ဘုရားသခင်ကိုဆန့်ကျင်တိုက်ခိုက်သူများ အောင်မြင်မည်မဟုတ်

“သူတို့သည် သင့်ကိုစစ်တိုက်၍မနိုင်ရကြ။ သင့်ကိုကယ်နုတ်ခြင်းငှာ၊ သင်နှင့်အတူငါရှိသည်ဟု ထာဝရဘုရားမိန့်တော်မူ၏။”—ယေရမိ ၁:၁၉။

၁။ အဘယ်တာဝန်ကိုယေရမိရရှိခဲ့ပြီး သူ၏လုပ်ငန်းသည် မည်မျှကြာခဲ့သနည်း။

ယေဟောဝါသည် လူငယ်ယေရမိကို လူအမျိုးမျိုးတို့၏ပရောဖက်ဖြစ်ရန် တာဝန်ပေးခဲ့သည်။ (ယေရမိ ၁:၅) ယုဒနိုင်ငံ၏မင်းကောင်း ယောရှိအုပ်စိုးချိန်အတွင်း ထိုသို့ဖြစ်ပျက်ခဲ့သည်။ ယေရမိ၏ပရောဖက်ပြုချက်ဆိုင်ရာ အမှုတော်ဆောင်ခြင်းသည် ယေရုရှလင်မြို့ကို ဗာဗုလုန်တို့မသိမ်းပိုက်မီအချိန်မှ ဘုရားသခင့်လူမျိုးတော်ကို ပြည်နှင်ခံအနေနှင့် ခေါ်ဆောင်သွားချိန်အထိ ကသောင်းကနင်းဖြစ်နေစဉ်ကာလတစ်လျှောက်ဖြစ်သည်။—ယေရမိ ၁:၁-၃။

၂။ ယေဟောဝါသည် ယေရမိကိုမည်သို့အားဖြည့်ပေးခဲ့ပြီး ထိုပရောဖက်ကိုတိုက်ခိုက်ခြင်းသည် အဘယ်အဓိပ္ပာယ်သက်ရောက်သနည်း။

^၂ ယေရမိကြေညာရမည့် တရားစီရင်ခြင်းသတင်းများသည် ဆန့်ကျင်မှုကိုမုချလှုံ့ဆော်လိမ့်မည်။ ထို့ကြောင့် ဖြစ်ပျက်လာမည့်အမှုများအတွက် သူ့ကိုခိုင်ခံ့စေတော်မူခဲ့သည်။ (ယေရမိ ၁:၈-၁၀) ဥပမာ၊ “သူတို့သည် သင့်ကိုစစ်တိုက်၍မနိုင်ရကြ။ ‘သင့်ကိုကယ်နုတ်ခြင်းငှာ၊ သင်နှင့်အတူငါရှိသည်’ ဟု ထာဝရဘုရားမိန့်တော်မူ” သောစကားများကြောင့် ထိုပရောဖက်သည် အားရှိခဲ့သည်။ (ယေရမိ ၁:၁၉) ယေရမိကိုတိုက်ခိုက်ခြင်းသည် ယေဟောဝါကိုတိုက်ခိုက်ခြင်းဖြစ်၏။ ယနေ့ ယေဟောဝါ၌ ယေရမိပြုလုပ်ခဲ့သောလုပ်ငန်းမျိုးကိုလုပ်ဆောင်နေကြသည့် ပရောဖက်နှင့်တူသောကျေးကျွန်အဖွဲ့တစ်ဖွဲ့ရှိသည်။ ထိုပရောဖက်ကဲ့သို့ပင် သူတို့သည် ဘုရားသခင့်ပရောဖက်ပြုချက်စကားကို ရဲစွမ်းသတ္တိရှိစွာ ကြေညာကြသည်။ ထိုသတင်းစကားကို တုံ့ပြန်မှုအပေါ်မူတည်၍ လူတစ်ဦးချင်းစီအနေနှင့်ကော လူမျိုးစုလိုက်အနေနှင့်ပါ အကျိုးအပြစ်ခံစားရမည်။ ယေရမိအချိန်ကကဲ့သို့ပင် ကိုယ်တော်၏ကျေးကျွန်များနှင့် သူတို့အားဘုရားသခင်အပ်နှင်းထားသော လုပ်ငန်းများကို ဆန့်ကျင်ခြင်းအားဖြင့် ဘုရားသခင်ကိုတိုက်ခိုက်နေကြသူများရှိသည်။

ယေဟောဝါ၏ကျေးကျွန်များ တိုက်ခိုက်ခံနေရ

၃။ ယေဟောဝါ၏ကျေးကျွန်များသည် အဘယ်ကြောင့်တိုက်ခိုက်ခံနေရကြသနည်း။

^၃ ယေဟောဝါ၏လူများသည် ၂၀ ရာစုအစောပိုင်းကတည်းက တိုက်ခိုက်ခံခဲ့ကြရပြီ။ တိုင်းနိုင်ငံအများရှိ အကြံအစည်ယုတ်မာသူတို့သည် ဘုရားသခင့်နိုင်ငံတော်သတင်းကောင်း ကြေညာခြင်းကို ဟန့်တားဖို့—ရပ်တန့်သွားစေဖို့—ကြိုးပမ်းခဲ့ကြသည်။ သူတို့သည် “ဟောက်သောခြင်္သေ့ကဲ့သို့ အဘယ်သူကိုမျိုရမည်နည်းဟူ၍ လှည့်လည်ရှာဖွေလျက်ရှိ” သောကျွန်ုပ်တို့၏ မဟာရန်သူကြီး စာတန်၏တွန်းအားပေးမှုကိုခံနေကြရသည်။ (၁ ပေတရု ၅:၈) ၁၉၁၄ ခုနှစ်တွင် ‘တစ်ပါးအမျိုးသားတို့၏အချိန်ကာလ’ ကုန်ဆုံးပြီးနောက် ဘုရားသခင်သည် မိမိ၏သားတော်ကို “ရန်သူတို့အလယ်၌အုပ်စိုးတော်မူ” ဖို့အမိန့်ပေးပြီး မြေကြီးဘုရင်သစ်အဖြစ် နန်းတင်ခဲ့သည်။ (လုကာ ၂၁:၂၄; ဆာလံ ၁၁၀:၂) ခရစ်တော်သည် မိမိ၏နိုင်ငံတော်တန်ခိုးကိုတင်ပြခြင်းအားဖြင့် စာတန်ကိုကောင်းကင်မှနှင်ချခဲ့ပြီး မြေကြီးဝန်းကျင်၌ ဘောင်ခတ်ထားသည်။ စာတန်သည် မိမိ၏အချိန်တစ်ခဏသာရှိကြောင်းသိထားရာ ဘိသိက်ခံခရစ်ယာန်များနှင့် သူတို့၏အပေါင်းပါများအပေါ် သူ၏အမျက်ဒေါသကို သွန်းလောင်းလေတော့သည်။ (ဗျာဒိတ် ၁၂:၉၊ ၁၇) ဘုရားသခင်ကို ဤသို့ဆန့်ကျင်တိုက်ခိုက်သူများ၏ ထပ်တလဲလဲတိုက်ခိုက်မှု၏ရလဒ်ကား အဘယ်နည်း။

၄။ ပထမကမ္ဘာစစ်အတွင်း ယေဟောဝါ၏လူမျိုးတော်သည် အဘယ်စမ်းသပ်မှုများကို ကြုံတွေ့ခဲ့ရကြသနည်း၊ သို့သော် ၁၉၁၉ နှင့် ၁၉၂၂ တွင်မည်သို့ဖြစ်ခဲ့သနည်း။

^၄ ပထမကမ္ဘာစစ်အတွင်း ယေဟောဝါ၏ဘိသိက်ခံကျေးကျွန်များသည် ယုံကြည်ခြင်းစမ်းသပ်မှုများစွာကို ကြုံတွေ့ခဲ့ရကြသည်။ သူတို့သည် ပြောင်လှောင်ခံခဲ့ရ၊ သွားပုပ်လေလွင့်အပြောခံခဲ့ရ၊ လူအုပ်၏ဖမ်းဆီးမှုများခံခဲ့ရပြီး အရိုက်ခံခဲ့ရကြသည်။ ယေရှုကြိုပြောခဲ့သကဲ့သို့ သူတို့သည် ‘ခပ်သိမ်းသောလူမျိုးတို့၏အမုန်းခံရ’ သူများ ဖြစ်လာခဲ့ကြသည်။ (မဿဲ ၂၄:၉) စစ်သွေးကြွနေချိန်တွင် ဘုရားသခင့်နိုင်ငံတော်၏ရန်သူများသည် ယေရှုခရစ်ကိုဆန့်ကျင်ရာတွင် အသုံးပြုခဲ့သော နည်းဗျူဟာတစ်ခုကို အသုံးပြုခဲ့ကြ၏။ သူတို့က ယေဟောဝါ၏လူမျိုးကို ပုန်ကန်ဖို့လှုံ့ဆော်သူများဖြစ်ကြောင်း မဟုတ်မမှန်ရှုတ်ချပြောဆိုခဲ့ကြပြီး ဘုရားသခင့်မျက်မြင်ရအဖွဲ့အစည်း၏ အဓိကအပိုင်းကို တိုက်ခိုက်ခဲ့ကြသည်။ ၁၉၁၈ ခုနှစ်မေလတွင် ကင်းမျှော်စင်အသင်း၏ဥက္ကဋ္ဌ ဂျေ. အက်ဖ်. ရပ်သဖော့ဒ်နှင့် သူ၏အရင်းနှီးဆုံးအပေါင်းပါခုနစ်ဦးကို ဖမ်းဆီးဖို့ ဖယ်ဒရယ်လ်မှဝရမ်းထုတ်ခဲ့သည်။ ဤလူရှစ်ဦးသည် ပြင်းထန်သောထောင်ဒဏ်စီရင်ချက်ချခံခဲ့ရပြီး ယူ.အက်စ်.အေ. ဂျော်ဂျီယာရှိ အတ်လန်တာဖယ်ဒရယ်လ်အကျဉ်းထောင်သို့ အပို့ခံခဲ့ရသည်။ ကိုးလကြာပြီးနောက် သူတို့လွတ်လာခဲ့ကြသည်။ ၁၉၁၉ မေလတွင် မြို့နယ်အယူခံရုံးတော်က တရားခံများအပေါ် တရားမျှတသောစစ်ဆေးမှုမလုပ်ခဲ့ဟုဆိုကာ ထုတ်ပြန်ခဲ့သောစီရင်ချက်ကို ပယ်ချလိုက်သည်။ အမှုကိုအသစ်ပြန်လည်စစ်ဆေးဖို့ ရမန်ပေးခဲ့သည်၊ သို့သော် နောက်ပိုင်းတွင် အစိုးရက ညီအစ်ကိုရပ်သဖော့ဒ်နှင့် သူ၏အပေါင်းပါများကို စွဲချက်တင်ခံရသောအပြစ်မှ လုံးဝကင်းလွတ်စေခဲ့ပြီး တရားစွဲဆိုချက်ကို ရုပ်သိမ်းခဲ့သည်။ သူတို့သည် လုပ်ငန်းဆောင်တာများကို ပြန်စလုပ်ခဲ့ကြပြီး ၁၉၁၉ နှင့် ၁၉၂၂ တွင် အိုဟိုင်အိုပြည်နယ် စီဒါပွိုင့်တွင်ကျင်းပခဲ့ကြသော စည်းဝေးကြီးများက ဘုရားသခင့်နိုင်ငံတော်ဟောပြောခြင်းလုပ်ငန်းကို အရှိန်ပြင်းစွာပြန်လည်အားသစ်လန်းစေခဲ့သည်။

၅။ နာဇီဂျာမနီတွင် ယေဟောဝါသက်သေများသည် အဘယ်အရာကြုံတွေ့ခဲ့ရသနည်း။

^၅ ၁၉၃၀ ပြည့်လွန်နှစ်များတွင် အာဏာရှင်စနစ်များပေါ်ထွက်လာခဲ့ပြီး ဂျာမနီ၊ အီတလီနှင့် ဂျပန်နိုင်ငံတို့သည် ဝင်ရိုးတန်းနိုင်ငံများအဖြစ် ပေါင်းစည်းလိုက်ကြသည်။ ထိုဆယ်စုနှစ်အစောပိုင်းတွင် အထူးသဖြင့် နာဇီဂျာမနီတွင် ဘုရားသခင့်လူမျိုးတော်သည် ရက်စက်ကြမ်းကြုတ်သော နှိပ်စက်ညှဉ်းပန်းမှုများကို ခံခဲ့ရကြသည်။ ပိတ်ပင်မှုများကို ပြဋ္ဌာန်းခဲ့ကြသည်။ နေအိမ်များကိုရှာဖွေခဲ့ကြပြီး ထိုတွင်နေထိုင်သူတို့ကို ဖမ်းဆီးခဲ့ကြသည်။ မိမိတို့၏ယုံကြည်ချက်ကို စွန့်လွှတ်ဖို့ငြင်းဆိုခဲ့ကြသောကြောင့် ထောင်နှင့်ချီသောသူတို့သည် ချွေးတပ်စခန်းများသို့အပို့ခံခဲ့ရကြသည်။ ထိုအာဏာရှင်အုပ်ချုပ်မှုနယ်ပယ်မှ ယေဟောဝါသက်သေများကို ဖယ်ရှားပစ်ဖို့ရည်ရွယ်ချက်ဖြင့် ဘုရားသခင်နှင့် ကိုယ်တော်၏လူမျိုးတော်ကို တိုက်ခိုက်ခဲ့ခြင်းဖြစ်သည်။a သက်သေခံများသည် မိမိတို့၏အခွင့်အရေးကိုကာကွယ်ဖို့ ဂျာမနီရှိတရားရုံးသို့သွားသောအခါ ရိုက်ခ်တရားရေးဝန်ကြီးဌာနက သူတို့လွတ်မြောက်မည်မဟုတ်ကြောင်း သေချာစေဖို့ ရှည်လျားသောအကဲဖြတ်ချက်တစ်ခုကို ပြင်ဆင်ခဲ့သည်။ ၎င်းက ဤသို့ဆိုသည်– “တရားရုံးများသည် ဥပဒေလုပ်ထုံးဖြစ်ပုံရမှုသက်သက်မျှဖြင့် မပျက်ကွက်ရပါ; သို့သော် မိမိတို့၏ ကြီးမြင့်သောဝတ္တရားကိုကျေပွန်ဖို့ လုပ်ထုံးအခက်အခဲများကြားမှ နည်းလမ်းများရှာဖွေရမည်။” ယင်းက တရားမျှတမှုရှိနိုင်မည်မဟုတ်ကြောင်း ဆိုလိုသည်။ နာဇီတို့က ယေဟောဝါသက်သေများ၏လုပ်ဆောင်မှုများသည် အန္တရာယ်ဖြစ်စေသည် သို့မဟုတ် ရန်လိုမှုဖြစ်စေပြီး ‘အမျိုးသားဆိုရှယ်လစ်ဝါဒကို တည်ထောင်ဖို့ အနှောင့်အယှက်ဖြစ်စေ’ သည်ဟုခံယူကြသည်။

၆။ ဒုတိယကမ္ဘာစစ်နှင့် ၎င်းနောက်ပိုင်းတွင် ကျွန်ုပ်တို့၏လုပ်ငန်း ရပ်တန့်သွားစေဖို့ အဘယ်ကြိုးပမ်းမှုများ ပြုလုပ်ခဲ့ကြသနည်း။

^၆ ဒုတိယကမ္ဘာစစ်အတွင်း ဩစတြေးလျ၊ ကနေဒါနှင့် ဗြိတိသျှဓနသဟာယနိုင်ငံများ၌ ပါဝင်ခဲ့ကြသော အာဖရိက၊ အာရှ၊ ကရစ်ဘီယံနှင့် ပစိဖိတ်ကျွန်းများစသည့် အခြားနိုင်ငံများသည် ယေဟောဝါ၏လူမျိုးတော်အပေါ် ပိတ်ပင်မှုများနှင့် ကန့်သတ်ချက်များကို ပြဋ္ဌာန်းခဲ့ကြသည်။ အမေရိကန်ပြည်ထောင်စုတွင် ဩဇာရှိသောရန်သူများနှင့် မဟုတ်မမှန်သတင်းပေးသူများက ‘မကောင်းသောအကြံနှင့် ဥပဒေပြဋ္ဌာန်း’ ခဲ့ကြသည်။ (ဆာလံ ၉၄:၂၀) သို့သော် အလေးပြုသည့်ကိစ္စနှင့် တစ်အိမ်မှတစ်အိမ်ဟောပြောခြင်းကို တားမြစ်ထားသည့်ထုတ်ပြန်ချက်များကို တရားရုံးတွင်ရင်ဆိုင်ဖြေရှင်းခဲ့ကြပြီး အမေရိကန်ပြည်ထောင်စုတွင် အနိုင်ရသောတရားရေးဆုံးဖြတ်ချက်များက လွတ်လပ်စွာဝတ်ပြုကိုးကွယ်ခြင်းကိုထောက်ခံသည့် အရံအတားတစ်ခုကို တည်ဆောက်ပေးခဲ့သည်။ ယေဟောဝါ၏ကျေးဇူးတော်ကြောင့် ရန်သူတို့၏ကြိုးစားမှုများ မအောင်မြင်ခဲ့ချေ။ ဥရောပ၌ စစ်ပြီးဆုံးချိန်တွင် ပိတ်ပင်မှုများကိုရုပ်သိမ်းခဲ့သည်။ ချွေးတပ်စခန်းများ၌ အဖမ်းခံထားရသော ထောင်ချီသည့်ယေဟောဝါသက်သေများသည် လွတ်မြောက်လာခဲ့ကြသော်လည်း တိုက်ခိုက်မှုအဆုံးမသတ်ခဲ့ချေ။ ဒုတိယကမ္ဘာစစ်ပြီးပြီးချင်း စစ်အေးတိုက်ပွဲစတင်ခဲ့သည်။ အရှေ့ဥရောပနိုင်ငံများက ယေဟောဝါ၏လူမျိုးတော်အပေါ် နောက်ထပ်ဖိနှိပ်မှုများဖြစ်ပေါ်စေခဲ့သည်။ ကျွန်ုပ်တို့၏သက်သေခံခြင်းလုပ်ငန်းများကိုရပ်စဲစေရန်၊ ကျမ်းစာစာပေများထုတ်ဝေခြင်းကို ရပ်တန့်သွားစေရန်နှင့် လူထုစည်းဝေးကြီးများကို ပိတ်ပင်သည့်အနှောင့်အယှက်များကို အရေးယူဆောင်ရွက်ခဲ့ကြသည်။ များစွာသောသူတို့မှာ အဖမ်းခံခဲ့ရကြ၏၊ သို့မဟုတ် အလုပ်ကြမ်းစခန်းသို့အပို့ခံခဲ့ရကြသည်။

ဟောပြောခြင်းလုပ်ငန်း ဆက်ဆောင်ရွက်ခြင်း!

၇။ မကြာသေးမီနှစ်များက ပိုလန်၊ ရုရှားနှင့်အခြားနိုင်ငံများတွင် ယေဟောဝါသက်သေများ အဘယ်အရာကိုကြုံတွေ့ခဲ့ရကြသနည်း။

^၇ ဆယ်စုနှစ်များကုန်လွန်လာသည်နှင့် ဘုရားသခင့်နိုင်ငံတော်ဟောပြောခြင်းလုပ်ငန်း လမ်းပွင့်ခဲ့သည်။ ကွန်မြူနစ်အုပ်ချုပ်မှုအောက်ရှိနေသေးသော ပိုလန်နိုင်ငံတွင် ၁၉၈၂ ၌တစ်ရက်စည်းဝေးကြီးများကို ကျင်းပခွင့်ရခဲ့သည်။ ၁၉၈၅ ခုနှစ်တွင် အပြည်ပြည်ဆိုင်ရာစည်းဝေးကြီးများကို ကျင်းပနိုင်ခဲ့ကြသည်။ ရုရှားနှင့် ယူကရိန်းမှ ထောင်ချီလာတက်ရောက်သူများပါဝင်သည့် အလွန်ကြီးမားသောအပြည်ပြည်ဆိုင်ရာစည်းဝေးကြီးကို ၁၉၈၉ ခုနှစ်တွင် ကျင်းပခဲ့ကြသည်။ ထိုနှစ်တွင် ဟန်ဂေရီနှင့်ပိုလန်နိုင်ငံများ၌ ယေဟောဝါသက်သေများသည် တရားဝင်အသိအမှတ်ပြုခံခဲ့ရသည်။ ၁၉၈၉ ခုနှစ်ဆောင်းဦးရာသီတွင် ဘာလင်တံတိုင်းကြီးပြိုလဲခဲ့သည်။ လအနည်းငယ်ကြာပြီးနောက် အရှေ့ဂျာမနီတွင် တရားဝင်အသိအမှတ်ပြုခံခဲ့ရပြီး များမကြာမီ အပြည်ပြည်ဆိုင်ရာစည်းဝေးကြီးကို ဘာလင်တွင်ကျင်းပခဲ့သည်။ ၂၀ ရာစု၏ နောက်ဆုံးဆယ်စုနှစ်အစပိုင်းတွင် ရုရှားနိုင်ငံရှိညီအစ်ကိုများနှင့် တစ်ဦးချင်းဆက်သွယ်မှုပြုဖို့ ကြိုးစားအားထုတ်ခဲ့ကြသည်။ မော်စကိုရှိ အစိုးရအရာရှိအချို့ထံချဉ်းကပ်ခဲ့ကြပြီး ၁၉၉၁ ခုနှစ်တွင် ယေဟောဝါသက်သေများသည် တရားဝင်မှတ်ပုံတင်ခွင့်ရရှိခဲ့ကြသည်။ ထိုအချိန်မှစ၍ လုပ်ငန်းတော်သည် ရုရှားနှင့် ယခင်ဆိုဗီယက်ပြည်ထောင်စု၌ပါဝင်ခဲ့ကြသည့် သမ္မတနိုင်ငံများ၌ အလွန်တိုးတက်လျက်ရှိသည်။

၈။ ဒုတိယကမ္ဘာစစ်ပြီးနောက် ၄၅ နှစ်အကြာကာလအတွင်း ယေဟောဝါ၏လူမျိုးတော်သည် အဘယ်သို့ဖြစ်ပျက်ခဲ့သနည်း။

^၈ အချို့ဒေသများတွင် နှိပ်စက်ညှဉ်းပန်းမှုလျော့ပါးသွားသော်လည်း အခြားဒေသများ၌မူ ပို၍ဆိုးဝါးလာသည်။ ဒုတိယကမ္ဘာစစ်ပြီးနောက် ၄၅ နှစ်ကြာကာလအတွင်း နိုင်ငံအတော်များများက ယေဟောဝါသက်သေများကို တရားဝင်အသိအမှတ်ပြုဖို့ ငြင်းဆိုခဲ့ကြသည်။ ထို့ပြင် အာဖရိကတွင် ၂၃ နိုင်ငံ၊ အာရှတိုက်တွင် ၉ နိုင်ငံ၊ ဥရောပတိုက်တွင် ၈ နိုင်ငံ၊ လက်တင်အမေရိကတွင် ၃ နိုင်ငံနှင့် ကျွန်း ၄ ကျွန်းတို့၌ ကျွန်ုပ်တို့ကို သို့မဟုတ် ကျွန်ုပ်တို့၏လုပ်ငန်းတော်ကို ပိတ်ပင်တားဆီးခဲ့ကြသည်။

၉။ ယေဟောဝါ၏ကျေးကျွန်များသည် မာလာဝီ၌ အဘယ်အရာကြုံတွေ့ခဲ့ကြရသနည်း။

^၉ မာလာဝီရှိယေဟောဝါသက်သေများသည် ၁၉၆၇ ခုနှစ်မှစ၍ ရက်စက်ကြမ်းကြုတ်သော နှိပ်စက်ညှဉ်းပန်းမှုများကို ကြုံတွေ့ခဲ့ကြရသည်။ ထိုဒေသရှိ ကျွန်ုပ်တို့၏ယုံကြည်သူချင်းတို့သည် ခရစ်ယာန်စစ်များအဖြစ် ကြားနေရပ်တည်မှုကြောင့် နိုင်ငံရေးပါတီကတ်များမဝယ်ခဲ့ကြချေ။ (ယောဟန် ၁၇:၁၆) ၁၉၇၂ ခုနှစ်တွင် မာလာဝီလွှတ်တော်ပါတီအစည်းအဝေးပြီးနောက် ရက်စက်ကြမ်းကြုတ်မှု အသစ်တစ်ဖန်စလာပြန်သည်။ ညီအစ်ကိုများသည် မိမိတို့နေအိမ်များမှ မောင်းထုတ်ခံခဲ့ရကြပြီး အလုပ်အကိုင်မရနိုင်ခဲ့ကြချေ။ ထောင်နှင့်ချီသောသူတို့သည် အသတ်မခံရဖို့ နိုင်ငံမှထွက်ပြေးခဲ့ကြရ၏။ သို့သော် ဘုရားသခင်နှင့်ကိုယ်တော်၏လူမျိုးတော်ကို ဆန့်ကျင်တိုက်ခိုက်သူများ အောင်မြင်ခဲ့ကြသလော။ ဝေးလေစွ! အခြေအနေပြောင်းပြန်ဖြစ်လာပြီးနောက် ၁၉၉၉ ခုနှစ်က မာလာဝီတွင် ဘုရားသခင့်နိုင်ငံတော်ကြေညာသူနှုန်းသစ် ၄၃,၇၆၇ ဦးရရှိခဲ့ပြီး ထိုတွင် ၁၂၀,၀၀၀ ကျော်သောသူတို့သည် ခရိုင်စည်းဝေးကြီးများကို တက်ရောက်ခဲ့ကြသည်။ ဌာနခွဲရုံးအသစ်ကို မြို့တော်၌တည်ဆောက်ခဲ့ကြသည်။

သူတို့ရမယ်ရှာကြခြင်း

၁၀။ ဒံယေလ၏အဖြစ်၌ကဲ့သို့ မျက်မှောက်ခေတ်ဘုရားသခင့်လူမျိုးတော်ကို ဆန့်ကျင်သူတို့သည် အဘယ်သို့ပြုခဲ့ကြသနည်း။

^၁၀ အယူဖောက်ပြန်သူများ၊ ဓမ္မဆရာများနှင့် အခြားသူတို့သည် ဘုရားသခင့်နှုတ်မြွက်စကားတော်မှ ကျွန်ုပ်တို့၏သတင်းစကားကိုနားမခံနိုင်ကြချေ။ ဆန့်ကျင်သူတို့သည် ခရစ်ယာန်ဘောင်ဘာသာရေးအုပ်စုအချို့၏ ဖိအားပေးမှုကြောင့် ကျွန်ုပ်တို့ကိုတိုက်ခိုက်ထိုက်ကြောင်းတင်ပြဖို့ တရားဝင်နည်းလမ်းဟုခေါ်ကြသော နည်းများကိုရှာဖွေကြသည်။ တစ်ခါတစ်ရံ အဘယ်နည်းဗျူဟာများကို အသုံးပြုခဲ့ကြသနည်း။ ပရောဖက်ဒံယေလကိုတိုက်ခိုက်ရာ၌ ပူးပေါင်းကြံစည်သူများသည် အဘယ်သို့ပြုခဲ့ကြသနည်း။ ဒံယေလ ၆:၄၊ ၅ ၌ကျွန်ုပ်တို့ဤသို့ဖတ်ရသည်– “ထိုအခါ ဝန်ကြီးနှင့်မြို့ဝန်တို့သည် ဒံယေလ၌အပြစ်တင်ခွင့်ကိုရှာ၍၊ နိုင်ငံတော်အမှုအရေးများကိုစစ်ကြောကြ၏။ ဒံယေလသည် သစ္စာနှင့်ပြည့်စုံ၍ အပြစ်တစ်စုံတစ်ခုမျှမရှိသောကြောင့်၊ အပြစ်တင်ခွင့်ကိုရှာ၍မတွေ့ကြသည်ရှိသော်၊ ‘ဘုရားသခင်၏ဘာသာမှုမှတစ်ပါးအခြားသောအမှုကို ဒံယေလ၌အပြစ်တင်ခွင့်ကိုငါတို့မတွေ့နိုင်ကြ’ ဟု တိုင်ပင်ပြောဆို [ကြ၏]။” ယခုခေတ်ဆန့်ကျင်သူများသည် ထိုနည်းတူ ရမယ်ရှာကြသည်။ သူတို့သည် “အန္တရာယ်ရှိသောတစ်ယူသန်ဂိုဏ်းများ” အကြောင်းမကျေမနပ်ထုတ်ဖော်တင်ပြကြပြီး ယေဟောဝါသက်သေများကို ထိုသို့ခေါ်ဝေါ်ကြသည်။ တလွဲတင်ပြချက်၊ စောင်းချိတ်ပြောသည့်စကားနှင့် မုသာများအားဖြင့် ကျွန်ုပ်တို့၏ဝတ်ပြုရေးနှင့် ဘုရားသခင်ရေးရာမူများကို ကျွန်ုပ်တို့လိုက်နာခြင်းကို သူတို့တိုက်ခိုက်ကြသည်။

၁၁။ ယေဟောဝါသက်သေများကို ဆန့်ကျင်သူအချို့သည် အဘယ်မှားယွင်းသောအဆိုများပြုခဲ့ကြသနည်း။

^၁၁ အချို့နိုင်ငံများတွင် ဘာသာရေးနှင့်နိုင်ငံရေးအင်အားစုများက ကျွန်ုပ်တို့သည် “ခမည်းတော်ဘုရားသခင့်ရှေ့တော်၌ စင်ကြယ်သန့်ရှင်းသော” ဝတ်ပြုနည်းကိုပြုကြောင်း အသိအမှတ်မပြုလိုကြချေ။ (ယာကုပ် ၁:၁၇) ကျွန်ုပ်တို့၏ခရစ်ယာန်လုပ်ငန်းများကို နိုင်ငံပေါင်း ၂၃၄ နိုင်ငံ၌လုပ်ဆောင်နေကြသော်လည်း ဆန့်ကျင်သူတို့က ကျွန်ုပ်တို့သည် “လူသိများသောဘာသာ” တစ်ခုမဟုတ်ဟုဆိုခဲ့ကြသည်။ ၁၉၉၈ ခုနှစ်၊ အပြည်ပြည်ဆိုင်ရာစည်းဝေးကြီးတစ်ခုမတိုင်မီလေးတွင် အေသင်သတင်းစာတစ်စောင်က လူ့အခွင့်အရေးဆိုင်ရာ ဥရောပတရားရုံး၏စီရင်ချက်ရှိလျက်နှင့် “[ယေဟောဝါသက်သေများ] သည် ‘လူသိများသောဘာသာ’ တစ်ခုမဟုတ်ပါ” ဟု ဂရိသြသဒေါက်ဓမ္မဆရာအဖွဲ့၏အဆိုကို ကိုးကားခဲ့သည်။ နောက်ရက်အနည်းငယ်ကြာသောအခါ ၎င်းမြို့ရှိ အခြားသတင်းစာတစ်စောင်က ချာ့ချ်ပြောရေးဆိုခွင့်ရှိသူတစ်ဦး၏ ဤအဆိုကိုကိုးကားခဲ့သည်– “[ယေဟောဝါသက်သေများ] သည် ယေရှုခရစ်ကိုယ်တိုင်နှင့်ဆိုင်သော ခရစ်ယာန်ယုံကြည်ခြင်းနှင့် တူညီမှုလုံးဝမရှိသောကြောင့် ‘ခရစ်ယာန်အသင်းတော်တစ်ခု’ မဖြစ်နိုင်ပါ။” ယင်းသည် အံ့အားသင့်စရာဖြစ်၏၊ အကြောင်းမှာ ယေရှုကိုအတုယူရန် ယေဟောဝါသက်သေများအလေးထားသကဲ့သို့ အခြားအဘယ်ဘာသာရေးအဖွဲ့မျှ အလေးမထားကြသောကြောင့်ဖြစ်သည်။

၁၂။ ဝိညာဉ်ရေးစစ်ကိုတိုက်ခိုက်ရာတွင် ကျွန်ုပ်တို့အဘယ်အမှုကိုပြုလုပ်ရမည်နည်း။

^၁၂ ကျွန်ုပ်တို့သည် သတင်းကောင်းကို ဥပဒေနည်းလမ်းအတိုင်း ကာကွယ်ရန်နှင့် အတည်တကျဖြစ်ရန် ကြိုးပမ်းကြသည်။ (ဖိလိပ္ပိ ၁:၇) ထို့ပြင် ဘုရားသခင်၏ဖြောင့်မတ်သောစံနှုန်းများအပေါ် ကျွန်ုပ်တို့၏ခိုင်မာသောစွဲကိုင်မှုကို အလျှော့ပေးလိုက်လျောခြင်း သို့မဟုတ် လျော့ပေါ့ခြင်းပြုမည်မဟုတ်ပါ။ (တိတု ၂:၁၀၊ ၁၂) ယေရမိနည်းတူ ကျွန်ုပ်တို့သည် ဘုရားသခင်အားဆန့်ကျင်တိုက်ခိုက်သူများကြောင့် အဘယ်နည်းဖြင့်မျှ မထိတ်လန့်ဘဲ ‘ခါးပန်းကိုစည်း၍ ယေဟောဝါမှာထားသမျှကိုဟောပြော’ ကြသည်။ (ယေရမိ ၁:၁၇၊ ၁၈) ယေဟောဝါ၏သန့်ရှင်းသောနှုတ်မြွက်စကားတော်က ကျွန်ုပ်တို့လျှောက်လှမ်းရမည့်လမ်းမှန်ကို အထင်အရှားဖော်ပြထားသည်။ ကျွန်ုပ်တို့သည် မည်သည့်အခါမျှ ချည့်နဲ့သည့် “လူ့လက်ရုံး” ကိုအားကိုးဖို့ သို့မဟုတ် ဤလောကတည်းဟူသော “အဲဂုတ္တုအရိပ်ကိုခိုလှုံ” ဖို့ မရှာကြံကြပါ။ (၂ ရာဇဝင်ချုပ် ၃၂:၈; ဟေရှာယ ၃၀:၃; ၃၁:၁-၃) ဝိညာဉ်ရေးစစ်ကိုတိုက်ခိုက်ရာတွင် ယေဟောဝါအား စိတ်နှလုံးအကြွင်းမဲ့ဆက်၍ကိုးစားကာ ကိုယ်တော်အားလမ်းညွှန်စေပြီး ကိုယ့်ဉာဏ်ကိုအမှီမပြုကြပါ။ (သု. ၃:၅-၇) ယေဟောဝါ၏ထောက်မမှုနှင့် ကိုယ်တော်တိုင်၏ကာကွယ်စောင့်ရှောက်မှုမရရှိလျှင် ကျွန်ုပ်တို့၏လုပ်ဆောင်မှုအားလုံးသည် “အချည်းနှီး” ဖြစ်ပေလိမ့်မည်။—ဆာလံ ၁၂၇:၁။

နှိပ်စက်ညှဉ်းဆဲခံရသော်လည်း အလျှော့မပေးခြင်း

၁၃။ ယေရှုအား စာတန့်တိုက်ခိုက်မှုရှုံးနိမ့်ခဲ့သည်ဟု အဘယ်ကြောင့်ဆိုနိုင်သနည်း။

^၁၃ ယေဟောဝါအားဆည်းကပ်ဝတ်ပြုခြင်းတွင် အလျှော့မပေးသည့် အထင်ရှားဆုံးပုံနမူနာမှာ ပုန်ကန်ရန်လှုံ့ဆော်သူနှင့် အတည်ပြုထားသောစနစ်ကို ပျက်ပြားစေသူဟု မှားယွင်းစွာစွပ်စွဲခံခဲ့ရသည့် ယေရှုဖြစ်သည်။ ပိလတ်သည် ယေရှု၏အမှုကိုစစ်ဆေးပြီးနောက် ကိုယ်တော့်အားလွှတ်ပေးလိုခဲ့သည်။ သို့သော် ဘာသာရေးခေါင်းဆောင်များ၏လှုံ့ဆော်မှုခံနေရသော လူအုပ်သည် ကိုယ်တော်၌အပြစ်မရှိသော်လည်း ယေရှုအားသစ်တိုင်၌ရိုက်ထားဖို့ အော်ဟစ်တောင်းဆိုခဲ့ကြသည်။ ကိုယ်တော့်အစား ဗာရဗ္ဗဟုခေါ်သော ပုန်ကန်၍ လူအသက်သတ်သောကြောင့် ထောင်ကျနေသူကို လွှတ်ပေးဖို့တောင်းဆိုကြသည်! ပိလတ်သည် ကျိုးကြောင်းညီညွတ်မှုမရှိသော ဆန့်ကျင်သူများကို ဖျောင်းဖျတားမြစ်ရန် ထပ်မံကြိုးပမ်းခဲ့သော်လည်း နောက်ဆုံးတွင် ဆူညံစွာအော်ဟစ်တောင်းဆိုသည့်လူထုကို အလျှော့ပေးခဲ့သည်။ (လုကာ ၂၃:၂၊ ၅၊ ၁၄၊ ၁၈-၂၅) ယေရှုသည် သစ်တိုင်ပေါ်၌သေဆုံးခဲ့သော်လည်း ယေရှုကို ယေဟောဝါရှင်ပြန်ထမြောက်စေခဲ့ပြီး မိမိ၏လက်ယာတော်ဘက်၌ ချီးမြှင့်ပေးခဲ့သောကြောင့် ဘုရားသခင်၏အပြစ်မရှိသောသားတော်အပေါ် ရက်စက်ကြမ်းကြုတ်သည့် စာတန်၏တိုက်ခိုက်မှုသည် လုံးဝရှုံးနိမ့်ခဲ့သည်။ ထို့ပြင် စီ.အီး. ၃၃ ပင်တေကုတ္တေပွဲနေ့တွင် ဘုန်းရှိသောယေရှုအားဖြင့် သန့်ရှင်းသောဝိညာဉ်တော်သွန်းလောင်းပေးခဲ့ကာ ခရစ်ယာန်အသင်းတော်—“ဖန်ဆင်းခြင်းအသစ်”—ကို တည်ထောင်လိုက်သည်။—၂ ကောရိန္သု ၅:၁၇; တမန်တော် ၂:၁-၄။

၁၄။ ဂျူးဘာသာရေးခေါင်းဆောင်များသည် ယေရှု၏နောက်လိုက်များကို ဆန့်ကျင်တိုက်ခိုက်သောအခါ အဘယ်ရလဒ်ဖြစ်ပေါ်ခဲ့သနည်း။

^၁၄ ထို့နောက် များမကြာမီ ဘာသာရေးသမားများသည် တမန်တော်များကို ခြိမ်းခြောက်ခဲ့ကြသော်လည်း ခရစ်တော်၏နောက်လိုက်များသည် သူတို့မြင်ခဲ့ကြားခဲ့သောအရာများကို မပြောဘဲမနေခဲ့ကြပါ။ ယေရှု၏တပည့်တော်များက ဤသို့ဆုတောင်းခဲ့ကြသည်– “အိုထာဝရဘုရား၊ ယခုအခါ ထိုသူတို့၏ခြိမ်းခြောက်ခြင်းကို မှတ်တော်မူပါ။ . . . ကိုယ်တော်၏ကျွန်တို့သည် နှုတ် [မြွက်] တရားတော်ကို ရဲရင့်စွာဟောပြောပါမည်အကြောင်း ကယ်မသနားတော်မူပါ။” (တမန်တော် ၄:၂၉၊ ၃၀) ယေဟောဝါသည် သန့်ရှင်းသောဝိညာဉ်တော်နှင့် သူတို့ကိုပြည့်စေခြင်းဖြင့် သူတို့၏အသနားခံချက်ကို ဖြေကြားပေးခဲ့ပြီး မကြောက်မရွံ့ဆက်ကြွေးကြော်နိုင်ဖို့ ခွန်အားပေးခဲ့သည်။ မကြာမီ တမန်တော်များကို မဟောမပြောဖို့ ထပ်မံအမိန့်ပေးခဲ့ကြသည်၊ သို့သော် ပေတရုနှင့် အခြားတမန်တော်တို့က “လူ၏စကားထက်ဘုရားသခင်၏စကားတော်ကို နားထောင်သင့်ပါ၏” ဟုဖြေဆိုခဲ့ကြသည်။ (တမန်တော် ၅:၂၉) ခြိမ်းခြောက်ခြင်း၊ အဖမ်းခံရခြင်းနှင့် ရိုက်နှက်ခံရခြင်းတို့က သူတို့၏ဘုရားသခင့်နိုင်ငံတော်ဟောပြောခြင်းလုပ်ငန်း ကျယ်ပြန့်စေခြင်းကို မဟန့်တားနိုင်ခဲ့ပေ။

၁၅။ ဂါမလျေလကား မည်သူနည်း၊ ယေရှုနောက်လိုက်များ၏ ဘာသာရေးဆန့်ကျင်သူများကို သူမည်သည့်အကြံပေးခဲ့သနည်း။

^၁၅ ဘာသာရေးခေါင်းဆောင်များ မည်သို့တုံ့ပြန်ခဲ့ကြသနည်း။ “ထိုသူတို့နှလုံးသည်ကွဲပြတ်မတတ်ဖြစ်၍၊ တမန်တော်တို့ကိုကွပ်မျက်ခြင်းငှာ အချင်းချင်းတိုင်ပင်ပြောဆိုကြ၏။” သို့ရာတွင် ဂါမလျေလအမည်ရှိသော နိဿရည်းဆရာ၊ ဖာရိရှဲတစ်ဦးရှိနေခဲ့ပြီး သူသည် လူအားလုံး၏လေးစားမှုခံရသူဖြစ်သည်။ တမန်တော်များကို ဆဲန်ဟီဒရင်ခန်းမမှ ခေတ္တထွက်စေခဲ့ပြီး ဘာသာရေးဆန့်ကျင်သူများအား သူကဤသို့အကြံပေးခဲ့သည်– “ဣသရေလလူတို့၊ ဤသူတို့အားအဘယ်သို့ပြုမည်အရာကို သတိနှင့်ဆင်ခြင်ကြလော့။ . . . ယခုလည်းဤသူတို့ကိုရှောင်ရှား၍ အလိုအလျောက်ရှိကြပါစေဟုငါဆို၏။ ဤအကြံဤအမှုသည် လူ၏အကြံလူ၏အမှုဖြစ်လျှင် ပျက်စီးခြင်းသို့ရောက်လိမ့်မည်။ (ဘုရားသခင်၏အကြံအမှုဖြစ်လျှင် သင်တို့သည်မဖျက်ဆီးနိုင်ကြ။) သင်တို့သည်ဘုရားသခင်၏အာဏာတော်ကို ဆန်သောသူမဖြစ်မည်အကြောင်း သတိပြုကြလော့။”—တမန်တော် ၅:၃၃-၃၉။

ကျွန်ုပ်တို့ကိုဆန့်ကျင်သည့်အဘယ်လက်နက်မျှ အောင်မြင်မည်မဟုတ်

၁၆။ မိမိ၏လူမျိုးတော်အား ယေဟောဝါပေးသည့်အာမခံချက်ကို သင့်ကိုယ်ပိုင်စကားဖြင့် မည်သို့ရှင်းပြမည်နည်း။

^၁၆ ဂါမလျေလ၏အကြံပေးချက်သည် ကျိုးကြောင်းခိုင်လုံပြီး ကျွန်ုပ်တို့အကျိုးအတွက် အချို့ထောက်ခံပြောဆိုသောအခါ ယင်းကို ကျွန်ုပ်တို့တန်ဖိုးထားလေးမြတ်ကြသည်။ တရားမျှတသောစိတ်ထားရှိ တရားသူကြီးများ၏ တရားရုံးဆုံးဖြတ်ချက်များကြောင့် လွတ်လပ်စွာဝတ်ပြုကိုးကွယ်ခွင့်ရခဲ့ကြောင်းကို ကျွန်ုပ်တို့အသိအမှတ်ပြုကြသည်။ မှန်ပါသည်၊ ဘုရားသခင့်နှုတ်မြွက်စကားတော်ကို ကျွန်ုပ်တို့လိုက်နာစွဲကိုင်ထားခြင်းကို ခရစ်ယာန်ဘောင်ဓမ္မဆရာများနှင့် မှားယွင်းသောဘာသာရေးကမ္ဘာ့အင်ပါယာဖြစ်သည့် မဟာဗာဗုလုန်၏ အခြားဘာသာရေးခေါင်းဆောင်များ မနှစ်သက်ကြပါ။ (ဗျာဒိတ် ၁၈:၁-၃) သူတို့နှင့် သူတို့၏သြဇာအလွှမ်းခံရသူများက ကျွန်ုပ်တို့ကိုဆန့်ကျင်တိုက်ခိုက်ကြသော်လည်း ဤအာမခံချက်ကိုရရှိထားကြသည်– “သင့်တစ်ဖက်၌လုပ်သောလက်နက်တစ်စုံတစ်ခုမျှ အထမမြောက်ရ။ သင့်ကိုတရားတွေ့သောသူမည်သည်ကား၊ အရှုံးခံရလိမ့်မည်။ ထာဝရဘုရား၏ကျွန်တို့သည် ထိုသို့သောအမွေကိုခံရ၍၊ ငါ့ကြောင့် ဖြောင့်မတ်ရာသို့ရောက်ရကြလိမ့်မည်ဟု ထာဝရဘုရားမိန့်တော်မူ၏။”—ဟေရှာယ ၅၄:၁၇။

၁၇။ ဆန့်ကျင်သူများက ကျွန်ုပ်တို့ကိုတိုက်ခိုက်ကြသော်လည်း ကျွန်ုပ်တို့သည် အဘယ်ကြောင့်မကြောက်ရွံ့ကြသနည်း။

^၁၇ ကျွန်ုပ်တို့၏ရန်သူများသည် ကျွန်ုပ်တို့ကို အကြောင်းမဲ့တိုက်ခိုက်ကြသော်လည်း ကျွန်ုပ်တို့မကြောက်ကြပါ။ (ဆာလံ ၁၀၉:၁-၃) ကျွန်ုပ်တို့၏ကျမ်းစာသတင်းတရားကိုမုန်းတီးသူများက ကျွန်ုပ်တို့၏ယုံကြည်ခြင်းကို အလျှော့ပေးလိုက်လျောစေရန် ခြိမ်းခြောက်ကြခြင်းကို မည်သည့်အခါမျှခွင့်ပြုမည်မဟုတ်ပါ။ ကျွန်ုပ်တို့၏ဝိညာဉ်ရေးတိုက်ခိုက်မှု ပြင်းထန်လာဖို့ ကျွန်ုပ်တို့မျှော်လင့်ကြသော်လည်း ရလဒ်ကိုသိထားကြသည်။ ယေရမိနည်းတူ ဤပရောဖက်ပြုချက်စကားများပြည့်စုံသည်ကို ကျွန်ုပ်တို့ကြုံတွေ့ရကြပါလိမ့်မည်– “သူတို့သည် သင့်ကိုစစ်တိုက်၍ မနိုင်ရကြ။ သင့်ကိုကယ်နုတ်ခြင်းငှာ၊ ‘သင်နှင့်အတူငါရှိသည်’ ဟု ထာဝရဘုရားမိန့်တော်မူ၏။” (ယေရမိ ၁:၁၉) မှန်ပါသည်၊ ဘုရားသခင်အားဆန့်ကျင်တိုက်ခိုက်သူများ အောင်မြင်ကြမည်မဟုတ်ကြောင်း ကျွန်ုပ်တို့သိထားကြသည်!

[အောက်ခြေမှတ်ချက်များ]

သင်မည်သို့တုံ့ပြန်မည်နည်း

• ယေဟောဝါ၏ကျေးကျွန်များသည် အဘယ်ကြောင့်တိုက်ခိုက်ခံခဲ့ရကြသနည်း။

• ဆန့်ကျင်သူများသည် ယေဟောဝါ၏လူမျိုးတော်ကို အဘယ်နည်းများဖြင့် တိုက်ခိုက်ခဲ့ကြသနည်း။

• ဘုရားသခင်အားဆန့်ကျင်တိုက်ခိုက်သူများ အောင်မြင်မည်မဟုတ်ဟု ကျွန်ုပ်တို့အဘယ်ကြောင့်စိတ်ချနိုင်သနည်း။

[စာမျက်နှာ ၁၇ ပါ ရုပ်ပုံ]

ယေဟောဝါသည် မိမိနှင့်အတူရှိမည်ဟုယေရမိစိတ်ချခဲ့

[စာမျက်နှာ ၁၈ ပါ ရုပ်ပုံ]

ချွေးတပ်စခန်းမှအသက်ရှင်ကျန်ရစ်ခဲ့သူများ

[စာမျက်နှာ ၁၈ ပါ ရုပ်ပုံ]

ယေဟောဝါသက်သေများကို အုပ်စုဖြင့်အကြမ်းဖက်ဆန့်ကျင်ခြင်း

[စာမျက်နှာ ၁၈ ပါ ရုပ်ပုံ]

ဂျေ. အက်ဖ်. ရပ်သဖော့ဒ်နှင့်အပေါင်းပါများ

[စာမျက်နှာ ၂၁ ပါ ရုပ်ပုံ]

ယေရှု၏အဖြစ်အပျက်တွင် ဘုရားသခင်အားဆန့်ကျင်သူများ မအောင်မြင်ခဲ့ပါ