ဘုရားသခင့်အလင်းတော်က မှောင်မိုက်ကိုပျောက်လွင့်စေ!

“[ယေဟောဝါ] သည် အကျွန်ုပ်၏မှောင်မိုက်ကို လင်းစေတော်မူ၏။”—၂ ဓမ္မရာဇဝင် ၂၂:၂၉။

၁။ အလင်းသည် အသက်နှင့်မည်သို့ ဆက်စပ်သနည်း။

“ဘုရားသခင်ကလည်း ‘အလင်းဖြစ်စေ’ ဟုအမိန့်တော်ရှိ၍ အလင်းဖြစ်လေ၏။” (ကမ္ဘာဦး ၁:၃) ထိုအရေးပါသောစကားများဖြင့် ကမ္ဘာဦးကျမ်းဖန်ဆင်းခြင်းမှတ်တမ်းက ယေဟောဝါကို အလင်း၏ရင်းမြစ်အဖြစ်ဖော်ပြသည်၊ အလင်းမရှိလျှင် မြေကြီးပေါ်အသက်ဟူသည် မရှိနိုင်ပေ။ ယေဟောဝါသည် ကျွန်ုပ်တို့၏ဘဝလမ်းညွှန်အတွက် အရေးပါသော ဝိညာဉ်ရေးအလင်း၏ရင်းမြစ်လည်းဖြစ်တော်မူ၏။ (ဆာလံ ၄၃:၃) “ကိုယ်တော်ထံမှာ အသက်စမ်းရေတွင်းရှိပါ၏။ အလင်းတော်ထဲမှာ အကျွန်ုပ်တို့သည် အလင်းကိုရကြပါ၏” ဟုရေးသားသောအခါ ဝိညာဉ်ရေးအလင်းနှင့် အသက်တို့အကြားရှိ အနီးကပ်ဆက်စပ်မှုကို ဘုရင်ဒါဝိဒ်တင်ပြခဲ့သည်။—ဆာလံ ၃၆:၉။

၂။ ပေါလုတင်ပြခဲ့သကဲ့သို့ အလင်းသည် အဘယ်အရာနှင့် အနီးကပ်ဆက်စပ်နေသနည်း။

^၂ ဒါဝိဒ်လက်ထက်မှ အနှစ် ၁,၀၀၀ ခန့်အကြာတွင် တမန်တော်ပေါလုသည် ဖန်ဆင်းခြင်းမှတ်တမ်းကို ရည်ညွှန်းခဲ့သည်။ ကောရိန္သုမြို့ရှိ ခရစ်ယာန်အသင်းတော်ထံရေးသားရာ၌ “‘မှောင်မိုက်ထဲက အလင်းထွန်းလင်းရမည်’ ဟု မိန့်တော်မူသောဘုရားသခင်” ဟုသူဆိုခဲ့သည်။ ထို့နောက် ဝိညာဉ်ရေးအလင်းသည် ယေဟောဝါထံမှအသိပညာနှင့် အနီးကပ်ဆက်စပ်နေကြောင်း ဤသို့ထပ်ဆင့်တင်ပြခဲ့သည်– “ယေရှုခရစ်၏မျက်နှာတော်၌ထွန်းလင်းသော ဘုရားသခင်၏ဘုန်းတော်ကိုသိသော ဉာဏ်၏အလင်းကိုပေးလိုသောငှာ ငါတို့စိတ်နှလုံးထဲ၌ ထွန်းလင်းစေတော်မူ၏။” (၂ ကောရိန္သု ၄:၆၊ သမ္မာ) ကျွန်ုပ်တို့အပေါ်သို့ ဤအလင်း မည်သို့သက်ရောက်သနည်း။

သမ္မာကျမ်းစာ—အလင်းထုတ်ကိရိယာ

၃။ ယေဟောဝါသည် သမ္မာကျမ်းစာမှတစ်ဆင့် အဘယ်အလင်းကို ပေးသနားတော်မူသနည်း။

^၃ ယေဟောဝါသည် ဝိညာဉ်ရေးအလင်းကို အဓိကအားဖြင့် မိမိ၏မှုတ်သွင်းခံသမ္မာကျမ်းစာမှတစ်ဆင့် သက်ရောက်စေတော်မူ၏။ ထို့ကြောင့် ကျွန်ုပ်တို့သည် သမ္မာကျမ်းစာကိုလေ့လာပြီး ဘုရားသခင့်ထံတော်မှအသိပညာကို နှလုံးသွင်းကြသောအခါ မိမိတို့အပေါ် အလင်းထွန်းလင်းနေစေရာရောက်သည်။ သမ္မာကျမ်းစာမှတစ်ဆင့် မိမိ၏ရည်ရွယ်တော်မူချက်များအပေါ် ယေဟောဝါအလင်းထွန်းလင်းတော်မူပြီး ကိုယ်တော်၏အလိုတော်ကို ကျွန်ုပ်တို့မည်သို့ထမ်းဆောင်နိုင်ကြောင်း ဖော်ပြတော်မူ၏။ ယင်းက ကျွန်ုပ်တို့၏ဘဝကိုရည်ရွယ်ချက်ရှိစေပြီး ဝိညာဉ်ရေးလိုအပ်ချက်များကို ဖြည့်ဆည်းပေးရန် ထောက်ကူသည်။ (ဒေ. ၁၂:၁; မဿဲ ၅:၃) ကိုယ်တော်သည် ကျွန်ုပ်တို့၏ဝိညာဉ်ရေးလိုအပ်ချက်များအား ဂရုစိုက်ရမည်ဖြစ်ကြောင်း မောရှေပညတ်ကိုကိုးကား၍ ဤသို့အလေးပေးဖော်ပြခဲ့သည်– “‘လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည်’ ကျမ်းစာလာသည်။”—မဿဲ ၄:၄; တရားဟောရာ ၈:၃။

၄။ ယေရှုသည် အဘယ်နည်းဖြင့် “ဤလောက၏အလင်း” ဖြစ်တော်မူသနည်း။

^၄ ယေရှုသည် ဝိညာဉ်ရေးအလင်းနှင့် အနီးကပ်ဆက်စပ်နေသည်။ အမှန်မှာ၊ မိမိကိုယ်တိုင်ကို “ဤလောက၏အလင်း” အဖြစ်ဖော်ပြပြီး “ငါ့နောက်သို့လိုက်သောသူသည် မှောင်မိုက်၌မသွားမလာ၊ အသက်၏အလင်းကိုရလိမ့်မည်” ဟုမိန့်ဆိုခဲ့သည်။ (ယောဟန် ၈:၁၂) ဤအသုံးအနှုန်းက ယေဟောဝါ၏အမှန်တရားကို လူတို့အားသိစေရေးတွင် ယေရှုသည် အဓိကအခန်းကဏ္ဍမှပါဝင်သည်ကို ကျွန်ုပ်တို့အားနားလည်စေသည်။ မှောင်မိုက်ကိုရှောင်၍ ဘုရားသခင့်အလင်းတော်၌ ကျွန်ုပ်တို့လျှောက်လှမ်းဖို့ဆိုလျှင် ယေရှုမိန့်တော်မူသမျှကိုနားထောင်၍ သမ္မာကျမ်းစာပါ ကိုယ်တော်၏ပုံသက်သေနှင့် သွန်သင်ချက်များကို အနီးကပ်လိုက်လျှောက်ကြရမည်။

၅။ ယေရှုသေဆုံးပြီးနောက် ကိုယ်တော့်နောက်လိုက်များသည် အဘယ်တာဝန်ရှိခဲ့ကြသနည်း။

^၅ ယေရှုမသေဆုံးမီ ရက်အနည်းငယ်အလိုတွင် မိမိကိုယ်ကို အလင်းအဖြစ် ထပ်မံရည်ညွှန်းပြီး တပည့်တော်များကို ဤသို့မိန့်ဆိုခဲ့သည်– “အလင်းသည် သင်တို့တွင်ခဏသာရှိ၏။ အလင်းရှိစဉ်အခါ သွားလာကြလော့။ သို့မဟုတ်လျှင် မှောင်မိုက်သည် သင်တို့ကိုမီလိမ့်မည်။ မှောင်မိုက်၌သွားသောသူသည် အဘယ်ဆီသို့မိမိသွားသည်ကို မိမိမသိ။ အလင်းရှိစဉ်အခါ အလင်း၏သားဖြစ်အံ့သောငှာ အလင်းကိုယုံကြည်ကြလော့။” (ယောဟန် ၁၂:၃၅၊ ၃၆) အလင်း၏သားများဖြစ်လာသူတို့သည် သမ္မာကျမ်းစာ၏ “ကျန်းခံ့ရေးတရားပုံစံကို” သင်ယူခဲ့ကြသည်။ (၂ တိမောသေ ၁:၁၃၊ ၁၄၊ သမ) ထို့နောက် သူတို့သည် ဤကျန်းခံ့ရေးတရားစကားကို အသုံးပြုလျက် အခြားစိတ်နှလုံးရိုးဖြောင့်သူများကို မှောင်မိုက်မှ ဘုရားသခင့်အလင်းတော်ထဲသို့ ခေါ်ဆောင်လာကြသည်။

၆။ ၁ ယောဟန် ၁:၅ တွင် အလင်းနှင့် မှောင်မိုက်ဆိုင်ရာ အဘယ်အခြေခံအမှန်တရားကို ကျွန်ုပ်တို့တွေ့ရှိရသနည်း။

^၆ တမန်တော်ယောဟန်က “ဘုရားသခင်သည် အလင်းဖြစ်တော်မူ၏။ ဘုရားသခင်၌ မှောင်မိုက်အလျှင်းမရှိ” ဟုရေးသားခဲ့သည်။ (၁ ယောဟန် ၁:၅) ဤတွင် အလင်းနှင့် မှောင်မိုက်၏ကွဲပြားခြားနားမှုကို သတိပြုပါ။ ဝိညာဉ်ရေးအလင်းသည် ယေဟောဝါထံမှ စတင်ပေါ်ပေါက်လာပြီး ကိုယ်တော်နှင့် ဝိညာဉ်ရေးမှောင်မိုက် မပူးပေါင်းနိုင်ချေ။ သို့ဖြစ်၍ မှောင်မိုက်၏ရင်းမြစ်မှာ အဘယ်သူနည်း။

ဝိညာဉ်ရေးမှောင်မိုက်—ရင်းမြစ်

၇။ လောက၏ဝိညာဉ်ရေးမှောင်မိုက်နောက်တွင် အဘယ်သူရှိသနည်း၊ သူ၌ အဘယ်သြဇာအာဏာရှိသနည်း။

^၇ တမန်တော်ပေါလုသည် “ဤလောကကိုအစိုးရသောဘုရား[သခင်]” အကြောင်းပြောခဲ့သည်။ စာတန်ကို ထိုအသုံးအနှုန်းဖြင့် သူရည်ညွှန်းခဲ့သည်။ ထိုပုဂ္ဂိုလ်နှင့်ပတ်သက်၍ ဤသို့လည်းသူဆိုခဲ့သည်– “ထိုသို့မယုံကြည်သောသူတို့ကား၊ ဘုရားသခင်၏ပုံသဏ္ဌာန်တော်တည်းဟူသော ခရစ်တော်၏ဘုန်းအသရေနှင့်ပြည့်စုံသော ဧဝံဂေလိတရား၏အရောင်သည် အလင်းကိုမပေးစေခြင်းငှာ . . . သူတို့၏ဉာဏ်မျက်စိကိုကွယ်စေ၏။” (၂ ကောရိန္သု ၄:၄) ဘုရားသခင်ကိုယုံကြည်သည်ဟုဆိုသူများစွာရှိ၏; သို့တိုင် ထိုသူတို့အနက် စာတန်ကိုမယုံကြည်သူ တိုးများလာသည်။ အဘယ်ကြောင့်နည်း။ အချို့သောမကောင်းဆိုးဝါး၊ လူထက်တန်ခိုးကြီးမားသူများရှိနေနိုင်ပြီး မိမိတို့၏တွေးခေါ်ပုံကို ဩဇာလွှမ်းနိုင်ကြောင်း သူတို့လက်မခံလိုကြချေ။ သို့သော် ပေါလုတင်ပြသကဲ့သို့ စာတန်အမှန်တည်ရှိပြီး အမှန်တရား၏အလင်းကိုမမြင်နိုင်စေဖို့ လူတို့ကိုတကယ်ပင် ဩဇာလွှမ်းမိုးထားသည်။ “ဤလောကတစ်နိုင်ငံလုံးကိုလှည့်ဖြား . . . သူ” အဖြစ် သူ့အကြောင်းပရောဖက်ပြုဖော်ပြရာ၌ လူ့အတွေးအခေါ်ကိုလွှမ်းမိုးလိုသော စာတန်၏တန်ခိုးကို တွေ့မြင်ရသည်။ (ဗျာဒိတ် ၁၂:၉) စာတန်၏လုပ်ဆောင်မှုများကြောင့် “ကြည့်ရှုလော့။ မှောင်မိုက်သည် မြေကြီးကိုဖုံးလွှမ်းလိမ့်မည်။ ထူထပ်သောမှောင်မိုက်သည် လူများကိုဖုံးလွှမ်းလိမ့်မည်” ဟူသော ပရောဖက်ဟေရှာယကြိုဟောခဲ့သည့်အခြေအနေသည် ယေဟောဝါအားဝတ်ပြုသူတို့မှလွဲ၍ လူသားအားလုံးနှင့် ယခုသက်ဆိုင်လျက်ရှိသည်။—ဟေရှာယ ၆၀:၂။

၈။ ဝိညာဉ်ရေးမှောင်မိုက်၌ရှိသူတို့သည် မိမိတို့မျက်စိလည်နေကြောင်း အဘယ်နည်းများဖြင့် တင်ပြကြသနည်း။

^၈ ထူထပ်သောမှောင်မိုက်ထဲတွင် အဘယ်အရာကိုမျှမတွေ့မြင်နိုင်ချေ။ မျက်စိလည်လမ်းပျောက်သွားဖို့လွယ်သည်။ အလားတူ ဝိညာဉ်ရေးမှောင်မိုက်၌ရှိသူတို့သည် အမြော်အမြင်မရှိဘဲ မကြာမီ ဝိညာဉ်ရေးသဘောအရ မျက်စိလည်လာကြသည်။ အမှန်နှင့်အမှား၊ အကောင်းနှင့်အဆိုးကို ခွဲခြားနိုင်စွမ်း ပျောက်သွားနိုင်သည်။ အဆိုပါမှောင်မိုက်ထဲရှိသူတို့နှင့်စပ်လျဉ်း၍ ပရောဖက်ဟေရှာယဤသို့ရေးသားခဲ့သည်– “မကောင်းကိုအကောင်း၊ အကောင်းကိုမကောင်းဟုခေါ်တတ်သောသူ၊ အလင်းအရာ၌အမိုက်၊ အမိုက်အရာ၌အလင်းကိုလည်းကောင်း၊ အချိုအရာ၌အခါး၊ အခါးအရာ၌အချိုကိုလည်းကောင်း အလွဲယူတတ်သောသူတို့သည် အမင်္ဂလာရှိကြ၏။” (ဟေရှာယ ၅:၂၀) ဝိညာဉ်ရေးမှောင်မိုက်၌ရှိသူတို့သည် မှောင်မိုက်၏ဘုရားသခင်စာတန်၏ ဩဇာလွှမ်းမှုကိုခံရကြသည်ဖြစ်၍ အလင်းနှင့်အသက်၏ရင်းမြစ်မှ ကင်းကွာနေကြသည်။—ဧဖက် ၄:၁၇-၁၉။

အမှောင်ထုမှ အလင်းသို့—အခက်အခဲများ

၉။ အမှားပြုသူတို့သည် ပကတိအရရော ဝိညာဉ်သဘောအရပါ မှောင်မိုက်ကို မည်သို့စွဲလမ်းနှစ်သက်ကြောင်း ရှင်းပြပါ။

^၉ တည်ကြည်သူယောဘက အမှားပြုသူများသည် ပကတိအမှောင်ထုကိုစွဲလမ်းနှစ်သက်ကြောင်း ဤသို့ရေးသားထောက်ပြခဲ့သည်– “သူ့မယားကိုခိုးသောသူသည် ညဦးယံအချိန်ကိုမျှော်လင့်၍ မိမိမျက်နှာကိုဖုံးလျက် အဘယ်သူမျှမမြင်ရဟု ဆိုတတ်၏။” (ယောဘ ၂၄:၁၅) ထို့ပြင် အမှားပြုသူတို့သည် ဝိညာဉ်ရေးအမှောင်ထု၌ရှိကြပြီး ၎င်းမှောင်မိုက်သည် ကိုယ့်ကိုယ်ကိုအစိုးမရအောင် ပြုလုပ်နိုင်သည်။ တမန်တော်ပေါလုက ထိုအမှောင်ထုအောက် ရောက်နေသူတို့၌ လိင်ဆိုင်ရာအကျင့်ယိုယွင်းခြင်း၊ ခိုးခြင်း၊ လောဘလွန်ကျူးခြင်း၊ သောက်ကြူးခြင်း၊ ဆဲရေးကဲ့ရဲ့ခြင်းနှင့် အနိုင်အထက်လုယူခြင်းတို့မှာ ဖြစ်နေကျအရာများဖြစ်သည်ဟုဆို၏။ သို့သော် ဘုရားသခင့်နှုတ်မြွက်စကားတော်၏အလင်းသို့ ရောက်လာသူမည်သူမဆို ပြောင်းလဲနိုင်ပါသည်။ ထိုသို့ပြောင်းလဲနိုင်ကြောင်းကို ကောရိန္သုမြို့သားများထံရေးသောစာ၌ ပေါလုရှင်းလင်းဖော်ပြသည်။ ကောရိန္သုမြို့သားခရစ်ယာန်များစွာသည် မှောင်မိုက်အကျင့်များကို ပြုကျင့်ခဲ့ကြသော်လည်း သူတို့ကိုပေါလုဤသို့ပြောခဲ့သည်– “အထက်ကသင်တို့တွင် အချို့သောသူတို့သည် ထိုသို့သောသူဖြစ်ကြသော်လည်း၊ ယခုတွင် သခင်ယေရှု၏နာမတော်အားဖြင့်လည်းကောင်း၊ ငါတို့ဘုရားသခင်၏ဝိညာဉ်တော်အားဖြင့်လည်းကောင်း ဆေးကြောသန့်ရှင်း၍ ဖြောင့်မတ်ရာသို့ရောက်ကြပြီ။”—၁ ကောရိန္သု ၆:၉-၁၁။

၁၀၊ ၁၁။ (က) ယေရှုသည် လူတစ်ဦးကို မျက်စိအလင်းပြန်ရစေရာတွင် မည်သို့ထောက်ထားစာနာမှုပြခဲ့သနည်း။ (ခ) များစွာသောသူတို့သည် အဘယ်ကြောင့် အလင်းကို မရွေးချယ်ကြသနည်း။

^၁၀ အမှောင်ထုထဲမှ လူတစ်ဦး အလင်းသို့ရောက်လာသောအခါ မျက်စိကျင့်သားရဖို့ အချိန်အနည်းငယ်လိုကောင်းလိုပေမည်။ ဗက်ဇဲဒမြို့တွင် ယေရှုသည် မျက်မမြင်တစ်ဦးကို ကုသပေးခဲ့သည်၊ သို့သော် ယင်းကို ကြင်နာစွာဖြင့် တစ်ဆင့်ပြီး တစ်ဆင့်ကုသပေးခဲ့သည်။ “ကိုယ်တော်သည် လူကန်းကိုလက်ဆွဲ၍ မြို့ပြင်သို့ထွက်ပြီးမှ၊ သူ၏မျက်စိကိုတံတွေးနှင့်ထွေး၍ သူ့အပေါ်မှာလက်တော်ကိုတင်လျက်၊ ‘သင်သည်တစ်စုံတစ်ခုကိုမြင်သလော’ ဟု မေးတော်မူ၏။ ထိုသူသည်ကြည့်မျှော်လျှင်၊ ‘လူတို့သည် သစ်ပင်ကဲ့သို့ဖြစ်၍ လှမ်းသွားသည်ကို အကျွန်ုပ်မြင်ပါသည်’ ဟုလျှောက်၏။ နောက်တစ်ဖန် သူ၏မျက်စိပေါ်မှာလက်တော်ကိုတင်၍ ကြည့်မျှော်စေတော်မူလျှင်၊ သူသည်ပကတိအဖြစ်သို့ရောက်၍ အလုံးစုံတို့ကိုရှင်းလင်းစွာမြင်လေ၏။” (မာကု ၈:၂၃-၂၅) ယေရှုသည် တောက်ပသောနေရောင်ကို ထိုသူ ကျင့်သားရနိုင်ဖို့ တဖြည်းဖြည်းအလင်းပြန်ရအောင် ပြုလုပ်ပေးခဲ့ခြင်းဖြစ်ဟန်တူသည်။ မျက်စိမြင်နိုင်သောအခါ ထိုသူဝမ်းမြောက်ဝမ်းသာဖြစ်နေပုံကို ကျွန်ုပ်တို့မြင်ယောင်ကြည့်နိုင်သည်။

^၁၁ သို့ရာတွင် ဝိညာဉ်ရေးအမှောင်ထုမှ အမှန်တရားအလင်းသို့ တစ်ဆင့်ပြီးတစ်ဆင့် ထွက်လာစေဖို့ ကူညီခံခဲ့ရသူတို့၏ ရွှင်လန်းမှုသည် ထိုသူ၏ရွှင်လန်းမှုထက် သာလွန်သည်။ သူတို့၏ပျော်ရွှင်မှုကို ကျွန်ုပ်တို့တွေ့မြင်ရသောအခါ အခြားသူများမူ အဘယ်ကြောင့် အလင်းသို့ဆွဲဆောင်မခံရသနည်းဟု စဉ်းစားမိပေမည်။ အကြောင်းရင်းကို ယေရှုဤသို့ဖော်ပြသည်– “အပြစ်စီရင်ခြင်းကိုခံရကြောင်းကား၊ အလင်းသည်ဤလောကသို့ဝင်၍၊ လူတို့သည် မကောင်းသောအကျင့်ကိုကျင့်သောကြောင့်၊ အလင်းထက် မှောင်မိုက်ကိုသာ၍နှစ်သက်ကြ၏။ ဆိုးယုတ်သောအကျင့်ကိုကျင့်သောသူအပေါင်းတို့သည် အလင်းကိုမြင်ပြင်း၍ မိမိတို့အကျင့်၌အပြစ်ပါသည်ကို မထင်ရှားစေခြင်းငှာ အလင်းသို့မချဉ်းကပ်ကြ။” (ယောဟန် ၃:၁၉၊ ၂၀) မှန်ပါ၏၊ “ဆိုးယုတ်သောအကျင့်” များ—အကျင့်ယိုယွင်းခြင်း၊ နိုင်ထက်စီးနင်းပြုမူခြင်း၊ လိမ်လည်ခြင်း၊ ဖြတ်စားလျှပ်စားလုပ်ခြင်းနှင့် ခိုးခြင်းစသည်တို့—ကို ပြုကျင့်လိုကြသူများစွာရှိပြီး စာတန်၏ဝိညာဉ်ရေးအမှောင်ထုက သူတို့အလိုရှိသည်အတိုင်းပြုနိုင်ဖို့ အလွန်ကောင်းသောဝန်းကျင်တစ်ခုဖြစ်သည်။

အလင်း၌တိုးတက်နေစေခြင်း

၁၂။ အလင်းသို့ရောက်ရှိလာခြင်းကြောင့် ကျွန်ုပ်တို့အဘယ်နည်းများဖြင့် အကျိုးရရှိခဲ့ပြီနည်း။

^၁၂ အလင်းနှင့်ဆိုင်သောအသိပညာကို ကျွန်ုပ်တို့သိထားကြရာ ကျွန်ုပ်တို့ကိုယ်နှိုက်တွင် အဘယ်ပြောင်းလဲမှုများပြုလိုက်သည်ကို တွေ့ရသနည်း။ တစ်ခါတစ်ရံ ကျွန်ုပ်တို့ပြုလုပ်ခဲ့သော ဝိညာဉ်ရေးတိုးတက်မှုကို ပြန်ပြောင်းစဉ်းစားသုံးသပ်ကြည့်သင့်သည်။ အဘယ်အကျင့်ဆိုးများကို ကျွန်ုပ်တို့စွန့်ပယ်လိုက်ပြီနည်း။ အဘယ်ဘဝပြဿနာများကို ကျွန်ုပ်တို့ပြုပြင်တည့်မတ်နိုင်ခဲ့ပြီနည်း။ အနာဂတ်အတွက် ကျွန်ုပ်တို့၏စီမံကိန်းများ မည်သို့ပြောင်းလဲသွားပြီနည်း။ ယေဟောဝါ၏ခွန်အားနှင့် ကိုယ်တော်၏သန့်ရှင်းသောဝိညာဉ်တော်အကူအညီဖြင့် ကျွန်ုပ်တို့သည် အလင်းကိုတုံ့ပြန်နေကြောင်းတင်ပြမည့် ဥပဓိရုပ်နှင့် စဉ်းစားတွေးခေါ်ပုံတို့ကို ဆက်၍ပြောင်းလဲနိုင်ကြသည်။ (ဧဖက် ၄:၂၃၊ ၂၄) ယင်းကိုပေါလုဤသို့ဆို၏– “အထက်ကာလ၌ သင်တို့သည် မှောင်မိုက်အတိဖြစ်ကြ၏။ ယခုမူကား သခင်ဘုရား၌အလင်းဖြစ်ကြ၏။ သို့ဖြစ်၍ အလင်း၏သားကဲ့သို့ကျင့်နေကြလော့။ အလင်းတော်၏အကျိုးမူကား၊ အလုံးစုံသောကောင်းမွန်ခြင်း၊ ဖြောင့်မတ်ခြင်း၊ [တည်ကြည်] ခြင်းဖြစ်သတည်း။” (ဧဖက် ၅:၈၊ ၉) ကျွန်ုပ်တို့ကိုယ်ကို ယေဟောဝါ၏အလင်းတော် လမ်းညွှန်ရန် ခွင့်ပေးခြင်းက မျှော်လင့်ချက်နှင့် ရည်ရွယ်ချက်ရှိစေသည်သာမက ကျွန်ုပ်တို့ဝန်းကျင်ရှိသူတို့၏အသက်တာများကိုလည်း တိုးတက်စေသည်။ ဤသို့သောပြောင်းလဲမှုများပြုခြင်းက ယေဟောဝါ၏နှလုံးတော်ကို ရွှင်ပြုံးစေလိုက်မည်ဖြစ်ခြင်း!—သု. ၂၇:၁၁။

၁၃။ ယေဟောဝါ၏အလင်းတော်အတွက် ကျေးဇူးတင်ကြောင်း ကျွန်ုပ်တို့မည်သို့တင်ပြနိုင်သနည်း၊ ယင်းသို့သောလမ်းစဉ်အတွက် အဘယ်အရာလိုသနည်း။

^၁၃ ယေဟောဝါ၏အလင်းတော်ကို ထင်ရှားစေခြင်းဖြင့် ကျွန်ုပ်တို့ရရှိထားသော ပို၍ပျော်ရွှင်သည့်အသက်တာအတွက် ကျေးဇူးတင်ကြောင်းဖော်ပြကြသည်၊ သမ္မာကျမ်းစာမှ ကျွန်ုပ်တို့သင်ယူခဲ့ရာများကို မိသားစုဝင်များ၊ မိတ်ဆွေများနှင့် အိမ်နီးနားချင်းများကိုဝေမျှခြင်းဖြင့် ထိုအလင်းကို ထင်ရှားစေကြသည်။ (မဿဲ ၅:၁၂-၁၆; ၂၄:၁၄) ကျွန်ုပ်တို့၏ဟောပြောခြင်းနှင့်အတူ စံထားလောက်သော ခရစ်ယာန်ဘဝလမ်းစဉ်သည် နားမထောင်လိုသူတို့အတွက် ပြစ်တင်ဆုံးမချက်ဖြစ်လာသည်။ ပေါလုဤသို့ရှင်းပြသည်– “သခင်ဘုရားနှစ်သက်တော်မူသောအရာသည် အဘယ်အရာဖြစ်သည်ကို သင်ကြလော့။ အကျိုးမဲ့သောမှောင်မိုက်အမှုတို့နှင့် မဆက်ဆံသည်သာမက၊ ထိုအမှုတို့၏အပြစ်ကိုပြကြလော့။” (ဧဖက် ၅:၁၀၊ ၁၁) မှောင်မိုက်ကိုစွန့်စေ၍ အလင်းကိုရွေးချယ်စေဖို့ သူတစ်ပါးကိုကူညီပေးရန် ကျွန်ုပ်တို့ဘက်မှသတ္တိရှိဖို့ လိုအပ်သည်။ ထို့ထက်ကား၊ သူတစ်ပါးကို သနားကြင်နာ၍ အရေးထားဖို့နှင့် သူတို့၏ထာဝရအကျိုးအတွက် အမှန်တရားအလင်းကို တလိုတလားဝေမျှပေးလိုစိတ်ရှိဖို့လိုသည်။—မဿဲ ၂၈:၁၉၊ ၂၀။

ထောင်ချောက်အလင်းများကို သတိထား!

၁၄။ အလင်းနှင့်ပတ်သက်၍ အဘယ်သတိပေးချက်ကို ကျွန်ုပ်တို့လိုက်နာသင့်သနည်း။

^၁၄ မှောင်မည်းနေချိန်တွင် ပင်လယ်ထဲရှိနေသူတို့အတွက် မည်သည့်အလင်းရောင်မဆိုသည် အားရဝမ်းသာလက်ခံစရာဖြစ်သည်။ ရှေးအခါက မုန်တိုင်းခိုသည့်နေရာတွေ့နိုင်ဖို့ အင်္ဂလန်နိုင်ငံရှိကျောက်ဆောင်များထက်၌ မီးထွန်းထားကြသည်။ ဤအလင်းရောင်များက ဘေးကင်းလုံခြုံသောဆိပ်ကမ်းများသို့ လမ်းညွှန်ပေးသည့်အတွက် သင်္ဘောသားများကျေးဇူးတင်ခဲ့ကြသည်။ သို့သော် အချို့မီးရောင်များမှာ ထောင်ချောက်မီးများဖြစ်ကြသည်။ ဆိပ်ကမ်းတစ်ခုတွေ့မည့်အစား ရေယာဉ်များစွာမှာ လမ်းလွဲခဲ့ကြပြီး ကျောက်ဆောင်ကမ်းပါးများနှင့်တိုက်မိကာ သင်္ဘောပျက်၍ သူတို့၏ကုန်စည်များ အခိုးခံရကြသည်။ ဤလှည့်စားတတ်သောလောကကြီးတွင် ဝိညာဉ်ရေးသင်္ဘောပျက်စေရန် ကျွန်ုပ်တို့အား သွေးဆောင်ဖြားယောင်းနိုင်သည့် ထောင်ချောက်အလင်းများကို သတိပြုရကြမည်။ “စာတန်ပင်လျှင် လင်းသောကောင်းကင်တမန်ဖြစ်ယောင်ဆောင်တတ်၏” ဟုကျွန်ုပ်တို့အား မိန့်မှာထား၏။ ထိုနည်းတူ အယူဖောက်ပြန်သူများပါဝင်သော သူ၏ကျေးကျွန်များသည်လည်း “ဖြောင့်မတ်ခြင်းတရားကိုဟောသောဆရာဖြစ်ယောင်ဆောင်” ကြသည့် “လှည့်ဖြားတတ်သောအမှုစောင့်” များဖြစ်ကြ၏။ ထိုသူတို့၏မှားယွင်းသော ဆင်ခြင်မှုများကို ကျွန်ုပ်တို့လက်ခံသုံးသပ်မည်ဆိုလျှင် ယေဟောဝါ၏နှုတ်မြွက်တော်အမှန်တရားဖြစ်သော သမ္မာကျမ်းစာကိုယုံကြည်စိတ်ချမှု အားပျော့သွားပြီး ယုံကြည်ခြင်းပျောက်ဆုံးသွားနိုင်သည်။—၂ ကောရိန္သု ၁၁:၁၃-၁၅; ၁ တိမောသေ ၁:၁၉။

၁၅။ အသက်ရှင်ခြင်းသို့ရောက်သောလမ်းပေါ် ကျွန်ုပ်တို့ဆက်လျှောက်ရန် အဘယ်အရာကကူညီပေးမည်နည်း။

^၁၅ “နှုတ်[မြွက်]တော်သည် အကျွန်ုပ်ခြေရှေ့မှာ မီးခွက်ဖြစ်၍ အကျွန်ုပ်လမ်းခရီးကိုလင်းစေပါ၏” ဟုဆာလံဆရာရေးသားခဲ့သည်။ (ဆာလံ ၁၁၉:၁၀၅) မှန်ပါသည်၊ “လူအပေါင်းတို့သည် ကယ်တင်ခြင်းသို့ရောက်၍ [အမှန်]တရားကိုသိစေခြင်းငှာ . . . အလိုတော်ရှိ” သော ကျွန်ုပ်တို့၏မေတ္တာရှင်ဘုရားသခင်၊ ယေဟောဝါသည် ‘အသက်ရှင်ခြင်းသို့ရောက်သော ကျဉ်းမြောင်းသည့်လမ်း’ ကို တောက်ပထွန်းလင်းစေတော်မူခဲ့ပြီ။ (မဿဲ ၇:၁၄; ၁ တိမောသေ ၂:၄) ကျမ်းစာသွန်သင်ချက်များကိုကျင့်သုံးခြင်းက ထိုကျဉ်းမြောင်းသောလမ်းမှပြောင်း၍ အမှောင်လမ်းများသို့ သွေဖည်ထွက်မသွားမိစေရန် ကျွန်ုပ်တို့ကိုကာကွယ်ပေးပါလိမ့်မည်။ ပေါလုဤသို့ရေးသားခဲ့သည်– “ကျမ်းစာရှိသမျှသည် ဘုရားရှင်ဝိညာဉ်တော်မှုတ်သွင်းထား၍ သင်ကြားခြင်း၊ အပြစ်ဖော်ပြခြင်း၊ ပဲ့ပြင်ခြင်း၊ ဖြောင့်မတ်အောင်ဆုံးမခြင်းများ၌ အကျိုးရှိ၏။” (၂ တိမောသေ ၃:၁၆၊ ကဘ) ဝိညာဉ်ရေး၌ တိုးတက်ကြီးထွားလာကြစဉ် ဘုရားသခင့်နှုတ်မြွက်တော်ဖြင့် ကျွန်ုပ်တို့သွန်သင်ခံရကြသည်။ ဘုရားသခင့်နှုတ်မြွက်တော်အလင်းတွင် မိမိတို့ကိုယ်ကို အပြစ်ဖော်ပြဆုံးမနိုင်ကြသည်၊ သို့မဟုတ် လိုအပ်မည်ဆိုလျှင် အသင်းတော်မှ မေတ္တာရှိသိုးထိန်းများအားဖြင့် အပြစ်ဖော်ပြဆုံးမခံရနိုင်သည်။ ထိုနည်းတူ ကိစ္စရပ်များကိုတည့်မတ်ပြီး အသက်လမ်းပေါ်ဆက်လျှောက်နေနိုင်ဖို့ ဖြောင့်မတ်ခြင်း၌ ဆုံးမမှုကို နှိမ့်ချစွာလက်ခံနိုင်ကြသည်။

ကျေးဇူးတင်လေးမြတ်စွာဖြင့် အလင်း၌လျှောက်လှမ်းလော့

၁၆။ ယေဟောဝါ၏ ထူးမြတ်လှသော အလင်းဆုကျေးဇူးကို ကျေးဇူးတင်လေးမြတ်ကြောင်း ကျွန်ုပ်တို့မည်သို့တင်ပြနိုင်ကြသနည်း။

^၁၆ ယေဟောဝါ၏ ထူးမြတ်လှသော အလင်းဆုကျေးဇူးကို ကျေးဇူးတင်လေးမြတ်ကြောင်း ကျွန်ုပ်တို့မည်သို့တင်ပြနိုင်ကြသနည်း။ ယောဟန်အခန်းကြီး ၉ က မွေးရာပါမျက်မမြင်တစ်ဦးကို ယေရှုကုသပေးသောအခါ ကျေးဇူးတင်ကြောင်းဖော်ပြရန် ထိုသူလှုံ့ဆော်ခံခဲ့ရကြောင်း ကျွန်ုပ်တို့ကိုဖော်ပြသည်။ မည်သို့အားဖြင့်နည်း။ ယေရှုကို ဘုရားသခင်၏သားတော်အဖြစ် သူယုံကြည်ခဲ့ပြီး လူအများရှေ့ ကိုယ်တော်အား “ပရောဖက်” တစ်ပါးအဖြစ်ဖော်ပြခဲ့သည်။ ထို့အပြင် ယေရှု၏အံ့ဖွယ်အမှုကို ပြစ်တင်ရှုတ်ချဖို့ကြိုးပမ်းသူတို့အား သူသည် ရဲရင့်စွာအန်တုပြောဆိုခဲ့သည်။ (ယောဟန် ၉:၁၇၊ ၃၀-၃၄) တမန်တော်ပေတရုသည် ဝိညာဉ်တော်ဖွားခရစ်ယာန်အသင်းသားများကို “ပိုင်ဆိုင်တော်မူသောလူမျိုး” ဟုခေါ်သည်။ အဘယ်ကြောင့်နည်း။ အကြောင်းမှာ မွေးရာပါမျက်မမြင်ဖြစ်ပြီး ကုသပျောက်ကင်းခံခဲ့ရသူကဲ့သို့ ကျေးဇူးသိတတ်သောစိတ် သူတို့၌ရှိသောကြောင့်ဖြစ်သည်။ ‘မှောင်မိုက်ထဲမှ အံ့ဖွယ်သောအလင်းတော်သို့ ခေါ်သွင်းတော်မူသောသူ၏ ဂုဏ်ကျေးဇူးများကို ဖော်ပြ’ ခြင်းအားဖြင့် သူတို့၏ကျေးဇူးရှင် ယေဟောဝါကို ကျေးဇူးတင်လေးမြတ်ကြောင်းပြကြသည်။ (၁ ပေတရု ၂:၉; ကောလောသဲ ၁:၁၃) မြေကြီးမျှော်လင့်ချက်ရှိသူများလည်း အလားတူကျေးဇူးတင်စိတ်ရှိပြီး ယေဟောဝါ၏ “ဂုဏ်ကျေးဇူးများ” ကို လူသိရှင်ကြားကြေညာရာ၌ သူတို့၏ဝိညာဉ်တော်ဖွားညီအစ်ကိုများကို ထောက်ကူပေးကြသည်။ မစုံလင်သောလူသားများကို ဘုရားသခင်ပေးသနားတော်မူသည့် တန်ဖိုးဖြတ်မရသောအခွင့်ထူးပင်တည်း!

၁၇၊ ၁၈။ (က) ယောက်စီယောက်တိုင်း၌ အဘယ်တာဝန်ရှိသနည်း။ (ခ) တိမောသေကိုတုပရာ၌ ခရစ်ယာန်ယောက်တိုင်း အဘယ်အရာကိုရှောင်ရန် တိုက်တွန်းခံရသနည်း။

^၁၇ အမှန်တရားအလင်းအတွက် လှိုက်လှိုက်လှဲလှဲကျေးဇူးတင်စိတ်ရှိဖို့ အရေးကြီး၏။ ကျွန်ုပ်တို့တစ်ဦးမျှ အမှန်တရားသိလျက်မွေးလာသူများမဟုတ်ကြောင်း သတိရပါ။ အချို့မှာ လူကြီးဖြစ်မှ သင်ယူကြပြီး အလင်းသည် မှောင်မိုက်ထက်သာလွန်ကောင်းမွန်ကြောင်း အလျင်အမြန်သိလာကြသည်။ အခြားသူများမူ ဘုရားသခင်ကိုကြောက်ရွံ့သောမိဘများ၏ ပြုစုပျိုးထောင်ပေးခြင်းခံရသည့် အခွင့်ထူးကို ရရှိခဲ့ကြသည်။ ထိုသူတို့သည် အလင်းကို အရေးမထားဖို့လွယ်ပေမည်။ သူ့ကိုမမွေးခင်ကတည်းက ယေဟောဝါအားဝတ်ပြုနေကြသောမိဘများရှိသူ သက်သေခံတစ်ဦးက နို့စို့အရွယ်မှသွန်သင်ခံခဲ့ရသောအမှန်တရား၏ အဓိပ္ပာယ်နှင့် အရေးပါမှုကို အပြည့်အဝနားလည်ဖို့ သူအချိန်အတော်ယူ ကြိုးပမ်းခဲ့ရကြောင်းဝန်ခံသည်။ (၂ တိမောသေ ၃:၁၅) ကြီးသည်ဖြစ်စေ၊ ငယ်သည်ဖြစ်စေ ကျွန်ုပ်တို့ယောက်တိုင်း ယေဟောဝါဖော်ပြထားသောအမှန်တရားကို အလွန်ကျေးဇူးတင်လေးမြတ်စိတ်ရှိလာစေရန် ပြုစုပျိုးထောင်ပေးဖို့လိုသည်။

^၁၈ လူငယ်တိမောသေသည် “ဓမ္မကျမ်းစာ” ကိုနို့စို့အရွယ်မှစ၍ သွန်သင်ခံခဲ့ရသော်လည်း ခရစ်ယာန်တစ်ဦးအဖြစ် သူရင့်ကျက်လာခြင်းသည် ဓမ္မအမှုတွင် ကိုယ်တိုင်ကြိုးစားအားထုတ်ခဲ့ခြင်းကြောင့်သာဖြစ်သည်။ (၂ တိမောသေ ၃:၁၅) ထိုအချိန်တွင် “သင်မူကား၊ ဝန်ခံတော်မူသောသူ၊ ရှက်ကြောက်စရာအကြောင်းမရှိဘဲ၊ သမ္မာတရားကို မှန်ကန်စွာပိုင်းခြားတတ်သော ဆရာသမားဖြစ်လျက်၊ ဘုရားသခင့်ရှေ့၌ ကိုယ်ကိုကိုယ်ဆက်သခြင်းငှာ ကြိုးစားအားထုတ်လော့” ဟုသူ့ကိုတိုက်တွန်းခဲ့သူ တမန်တော်ပေါလုကို ထောက်ကူပေးဖို့ သူ့မှာအရည်အချင်းပြည့်မီနေပြီဖြစ်သည်။ ကျွန်ုပ်တို့အားလုံး တိမောသေကဲ့သို့မိမိတို့ကိုအရှက်ရစေသော—သို့မဟုတ် ကျွန်ုပ်တို့ကြောင့် ယေဟောဝါအရှက်ရစေမည့် မည်သည့်အရာကိုမဆို ရှောင်ကြပါစို့!—၂ တိမောသေ ၂:၁၅။

၁၉။ (က) ဒါဝိဒ်ကဲ့သို့ ကျွန်ုပ်တို့အားလုံး အဘယ်သို့ပြောဆိုဖို့ အကြောင်းရင်းရှိသနည်း။ (ခ) နောက်ဆောင်းပါးတွင် အဘယ်အကြောင်းဆွေးနွေးမည်နည်း။

^၁၉ အမှန်တရားအလင်းကိုပေးသနားတော်မူသော ယေဟောဝါအားချီးမွမ်းဖို့ ကျွန်ုပ်တို့၌ ခိုင်လုံသောအကြောင်းရှိသည်။ ဘုရင်ဒါဝိဒ်ကဲ့သို့ ကျွန်ုပ်တို့ဤသို့ဆိုကြသည်– “အိုထာဝရဘုရား ကိုယ်တော်သည် အကျွန်ုပ်၏မီးခွက်ဖြစ်တော်မူ၏။ ထာဝရဘုရားသည် အကျွန်ုပ်၏မှောင်မိုက်ကို လင်းစေတော်မူ၏။” (၂ ဓမ္မရာဇဝင် ၂၂:၂၉) သို့သော် ကျွန်ုပ်တို့ကိုယ်ကိုကျေနပ်ပြီးမနေဝံ့ကြပါ၊ ယင်းက ကျွန်ုပ်တို့ကယ်နုတ်ခံခဲ့ရာဖြစ်သော မှောင်မိုက်ထဲသို့ တဖြည်းဖြည်းပြန်လျှောကျသွားစေနိုင်သောကြောင့်ဖြစ်သည်။ ထို့ကြောင့် နောက်ဆောင်းပါးက မိမိတို့ဘဝတွင် ဘုရားသခင့်အမှန်တရားအား အရေးထားပုံကို ချိန်ဆရန် ကျွန်ုပ်တို့ကိုကူညီပေးပါလိမ့်မည်။

သင်အဘယ်အရာသင်ယူခဲ့ပြီနည်း

• ယေဟောဝါသည် ဝိညာဉ်ရေးထွန်းလင်းမှုကို မည်သို့ပေးတော်မူ သနည်း။

• ယခု ကျွန်ုပ်တို့ကိုဝိုင်းရံနေသော ဝိညာဉ်ရေးမှောင်မိုက်က အဘယ်အခက်အခဲများကိုဖြစ်စေသနည်း။

• အဘယ်အန္တရာယ်များကို ကျွန်ုပ်တို့ရှောင်ရမည်နည်း။

• အမှန်တရားအလင်းအတွက် ကျေးဇူးတင်ကြောင်း ကျွန်ုပ်တို့ မည်သို့တင်ပြနိုင်ကြသနည်း။

[စာမျက်နှာ ၈ ပါ ရုပ်ပုံ]

ယေဟောဝါသည် ပကတိနှင့် ဝိညာဉ်ရေးအလင်း၏ ရင်းမြစ်ဖြစ်

[စာမျက်နှာ ၁၀ ပါ ရုပ်ပုံ]

ယေရှုသည် မျက်မမြင်တစ်ဦးကို တဖြည်းဖြည်းကုသပေးခဲ့သကဲ့သို့ ဝိညာဉ်ရေးအမှောင်ထုမှထွက်လာရန် ကျွန်ုပ်တို့ကိုကူညီပေးတော်မူ၏

[စာမျက်နှာ ၁၁ ပါ ရုပ်ပုံ]

စာတန်၏ ထောင်ချောက်အလင်းများကြောင့် လမ်းလွဲသွားခြင်းက ဝိညာဉ်ရေးသင်္ဘောပျက်စေ