စုန်းကဝေအတတ်အကြောင်း သင်ဘာသိရှိထားသနည်း

စုန်းကဝေအတတ်! ထိုစကားလုံးက သင့်အား ဘာကိုသတိရစေသနည်း။

လူအများက ၎င်းကို အယူသီးမှုနှင့် စိတ်ကူးယဉ်မှုဟု ယူမှတ်ကြကာ အလေးမထားကြချေ။ သူတို့အတွက် စုန်းအတတ်ဟူသည် စိတ်ကူးယဉ်၌သာတည်ရှိ၏။ ဆူပွက်နေသောအိုးထဲတွင် လင်းနို့အတောင်များကိုထည့်ပြုတ်ကာ လူတို့ကိုဖားများဖြစ်စေပြီး တံမြက်စည်းရိုးဖြင့် ညအမှောင်ယံကောင်းကင်တွင် ပျံဝဲစဉ် ရန်ငြိုးကြီးစွာ တစာစာနှင့်စကားပြော ရယ်မောကြသော ခေါင်းစွပ်ပါအပေါ်ဝတ်ရုံများကို ဝတ်ဆင်ထားကြသည့် စုန်းမအိုကြီးများရှိသည်ဟုဆိုကြ၏။

အခြားသူတို့အတွက်မူ စုန်းကဝေအတတ်ပညာသည် ကျီစယ်ရယ်မောစရာကိစ္စမဟုတ်ချေ။ ကမ္ဘာ့လူဦးရေထက်ဝက်ကျော်က စုန်းမများ အမှန်တကယ်ရှိပြီး အခြားသူတို့၏အသက်တာကို လွှမ်းမိုးနိုင်သည်ဟု ယုံကြည်ကြကြောင်း စူးစမ်းလေ့လာသူအချို့ကပြောသည်။ သန်းနှင့်ချီသောသူတို့က စုန်းကဝေအတတ်ပညာသည် ဆိုးရွား၍ အန္တရာယ်ရှိကာ အလွန်ကြောက်ဖွယ်ကောင်းသည်ဟု လက်ခံထားကြ၏။ ဥပမာ၊ အာဖရိကဘာသာရေးအကြောင်းနှင့်ပတ်သက်သည့် စာအုပ်တစ်အုပ်က ဤသို့ဆိုသည်– “ဆိုးရွားသောမျက်လှည့်အတတ်၊ မှော်အတတ်၊ စုန်းကဝေအတတ်၏ ဆောင်ရွက်မှုနှင့်အန္တရာယ်များကို ယုံကြည်ခြင်းသည် အာဖရိကတိုက်သားတို့ဘဝတွင် အလွန်အမြစ်စွဲနေသည် . . . စုန်းမများနှင့် မှော်ဆရာများသည် ထိုသူတို့၏အသိုင်းအဝိုင်းတွင် မုန်းစရာအကောင်းဆုံးပုဂ္ဂိုလ်များဖြစ်ကြသည်။ ယခုအချိန်ထိတိုင် သူတို့ကို အခြားသူများ ရိုက်သတ်သည့် နေရာများနှင့် အချိန်အခါများရှိသည်။”

သို့သော် အနောက်တိုင်းနိုင်ငံများတွင် စုန်းကဝေအတတ်ပညာသည် ဂုဏ်အသရေရှိမျက်နှာဖုံးအသစ်ကို စွပ်ထားကြပြီ။ စာအုပ်များ၊ ရုပ်မြင်သံကြားနှင့် ရုပ်ရှင်တို့က စုန်းကဝေအတတ်ပညာကိုကြောက်ရွံ့စိတ် လျော့နည်းသွားစေခဲ့ပြီ။ အပန်းဖြေမှုကိုဆန်းစစ်လေ့လာသူ ဒေးဗစ် ဒါ့ဗစ္စက ဤသို့သတိပြုသည်– “ရုတ်ခြည်းဆိုသလို စုန်းမများသည် ငယ်ရွယ်လာပြီး ရှုချင်စဖွယ် တကယ်ပင်ချစ်စရာကောင်းသူများဖြစ်လာပြီ။ ဟော်လီဝုဒ်သည် ရေပန်းစားရာများကို အခွင့်ကောင်းယူတိုးမြှင့်ပေးရန် အလွန်လျင်မြန်ပေသည်။ . . . စုန်းမများကို ချစ်စရာကောင်းပြီး သာ၍စွဲမက်စရာပုံစံရှိစေခြင်းဖြင့် အမျိုးသမီးများနှင့် ကလေးငယ်များပါအပါအဝင် လူပိုများသောပရိသတ် ကြိုက်နှစ်သက်ရာဖြစ်လာစေနိုင်ခဲ့သည်။” ရေပန်းစားလာသော မည်သည့်အရာကိုမဆို ဟော်လီဝုဒ်က မည်သို့အမြတ်ထုတ်ရမည်ကို သိထားသည်။

အမေရိကန်ပြည်ထောင်စုတွင် စုန်းကဝေအတတ်ပညာသည် အတိုးပွားဆုံးဝိညာဉ်ရေးလှုပ်ရှားမှုတစ်ခုဖြစ်ကြောင်း အချို့သူတို့ကဆိုကြသည်။ စက်မှုထွန်းကားသောကမ္ဘာတစ်ခွင်တွင် အမျိုးသမီးများအရေး၏ လှုံ့ဆော်ပေးမှုကိုခံခဲ့ကြရပြီး ပင်မဘာသာရေးများကိုစိတ်ပျက်၍ စုန်းကဝေအတတ်ပညာ၏ပုံစံအမျိုးမျိုးမှ ဝိညာဉ်ရေးအရ စိတ်ကျေနပ်မှုရရန် ကြိုးစားရှာဖွေသူတို့၏အရေအတွက် တိုးများလာနေပေသည်။ အမှန်မှာ၊ စုန်းကဝေအတတ်ပညာပုံစံအမျိုးအမည်များလွန်းရကား “စုန်း” ဟူသောစကားလုံး၏အဓိပ္ပာယ်နှင့်ပတ်သက်၍ပင် စိတ်ဝမ်းကွဲပြားနေကြ၏။ သို့သော် စုန်းမဟုဆိုကြသူတို့သည် များသောအားဖြင့် ဝစ်ကာနှင့်တူ၏။ အဘိဓာန်ကျမ်းတစ်ခုက ၎င်းသည် “ခရစ်ယာန်ခေတ်မတိုင်မီက အနောက်ဥရောပတွင် အယူမှားသောသဘာဝကိုးကွယ်သည့်ဘာသာတစ်ခု၌ မြစ်ဖျားခံပြီး ၂၀ ရာစုတွင် ခေတ်ပြန်ထလာခဲ့ခြင်း” ဖြစ်သည်ဟုဆိုသည်။a သို့ဖြစ်၍ များစွာတို့က မိမိတို့ကိုယ်ကို နတ်ဘုရားကိုးကွယ်သူ သို့မဟုတ် ခေတ်ပေါ်နတ်ဘုရားကိုးကွယ်သူဟု အမည်ခံယူကြ၏။

သမိုင်းတစ်လျှောက်တွင် စုန်းမများသည် အမုန်းခံရ၊ နှိပ်စက်ညှဉ်းပန်းခံရ၍ အသတ်ပင်ခံခဲ့ရပြီ။ ယင်းကြောင့် ခေတ်သစ်စုန်းအတတ်ပညာသည်တို့သည် သူတို့အပေါ်လူအများအမြင်ကြည်စေရန် စိတ်ထက်သန်ကြခြင်းသည် အံ့အားသင့်စရာမဟုတ်ပေ။ လေ့လာမှုတစ်ရပ်တွင် လူထုအား အဘယ်အကြောင်းကို အသိပေးချင်ဆုံးဖြစ်သနည်းဟု ဒါဇင်နှင့်ချီသော စုန်းမများကို မေးမြန်းခဲ့ကြ၏။ သူတို့၏အဖြေကို သုတေသီ မာဂေါ့အဲဒလာက ဤသို့အကျဉ်းချုပ်ဖော်ပြပေးခဲ့သည်– “ကျွန်ုပ်တို့ဟာ ဆိုးရွားသူတွေမဟုတ်ကြပါ။ နတ်ဆိုးကို မကိုးကွယ်ကြပါ။ လူတို့ကို ဘေးမပြု၊ ဖျက်လိုဖျက်ဆီးမပြုကြပါ။ ကျွန်ုပ်တို့ဟာ အန္တရာယ်ပေးသူတွေမဟုတ်ကြပါ။ သင်တို့လိုပဲ သာမန်လူတွေဖြစ်ကြတယ်။ မိသားစုတွေ၊ အလုပ်အကိုင်တွေ၊ မျှော်လင့်ချက်တွေနဲ့ စိတ်ကူးယဉ်အိပ်မက်တာတွေ ရှိကြပါတယ်။ ကျွန်ုပ်တို့ဟာ ဂိုဏ်းတစ်ခုမဟုတ်ဘူး။ တစ်မူထူးသူတွေမဟုတ်ဘူး။ . . . ကျွန်ုပ်တို့ကို ကြောက်စရာမလိုဘူး။ . . . သင်တို့ထင်တာထက် ကျွန်ုပ်တို့ဟာ သင်တို့နဲ့အတော်တူကြပါတယ်။”

ထိုသတင်းကို ပိုမိုလက်ခံလာနေကြပြီ။ သို့သော် ယင်းကြောင့် စုန်းအတတ်ပညာကို စိုးရိမ်စရာမရှိဟု ဆိုလိုပါသလော။ နောက်ဆောင်းပါးတွင် အဆိုပါမေးခွန်းကို သုံးသပ်ကြည့်ကြစို့။

[အောက်ခြေမှတ်ချက်များ]