သူတစ်ထူး၌ ကိုယ်တိုင်စိတ်ဝင်စားမှုပြခြင်း

^၁ သူတစ်ထူးကို ယေဟောဝါစိတ်ဝင်စားကြောင်း များစွာထင်ရှားပါသည်။ ဖန်ဆင်းထားသောသတ္တဝါအပေါင်းအတွက် လိုလေသေးမရှိ ပြင်ဆင်ပေးထားတော်မူပြီမဟုတ်လော။ (က၊ ၁:၂၉၊ ၃၀။ ၂:၁၆၊ ၁၇။ မ၊ ၅:၄၅။ လု၊ ၆:၃၅ နှင့်နှိုင်းယှဉ်) ထိုထက်အရေးကြီးသည်ကား အပြစ်နှင့်သေခြင်းမှလွတ်မြောက်ရန် စီစဉ်ပေးတော်မူခြင်းအားဖြင့် ကျွန်ုပ်တို့ကိုစိတ်ဝင်စားတော်မူကြောင်း တင်ပြသည်မဟုတ်လော။​—ယော၊ ၃:၁၆။

^၂ သူတစ်ထူး၌စိတ်ဝင်စားသည့် ခမည်းတော်၏စုံလင်သောပုံသက်သေကို ကမ္ဘာပေါ်ယေရှုရှိစဉ်က အတုယူတော်မူခဲ့သည်။ (မ၊ ၁၁:၂၈-၃၀။ ၁ ပေ၊ ၂:၂၁) နူနာစွဲနေသောသူတစ်ဦးကယေရှုအား “သခင်အလိုတော်ရှိလျှင် ကျွန်တော်ကိုသန့်ရှင်းစေနိုင်တော်မူသည်” ဟုလျှောက်သော် ယေရှုက “ငါအလိုရှိ၏” ဟုဖြေဆိုကာ ရောဂါပျောက်စေသည်။ (မ၊ ၈:၂၊ ၃) နာဣနမြို့အနီးတွင် မုဆိုးမ၏တစ်ဦးတည်းသောသားအသုဘနှင့် ယေရှုကြုံလေရာ သနားသဖြင့် လုလင်အားအသက်ပြန်ရှင်စေသည်။ (လု၊ ၇:၁၁-၁၅) အသနားမခံမီ ယေရှုကသူတစ်ထူး၌စိတ်ဝင်စားမှုပြတော်မူသည်။ ကလေးငယ်များကိုပင် ယေရှုအချိန်ပေးအာရုံပြုတော်မူသည်။ သူတစ်ပါးကိုနှစ်သိမ့်အားပေးရန် တစ်ခါမျှ အလုပ်မများလွန်းခဲ့ချေ။​—မ၊ ၂၀:၃၁-၃၄။ မာ၊ ၁၀:၁၃-၁၆။

ဆွေမျိုးဉာတိမိတ်သင်္ဂဟ

^၃ သူတစ်ထူးကိုစိတ်ဝင်စားကြောင်းတင်ပြရန်နည်းများကို ယေဟောဝါနှင့်ယေရှုခရစ်နည်းတူ အခွင့်အရေးရှာယူသင့်သည်။ ထိုကြောင့် ထိုသို့ပြုရန်အခွင့်အလမ်းများကိုသုံးသပ်ကြည့်စို့။

^၄ အရေးအကြီးဆုံးကား မိမိ၏မိသားစုကိုစိတ်ဝင်စားပြီး မိသားစုဝိညာဉ်ရေးကို လျစ်လျူမရှုခြင်းဖြစ်သည်။ ယင်း၌ မိသားစုနှင့်မှန်မှန်သင်အံမှုပြုခြင်းပါဝင်သည်။ သင်၏မိသားစုသင်အံမှုတွင် အကြောင်းအရာတစ်ခုကို စိတ်ဝင်စားစွာနှင့်လက်တွေ့ကျကျ တန်ဖိုးရှိစွာ လေ့လာကြပါသလော။ သင့်အိမ်ထောင်စုရှိသူတစ်ဦးစီနှင့် လယ်ကွင်းလုပ်ငန်းတွင် မှန်မှန်ပါဝင်ခြင်းအားဖြင့် အကျိုးထိရောက်မှုရှိမရှိ စုံစမ်းသလော။ ထိုသို့ပြုသည့်အခါ ပျော်ရွှင်စရာအချိန်ဖြစ်ပါသလော။ သူတစ်ပါးကိုကူညီပေးချင်စိတ် သင့်သားသမီးများ၌မွေးမြူပေးခြင်းဖြင့် ခရစ်ယာန်အိမ်နီးချင်းမေတ္တာကို တည်ဆောက်ပေးပါသလော။ အိမ်ထောင်ရှိ၍ သားသမီးများမရှိသော်လည်း မိသားစုသင်အံမှုပြုလုပ်ပါသလော။

^၅ ဝိညာဏအကူအညီကို လူတိုင်းအား ကျွန်ုပ်တို့ပေးလိုပါသည်။ သို့သော် အလုပ်များကြသဖြင့်အထူးလိုအပ်ရာများရှိ အသင်းတော်သားများကို စိတ်ဝင်စားမှုတင်ပြရန် မေ့ပျောက်နေပါသလော။ (သု၊ ၃:၂၇။ ဂလ၊ ၆:၁၀) ခရစ်ယာန်အသင်းတော်တွင် ဖခင်မဲ့လူငယ်များ၊ သက်ကြီးရွယ်အို၊ မုဆိုးမ၊ ချို့တဲ့သူ၊ စိတ်ဓာတ်ကျသူ၊ မသန်မစွမ်းသူနှင့်ထူးခြားသောအကူအညီလိုအပ်သူများရှိသည်။ ယေဟောဝါနှင့် ကိုယ်တော်၏သားတော်ယေရှုခရစ်နည်းတူ ကျွန်ုပ်တို့ညီအစ်ကိုညီအစ်မများအားလုံးကို စိတ်ဝင်စားကြောင်း မပြဘဲမနေသင့်။​—၁ ကော၊ ၁၀:၂၄။ ဖိ၊ ၂:၄။ ဟေ၊ ၁၃:၁၆။

လယ်ကွင်းရှိသိုးကဲ့သို့သောသူများ

^၆ အိမ်တွင်းကျမ်းစာသင်အံမှုရှိသူများကိုစိတ်ဝင်စားကြောင်း မည်သို့ပြနိုင်သနည်း။ သူတို့အနက်အများက လောကီအပေါင်းအသင်းများနှင့် အဆက်အသွယ်ဖြတ်တောက်ရန်လိုအပ်ကြောင်းတွေ့ရှိခဲ့သည်။ ကျွန်ုပ်တို့အလုပ်များနေကြမည်မှန်သော်လည်း ဤသင်သားတို့၌စိတ်ဝင်စားမှုပြကာ ပြုပြင်ပြောင်းလဲလာသူတို့အား ကျွန်ုပ်တို့၏မိတ်သစ်ဆွေသစ်များအဖြစ် ကြိုဆိုပါသလော။ သူတို့နှင့်ကျွန်ုပ်တို့ကိုယ်တိုင် ကျမ်းစာမလေ့လာသော်လည်း သူတို့ကိုအားပေးတည်ဆောက်ပါသလော။​—မာ၊ ၁၀:၂၈-၃၀။

^၇ သတင်းကောင်းကိုနားထောင်လိုသူများအား စိတ်ရင်းမှန်ဖြင့် စိတ်ဝင်စားကြောင်း များများပါဝင်တင်ပြနိုင်ပါသလော။ သူတို့၏ဝိညာဏလိုအပ်ရာများကို မီနိုင်ကြရန်ကြိုးစားကူညီပေးမည်လော။ သင်ကိုယ်တိုင် လယ်ကွင်းဓမ္မအမှု၌များများပါဝင်နိုင်ရန် ဘာလုပ်ကိုင်နိုင်သနည်း။ များများပါဝင်နိုင်ခွင့်ရှိနေပြီဆိုလျှင် နောက်တွန့်ဆုတ်မနေပါနှင့်။​—လု၊ ၉:၆၀-၆၂။

^၈ သူတစ်ထူးကိုစိတ်ဝင်စားမှုတင်ပြခြင်း၌ ယေဟောဝါနှင့်ယေရှုကိုအတုယူရကြမည်။ နူနာစွဲသူကိုယေရှုစာနာမှုပြသည်နည်းတူ ကိုယ်တိုင်ဦးစွာကူညီပေးရမည်။ မှန်၏။ သူတစ်ထူးကိုစိတ်ဝင်စားမှုတင်ပြနိုင်ရန်နည်းများကို အမြဲသတိပြုနေရကြမည်။