သတင်းကောင်းဝေငှခြင်း​—စာအုပ်စာတမ်းများကို ပညာရှိစွာအသုံးပြုခြင်းအားဖြင့်

^၁ ၁၉၉၁ လုပ်ငန်းတော်နှစ်အတွက် အထူးစည်းဝေးပွဲအစီစဉ်တွင် “ကျွန်ုပ်တို့၏ဓမ္မအမှု​—သာမန်မဟုတ်၊ သို့သော်သန့်ရှင်း၏” အကြောင်းကိုဆွေးနွေးတင်ပြခဲ့သည်။ ကျွန်ုပ်တို့လုပ်ငန်းတော်သည်မွန်မြတ်သဖြင့် အခွင့်အရေးမယူသင့်။ စာအုပ်စာတမ်းများအသုံးပြုခြင်းသည် ဓမ္မအမှုတွင်အရေးပါသည့်အတွက် ယင်းကိုတန်ဖိုးထားရမည်။ စာပေများကို ပညာရှိစွာအသုံးပြုခြင်းဖြင့် မည်မျှတန်ဖိုးထားကြောင်း တစ်ဦးစီတင်ပြနိုင်သည်။

^၂ ၁၉၉၀ လုပ်ငန်းတော်နှစ်အတွင်း အသင်းမသည် ကမ္ဘာချီလုပ်ငန်းတွင်အသုံးပြုရန် မဂ္ဂဇင်းပေါင်း ၆၇၈ သန်း၊ ကျမ်းစာနှင့်အခြားစာအုပ်ကြီး ၅၁ သန်းပုံနှိပ်ထုတ်ဝေခဲ့သည်။ ယင်းက အချိန်၊ ခွန်အားနှင့်ငွေအမြောက်အမြားကုန်ခမ်းခဲ့ကြောင်း တင်ပြပါသည်။ စေတနာ့ဝန်ထမ်းသူများစွာ၏ကြိုးပမ်းမှုက ကိုယ်ပိုင်နှင့်လယ်ကွင်း၌ဝေငှရန် စံမီစာအုပ်စာတမ်းများပုံနှိပ်ထုတ်ဝေခြင်းဖြစ်မြောက်စေသည်။ စိတ်ရိုးသားသူတို့ထံ နိုင်ငံတော်သတင်းကြေညာရာတွင် ကျွန်ုပ်တို့စာပေများကိုကိုယ်တိုင်တန်ဖိုးထားကြောင်း မည်သို့တင်ပြနိုင်သနည်း။

^၃ ကိုယ်ပိုင်နှင့်မိသားစုလေ့လာမှု။ ရောမ ၂:၂၁ တွင်တမန်တော်ပေါလုဤသို့ဆိုသည်။ “သူတစ်ပါးကိုဆုံးမလျက်ပင် ကိုယ်ကိုမဆုံးမသလော။” ကျွန်ုပ်တို့၏ကျမ်းစာအခြေခံသောစာပေများကို ဖတ်ရှုလေ့လာဆုတောင်းပြီးသုံးသပ်ရန် အချိန်ကုန်ခံသည့်အခါ ယေဟောဝါ၏ဘဏ္ဍာစိုးအတန်းစားမှတစ်ဆင့်ရရှိသည့် အချိန်မီဝိညာဉ်အစာတို့ကို မည်မျှတန်ဖိုးထားကြောင်းတင်ပြနေပါသည်။ (လု၊ ၁၂:၄၂) ကိုယ်ပိုင် သို့မဟုတ် မိသားစုလေ့လာမှုအားဖြင့် ဖော်ပြပေးသည့်သမ္မာတရားကိုမီအောင်ဖတ်ရှုခြင်းသည် ကျွန်ုပ်တို့အားယေဟောဝါအပ်နှင်းထားသည့်အရာများကို မြတ်နိုးစိတ်ပြုစုပေးသည်။ သားသမီးများအားလည်း အသင်းမစာပေများကိုတန်ဖိုးထားမြတ်နိုးရန် လေ့ကျင့်ပေးသင့်သည်။ ၎င်းတို့တွင် ရေးခြစ်ပုံဆွဲခြင်းမပြုသင့်ပါ။ ထို့ပြင် သပ်ရပ်သန့်ရှင်းသောစာပေများကို လယ်ကွင်းတွင်အသုံးပြုနိုင်ရန် ၎င်းတို့ကိုကောင်းစွာသိမ်းဆည်းထားသင့်သည်။

^၄ ဖြုန်းတီးခြင်းကိုရှောင်ပါ။ အမှန်အကျိုးရှိစေရန် ကျွန်ုပ်တို့စာပေများသည် သမ္မာတရားမြတ်နိုးသူ၊ ကျွန်ုပ်တို့သတင်းနှင့်လုပ်ငန်းကိုတန်ဖိုးထားသူတို့ထံ ရောက်စေသင့်သည်။ (မ၊ ၁၀:၁၁) ထို့ကြောင့်သမ္မာကျမ်းစာပါသတင်းတရားကိုအမှန်မြတ်နိုးစိတ်မရှိသူတို့လက်ထဲ စာအုပ်စာတမ်းများကို ပေးကမ်းခြင်းရှောင်ကြဉ်ရမည်။ မိမိအိမ်တွင် မဂ္ဂဇင်းများ၊ စာအုပ်များနှင့်အခြားစာပေများပုံနေမည်ဆိုလျှင်လည်း ဖြုန်းတီးမှုတစ်မျိုးဖြစ်သည်။

^၅ မဂ္ဂဇင်းများသည် ရက်စွဲပါသဖြင့် နောက်ဆုံးထုတ်စာစောင်များအဖြစ်ဝေငှပေးရန် အချိန်အကန့်အသတ်ရှိသည်။ ထိုကြောင့် ဓမ္မအမှုတွင်ကြိုးစားပါဝင်၍ ဤမဂ္ဂဇင်းများကို စိတ်ဝင်စားသူတို့ထံရောက်စေသင့်သည်။ သို့ပြုလျက်ပင် မဂ္ဂဇင်းများပုံနေမည်ဆိုလျှင် မဂ္ဂဇင်းလုပ်ငန်း၌ပါဝင်ရန် အချိန်စီစဉ်လျှင်ကောင်းပေမည်။ ဤသို့မပြုလုပ်နိုင်လျှင် မဂ္ဂဇင်းများကိုလျှော့မှာယူနိုင်သည်။ ဤအကြံပြုချက်များအတိုင်းလုပ်ကိုင်ခြင်းဖြင့် ဘုရားသခင်၏မခံစားထိုက်သောကရုဏာတော်အောက် သစ္စာရှိကျေးကျွန်များဖြစ်ကြောင်း ကိုယ်ကိုယ်ကိုတင်ပြကြမည်။​—၁ ကော၊ ၄:၂။ ၁ ပေ၊ ၄:၁၀၊ ၁၁။ လု၊ ၁၆:၁၊ ၁၀ နှင့်နှိုင်းယှဉ်။

^၆ ယေဟောဝါသည် ကိုယ်တော်၏သစ္စာရှိ “ကျွန်” အုပ်ချုပ်ရသော “ဥစ္စာ” အပါအဝင် ကြီးလေးသောတာဝန်နှင့်လုပ်ငန်းကို ဆက်ကပ်အပ်နှံလူမျိုးထံ၌ ‘အပ်နှင်းထား’ သည်။ (၂ တိ၊ ၁:၁၂။ လု၊ ၁၂:၄၂-၄၄၊ ၄၈ခ။ ၁ တိ၊ ၆:၂၀) ဘုရားသခင့်လုပ်ငန်းတော်၌ပါဝင်ခွင့်ရသဖြင့် ကျေးဇူးတင်လေးစားစွာနှင့် သတင်းကောင်းကြေညာရာတွင် အသင်းမစာပေများကို ပညာရှိစွာဆက်အသုံးပြုနိုင်ကြပါစေ။