“ဘုရားသခင်၌ ချဉ်းကပ်ကြလော့။ သို့ပြုလျှင် သင်တို့၌ ချဉ်းကပ်တော်မူလိမ့်မည်။”

မတိုင်မီနှင့် ပြီးနောက် ပြုပြင်ပြောင်းလဲပေးနိုင်သည့်အစွမ်းကို သူတွေ့ ရှိခဲ့

မက္ကဆီကိုနိုင်ငံမှ စန္ဒြာဟူသောအမျိုးသမီးက သူ့မိသားစုတွင် သူသည် တစ်မိပေါက် တစ်ယောက်ထွန်းဖြစ်သည်ဟု ဖော်ပြခဲ့သည်။ အပယ်ခံရခြင်းနှင့် အချစ်မခံရခြင်းတို့က သူ၏ဆယ်ကျော်သက်အရွယ်ကို အကျည်းတန်စေခဲ့သည်။ “အမြဲတမ်း ဟာတာတာကြီးခံစားရပြီး ကျွန်မအသက်ရှင်နေရတဲ့အကြောင်းရယ် လူ့ဘဝနဲ့ပတ်သက်လို့ရယ် သံသယတွေဖြစ်ရင်းနဲ့ပဲ မြီးကောင်ပေါက်အရွယ်ကို ကျွန်မဖြတ်ကျော်ခဲ့ပါတယ်” ဟုသူဆိုသည်။

အထက်တန်းကျောင်းတက်နေစဉ် စန္ဒြာသည် အိမ်၌ရှိသော ဖခင်၏ဝိုင်အရက်ကို သောက်တတ်စပြုလာသည်။ အချိန်တန်သော် အရက်ပုလင်းများကို ကိုယ်တိုင် စတင်ဝယ်ယူပြီး အရက်စွဲသူဖြစ်လာခဲ့သည်။ “ကျွန်မမှာ ဆက်အသက်ရှင်ချင်စိတ် မရှိခဲ့ဘူး” ဟုသူဝန်ခံသည်။ ကြံရာမရဖြစ်သည့်အဆုံး စန္ဒြာသည် မူးယစ်ဆေးဝါးကိုစသုံးတော့သည်။ “ကျွန်မရဲ့ပြဿနာတွေကို မေ့မေ့ပျောက်ပျောက်ဖြစ်စေတဲ့ တစ်ခုတည်းသောအရာကတော့ ကျွန်မရဲ့လက်ပွေ့အိတ်ထဲမှာ ဆောင်ထားတဲ့ အရက်ပုလင်းတစ်လုံး၊ ဆေးပြားတချို့၊ ဒါမှမဟုတ် ဆေးခြောက်နည်းနည်းတို့ပါပဲ” ဟုသူပြောပြသည်။

စန္ဒြာသည် ဆေးကျောင်းတက်ပြီးသည့်နောက် အရက်စွဲသည်ထက်စွဲလာတော့သည်။ သူ့ကိုယ်သူအဆုံးစီရင်ရန် ကြိုးစားခဲ့သော်လည်း သူမသေခဲ့ပါ။

စန္ဒြာသည် ဝိညာဉ်ရေးကူညီမှုနှင့် စိတ်ပိုင်းဆိုင်ရာထောက်မမှုတွေ့ ရှိဖို့ ဘာသာတရားအမျိုးမျိုး၌ ရှာဖွေခဲ့သော်လည်း အချည်းနှီးဖြစ်ခဲ့သည်။ မျှော်လင့်ချက်ကင်းမဲ့ပြီး စိတ်ပျက်အားလျော့လာရာ ဘုရားသခင် “ကိုယ်တော်ဘယ်မှာလဲ။ ကျွန်မကို ဘာလို့မကူညီတာလဲ” ဟုသူအကြိမ်ကြိမ်ဟစ်အော်ခဲ့သည်။ မိမိကိုယ်ကိုတန်ဖိုးထားသည့်စိတ် မရှိဆုံးအချိန်တစ်ချိန်တွင် ယေဟောဝါသက်သေတစ်ဦးနှင့် သူစကားပြောဖြစ်ခဲ့သည်။ ထိုမှ ကိုယ်တိုင်ကိုယ်ကျ ကျမ်းစာလေ့လာလေသည်။ “ထာဝရဘုရားသည် နှလုံးကြေကွဲသူတို့နှင့်နီးတော်မူ” ကြောင်း စန္ဒြာသိရှိရသောအခါ အကြီးအကျယ်စိတ်လှုပ်ရှားခဲ့သည်။—ဆာလံ ၃၄:၁၈၊ သမ္မာ။

ကျွန်ုပ်တို့သည် အာဒံထံမှ အမွေခံခဲ့ရသော အပြစ်နှင့် မစုံလင်မှုကြောင့် အားနည်းချက်ရှိသူများဖြစ်သည်ကို ယေဟောဝါဘုရားသခင်သိတော်မူကြောင်း ကျမ်းစာသင်ပေးသူက စန္ဒြာကိုနားလည်စေခဲ့သည်။ ကျွန်ုပ်တို့သည် ဖြောင့်မတ်သောစံနှုန်းများကို လုံးလုံးမပြည့်မီနိုင်သည်ကို ဘုရားသခင်နားလည်တော်မူကြောင်း စန္ဒြာသိရှိလာသည်။ (ဆာလံ ၅၁:၅; ရောမ ၃:၂၃; ၅:၁၂၊ ၁၈) ယေဟောဝါသည် ကျွန်ုပ်တို့၏ အားနည်းချက်များကိုသာ အာရုံစိုက်မနေကြောင်းနှင့် ကျွန်ုပ်တို့တတ်နိုင်သည်ထက် ပို၍မမျှော်လင့်ကြောင်း သိရသဖြင့် သူဝမ်းသာပျော်ရွှင်မိသည်။ ဆာလံဆရာကဤသို့မေးခဲ့သည်– “အိုဘုရားရှင်ထာဝရဘုရား ကိုယ်တော်သည် ဒုစရိုက်အပြစ်များကိုမှတ်တော်မူလျှင် အဘယ်သူခံရပ်နိုင်ပါမည်နည်း။”—ဆာလံ ၁၃၀:၃။

စန္ဒြာ၏နှလုံးကိုနွေးထွေးစေသော အရေးပါသည့် ကျမ်းစာအမှန်တရားတစ်ခုမှာ ယေရှုခရစ်၏ ရွေးဖိုးပူဇော်ရာယဇ်ဖြစ်သည်။ ၎င်းအားဖြင့် ယေဟောဝါသည် လူတို့၌ မစုံလင်မှုများရှိသော်လည်း နာခံသောလူသားများကို ဖြောင့်မတ်သောအနေအထား ပေးသနားတော်မူ၏။ (၁ ယောဟန် ၂:၂; ၄:၉၊ ၁၀) မှန်ပါသည်၊ ကျွန်ုပ်တို့သည် ‘ကျူးလွန်မှုများပြေလွှတ်ခွင့်’ ရရှိနိုင်ပြီး ထိုနည်းအားဖြင့် တန်ဖိုးမရှိဟူသော မည်သည့်ခံစားချက်များကိုမဆို အောင်မြင်ကျော်လွှားရန် အကူအညီရနိုင်ကြသည်။—ဧဖက် ၁:၇။

စန္ဒြာသည် တမန်တော်ပေါလု၏ပုံသက်သေမှ အဖိုးတန်သင်ခန်းစာများရရှိခဲ့သည်။ ဘုရားသခင်သည် သဘောထားကြီးစွာဖြင့် သူ၏ယခင်အပြစ်များကိုခွင့်လွှတ်ပြီး ပြန်ပေါ်လာသည့်အားနည်းချက်များကို အပြင်းအထန်တွန်းလှန်ကျော်လွှားရာတွင် ကူညီထောက်မပေးသော ကိုယ်တော်၏ကြင်နာမှုကို သူအလွန် ကျေးဇူးတင်လေးမြတ်ခဲ့သည်။ (ရောမ ၇:၁၅-၂၅; ၁ ကောရိန္သု ၁၅:၉၊ ၁၀) ပေါလုသည် သူ၏ဘဝလမ်းစဉ်ကို တည့်မတ်ပြုပြင်ပြီး ဘုရားသခင်နှစ်သက်သော လမ်းစဉ်ပေါ်တွင်ရှိနေဖို့ ‘သူ၏ကိုယ်ကိုထိုး၍ ကျွန်တစ်ယောက်ကဲ့သို့ နှိပ်စက်ခဲ့သည်။’ (၁ ကောရိန္သု ၉:၂၇) အပြစ်ပြုလိုသောစိတ်သဘောထားများက သူ့ကို ကျွန်ပြုစေရန် ပေါလုခွင့်မပြုခဲ့ပါ။

စန္ဒြာ၏အားနည်းချက်များက သူ့ကိုနှိပ်စက်ဖိစီးခဲ့သော်လည်း ၎င်းတို့ကို သူတိုက်လှန်နေ၏။ ၎င်းတို့ကို ကျော်လွှားနိုင်ဖို့ ကိုယ်တော်၏သက်ညှာမှုရရှိရန် ယေဟောဝါ၏အကူအညီကို စိတ်ထက်သန်စွာတောင်းဆိုခဲ့သည်။ (ဆာလံ ၅၅:၂၂; ယာကုပ် ၄:၈) စန္ဒြာသည် ဘုရားသခင်၏ပုဂ္ဂိုလ်ရေးစိတ်ဝင်စားမှုကို ခံစားသိရှိခဲ့ရာ သူ့ဘဝပုံစံကို ပြုပြင်ပြောင်းလဲနိုင်ခဲ့သည်။ “တခြားသူတွေကို အချိန်ပြည့် ကျမ်းစာသင်ပေးရလို့ ကျွန်မပျော်ရွှင်မိတယ်” ဟုသူပြောပြသည်။ သူ၏အစ်မနှင့် ညီမဖြစ်သူကို ယေဟောဝါအားသိရှိလာဖို့ ကူညီပေးရသောအခွင့်ထူးကို သူရရှိခဲ့သည်။ စန္ဒြာသည် ‘ကောင်းစွာသောအမှုကိုပြု’ နေစဉ် ယေဟောဝါသက်သေများ၏ စည်းဝေးပွဲများတွင် သူ၏ဆေးပညာပိုင်းကျွမ်းကျင်မှုဖြင့်လည်း စေတနာ့ဝန်ထမ်းခွင့်ရသည်။—ဂလာတိ ၆:၁၀။

စန္ဒြာ၏စွဲနေမှုများကော မည်သို့ နည်း။ ယုံကြည်စိတ်ချစွာဖြင့် သူဤသို့ဆိုသည်– “ကျွန်မစိတ်ကြည်လင်တယ်။ အရက်တို့ ဆေးလိပ်တို့ကို ကျွန်မ,မသောက်တော့ဘူး၊ မူးယစ်ဆေးဝါးလည်း မသုံးတော့ဘူး။ အဲဒါတွေကို ကျွန်မမလိုအပ်တော့ဘူး။ ကျွန်မရှာဖွေနေတဲ့အရာကို တွေ့ခဲ့ပြီလေ။”

[စာမျက်နှာ ၉ ပါ လေးထောင့်ကွက်]

အကျိုးသက်ရောက်သော ကျမ်းစာမူများ

အောက်ပါကျမ်းစာမူအချို့က လူများစွာကို ညစ်ညမ်းသောစွဲနေမှုများမှ ပြတ်သွားစေခဲ့သည်–

“ကိုယ်ခန္ဓာ၏အညစ်အကြေး၊ စိတ်ဝိညာဉ်၏အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေလျက်၊ ဘုရားသခင်ကိုကြောက်ရွံ့၍ သန့်ရှင်းခြင်း . . . နှင့်ပြည့်စုံကြကုန်အံ့။” (၂ ကောရိန္သု ၇:၁) ညစ်ညမ်းသည့်အရာများစွန့်လွှတ်ပြီး မသန့်ရှင်းသောအမူအကျင့်များ ရှောင်ကြဉ်သူများကို ဘုရားသခင်ကောင်းချီးပေးတော်မူ၏။

“ထာဝရဘုရားကိုကြောက်ရွံ့သောသဘောကား၊ [မကောင်းမှု]ကိုမုန်းသောသဘောတည်း။” (သု. ၈:၁၃) ဘုရားသခင်ကို ရိုသေခန့်ညားကြောက်ရွံ့ခြင်းသည် မူးယစ်ဆေးအလွဲသုံးခြင်းအပါအဝင် မကောင်းသောအကျင့်များကို ပြတ်စေသည်။ ပြုပြင်ပြောင်းလဲလာသူသည် ယေဟောဝါ၏စိတ်တော်နှင့်တွေ့သည့်အပြင် ကြောက်မက်ဖွယ်အနာရောဂါများမှ အကာအကွယ်ရကြသည်။

‘မင်းအရာရှိ၊ အာဏာပိုင်သူတို့၏ အုပ်စိုးခြင်းကိုဝန်ခံ၍ နားထောင်ကြလော့။’ (တိတု ၃:၁၊ သမ္မာ) နေရာဒေသများစွာတွင် အချို့သောမူးယစ်ဆေးများကို လက်ဝယ်ထားရှိခြင်း၊ သို့မဟုတ် အသုံးပြုခြင်းတို့သည် ဥပဒေကိုချိုးဖောက်ခြင်းဖြစ်သည်။ ခရစ်ယာန်စစ်များသည် တရားမဝင်သောမူးယစ်ဆေးများကို လက်ဝယ်မထား၊ မသုံးစွဲကြချေ။

[စာမျက်နှာ ၉ ပါ အကျဉ်းဖော်ပြချက်]

“ကျွန်မရှာဖွေနေတဲ့အရာကို တွေ့ ခဲ့ပြီ”