ဘုရားသခင့်နိုင်ငံတော်ကြွေးကြော်သူများမှတ်တမ်း

ဆွီဒင်တွင် မျက်မှောက်ခေတ်အာဇာနည်များ သက်သေခံကြ

“သက်သေခံ” ဟုပြန်ဆိုသောစကားလုံးအတွက် ဂရိစကားလုံးမှာ မာတရ် ဖြစ်၏၊ ၎င်းမှ အင်္ဂလိပ်စကားလုံး “မာတရ်” (အာဇာနည်) ဖြစ်လာသည်၊ အဓိပ္ပာယ်ကား “မိမိ၏သေခြင်းဖြင့် သက်သေခံသူ” ဖြစ်၏။ ပထမရာစုခရစ်ယာန်များစွာသည် သူတို့၏ယုံကြည်ခြင်းအတွက် သေခြင်းအားဖြင့် ယေဟောဝါအကြောင်း သက်သေခံခဲ့ကြသည်။

အလားတူစွာ ၂၀ ရာစုတွင် ထောင်နှင့်ချီသော သက်သေခံများသည် နိုင်ငံရေးနှင့် အမျိုးသားရေးကိစ္စရပ်များတွင် ကြားနေမှုကိုထိန်းသိမ်းခဲ့ကြသောကြောင့် ဟစ်တလာ၏သြဇာခံများလက်ချက်ဖြင့် သေဆုံးခဲ့ကြရသည်။ ထိုမျက်မှောက်ခေတ် အာဇာနည်များသည်လည်း တန်ခိုးပါသောသက်သေခံချက်ကို ဖြစ်ပေါ်စေကြသည်။ ဆွီဒင်နိုင်ငံတွင် မကြာမီက ထိုသို့ဖြစ်ပျက်ခဲ့၏။

ဒုတိယကမ္ဘာစစ်ပြီးဆုံးခြင်း၏ အနှစ် ၅၀ မြောက်နှစ်ပတ်လည်နေ့နှင့်ပတ်သက်၍ ဆွီဒင်အစိုးရသည် မီးလောင်တိုက်သွင်းခြင်းအကြောင်း ပညာပေးရေး လှုပ်ရှားမှုတစ်ရပ်ကို တစ်နိုင်ငံလုံးအနှံ့ အစပြုခဲ့သည်။ ထိုစီမံကိန်းကို သက်ရှိသမိုင်းဟု ခေါ်ဆိုကြသည်။ ထိုတွင် ယေဟောဝါသက်သေများပါဝင်ပြီး သူတို့၏တွေ့ ကြုံမှုများကိုတင်ပြကြရန် ဖိတ်ခေါ်ခဲ့သည်။

ယေဟောဝါသက်သေများက မီးလောင်တိုက်သွင်းခံရသည့် မေ့လျော့ခံရသောသားကောင်များခေါင်းစဉ်ဖြင့် ပြပွဲတစ်ခုကို တင်ဆက်ပြသခဲ့ကြသည်။ ၎င်းကို စထရင်းနက်စ်ရှိ ယေဟောဝါသက်သေများ၏ စည်းဝေးခန်းမကြီးတွင် စတင်ဖွင့်လှစ်ပြသခဲ့သည်။ ပထမနေ့၌ တက်ရောက်လာကြသူ ၈,၄၀၀ ကျော်အား မီးလောင်တိုက်သွင်းခြင်းမှ လွတ်မြောက်လာခဲ့သူ သက်သေခံများသည် မိမိတို့၏အတွေ့အကြုံများကို ပြောပြခဲ့ကြသည်! ၁၉၉၉ နှစ်ကုန်ပိုင်းတွင် ဆွီဒင်တစ်ဝန်းရှိ ပြတိုက်နှင့် လူထုစာကြည့်တိုက်ပေါင်း ၁၀၀ ကျော်တွင် ထိုပြပွဲကို ပြသခဲ့ရာ လူပေါင်း ၁၅၀,၀၀၀ ခန့်ကြည့်ရှုခဲ့ကြရသည်။ လည်ပတ်ကြည့်ရှုသူများတွင် အစိုးရအရာရှိအများအပြားပါဝင်ခဲ့ပြီး သူတို့က မြင်တွေ့သမျှကို ချီးမွမ်းပြောဆိုခဲ့ကြ၏။

ဆွီဒင်နိုင်ငံတွင် ယေဟောဝါသက်သေများ၏ လုပ်ဆောင်မှုများနှင့်စပ်လျဉ်း၍ အခြားမည်သည့်ဖြစ်ရပ်မျှ ဤပြပွဲလောက် ကျယ်ကျယ်ပြန့်ပြန့် ထုတ်လွှင့်တင်ပြခြင်းမရှိခဲ့ပေ၊ လူအများ၏နှစ်သက်လက်ခံမှုကိုလည်း ဤမျှလောက် မရရှိခဲ့ဖူးချေ။ လာရောက်ကြည့်ရှုသူများစွာက “မီးလောင်တိုက်သွင်းခြင်းတွေ့ ကြုံမှုတွေကို အရင်က ဘာကြောင့်မပြောပြတာလဲ” ဟုမေးခဲ့ကြ၏။

အသင်းတော်တစ်ခု၏ဒေသအတွင်း ထိုပြပွဲကိုပြသပြီးနောက် အိမ်တွင်းကျမ်းစာသင်အံမှု ၃၀ ရာခိုင်နှုန်းတိုးတက်လာကြောင်း သတင်းပို့သည်! သက်သေခံတစ်ဦးသည် ပြပွဲသွားကြည့်ရန် အလုပ်ဖော်တစ်ဦးကိုဖိတ်ခေါ်ခဲ့၏။ အလုပ်ဖော်သည် ဝမ်းပန်းတသာလက်ခံကာ သူငယ်ချင်းတစ်ယောက်ကိုပါ ခေါ်လာခဲ့သည်။ ပြပွဲအပြီးတွင် သူငယ်ချင်းဖြစ်သူက မိမိတို့၏ယုံကြည်ခြင်းကိုစွန့်ကြောင်း လက်မှတ်ထိုးမည့်အစား သေဒဏ်စီရင်ခံလိုကြသည့်အထိ ခိုင်မြဲသောယုံကြည်ခြင်းမျိုး မည်သို့ရှိနိုင်သည်ကို နားလည်ရခက်ကြောင်း ပြောပြသည်။ ဤမှ ထပ်ဆင့်ဆွေးနွေးစရာများ ပေါ်ပေါက်လာ၍ ထိုသူနှင့်ကျမ်းစာသင်အံမှု စတင်ပြုလုပ်နိုင်ခဲ့သည်။

၂၀ ရာစုမှ တည်ကြည်သောဤအာဇာနည်များသည် ပထမရာစုမှ သူတို့၏အပေါင်းအဖော်များနည်းတူ ယေဟောဝါသာလျှင် စစ်မှန်သောဘုရားသခင်တစ်ဆူတည်းဖြစ်၍ ကျွန်ုပ်တို့၏ ခိုင်မြဲသောယုံကြည်ခြင်းနှင့် တည်ကြည်မှုကိုရထိုက်ကြောင်း ရဲရင့်စွာသက်သေခံခဲ့ကြပြီ။—ဗျာဒိတ် ၄:၁၁။

[Picture Credit Line on page 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives