၁၉၉၁ ‘လွတ်လပ်မှုမြတ်နိုးသူများ’ ခရိုင်စည်းဝေးပွဲတက်ရောက်ရန် ယခုပင်စီစဉ်

^၁ ယနေ့ကမ္ဘာ့အခြေအနေများကြောင့် တိုင်းနိုင်ငံများစွာရှိလူတို့သည် သူတို့ရရှိထားသည့်လွတ်လပ်မှုထက် ပိုလွတ်လပ်ခွင့်တမ်းတနေကြသည်ကား အံ့ဩစရာမဟုတ်ပေ။ သို့သော် စစ်မှန်သောလွတ်လပ်ရေးကို ဘယ်နေရာတွင်ရရှိနိုင်မည်နည်း။ ယေရှုခရစ်က “သင်တို့သည်ငါ၏ဒေသနာ၌တည်လျှင် ငါ့တပည့်အမှန်ဖြစ်ကြ၏။ သမ္မာတရားကိုလည်းသိကြသဖြင့် ထိုတရားသည် သင်တို့အားကိုလွှတ်လိမ့်မည်။” (ယော၊ ၈:၃၁၊ ၃၂) ဤလွတ်လပ်မှုသည် ပိုလွတ်လပ်ရန်မျှော်လင့်ချက်ဖြင့် နိုင်ငံရေးမင်းတစ်ပါး သို့မဟုတ် အုပ်ချုပ်ပုံတစ်ခုကို လူတို့ငြင်းပယ်ပြီးနောက်ရသော အကန့်အသတ်ရှိလွတ်လပ်မှုမျိုးနှင့်မတူပါ။ ယင်းကား လူ့ပြဿနာ၏အရေးအကြီးဆုံးအချက်အထိ ဖြေရှင်းပေးသည်။ ယေရှုဆွေးနွေးနေသည်ကား အပြစ်တရား၏ကျွန်ဖြစ်ရခြင်းကိစ္စဖြစ်သည်။ (ယော၊ ၈:၂၄၊ ၃၄-၃၆) သို့ဖြစ်၍ လူတစ်ယောက်သည် ယေရှုခရစ်၏တပည့်စစ်ဖြစ်လာသောအခါ သူ၏ဘဝအသက်တာ အထင်အရှားပြောင်းလဲလာသည်ကိုတွေ့မြင်ရ၏။ သို့ဖြင့်လွတ်မြောက်လေသည်။

^၂ သုံးရက်တိုင်စည်းဝေးပွဲ။ ၁၉၉၁ “လွတ်လပ်မှုမြတ်နိုးသူများ” ခရိုင်စည်းဝေးပွဲများသည် မြန်မာပြည်တွင် အောက်တိုဘာ ၂၅-၂၇ ရက်နေ့များနှင့်စတင်မည်။ သောကြာနေ့နံနက် ၈:၃၀ တွင်အစီစဉ်စတင်ဖွင့်မည်ဖြစ်၍ စည်းဝေးပွဲသည် တနင်္ဂနွေနေ့ ညနေ ၄:၁၀ တွင်နိဂုံးချုပ်လိမ့်မည်။ အစီအစဉ်တိုင်းတွင် ကျွန်ုပ်တို့၏ဝိညာဏကျန်းမာရေးအတွက် အရေးကြီးသော အထူးရွေးချယ်ထားသည့်အချက်အလက်များကိုတင်ဆက်မည်။ ရောမ ၈:၂၁ တွင်ဖေါ်ပြထားသည့်လွတ်လပ်မှုကို ကျွန်ုပ်တို့မည်သို့ရရှိနိုင်ကြောင်း ဟောပြောချက်အသီးသီးက ပေါ်လွင်စေမည်။ စိတ်တက်ကြွလှုပ်ရှားဖွယ်ရာအချက်အလက်များကို ဟောပြောချက်များ၊ သရုပ်ပြခန်းများ၊ လူတွေ့ခေါ်မေးမြန်းခြင်းနှင့်သရုပ်ပြပွဲတစ်ခုဖြင့် ပေါ်လွင်အောင်တင်ဆက်သွားပါမည်။

^၃ အစီအစဉ်တစ်ပိုင်းကိုမျှလက်မလွတ်ရန်စိတ်ဆုံးဖြတ်ပါ။ ယင်းသို့ပြုရန် ကိုယ်ရေးကိုယ်တာအနစ်နာခံစွန့်လွှတ်စရာများရှိပေမည်။ သင့်ကိုယ်ပိုင်အစီအစဉ်ကို ပြုပြင်စရာလိုပေမည်။ သင့်အလုပ်ရှင်နှင့်အထူးအစီအစဉ်များပြုလုပ်ရန် လိုအပ်ပေမည်။ အစီအစဉ်အစမှအဆုံးတက်နိုင်ရန် အချို့သူများသည် ငွေရခွင့်ရေးများကိုပင် စွန့်လွှတ်ခဲ့ရပြီ။ စည်းဝေးပွဲတက်ရောက်နိုင်ရန် ဆုတောင်းအကူအညီယူပြီး အတတ်နိုင်ဆုံးကြိုးစားအားထုတ်သူများကို ယေဟောဝါအမှန်ကောင်းချီးပေးပါမည်။​—လု၊ ၁၃:၂၄။

^၄ စောစောရောက်ရှိနေ။ အားကိုးအားထားနိုင်သူ၊ အချိန်ကိုလေးစားသူများအဖြစ် ယေဟောဝါသက်သေများ နာမည်ကောင်းရရှိထားသည်။ (လု၊ ၁၆:၁၀) ခရိုင်စည်းဝေးပွဲတက်ရာတွင် ယင်းအရည်အချင်းလိုအပ်သည်။ နေ့စဉ်စောစောရောက်နေပြီး အစီအစဉ်မစမီ ထိုင်ခုံတွင်အသင့်ရှိနေပါ။ ယင်းသို့ပြုနိုင်ရန် ကိုယ်ပြုစုရမည့်ကိစ္စများကိုလုပ်ကိုင်၍ မိသားစုအတွက်နေရာယူရန် အချိန်အလုံအလောက်ရှိဖို့လိုသည်။

^၅ ခရိုင်စည်းဝေးပွဲတက်ခြင်းက သာယာသောပေါင်းသင်းမှုရရှိခွင့်ရှိစေသည်။ သို့သော် ညဉ့်နက်သည်တိုင် မိတ်ဆွေများနှင့်စကားစမြည်ပြောဆိုနေပါက နောက်နေ့အချိန်မီရောက်ရှိခြင်းအတွက် အနှောင့်အယှက်ဖြစ်စေနိုင်သည်။ စတင်ပြင်ဆင်မှုနောက်ကျသဖြင့် ရေးကြီးသုတ်ပျာလုပ်ကိုင်ရ၍ စိုးရိမ်ပူပန်၊ စိတ်အနှောင့်အယှက်ဖြစ်စရာများပြားနိုင်သည်။ ယင်းသို့မဖြစ်စေရန် အိပ်ရာဝင်ချိန်သတ်မှတ်ပေးခြင်းက အကျိုးရှိသည်။ အစီအစဉ်ရှိသည်အတိုင်း လိုက်ရှောက်လုပ်ကိုင်ခြင်းအားဖြင့် အားလုံးအိပ်ရေးဝကြပြီး နောက်နေ့စောစောထနိုင်မည်။ သို့ပြုလျှင် အနှောင့်အယှက်ဖြစ်စေနိုင်သည့် စည်းဝေးစပြီးနောက်မှရောက်လာခြင်းကိုရှောင်ကြဉ်နိုင်မည်။ နေ့စဉ်စောစောရောက်ရှိနေခြင်းအားဖြင့် ညီအစ်ကိုညီအစ်မများနှင့်ပေါင်းသင်းခွင့်ရရှိလိမ့်မည်။ ခရစ်ယာန်မေတ္တာနှင့်စာနာမှုရှိခြင်းအပြင် ယေဟောဝါကိုလည်းကောင်း၊ ကိုယ်တော်ပြင်ဆင်သည့် ဝိညာဏရေးရာများကိုလည်းကောင်း လေးစားတန်ဖိုးထားခြင်းကား အချိန်မီရောက်ရှိရန် အတတ်နိုင်ဆုံးကြိုးစားဖို့ လှုံ့ဆော်တိုက်တွန်းပေးသင့်သည်။

^၆ အာရုံစူးစိုက်နားထောင်ခြင်း။ နားထောင်ခြင်းမည်သည်ကား စိတ်နှင့်နှလုံး၊ နားရွက်နှင့်သဘောပေါက်နားလည်ရန်ကြိုးစားခြင်းဖြင့် တကယ်ဂရုစိုက်အာရုံပြုခြင်းကိုဆိုလိုသည်။ နားစွင့်၍ “ယေဟောဝါ၏နှုတ်ကပါဌ်တော်ကိုနားထောင်” ဖို့လိုသည်။ (ယေ၊ ၂:၄) ဟေရှာယ ၅၅:၂ တွင်ဣသရေလလူမျိုးကို ယေဟောဝါဤသို့မိန့်တော်မူခဲ့သည်။ “ငါ့စကားကိုစေ့စေ့နားထောင်။” “စေ့စေ့” ဟူသောစကားလုံးကို “အားစိုက်၍ သို့မဟုတ်အာရုံပြုခြင့်ဖြင့်” ဟုအနက်ဖွင့်ထားသည်။ စည်းဝေးပွဲအတွင်းအာရုံစူးစိုက်ကြမည်ဆိုလျှင် ကျွန်ုပ်တို့သည် စိတ်ထက်သန်စွာ “နားထောင်သဖြင့်ပညာအတတ်တိုးပွား” လိမ့်မည်။ (သု၊ ၁:၅) စည်းဝေးပွဲကြီးတွင် နားထောင်၍သင်ယူရန် နိုင်ငံတော်ခန်းမ၌အာရုံပြုသည်ထက် ပိုမိုကြိုးစားစူးစိုက်နားထောင်ရန်လိုပေသည်။ အဘယ်ကြောင့်နည်း။ အချိန်ပိုကြာရှည်ထိုင်နေရကြသည်။ တက်ရောက်သူဦးရေပိုများသည့်အတွက် အာရုံထွေပြားစရာအကြောင်းပိုများသည်။ အာရုံစူးစိုက်ခြင်းမရှိလျှင် ကျွန်ုပ်တို့နစ်နာဆုံးရှုံးပြီး ပြင်ဆင်ထားသည့်ဝိညာဏအာဟာရမှ အကျိုးအပြည့်အဝမရရှိဘဲဖြစ်သွားနိုင်သည်။ (၁ ပေ၊ ၂:၂) ဘာလုပ်နိုင်သနည်း။ အစီအစဉ်တွင်မှတ်စုများယူသည့်အကျင့်ကောင်း ပွဲလာသူအများ၌ရှိသည်ကိုတွေ့ရသဖြင့် နှစ်မြို့ဖွယ်ဖြစ်သည်။ ခရိုင်စည်းဝေးပွဲတွင်ဟောပြောသည့် ဟောပြောချက်အချို့သည် အသင်းမစာပေများတွင်ပြန်ပါလာမည်မှန်သော်လည်း အားလုံးပါမည်မဟုတ်ပါ။ ခရိုင်စည်းဝေးပွဲတွင် မှတ်စုများယူရန်ပန်းတိုင်ရှိဖို့အားပေးရခြင်းမှာ ဟောပြောသည့်အကြောင်းကိုအာရုံစူးစိုက်ဖို့ ယင်းသည်အကောင်းဆုံးနည်းဖြစ်သည်။

^၇ မှတ်စုများရှည်လျားထွေပြားစရာမလို။ အဓိကအချက်တစ်ချက်အတွက် ဝါကျတစ်ခုနှစ်ခုလုံလောက်သည်။ ကလေးငယ်များပင် ဟောပြောသူ၏အဓိကအချက်များနှင့် အဓိကကျမ်းချက်များ သို့မဟုတ် အချက်အသစ်များကိုရေးချရန် သူတို့အားစက္ကူနှင့်ခဲတံပေးထားမည်ဆိုလျှင် ဟောပြောချက်များမှအကျိုးများများရပြီး အာရုံပြုရန်အကူအညီဖြစ်စေမည်။ ခရိုင်စည်းဝေးပွဲပြီးနောက်လုပ်ငန်းတော်စည်းဝေးပွဲတွင် စည်းဝေးပွဲအစီအစဉ်ကိုပြန်သုံးသပ်ခြင်းကို စိတ်ဝင်စားသည့်နည်းဖြင့်ပြုလုပ်နိုင်ရန် အကြီးအကဲများသည်မှတ်စုများကို ကောင်းစွာယူထားလျှင်အကျိုးရှိမည်။ ထို့ပြင် စည်းဝေးပွဲတွင်ကြားသိရသည့်အချက်ကောင်းများစွာကို သူတို့၏သွန်သင်၍သိုးထိန်းခြင်းလုပ်ငန်း၌ ထည့်သွင်းလိုကြပေမည်။

^၈ သီချင်းနှင့်ဆုတောင်းခြင်းတွင်စည်းလုံးခြင်း။ ယေရှုနှင့်တမန်တော်များပြုလုပ်ခဲ့သည်နည်းတူ ကျွန်ုပ်တို့၏ဝတ်ပြုရေးတွင် ယေဟောဝါအားချီးမွမ်းသီချင်းများသီဆိုခြင်းပါဝင်သည်။ (မာ၊ ၁၄:၂၆) ၁ ကောရိန္သု ၁၄:၁၅ ပါသီချင်းဆိုခြင်းနှင့်ပတ်သက်သည့် ပေါလု၏စကားများအရ ခရစ်ယာန်ဝတ်ပြုရေးတွင် သီချင်းဆိုခြင်းသည် အမြဲပြုကြသည့်ထုံးစံရှိပုံပေါက်သည်။ ၁၉၉၁ ဖေဖေါ်ဝါရီ ကျွန်ုပ်တို့၏နိုင်ငံတော်ဓမ္မအမှု စာမျက်နှာ ကိုလည်းရှု) အထူးသဖြင့်ခရိုင်စည်းဝေးပွဲကြီးများတွင် ကျွန်ုပ်တို့၏ညီကိုညီမရာချီတို့နှင့်အတူ သီချင်းနှင့်ဆုတောင်းခြင်းဖြင့် ယေဟောဝါအားချီးမွမ်းခွင့်ရရှိကြသည်။ သို့ရာတွင် ကျွန်ုပ်တို့၏ဝတ်ပြုရေးအဝင်ဖြစ်သည့် ဤကဏ္ဍများကို အချို့မလေးမခန့်ပြုလုပ်ခဲ့ကြပြီ။ မည်သို့အားဖြင့်နည်း။ အဖွင့်သီချင်းနှင့်ဆုတောင်းချက်ပြီးနောက်မှ စည်းဝေးပွဲသို့ရောက်လာခြင်းအားဖြင့်ဖြစ်သည်။ အစီအစဉ်အဆုံးတွင် သီချင်းဆိုစဉ်၊ ဆုမတောင်းမီ ထိုင်ခုံမှထွက်ခွါသွားကြသည်။ အလွန်အရေးကြီးသည့်အခါ ဤသို့ပြုရန်လိုကောင်းလိုမည်။ သို့ရာတွင် အိမ်သို့စောစောပြန်ရန်၊ အစာစားရန် တစည်းတလုံးနှင့်သီချင်းမဆို၊ ဆုမတောင်းလျှင် ယေဟောဝါ၏စားပွဲတော်ကို ထိုက်သင့်လျော်ကန်စွာလေးစားတန်ဖိုးထားခြင်းဖြစ်ပါမည်လော။​—မ၊ ၆:၃၃။

^၉ မိမိအဆင်ပြေဖို့အတွက် လောက၏ငါသာပဓာဏသဘောထား၊ ဘုရားဝတ်နှင့်မစပ်ဆိုင်သော လောဘနှင့်အတ္တစိတ်တို့သည် ကျွန်ုပ်တို့၏ဝိညာဏတိုးတက်မှုကိုမဟန့်တားစေရန် ဂရုစိုက်သင့်သည်။ အရှေ့ဥရောပနိုင်ငံများရှိ ကျွန်ုပ်တို့၏ညီကိုညီမများစွာသည် လွတ်လပ်စွာသီချင်းဆိုဆုတောင်းခွင့်ကိုရရှိခဲ့ကြသည်မှာ နှစ်အနည်းငယ်ကပင်သာဖြစ်သည်။ လူအုပ်နှင့်အတူသီချင်းဆိုဆုတောင်းခွင့်ရသဖြင့် နှလုံးပီတိဂွမ်းဆီထိဖြစ်ခဲ့သည်နည်းတူ မြင့်မြတ်သောအရာများကိုထပ်တူတန်ဖိုးထားလေးစားသောသဘောကို ယခုတင်ပြကြစို့။ အတူတကွသီချင်းဆိုဆုတောင်းခွင့်ရခြင်းကို ဘယ်သောအခါမျှပေါ့ပေါ့တန်တန်သဘောမထားကြစို့လေ။

^၁၀ ကျွန်ုပ်တို့၏ခရစ်ယာန်အမူအကျင်းများ။ ခရိုင်စည်းဝေးပွဲကြီးများတွင် ကျွန်ုပ်တို့၏ခရစ်ယာန်အမူအကျင့်နှင့်ဝတ်စားပုံသည် ယေဟောဝါသက်သေများအတွက် နာမည်ကောင်းရရှိနေဆဲဖြစ်သည်။ ဤသို့ဖြစ်ရခြင်းကား ယေဟောဝါအားဝတ်ပြုခြင်းကို ကျွန်ုပ်တို့အလေးအနက်သဘောထားပြီး စည်းဝေးပွဲတက်ခြင်းကို လူမှုရေးပျော်ရွှင်မှုတစ်ပွဲအဖြစ်သဘောမထားကြခြင်းကြောင့်ဖြစ်သည်။ ဤအထူးပွဲလမ်းသဘင်များတွင် စုဝေးကြသည့်အခါ ကျွန်ုပ်တို့၏ခရစ်ယာန်သိက္ခာကိုထိန်းသိမ်းသင့်သည်။ အချိန်အခါမရွေး ဓမ္မအမှုဆောင်များအဖြစ် ထိုက်သင့်စွာကျင့်ကြံခြင်းအားဖြင့် မြင့်မားသောဝိညာဏစိတ်ထားကိုလည်းစောင့်ထိန်းသင့်သည်။​—၁ ကော၊ ၁၀:၃၁-၃၃။

^၁၁ ယင်းသို့မပြုလုပ်ဘဲနေပါက သူတစ်ပါးပျော်ရွှင်မှုကိုထိခိုက်စေ၍ လူသစ်များအတွက်ထိမိ၍လဲစရာပင်ဖြစ်နိုင်မည်။ အသေးအဖွဲမျှဖြစ်သောကျေးဇူးပြုမှုများကို အသိအမှတ်ပြုကျေးဇူးတင်ကြောင်းပြောဆိုပါသလော။ ကျွန်ုပ်တို့ဝန်းကျင်ရှိ သူတစ်ပါးကိုဂရုပြုကာ သူတို့ကိုလေးစားကြောင်း၊ စာနာမှုရှိကြောင်းတင်ပြသင့်သည်။ စည်းဝေးအစီအစဉ်စပြီဆိုလျှင် သွားလာချိန်၊ စကားပြောဆိုချိန်မဟုတ်တော့ဘဲ နားစွင့်ရန်အချိန်ဖြစ်သည်ကို အားလုံးသဘောပေါက်သင့်သည်။​—တရား၊ ၃၁:၁၂။

^၁၂ ခရစ်ယာန်အမူအကျင့်များတင်ပြခြင်းဖြင့် ယေဟောဝါဘုရား၏ဘုန်းထင်ရှားနိုင်သည့် အခြားနေရာတစ်နေရာမှာ တည်းခိုခွင့်ပြုသူများနှင့်ဆက်ဆံပုံအားဖြင့်ဖြစ်သည်။ ကျွန်ုပ်တို့အားတည်းခိုခွင့်ပေးသည့်အိမ်ရှင်နှင့်သူ၏မိသားစုကို ကျေးဇူးတင်၍စာနာမှုရှိကြောင်း ယဉ်ကျေးရည်မွန်စွာပြုမူခြင်း၊ အလွန်အမင်းတောင်းဆိုချက်များမပြုခြင်းဖြင့်ပြသင့်သည်။ (ဂလ၊ ၆:၁၀) ‘သတင်းကောင်းအတွက်အရာခပ်သိမ်းကိုပြုရန်အသင့်ရှိလော့။’​—၁ ကော၊ ၉:၁၉-၂၃။

^၁၃ ဝတ်စားဆင်ယင်ပုံနှင့်အမူအကျင့်အားဖြင့်သာမက သူတစ်ပါးဥစ္စာကိုအသုံးပြုပုံအားဖြင့်လည်း သန့်ရှင်းမှုနှင့်စာနာမှုတင်ပြသင့်သည်။ အခန်းကိုသပ်ယပ်သန့်ရှင်းစွာထားရစ်ခြင်းသည် မသင့်တော်သလော။ စာနာမှုမရှိပြုမူခြင်းကား ကျွန်ုပ်တို့နာမည်ကောင်းကိုဖျက်ဆီးသည်။ လာမည့်ခရိုင်စည်းဝေးပွဲများတွင် “ငါတို့ကိုကယ်တင်တော်မူသောအရှင်ဘုရားသခင်၏သြဝါဒကို အရာရာ၌တန်ဆာဆင်ခြင်းငှာ” ကျွန်ုပ်တို့ပြုမူကျင့်ကြံဖို့စိတ်ဆုံးဖြတ်ထားသင့်သည်။​—တိ၊ ၂:၁၀။

^၁၄ မိဘများအတွက်။ ကလေးငယ်များနှင့်ဆယ်ကျော်သက်များ “လွတ်လပ်မှုမြတ်နိုးသူများ” ခရိုင်စည်းဝေးပွဲတက်ကြမည်ဟုမျှော်လင့်သည်။ အစကနဦးကလူသားအားပေးထားသည့်လွတ်လပ်ခွင့်ကိုအာဒံဆုံးရှုံးခဲ့သကဲ့သို့ လောကကမ်းလှမ်းသည့်လွတ်လပ်မှုသည် သူတို့အားဝိညာဏသေခြင်းသို့လားစေသည်။ ဤကိစ္စကိုမှန်ကန်စွာသုံးသပ်ဆင်ခြင်ကြရန် ယေဟောဝါ၏မေတ္တာပါအဖွဲ့အစည်းက လိုအပ်သောပြင်ဆင်ချက်များကမ်းလှမ်းထားသည်။ ခရစ်ယာန်စည်းဝေးအားလုံးတွင် အာရုံစူးစိုက်နားထောင်တတ်သူ၊ စည်းဝေးပွဲအစီအစဉ်၌ စေ့စေ့စိတ်ဝင်စားမှုပြသူလူငယ်များကိုတွေ့ရှိရသဖြင့် အလွန်အားရပါသည်။ (ဆာ၊ ၁၄၈:၁၂၊ ၁၃) သို့သော်မိဘများ၏ပုံသက်သေနှင့်ကြီးကြပ်မှုအပေါ် များစွာမူတည်နေသည်။ မှတ်စုယူရန် လူငယ်များစွာလေ့ကျင့်မှုရရှိခဲ့ပြီ။ မှတ်စုယူရန် သင့်ကလေးငယ်များကိုသင်မပေးရသေးလျှင် စည်းဝေးပွဲကြီးမတိုင်မီ ကျန်ကြွင်းသည့်အချိန်တွင်သင်ပေးပါလေ။ အလွန်ငယ်ရွယ်သောသူများကိုပင် ကျမ်းချက်များ၊ ၄င်းတို့နှင့်ဆက်စပ်သောစကားလုံးများကိုရေးမှတ်ရန် အားပေးတိုက်တွန်းနိုင်သည်။ တည်းခိုရာနေရာသို့အသွား သို့မဟုတ် ပြန်ရောက်သည့်အခါ တစ်နေ့တာအစီအစဉ်မှအဓိကအချက်များကိုပြန်သုံးသပ်ရန် အချို့မိဘများစီစဉ်တတ်ကြသည်။

^၁၅ ပြေးလွှားကစားရန် ကလေးအများ၏ဝသီဖြစ်ကြောင်း မိဘအများသဘောပေါက်သည်။ သူတို့တွင်ဘဝအတွေ့အကြုံနည်းသေး၍ မရင့်ကျက်ကြသေးချေ။ ထိုကြောင့် မည်သည့်အခါအာရုံစူးစိုက်နေရမည်၊ စည်းဝေးတွင်မည်သို့ကျင့်ကြံရမည်ကို သွန်သင်ပေးဖို့လိုသည်။ သို့ပြုရန် မိဘများကောင်းစွာကြပ်မတ်ကွပ်ကဲစရာလိုသည်။ ဤကိစ္စတွင် အချို့မိဘများပေါ့ပျက်ပါသည်။ တစ်ခါတစ်ရံဆုတောင်းနေစဉ် မိဘများလေးစားမှုပြနေကြသော်လည်း သူတို့သားသမီးများသည် ဆော့နေတတ်သည်။ သူတစ်ပါးအာရုံကိုနှောင့်ယှက်နေတတ်သည်။ ဆုတောင်းနေစဉ်ပင် သားသမီးများဘာလုပ်နေသည်ကို မိဘများသိသင့်သည်။ ထို့ပြင်အစီအစဉ်အတွင်း ထိုင်ခုံမှထသွားသည့်အခါ သူတို့ဘာလုပ်နေကြသနည်း။ စည်းဝေးအစီအစဉ်အတွင်း၊ သို့မဟုတ်ပြီးနောက်တွင် ကွပ်ကဲမှုမရှိ သားသမီးများကိုပစ်ထားတတ်သလော။​—သု၊ ၂၉:၁၅။

^၁၆ အချို့ကလေးများသည် ပဲ့ပြင်မှုမရှိ၊ စည်းမဲ့ကမ်းမဲ့ပြုမူခဲ့ပြီ။ သူတို့အားကြင်နာစွာဆုံးမသောသက်ကြီးရွယ်အိုညီကိုညီမများ သို့မဟုတ် ဧည့်ကြိုများကိုပင်မလေးမခန့်ပြုမူခဲ့ပြီ။ ခရစ်ယာန်အကျင့်မဟုတ်သည့် ဤစည်းကမ်းမဲ့ပြုမူခြင်းသည် အိမ်တွင်း၌အလိုလိုက်ခြင်း၊ ပဲ့ပြင်ဆုံးမမှုမရှိခြင်းကြောင့် အများအားဖြင့်ဖြစ်သည်။ ယင်းကိုပြုပြင်သင့်သည်ကားအမှန်။ “ယေဟောဝါ၏ပဲ့ပြင်ဆုံးမခြင်းနှင့် စိတ်သဘောတော်ဆိုင်ရာ စည်းမျဉ်းဥပဒေအရ သူတို့ကို မွေးမြူကြ” ရာတွင် ခရစ်ယာန်မိဘအားလုံး မိမိတို့သားသမီးများကို အချိန်အခါမရွေးဂရုစိုက်ကြီးကြပ်ပေးသင့်သည်။​—ဧ၊ ၆:၄။

^၁၇ အရာရာ၌ သင့်ဝိုင်းဝန်းကူညီလိုက်လျောမှုကို ကျေးဇူးတင်။ ပွဲလာသူအားလုံးအတွက်ထိုင်ခုံ၊ စာပေစာတမ်း၊ အစားအသောက်နှင့်အခြားပြင်ဆင်ချက်များအားလုံး အလုံအလောက်ရှိနေရန် အသေအချာကြိုတင်စီစဉ်ပြုလုပ်ထားပါသည်။ ဤအစီအစဉ်များ၏အကျိုးထိရောက်မှုအတွက် တက်ရောက်ရမည့်စည်းဝေးပွဲအကြောင်း အသင်းတော်တစ်ခုစီအား တာဝန်ခွဲခန့်ထားပြီ။ လူအုပ်များလွန်းခြင်းမဖြစ်စေရန် သင့်ဝိုင်းဝန်းကူညီလိုက်လျောမှုသည် အလွန်အရေးကြီးသည်။ အခြေအနေအရ လူအချို့သည် အခြားသတ်မှတ်ပေးထားသည့်စည်းဝေးပွဲအစား အခြားစည်းဝေးပွဲကိုတက်ကြရန် အကြောင်းပေါ်ပေမည်။ သို့ရာတွင် အများစုမှာ တာဝန်ပေးထားသည့်နေရာတွင် စည်းဝေးပွဲတက်နိုင်သင့်ပေသည်။​—၁ ကော၊ ၁၃:၅။ ဖိ၊ ၂:၄။

^၁၈ ထိုင်ခုံကြိုယူထားခြင်းနှင့်ပတ်သက်၍ ပြောသည့်အတိုင်းလိုက်နာလုပ်ကိုင်ကြမည်ဟု မျှော်လင့်သည်။ သင့်အိမ်ထောင်သားများနှင့်သင်နှင့်အတူ ရပ်ဝေးမှတစ်ပါတည်းပါလာသူတို့အတွက်သာ ထိုင်ခုံများကြိုတင်ယူထားသင့်ကြောင်း သတိရပါ။ အခြားသူတို့အတွက်ခုန်မဦးထားပါနှင့်။ တစ်ခါတရံ ထိုင်ခုံများကိုအကျိုးမဲ့အကြောင်းမဲ့ဦးထားတတ်ကြသည်။ ယင်းသို့ပြုခြင်းကား မေတ္တာပြရာမကျ၊ ဧည့်ကြိုများနှင့်ထိုင်ခုံရှာသူများအတွက် အထင်မှားစရာဖြစ်စေသည်။ ကျမ်းစာသြဝါဒနှင့်အညီ ညီအစ်ကိုချင်းမေတ္တာပြရန်ကြိုးစား၍ ထိုင်ခုံဦးခြင်းအစီအစဉ်နှင့်ကိုက်ညီစွာ ဝိုင်းဝန်းပြုလုပ်သင့်သည်။ မိမိအိမ်ထောင်သားများအရေအတွက်၊ ကိုယ်နှင့်လိုက်ပါလာသူဦးရေထက်ပို၍ ထိုင်ခုံဦးခွင့်မရှိပါ။​—၂ ပေ၊ ၁:၇။

^၁၉ အသင်းမ၏ထိုင်ခုံဦးခြင်းအစီအစဉ်ကိုအလွဲသုံးစားပြုမှုမရှိစေရန်ကြီးကြပ်ပေးဖို့ ဧည့်ကြိုများသည် တာဝန်ပေးထားသည့်နေရာများတွင် နံနက် ၇:၀၀ မထိုးမီရောက်ရှိနေသင့်သည်။ တက်ရောက်သူအားလုံး၏အကျိုးအလိုငှာ ဧည့်ကြိုများတာဝန်ကျေပွန်စွာအမှုထမ်းကြရာတွင် သူတို့အားဝိုင်းဝန်းကူညီပါ။

^၂၀ ပြင်ဆင်ထားသည့်ဝိညာဏအစီအစဉ်မှအကျိုးရရှိရန် စည်းဝေးပွဲကျင်းပရာနေရာထိုင်ခင်း၌ စုဝေးခွင့်ရခြင်းကို ယေဟောဝါလူမျိုး အမှန်ကျေးဇူးတင်လေးစားကြသည်။ ဤစည်းဝေးပွဲများတွင် အဆင်ပြေစွာစီစဉ်ပြုလုပ်ထားရာအားလုံးတို့အတွက်လည်း ကျေးဇူးတင်ကြပါသည်။ စည်းဝေးပွဲတက်ချိန်တွင် ပျော်ရွှင်မှုရပြီး ဝိညာဏလန်းဆန်းမှုရရှိနိုင်ရန် အသင်းမအတွက်အကုန်အကျများစွာဖြင့် ထိုင်ခုံအလုံအလောက်၊ အသံချဲ့စက်၊ စားသောက်ဌာနနှင့်အခြားအခြားအစီအစဉ်များကို အသေအချာစီစဉ်ထားရပါသည်။

^၂၁ ဤအရာများအတွက်ကုန်ကျစရိတ်ကို သင့်စေတနာအလျောက်လှူဒါန်းငွေဖြင့် ဆောင်ရွက်ပြုလုပ်ထားပါသည်။ သင့်အတွက်အဆင်ပြေသောနေရာများတွင် ထင်ရှားစွာမှတ်သားပေးထားသည့် အလှူငွေပုံးများထားပေးပါသည်။ သင့်အလှူငွေကိုများစွာတန်ဖိုးထားပါသည်။ ဤနည်းဖြင့် သင်သည်နိုင်ငံတော်မှုရေးကိစ္စမျာကိုထောက်ခံပေးသဖြင့် အသင်းမကလည်း သင့်အားကြိုတင်ကျေးဇူးတင်လိုပါသည်။ မည်မျှလှူဒါန်းရမည်ကိုမသတ်မှတ်ထားသည့်အတွက် တစ်ဦးတစ်ယောက်ဤသို့ဆိုသည်။ ‘ကျွန်ုပ်တို့၏တန်ဖိုးထားလေးစားမှုပေါ်အခြေပြု၍အလှူငွေပေးနိုင်ခြင်းကို ကျွန်ုပ်သဘောကျသည်။ ယင်းကြောင့် ကျေးဇူးတင်စွာဖြင့် ပေးလေ့ရှိသည်ထက် အလှူငွေပိုပေးချင်စိတ်ရှိစေသည်။’ ဤကုန်ကျစရိတ်နှင့်ပတ်သက်၍ တစ်ဦးစီ၌တာဝန်ရှိနေသည်ကိုသိရှိစွာဖြင့် အခြေအနေခွင့်ပြုသ၍ ပါဝင်အလှူငွေထည့်ကြမည်ဟု ကျွန်ုပ်တို့စိတ်ချပါသည်။​—လု၊ ၆:၃၈။

^၂၂ “လွတ်လပ်မှုမြတ်နိုးသူများ” ခရိုင်စည်းဝေးပွဲကိုတက်ရောက်ကြပါ။ “လွတ်လပ်မှုမြတ်နိုးသူများ” ခရိုင်စည်းဝေးပွဲကိုတက်ရောက်၍ အစီအစဉ်ကိုစူးစိုက်အာရုံပြုခြင်းအားဖြင့် ခရစ်တော်မှတစ်ဆင့်ရရှိသောလွတ်လပ်ခွင့်ကိုတန်ဖိုးထားစိတ်တိုးပွားစေ၍ ခရစ်ယာန်လွတ်လပ်မှုကိုလျောက်ပတ်စွာအသုံးပြုပေမည်။ စည်းဝေးအဖွင့်သီချင်းစသည်နှင့်ရောက်ရှိနေရန်လည်းကောင်း၊ တနင်္ဂနွေနေ့ညနေ နောက်ဆုံးသီချင်းဆိုပြီးသည်အထိ အစီအစဉ်အားလုံးကိုတက်နိုင်ရန် ယခုကတည်းကအစီအစဉ်များရေးဆွဲပါ။

[စာမျက်နှာ ၉ ပါ လေးထောင့်ကွက်]

ခရိုင်စည်းဝေးပွဲသတိပေးချက်များ

နှစ်ခြင်း။ စနေနေ့နံနက်အစီအစဉ်မစမီ သတ်မှတ်ပေးထားသည့်နေရာတွင် ထိုင်ခုန်၌အသင့်ရောက်ရှိနေရန် နှစ်ခြင်းယူမည့်သူများကြိုးစားအားထုတ်သင့်သည်။ ယောက်စီယောက်တိုင်း ဣန္ဒြေရှိသောနှစ်ခြင်းယူရန်ဝတ်စုံနှင့်မျက်နှာသုတ်ပုဝါယူလာသင့်သည်။ ဟောပြောသူ၏နှစ်ခြင်းဟောပြောချက်နှင့်ဆုတောင်းခြင်းအဆုံးတွင် သဘာပတိသည် နှစ်ခြင်းယူမည့်သူတို့သိသင့်သောအကြောင်းများကိုလိုရင်းတိုရှင်းပြောမည်။ ထိုနောက်သီချင်းဆိုမည်။ နောက်ဆုံးအပိုဒ်စသည်နှင့် နှစ်ခြင်းယူမည့်သူတို့အား ဧည့်ကြိုများက နှစ်ခြင်းယူရာနေရာသို့ညွှန်ကြားမည်။ သို့မဟုတ်ပို့ဆောင်မည့်ကားများထံညွှန်ပြမည်။ ကျန်ပရိသတ်မှာမူ သီချင်းတစ်ပုဒ်လုံးကိုအဆုံးအထိသီဆိုကြမည်။ မိမိကိုယ်ကိုဆက်ကပ်အပ်နှံခြင်းအထိမ်းအမှတ်ဖြစ်သည့် နှစ်ခြင်းမင်္ဂလာသည် နှစ်ခြင်းယူသူနှင့်ယေဟောဝါစပ်ကြား ရင်းနှီးကျွမ်းဝင်၍ကိုယ်ရေးကိုယ်တာကိစ္စဖြစ်သောကြောင့် နှစ်ခြင်းယူနေစဉ် နှစ်ခြင်းယူသူနှစ်ဦး သို့မဟုတ် ထိုထက်မကလက်တွဲနေရမည့်အစီအစဉ်မရှိပါ။

လုပ်အားပေးအစီအစဉ်။ ခရိုင်စည်းဝေးပွဲအောင်မြင်စွာပြီးဆုံးနိုင်ရန် လုပ်အားပေးခြင်းများစွာလိုအပ်ပါသည်။ စည်းဝေးပွဲတစ်ပိုင်းလောက်သာလုပ်အားပေးနိုင်ဦးတော့ သင့်အကူအညီကိုအမှန်လိုအပ်နေပါသည်။ လုပ်အားပေးနိုင်မည်ဆိုလျှင် လုပ်အားပေးဌာနသို့ စည်းဝေးတက်ရန်ရောက်လာသည်နှင့်အကြောင်းကြားပါ။ အသက် ၁၆ နှစ်အောက်ကလေးများလည်းလုပ်အားပေးနိုင်ပါသည်။ သို့သော်မိဘသို့မဟုတ်တာဝန်သိတတ်သူလူကြီးတစ်ဦးနှင့်အတူ တွဲဖက်လုပ်အားပေးရန်လိုပါသည်။

ရင်ထိုးတံဆိပ်ကပ်ပြားများ။ စည်းဝေးပွဲတွင်လည်းကောင်း၊ စည်းဝေးပွဲကျင်းပရာနေရာသို့အသွားအပြန်ခရီးတွင်လည်းကောင်း အထူးဒီဇိုင်းဆွဲထားသည့်ရင်ထိုးတံဆိပ်ကပ်ပြားများကိုတပ်ထားပါ။ ယင်းသို့ပြုခြင်းဖြင့် ခရီးသွားစဉ်သက်သေခံခွင့်ကောင်းများရရှိစေသည်။ ရင်ထိုးကပ်ပြားများကို စည်းဝေးပွဲကျင်းပရာစာအုပ်စာတမ်းဌာနများတွင် ဝယ်ယူနိုင်ပါသည်။

သတိပေးစကားများ။ မည်သည့်နေရာတွင်မဆိုသင့်ကား သို့မဟုတ် စက်ဘီးကိုရပ်ထားစေကာမူ အချိန်အခါတိုင်း တွင်သော့ခပ်ထားပါ။ အတွင်း၌မြင်သာအောင်ပစ္စည်းများကို မည်သည့်အခါမျှ မထားပါနှင့်။ ဖြစ်နိုင်လျှင်ကားနောက်ခန်းတွင် မတွေ့နိုင်သည့်နေရာ၌ သင့်ပစ္စည်းများကိုအလုံပိတ်ခပ်ထားပါ။ စက်ဘီးဆိုလျှင်လည်း အသေအချာသော့ခပ်၍ သတ်မှတ်ပေးထားသည့်နေရာတွင်သာရပ်နားထားပါ။ လူအုပ်ကြီးသည့်နေရာသို့ရောက်လာတတ်သော ခါးပိုက်နှိုက်နှင့်သူခိုးများကိုလည်းသတိပြုပါ။ စည်းဝေးပွဲ၌ ထိုင်ခုံများပေါ်တွင်တန်ဖိုးရှိ မည်သည့်ပစ္စည်းကိုမျှမချန်ထားရန် သတိပေးလိုပါသည်။ အထူးဂရုပြုကြပါ။