စာရှုသူများထံမှ မေးခွန်းလွှာ

ဆန္ဒမဲပေးခြင်းကို ယေဟောဝါသက်သေများ မည်သို့ရှုမြင်ကြသနည်း။

ယင်းကိစ္စနှင့်ပတ်သက်၍ ဘုရားသခင့်ကျေးကျွန်များ၌ လျောက်ပတ်သည့်အမြင်မျိုးရှိနိုင်ရန် သမ္မာကျမ်းစာတွင် ရှင်းလင်းသည့်မူများကို ဖော်ပြထားသည်။ သို့ရာတွင် ဆန္ဒမဲပေးခြင်းကို ဆန့်ကျင်သည့်မူရှိပုံမရချေ။ ဥပမာ၊ ညွှန်ကြားရေးမှူးများအဖွဲ့တွင် သူတို့၏ကော်ပိုရေးရှင်းနှင့်ပတ်သက်ပြီး ဆုံးဖြတ်ချက်ချရန် ဆန္ဒမဲမပေးသင့်ဟူ၍ အကြောင်းပြချက်မရှိပါ။ ယေဟောဝါသက်သေများ၏ အသင်းတော်များတွင် အစည်းအဝေးအချိန်များနှင့် အသင်းတော်၏ရန်ပုံငွေများ အသုံးပြုခြင်းတို့နှင့်ပတ်သက်ပြီး လက်ထောင်၍ ဆန္ဒမဲပေးခြင်းအားဖြင့် ဆုံးဖြတ်ချက်ချလေ့ရှိသည်။

သို့သော် နိုင်ငံရေးရွေးကောက်ပွဲများတွင် ဆန္ဒမဲပေးခြင်းနှင့်ပတ်သက်၍ကော အသို့နည်း။ ဒီမိုကရေစီနိုင်ငံအချို့၌ လူဦးရေ ၅၀ ရာခိုင်နှုန်းခန့်ပင် ရွေးကောက်ပွဲနေ့တွင် ဆန္ဒမဲထည့်ရန် မရောက်ရှိလာကြချေ။ ယေဟောဝါသက်သေများမူကား အခြားသူများ၏ ဆန္ဒမဲပေးခွင့်ကို ဝင်မစွက်ဖက်ကြချေ၊ နိုင်ငံရေးရွေးကောက်ပွဲများကိုဆန့်ကျင်သော မည်သည့်ကင်ပိန်းကိုမျှလည်း မပြုလုပ်ကြပါ။ သူတို့သည် ထိုရွေးကောက်ပွဲများတွင် ထုံးစံအတိုင်းရွေးချယ်ခံရသော အာဏာပိုင်များကို လေးမြတ်ကြကာ ပူးပေါင်းဆောင်ရွက်ကြသည်။ (ရောမ ၁၃:၁-၇) ယေဟောဝါသက်သေတို့သည် ရွေးကောက်ပွဲတစ်ခုတွင် ပါဝင်ယှဉ်ပြိုင်မည့်သူအတွက် သူတို့ကိုယ်တိုင် ဆန္ဒမဲထည့်မည်၊ မထည့်မည်နှင့်ပတ်သက်၍ သမ္မာကျမ်းစာအတိုင်း လေ့ကျင့်ထားသော သူတို့၏ ကိုယ်ကိုကိုယ်သိသောစိတ်အပြင် ဘုရားသခင်နှင့် တိုင်းပြည်အပေါ် သူ၏တာဝန်သိတတ်မှုကို အခြေခံသည့် ကိုယ်ပိုင်ဆုံးဖြတ်ချက်အရ တစ်ဦးချင်းစီ ဆုံးဖြတ်ချက်ချကြသည်။ (မဿဲ ၂၂:၂၁၊ ၁ ပေတရု ၃:၁၆) သက်သေခံများသည် ဤကိုယ်ပိုင်ဆုံးဖြတ်ချက်ချရာ၌ အကြောင်းအရာများစွာကို စဉ်းစားဆင်ခြင်ကြ၏။

ပထမတစ်ချက်မှာ၊ ယေရှုခရစ်က မိမိ၏နောက်လိုက်များနှင့်ပတ်သက်၍ “အကျွန်ုပ်သည် ဤလောကနှင့် မဆက်ဆံသကဲ့သို့ ဤသူတို့သည် မဆက်ဆံ” ကြဟု မိန့်တော်မူခဲ့သည်။ (ယောဟန် ၁၇:၁၄) ယေဟောဝါသက်သေများသည် ဤမူကို အလေးအနက်သဘောထားသည်။ “ဤလောကနှင့်မစပ်ဆိုင်” ကြသည့်အတွက် သူတို့သည် ဤလောက၏နိုင်ငံရေးကိစ္စများတွင် ကြားနေကြသည်။​—ယောဟန် ၁၈:၃၆။

ဒုတိယအချက်မှာ တမန်တော်ပေါလုသည် သူ့ကိုယ်သူ ခရစ်တော်၏ကိုယ်စားလှယ် “သံတမန်” တစ်ဦးဖြစ်သည်ဟု သူ့ခေတ်မှ လူတို့ကို ဖော်ပြခဲ့သည်။ (ဧဖက် ၆:၂၀၊ ၂ ကောရိန္သု ၅:၂၀) ခရစ်တော်ယေရှုသည် ယခု ဘုရာသခင့်ကောင်းကင်နိုင်ငံတော်၏ နန်းထိုင်ဘုရင်ဖြစ်နေပြီဟု ယေဟောဝါသက်သေများ ယုံကြည်ကြပြီး သံတမန်များနည်းတူ သူတို့သည် အဆိုပါအကြောင်းကို နိုင်ငံများတွင် ကြေညာကြရမည်ဖြစ်သည်။ (မဿဲ ၂၄:၁၄၊ ဗျာဒိတ် ၁၁:၁၅) သံတမန်များကို ကြားနေဖို့မျှော်လင့်သည့်အတွက် သူတို့အပို့ခံရသောနိုင်ငံများ၏ ပြည်တွင်းရေးများ၌ ဝင်ရောက်စွက်ဖက်ခြင်းကို ရှောင်ကြ၏။ ဘုရားသခင့်ကောင်းကင်နိုင်ငံတော်၏ ကိုယ်စားလှယ်များဖြစ်ကြသည့် ယေဟောဝါသက်သေများသည် သူတို့နေထိုင်ကြသော တိုင်းပြည်များ၏ နိုင်ငံရေး၌ ဝင်ရောက်စွက်ဖက်ခြင်းမပြုရန် အလားတူ တာဝန်ရှိကြသည်။

သုံးသပ်စရာ တတိယအချက်မှာ လူတစ်ဦးရာထူးရဖို့ ဆန္ဒမဲပေးသူတို့သည် ထိုသူ၏လုပ်ရပ်အတွက် တာဝန်ယူရပေမည်။ (၁ တိမောသေ ၅:၂၂ နှိုင်းယှဉ်၊ အင်္ဂလိပ်ကျမ်းစာသစ်။) ၎င်းတာဝန်ယူလိုသည်၊ မယူလိုသည်ကို ခရစ်ယာန်များ သေချာစွာ သုံးသပ်ရမည်ဖြစ်သည်။

စတုတ္ထအချက်မှာ ယေဟောဝါသက်သေများသည် သူတို့၏ခရစ်ယာန်စည်းလုံးမှုကို အလွန်တန်ဖိုးထားကြ၏။ (ကောလောသဲ ၃:၁၄) ဘာသာတရားများသည် နိုင်ငံရေးတွင် ပါဝင်လာကြသောအခါ သူတို့၏အသင်းသားများသည် စိတ်ဝမ်းကွဲပြားတတ်လေ့ရှိကြသည်။ ယေရှုခရစ်ကိုတုပပြီး ယေဟောဝါသက်သေများသည် နိုင်ငံရေးတွင်ပါဝင်ခြင်းကို ရှောင်ခြင်းဖြင့် သူတို့၏ခရစ်ယာန်စည်းလုံးမှုကို ဆက်ထိန်းသိမ်းထားကြသည်။​—မဿဲ ၁၂:၂၅၊ ယောဟန် ၆:၁၅၊ ၁၈:​၃၆၊ ၃၇။

ပဉ္စမနှင့် နောက်ဆုံးအချက်မှာ ယေဟောဝါသက်သေများသည် နိုင်ငံရေးတွင် မပါဝင်ခြင်းဖြင့် မည်သည့်နိုင်ငံရေးခံယူချက် ရှိသူမဆိုထံ ချဉ်းကပ်၍ အရေးကြီးသော ဘုရားသခင့်နိုင်ငံတော်သတင်းကို လွတ်လပ်စွာ ပြောဆိုဖို့ဖြစ်စေသည်။​—ဟေဗြဲ ၁၀:၃၅။

အထက်တွင် ဖော်ပြထားသော ကျမ်းဆိုင်ရာမူများကြောင့် တိုင်းပြည်များစွာရှိ ယေဟောဝါသက်သေများသည် နိုင်ငံရေးရွေးကောက်ပွဲများတွင် ဆန္ဒမဲမထည့်ဖို့ ကိုယ်ပိုင်ဆုံးဖြတ်ချက်ချကြသည့်အပြင် ထိုသို့လွတ်လပ်စွာ ဆုံးဖြတ်ချက်ခွင့်ရှိကြောင်း တိုင်းပြည်ဥပဒေက ထောက်ခံသည်။ သို့သော် နိုင်ငံသားများကို ဆန္ဒမဲထည့်ရန် ဥပဒေကတောင်းဆိုလာလျှင်ကော အသို့နည်း။ ဤကဲ့သို့သောအမှုတွင် အခြေအနေကို ကိုင်တွယ်ဖြေရှင်းပုံနှင့်ပတ်သက်၍ အသိစိတ်ဖြင့် ကျမ်းစာကိုအခြေခံထားသော ဆုံးဖြတ်ချက်ချရန် သက်သေခံအသီးသီး၌ တာဝန်ရှိသည်။ တစ်ဦးတစ်ယောက်က မဲရုံသို့သွားဖို့ ဆုံးဖြတ်လျှင် ၎င်းသည် သူ၏ဆုံးဖြတ်ချက်ပင်ဖြစ်သည်။ မဲရုံတွင် သူပြုသည့်အမှုသည် သူနှင့် သူ၏ဖန်ဆင်းရှင်ကြား ဖြေရှင်းစရာကိစ္စဖြစ်၏။

နိုဝင်ဘာ ၁၅၊ ၁၉၅၀ ပြည့်နှစ်ထုတ် ကင်းမျှော်စင် စာမျက်နှာ ၄၄၅ နှင့် ၄၄၆ တို့တွင် ဤသို့ပြောခဲ့သည်– “အစိုးရက နိုင်ငံသားများကို မဖြစ်မနေ ဆန္ဒမဲထည့်ခိုင်းသောနေရာတွင် . . . [သက်သေခံများသည်] မဲရုံသို့သွားနိုင်သည်။ ဤတွင် သူတို့၏ရပ်တည်မှုကိုဖော်ပြရန် မဲပြားပေါ်ရေးမှတ်ဖို့ဖြစ်သည်။ မဲဆန္ဒရှင်များသည် မိမိတို့၏မဲပြားများကို သူတို့နှစ်သက်ရာလုပ်ကြသည်။ ထို့ကြောင့် ဘုရားသခင့်ရှေ့မှောက် ဤနေရာတွင် ကိုယ်တော်၏သက်သေခံများသည် ပညတ်တော်များနှင့်အညီ မိမိတို့၏ယုံကြည်ချက်အတိုင်း ပြုမူကြရမည်ဖြစ်သည်။ မဲပြားကို မည်သို့လုပ်ရမည်နှင့်ပတ်သက်၍ သူတို့ကို ညွှန်ကြားရန် ကျွန်ုပ်တို့ တာဝန်မဟုတ်ပါ။”

ခရစ်ယာန်အမျိုးသမီးတစ်ဦး၏ မယုံကြည်သောခင်ပွန်းက သူ့ကို မဲရုံသို့သွားရန် အတင်းအကျပ် တိုက်တွန်းလျှင်ကော အသို့နည်း။ ခရစ်ယာန်များသည် အထက်အာဏာပိုင်များ၏ အုပ်စိုးခြင်းကို ဝန်ခံရသကဲ့သို့ မိမိခင်ပွန်း၏အုပ်စိုးခြင်းကိုလည်း ဝန်ခံကြရမည်။ (ဧဖက် ၅:၂၂၊ ၁ ပေတရု ၂:၁၃-၁၇) သူ၏ခင်ပွန်းကိုနာခံသည့်အနေနှင့် မဲရုံသို့သွားသော် ၎င်းသည် သူ၏ကိုယ်ပိုင်ဆုံးဖြတ်ချက်ပင်ဖြစ်သည်။ မည်သူကမျှ သူ့ကို မဝေဖန်သင့်ချေ။​—ရောမ ၁၄:၄ နှိုင်းယှဉ်။

မဖြစ်မနေ ဆန္ဒမဲထည့်ဖို့ နိုင်ငံတော်ဥပဒေက မပြဋ္ဌာန်းထားသော်လည်း မဲရုံသို့မသွားသူများကို ရန်လိုမုန်းတီး​—အန္တရယ်ပြုကောင်းပြုနိုင်​—လျှင်ကော။ ဆန္ဒမဲထည့်ရန် တရားဝင်တာဝန်မရှိသော်လည်း မဲရုံးသို့မသွားပါက တစ်ဦးချင်းစီကို တစ်နည်းနည်းဖြင့် ကြီးမားစွာ ဒဏ်တပ်လျှင်ကော အသို့နည်း။ အဆိုပါအခြေအနေများနှင့် အလားတူအခြေအနေမျိုးများတွင် ခရစ်ယာန်တစ်ဦးသည် မိမိကိုယ်ပိုင်ဆုံးဖြတ်ချက်ချရမည်ဖြစ်သည်။ “လူအသီးသီးတို့သည် မိမိတို့ဝန်ကို ဆောင်ရွက်ရကြမည်။”​—ဂလာတိ ၆:၅။

ရွေးကောက်ပွဲအတွင်း သူတို့နိုင်ငံရှိ ယေဟောဝါသက်သေအချို့သည် မဲရုံသို့သွားကြပြီး အချို့သည် မသွားကြသည်ကို သတိပြုမိသောအခါ ထိမိလဲသွားသူများရှိပေမည်။ ‘ယေဟောဝါသက်သေတွေက ညီညွတ်မှုမရှိကြဘူး’ ဟု သူတို့ပြောကြပေမည်။ သို့သော် ဤကိစ္စသည် တစ်ဦးချင်းစီ၏ ကိုယ်ကိုကိုယ်သိသောစိတ်နှင့်ပတ်သက်၍ ခရစ်ယာန်အသီးသီးသည် ယေဟောဝါဘုရားသခင်၏ရှေ့မှောက်တွင် ကိုယ်ပိုင်ဆုံးဖြတ်ချက်ချရသည်ကို လူတို့အသိအမှတ်ပြုသင့်၏။​—ရောမ ၁၄:၁၂။

အခြေအနေအမျိုးမျိုးကိုကြုံရစဉ်တွင် ယေဟောဝါသက်သေများသည် မည်သို့ပင် ကိုယ်ပိုင်ဆုံးဖြတ်ချက်ချပါစေ၊ မိမိတို့၏ခရစ်ယာန်ကြားနေမှုနှင့် လွတ်လပ်စွာပြောဆိုမှုတို့ကို သူတို့ ကာကွယ်ထိန်းသိမ်းကြသည်။ အရာခပ်သိမ်းတွင် ခွန်အားရရှိစေရန်၊ ဉာဏ်ပညာရရှိရန်နှင့် မိမိတို့၏ယုံကြည်ခြင်းကို အဘယ်နည်းဖြင့်မျှ အလျှော့မပေးမိရန် သူတို့သည် ယေဟောဝါဘုရားသခင်ကို မှီခိုအားထားကြသည်။ ထိုသို့ဖြင့် ဆာလံဆရာ၏ ဤစကားကို ယုံကြည်စိတ်ချကြောင်း သူတို့ပြသကြသည်– “အကျွန်ုပ်၏ကျောက်၊ အကျွန်ုပ်၏ရဲတိုက်ကား ကိုယ်တော်ပေတည်း။ နာမတော်အဖို့အလို့ငှာ အကျွန်ုပ်ကို လမ်းပြ၍ သွန်သင်ပဲ့ပြင်တော်မူပါ။”​—ဆာလံ ၃၁:၃။