန်းများတွင် သူငယ်တော်ဖွားမြင်ရာမြင်ကွင်း သို့မဟုတ် ပရယ်ဇဲပီရုပ်ကြွများကို တစ်နှစ်ပတ်လုံးရောင်းချကြသည်။ လူအများသာ၍ကြိုက်သည့်ရုပ်ကြွများမှာ ခရစ်ဝင်ကျမ်းမှတ်တမ်းများထဲမှ ပုဂ္ဂိုလ်များမဟုတ်ဘဲ ဒိုင်ယာနာမင်းသမီး၊ မာသာထရီဇာနှင့် အဝတ်အထည်ပုံစံပြုသူ ဂျန်းနီ ဗဲရ်စားချေစသည့် မျက်မှောက်ခေတ်အကျော်အမော်များဖြစ်သည်။ အခြားနေရာများတွင် ပရယ်ဇဲပီကို ချော့ကလက်၊ ပါစတာတို့အပြင် ကနုကမာများဖြင့်ပင် သရုပ်ဖော်ထားကြသည်။ ယင်းသို့သောဖော်ပြချက်များ၌ သမိုင်းကို အဘယ်ကြောင့်တွေ့ခဲကြောင်း သဘောပေါက်နိုင်ပါသည်။

သို့ဖြစ်လျှင် ထိုသို့သောသူငယ်တော်ဖွားမြင်ရာမြင်ကွင်းများသည် အဘယ်နည်းဖြင့် “မည်သည့်ခရစ်ဝင်ကျမ်းထက်မဆို ပိုပီပြင်စွာသရုပ်ဖော်နိုင်” မည်နည်း။ ခရစ်ဝင်ကျမ်းတွင်ပါသောမှတ်တမ်းများသည် စစ်မှန်သည့်သမိုင်းဝင်အဖြစ်အပျက်မဟုတ်ပေလော။ ယေရှုသည် တကယ့်သမိုင်းဝင်ပုဂ္ဂိုလ်တစ်ပါးဖြစ်ကြောင်းကို စိတ်နှလုံးခိုင်မာသော သံသယဝင်သူများပင် ဝန်ခံရလိမ့်မည်။ ထို့ကြောင့် ကိုယ်တော်သည် တစ်ကြိမ်က တကယ့်နေရာတစ်ခုတွင် မွေးဖွားခဲ့သော တကယ့်သူငယ်တစ်ဦးဖြစ်ခဲ့ရမည်။ သူငယ်တော်ဖွားမြင်ရာမြင်ကွင်းကို ငေးကြည့်နေရုံမျှထက် ကိုယ်တော်မွေးဖွားခြင်းနှင့်စပ်လျဉ်းသည့် အဖြစ်အပျက်များကို ပိုမိုပီပြင်စွာသရုပ်ဖော်နိုင်သည့် သာ၍ကောင်းသောနည်းတစ်ခုရှိသင့်သည်!

အမှန်ရှိပါသည်။ ယေရှုမွေးဖွားခြင်းအကြောင်းကို သမိုင်းဆရာနှစ်ဦးက သီးခြားမှတ်တမ်းများရေးသားခဲ့သည်။ ခရစ္စမတ်အချိန်တွင် ခရစ်တော်သည် များသောအားဖြင့် လျစ်လျူရှုခံရသည်ဟု သင်တစ်ခါတစ်ရံယူဆမည်ဆိုလျှင် ဤမှတ်တမ်းများကို ကိုယ်တိုင်စစ်ဆေးကြည့်ပါ။ ထိုမှတ်တမ်းများတွင် ဒဏ္ဍာရီပုံပြင်များကိုမဟုတ်ဘဲ ဆွဲဆောင်မှုရှိသောဇာတ်လမ်း—ခရစ်တော်မွေးဖွားခြင်း၏ ဖြစ်ရပ်မှန်ဇာတ်လမ်းကို သင်တွေ့ရပါလိမ့်မည်။

[Picture Credit Line on page 3]

စာမျက်နှာ ၃-၆၊ ၈ နှင့် ၉ တို့၏အနားသတ်လက်ရာ– Fifty Years of Soviet Artနှစ် ၅၀ တိုင် ဆိုဗီယက်အနုပညာ