“လာခဲ့ပါ” ဟုရဲရင့်စွာ တိုး၍ဖိတ်ခေါ်

^၁ ကမ္ဘာချီအလျင်အမြန် ဖြစ်ပျက်နေသော အဖြစ်အပျက်တို့က ဤအခါသမယသည် “နောက်ဆုံးကာလ” ဖြစ်ကြောင်းသတ်မှတ်သည်။ (၂ တိ၊ ၃:၁-၅) ရာဇဝတ်မှု၊ ကုန်ဈေးနှုန်းကစားခြင်၊ စိုးရိမ်ဖွယ်ရောဂါများကလည်း ဖိစီးမှုပိုဆိုးရွားစေသည်။ သို့သော် ဤအမင်္ဂလာများအလယ် ထာဝရအကျိုးပေးမည့် ဖိတ်ခေါ်ချက်တစ်ခု လူတို့အတွက်ရှိနေပါသည်။ ဝိညာဉ်တော်နှင့်သတို့သမီးက “လာခဲ့ပါ” ဟုဆက်၍ဖိတ်ခေါ်နေသည်။ ယနေ့သူတို့နှင့်အတူ “လူအုပ်ကြီး” ပါဝင်၍ နေရာအသီးသီးရှိလူတို့အား လာ၍အသက်စမ်းရေကို အခမဲ့သောက်ကြပါဟု ဖိတ်ခေါ်နေပါသည်။​—ဗျာ၊ ၇:၉။ ၂၂:၁၇။

^၂ ယနေ့ ဖြောင့်မတ်ခြင်းတရားဆာလောင်သူ အမြောက်အမြားသည် ဤဖိတ်ခေါ်ချက်ကို လက်ခံနေကြသည်။ လွန်ခဲ့သောနှစ်တွင် ကမ္ဘာချီကျင်းပခဲ့သော ခရိုင်စည်းဝေးပွဲကို သန်းပေါင်းများစွာသောသူတို့ တက်ရောက်ခဲ့ကြသည်။ သတိရအောက်မေ့ပွဲတက်ရောက်သူ ဆယ်သန်းနီးပါးရှိသည်။ ဘုရားသခင်၏နိုင်ငံတော်သတင်းကောင်းကို လက်ခံနားထောင်ခြင်းအားဖြင့် အခြားသန်းပေါင်းများစွာတို့သည် ယေဟောဝါ၏ပြင်ဆင်ချက်ကို လေးစားကြောင်း တင်ပြနေကြပါသည်။ ထိုကြောင့် တစ်အိမ်မှတစ်အိမ် လူအများကိုလည်ပတ်ဖိတ်ခေါ်သည့်အချိန်ကို ပညာရှိရှိအသုံးပြုရန် အလွန်မှအရေးကြီးပေသည်။​—တ၊ ၅:၄၂။ ဧ၊ ၅:၁၅၊ ၁၆။

ရဲရင့်စွာပါဝင်

^၃ ဇွဲလုံ့လနှင့်ဟောပြောကြခြင်းကြောင့် ရှေးခရစ်ယာန်များ ညှဉ်းဆဲခံခဲ့ရသည်။ (တ၊ ၁၆:၁၉-၂၁။ ၁၇:၂-၈) သို့ရာတွင် ရဲရင့်စွာဖြင့် သတင်းကောင်းကြေငြာခြင်းကို မရပ်စဲခဲ့ပါ။ ကျွန်ုပ်တို့လည်း သတင်းကောင်းဟောပြောပြီးသားဖြစ်စေရန် ကြိုးစားကြရာတွင် ရဲရင့်၍ဇွဲလုံ့လရှိရကြမည်။

^၄ လုပ်ငန်းတော်ပိတ်ပင်ခံရသောနိုင်ငံများမှာပင် ပြင်းထန်စွာနှိပ်စက်ခံရလျက်နှင့် ညီအစ်ကိုများသည် ဟောပြောခြင်းလုပ်ငန်းတွင် စိတ်နှလုံးအကြွင်းမဲ့ပါဝင်နေကြပါသည်။ အလုပ်ပြုတ်နိုင်၊ အိုးအိမ်ဆုံးရှုံးနိုင်၊ လွတ်လပ်မှုကိုပင်ဆုံးရှုံးနိုင်လျက်နှင့် ထိုသို့ပြုလုပ်နေကြ၏။ သူတို့၏ပုံသက်သေကောင်းကား သူတစ်ထူးအား “လာခဲ့ပါ” ဟုဆက်ဖိတ်ခေါ်ရန် ကျွန်ုပ်တို့အတွက် အားပေးတိုက်တွန်းမှုဖြစ်သည်။​—၂ သက်၊ ၃:၉။

^၅ ညီအစ်မတစ်ဦးသည် သမ္မာတရားကိုသိရှိပြီးနောက် ၃၅ နှစ်လုံးလုံး ရှေ့ဆောင်လိုသည့်ဆန္ဒကို မပျောက်ပျက်စေခဲ့ပါ။ သူ၏ကိုယ်ရေးကိုယ်တာအခြေအနေသည် အသက် ၇၀ အရွယ်တွင် ပြောင်းလဲခဲ့သည်။ ထိုအခါ မှန်မှန်ရှေ့ဆောင်စလုပ်နိုင်လေသည်။ ထိုအသက်အရွယ်တွင် ဘဝတက်လှမ်းရေးအတွက် လုပ်ငန်းအသစ်ကိုရွေးလုပ်ကိုင်မည်မဟုတ်သော်လည်း ထိုညီအစ်မရွေးချယ်ခဲ့သည်။ ယခု အချိန်ပြည့်ဓမ္မအမှုတွင် နှစ်အနည်းငယ်ပါဝင်ခဲ့ပြီဖြစ်ရာ သူမက “တစ်နေ့ထက်တစ်နေ့ ပိုပျော်စရာကောင်းတယ်” ဟုဆိုသည်။ ဘုရားသခင်၏နိုင်ငံတော်လုပ်ငန်း၌ တိုး၍ပါဝင်ရန်ဖိတ်ခေါ်ချက်ကို ရဲရင့်စွာလက်ခံခဲ့သောကြောင့် သူမသည် အခြားသူတို့အား ဝိညာဏလန်းဆန်းမှုကိုရရှိစေသည်။

^၆ ပထမရာစုအချိန်ကကဲ့သို့ ဤဖိတ်ခေါ်ချက်ကို လူတို့လက်ခံကာ သူတို့၏စဉ်းစားတွေးတောပုံကို ပြုပြင်ပြောင်းလဲ၍ ဘုရားသခင်ကိုရှုတ်ချသောအကျင့်များကိုစွန့်ပစ်နေကြပြီ။ သူတို့သည် အပြည်ပြည်ဆိုင်ရာ ဆက်ကပ်အပ်နှံသက်သေခံများအသင်းအပင်းအဝင်ဖြစ်လာကြပြီး ဝိညာဉ်တော်နှင့်သတို့သမီးနှင့်အတူ “လာခဲ့ပါ” ဟု အခြားရိုးဖြောင့်သူတို့အား ထပ်ဆင့်ဖိတ်ခေါ်နေကြပါသည်။

^၇ ဘုရားသခင်၏နိုင်ငံတော်လုပ်ငန်း တစ်ဟုန်ထိုးတိုးတက်လာခြင်းနှင့် နိုင်ငံအသီးသီးတွင် ဌာနခွဲရုံးများကို ထပ်မံတိုးချဲ့ဆောက်လုပ်နေရခြင်းက ယေဟောဝါ၏ကောင်းချီးခံစားနေရကြောင်း သာဓကတစ်ရပ်ပင်ဖြစ်သည်။ သို့သော် ဤအစီစဉ်စနစ်အတွက်အချိန်ကုန်လုပြီ။ ရဲရင့်စွာဖြင့် “လာခဲ့ပါ” ဟုဖိတ်ခေါ်ခြင်းဖြင့် အခြားသူတို့လည်း အလျင်အမြန်လက်ခံ၍ ကြားသည့်အတိုင်းလုပ်ဆောင်နိုင်ကြရန် ဇွဲလုံ့လရှိရမည့်အချိန်ကား ဤအချိန်အခါပင်ဖြစ်သည်။​—တ၊ ၂၀:၂၆၊ ၂၇။ ရော၊ ၁၂:၁၁။