‘စိတ်နှိမ့်ချသောသူတို့သည် မြေကြီးကို အမွေခံလိမ့်မည်’—မည်သို့နည်း

“‘စိတ်နှိမ့်ချသူတွေဟာ မြေကြီးကိုအမွေခံရလိမ့်မယ်’ ဆိုတဲ့ ယေရှုရဲ့ကြည်နူးအားရဖွယ်စကားကို ရှင် ရင်းနှီးပြီးသားဖြစ်ပါလိမ့်မယ်။ ဒါပေမဲ့ လူလူချင်းကိုဖြစ်စေ၊ မြေကြီးကိုဖြစ်စေ လူတွေပြုလုပ်နေသမျှကိုကြည့်ပြီး စိတ်နှိမ့်ချသူတွေ အမွေခံစရာ ဘာကျန်မယ်လို့ ရှင်ထင်သလဲ။”—မဿဲ ၅:၅; ဆာလံ ၃၇:၁၁။

ယေဟောဝါသက်သေတစ်ဦးဖြစ်သူ မီရီအဲမ်သည် ထိုမေးခွန်းဖြင့် ကျမ်းစာဆွေးနွေးမှုတစ်ခုကို အစပြုခဲ့သည်။ သူ၏စကားကို နားထောင်နေသောအမျိုးသားက ယေရှုဤသို့ကတိပြုခဲ့သည်မှန်လျှင် မြေကြီးသည် ပြုတ်ပြုတ်ပြုန်းနေသော သို့မဟုတ် လူမနေနိုင်အောင် ပျက်စီးယိုယွင်းနေသောအရပ်မဟုတ်ဘဲ အမွေအနှစ်ဟူသောအမည်နှင့် ထိုက်လျော်သည့်အရပ်ဖြစ်ရမည်ဟု ဖြေဆိုခဲ့သည်။

ယင်းသည် အမှန်ပင် အပြုသဘောဆောင်သောအဖြေဖြစ်၏။ သို့သော် ထိုသို့အကောင်းမြင်စရာ အကြောင်းရှိပါသလော။ အမှန်ရှိပါသည်၊ အကြောင်းမှာ သမ္မာကျမ်းစာက ထိုကတိတော်သည် အမှန်တကယ်ပြည့်စုံမည်ဟု ယုံကြည်စိတ်ချရန် ခိုင်လုံသောအကြောင်းရင်းများ ပေးထားသောကြောင့်ဖြစ်၏။ အမှန်မှာ ထိုကတိတော်ပြည့်စုံခြင်းသည် လူသားနှင့်လည်းကောင်း၊ မြေကြီးနှင့်လည်းကောင်းဆိုင်သော ဘုရားသခင့်ရည်ရွယ်ချက်နှင့် အနီးကပ်ဆက်စပ်နေသည်။ ဘုရားသခင်သည် ရည်ရွယ်ထားရာများကို ဖြစ်မြောက်အောင်မြင်စေမည်ဟု အာမခံထားသည်။ (ဟေရှာယ ၅၅:၁၁) သို့ဖြစ်၍ လူသားတို့အတွက် ဘုရားသခင်၏ကနဦးရည်ရွယ်ချက်ကားအဘယ်နည်း၊ မည်သို့ပြည့်စုံလာမည်နည်း။

မြေကြီးအတွက် ဘုရားသခင်၏ထာဝရရည်ရွယ်ချက်

ယေဟောဝါဘုရားသခင်သည် မြေကြီးကို အထူးရည်ရွယ်ချက်တစ်ခုအတွက် ဖန်ဆင်းခဲ့ပါသည်။ ‘မိုးကောင်းကင်ကို ဖန်ဆင်း၍ မှန်တော်မူသောဘုရားသခင်၊ မြေကြီးကိုပြုပြင်ဖန်ဆင်း၍ အမြဲတည်စေတော်မူသောအရှင်၊ လဟာအဖြစ်ဖြင့်ဖန်ဆင်းသည်မဟုတ်၊ သတ္တဝါနေစရာဖို့ ဖန်ဆင်းတော်မူသော ထာဝရဘုရားသခင်မိန့်တော်မူသည်ကား ‘ငါသည်ယေဟောဝါဖြစ်၏။ ငါမှတစ်ပါး အခြားသောဘုရားသခင်မရှိ။’’ (ဟေရှာယ ၄၅:၁၈) သို့ဖြစ်၍ မြေကြီးကို လူနေဖို့ သီးသန့်ဖန်ဆင်းထားသည်။ ထို့အပြင် မြေကြီးနှင့်ပတ်သက်သော ဘုရားသခင့်ရည်ရွယ်ချက်မှာ လူတို့၏ထာဝရနေအိမ်ဖြစ်စေဖို့တည်း။ “မြေကြီးအမြစ်ကို ကာလအစဉ်အမြဲ မရွေ့မလှုပ်စေခြင်းငှာ တည်တော်မူ” ၏။—ဆာလံ ၁၀၄:၅; ၁၁၉:၉၀။

ကနဦးလူသားမောင်နှံကို ဘုရားသခင်ပေးခဲ့သောတာဝန်ကလည်း မြေကြီးနှင့်ပတ်သက်သော ကိုယ်တော်၏ရည်ရွယ်ချက်ကို ထင်ရှားစေသည်။ အာဒံနှင့် ဧဝကို ယေဟောဝါဤသို့မိန့်တော်မူ၏– “အချင်းတို့ များပြားစွာမွေးဖွားကြလော့။ မြေကြီးကိုပြည့်စေ၍ နိုင်ကြလော့။ ပင်လယ်ငါးတို့ကိုလည်းကောင်း၊ မိုးကောင်းကင်ငှက်တို့ကိုလည်းကောင်း၊ အသက်ရှင်၍မြေပေါ်မှာလှုပ်ရှားတတ်သော တိရစ္ဆာန်အပေါင်းတို့ကိုလည်းကောင်း အုပ်စိုးကြလော့။” (ကမ္ဘာဦး ၁:၂၈) အာဒံနှင့်ဧဝကို ဘုရားသခင်ပေးအပ်ခဲ့သော မြေကြီးသည် သူတို့နှင့် သူတို့၏သားစဉ်မြေးဆက် ထာဝစဉ်နေထိုင်ဖို့ဖြစ်သည်။ ရာစုနှစ်များစွာကြာပြီးနောက် ဆာလံဆရာက ‘ကောင်းကင်ကား ထာဝရဘုရားသခင်၏ကောင်းကင်ဖြစ်၏။ မြေကြီးကိုကား လူသားတို့အားပေးတော်မူပြီ’ ဟုအတိအလင်းပြောခဲ့သည်။—ဆာလံ ၁၁၅:၁၆။

အလွန်ကောင်းသောထိုရှေ့ရေး အကောင်အထည်ပေါ်ဖို့ အာဒံနှင့်ဧဝကော သူတို့၏သားစဉ်မြေးဆက်တို့ပါ ယေဟောဝါဘုရားသခင်ကို ဖန်ဆင်းရှင်၊ အသက်ပေးရှင်နှင့် ရှင်ဘုရင်အဖြစ် လက်ခံပြီး ကိုယ်တော်အား နာခံကြရမည်။ လူကို ဤသို့ ပညတ်ပေးချိန်တွင် ယင်းကို ယေဟောဝါ အတိအလင်းဖော်ပြခဲ့သည်– “ကောင်းမကောင်းကိုသိကျွမ်းရာအပင်မှတစ်ပါး ထိုဥယျာဉ်၌ရှိသမျှသောအပင်တို့၏အသီးကို သင်သည်စားရသောအခွင့်ရှိ၏။ ထိုအပင်၏အသီးကိုကားမစားရ။ စားသောနေ့တွင် ဧကန်အမှန်သေရမည်။” (ကမ္ဘာဦး ၂:၁၆၊ ၁၇) အာဒံနှင့်ဧဝတို့သည် ဧဒင်ဥယျာဉ်၌ ဆက်နေထိုင်လိုလျှင် ထိုရှင်းလင်းပြတ်သားသောပညတ်ကို နာခံကြရမည်။ ထိုသို့နာခံခြင်းဖြင့် ကောင်းကင်ခမည်းတော် ပြုလုပ်ပေးသမျှကို ကျေးဇူးတင်ကြောင်းပြရာရောက်ပေမည်။

အာဒံနှင့်ဧဝတို့သည် သူတို့အား ပေးထားသောပညတ်ကို ချိုးဖောက်ခြင်းအားဖြင့် ဘုရားသခင်၏စကားကို တမင်မနာခံကြသောအခါ သူတို့သည် အမှန်စင်စစ် အရာခပ်သိမ်းပေးသနားသည့် အရှင်ကို စွန့်ပယ်ကြခြင်းဖြစ်သည်။ (ကမ္ဘာဦး ၃:၆) ထိုသို့ပြုခြင်းအားဖြင့် သူတို့ကိုယ်တိုင်အတွက်သာမက သူတို့၏သားစဉ်မြေးဆက်များအတွက်ပါ လှပသောပရဒိသုနေအိမ်ကို လက်လွှတ်ဆုံးရှုံးခဲ့ကြရသည်။ (ရောမ ၅:၁၂) ကနဦးမောင်နှံစုံ၏ မနာခံမှုသည် မြေကြီးကိုဖန်ဆင်းရသည့် ဘုရားသခင့်ရည်ရွယ်ချက်ကို ပျက်ပြယ်စေခဲ့သလော။

ပြောင်းလဲခြင်းမရှိသော ဘုရားသခင်

ဘုရားသခင်က “ငါသည် ထာဝရ [“ယေဟောဝါ၊” ကဘ] ဘုရား [သခင်] ဖြစ်၏။ ပြောင်းလဲခြင်းမရှိ” ဟု ပရောဖက်မိက္ခာမှတစ်ဆင့် ကြေညာခဲ့သည်။ (မာလခိ ၃:၆) ဤကျမ်းချက်နှင့်ပတ်သက်၍ ပြင်သစ်ကျမ်းပညာရှင် အဲလ်. ဖီလီယောန်က ၎င်းကြေညာချက်သည် ဘုရားသခင့်ကတိတော်များ အထမြောက်ခြင်းနှင့် အနီးကပ်ဆက်စပ်နေသည်ဟု မှတ်ချက်ချခဲ့သည်။ ဖီလီယောန်ဤသို့ရေးသားခဲ့သည်– “ယေဟောဝါသည် ဤပုန်ကန်သူများကို အပြီးအပိုင် သုတ်သင်ပစ်နိုင်သော်လည်း မိမိ၏ကတိတော်များကို မပြောင်းလဲနိုင်သဖြင့် မည်သည့်အခြေအနေမျိုးပင်ရှိစေကာမူ အတိတ်ကပြုခဲ့သော ကတိတော်များကို တည်စေပါမည်။” ဘုရားသခင်သည် လူတစ်ဦးကိုဖြစ်စေ၊ လူမျိုးတစ်မျိုးကိုဖြစ်စေ သို့မဟုတ် လူသားအားလုံးကိုဖြစ်စေ ပေးထားသော ကတိတော်များကို မေ့လျော့မည်မဟုတ်၊ ကိုယ်တော်သတ်မှတ်ထားချိန်တွင် ပြည့်စုံစေမည်ဖြစ်သည်။ ‘လူမျိုးအဆက်တစ်ထောင်တိုင်အောင် မိန့်တော်မူသည့် နှုတ်မြွက်စကားတော်တည်းဟူသော ပဋိညာဉ်တော်ကို အစဉ်အမြဲအောက်မေ့တော်မူ၏။’—ဆာလံ ၁၀၅:၁၂၊ သမ္မာ။

သို့သော် ယေဟောဝါသည် မြေကြီးနှင့်ပတ်သက်သော မိမိ၏ကနဦးရည်ရွယ်ချက်ကို မပြောင်းခဲ့ကြောင်း မည်သို့စိတ်ချနိုင်သနည်း။ နာခံသောလူသားများအား ဤမြေကြီးကိုပေးမည့် ဘုရားသခင့်ရည်ရွယ်ချက်ကို ဘုရားသခင်၏မှုတ်သွင်းခံစကားတော်၊ သမ္မာကျမ်းစာတစ်အုပ်လုံးတွင် တွေ့ရှိရသောကြောင့် ယင်းကိုစိတ်ချနိုင်ပါသည်။ (ဆာလံ ၂၅:၁၃; ၃၇:၉၊ ၂၂၊ ၂၉၊ ၃၄) ထို့ပြင် ယေဟောဝါ၏ကောင်းချီးခံစားရသူတို့ကို သမ္မာကျမ်းစာက “ကြောက်စေသောသူတစ်ယောက်မျှမရှိ” ဘဲ “ကိုယ်ပိုင်သောသင်္ဘောသဖန်းပင်အောက်” ထိုင်နေကြသော လုံခြုံမှုရှိသူများအဖြစ် ဖော်ပြထားသည်။ (မိက္ခာ ၄:၄; ယေဇကျေလ ၃၄:၂၈) ယေဟောဝါရွေးချယ်သူတို့သည် “ကိုယ်ဆောက်သောအိမ်၌နေကြလိမ့်မည်။ ကိုယ်စိုက်သောစပျစ်ဥယျာဉ်အသီးကို စားကြလိမ့်မည်။” သူတို့သည် တောသားရဲများနှင့်ပင် အသင့်အတင့်ရှိပါလိမ့်မည်။—ဟေရှာယ ၁၁:၆-၉; ၆၅:၂၁၊ ၂၅။

သမ္မာကျမ်းစာတွင် ဘုရားသခင့်ကတိတော်ဆိုင်ရာ ကြိုတင်မြင်ကွင်းတစ်ခုကို အခြားတစ်နည်းဖြင့် ဖော်ပြပေးသည်။ ရှောလမုန်ဘုရင်အုပ်စိုးချိန်အတွင်း ဣသရေလနိုင်ငံသည် ငြိမ်းချမ်း၍ သာယာဝပြောခဲ့သည်။ သူ၏အုပ်ချုပ်မှုအောက် “လက်ထက်တော်ကာလပတ်လုံး ယုဒအမျိုးနှင့် ဣသရေလအမျိုးသားတို့သည် ဒန်မြို့မှစ၍ ဗေရရှေဘမြို့တိုင်အောင် အသီးအသီး မိမိစပျစ်ပင်၊ မိမိသင်္ဘောသဖန်းပင်အောက်မှာ ငြိမ်ဝပ်စွာနေရကြ၏။” (၃ ဓမ္မရာဇဝင် ၄:၂၅) သမ္မာကျမ်းစာက ယေရှုကို “ရှောလမုန်ထက် သာ၍ကြီးမြတ်သောသူ” ဟုဆိုပြီး ကိုယ်တော်၏အုပ်ချုပ်မှုနှင့်ပတ်သက်၍ ဆာလံဆရာက ဤသို့ပရောဖက်ပြုကြေညာခဲ့သည်– “လက်ထက်တော်၌ လသည် ပပျောက်ခြင်းသို့မရောက်မီတိုင်အောင် တရားသောသူသည်ပွင့်လန်း၍ ချမ်းသာများပြားလိမ့်မည်။” ထိုအချိန်တွင် “ပြည်တော်၌ များစွာသောစပါးရှိ၍ အသီးအနှံသည် လေဗနုန်တောကဲ့သို့ တောင်ထိပ်ပေါ်မှာ လှုပ်ရှားလိမ့်မည်။”—လုကာ ၁၁:၃၁; ဆာလံ ၇၂:၇၊ ၁၆။

ယေဟောဝါသည် မိမိ၏စကားအတိုင်း ကတိထားရာအမွေအနှစ်ကို အသင့်ရှိစေရုံမက ယင်း၏ခံ့ညားထည်ဝါမှုဟူသ၍ကိုလည်း ဧကန်အမှန် ပြန်ရရှိစေပါလိမ့်မည်။ ကတိထားရာကမ္ဘာသစ်တွင် ဘုရားသခင်သည် “သူတို့၏မျက်စိ၌မျက်ရည်ရှိသမျှတို့ကို သုတ်တော်မူမည်။ နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ” ဟု ဗျာ. ၂၁:၄ တွင် သမ္မာကျမ်းစာကဆို၏။ ကတိထားရာပရဒိသု အမှန်တကယ် ဖြစ်လာပါလိမ့်မည်။—လုကာ ၂၃:၄၃။

ကတိထားရာအမွေအနှစ်ကို ဝေမျှခံစားနိုင်ပုံ

ဘုရင်အဖြစ် ယေရှုခရစ်အုပ်ချုပ်မည့်နိုင်ငံတော်၊ ယင်း၏လက်အောက်ခံများကို ကောင်းကင်မှအုပ်ချုပ်မည့်အစိုးရလက်အောက်တွင် မြေကြီးသည် ပရဒိသုအသွင် ပြောင်းလဲလာပါလိမ့်မည်။ (မဿဲ ၆:၉၊ ၁၀) ဦးဆုံး ထိုနိုင်ငံတော်သည် “မြေကြီးကိုဖျက်ဆီးသောသူတို့ကို ဖျက်ဆီးတော်မူ” လိမ့်မည်။ (ဗျာ. ၁၁:၁၈; ဒံယေလ ၂:၄၄၊ ၄၅) ထို့နောက် ယေရှုခရစ်သည် “ငြိမ်သက်ခြင်းမင်း” အဖြစ် “အာဏာတော်နှင့် ငြိမ်သက်ခြင်းသည် မကုန်မဆုံး . . . အမြဲတိုးတက်လိမ့်မည်” ဟူသော ပရောဖက်ပြုစကားကို ပြည့်စုံစေပါလိမ့်မည်။ (ဟေရှာယ ၉:၆၊ ၇၊ သမ္မာ) ရှင်ပြန်ထမြောက်ခြင်းအားဖြင့် အသက်ပြန်ရှင်လာကြမည့်သူများအပါအဝင် သန်းပေါင်းများစွာသောသူတို့သည် ထိုနိုင်ငံတော်အောက် မြေကြီးကိုအမွေခံခွင့် ရကြပါလိမ့်မည်။—ယောဟန် ၅:၂၈၊ ၂၉; တမန်တော် ၂၄:၁၅။

အလွန်ကောင်းသော ထိုအမွေအနှစ်ကို မည်သူတို့ခံစားရဖို့ အလားအလာရှိမည်နည်း။ ‘စိတ်နူးညံ့သိမ်မွေ့သောသူတို့သည် ပျော်ရွှင်ကြ၏။ အကြောင်းမူကား ထိုသူတို့သည် ဤမြေကြီးကိုအမွေခံရကြလတ္တံ့’ ဟူသော ယေရှု၏စကားကိုသုံးသပ်ကြည့်ပါ။ (မဿဲ ၅:၅၊ သမ္မာ) စိတ်နူးညံ့သိမ်မွေ့ခြင်း သို့မဟုတ် စိတ်နှိမ့်ချခြင်းသည် အဘယ်အရာကိုဆိုလိုသနည်း။ အဘိဓာန်အများက “စိတ်နှိမ့်ချခြင်း” သို့မဟုတ် “နူးညံ့သိမ်မွေ့ခြင်း” ကို ညင်သာသော၊ မပြင်းထန်သော၊ သည်းညည်းခံတတ်သော၊ အမျက်ထွက်ခဲသော၊ ကျိုးနွံသောဟု အဓိပ္ပာယ်ဖွင့်ကြသည်။ သို့သော် မူရင်းဂရိစကားလုံးသည် အဓိပ္ပာယ်ပိုကျယ်ဝန်းသည်။ ထိုစကားလုံးတွင် “ညင်သာမှုပါရှိသည်၊ သို့သော် ညင်သာမှုနောက်ဝယ် သံမဏိတမျှ ခိုင်မာမှုရှိသည်” ဟုဝီလျံဘာကလေး၏ ဓမ္မသစ်ဝေါဟာရကျမ်းကဆို၏။ ယင်းသည် အငြိုးအတေးမရှိ သို့မဟုတ် လက်စားချေဖို့စိတ်မကူးဘဲ ထိခိုက်နစ်နာမှုကိုခံရပ်နိုင်စေသော စိတ်သဘောထားကိုဆိုလို၏၊ ဘုရားသခင်နှင့် ကောင်းသောဆက်ဆံရေးရှိထားပြီး ထိုဆက်ဆံရေးက သူ၏ခွန်အားရင်းမြစ်ဖြစ်လာခြင်းကြောင့် ထိုစိတ်သဘောထားရှိလာခြင်းဖြစ်သည်။—ဟေရှာယ ၁၂:၂; ဖိလိပ္ပိ ၄:၁၃။

စိတ်နှိမ့်ချသူသည် ဘုရားသခင့်စံနှုန်းများကို သူ၏ဘဝကဏ္ဍအသီးသီးတွင် နှိမ့်ချစွာခံယူသည်; သူထင်မြင်ယူဆသည့်အတိုင်း သို့မဟုတ် အခြားသူများ၏ယူဆချက်နှင့်အညီ ဇွတ်တရွတ်မလုပ်ပါ။ သင်ပေး၍ရသောသူ၊ ယေဟောဝါ၏သွန်သင်မှုကို ခံယူလိုသူလည်းဖြစ်သည်။ ဆာလံဆရာဒါဝိဒ်က ဤသို့ရေးသားခဲ့သည်– “[ယေဟောဝါသည်] စိတ်နှိမ့်ချသောသူတို့ကို တရားလမ်း၌ပို့ဆောင်၍ လမ်းခရီးတော်များကို သွန်သင်တော်မူ၏။”—ဆာလံ ၂၅:၉; သု. ၃:၅၊ ၆။

အသင်သည် မြေကြီးကိုအမွေခံမည့် “စိတ်နှိမ့်ချသောသူတို့” အဝင်ဖြစ်မည်လော။ ယေဟောဝါနှင့် ကိုယ်တော်၏အလိုတော်ကိုသိရှိရန် ကျမ်းစာကို ဝီရိယရှိရှိလေ့လာပြီး သိရှိခဲ့ရာများကို လက်တွေ့ကျင့်သုံးခြင်းအားဖြင့် အသင်လည်း မြေကြီးပရဒိသုကို အမွေခံကာ ထာဝစဉ်အသက်ရှင်ဖို့ စောင့်မျှော်နိုင်ပါသည်။—ယောဟန် ၁၇:၃။

[စာမျက်နှာ ၅ ပါ ရုပ်ပုံ]

အာဒံနှင့်ဧဝတို့ကို ပေးခဲ့သောတာဝန်က မြေကြီးနှင့်ပတ်သက်သော ဘုရားသခင့်ရည်ရွယ်ချက်ကို ထင်ရှားစေ

[စာမျက်နှာ ၆၊ ၇ ပါ ရုပ်ပုံ]

ရှောလမုန်အုပ်ချုပ်ရေး၏ ငြိမ်းချမ်းမှုနှင့် သာယာဝပြောမှုတို့က ကတိထားရာအမွေအနှစ်နှင့်ပတ်သက်သော ကြိုတင်မြင်ကွင်းတစ်ခုကို ဖော်ပြပေး

[Credit Lines]

Sheep and background hill: Pictorial Archive (Near Eastern History) Est.; Arabian oryx: Hai-Bar, Yotvata, Israel; farmer plowing: Garo Nalbandian

[စာမျက်နှာ ၇ ပါ ရုပ်ပုံ]

ဖြောင့်မတ်သောကမ္ဘာသစ် ရောက်လာတော့မည်—ထိုတွင် သင်ရှိမည်လော