လယ်ကွင်းဓမ္မအမှုတွင်စိုးလ်အပြည့်ရှိလေ
အပိုင်း ၅။ စိုးလ်အပြည့်အမှုဆောင်ခြင်း၏ကြွယ်ဝသောအကျိုးကျေးဇူးများ
၁ စိုးလ်အပြည့်အမှုဆောင်သောမိမိကျေးကျွန်များ ကြွယ်ဝသောအကျိုးကျေးဇူးများခံစားရရန် အထောက်အပံ့အလျှံပယ်ကို ယေဟောဝါပေးထားတော်မူသည်။ (ဆာ၊ ၁၁၆:၁၂) ဓမ္မအမှုဆောင်ခြင်းတွင်ယေဟောဝါ၏ကောင်းချီးအပြည့်အဝခံစားရရန် မည်သို့ပြုနိုင်သနည်း။ ကျွန်ုပ်တို့အတွက် မည်သည့်အကျိုးကျေးဇူးများရရန်ရှိသနည်း။ ကိုယ်တော်.နှစ်သက်မှုနှင့်မျက်နှာသာရရန် ဘာပြုရမည်နည်း။
၂ ကိုယ်တိုင်အားထုတ်ရန်လို။ ဘုရားပေးဆုကျေးဇူးများကို သင်မည်မျှခံစားရသည်ဆိုခြင်းသည် သင်ကိုယ်တိုင်ဘုရားအလိုတော်ကိုအားထုတ်လုပ်ဆောင်သည့်အပေါ်မူတည်သည်။ ဓမ္မအမှုဆောင်ခြင်းနှင့်ပတ်သက်၍ ပေါလုဤသို့ရေးသည်။ “အသီးသီးမိမိလုပ်သည့်အတိုင်း အကျိုးခံရလိမ့်မည်။” (၁ ကော၊ ၃:၈) ထို့ကြောင့်ဓမ္မအမှုတွင် ကျွန်ုပ်တို့ပါဝင်နိုင်သရွေ့ အပြည့်အဝပါဝင်ကြစို့။ လူများစွာနှင့်အသင်းတော်တစ်ခုလုံး ဘုရားသခင်ကိုသိရှိလာရန်ကူညီပေးရာတွင် တမန်တော်ပေါလုကိုယ်ရေးကိုယ်တာဆုကျေးဇူးများခံစားခဲ့ရသည်။ ယုံကြည်ခြင်း၌ သူတို့မြဲမြံနေကြခြင်းကိုသိရ၍ ပေါလုမည်မျှဝမ်းမြောက်မည်တကား။ (၁ သက်၊ ၂:၁၉၊ ၂၀) ပေါလုလောက်ဓမ္မအမှု၌ အပြည့်အဝပါဝင်ရန် သင့်အခြေအနေပေးချင်မှပေးမည်။ သို့သော် သိုးလိုစိတ်ထားရှိလူတစ်ဦး သို့မဟုတ် မိသားစုတစ်ခုကို အသက်လမ်းပေါ်မြဲမြံစွာရပ်တည်နိုင်ရန်ကူညီပေးနိုင်ခြင်းသည် ကြွယ်ဝသည့်ကောင်းချီးမဟုတ်ပေလော။ တစ်အိမ်တက်ဆင်းအမှုဆောင်ခြင်းနှင့်လည်ပတ်မှု၊ သင်အံမှုတို့တွင် ကြိုးစားလုပ်ဆောင်ရခြင်းသည် မည်မျှစိတ်အားတက်ကြွဖွယ်ပါတကား။
၃ ထပ်ဆင့်အကျိုးကျေးဇူးများ။ စိုးလ်အပြည့်အမှုဆောင်ခြင်း၏ တန်ဖိုးမဖြတ်နိုင်သောအကျိုးကျေးဇူးတစ်ခုမှာ ယေဟောဝါနှင့်ယေရှုတို့၏လုပ်ဖော်ဆောင်ဖက်အဖြစ် ကိုယ်တော်တို့နှင့်ပို၍အကျွမ်းဝင်ခွင့်ရခြင်းဖြစ်သည်။ (မ၊ ၁၁:၂၉၊ ၃၀။ ၁ ကော၊ ၃:၉) ဓမ္မအမှုတွင် ဘုရားသခင့်ဝိညာဉ်တော်သင့်ကိုကူညီနေကြောင်းခံစားရခြင်းသည် ဝမ်းမြောက်ဖွယ်ပါတကား။ (မ၊ ၁၀:၂၀။ ယော၊ ၁၄:၂၆) ထို့အပြင် အသင်းတော်ရှိအခြားသူတို့နှင့်ရင်ဘောင်တန်း၍ ကြိုးစားအားထုတ်အမှုဆောင်ခြင်းဖြင့် ကျွန်ုပ်တို့၏မေတ္တာနှင့်စည်းလုံးမှုနှောင်ကြိုးကို ပိုမိုခိုင်မာစေသည်။
၄ ဤနောက်ဆုံးကာလတွင် အလိုတော်ပြည့်စုံရန် ယေဟောဝါအသုံးပြုသောအဖွဲ့အစည်းကို အပြည့်အဝထောက်ခံအားပေးမှုမရှိဘဲ အကျိုးကျေးဇူးအပြည့်အဝမရရှိနိုင်ပါ။ (၄ ရာ၊ ၁၀:၁၅ နှင့်နှိုင်းယှဉ်ပါ။) ကျွန်ုပ်တို့သည်ဘုရားသခင်အစီအစဉ်မှလမ်းညွှန်မှုအတိုင်း တစ်သဝေမတိမ်းနှလုံးအပြည့်အဝလိုက်လျှောက်ပြီး အသင်းတော်လှုပ်ရှားမှုများတွင် တက်ကြွစွာပါဝင်မည်ဆိုလျှင် ဝိညာဉ်ရေးအရ စာတန်၏စဉ်းလဲသောအကြံအစည်များမှကာကွယ်ခံရပေမည်။ သို့ဖြင့်ကျွန်ုပ်တို့သည် ဓမ္မအမှုဆောင်ခြင်းတွင် ပိုမိုအကျိုးဖြစ်ထွန်းစွာပါဝင်နိုင်ပေသည်။
၅ ဤအပိုင်း ၅ ပိုင်းပါအခန်းဆက်ဆောင်းပါးသည် အရေးကြီးအချက်ပေါင်းများစွာကိုပေါ်လွင်စေခဲ့ပြီ။ ယေဟောဝါအား ကျေးဇူးတင်လေးမြတ်စိတ်ကိုတည်ဆောက်ရန်သော့ချက်ကားအဘယ်နည်း။ လူတစ်ဦး စိုးလ်အပြည့်အဝဖြင့်လုပ်ဆောင်ရန် အဘယ်အရာကလှုံ့ဆော်ကြောင်းသင်မှတ်မိသလော။ (ဇူလိုင်လထုတ်) လယ်ကွင်းဓမ္မအမှုတွင်စိတ်အားတက်ကြွရန် ပြင်ဆင်မှုအဘယ်ကြောင့်လိုအပ်သနည်း။ (ဩဂုတ်) အတွေ့အကြုံများသောကြေညာသူက အခြားသူတို့ကို စိုးလ်အပြည့်အဝဖြင့်လုပ်ဆောင်ရန် မည်သို့ကူညီနိုင်သနည်း။ (စက်တင်ဘာ) ဓမ္မအမှုတွင်စိုးလ်အကြွင်းမဲ့ပါဝင်နိုင်ရန် ကိုယ်ပိုင်အစီအစဉ်ကောင်းများချမှတ်ခြင်းသည် မည်သို့အကူအညီဖြစ်စေသနည်း။ (အောက်တိုဘာ) ဤအကြံပေးချက်များကို သင်ကျင့်သုံးနေပါသလော။
၆ ယေဟောဝါကိုနာခံခြင်းမှ ကျွန်ုပ်တို့အကျိုးခံစားရရန် ကိုယ်တော်အလိုတော်ရှိတော်မူ၏။ (ဟေရှာ၊ ၄၈:၁၇) ထို့အပြင် စိုးလ်အပြည့်အဝလုပ်ဆောင်ခြင်းသည် နားထောင်သူကိုပါအကျိုးဖြစ်ထွန်းစေသည်။ (၁ တိ၊ ၄:၁၅၊ ၁၆) ယခုသင်လုပ်ငန်းတော်၌ကြိုးစားပါဝင်ခြင်းကို ယေဟောဝါစောင့်ကြည့်နေတော်မူပြီး ထာဝရအသက်တည်းဟူသော “အမွေတော်ဆိုင်ရာအကျိုးကိုသင်ရ” ရန်စိတ်ချနိုင်သည်။—ကော၊ ၃:၂၃၊ ၂၄။