ကျမ်းစာမေးခွန်းတွေရဲ့ အဖြေ

စာတန် ဘယ်လိုဖြစ်လာတာလဲ

စာတန်ကို ဘုရားသခင် ဖန်ဆင်းခဲ့တာမဟုတ်ပါဘူး။ ဘုရားသခင် ဖန်ဆင်းခဲ့တဲ့ ကောင်းကင်တမန်တစ်ပါးဟာ နောက်ပိုင်းမှာ ဆိုးသွမ်းလာတဲ့အတွက် စာတန်ဖြစ်သွားတာပါ။ တစ်ချိန်တုန်းက စာတန်ဟာ ဖြောင့်မတ်ပြီး အပြစ်ကင်းတဲ့သူ ဖြစ်တယ်လို့ ယေရှု ရည်ညွှန်းပြောဆိုခဲ့ဖူးတယ်။ ဒါကြောင့် စာတန်ဟာ အစပိုင်းမှာ ဘုရားသခင်ရဲ့ ဖြောင့်မတ်တဲ့ ကောင်းကင်သားတစ်ဦး ဖြစ်ခဲ့ပါတယ်။—ယောဟန် ၈:၄၄ ကိုဖတ်ပါ။

ကောင်းကင်တမန်တစ်ပါးက စာတန်ဘယ်လို ဖြစ်သွားနိုင်သလဲ

စာတန်ဖြစ်သွားတဲ့ ကောင်းကင်တမန်ဟာ ဘုရားသခင်ကို ဆန့်ကျင်ပုန်ကန်ပြီး ပထမဆုံး လူသားမောင်နှံကိုလည်း သူ့ဘက်ပါအောင် သွေးဆောင်ခဲ့ပါတယ်။ ဒီလိုနဲ့ သူဟာ “ခုခံသူ” လို့အဓိပ္ပာယ်ရတဲ့ စာတန်ဆိုပြီး သူ့ကိုယ်သူ ဖြစ်စေလိုက်ပါတယ်။—ကမ္ဘာဦး ၃:၁–၅; ဗျာဒိတ် ၁၂:၉ တို့ကိုဖတ်ပါ။

ဘုရားသခင်ရဲ့ အသိဉာဏ်ရှိ တခြားကောင်းကင်တမန်တွေလိုပါပဲ၊ စာတန်ဖြစ်သွားတဲ့ ဒီကောင်းကင်တမန်ကလည်း အမှားအမှန်ကို လွတ်လပ်စွာ ရွေးချယ်ပိုင်ခွင့်ရှိပါတယ်။ ဒါပေမဲ့ တဖြည်းဖြည်းနဲ့ သူဟာ ဝတ်ပြုကိုးကွယ်ခံချင်တဲ့ ဆန္ဒပြင်းပြလာတယ်။ ဝတ်ပြုကိုးကွယ်ခံချင်တဲ့ သူ့ရဲ့စိတ်ဆန္ဒက ဘုရားသခင့်နှစ်သက်လက်ခံမှုကို ရယူချင်တဲ့ဆန္ဒထက် ပိုပြီးပြင်းထန်ပါတယ်။—မဿဲ ၄:၈၊ ၉; ယာကုပ် ၁:၁၃၊ ၁၄ တို့ကိုဖတ်ပါ။

စာတန်ဟာ လူသားတွေကို ဘယ်လိုဆက်ပြီး ဩဇာလွှမ်းမိုးနေပါသလဲ။ သူ့ကို ကြောက်ရွံ့သင့်ပါသလား။ ဒီမေးခွန်းတွေရဲ့ အဖြေတွေကို ကျမ်းစာထဲမှာ တွေ့နိုင်ပါတယ်။