လူငယ်များ သူတို့၏ဖန်ဆင်းရှင်ကိုအောက်မေ့ရန် ကူညီပေးနိုင်သည့်လက်နက်တစ်ခု

“အသက်ပျိုစဉ်အခါပင် သင့်ကိုဖန်ဆင်းတော်မူသောအရှင်ကို အောက်မေ့လော့” ဟူ၍ လွန်ခဲ့သော နှစ်ပေါင်း ၃,၀၀၀ ခန့်က ပညာရှိ ရှောလမုန် ရေးသားခဲ့သည်။ (ဒေ. ၁၂:၁) ယခု ခရစ်ယာန်လူငယ်များအား ယင်းသို့လုပ်ဆောင်ရန် ကူညီပေးနိုင်သည့် နောက်ထပ်ကိရိယာရှိသည်။ မေလ၊ ၂၀၀၈ မှ ဇန်နဝါရီလ၊ ၂၀၀၉ အထိ ကမ္ဘာတစ်ဝန်းကျင်းပခဲ့သော ယေဟောဝါသက်သေများ၏ “ဘုရားသခင့်စွမ်းအားတော် ဦးဆောင်လမ်းပြမှု” ခရိုင်စည်းဝေးကြီးတွင် လူငယ်များအမေး—တာသွားသည့်အဖြေ၊ အတွဲ ၂ စာအုပ်ကို ထုတ်ဝေခဲ့သည်။

ထိုစာအုပ်၏ ရှေ့မျက်နှာဖုံးအတွင်းပိုင်းတွင် လူငယ်များအတွက် အုပ်ချုပ်ရေးအဖွဲ့မှ စာတစ်စောင်ပါရှိသည်။ တစ်စိတ်တစ်ပိုင်းအနေနှင့် ဤသို့ဖော်ပြထားသည်– “ဤစာအုပ်တွင် ဖော်ပြထားသော အကြောင်းအရာများက ယနေ့ အသင်လူငယ်တို့ ကြုံတွေ့နေရသည့် သွေးဆောင်မှုနှင့် ဖိအားများကို တွန်းလှန်နိုင်ရန်နှင့် ဘုရားသခင့်အလိုတော်နှင့်ညီသော ဆုံးဖြတ်ချက်များချနိုင်ရန် ထောက်ကူပေးဖို့ ကျွန်ုပ်တို့ စိတ်ရင်းမှန်ဖြင့် ဆုတောင်းပါသည်။”

မိဘတို့သည် မိမိတို့၏သားသမီးများကို ‘ယေဟောဝါ၏ ဆုံးမပဲ့ပြင်ခြင်းနှင့် စိတ်သဘောတော်အတိုင်း’ ပြုစုပျိုးထောင်လိုကြသည်။ (ဧ. ၆:၄) သို့သော် မြီးကောင်ပေါက်အရွယ်ရောက်လာသောအခါ လူငယ်အတော်များများသည် မိမိကိုယ်ကို ယုံကြည်စိတ်ချမှုမရှိသောကြောင့် လမ်းညွှန်မှုကို မျှော်ကိုးတတ်ကြသည်။ သင်သည် မြီးကောင်ပေါက်တစ်ဦး၏ မိဘဖြစ်မည်ဆိုပါက ဤစာအုပ်မှ သင့်ကလေး အကျိုးအများဆုံးရရှိရန် မည်သို့ကူညီပေးမည်နည်း။ အကြံပေးချက်အချို့ကို အောက်တွင်ဖော်ပြပေးထားသည်။

▪ ဤစာအုပ်ကို သင့်ကိုယ်ပိုင်အဖြစ်ထားရှိကာ ယင်းနှင့် အကျွမ်းတဝင်ရှိပါ။ ယင်းတွင် ဖတ်ရုံထက်မက ပါဝင်သည်။ စာအုပ်တွင် အယူအဆများ တင်ဆက်ထားပုံကိုလည်း သိရှိအောင်ကြိုးစားပါ။ ဤစာအုပ်သည် လူငယ်များအား အဘယ်အရာ မှန်သည်၊ အဘယ်အရာ မှားသည်ဟု ပြောပြရုံသာပြုမည့်အစား သူတို့၏ “သိနားလည်နိုင်စွမ်း” ကိုလေ့ကျင့်ပေးပါသည်။ (ဟေဗြဲ ၅:၁၄) ယင်းစာအုပ်က လူငယ်တို့အား မှန်ရာဘက်တွင် မည်သို့ ရပ်တည်နိုင်ကြောင်း လက်တွေ့ကျအကြံပြုချက်များကိုလည်း ပေးထားသည်။ ဥပမာအနေနှင့် အခန်း ၁၅ (“ရွယ်တူချင်းဖိအားကို ငါဘယ်လို တွန်းလှန်နိုင်မလဲ”) တွင် ငြင်းဆိုရုံထက်မက ပြုရန်လိုကြောင်း ရှင်းပြထားသည်။ ယင်းစာအုပ်တွင် လူငယ်များသည် ပြဿနာများကို ကျမ်းစာမူဖြင့် မည်သို့ဖြေရှင်းနိုင်ပုံနှင့် တကယ့်လက်တွေ့ အခြေအနေများတွင် “လူအသီးသီးတို့အား မည်ကဲ့သို့ ဖြေကြား” နိုင်ပုံတို့ကို ဖော်ပြပေးထားသည်။—ကော. ၄:၆။

▪ စာအုပ်တွင်ပါသော တုံ့ပြန်ချရေးရသည့် အသွင်အပြင်များကို အသုံးပြုပါ။ ယင်းအပိုင်းများသည် လူငယ်များအတွက် ရည်ရွယ်ထားသော်လည်း မိဘများလည်း မိမိတို့၏ ကိုယ်ပိုင်စာအုပ်တွင် သင့်တော်သည့် အကြောင်းအရာများကို ချရေးနိုင်သည်။aစာမျက်နှာ ၁၆ ပါ ချိန်းတွေ့ခြင်းနှင့်ပတ်သက်၍ တုံ့ပြန်ချရေးရမည့် မေးခွန်းနှစ်ခုကို သုံးသပ်သောအခါ သင်သည် သင့်ကလေး၏အသက်အရွယ်တွင်ရှိခဲ့စဉ်က သင်မည်သို့ခံစားခဲ့ရသည်ကို မှတ်မိရန်ကြိုးစားကြည့်ပါ။ သင်ထိုအသက်အရွယ်တွင် ဤမေးခွန်းများကို ဖြေဆိုမည့်ပုံအတိုင်း ပေးထားသည့် ကွက်လပ်များ၌ သင်ဖြည့်စွက်ကောင်း ဖြည့်စွက်ပေမည်။ ထို့နောက် သင့်ကိုယ်သင် ဤသို့မေးပါ– ‘နှစ်အတော်ကြာပြီးတဲ့နောက် ဒီကိစ္စနဲ့ပတ်သက်ပြီး ငါ့ရဲ့ခံစားချက် ဘယ်လိုပြောင်းလဲသွားပြီလဲ။ ငါ မြီးကောင်ပေါက်အရွယ်နောက်ပိုင်းမှာ ဘယ်အရာကို ထိုးထွင်းသိမြင်လာသလဲ၊ ဒါကို ငါ့ကလေးသိလာအောင် ဘယ်လို အကျိုးရှိရှိ သင်ပေးနိုင်မလဲ။’

▪ သင့်ဆယ်ကျော်သက်ကလေး၏ လွတ်လပ်ခွင့်ကို လေးစားပါ။ တုံ့ပြန်ချရေးရသည့် အပိုင်းများသည် သင့်ကလေး၏ စိတ်ထဲရှိရာများကို ဖော်ထုတ်၍ စာဖြင့်ဖြစ်စေ၊ စိတ်ဖြင့်ဖြစ်စေ တုံ့ပြန်စေဖို့ ရည်ရွယ်ထားခြင်းဖြစ်သည်။ သင့်ရည်ရွယ်ချက်မှာ စာအုပ်ထဲတွင် သင့်ကလေး ဘာချရေးထားသည်ကို ကြည့်ရှုရန်မဟုတ်ဘဲ ကလေး၏နှလုံးကို ကြည့်ရှုရန်ဖြစ်သည်။ စာမျက်နှာ ၃ ရှိ “မိဘများသတိချပ်စရာ” ဟူ၍ ခေါင်းစဉ်တပ်ထားသော အပိုင်းတွင် စာအုပ်က ဤသို့အကြံပြုထားသည်– “သင့် မြီးကောင်ပေါက်အရွယ် သားသမီးများအား သူတို့၏ စာအုပ်ထဲတွင် ပွင့်ပွင့်လင်းလင်း ချရေးရန် အားပေးပါ၊ အတိုင်းအတာတစ်ခုအထိ ကိုယ်ပိုင်လွတ်လပ်ခွင့်ပေးပါ။ နောက်ပိုင်းတွင် သူတို့သည် ကိစ္စရပ်များနှင့်ပတ်သက်၍ သူတို့ချရေးထားသည့်အကြောင်းအရာများကို သင့်အား ဖွင့်ဟပြောဆိုလာပါလိမ့်မည်။”

မိသားစုကျမ်းစာလေ့လာမှုအတွက် အကူအညီ

လူငယ်များအမေး၊ အတွဲ ၂ သည် မိသားစုဝတ်ပြုမှုပြုလုပ်ချိန်အတွင်း အသုံးပြုရန် အလွန်ကောင်းသော အထောက်အကူတစ်ခု ဖြစ်သည်။ စာအုပ်တွင် စာပိုဒ်များအတွက် လေ့လာရန်မေးခွန်းများ မပါရှိသောကြောင့် ယင်းကို သင်မည်သို့အသုံးပြုနိုင်သနည်း။ သင့်သားသမီးများအတွက် အထိရောက်ဆုံးနည်းကို အသုံးပြုခြင်းဖြင့် လေ့လာမှုပုံစံကို ပြောင်းသာလွဲသာပြုလုပ်ပါလေ။

ဥပမာအနေနှင့် မိသားစုအချို့သည် စာမျက်နှာ ၁၃၂ နှင့် ၁၃၃ ရှိ “ရွယ်တူချင်းဖိအားကိုတုံ့ပြန်ရန် အစီအစဉ်” ကို လေ့လာသုံးသပ်သည့်အခါ လက်တွေ့ကျလေ့ကျင့်မှုများ ပြုလုပ်ရခြင်းကို နှစ်သက်ကြပေမည်။ ဦးဆုံးမေးခွန်းက သင့်သား သို့မဟုတ် သမီးအတွက် အခက်ခဲဆုံးကိစ္စကို ထုတ်ဖော်ပြောပြစေရန် ထောက်ကူပေးပါလိမ့်မည်။ ဒုတိယမေးခွန်းက ဖိအားပေါ်ပေါက်နိုင်ဖွယ်ရှိသည့် အခြေအနေများကို သိမြင်စေပါလိမ့်မည်။ ရွယ်တူချင်းဖိအားကို တွန်းလှန်သည်ဖြစ်စေ၊ အလျှော့ပေးလိုက်လျောသည်ဖြစ်စေ ယင်းနောက်ဖြစ်ပေါ်လာမည့် အကျိုးဆက်များကို သုံးသပ်ပြီးသောအခါ သင့်ကလေးအား ယင်းဖိအားကို ဒဏ်ခံကာကွယ်ခြင်း၊ လွှဲဖယ်ခြင်း သို့မဟုတ် တုံ့ပြန်ချေပခြင်း စသည့် တုံ့ပြန်ပုံအချို့အတွက် စိတ်ကူးထားရာများကို မေးမြန်းပါ။ သင့်သား သို့မဟုတ် သမီးအား ဖြတ်ထိုးဉာဏ်ရှိစေရန်နှင့် သူသက်သောင့်သက်သာ၊ အခိုင်အမာယုံကြည်စိတ်ချမှုဖြင့် တုံ့ပြန်ပြောဆိုနိုင်ရန် ပြင်ဆင်ရာ၌ ကူညီပေးပါ။—ဆာ. ၁၁၉:၄၆။

ဆက်သွယ်ပြောဆိုမှုအတွက် ကိရိယာ

လူငယ်များအမေး၊ အတွဲ ၂ သည် လူငယ်များအား သူတို့၏မိဘများနှင့် ဆက်သွယ်ပြောဆိုရန် အားပေးသည်။ ဥပမာအနေနှင့် (စာမျက်နှာ ၆၃-၆၄) ရှိ “လိင်အကြောင်း ငါ့အဖေနဲ့ အမေကို ဘယ်လိုပြောရမလဲ” နှင့် (စာမျက်နှာ ၁၈၉) ရှိ “သင့်မိဘများကို ပြောဆိုပါ” လေးထောင့်ကွက်များတွင် ပြောရခက်သည့်အကြောင်းအရာများကို မည်သို့စတင်ပြောဆိုနိုင်ပုံနှင့်ပတ်သက်သော လက်တွေ့ကျအကြံပြုချက်များ ပေးထားသည်။ ၁၃ နှစ်အရွယ် မိန်းကလေးတစ်ဦး ဤသို့ရေးခဲ့သည်– “ဒီစာအုပ်က ကျွန်မရဲ့စိတ်ထဲရှိနေတဲ့အရာတွေ၊ ကျွန်မလုပ်ခဲ့တဲ့ အရာတွေကိုတောင် မိဘတွေကို ဖွင့်ဟပြောဆိုရဲတဲ့သတ္တိ ရှိစေတယ်။”

ဤစာအုပ်သည် အခြားနည်းများဖြင့်လည်း ဆက်သွယ်ပြောဆိုမှုကို တိုးတက်စေသည်။ အခန်းတစ်ခန်းစီ၏ အဆုံးပိုင်း၌ “သင်မည်သို့ ယူဆသနည်း” ဟူသော လေးထောင့်ကွက်ပါရှိသည်။ ယင်းလေးထောင့်ကွက်ကို ပြန်လည်သုံးသပ်ရုံမျှသာမဟုတ်ဘဲ မိသားစုဆွေးနွေးမှု အောက်လိုင်းအဖြစ်လည်း အသုံးပြုနိုင်သည်။ အခန်းတစ်ခုစီ၏ နိဂုံးပိုင်းတွင် “လက်တွေ့ကျလုပ်ဆောင်မည့် အစီအစဉ်” ဟူသော လေးထောင့်ကွက်တစ်ခုလည်း ပါရှိသည်။ ဤလေးထောင့်ကွက်သည် လူငယ်များအား ထိုအခန်းနှင့်ပတ်သက်၍ သင်ယူသိရှိရာများထဲမှ လက်တွေ့ကျင့်သုံးနိုင်သည့် သတ်သတ်မှတ်မှတ် အကြောင်းအရာများကိုချရေးရန် အခွင့်အရေးရစေသည်။ “လက်တွေ့ကျလုပ်ဆောင်မည့် အစီအစဉ်” တစ်ခုစီ၏ နောက်ဆုံးအချက်မှာ ဤသို့ဖြစ်သည်– “ဒီအခန်းနဲ့ပတ်သက်ပြီး ငါ့မိဘကို မေးမြန်းလိုတဲ့အရာက . . . ။” ယင်းက လူငယ်များ သူတို့မိဘများထံမှ အဖိုးတန်အကြံဉာဏ်များရရှိရန် အထောက်အကူပေးနိုင်သည်။

နှလုံးကို ထိမိစေပါ

မိဘတစ်ဦးအနေနှင့် သင်၏ရည်ရွယ်ချက်မှာ သင့်ကလေး၏နှလုံးကို ထိမိစေရန်ဖြစ်သည်။ လူငယ်များအမေး၊ အတွဲ ၂ က ထိုသို့ပြုလုပ်ရန် သင့်ကို ကူညီပေးနိုင်သည်။ ဖခင်တစ်ဦးသည် ဤစာအုပ်ကိုသုံး၍ သူ၏သမီးနှင့် ရင်းနှီးသောဆက်ဆံရေးကို မည်သို့တိုးမြှင့်နိုင်ခဲ့သည်ကို သုံးသပ်ကြည့်ကြစို့။

“ရေဗက္ကနဲ့ ကျွန်တော် အတူလမ်းလျှောက်၊ စက်ဘီးစီး ဒါမှမဟုတ် ကားမောင်းချင်တဲ့ သာယာတဲ့နေရာတွေရှိတယ်။ အဲဒီ အိမ်အပြင်ဝန်းကျင်တွေက သူ ကျွန်တော့်ကို ပွင့်ပွင့်လင်းလင်းပြောစေနိုင်တဲ့ အခြေအနေတစ်ခုကို ဖန်တီးပေးတယ်ဆိုတာ ကျွန်တော် တွေ့ရတယ်။

“ဒီစာအုပ်မှာ ကျွန်တော်တို့စတင်သုံးသပ်ခဲ့တဲ့အပိုင်းက အုပ်ချုပ်ရေးအဖွဲ့ထံမှစာနဲ့ ‘မိဘများသတိချပ်စရာ’ တို့ ဖြစ်တယ်။ စာမျက်နှာ ၃ မှာ ပြောထားတဲ့အတိုင်း ကျွန်တော့်သမီးကို သူ့ရဲ့ကိုယ်ပိုင်စာအုပ်မှာ ပွင့်ပွင့်လင်းလင်းချရေးနိုင်တယ်ဆိုတာ သိစေချင်တယ်။ သူရေးထားတဲ့အကြောင်းအရာတွေကို ကျွန်တော်ကြည့်မှာမဟုတ်ဘူး။

“သူဆွေးနွေးချင်တဲ့ အခန်းတွေကို၊ သူကြိုက်တဲ့အစီအစဉ်အတိုင်း ဆွေးနွေးဖို့ ရေဗက္ကကို ရွေးချယ်ခွင့်ပြုခဲ့တယ်။ သူရွေးချယ်ခဲ့တဲ့ ဦးဆုံးအခန်းက ‘အီလက်ထရောနစ်ဂိမ်းတွေကို ငါ ကစားသင့်သလား’ ဆိုတဲ့ အခန်းဖြစ်တယ်။ ဒီအကြောင်းအရာကို သူရွေးချယ်လိမ့်မယ်လို့ ကျွန်တော် ဘယ်တုန်းကမှ မစဉ်းစားခဲ့ဖူးဘူး။ ဒါပေမဲ့ သူ့မှာ အကြောင်းရင်းတစ်ခုရှိတယ်။ သူ့သူငယ်ချင်းအတော်များများက တော်တော့်ကို ထိတ်လန့်စရာကောင်းတဲ့ ဂိမ်းတွေကို ကစားနေကြတယ်။ ဂိမ်းတွေမှာ အကြမ်းဖက်ရုပ်ပုံတွေနဲ့ ညစ်ညမ်းတဲ့စကားတွေ ပါဝင်တယ်ဆိုတာ ကျွန်တော်မသိခဲ့ဘူး။ ဒါပေမဲ့ စာမျက်နှာ ၂၅၁ က “လက်တွေ့ကျလုပ်ဆောင်မည့် အစီအစဉ်” ကို ကျွန်တော်တို့ ဆွေးနွေးတဲ့အခါ သူအားလုံးပြောပြတော့တာပဲ။ တကယ်လို့ တစ်ယောက်ယောက်က သူ့ကို ဂိမ်းကစားဖို့ ဖိအားပေးလာခဲ့မယ်ဆိုရင် တုံ့ပြန်ပြောဆိုဖို့ ပြင်ဆင်ရာမှာ အဲဒီလေးထောင့်ကွက်က ရေဗက္ကအတွက် အထောက်အကူဖြစ်ခဲ့တယ်။

“ဒီအချက်မှာတော့ ရေဗက္ကက သူ့စာအုပ်မှာ ဘာတွေရေးထားတယ်ဆိုတာ ကျွန်တော့်ကို မတွန့်မဆုတ်ပြောပြခဲ့တယ်။ ကျွန်တော်တို့ရဲ့ လေ့လာမှုက မရပ်မနား စကားလက်ဆုံပြောခန်းတစ်ခု ဖြစ်ခဲ့တယ်။ ကျွန်တော်တို့ အလှည့်ကျဖတ်ရှုတယ်၊ ပြီးတဲ့နောက် သူက ရုပ်ပုံနဲ့ လေးထောင့်ကွက်တွေအပါအဝင် အကုန်လုံးကို ပြောချင်တယ်။ ကျွန်တော် သူ့အသက်အရွယ်တုန်းက ဒါတွေ ဘယ်လိုရှိခဲ့တယ်ဆိုတာ သူ့ကိုပြောပြပြီးတဲ့နောက် သူက ဒီခေတ်အခါမှာ ဘယ်လိုဖြစ်နေတယ်ဆိုတာ ကျွန်တော့်ကို ပြန်ပြောပြဖို့ အခွင့်အရေးတစ်ခု ဖြစ်စေတယ်။ သူက အကုန်လုံးကို ပြောပြချင်တာ။”

သင်သည် မိဘတစ်ဦးဖြစ်မည်ဆိုပါက ဤစာအုပ် ထုတ်ဝေလိုက်ခြင်းအတွက် ဝမ်းသာပီတိဖြစ်မည်မှာ အသေအချာပင်။ ယခုပင် ဤစာအုပ်ကို ကောင်းစွာအသုံးချနိုင်သည့် အခွင့်အရေး သင့်တွင်ရှိထားသည်။ လူငယ်များအမေး— တာသွားသည့်အဖြေ၊ အတွဲ ၂ သည် သင့်မိသားစုအတွက် ကောင်းချီးတစ်ရပ် ဖြစ်လိမ့်မည်ဟု အုပ်ချုပ်ရေးအဖွဲ့မှ မျှော်လင့်ပါသည်။ အထူးသဖြင့် ကျွန်ုပ်တို့၏ ချစ်လှစွာသော လူငယ်များအပါအဝင် ကျွန်ုပ်တို့အားလုံးကို ‘စွမ်းအားတော်ဖြင့် လျှောက်လှမ်းနေ’ ရန် ဤစာအုပ်က အထောက်အကူပြုပါစေ။—ဂလ. ၅:၁၆။

[အောက်ခြေမှတ်ချက်]

[စာမျက်နှာ ၃၀ ပါလေးထောင့်ကွက်]

လူငယ်တချို့ပြောဆိုရာ

“ဒီစာအုပ်က ခဲတံတစ်ချောင်းကိုင်၊ ထိုင်ပြီး ဖတ်ရင်း တွေးတောဆင်ခြင်ဖို့လိုတဲ့ စာအုပ်မျိုးဖြစ်တယ်။ ဒီစာအုပ်ကို ကိုယ်ပိုင်မှတ်တမ်းစာအုပ်အနေနဲ့ အသုံးပြုဖို့ ရည်ရွယ်ထုတ်ဝေပေးထားတဲ့အတွက် အကောင်းဆုံးဘ၀လမ်းစဉ်ကို ဖန်တီးနိုင်တဲ့ ပန်းတိုင်တွေကို ကိုယ့်ဘာသာကိုယ် ပြန်သုံးသပ်ရာမှာ အသုံးပြုနိုင်တယ်။’’—နီကိုလာ။

“ကျွန်မ ချိန်းတွေ့ဖို့ တော်တော့်ကို ဖိအားပေးခံခဲ့ရတယ်၊ သဘောရိုးဖြောင့်ပါတယ်ဆိုတဲ့ သူတွေကတောင် ဖိအားပေးခဲ့တယ်။ ဘယ်သူတွေဘာပဲပြောပြော၊ ကျွန်မ ချိန်းတွေ့ဖို့ အဆင်သင့်မဖြစ်သေးဘူးဆိုတာ ဒီစာအုပ်ရဲ့ ဦးဆုံးအပိုင်းက ကျွန်မကို အခိုင်အမာယုံကြည်စိတ်ချစေတယ်။”—ကက်ထရီနာ။

“‘နှစ်ခြင်းခံဖို့ သင် စဉ်းစားနေသလော’ ဆိုတဲ့ လေးထောင့်ကွက်က ကျွန်မကို နှစ်ခြင်းခံဖို့အတွက် အလေးအနက်စဉ်းစားစေတယ်။ အဲဒီအကြောင်းအရာက ကျွန်မရဲ့ လေ့လာမှုနဲ့ ဆုတောင်းတဲ့ အလေ့အကျင့်တွေကို ပြန်သုံးသပ်ဖို့ လှုံ့ဆော်ပေးတယ်။” — အက်ရှလေ။

“ကျွန်မ ငယ်ငယ်လေးကတည်းက ကျွန်မရဲ့ ခရစ်ယာန်မိဘတွေက သွန်သင်ပေးတယ်ဆိုပေမဲ့ ဒီစာအုပ်က ကျွန်မရဲ့ဘဝမှာ ဘယ်လိုခြေလှမ်းမျိုးတွေလှမ်းသင့်တယ်ဆိုတာ ကိုယ့်ကိုယ်ကိုယ်သုံးသပ်ဖို့ ကူညီပေးတယ်။ ဒီစာအုပ်က ကျွန်မရဲ့မိဘတွေအပေါ် ပွင့်ပွင့်လင်းလင်းရှိဖို့လည်း ထောက်ကူပေးတယ်။’’—ဇာမီးရာ။

[စာမျက်နှာ ၃၁ ပါရုပ်ပုံ]

မိဘတို့၊ ဒီစာအုပ်နဲ့ အကျွမ်းတဝင်ရှိပါ

[စာမျက်နှာ ၃၂ ပါရုပ်ပုံ]

သင့်ကလေးတွေရဲ့နှလုံးကို ထိမိစေဖို့ ပန်းတိုင်ထားပါ