ကျမ်းစာမေးခွန်းတွေရဲ့ အဖြေ
ကောင်းကင်တမန်တွေက ကျွန်ုပ်တို့ကို ကူညီပေးနိုင်သလား
ကောင်းကင်တမန်တွေက ရှေးအချိန်မှာ ဘုရားအပေါ် သစ္စာရှိခဲ့တဲ့ ဒံယေလကို ကူညီပေးခဲ့သလို ဒီနေ့အချိန်မှာလည်း သတင်းကောင်းကို လူတွေကြားပြီး အကျိုးရစေဖို့ ကူညီပေးနေ
ယေဟောဝါဘုရားဟာ လူသားတွေကို မဖန်ဆင်းခင် သန်းနဲ့ချီတဲ့ ကောင်းကင်တမန်တွေကို ဖန်ဆင်းခဲ့ပါတယ်။ (ယောဘ ၃၈:၄၊ ၇) ကောင်းကင်တမန်တွေက ဘုရားရဲ့ အမှုတော်ကို ထမ်းဆောင်နေကြတဲ့ တန်ခိုးကြီးပြီး မျက်စိနဲ့မမြင်နိုင်တဲ့ ပုဂ္ဂိုလ်တွေဖြစ်တယ်။ ဘုရားက တစ်ခါတလေ ကောင်းကင်တမန်တွေကို စေလွှတ်ပြီး မိမိကိုဝတ်ပြုကိုးကွယ်တဲ့သူတွေကို လမ်းညွှန်ပေးတယ်၊ ကာကွယ်ပေးတယ်။ (ဆာလံ ၉၁:၁၀၊ ၁၁) ဒီနေ့အချိန်မှာ ယေရှုနောက်လိုက်တွေ ဟောပြောနေတဲ့သတင်းကောင်းကို လူတွေကြားပြီး အကျိုးရစေဖို့ ကောင်းကင်တမန်တွေ ကူညီပေးနေကြတယ်။—ဗျာဒိတ် ၁၄:၆၊ ၇ ကိုဖတ်ပါ။
အကူအညီရဖို့ ကောင်းကင်တမန်တွေဆီ ဆုတောင်းသင့်သလား။ မတောင်းသင့်ပါဘူး။ ဆုတောင်းခြင်းဆိုတာ ဝတ်ပြုမှုပုံစံတစ်မျိုးဖြစ်ပါတယ်။ ကျွန်ုပ်တို့ရဲ့ ဝတ်ပြုမှုကို ဘုရားတစ်ပါးတည်းသာ ရထိုက်တယ်။ (ဗျာဒိတ် ၁၉:၁၀) ကောင်းကင်တမန်တွေက ဘုရားရဲ့ အမှုတော်ဆောင်တွေဖြစ်တဲ့အတွက် ဘုရားရဲ့ညွှန်ကြားချက်တွေကိုပဲ လိုက်နာဆောင်ရွက်ကြတယ်။ ဒါကြောင့် ကျွန်ုပ်တို့အနေနဲ့ ယေရှုကနေတစ်ဆင့် ဘုရားသခင်ကိုပဲ တိုက်ရိုက် ဆုတောင်းသင့်ပါတယ်။—ဆာလံ ၁၀၃:၂၀၊ ၂၁; မဿဲ ၂၆:၅၃ တို့ကိုဖတ်ပါ။
ကောင်းကင်တမန်ဆိုးတွေ ရှိသလား
လူတွေလိုပဲ ကောင်းကင်တမန်တွေဆီမှာလည်း လွတ်လပ်စွာ ရွေးချယ်ပိုင်ခွင့်ရှိပြီး အမှားအမှန်ကို ကိုယ်တိုင်ဆုံးဖြတ်နိုင်တယ်။ စိတ်မကောင်းစရာက ကောင်းကင်တမန်များစွာဟာ ဘုရားကို ပုန်ကန်ခဲ့ကြတယ်။ (၂ ပေတရု ၂:၄) ပထမဆုံးပုန်ကန်တဲ့ ကောင်းကင်တမန်တစ်ပါးဟာ စာတန်မာရ်နတ် (နတ်ဆိုးမင်း) ဖြစ်လာတယ်။ နောက်ပိုင်းမှာ တခြားကောင်းကင်တမန်တွေလည်း ပုန်ကန်ခဲ့ကြပြီး ကောင်းကင်တမန်ဆိုးတွေ (နတ်ဆိုးတွေ) ဖြစ်လာကြတယ်။ မကြာခင်တုန်းက မာရ်နတ်နဲ့ တခြားကောင်းကင်တမန်ဆိုးတွေဟာ ကောင်းကင်ကနေ မြေကြီးပေါ်ကို ပစ်ချခံခဲ့ရတယ်။—ဗျာဒိတ် ၁၂:၇–၉ ကိုဖတ်ပါ။
၁၉၁၄ ခုနှစ်ကစပြီး သိသိသာသာ တိုးများလာတဲ့ ဆိုးသွမ်းမှုနဲ့ အကြမ်းဖက်မှုတွေက မကြာခင်မှာ စာတန်နဲ့ သူ့ရဲ့နတ်ဆိုးအားလုံးကို ဘုရားဖျက်ဆီးတော့မယ်ဆိုတဲ့ နိမိတ်တွေပဲ။ ဖျက်ဆီးပြီးတဲ့နောက် ဘုရားက မိမိရဲ့မူလရည်ရွယ်ချက်အတိုင်း ကမ္ဘာမြေကြီးကို သာယာလှပအောင် ပြန်လုပ်ပေးပါလိမ့်မယ်။—ဗျာဒိတ် ၁၂:၁၂; ၂၁:၃၊ ၄ တို့ကိုဖတ်ပါ။