ယေဟောဝါ၏နှုတ်မြွက်စကားတော်သည် အသက်ရှင်၏

ဆာလံကျမ်းအပိုင်းတစ်မှ ပေါ်လွင်ချက်များ

ဖန်ဆင်းရှင် ယေဟောဝါဘုရားသခင်အား ချီးမွမ်းကျူးဧခြင်းအများစုပါဝင်သော ကျမ်းစောင်ကို အဘယ်အမည်ပေးရန် သင့်လျော်သနည်း။ ဆာလံဟူသောအမည်ထက် သင့်လျော်သည့်အမည် မရှိပေ။ ဤအရှည်ဆုံးကျမ်းစောင်တွင် ဘုရားသခင်၏ ကောင်းမြတ်လှသော အရည်အသွေးများ၊ တန်ခိုးပါသောလုပ်ရပ်များနှင့် ပရောဖက်ပြုချက်အမြောက်အမြားကို ဖော်ပြသည့် လှပစွာသီကုံးထားသော သီချင်းများပါဝင်သည်။ ကျူးဧသီချင်းအများစုမှာ ကျမ်းရေးသူတို့ ဘေးဆိုးများတွေ့ကြုံရင်ဆိုင်ရစဉ် သူတို့၏ခံစားချက်များကို ထုတ်ဖော်သည်။ ယင်းတွင် ပရောဖက်မောရှေခေတ်မှစ၍ ပြည်နှင်ခံရချိန်နောက်ပိုင်းအထိ နှစ်ပေါင်းတစ်ထောင်ကြာအချိန်အတွင်း အဖြစ်အပျက်များအကြောင်း ပါရှိသည်။ ကျမ်းရေးသူများမှာ မောရှေ၊ ဘုရင်ဒါဝိဒ်နှင့် အခြားပုဂ္ဂိုလ်များဖြစ်သည်။ ဆာလံကျမ်းကို ယခုနောက်ဆုံးပုံစံအတိုင်းဖြစ်လာစေရန် ယဇ်ပုရောဟိတ်ဧဇရ စီစဉ်ခဲ့သည်ဟု ယူဆကြသည်။

ရှေးအချိန်ကတည်းက ဆာလံကျမ်းကို သီချင်းပေါင်းချုပ်ငါးခု သို့မဟုတ် အပိုင်းငါးပိုင်းအဖြစ် ခွဲခြားထား၏– (၁) ဆာလံ ၁-၄၁ (၂) ဆာလံ ၄၂-၇၂ (၃) ဆာလံ ၇၃-၈၉ (၄) ဆာလံ ၉၀-၁၀၆ (၅)  ဆာလံ ၁၀၇-၁၅၀ တို့ဖြစ်ကြသည်။ ဤဆောင်းပါးတွင် ပထမအပိုင်းကို သုံးသပ်ပါမည်။ ဤအပိုင်းရှိ ဆာလံသုံးပုဒ်မှလွဲ၍ ကျန်အားလုံးကို ရှေးခေတ်ဣသရေလဘုရင်ဒါဝိဒ် ရေးစပ်သီကုံးခဲ့၏။ ဆာလံ ၁၊ ၁၀၊ ၃၃ တို့ကိုမူ မည်သူရေးစပ်ခဲ့ကြောင်း မသိရှိရချေ။

‘ထာဝရဘုရားသခင်သည် ငါ၏ကျောက် ဖြစ်တော်မူ၏’

(ဆာလံ ၁:၁–၂၄:၁၀)

ပထမဆာလံတွင်  ယေဟောဝါ၏တရားတော်၌ မွေ့လျော်သူသည် ပျော်ရွှင်ကြောင်း ဖော်ပြပြီးသည်နှင့် ဒုတိယဆာလံက ဘုရားသခင့်နိုင်ငံတော်အကြောင်း အဓိကဖော်ပြသည်။a ဤဆာလံအပိုင်းတစ်တွင် ဘုရားသခင်ထံ အသနားခံချက်များ ပါဝင်သည်။ ဥပမာ၊ ဆာလံ ၃-၅၊ ၇၊ ၁၂၊ ၁၃၊ ၁၇ သည် ရန်သူတို့လက်မှ ကယ်လွှတ်ပေးပါရန် အသနားခံချက်များဖြစ်၏။ လူ၏သေးနုပ်မှုနှင့်နှိုင်းလျှင် ယေဟောဝါကြီးမြတ်တော်မူကြောင်း ဆာလံ ၈ က ပေါ်လွင်စေသည်။

ဒါဝိဒ်သည် ယေဟောဝါအား မိမိလူမျိုးကို ကာကွယ်တော်မူရှင်အဖြစ် ဖော်ပြကာ ဤသို့သီဆိုခဲ့သည်– ‘ထာဝရဘုရားသခင်သည် ငါ၏ကျောက်၊ . . . ငါ၏ရဲတိုက်ဖြစ်တော်မူ၏။’ (ဆာလံ ၁၈:၂) ဆာလံ ၁၉ တွင် ယေဟောဝါအား ဖန်ဆင်းရှင်၊ ပညတ်ပေးရှင်အဖြစ်၊ ဆာလံ ၂၀ တွင် ကယ်တင်ရှင်အဖြစ်၊ ဆာလံ ၂၁ တွင် ခန့်အပ်ခံဘုရင်၏ကယ်တင်ရှင်အဖြစ် ချီးမွမ်းထားသည်။ ဆာလံ ၂၃ တွင် ကိုယ်တော်အား ကြီးမြတ်သောသိုးထိန်းရှင်၊ ဆာလံ ၂၄ တွင် ဘုန်းအသရေပြည့်စုံသောဘုရင်အဖြစ် ပုံဖော်ထားသည်။ 

ကျမ်းစာမေးခွန်းများ၏အဖြေ–

၂:၁၊ ၂—လူမျိုးတို့သည် အဘယ် “အချည်းနှီး” အရာကို ကြံစည်ကြသနည်း။ လူ့အုပ်စိုးရှင်များ မိမိတို့အာဏာတည်မြဲရေးအတွက် မပြတ်ပူပန်ကြနေခြင်းမှာ “အချည်းနှီး” အရာဖြစ်သည်။ သူတို့၏ရည်ရွယ်ချက်သည် လုံးဝအထမြောက်မည်မဟုတ်သောကြောင့် အချည်းနှီးပင်။ လူမျိုးတို့သည် ‘ထာဝရဘုရားသခင်နှင့် ခရစ်တော်ကို ရန်ဘက်ပြု’ သည့်အတွက် အောင်မြင်နိုင်မည်လော။

၂:၇—‘ယေဟောဝါ၏ အမိန့်တော်’ ကားအဘယ်နည်း။ ဤအမိန့်တော်မှာ ယေဟောဝါသည် မိမိချစ်မြတ်နိုးသောသား ယေရှုခရစ်နှင့်ဖွဲ့သော ဘုရားသခင့်နိုင်ငံတော်ပဋိညာဉ် ဖြစ်သည်။—လုကာ ၂၂:၂၈၊ ၂၉။

၂:၁၂—ရှင်ဘုရင်တို့သည် အဘယ်နည်းဖြင့် “သားတော်ကို နမ်း” နိုင်ကြသနည်း။ ကျမ်းစာခေတ်တွင် နမ်းခြင်းသည် ခင်မင်ရင်းနှီးမှုနှင့်သစ္စာရှိမှုကို ဖော်ပြသည်။ ဧည့်သည်များကို ကြိုဆိုကြောင်း ဖော်ပြသည့်နည်းလည်းဖြစ်၏။ ရှင်ဘုရင်များ သားတော်ကိုနမ်းကြဟုမိန့်မှာခြင်းမှာ ကိုယ်တော်အား မေရှိယဘုရင်အဖြစ် ကြိုဆိုကြရန်ဖြစ်သည်။

အခန်း ကြီး ၃ ထိပ်စီးခေါင်းစဉ်—ဆာလံကျမ်းအချို့ကို ထိပ်စီးခေါင်းစဉ်တပ်ထားခြင်းက အဘယ်အတွက်နည်း။ တစ်ခါတစ်ရံ ခေါင်းစဉ်သည် ကျမ်းရေးသူကို ဖော်ပြ၏။ ထို့ပြင် ဆာလံ ၃ မှာကဲ့သို့ ဆာလံတစ်ပုဒ်ကိုစပ်ဆိုရသော အခြေအနေများအကြောင်း ဖော်ပြပေးသည်။ ထိပ်စီးခေါင်းစဉ်သည် သီချင်းတစ်ပုဒ်၏ရည်ရွယ်ချက် သို့မဟုတ် ယင်းကိုအသုံးပြုပုံ (ဆာလံ ၄ နှင့် ၅) အပြင် တေးဂီတအညွှန်း (ဆာလံ ၆) ကိုလည်း ဖော်ပြပေးသည်။

၁၁:၁-၃—အဘယ်အမှီတကဲတို့သည် ပျက်ရသနည်း။ ယင်းတို့သည် လူဘောင်အဖွဲ့အစည်းတည်မှီရာ အမှီတကဲများဖြစ်သော ဥပဒေ၊ အမိန့်၊ တရားမျှတမှုတို့ ဖြစ်သည်။ ယင်းတို့ပြိုပျက်သွားသောအခါ လူမှုရေးဖောက်ပြန်မှုများ ကြီးစိုးလာပြီး တရားမျှတမှုရှိတော့မည် မဟုတ်ချေ။ အဆိုပါအခြေအနေများတွင် “ဖြောင့်မတ်သောသူ” သည် ဘုရားသခင်အား အကြွင်းမဲ့ကိုးစားရမည်။—ဆာလံ ၁၁:၄-၇။

၂၁:၃—“ရွှေစင်သရဖူ”  ကား  အဘယ်အရာကို ပုံဆောင်သနည်း။ ယင်းသည် တကယ့်သရဖူလော သို့မဟုတ် ဒါဝိဒ် အကြိမ်ကြိမ်အောင်ပွဲခံခဲ့သောကြောင့် ဘုန်းတန်ခိုးတိုးလာခြင်းကို ပုံဆောင်သလောဆိုသည်ကို မဖော်ပြထားပါ။ သို့သော် ယင်းအခန်းငယ်က ၁၉၁၄ ခုနှစ်တွင် ယေဟောဝါထံမှ ယေရှုရရှိခဲ့သော ဘုရင့်အရိုက်အရာသရဖူကို ပရောဖက်ပြုရည်ညွှန်းသည်။ ရွှေနှင့်ပြုလုပ်ထားခြင်းက ကိုယ်တော့်အုပ်စိုးမှုသည် အမြင့်မြတ်ဆုံးဖြစ်ကြောင်း တင်ပြသည်။

၂၂:၁၊ ၂—ဒါဝိဒ်သည် မိမိကို ယေဟောဝါစွန့်ပစ်ပြီဟု အဘယ်ကြောင့်ခံစားရသနည်း။ ဒါဝိဒ်ကို ရန်သူများ အကြီးအကျယ်ဖိအားပေးသည့်အတွက် သူ၏ “နှလုံးသည် ဖယောင်းကဲ့သို့ဖြစ်၍ ရင်ထဲမှာ အရည်ကျို” ခံရသကဲ့သို့ဖြစ်နေ၏။ (ဆာလံ ၂၂:၁၄) မိမိကို ယေဟောဝါစွန့်ပစ်ပြီဟု သူခံစားနေရပုံပေါ်သည်။ ယေရှုလည်း နှက်တိုင်တင်ခံရချိန်တွင် အလားတူခံစားခဲ့ရ၏။ (မဿဲ ၂၇:၄၆) ဒါဝိဒ်၏စကားများက ဆိုးရွားလှသောအခြေအနေတွင် လူသားတစ်ဦးအနေနှင့် သူ၏တုံ့ပြန်ပုံကို ဖော်ပြသည်။ သို့သော် ဆာလံ ၂၂:၁၆-၂၁ တွင်ပါသည့် ဒါဝိဒ်၏ဆုတောင်းချက်အရ ဘုရားသခင်အား သူယုံကြည်နေဆဲဖြစ်ကြောင်း ထင်ရှားသည်။

ကျွန်ုပ်တို့အတွက် သင်ခန်းစာ–

၁:၁၊ ၂။ ယေဟောဝါအား မချစ်သူတို့နှင့် မပေါင်းသင့်ပေ။—၁ ကောရိန္သု ၁၅:၃၃။

၁:၂။ ဝိညာဉ်ရေးရာများကို တွေးတောဆင်ခြင်ခြင်းမပြုသည့် နေ့ရက်တစ်ရက်မျှ မရှိစေရပါ။—မဿဲ ၄:၄။

၄:၄။ ကျွန်ုပ်တို့စိတ်ဆိုးသောအခါ နောင်တရစရာဖြစ်စေမည့်စကားများ မပြောမိဖို့ လျှာကိုထိန်းခြင်းသည် ပညာရှိ၏။—ဧဖက် ၄:၂၆၊ ၂၇။

၄:၅။ စိတ်ရင်းမှန်ရှိပြီး ယေဟောဝါ၏ တောင်းဆိုချက်များနှင့်အညီ ကျင့်ကြံမှသာ ကျွန်ုပ်တို့၏ ဝိညာဉ်ရေးပူဇော်ရာယဇ်များသည် “တရားသဖြင့်ယဇ်ပူဇော်” ခြင်းဖြစ်သည်။

၆:၅။ အသက်ဆက်ရှင်လိုသည့် အကောင်းဆုံးအကြောင်းရင်းမှာ အဘယ်နည်း။—ဆာလံ ၁၁၅:၁၇။

၉:၁၂။ ယေဟောဝါသည် သွေးပြစ်ကျူးလွန်ခြင်းကို အပြစ်ပေးရန် လူအသက်သတ်ခြင်းအမှုကို စစ်တော်မူ၍ “နှိမ့်ချလျက်ရှိသောသူတို့၏ အော်ဟစ်ခြင်းအသံ” ကို မေ့လျော့တော်မမူပါ။

၁၅:၂၊ ၃; ၂၄:၃-၅။ စစ်မှန်သောဝတ်ပြုသူများသည် မှန်ရာကိုပြောဆိုရမည်။ မဟုတ်မမှန်ကျိန်ဆိုခြင်း၊ ရှုတ်ချပြောဆိုခြင်းတို့ကို ရှောင်ရမည်။

၁၅:၄။ ကျမ်းစာနှင့်ဆန့်ကျင်သော ကတိတစ်ခုမဟုတ်ကြောင်းသိရှိလျှင် မည်မျှပင်ခက်ခဲပါစေ ကတိတည်ရမည်။

၁၅:၅။ ယေဟောဝါအား ဝတ်ပြုသူများသည် ငွေအလွဲသုံးစားပြုလုပ်ခြင်းကို ရှောင်ရမည်။

၁၇:၁၄၊ ၁၅။ ‘လောကသား’ တို့သည် လူကုံထံဖြစ်ရန်၊ အိမ်ထောင်သားမွေးရန်၊ အမွေချန်ထားရန် အပတ်တကုတ်ကြိုးစားကြသည်။ ဒါဝိဒ်မူ ဘုရားသခင့် “မျက်နှာတော်ကိုဖူးမြင်” ရန် သို့မဟုတ် မျက်နှာသာရရန် ဘုရားသခင့်ရှေ့တွင် နာမည်ကောင်းရရေးကို အဓိကထားသည်။ သူသည် ယေဟောဝါ၏ကတိတော်များ၊ အာမခံချက်များကို သတိပြုမိသောအခါ ကိုယ်တော်၏ “ပုံသဏ္ဌာန်တော်အားဖြင့် . . . အလိုပြည့်စုံ” သည်၊ မိမိနှင့်အတူ ယေဟောဝါရှိနေသည်ဟု ခံစားရ၍ ဝမ်းသာအားရဖြစ်ခဲ့သည်။ ဒါဝိဒ်ကဲ့သို့ပင် ကျွန်ုပ်တို့လည်း ဝိညာဉ်ရေးဘဏ္ဍာများအပေါ် အာရုံမစိုက်သင့်ပေလော။

၁၉:၁-၆။ စကားမပြောတတ်၊ မဆင်ခြင်တတ်သော ဖန်ဆင်းရာများပင် ယေဟောဝါ၏ဘုန်းတော်ကို ကြားပြောကြလျှင် စဉ်းစားတွေးခေါ်နိုင်၊ စကားပြောဆိုနိုင်၊ ဝတ်ပြုကိုးကွယ်နိုင်သော ကျွန်ုပ်တို့ သည် ထိုထက်ပို၍ ပြုသင့်သည်မဟုတ်ပေလော။—ဗျာ. ၄:၁၁။

၁၉:၇-၁၁။ ယေဟောဝါ၏တောင်းဆိုချက်များသည် ကျွန်ုပ်တို့အတွက် အလွန်ပင်အကျိုးရှိလှသည်။

၁၉:၁၂၊ ၁၃။ မှားယွင်းခြင်းနှင့် ရောင့်တက်ခြင်းတို့ကို ရှောင်သင့်သည်။

၁၉:၁၄။ ကျွန်ုပ်တို့၏အပြုအမူကိုသာမက စဉ်းစား၊ ပြောဆိုသမျှကိုပါ ဂရုစိုက်သင့်သည်။

‘ကိုယ်တော်သည် အကျွန်ုပ်၏သမာဓိကြောင့်စောင်မတော်မူ၏’

(ဆာလံ ၂၅:၁–၄၁:၁၃)

ဤအပိုင်းမှ ပထမဦးဆုံးဆာလံနှစ်ပုဒ်တွင် သမာဓိစောင့်သိရန် ဒါဝိဒ်၏ပြင်းပြသောစိတ်နှင့် ခိုင်မာသောသန္နိဋ္ဌာန်သည် ထူးခြားလိုက်လေခြင်း။ “အကျွန်ုပ်မူကား ဖြောင့်မတ်ခြင်းလမ်းသို့ လိုက်ပါ၏” ဟုသူသီဆိုခဲ့သည်။ (ဆာလံ ၂၆:၁၁) သူ၏အပြစ်များကို ခွင့်လွှတ်ပါရန် ဤသို့ဆုတောင်းဝန်ခံခဲ့သည်– “ငါသည် အပြစ်ကို မဖော်မပြဘဲနေစဉ်အခါ တစ်နေ့လုံးညည်းတွားသောအားဖြင့် ငါ့အရိုးတို့သည် ဆွေးမြေ့ခြင်းသို့ ရောက်ကြ၏။” (ဆာလံ ၃၂:၃) ‘ထာဝရဘုရားသခင်သည် ဖြောင့်မတ်သောသူတို့ကို ကြည့်ရှုတော်မူ၏။ သူတို့အော်ဟစ်သံကိုလည်း နားထောင်တော်မူ၏’ ဟူ၍ ဘုရားသခင်အပေါ် တည်ကြည်သူတို့ကို ဒါဝိဒ်စိတ်ချစေသည်။—ဆာလံ ၃၄:၁၅။

ဆာလံ ၃၇ တွင်ပါသော အကြံပြုချက်သည် ဣသရေလလူတို့အတွက်နှင့် ဤအစီအစဉ်စနစ်၏ နောက်ဆုံးသောနေ့ရက်များတွင် အသက်ရှင်နေသော ကျွန်ုပ်တို့အတွက်ပါ အလွန်တန်ဖိုးရှိလေစွ။ (၂ တိမောသေ ၃:၁-၅) ယေရှုခရစ်နှင့်ပတ်သက်၍ ဆာလံ ၄၀:၇၊ ၈ က ဤသို့ပရောဖက်ပြုသည်– “ကျမ်းစာလိပ်၌ အကျွန်ုပ်အား မှာထားတော်မူသည့်အတိုင်း ဆောင်ရွက်ရန် ရောက်လာပါပြီ။ အို  အကျွန်ုပ်၏ဘုရားသခင် အလိုတော်ကိုဆောင်ရွက်ရာ၌ အားရဝမ်းမြောက်ပါ၏။ တရားတော်သည်လည်း အကျွန်ုပ်နှလုံးထဲမှာရှိပါ၏။” ဤအပိုင်း၏နောက်ဆုံးဆာလံသည် ဗေသရှေဘနှင့် ဒါဝိဒ်မှားယွင်းပြီးနောက် စိတ်ဆင်းရဲနေသည့်နှစ်များအတွင်း ယေဟောဝါ၏ကူညီမစမှုကို တောင်းခံခြင်းအကြောင်း ဖြစ်သည်။ သူ ဤသို့သီဆိုခဲ့၏– ‘ကိုယ်တော်သည် အကျွန်ုပ်၏သမာဓိကြောင့် စောင်မတော်မူ၏။’—ဆာလံ ၄၁:၁၂၊ ကဘ။

ကျမ်းစာမေးခွန်းများ၏အဖြေ–

၂၆:၇—ကျွန်ုပ်တို့သည် ဒါဝိဒ်နည်းတူ ယေဟောဝါ၏ ယဇ်ပလ္လင်တော်ကို ပုံဆောင်သဘောဖြင့် မည်သို့ ဝန်းရံလျက်နေနိုင်မည်နည်း။ ယဇ်ပလ္လင်သည် လူသားတို့ကိုရွေးနုတ်ရန် ယေရှုခရစ်၏ ရွေးဖိုးပူဇော်ရာယဇ်ကို လက်ခံခြင်းဖြစ်သော ဘုရားသခင့်အလိုတော်ကို ပုံဆောင်သည်။ (ဟေဗြဲ ၈:၅; ၁၀:၅-၁၀) ကျွန်ုပ်တို့သည် ထိုပူဇော်ရာယဇ်ကို ယုံကြည်ခြင်းအားဖြင့် ယေဟောဝါ၏ယဇ်ပလ္လင်ကို ဝန်းရံလျက်နေနိုင်ကြသည်။

၂၉:၃-၉—ယေဟောဝါ၏အသံတော်ကို ထိတ်လန့်ဖွယ် မိုးချုန်းသံနှင့်ပုံခိုင်းခြင်းက အဘယ်အရာကို ရုပ်လုံးဖော်သနည်း။ ယေဟောဝါ၏ စိုးရွံ့ထိတ်လန့်ဖွယ်တန်ခိုးတော်ကို ရုပ်လုံးဖော်ခြင်းသာဖြစ်သည်။

၃၃:၆—ယေဟောဝါ၏ “နှုတ်တော်အသက်” ကားအဘယ်နည်း။ ယင်းသည် ပကတိကောင်းကင်ကိုဖန်ဆင်းရာတွင် အသုံးပြုခဲ့သော ဘုရားသခင်၏ တက်ကြွလှုပ်ရှားသောစွမ်းအား သို့မဟုတ် သန့်ရှင်းသောဝိညာဉ်တော်ဖြစ်သည်။ (ကမ္ဘာဦး ၁:၁၊ ၂) နှုတ်တော်အသက်ဟုခေါ်ရခြင်းမှာ ရပ်ဝေးရှိအရာတို့ကို ပြီးမြောက်စေနိုင်သည့် နှုတ်ထွက်စွမ်းအားနှင့်တူသောကြောင့်  ဖြစ်၏။

၃၅:၁၉၊ သမ္မာ—မိမိကိုမုန်းသောသူတို့သည် မျက်ရိပ်ပြခြင်းကို  မပြုကြပါစေနှင့်ဟု ဒါဝိဒ် အဘယ်ကြောင့် တောင်းဆိုခဲ့သနည်း။ မျက်ရိပ်ပြခြင်းဆိုသည်မှာ ရန်သူများက ဒါဝိဒ်ကိုဆန့်ကျင်၍ မလိုမုန်းထားစိတ်ဖြင့်ပြုသော အကြံအစည်များသည် အထမြောက်သောကြောင့် ကျေနပ်အားရနေခြင်းကို ဖော်ပြသည်။ ယင်းသို့မဖြစ်စေရန် ဒါဝိဒ်တောင်းဆိုနေခြင်းဖြစ်၏။ 

ကျွန်ုပ်တို့အတွက် သင်ခန်းစာ–

၂၆:၄။ အင်တာနက်စကားဝိုင်းများတွင် မိမိတို့မည်သူမည်ဝါဖြစ်ကြောင်း အသိမပေးသူများ၊ ကျောင်းနှင့်အလုပ်ခွင်တွင် မရိုးမသားစိတ်ဖြင့် မိတ်ဆွေဟန်ဆောင်သူများ၊ စိတ်ရင်းမှန်ဟန်ဆောင်သော အယူဖောက်ပြန်သူများ၊ နှစ်ဘဝစံသူများနှင့် မပေါင်းသင်းပါက ပညာရှိရာရောက်သည်။

၂၆:၇၊ ၁၂; ၃၅:၁၈; ၄၀:၉။ ကျွန်ုပ်တို့သည် ခရစ်ယာန်အစည်းအဝေးများတွင် ယေဟောဝါအား လူအများရှေ့ ချီးမွမ်းကြရမည်။

၂၆:၈; ၂၇:၄။ ခရစ်ယာန်အစည်းအဝေးများ တက်ရသည်ကို ကျွန်ုပ်တို့ပျော်မွေ့ကြသလော။

၂၆:၁၁။ ဒါဝိဒ်သည် သမာဓိစောင့်သိရန် သန္နိဋ္ဌာန်ချထားကြောင်းဖော်ပြစဉ် သူ့ကို ရွေးနုတ်ပေးပါရန် အသနားခံခဲ့သည်။ မှန်ပါသည်၊ ကျွန်ုပ်တို့ မစုံလင်ကြသော်လည်း သမာဓိစောင့်သိနိုင်ကြ၏။

၂၉:၁၀။ ယေဟောဝါသည် “မိုးသက်မုန်တိုင်း” ပေါ်မှာ ထိုင်တော်မူခြင်းက ကိုယ်တော်သည် မိမိ၏တန်ခိုးတော်ကို အပြည့်အဝထိန်းချုပ်ထားကြောင်း ဖော်ပြသည်။

၃၀:၅။ ယေဟောဝါ၏အဓိကအရည်အသွေးမှာ မေတ္တာဖြစ်၏။ အမျက်တော်မဟုတ်ပေ။

၃၂:၈၊ ၉။ ယေဟောဝါသည် ကျွန်ုပ်တို့ကို ဇက်ကြိုးဖြင့်ဆွဲမှ သို့မဟုတ် နှင်တံသုံးမှ နာခံတတ်သော မြည်းလားကဲ့သို့ မဖြစ်စေလိုပါ။ ယင်းအစား ကိုယ်တော်၏အလိုတော်ကို သိနားလည်သောကြောင့် ကိုယ်တော်အား နာခံမှုပြစေလိုသည်။

၃၃:၁၇-၁၉။ လူဖန်တီးသော အစီအစဉ်မှန်သမျှ မည်မျှပင်သြဇာရှိပါစေ ကျွန်ုပ်တို့ကို မကယ်တင်နိုင်ပါ။ ယေဟောဝါနှင့် ကိုယ်တော်၏နိုင်ငံတော်ကိုသာ ယုံကြည်ကိုးစားကြရမည်။

၃၄:၁၀။ ယင်းသည် ဘုရားသခင့်နိုင်ငံတော်အကျိုးစီးပွားကို ရှေးဦးထားသူတို့အတွက် အမှန်တကယ်အားရှိစရာပင်။

၃၉:၁၊ ၂။ မတရားသောသူများက ကျွန်ုပ်တို့နှင့်ယုံကြည်ခြင်းတူသူများကို အန္တရာယ်ပြုရန် သတင်းထောက်လှမ်းသည့်အခါ ကျွန်ုပ်တို့သည် “ကိုယ်နှုတ်ကိုချည်နှောင်” ၍ နှုတ်ဆိတ်နေခြင်းက ပညာရှိရာရောက်သည်။

၄၀:၁၊ ၂။ ယေဟောဝါအား မျှော်လင့်ခြင်းသည် ‘ပျက်စီးရာတွင်းနှင့် အလွန်ဆိုးသောရွှံ့ထဲက ဆယ်နုတ်’ ခံရသကဲ့သို့ စိတ်ဓာတ်ကျဆင်းမှုကို ရင်ဆိုင်ဖြေရှင်းနိုင်စေသည်။

၄၀:၅၊ ၁၂။ ကျွန်ုပ်တို့၏ကောင်းချီးများသည် “ရေတွက်၍မကုန်နိုင်အောင် များလှ” ကြောင်း အမြဲအမှတ်ရနေပါက ဘေးဆိုးများ၊ ချွတ်ယွင်းချက်များ မည်မျှပင်များပြားနေပါစေ ကျွန်ုပ်တို့ သောကရောက်နေမည်မဟုတ်ပေ။

“ယေဟောဝါသည် မင်္ဂလာရှိတော်မူစေသတည်း”

ဤဆာလံ ၄၁ ပုဒ်သည် အလွန်အားရစရာ  ကောင်းလိုက်လေခြင်း။  ကျွန်ုပ်တို့သည် စမ်းသပ်မှုများခံနေရသည်ဖြစ်စေ၊ ကိုယ့်ကိုယ်ကိုသိသောစိတ် မကြည်လင်သည်ဖြစ်စေ ဘုရားသခင်၏တန်ခိုးပါသော ဤကျမ်းများမှ  ခွန်အားရရှိနိုင်သည်။ (ဟေဗြဲ ၄:၁၂) ဤဆာလံကျမ်းများတွင် အသက်တာအတွက် လမ်းညွှန်ချက်ကောင်းများ  ပါရှိသည်။ ကျွန်ုပ်တို့သည် မည်သည့်အခက်အခဲပင် ကြုံတွေ့နေရပါစေ ကျွန်ုပ်တို့ကို ယေဟောဝါစွန့်ပစ်မည်မဟုတ်ကြောင်း ထပ်တလဲလဲအာမခံထားသည်။ 

ဆာလံကျမ်း၏  ဤပထမအပိုင်းကို အောက်ပါစကားများဖြင့် နိဂုံးချုပ်ထားသည်– ‘ဣသရေလလူမျိုး၏ဘုရားသခင် ယေဟောဝါသည် ကမ္ဘာအဆက်ဆက် မင်္ဂလာရှိတော်မူစေသတည်း။ အာမင်နှင့်အာမင်။’ (ဆာလံ ၄၁:၁၃) ၎င်းတို့ကိုသုံးသပ်ပြီးနောက် ယေဟောဝါအား ချီးမွမ်းရန် ကျွန်ုပ်တို့ လှုံ့ဆော်ခံရသည်မဟုတ်ပေလော။

[အောက်ခြေမှတ်ချက်]

[စာမျက်နှာ ၁၉ ပါ အကျဉ်းဖော်ပြချက်]

သက်မဲ့ဖန်ဆင်းရာများပင် ယေဟောဝါ၏ဘုန်းတော်ကို ကြားပြောကြလျှင် ကျွန်ုပ်တို့သည် ထိုထက်ပို၍ ပြုသင့်သည်မဟုတ်လော

[စာမျက်နှာ ၁၇ ပါ ရုပ်ပုံ]

ပထမပိုင်း ဆာလံ ၄၁ ပုဒ်မှ အများစုကို ဒါဝိဒ်ရေးစပ်ခဲ့

[စာမျက်နှာ ၁၈ ပါ ရုပ်ပုံ]

အဘယ်ဆာလံက ယေဟောဝါအား ကြီးမြတ်သောသိုးထိန်းရှင်အဖြစ် ပုံဖော်ထားကြောင်း သိပါသလော

[စာမျက်နှာ ၂၀ ပါ ရုပ်ပုံ]

ဝိညာဉ်ရေးရာများကိုတွေးတောဆင်ခြင်ခြင်းမပြုဘဲနေသည့် နေ့ရက်တစ်ရက်မျှ မရှိစေပါနှင့်

[Picture Credit Line on page 17]

Stars: Courtesy United States Naval Observatory

[Picture Credit Line on page 19]

Stars, pages 18 and 19: Courtesy United States Naval Observatory

[Picture Credit Line on page 20]

Stars: Courtesy United States Naval Observatory