ယေရှုခရစ် ကမ္ဘာမြေပေါ်သက်တော်ထင်ရှားခဲ့ခြင်း သာဓက

အဲလ်ဘတ်အိုင်းစတိုင်း အမည်ရှိသူတစ်ဦး အသက်ရှင်ခဲ့ခြင်းကို သင်ယုံပါသလော။ ချက်ချင်းပင် ယုံပါသည်ဟု သင်ဖြေဆိုမည်၊ သို့သော် အဘယ်ကြောင့်နည်း။ လူအများစုသည် သူ့ကို ကိုယ်တိုင်ကိုယ်ကျ မတွေ့မမြင်ဖူးခဲ့ကြပါ။ သို့တိုင် သူ၏အောင်မြင်မှုများဆိုင်ရာ အားထားလောက်သောမှတ်တမ်းတို့က သူအသက်ရှင်ခဲ့ကြောင်း သက်သေထူ၏။ သူ၏ရှာဖွေတွေ့ရှိချက်များ၏ သိပ္ပံဆိုင်ရာအသုံးချမှုများအားဖြင့် သူသက်ရှိထင်ရှားခဲ့ကြောင်း သိရှိရသည်။ ဥပမာ၊ အိုင်းစတိုင်း၏ကျော်ကြားလှသော E=mc2 ညီမျှခြင်းကို အသုံးချမှုနှင့် နီးကပ်စွာဆက်နွှယ်နေသော (စွမ်းအင်ညီမျှခြင်း ဒြပ်ထုအမြှောက် အလင်းအလျင်၏နှစ်ထပ်ကိန်း) ထုတ်လွှတ်မှုဖြစ်သည့် နယူကလီးယားစွမ်းအင်မှ ထုတ်လုပ်သည့် လျှပ်စစ်ဓာတ်အားကြောင့် လူတို့ အကျိုးကျေးဇူးရရှိခဲ့ကြပြီ။

အလားတူ ကျိုးကြောင်းဆင်ခြင်ကြည့်ခြင်းက သမိုင်းတွင် ဩဇာအညောင်းဆုံးပုဂ္ဂိုလ်၊ ယေရှုခရစ်နှင့်လည်း သက်ဆိုင်ပါသည်။ ကိုယ်တော်အကြောင်း ရေးသားထားရာနှင့် ကိုယ်တော့်သြဇာအာဏာသက်ရောက်မှု၏ မျက်မြင်အထောက်အထားတို့က ကိုယ်တော်သက်ရှိထင်ရှားခဲ့ကြောင်း သံသယကင်းစွာသက်သေထူသည်။ ရှေ့ဆောင်းပါး၌ ဖော်ပြခဲ့သော ရှေးဟောင်းသုတေသနမှ မကြာသေးမီက ရှာဖွေတွေ့ရှိသည့် ယာကုပ်၏ကမ္ပည်းစာသည် စိတ်ဝင်စားဖွယ်ကောင်းသော်လည်း ယေရှု၏ရာဇဝင်အရ တိကျမှန်ကန်ခြင်းသည် ၎င်းအပေါ် သို့မဟုတ် အခြားမည်သည့်ရှေးဟောင်းပစ္စည်းအပေါ် မမူတည်ပါ။ အမှန်မှာ ယေရှုသက်တော်ထင်ရှားခဲ့ခြင်း၏ အထောက်အထားကို လောကသမိုင်းပညာရှင်များနှင့် ကိုယ်တော်၏နောက်လိုက်များက ကိုယ်တော့်အကြောင်း ရေးသားထားရာတို့မှ ကျွန်ုပ်တို့ရှာတွေ့နိုင်ကြသည်။

သမိုင်းပညာရှင်တို့၏သက်သေထွက်ဆိုချက်

ဖာရိရှဲတစ်ဦးဖြစ်သော ပထမရာစုရှိ ဂျူးလူမျိုး သမိုင်းပညာရှင် ဖလေးဗီးယက်စ် ဂျိုစီဖတ်စ်၏ထွက်ဆိုချက်ကို သုံးသပ်ကြည့်ပါ။ ဂျူးတို့၏ ရှေးဟောင်းနှောင်းဖြစ်များစာအုပ်တွင် ယေရှုခရစ်ကို သူရည်ညွှန်းဖော်ပြခဲ့သည်။ ယေရှုအား မေရှိယအဖြစ် ဂျိုစီဖတ်စ်ဖော်ပြချက်ဖြစ်သည့် ပထမကိုးကားချက်၏မှန်ကန်မှုကို အချို့သူတို့က သံသယဝင်ကြစဉ် ရီရှေဗာတက္ကသိုလ်မှ ပါမောက္ခ လူးဝစ္စ အိပ်ချ်. ဖီလ်ဒ်မန်က လူအနည်းငယ်တို့သည် ဒုတိယကိုးကားချက်အပေါ် သံသယဝင်ခဲ့ကြပြီဟု ပြောဆိုသည်။ ထိုတွင် ဂျိုစီဖတ်စ်က ဤသို့ဆိုသည်– “[ယဇ်ပုရောဟိတ်မင်းအန္န] သည် ဆဲန်ဟီဒရင်မှ တရားသူကြီးများကို ဆင့်ခေါ်၍ သူတို့ရှေ့မှောက်သို့ ယာကုပ်အမည်ရှိသူတစ်ဦးကို အရောက်ပို့ဆောင်ခဲ့သည်၊ ထိုသူ၏အစ်ကိုမှာ ခရစ်ဟုခေါ်သော ယေရှုဖြစ်သည်။” (ဂျူးတို့၏ ရှေးဟောင်းနှောင်းဖြစ်များ၊ ၂၀၊ ၂၀၀) မှန်ပါသည်၊ ဖာရိရှဲတစ်ဦး၊ ယေရှု၏ရန်သူများဟု ကိုယ်တိုင်ဝန်ခံခဲ့သူတို့၏နောက်လိုက်များဖြစ်သော အသင်းအဖွဲ့ဝင်တစ်ဦးက “ယေရှု၏ညီ ယာကုပ်” သက်ရှိထင်ရှားခဲ့ကြောင်း အသိအမှတ်ပြု၏။

ယေရှုဘဝ၏သြဇာညောင်းမှုကို ကိုယ်တော့်နောက်လိုက်များ၏ လုပ်ဆောင်မှုများမှတစ်ဆင့် သိရှိခဲ့ကြရသည်။ စီ.အီး. ၅၉ ခုနှစ်ခန့်က ရောမတွင် တမန်တော်ပေါလု အကျဉ်းကျနေစဉ် ဂျူးတို့၏အကြီးအမှူးက သူ့အား ဤသို့ပြောခဲ့သည်– “ဤဘာသာသည် အရပ်ရပ်တို့၌ ကဲ့ရဲ့အပြစ်တင်ခြင်းကိုခံရသောဘာသာဖြစ်သည်ကို အကျွန်ုပ်တို့သိကြသည်။” (တမန်တော် ၂၈:၁၇-၂၂) ယေရှု၏တပည့်များကို သူတို့က “ဤဘာသာ” ဟုခေါ်ဆိုခဲ့ကြသည်။ သူတို့သည် အရပ်ရပ်တို့၌ ကဲ့ရဲ့အပြစ်တင်ခြင်းကို ခံခဲ့ရသည်ဆိုလျှင် လောကသမိုင်းပညာရှင်များသည် သူတို့နှင့်ပတ်သက်၍ မှတ်တမ်းတင်ကြလိမ့်မည်မဟုတ်ပေလော။

တက်စီတပ်စ်သည် စီ.အီး. ၅၅ ခုနှစ်၌ ဖွားမြင်ပြီး ကမ္ဘာ့အကျော်ကြားဆုံး သမိုင်းပညာရှင်တို့တွင် တစ်ဦးအဝင်ဖြစ်သည်ဟု ယူမှတ်ထားကြကာ သူ၏နှစ်အလိုက်သမိုင်းဝင်မှတ်တမ်းများ၌ ခရစ်ယာန်များကို ဖော်ပြထားသည်။ စီ.အီး. ၆၄ ခုနှစ်တွင် အကြီးအကျယ်မီးလောင်ကျွမ်းမှုကြောင့် နီရိုးက ထိုသူတို့အပေါ် အပြစ်ပုံချမှုမှတ်တမ်းနှင့်ပတ်သက်၍ သူဤသို့ရေးသားခဲ့သည်– “နီရိုးသည် လူထုက ခရစ်ယာန်များဟုခေါ်သောသူများအပေါ် အပြစ်ပုံချကာ သူတို့၏မနှစ်မြို့ဖွယ်များအတွက် မုန်းတီးခံရသော လူတစ်စုကို အပြင်းအထန် နှိပ်စက်ကလူ ပြုလေတော့သည်။ ထိုခရစ်ယာန်ဟူသောအမည်သည် တိဗေရိမင်းနန်းစံ ဘုရင်ခံပုန္တိပိလတ်သတ်ခဲ့သည့် ခရစ္စတပ်စ်ဟူသောပုဂ္ဂိုလ်မှ ဆင်းသက်လာသည်။” ဤမှတ်တမ်း၏ဖော်ပြချက်များမှာ သမ္မာကျမ်းစာရှိ ယေရှုနှင့်ပတ်သက်သော သတင်းအချက်အလက်များနှင့် ကိုက်ညီပေသည်။

ယေရှု၏နောက်လိုက်များနှင့်ပတ်သက်၍ ဝေဖန်ချက်ပေးခဲ့သည့် နောက်ထပ်စာရေးဆရာတစ်ဦးမှာ ဘီသနီယာ ဘုရင်ခံ ပလင်နီအငယ်ဖြစ်သည်။ စီ.အီး. ၁၁၁ ခုနှစ်ခန့်တွင် ပလင်နီသည် ခရစ်ယာန်များကို မည်သို့ကိုင်တွယ်ရမည်အကြောင်း ဧကရာဇ်ထရာဂျင်ထံ စာရေးခဲ့သည်။ ခရစ်ယာန်ဟု မှားယွင်းစွာစွပ်စွဲခံရသူတို့က မိမိတို့သည် ခရစ်ယာန်မဟုတ်ကြောင်း သက်သေပြရုံမျှပြုရန် ဘုရားသခင်များနှင့် ထရာဂျင်၏အနေအထားကို ထပ်ခါတလဲ တိုင်တည်လိမ့်မည်ဟု ပလင်နီရေးသားခဲ့သည်။ ပလင်နီက ဆက်၍ဤသို့ဆိုသည်– “ခရစ်ယာန်စစ်များအား ယင်းသို့သောလိုက်လျောမှုများပြုရန် အတင်းအကျပ် စေခိုင်း၍မရချေ။” ယင်းက ကိုယ်တော်၌ယုံကြည်ခြင်းအတွက် မိမိတို့၏အသက်ကိုစွန့်ရန် အသင့်ရှိသော နောက်လိုက်များရှိခဲ့သည့် ခရစ်တော် အမှန်တကယ်တည်ရှိကြောင်း သက်သေထူ၏။

ရာစုနှစ်နှစ်ခုရှိ သမိုင်းပညာရှင်တို့က ယေရှုခရစ်နှင့် ကိုယ်တော်၏နောက်လိုက်များနှင့်ပတ်သက်၍ အကျဉ်းချုံးရည်ညွှန်းကိုးကားပြီးနောက် ဗြိတဲန်နီကာစွယ်စုံကျမ်း (၂၀၀၂ ကြိမ်ထုတ်ဝေခြင်း) ကဤသို့မှတ်ချက်ချသည်– “ရှေးခေတ်က ခရစ်ယာန်ဘာသာကိုဆန့်ကျင်သူများပင် ယေရှုတကယ်ရှိခဲ့သည်ကို ယုံကြည်ကြကြောင်း ဤဘက်မလိုက်မှတ်တမ်းများက သက်သေထူသည်။ ယင်းကိစ္စကို အကြောင်းအချက်မခိုင်လုံဘဲ ၁၈ ရာစုအဆုံးပိုင်း၊ ၁၉ ရာစုအတွင်းနှင့် ၂၀ ရာစုအစပိုင်းတွင် စတင်ငြင်းခုံလာခဲ့ကြသည်။”

ယေရှုနောက်လိုက်များ၏ထွက်ဆိုချက်များ

“ဓမ္မသစ်ကျမ်းက ယေရှု၏အသက်တာနှင့် ကြမ္မာအပြင် ကိုယ်တော်တည်ရှိမှုဆိုင်ရာ အစောပိုင်းခရစ်ယာန်များ၏အဓိပ္ပာယ်ဖွင့်ဆိုချက်အတွက် သမိုင်းဝင်ဆက်စပ်မှု၏ သက်သေသာဓကအားလုံးကို ပံ့ပိုးပေးသည်” ဟု အမေရိကားနားစွယ်စုံကျမ်းကဆိုသည်။ မယုံကြည်လိုသူတို့သည် သမ္မာကျမ်းစာကို ယေရှုသက်တော်ထင်ရှားခြင်း၏ အထောက်အထားအဖြစ် လက်မခံကြချေ။ သို့တိုင် သမ္မာကျမ်းစာမှတ်တမ်းများအပေါ် အခြေခံသည့် ကျိုးကြောင်းဆင်ခြင်ချက်နှစ်ရပ်က ယေရှုသည် အမှန်တကယ်မြေကြီးပေါ် ခြေချခဲ့ကြောင်း အထူးသဖြင့် ခြေမြစ်ခိုင်လုံစေသည်။

ကျွန်ုပ်တို့သိရှိခဲ့ကြသည့်အတိုင်း အိုင်းစတိုင်း၏ကျော်ကြားသောသီအိုရီများက သူအသက်ရှင်ခဲ့ကြောင်း သက်သေထူသည်။ အလားတူ ယေရှု၏သွန်သင်ချက်များက ကိုယ်တော်အမှန်တကယ် သက်တော်ထင်ရှားကြောင်း သက်သေထူသည်။ ယေရှုမိန့်တော်မူသမျှတွင် ကျော်ကြားလှသောတောင်ပေါ်တရားတော်ကို ဥပမာအဖြစ် သုံးသပ်ကြည့်ပါ။ (မဿဲ၊ အခန်းကြီး ၅-၇) တမန်တော်မဿဲက ထိုတရားတော်၏ ထိထိမိမိအကျိုးသက်ရောက်မှုကို ဤသို့ရေးသားခဲ့သည်– “ပရိသတ်အပေါင်းတို့သည် ဆုံးမ . . . ခြင်းကို အလွန်အံ့သြကြ၏။ အကြောင်းမူကား၊ ကျမ်းပြုဆရာနည်းတူမဟုတ်၊ အစိုးရသောသူနည်းတူ ဆုံးမ . . . တော်မူ၏။” (မဿဲ ၇:၂၈၊ ၂၉) ရာစုနှစ်များတစ်လျှောက် လူတို့အပေါ် တရားတော်အကျိုးသက်ရောက်မှုနှင့်ပတ်သက်၍ ပါမောက္ခ ဟန်းစ် ဒီရေတာ ဘက်စ်က ဤသို့ဖော်ပြသည်– “တောင်ပေါ်တရားတော်၏သြဇာညောင်းမှုသည် ယေဘုယျအားဖြင့် ယုဒဘာသာနှင့် ခရစ်ယာန်ဘာသာ၏နယ်ခြားမှ ကျူးကျော်ဝင်ရောက်ရုံမက အနောက်တိုင်းယဉ်ကျေးမှုကို ထိုးဖောက်လေသည်။” ထပ်ဆင့်၍ သူက ဤတရားတော်ကို “လူအားလုံး နှစ်သက်သဘောကျကြသည်” ဆိုခဲ့၏။

တောင်ပေါ်တရားတော်တွင် တွေ့ရှိရသည့် ကျစ်ကျစ်လျစ်လျစ်ဖြင့် လက်တွေ့ကျသော အောက်ပါပညာရှိစကားများကို သုံးသပ်ကြည့်ပါ– “သင်၏ပါးတစ်ဖက်ကို သူတစ်ပါးပုတ်လျှင်၊ ပါးတစ်ဖက်ကိုလှည့်၍ပေးဦးလော့။” “လူများတို့မြင်စေခြင်းငှာ ကိုယ်သီလအကျင့်ကို သူ့ရှေ့မှောက်၌ မကျင့်မည်အကြောင်း သတိပြုကြလော့။” “နက်ဖြန်အဖို့ မစိုးရိမ်ကြနှင့်။ နက်ဖြန်နေ့သည် မိမိအဖို့စိုးရိမ်လိမ့်မည်။” “ပုလဲရတနာတို့ကို ဝက်တို့ရှေ့မှာ မချမထားကြနှင့်။” “တောင်းကြလော့။ တောင်းလျှင်ရမည်။” “သင်တို့သည် ကိုယ်၌သူတစ်ပါးပြုစေလိုသမျှအတိုင်း သူတစ်ပါး၌ပြုကြလော့။” “ကျဉ်းသောတံခါးကိုဝင်ကြလော့။” “ထိုသူတို့၏အကျင့်ကိုထောက်၍ သူတို့၏သဘောကို သိကြလိမ့်မည်။” “ကောင်းသောအပင်သည် ကောင်းသောအသီး . . . ကို သီးတတ်၏။”—မဿဲ ၅:၃၉; ၆:၁၊ ၃၄; ၇:၆၊ ၇၊ ၁၂၊ ၁၃၊ ၁၆၊ ၁၇။

ဤဖော်ပြချက်အချို့ သို့မဟုတ် ယင်းတို့မှ လိုရင်းအချုပ်တို့ကို သင်ကြားဖူးနားဝရှိပေမည်။ ယင်းတို့သည် သင့်ဘာသာစကားတွင် စကားပုံတစ်ခု ဖြစ်ကောင်းဖြစ်လာနိုင်သည်။ ၎င်းတို့အားလုံး တောင်ပေါ်တရားတော်မှ ကောက်နုတ်ထားခြင်းဖြစ်သည်။ ဤတရားတော်သည် လူများစွာနှင့် ယဉ်ကျေးမှုများစွာရှိသူတို့အပေါ် ဩဇာညောင်းခြင်းက “ကြီးမြတ်သောဆရာ” သက်တော်ထင်ရှားခဲ့ကြောင်း အတိအလင်းသက်သေထူသည်။

တစ်စုံတစ်ဦးက ယေရှုခရစ်ဟုခေါ်ဆိုသော ပုဂ္ဂိုလ်တစ်ဦးကို လုပ်ဇာတ်ခင်းလိုက်သည်ဆိုပါစို့။ ထိုသူသည် သမ္မာကျမ်းစာ၌ပါသည့် ယေရှုသွန်သင်သည်ဟုဆိုသောသွန်သင်ချက်များကို တီထွင်နိုင်လောက်အောင် ဉာဏ်ရည်သွားသည်ဟု ဆိုကြပါစို့။ သူက ယေရှုနှင့် ကိုယ်တော်၏သွန်သင်ချက်များကို လူအများ နားဝင်ချိုစေရန် အတတ်နိုင်ဆုံးဖန်တီးမည် မဟုတ်ပေလော။ သို့တိုင် တမန်တော်ပေါလုက ဤသို့ဖော်ပြခဲ့သည်– “ယုဒလူတို့သည် နိမိတ်လက္ခဏာကိုတောင်းတတ်ကြ၏။ ဟေလသလူတို့သည် ပညာကိုရှာတတ်ကြ၏။ ငါတို့မူကား၊ လက်ဝါးကပ်တိုင်မှာအသေခံတော်မူသော ခရစ်တော်၏အကြောင်းအရာကို ဟောပြောကြ၏။ ထိုအကြောင်းအရာသည်ကား၊ ယုဒအမျိုးသားထိမိ၍လဲစရာအကြောင်းဖြစ်၏။ တစ်ပါးအမျိုးသား၌ကား၊ မိုက်မဲခြင်းဖြစ်၏။” (၁ ကောရိန္သု ၁:၂၂-၂၃) နှက်တိုင်တင်၍ ခရစ်တော်၏အသတ်ခံရခြင်းသတင်းသည် ဂျူးနှင့် တစ်ပါးအမျိုးသားတို့အတွက် နှစ်သက်စရာမဟုတ်ချေ။ သို့သော် ထိုသို့ ခရစ်တော်ခံခဲ့ရကြောင်းကို ပထမရာစုရှိခရစ်ယာန်များက ကြွေးကြော်ခဲ့သည်။ ခရစ်တော်နှက်တိုင်တင်အသတ်ခံရကြောင်း အဘယ်ကြောင့်ဖော်ပြသနည်း။ တစ်ခုတည်းသော ကျေနပ်ဖွယ်ရှင်းပြချက်မှာ ခရစ်ယာန်ဂရိကျမ်းစောင်များကို ရေးသားသူတို့သည် ယေရှု၏ဘဝနှင့် သေခြင်းဆိုင်ရာအမှန်တရားကို မှတ်တမ်းတင်ထားခြင်းဖြစ်မည်။

ယေရှု၏ရာဇဝင်သမိုင်းဆိုင်ရာတိကျမှန်ကန်ကြောင်း ထောက်ခံသည့်နောက်အကြောင်းတစ်ရပ်ကို ကိုယ်တော့်နောက်လိုက်များအားဖြင့် ကိုယ်တော့်သွန်သင်ချက်များကို မမောနိုင်မပန်းနိုင် ဟောပြောခြင်းမှတွေ့ရှိရသည်။ ကိုယ်တော်၏ခရစ်ယာန်ဓမ္မအမှုကို စတင်ပြီးနောက် အနှစ် ၃၀ ခန့်အကြာမှသာလျှင် သတင်းကောင်းသည် “ကောင်းကင်အောက်၌ရှိသမျှသော . . . သတ္တဝါတို့အား ဟောပြော” ပြီးပြီဟု ပေါလုဆိုနိုင်ခဲ့သည်။ (ကောလောသဲ ၁:၂၂-၂၃) အမှန်ပင် ယေရှု၏သွန်သင်ချက်များသည် ဆန့်ကျင်မှုများကြားမှ ရှေးလောကတစ်ခွင်တွင် ပျံ့နှံ့သွားခဲ့သည်။ တစ်ချိန်က ကိုယ်တိုင်နှိပ်စက်ညှဉ်းပန်းသူဖြစ်ခဲ့သော ပေါလုသည် ခရစ်ယာန်တစ်ဦးအနေဖြင့် ဤသို့ရေးသားခဲ့၏– “ခရစ်တော်သည် ထမြောက်တော်မမူလျှင်၊ ငါတို့ဟောပြောခြင်း၌အကျိုးမရှိ သင်တို့ယုံကြည်ခြင်း၌လည်း အကျိုးမရှိ။” (၁ ကောရိန္သု ၁၅:၁၂-၁၇) ရှင်ပြန်ထမြောက်ခြင်းမရှိခဲ့သော ခရစ်တော်နှင့်ပတ်သက်၍ ဟောပြောခြင်းသည် အချည်းနှီးဖြစ်မည်ဆိုလျှင် တစ်ခါမျှအသက်မရှင်ခဲ့သော ခရစ်တော်တစ်ဦးနှင့်စပ်လျဉ်းသည့် ဟောပြောခြင်းက သာ၍ပင် အချည်းနှီးဖြစ်ပေလိမ့်မည်။ ပလင်နီအငယ်ရေးသောမှတ်တမ်းတွင် ကျွန်ုပ်တို့ ဖတ်ရှုကြည့်ကြစဉ် ပထမရာစုရှိခရစ်ယာန်များသည် ယေရှုခရစ်၌ သူတို့၏ယုံကြည်ခြင်းအတွက် အသေခံရန် တလိုတလားရှိခဲ့ကြ၏။ ကိုယ်တော်သည် အမှန်တကယ်ရှိခဲ့သောပုဂ္ဂိုလ်ဖြစ်သောကြောင့် သူတို့သည် ကိုယ်တော်အတွက် သူတို့၏အသက်ကိုစွန့်စားခဲ့ကြသည်; ခရစ်ဝင်မှတ်တမ်းများက မှတ်တမ်းတင်ထားသည့်အတိုင်း ကမ္ဘာမြေပေါ် ကိုယ်တော်ခြေချခဲ့ပြီး အသက်ရှင်နေထိုင်ခဲ့၏။

သက်သေအထောက်အထားကို သင်မြင်တွေ့ရပြီ

ခရစ်ယာန်ဟောပြောခြင်းတွင် ပါဝင်နိုင်ဖို့အတွက် ရှေးဦးစွာ ယေရှုခရစ်၏ရှင်ပြန်ထမြောက်ခြင်း၌ ယုံကြည်ခြင်းရှိရန်လိုသည်။ ယနေ့အချိန်တွင် ယေရှုလုပ်ဆောင်နေသော အကျိုးသက်ရောက်မှုကို သင်လည်း ကြည့်ရှုခြင်းအားဖြင့် ရှင်ပြန်ထမြောက်ခဲ့ပြီးသောကိုယ်တော်ကို သင်မြင်ယောင်ကြည့်နိုင်သည်။

နှက်တိုင်တင်မခံရမီအချိန်လေးအတွင်း ယေရှုသည် အနာဂတ်ကိုယ်တော်ရောက်ရှိခြင်းအကြောင်း ပို၍ကြီးကျယ်သောပရောဖက်ပြုချက်တစ်ရပ်ပေးခဲ့သည်။ ကိုယ်တော်သည် ရှင်ပြန်ထမြောက်၍ ဘုရားသခင်၏လက်ယာဘက်တွင် ထိုင်ကာ မိမိ၏ရန်သူများအား နှိမ်နင်းဖို့အချိန်ကို စောင့်ဆိုင်းလျက်နေလိမ့်မည်အကြောင်းလည်း ဖော်ပြတော်မူခဲ့သည်။ (ဆာလံ ၁၁၀:၁; ယောဟန် ၆:၆၂; တမန်တော် ၂:၃၄၊ ၃၅; ရောမ ၈:၃၄) ထိုသို့ပြီးနောက် ကောင်းကင်မှ စာတန်နှင့် သူ၏နတ်ဆိုးများကို အရေးယူ၍ နှင်ထုတ်ပစ်လိမ့်မည်။—ဗျာ. ၁၂:၇-၉။

ဤအရာအားလုံး အဘယ်အချိန်တွင် ဖြစ်ပျက်လိမ့်မည်နည်း။ ယေရှုသည် တပည့်များအား ‘ကိုယ်တော်ကြွလာ၍ ကပ်ကမ္ဘာကုန်သောပုဗ္ဗနိမိတ်’ ဤကမ္ဘာကုန်ဆုံးမည့် ရှေ့ပြေးနိမိတ်’ ကိုပေးခဲ့သည်။ ကိုယ်တော်၏ မျက်မြင်မရရောက်ရှိခြင်းနိမိတ်တွင် စစ်ပွဲကြီးများ၊ အစာခေါင်းပါးခြင်း၊ မြေငလျင်လှုပ်ခြင်း၊ ပရောဖက်အတုအယောင်များ ပေါ်ထွန်းခြင်း၊ မတရားမှုတိုးများလာခြင်းနှင့် ပြင်းထန်သောကပ်ရောဂါများ ပါဝင်သည်။ စာတန်ကို နှင်ချလိုက်ခြင်းက ‘မြေကြီးကို အမင်္ဂလာ’ ဖြစ်စေရာ ထိုသို့သောဘေးတွေ့သည့်အဖြစ်သနစ်များ မျှော်လင့်ရန်ဖြစ်ခဲ့သည်။ စာတန်သည် “မိမိကာလတစ်ခဏသာရှိသည်ကိုသိ၍၊ ပြင်းစွာသောဒေါသအမျက်နှင့်တကွ” မြေကြီး၏အထက်ဝန်းကျင်သို့ ဆင်းလာခဲ့လေပြီ။ ထိုမျှမက အဆိုပါနိမိတ်တွင် “လူမျိုးအပေါင်းတို့အားသက်သေဖြစ်မည်အကြောင်း” ဘုရားသခင့်နိုင်ငံတော်နှင့်ယှဉ်သောသတင်းကောင်းကို “လော[က]နိုင်ငံအရပ်ရပ်ရှိသမျှတို့၌” ဟောပြောခြင်းပါဝင်သည်။—မဿဲ ၂၄:၃-၁၄; ဗျာ. ၁၂:၁၂; လုကာ ၂၁:၇-၁၉။

ဉာဏ်စမ်းရုပ်ဆက်ပုံတစ်ခုတွင် အပိုင်းအစများသည် အံဝင်ခွင်ကျနေသကဲ့သို့ပင် ယေရှု ပရောဖက်ပြုခဲ့သောအရာများမှာ ဖြစ်ပျက်လာခဲ့ပြီ။ ၁၉၁၄ ခုနှစ်တွင် ပထမကမ္ဘာစစ် စတင်ဖြစ်ပွားပြီးကတည်းက မျက်မြင်မရယေရှုရောက်ရှိနေခြင်း၏ စုပေါင်းသာဓကကို ကျွန်ုပ်တို့ တွေ့မြင်ခဲ့ကြရပြီ။ ကိုယ်တော်သည် ဘုရားသခင့်နိုင်ငံတော်ဘုရင်အဖြစ် အုပ်စိုးလျက်ရှိပြီး လွန်စွာပင် ဩဇာညောင်းလျက်ရှိသည်။ သင့်လက်ဝယ် ဤမဂ္ဂဇင်းရောက်ရှိနေခြင်းက မျက်မှောက်ခေတ်တွင် နိုင်ငံတော်ဟောပြောခြင်းလုပ်ငန်းကို ဆောင်ရွက်နေကြောင်း သာဓကဖြစ်သည်။

ယေရှုရောက်ရှိနေခြင်း၏ နောက်ထပ်အကျိုးသက်ရောက်မှုကို နားလည်သဘောပေါက်ရန် သမ္မာကျမ်းစာကို သင်လေ့လာဖို့လိုသည်။ ယေရှုရောက်ရှိခြင်း၏ အသေးစိတ်အချက်အလက်များကို ယေဟောဝါသက်သေတို့ထံ မေးမြန်းပါလေ။

[စာမျက်နှာ ၅ ပါ ရုပ်ပုံ]

ဂျိုစီဖတ်စ်၊ တက်စီတပ်စ်၊ ပလင်နီအငယ်တို့သည် ယေရှုခရစ်နှင့် ကိုယ်တော်နောက်လိုက်များကို ရည်ညွှန်းဖော်ပြခဲ့

[Credit Line]

All three images: © Bettmann/CORBIS

[စာမျက်နှာ ၇ ပါ ရုပ်ပုံ]

ယေရှုသည် တကယ့်ပုဂ္ဂိုလ်တစ်ပါးဖြစ်ကြောင်း အစောပိုင်းခရစ်ယာန်များ ယုံကြည်စိတ်ချခဲ့